अल्पायुमै साहित्यकार अप्सराको निधन
हेटौंडा । मकवानपुरकी लोकप्रिय साहित्यकार अप्सरा तिम्सिनाको आइतबार राती निधन भएको छ । स्नानकक्षमा लडेर सामान्य घाइते भएकी ४५ वर्षीया तिम्सिनाको ज्वरो आउने, पेट दुख्ने तथा जिउ गल्ने समस्याका कारण हेटौँडाको चुरेहिल अस्पतालमा भर्ना गरिएको थियो । थप उपचारका लागि आइतबार नै भरतपुर लगिएकोमा राति उहाँको निधन भएको पारिवारिक स्रोतले जनाएको छ । विभिन्न पत्रपत्रिकामा दर्जनौँ फुटकर कविता र कथा प्रकाशित गरेकी तिम्सिनाको ‘नदी किनाराका आभास’ कविता सङ्ग्रह र ‘अभ्यन्तर’ कथा सङग्रह प्रकाशित छन् । उनी आँचल साहित्य कला पुञ्ज मकवानपुरको अध्यक्ष थिए उनको निधनले मकवानपुरको साहित्य क्षेत्रमा ठूलो क्षति भएको साहित्यकारले बताएका छन् । “लामो समयदेखि साहित्य क्षेत्रमा लाग्नुभएकी तिम्सिनाले साहित्य क्षेत्रमा दुई वटा गहकिला पुस्तक र सयौँ कथा कविता छोडेर अल्पायुमा बिदा हुनुभयो”, सहकर्मी साहित्यकार भावना तिम्सिनाले भने । उनको निधन पत्याउनै नसकिने दुखद् घटना भएको साहित्य सङ्गम मकवानपुरका अध्यक्ष निमेष निखिलले बताए । उनको आजै गोरक्षेश्वर घाट हेटौँडामा दाहसंस्कार गरिने पारिवारिक स्रोतले जनाएको छ । रासस
नेपाल राष्ट्र बैंकले सोमबार १० कराेडको ट्रेजरी बिल बिक्री गर्ने
काठमाडौँ । नेपाल राष्ट्र बैंकले सोमबार रु १० कराेड बराबरको ट्रेजरी बिल बिक्री गर्ने भएको छ । बैंकले बोलकबोलकको माध्यमबाट ट्रेजरी बिल बिक्री गर्ने भएको छ । बैंकले उक्त प्रक्रियामा सहभागी भई ट्रेजरी बिल खरिदका लागि आग्रह गरेको छ । बैंकले यसअघि पनि यही साउन ६ गते ट्रेजरी बिल बिक्री गरेको थियो ।
होमस्टेमा पर्यटकको आकर्षण, सामुदायिक होमस्टेमा थपिंदैछ ७ नयाँ घर
भीमदत्तनगर । रानाथारु समुदायद्वारा सञ्चालित ‘रानाथारु सामुदायिक होमस्टे’ आन्तरिक तथा बाह्य पर्यटकले खचाखच भरिएको छ । कञ्चनपुरको भीमदत्तनगरपालिका–१४ नयाँ बस्तीका रानाथारु समुदायले चलाएको उक्त होमस्टे (घरबास) २०७२ सालमा स्थापना गरिएको हो । तीन वर्षमा छ हजार ६०० भन्दा बढी आन्तरिक तथा बाह्य पर्यटकले उक्त होमस्टेको भ्रमण गरिसकेका छन् । सुदूरपश्चिम प्रदेशकै प्रख्यात पर्यटकीय गन्तव्य शुक्लाफाँटा राष्ट्रिय निकुञ्ज र महाकाली नदीमा बनेको एशियाकै लामो झोलुङ्गे पुलको बीच भागमा रानाथारु होमस्टे सञ्चालनमा छ । गत आर्थिक वर्षमा मात्रै दुई हजारभन्दा बढी पर्यटकले होमस्टेको अवलोकन गरेको सो होमस्टेका सचिव चेतराम रानाले जानकारी दिए । “पर्यटकहरु यहाँ बास बसेर यस वरपरको पर्यटकीय क्षेत्र अवलोकन गरी भारतीय शहर घुम्न जाने गरेका छन्”, उनले भने । बाह्यभन्दा आन्तरिक पर्यटक समूहमा धेरै आउने गरेको उनी बताउँछन् । तीन वर्षको अवधिमा होमस्टेमा रु २९ लाख ५१ हजारको कारोवार भएको छ । यहाँ आउने पर्यटक भारतको नैनीताल, अल्मोडा, देहरादुन, मन्सुरी, चण्डीगढ, सिमलालगायत पर्यटकीय शहर घुम्न जाने गरेका छन् । “यहाँ बास बसेर भारततर्फ घुम्न जाने गरेका छन्”, सचिव रानाले