स्पर्स लघुवित्त तेस्रो बर्षमा, विपन्न परिवारका ८४ जना छोरीहरुलाई छात्रवृत्ति वितरण
काठमाडौँ । स्पर्स लघुवित्त वित्तीय संस्था लिमिटेड स्थापनाको दोस्रो बर्ष पूरा गरी तेस्रो बर्षमा प्रवेश गरेको छ । बार्षिकोत्सवको अवसरमा वित्तीय संस्थाले संस्थागत सामाजिक उत्तरदायित्व अन्तर्गत हाल सञ्चालनमा रहेका विभिन्न २० वटा शाखा कार्यालयहरु मार्फत वित्तीय संस्थामा आवद्ध ग्राहक सदस्यहरुका ८४ जना विपन्न परिवारका छोरीहरुलाई छात्रवृत्ति वितरण गरेको छ । यसका साथै शाखा कार्यालयहरु आसपासका विभिन्न सामुदायिक विद्यालयहरुका छात्रछात्राहरुलाई शैक्षिक सामाग्री वितरण, नगर-टोल सरसफाई कार्यक्रम, वृद्धवृद्धाहरुलाई फलफुल वितरण तथा फरक रुपमा सवल व्यक्तिहरुलाई खाद्यान्न वितरण गरेको वित्तीय संस्थाका प्रमुख कार्यकारी अधिकृत सजल खड्काले बताए ।
कास्कीका छिनेडाँडामा कामना सेवाकोे ९४औं शाखा बिस्तार
काठमाडौँ । कामना सेवाविकास बैंक लिमिटेडले कास्की जिल्लाको पोखरा महानगरपालिका वडा नं. १४ स्थित छिनेडाँडामा असार २९ गते ९४औँ शाखा कार्यालय स्थापना गरी कारोबार शुरु गरेको हो । बैंकका सञ्चालक चतुराखर अधिकारी, संचालक देवकृष्ण काफ्ले तथा गण्डकी प्रदेश प्रमु्ख टुबराज बास्तोलाले संयुक्त रुपमा कारोबार सुभारम्भ गरेका हुन् ।
सांग्रिला डेभलपमेन्ट बैंकबाट महालक्ष्मीको बीमा सेवा पाइने
काठमाडौँ । सांग्रिला डेभलपमेन्ट बैंक लिमिटेड र महालक्ष्मी लाईफ ईन्स्योरेन्स लिमिटेडबीच जीवन बीमा सेवा सम्बन्धी सम्झौता भएको छ । सम्झौता पत्रमा बैंकको तर्फबाट प्रमुुख कार्यकारी अधिकृतसुयोग श्रेष्ठ र महालक्ष्मी लाईफ ईन्स्योरेन्स लिमिटेडका तर्फबाट उक्त कम्पनीका प्रमुख कार्यकारी अधिकृत रमेशकुमार भट्टराईले हस्ताक्षर गरेका छन् । उक्त सम्झौता अनुसार बैंकका ग्राहकहरुले ८६ वटै शाखा कार्यालयहरुबाट सहज रुपमा महालक्ष्मी लाईफ ईन्स्योरेन्स लिमिटेडको जीवन बीमा पोलिसीहरु खरिद गर्न सक्नेछन् ।
कर्मचारी सञ्चय कोषका कर्मचारीलाई चरक मेमोरियल हस्पिटलमा विशेष छुट
काठमाडौँ । पोखराको चरक मेमोरियल हस्पिटल प्रालि र कर्मचारी सञ्चय कोष बीच सम्झौता भएको छ । कर्मचारी सञ्चय कोषका सम्पूर्ण कर्मचारी तथा सञ्चयकर्ताले चरक मेमोरियल हस्पिटल पोखरामा लाग्ने उपचार खर्चमा विशेष छुट दिने सम्बन्धी सम्झौता भएको हो । उक्त सम्झौतामा कर्मचारी सञ्चय कोषको तर्फबाट पोखरा शाखाका शाखा प्रमुख दिलिपराज पौडेल र चरक मेमोरियल हस्पिटलको तर्फबाट अध्यक्ष डा. बद्री पौडेलले सम्झौता पत्रमा हस्ताक्षर गरेका छन् । यो सम्झौता अनुसार चरक मेमोरियल हस्पिटल पोखरामा उपचार गराउँदा कर्मचारी सञ्चय कोषका सञ्चयकर्ता तथा कर्मचारीहरुले सम्पूर्ण प्रकारका उपचार शुल्कमा १० प्रतिशत र औषधी खरिदमा ५ प्रतिशत छुट प्राप्त गर्ने बताइएको छ । यो सम्झौताले कर्मचारी सञ्चयकोषका ६ लाख सञ्चयकर्ता तथा कर्मचारीहरु लाभान्वित हुने बताइएको छ ।
