विकासन्युज

सिटिजन्स बैंक र म्याक्स मनिबीच रेमिटेन्स सम्झौता

काठमाडौं । सिटिजन्स बैंक इन्टरनेसनल र म्याक्स मनि ट्रान्सफरबीच रेमिटेन्स सम्झौता भएको छ । दुई कम्पनीले मलेसिया लगायत अन्य मुलुकबाट बैंकिङ् प्रणालि मार्फत पठाएको विप्रेषण रकम भुक्तानी दिने कार्यका लागि उक्त सम्झौता गरेका हुन् । यस सम्झौता बमोजिम अबम्याक्स मनि ट्रान्सफर मार्फत विदेशबाट नेपालमा पठाएको विप्रेषण रकम सिटिजन्स बैंकको ८९ वटा शाखाहरुबाट सजिलै भुक्तानी पाउन सकिने छ । जसबाट बैंकका ग्राहकहरु लाभान्वित हुने बैंकको विश्वास छ । हाल बैंकले ८९ वटा शाखा, ९० वटा एटिएम र १०३ वटा शाखा रहित बैंकिङ्ग एकाईहरुबाट करिब पाँच लाख ग्राहकलाई आधुनिक बैंकिङ्ग सेवाहरु प्रदान गर्दै आएको छ ।

कामना सेवा विकास बैंकले ल्यायो बीमा सहितको स्वर्णिम सुरक्षित प्लस बचत खाता

काठमाडौं । कामना सेवा विकास बैंकले बीमा सुविधा सहितको स्वर्णिम सुरक्षित प्लस बचत खाता सञ्चालनमा ल्याएको छ । बैंकले एभरेष्ट इन्स्योरेन्सको सहकार्यमा उक्त खाता सञ्चालनमा ल्याएको हो । यस खाता खोल्ने ग्राहकले ७ लाख रुपैयाँसम्मको दुर्घटना बीमा र १ लाख रुपैयाँसम्मको ओषधीउपचार बीमा सुविधा पाउने छन् । जसबाट ग्राहकले ठूलो लाभ लिन सक्ने र बैंकको व्यवसाय वृद्धिमा सहयोग पुग्ने संस्थाको विश्वास छ । विकास बैंकले हाल ११८ वटा शाखा तथा ६२ वटा एटीएम मार्फत ग्राहकहरुलाई आफनो सेवा तथा सुविधाहरु प्रदान गर्दै आएको छ । साथै, संस्थाले समय सापेक्ष आफ्ना सेवाहरु थप गर्दै जाने योजना रहेको जानकारी दिएको छ ।

नागरिक लगानी कोषले दर्ता गर्यो १० अर्बकाे स्टक डिलर कम्पनी

काठमाडौं । नागरिक लगानी कोष (सीआईटी)ले सेयर बजारमा आउने उथलपुथललाई स्थीरता प्रदान गर्न स्टक डिलर कम्पनी दर्ता गरेको छ । कोषले बुधबार(माघ २९ गते) मात्रै १० अर्बको उक्त कम्पनी दर्ता गरेको हो । यससँगै कम्पनीले आगामी साता अर्थात फागुनको पहिलो हप्तामा बोर्ड गठन गर्ने तयारी गरेको कोषका उपकार्यकारी निर्देशक डा. इन्द्रकुमार कट्टेलले जानकारी दिए । उनले भने- ‘सेयर बजारमा ठूलो घटबढ हुन नदिन स्टक डिलर स्थापना गर्न लागेका हौं, बजार धेरै घट्यो भने सेयर किन्ने र धेरै बढ्यो भने बेच्ने गरेर बजारलाई स्थायित्व प्रदान गर्ने काम डिलरले गर्नेछ ।’ कम्पनीको अधिकृत पुँजी १० अर्ब रुपैयाँ हुनेछ भने चुक्ता पुँजी ५ अर्ब रुपैयाँ हुनेछ । ४ वटा कम्पनीको लगानीमा खोलिएको उक्त कम्पनीमा सबैभन्दा बढी लगानी सीआईटीको रहेको छ । जसको ५१ प्रतिशत सेयर रहेको छ । त्यस्तै, नेपाल पुनर्बीमा कम्पनीको १० प्रतिशत, नेपाल दुरसञ्चार कम्पनी(एनटीसी) को ९ प्रतिशत र सर्वसाधारणको ३० प्रतिशत सेयर रहेको कोषले जानकारी दिएको छ । यस्तै, कम्पनीले बढीमा १० अर्ब रुपैयाँसम्म बजारबाट उठाउनेछ । स्टक डिलर कम्पनीले सेयर बजारमा करिब १५ अर्ब रुपैयाँ लगानी गर्नेछ । आफूसँग भएको ५ अर्ब रुपैयाँ र बजारबाट बास्केट फण्डको रुपमा उठाएको १० अर्ब रुपैयाँ लगानी गरेर सेयर बजारलाई स्थायित्व प्रदान गर्ने काममा कोष लागेको कोषका उपकार्यकारी निर्देशक कट्टेलले जानकारी दिए ।