भने । कैलालीको भादा, बर्दियाको डल्ला, चितवनलगायत देशका अन्य क्षेत्रमा थारुचौधरीलगायत जातिले आफ्नो समुदायमा होमस्टे सञ्चालनमा ल्याएका छन् । कैलाली र कञ्चनपुरमा रानाथारु समुदायले होमस्टे सञ्चालन गरेको यहीँ मात्र हो । “कला संस्कृतिको संरक्षण एवं पर्यटन प्रवद्र्धनका लागि होमस्टे शुरु गरेका हौँ ”, रानाले भने । विभिन्न दातृ निकायको सहयोगमा कञ्चनपुरको शुक्लाफाँटा र कृष्णपुरमा चौधरी समुदायले होमस्टे सञ्चालन गरे पनि फष्टाउन सकेको छैन । शुक्लाफाँटा निकुञ्जसित जोडिएको राना होमस्टेमा गत वैशाख यता पर्यटकलाई राख्न नसकिएको सचिव रानाको भनाइ छ । “सात घर नयाँ बनाउँदैछौँ”, उनले भने, “असोजदेखि सञ्चालनमा ल्याउँछौँ ।” होमस्टेमा आउने जोकोही पाहुनाले थारु समुदायको पहिरनसहितको परम्परागत नाच अवलोकन गर्न पाउनुका साथै विभिन्न थारु परिकार खान पाउने छन् । तराई भू–परिधी कार्यक्रम(ताल) को प्राविधिक तथा अन्य सहयोगमा शुरु गरिएको होमस्टे सञ्चालनका लागि शुक्लाफाँटा मध्यवर्ती व्यवस्थापन समितिले आवश्यक सहयोग गर्दै आएको छ । होमस्टेमा आउने जोकोही पाहुनाले थारु समुदायको पहिरनसहितको परम्परागत नाच अवलोकन गर्न पाउनुका साथै विभिन्न थारु परिकार खान पाउने छन् । “पाहुनाको स्वागत गर्न होली नाँच, राजनी नाँचलगायत परम्परागत नाँच प्रस्तुत गछौँ”, उनले भने, “तितौला, सिमही, मिसौला, पपरा, कत्तरालगायत परिकार खुवाउँछौँ ।” पर्यटक सूचना केन्द्र कार्यालय सहायकका भरमा सुदूरपश्चिम प्रदेशको प्रमुख नाका गड्डाचौकी भारतसित जोडिएको छ । नेपाल भित्रिने बाह्य पर्यटकलाई यहाँको बारेमा जानकारी दिने उद्देश्यले २०६१ सालमा गड्डाचौकीमा नेपाल पर्यटन बोर्डको पर्यटक सूचना केन्द्र स्थापना गरिएको हो । पाँच वर्षदेखि उक्त कार्यालय सहायकका भरमा सञ्चालनमा छ । यहाँ थानेश्वर लेखक कार्यालयक सहायकका रुपमा काम गर्दै आएका छन् । “पर्यटन भ्रमण वर्षको चर्चा चुलिँदा पर्यटकलाई विभिन्न गन्तव्यका बारेमा सूचना दिने कार्यालय रित्तो छ, आवश्यक कर्मचारी नहुँदा अनेकन समस्या आउने गरेका छन्”, कार्यालय सहायक लेखकले पीडा सुनाए, “केन्द्रलाई कार्यालयमा हाकिम चाहियो, कर्मचारी अभाव छ भनेर पटक–पटक ताकेता गर्दै आए पनि सुनुवाइ भएको छैन ।” यहाँ पाँच वर्षदेखि कार्यालय प्रमुखविहीन छ । प्रमुख नहुँदा कार्यालयको नियमित कामकारवाही प्रभावित बनेको उनले बताए । “मैलै सक्दो प्रचारप्रसार गरकै छु, एक्लैले पर्यटकलाई सूचना दिन निकै गाह्रो छ”, लेखकले भने । यहाँ बास बसेर यस वरपरको पर्यटकीय क्षेत्र अवलोकन गरी भारतीय शहर घुम्न जाने गरेका छन् । गड्डाचौकीस्थित अध्यागमन कार्यालयले दिएको जानकारी अनुसार सन् २०१८ मा यहाँबाट दुई हजार ९३० बाह्य पर्यटक नेपाल भित्रिएका थिए । दुई हजार २२२ बाह्य पर्यटक बाहिरिएको तथ्याङ्क छ । यहाँ भ्रमणमा आउनेमा अमेरिका, फ्रान्स, जर्मन, बेलायतलगायत देशका नागरिक रहेका छन् । अध्यागमन कार्यालयका निमित्त प्रमुख पदमराज भट्टले सन् २०१९ को जुलाइसम्ममा एक हजार पाँच सय ९८ बाह्य पर्यटक गड्डाचौकी भएर भित्रिएका छन् भने एक हजार दुई सय ८५ पर्यटक बाहिरिएका छन् । “यहाँ आउने बाह्य पर्यटक काठमाडौंँ, पोखरा र बर्दिया बढी घुम्न जाने गरेका छन्”, उनले भने । रासस