हङकङ, युएई र जोर्डनबाट पनि मेगा बैंकको ‘मेगा रेमीट’ सेवा
काठमाडौँ । मेगा बैंक नेपाल लिमिटेडले एकैपटक तीन वटा देशमा ‘मेगा रेमीट’ सेवालाई विस्तार गरेको छ । हङकङ, युएई र जोर्डनमा मेगा रेमीटको सञ्जाल विस्तार गरिएको हो । हङकङबाट नेपालीहरुले अब ई-पे लिमिटेडबाट मेगा रेमीटमार्फत स्वदेशमा रकम पठाउन सक्नेछन् । युएईबाट सराफ एक्सचेन्जबाट मेगा रेमीटमा रकम पठाउन सकिने बैंकले जनाएको छ । यसैगरी, जोर्डनको अल अलाउनी एक्सचेन्ज र मेगा बैंकबीच रेमीट कारोबारसम्बन्धी सम्झौता भएको छ । हङकङको ई–पे लिमिटेड, युएईको सराफ एक्सचेन्ज र जोर्डनको अल अलाउनी एक्सचेन्जबाट पठाएको रकम मेगा बैंक र देशभर छरिएका मेगा बैंकका २५ सय भन्दा बढी एजेण्टमार्फत तुरुन्तै भुक्तानी लिन सकिने मेगा बैंकले जनाएको छ ।
आईएमई जनरल र नेपाल इन्स्योरेन्सले मर्जरकाे काम थाले, स्वाप रेसियाे बराबर हुन सक्ने
काठमाडौं । बैंकिङ क्षेत्रमा मर्जर कार्यको अगुवाई गर्दै अगाडि बढेको आईएमई समूहले बीमा क्षेत्रमा पनि मर्जरको अगुवाई गर्ने सम्भावना बढेको छ । आईएमई समूहको मुख्य लगानी रहेको आईएमई जनरल इन्स्योरेन्स कम्पनी र आईएमई समूहले प्रवर्द्धक सेयरमा लगानी गरेको नेपाल इन्स्यारेन्स कम्पनी दुबैले मर्जरको गृहकार्य थालनी गरेका छन् । आईतबार सम्पन्न आईएमई जनरल इन्स्योरेन्स कम्पनीको साधारणसभाले उपयुक्त पार्टनर खोजी मर्जरमा जान सञ्चालक समितिलाई अख्तियारी दिएको छ । साधारणसभाले उपयुक्त कम्पनीसँग गाभ्न, गाभिन र प्राप्ति गर्न सञ्चालक समितिलाइ अक्तियार दिएकाे छ । उता नेपाल इन्स्योरेन्स कम्पनीले मर्जरमा जानको लागि आवश्यक अध्ययन गर्न र सुझाव दिन एक कमिटि गठन गरी काम थालेको छ । यस कम्पनीले पनि साउन महिना गर्न लागेकाे साधारणसभा मर्जर सम्बन्धि विशेष प्रस्ताव लैजाने भएकाे छ । दुई कम्पनीका केही प्रमोटर, विजनेशनको साईज, नाफा, सेयरको बजार मूल्य लगायत धेरै सूचकाङ्कमा समानाता रहेकोले दुई कम्पनीबीच मर्ज सहज हुने बताइएको छ । आईतबार सम्पन्न आईएमई जनरल इन्स्योरेन्स कम्पनीको साधारणसभाले कम्पनले ५ प्रतिशत बोनस सेयर पारित गरेको छ । बोनस सेयर पारितपछि कम्पनीको चुक्ता पुँजी १ अर्ब ५ करोड रुपैयाँ हुनेछ । उता नेपाल इन्स्योरेन्स कम्पनीले पनि आईतबार नै बोनस सेयर घोषणा गरेको छ । कम्पनीले ७.