कक्षा १२ को परीक्षाफल आज, चार लाख ३५ हजार विधार्थी प्रतिक्षामा
काठमाडौँ । कक्षा १२ को परीक्षाफल आज साँझसम्म प्रकाशन हुने भएको छ । राष्ट्रिय परीक्षा बोर्डले यस वर्षको माध्यमिक शिक्षा उतीर्ण परीक्षा (एसएलसीई) कक्षा १२ को नतिजा आज प्रकाशन हुने जनाएको छ । बोर्डले साँझ ५ बजे सम्ममा सबै विषयको नतिजा प्रकाशन गर्ने तयारी गरेको परीक्षा नियन्त्रण कृष्णप्रसाद शर्माले बताए । नतिजा प्रकाशनका लागि आजै बोर्ड बैठक बोलाइएको छ । यस वर्ष चार लाख ३५ हजार विद्यार्थी कक्षा १२ को परीक्षामा सहभागी भएका छन् ।
६ वर्षमा पनि बनेन कमलविनायक-नगरकोट सडक, स्थानीयवासी आक्रोशित
नगरकोट । ठेक्का भएको छ वर्षसम्म पूरा हुन नसकेको पर्यटकीयस्थल कमलविनायक-नगरकोट सडकको प्रतिनिधिसभाको विकास तथा प्रविधि समितिले आइतबार स्थलगत अनुगमन गरेको छ । विसं २०७० मा शुरु भई दुई वर्षमा पूरा हुनुपर्ने १७ किमि सडक छ वर्ष बित्दा पनि निर्माण हुन नसक्दा पर्यटकमार्फत विश्वव्यापी रुपमा नकारात्मक सन्देश गएको स्थानीयवासीको गुनासो छ । राजधानी नजिकैबाट विश्वको सर्वोच्च शिखर सगरमाथाका साथै धेरै हिमाल एवम् सूर्योदयको दृश्य देखिने नगरकोट आन्तरिक एवं बाह्य पर्यटकको रोजाइमा पर्दै आएको छ । सडक अनुगमनपछि आयोजित अन्तरक्रिया कार्यक्रममा समिति सभापति कल्याणीकुमारी खड्काले सन् २०२० को नेपाल भ्रमण वर्षअगावै सडक कालोपत्र पूरा गर्न सम्बन्धित सरकारी निकायलाई निर्देशन दिए । चाँगुनारायण नगरपालिकाका नगरप्रमुख सोमप्रसाद मिश्रले ठाउँ ठाउँमा खाल्डाखुल्डी भएको सडकमा दुर्घटना भई धेरैले जीवन गुमाउनु परेको, पर्यटन व्यवसायमा नकारात्मक प्रभाव परेकाले अब थप भएको समयमा निर्माण पूरा नगरे कडा कदम चाल्न बाध्य हुनुपर्ने बताए । रु ३७ करोड ८७ लाखमा शैलुङ कन्स्ट्रक्सनले निर्माण जिम्मा पाएको सडक किनारमा बनेका ड्रेनलगायत संरचना गुणस्तरीय नहुँदा सम्पन्न नभई भत्कन थालेको सडक निर्माण दबाब समिति संयोजक राजकुमार लामिछानेले गुनासो गरे ।
वैदेशिक रोजगारीको नाममा ठगी, अढाई लाखदेखि चार लाखसम्म उठाएर भरत र भोपाल फरार
गाईघाट । वैदेशिक रोजगारीका नाममा उदयपुर जिल्लाभित्रका केही दलालले जिल्लाका युवालाई अफगानिस्थानदेखि युरोप पठाइदिन्छु भन्दै करोडौँ रकम असुलेर फरार भएपछि उदयपुर जिल्लाका तीन दर्जनभन्दा बढी युवा ठगिएका छन् । जिल्लाको त्रियुगा नगरपालिका–७ सहरेका भरत मगर र लिम्चुङबुङ गाउँपालिका जाँतेका भोपाल थापाले जिल्लाका साउने, खाबु, त्रियुगा नगरपालिका, जाँते, लाफागाउँ, चुहाडे क्षेत्रका तीन दर्जन युवालाई विदेश पठाइदिने भन्दै करोडौँ रकम असुलेर बेपत्ता भएपछि आफूहरु ठगिन पुगेको पीडित युवाको गुनासो रहेको छ । जिल्लाका पीडितमध्येका हरिबहादुर कार्कीका अनुसार