५ प्रतिशत बोनस सेयर दिने निर्णय गरेको छ । बोनस सेयर वितरणपछि कम्पनीको चुक्ता पुँजी १ अर्ब ९ करोड ५५ लाख रुपैयाँ हुनेछ । दुई कम्पनी मर्ज हुँदा चुक्ता पुँजी करिव २ अर्ब १५ करोड हुन्छ । विजनेशन साढे २ अर्ब रूपैयाँ बराबर हुनेछ । दुई कम्पनीको चालु आर्थिक वर्षको विजनेश पनि समान देखिएको छ । गत शुक्रबारसम्म आईएमई जनरल इन्स्योरेन्स कम्पनीले १ अर्ब २१ करोड प्रिमियम संकलन गरेको छ । त्यस्तै, नेपाल इन्स्योरेन्स कम्पनीले शुक्रबारसम्म १ अर्ब १८ करोड प्रिमियम संकलन गरेको छ । दुई कम्पनीबीच स्वाप रेसियो बराबरीको हाराहारीमा हुने देखिएको छ । आईतबार सेयर बजारमा आईएमई जनरल इन्स्योरेन्सको सेयर प्रतिकित्ता ३५४ रुपैयाँमा कारोबार भयो भने नेपाल इन्स्योरेन्स कम्पनीको सेयर प्रतिकित्ता ३५३ रुपैयाँमा कारोबार भएको छ । आईएमई जनरल इन्स्योरेन्स कम्पनीमा आईएमई समूहमा आवद्ध व्यक्ति तथा कम्पनीहरुको सेयर झण्डै ७० प्रतिशत रहेको बताईएको छ । उता नेपाल इन्स्योरेन्स कम्पनीमा आईएमई समूह र आईएमई समूहसँग विजनेश साझेदारीमा हातेमालो गर्दै आएको विशाल ग्रुपमा सेयर लगानी झण्डै ३० प्रतिशत छ । बीमा समितिले मर्जरलाई प्रोत्साहित गर्ने नीति लिएपछि यी दुबै कम्पनी मर्जरमा जाने गृहकार्यमा जुटेका छन् । बीमा समितिले पनि क्रसहाेल्डिङ भएका कम्पनीबीच मर्ज गराउन दवाव दिने तयारी गर्दैछ । आईएमई समूह र विकाल समूह दुबैसँग बैकिङ क्षेत्रमा मर्जर गरी सफलता हासिल गरेको अनुभव छ । नाममा सहमति जुट्न कठिन अरु विषयमा दुई कम्पनीबीच मर्जरको लागि ठूलो समस्या नदेखिए पनि नाम टुङ्गो लगाउन भने निकै सकस हुने देखिएको छ । ‘नेपाल इन्स्योरेन्स’ नेपालको पहिलो इन्स्योरेन्स कम्पनी हो । यसका नाम र इतिहास दुबै राम्रो छ । उता आईएमई जनरल इन्स्योरेन्स कम्पनीले पनि ब्राण्ड इमेज बनाउन विगत एक वर्षमा धेरै पैसा खर्च गरेको छ । आईएमई रेमिट, ग्लोवल आईएमई बैंक, ग्लोबल आर्ईएमई क्यापिटल, आईएमई लाइफ इन्स्याेरेन्स हुँदै आईएमई जनरल इन्स्योरेन्सको नाममा व्यवसायिक सफलता चुम्दै आएको आईएमई समूहको लागि यो नाम छोड्न सहज हुनेछैन । अन्ततः नेपाल आईएमई इन्स्याेरेन्स वा आईएमई नेपाल इन्याेरेन्स नाममा सहमति जुट्न सक्ने जानकारहरू बताउँछन् ।
सन नेपालले गर्यो २६ लाख ३४ हजार रुपैयाँ मृत्यु दावी भुक्तानी
काठमाडौ । सन नेपाल लाइफ इन्स्योरेन्स कम्पनीले मृत बिमितको २६ लाख ३४ हजार रुपैयाँ भुक्तानी गरेको छ । कम्पनीले ५ जना मृत बिमितको रकम भुक्तानी गरेको हो । मृत्युवरण गर्ने बिमितहरु मध्येमा महिलाको भन्दा पुरुषको संख्या धेरै देखीएको छ । १ जना महिला बिमितले मृत्युवरण गर्दा ४ जना पुरुष बिमितले मृत्युवरण गरेका छन् । मृत्युवरण गर्ने बिमितहरु कैलाली, रुकुम, रुपन्देही, महोत्तरी र कञ्चनपुरका रहेका छन् । मृत्युवरण गर्ने बिमितहरु व्यापार व्यसायदेखी शिक्षण पेशामा आवद्ध रहेको थिए । ३ जना बिमितले व्यापार व्यवसाय गर्दै आएका थिए भने १ जना शिक्षण पेशामा आवद्ध रहेका थिए । सन नेपाल लाईफका प्रमुख कार्यकारी अधिकृत (सिईओ) राजकुमार अर्यालले आफूहरुले ग्रामीण क्षेत्रलाई