कसैलाई युरोप, कसैलाई दुबई र अफगानिस्थान पठाइदिने भनेर आफूहरुबाट रु अढाइ लाखदेखि चार लाखसम्म रकम उठाएर मगर र थापा अहिले सम्पर्कविहीन भएका छन् । अर्का पीडित अमृत आलेमगरले काठमाडौँस्थित सिनामङ्गलमा रहेको भेरी ओभरसिज मार्फत आफूहरुलाई विदेश पठाइदिने भन्दै आफूहरुबाट रकम असुलेर उनीहरु अहिले सम्पर्कविहीन भएको कारण आफूहरुको रकम डुबेको बताए । केही पीडित युवाले न्यायको लागि जिल्ला प्रशासन उदयपुरमा समेत निवेदन दिएको र आफूहरुलाई ठगी गर्नेविरुद्ध कारवाहीको लागि निवेदन दिएको बताउँछन् । यस विषयमा उदयपुरका प्रमुख जिल्ला अधिकारी ध्रुवबहादुर खड्का भन्नुहुन्छ, “केही युवा आफूहरु ठगिएको गुनासो लिएर प्रशासनमा आएको तर पठाउने कम्पनी आधिकारिक हो कि हैन, ती पठाउने व्यक्ति सम्बन्धित कम्पनीका हुन् कि हैनन भनेर बुझ्न र आधिकारिकता र कारवाहीका लागि क्षेत्रीय श्रम कार्यालय विराटनगरमा जान सुझाव दिएको छु ।” पीडित युवामा जिल्लाका विभिन्न स्थानका इन्द्र मगर, रामबहादुर मगर, गोविन्द मगर, सुपबहादुर मगर, अम्बर रिमाल, अमृत आले, हरिबहादुर कार्की, डम्बर मगर रहेका छन् । त्यसैगरी राजेश श्रेष्ठ, पूर्णथापा मगर, रामकुमार मगर, खगेन्द्र मगर, बमहादुर राईसहित तीन दर्जन युवा वैदेशिक रोजगारी पठाइदिने नाममा दलालबाट ठगिन पुगेको पीडितले बताएका छन् । विदेश पठाइदिने भन्दै पटक–पटक सबैबाट रु चार लाखसम्म रकम सङ्कलन गरेर अब तयारी रहनु भनेर उनीहरु हाल मोबाइलसमेत स्विचअफ गरेर बेपत्ता भएपछि आफूहरु ठगिएका रहेछौँ भनेर जानकारी भएको पीडित युवाले बताएका छन् । रासस
नेको इन्स्योरेन्सको साधारण सभा भदौ १४ मा, १२ प्रतिशत बोनस सेयर दिने प्रस्ताव पारित गरिने
काठमाडौँ । नेको इन्स्योरेन्स लिमिटेडको २३ औं वार्षिक साधारण सभा भदौ १४ गते हुने भएको छ । साउन १० गते बसेको सञ्चालक समितिको बैठकले साधारण सभाको मिति तोकेको हो । साथै बैठकले साधारण सभा प्रयोजका लागि भदौ ३ गतेदेखि साधारण सभा नभएसम्मको लागि सेयरधनी दाखिला खारेज बन्द गर्ने निर्णय गरेको छ । साधारण सभाबाट १२ प्रतिशत अर्थात १४ करोड ११ लाख ५३ हजार ४ सय ८ रुपैयाँ बराबरको बोनस सेयर वितरण गर्ने प्रस्ताव पारित गरिने कार्यसूची रहेको कम्पनी सचिव विष्णुप्रसाद धितालले जनाएका छन् ।
प्रुडेन्सियल इन्स्योरेन्सको साधारण सभा भदौ १ गते, बुक क्लोज कहिले ?
काठमाडौं । प्रुडेन्सियल इन्स्योरेन्स कम्पनी लिमिटेडको १७ औँ वार्षिक साधारण सभा भदौ १ गते हुने भएको छ । कम्पनी सञ्चालक समितिको आइतबार बसेको बैठकले दियालो लर्डस प्लाला, आर्दशनगर वीरगञ्जमा दिउँसो ३ बजे साधारण सभा गर्ने निर्णय गरेको हो । साधारण सभा प्रयोजका लागि साउन २० गतेदेखि भदौ १ गतेसम्म कम्पनीको सेयर दाखिला, खारेज दर्ता बन्द(बुक क्लोज) रहने कम्पनीले जनाएको छ । साधारण सभाले आव २०७४/०७५ को वार्षिक प्रतिवेदन र आव २०७४/०७५ को नाफा नोक्सान तथा आयव्यय हिसाव र सोही अवधिको नगद प्रवाह विवरण छलफल सहित पारित गर्ने कार्यसूची रहेको छ ।