प्राथमिकतामा राख्दै आएपनि देशैभर नै सेवा प्रदान गर्दै आएको बताए । सन नेपाल लाइफका प्रडक्टहरु कम्पनीले धनलक्ष्मी जीवन बीमा, सामूहिक म्यादी जीवन बीमा, बाल समृद्ध जीवन बीमा, धनाधन्य जीवन बीमा, नविकरण म्यादी जीवन बीमा, भाग्योदय जीवन बीमा, नबिन आजिवन जीवन बीमा, सनलाईफ इन्डोमेन्ट एन्स्योरेन्स प्लान, सार्थक आजीवन जीवन बीमा शीर्षकमा बीमा गराउँदै आएको छ । साथै, सन नेपाल लाईफ इन्स्योरेन्स कम्पनीले दैनिक ५ रुपैयाँ बीमा शुल्क तिरेर बीमा गर्न मिल्ने पोलिसी बजारमा ल्याएको छ । सो बीमा मार्फत बिमितले १८ घातक रोगहरुमा ५ लाख रुपैयाँ उपचार खर्च पाउने छन् । त्यस्तै, ५ लाख बिमाङ्कको ५ वर्षे म्यादी जीवन बीमा दैनिक ५ रुपैयाँ बीमा शुल्कमै गर्न मिल्ने व्यवस्था कम्पनीले ल्याएको छ । बीमा अवधि भित्र करारमा उल्लेखित १८ किसिमका घातक रोग लागेकोे निरुपण भएमा बीमाङ्क रकम बराबर अधिकतम ५० लाख रुपैयाँसम्म बीमा गर्न सकिने जनाएको छ । दैनिक ५ रुपैयाँ भनिएको बीमा शुल्कमा बिमितको उमेर समूहले केही थपघट हुने कम्पनीले जनाएको छ । सन नेपाल लाइफका शाखा सञ्जालहरु सन नेपाल लाइफ इन्स्योरेन्स कम्पनीले २० वटा शाखाहरुबाट बीमा सेवा प्रदान गर्दै आएको छ । इन्स्योरेन्स कम्पनीले सार्वजनिक गरे अनुसार देशको विभिन्न स्थानबाट बीमा सेवा प्रदान गर्दै आएको छ । लगनखेल, धनगढी, डडेलधुरा, सुर्खेत, नेपालगञ्ज, दाङ, बुटवल, पोखरा, सूर्यविनायक, नारायणगढ, बनेपा, काठमाडौ, वीरञ्ंज, लाहान, जनकपुर, धरान, बसन्तपुर, ईटहरी, दमक, बिर्तामोडबाट जीवन बीमा सेवा प्रदान गर्दै आएको कम्पनीले जनाएको छ ।
झिनो अंकले बढ्यो नेप्से, कारोबार रकम भने न्यून
काठमाडौँ । साताको पहिलो दिन आइतबार सेयर बजार झिनो अंकले बढेको छ । आज ०.९५ अंकले नेप्से बढेको हो । ०.०८ प्रतिशतले बढ्दा परिसूचक १२४९.४९ विन्दुमा पुगेको छ । आज १६१ कम्पनीका १० लाख ४२ हजार ६ सय ४६ कित्ता सेयर किनबेच हुँदा २८ करोड ५२ लाख १४ हजार ५ सय ७२ रुपैयाँ बराबरको कारोबार भएको नेपाल स्टक एक्सचेञ्ज लिमिटेड(नेप्से)ले जनाएको छ । नेप्से झिनो अंकले बढेपनि कारोबार रकममा भने गिरावट आएको छ । आइतबार ६ सूचकमा हरियाले छायो भने बाँकी राताम्मे भए । बैंकिङ समूह ०.६१, वित्त समूह १.६१, निर्जीवन बीमा समूह ०.१२, उत्पादनमूलक समूह २.५३ र वित्त समूह ०.४७ अंकले घट्यो भने होटल समूह ११.९६, विकास बैंक समूह ८.८५, लघुवित्त समूह ०.९४, अन्य समूह २.२५, जीवन बीमा समूह ३२.५२ र म्युचुअल फण्ड ०.०३ अंकले बढेका हुन् । आज माहुली सामुदायिक लघुवित्त वित्तीय संस्था लिमिटेडका सेयरधनीले सबैभन्दा बढी ९.९० प्रतिशतले नाफा कमाएका छन् भने मल्टीपर्पोज फाइनान्स कम्पनी लिमिटेडका लगानीकर्ताले सबैभन्दा बढी ८.२७ प्रतिशतले घाटा व्यहोरेका छन् ।