एन प्याब्सनकाे सबै बैंकिङ्ग कारोबार अबदेखि प्रभु बैंक मार्फत

काठमाडौं । निजी क्षेत्रका विद्यालयहरुको छाता संगठन एन प्याब्सनको बैंकिङ्ग कारोबार प्रभु बैंक मार्फत गर्ने सम्झौता भएको छ । प्रभु बैंक लिमिटेडको प्रधान कार्यालय बबरमहल काठमाण्डौमा आज एक समारोहका विच सम्पन्न उक्त सम्झौतामा प्रभु बैंकका तर्फबाट प्रमुख कार्यकारी अधिकृ अशोक शेरचन र एन प्याब्सनका तर्फबाट अध्यक्ष विष्णु पराजुलीले हस्ताक्षर गरेका हुन् । प्रभु बैंक र एन प्याब्सनसँगको बुधबार सम्पन्न सम्झौता बमोजिम प्रभु बैंक एनप्याब्सनको आधिकारिक बैंक हुनेछ । एन प्याब्सनले आफ्नो सम्पूर्ण आर्थिक कारोबार प्रभु बैंकबाट गर्नेछ भने एनप्याब्सन अन्तर्गत सदस्यता ग्रहण गरेका निजी क्षेत्रका विद्यालयहरुले पनि आफुलाई पायक पर्ने प्रभु बैंकको जुनसुकै शाखा कार्यालयमा खाता खोली विद्यार्थीहरुबाट संकलन गर्ने शैक्षिक शुल्क बैंकमार्फत नै संकलन गर्न लगायत सम्पूर्ण आर्थिक कारोबार प्रभु बैंक मार्फत गर्न सक्नेछन् । उक्त विद्यालयहरुमा कार्यरत शिक्षक तथा अन्य कर्मचारीहरुको तलबी खाता पनि प्रभु बैंकमै खोली सम्पूर्ण शिक्षक तथा कर्मचारहिरुले बैंक मार्फत नै तलब भुक्तानी लिन सक्नेछन् । एन प्याब्सन अन्तर्गत सदस्यता लिएका निजी विद्यालयहरुमा कार्यरत शिक्षक विद्यार्थि, कर्मचारी तथा सम्बन्धित अभिभावकहरुलाई एकीकृत वित्तीय सेवा जस्तैः नेपाल धितो पत्र बोर्डमा सुचिकृत कम्पनीहरुको आईपिओ, एफपिओ, डिबेञ्चर लगायतको सूचना उपलब्ध हुनुका साथै शेयर कारोबार प्रयोजनका लागि आवश्यक पर्ने डिम्याट खाता खोल्ने सुविधा समेत उपलब्ध हुनेछ । एन प्याब्सनले आयोजना गर्ने संस्थागत वार्षिक कार्यक्रम लगायत जुनसुकै कार्यक्रमहरुमा आधिकारिक बैंकको रुपमा प्रभु बैंकको नाम उल्लेख गर्नेछ ।

बजेटको अर्धवार्षिक समीक्षा: यी हुन बजेट खर्च नबढ्नुका ६ कारण

काठमाडौं। नेपाल सरकरले चालु आर्थिक वर्ष २०७६/०७७ मा विनियोजित बजेटमध्ये पहिलो ६ महिनामा २७.६ प्रतिशत खर्च गरेको छ । चालु आर्थिक वर्षको कुल विनियोजन १५ खर्ब ३२ अर्ब ९६ करोड ७१ लाखमध्ये पहिलो ६ महिनामा ४ खर्ब २२ अर्ब ५५ करोड ६ लाख खर्च भएको छ। यो खर्च कुल विनियोजनको २७.६ प्रतिशत हो । गत आर्थिक वर्ष २०७५÷७६ को यही अवधिमा कुल ३ खर्ब ७५ अर्ब ८२ करोड ९ लाख अर्थात वार्षिक विनियोजनको २८.६ प्रतिशत खर्च भएको थियो। समीक्षा अवधिमा गत वर्षको तुलनामा कुल खर्च ४६ अर्ब ७२ करोड ९७ लाख रुपैयाँ अर्थात १२.४ प्रतिशत वृद्धि भएको छ। अघिल्लो वर्षको तुलनामा यस वर्ष समानीकरण अनुदान हस्तान्तरण कम हुँदा पनि संघतर्फको खर्चको अनुपात केही कम देखिएको अर्थमन्त्री युवराज खतिवडाले बताए । खतिवडाले विभिन्न कारणले यस वर्षको ६ महिनाको अवधिमा खर्च गर्न नसकिएको बताएका छन् । मन्त्रालयले बजेटकाे अर्धवार्षिक समीक्षा प्रतिवेदन सार्वजनिक गर्दै विभिन्न कारणले चालु आर्थिक वर्षको बजेट खर्च गर्न नसकेको उल्लेख गरेको छ । यी हुन बजेट खर्च नबढ्नुका ६ कारण: १. भकम्पपीडितलाई व्यक्तिगत आवास निर्माणको अनुदानको रूपमा दिइने किस्ता वितरण अन्तिम चरणमा पुगेकोले गत वर्षको भन्दा १४ अर्ब १४ करोड रुपैयाँ कम अनुदान गएको। २. नेपाल र अमेरिकी सहयोग मिलिनियम च्यालेन्ज कर्पोरेशन बीच भएको अनुदान सहायता सम्झौता संघीय संसदबाट अनुमोदन हुन ढिलाइ भइरहेकोले विनियोजित १० अर्ब रुपैयाँ खर्च हुन नसकेको। ३. अघिल्लो वर्षको बजेट विनियोजनबाट सञ्चित रहेको रकमबाट नै कतिपय प्रदेश तथा स्थानीय तहमा चालु वर्षको खर्च भइरहेकोले गत वर्षको तुलनामा यो वर्ष १८ अर्ब रुपैयाँ बराबर कम वित्तीय समानीकरण र सशर्त अनुदानको रकम संघीय सञ्चित कोषबाट प्रदेश सञ्चित कोषमा हस्तान्तरण भएको। प्रदेश नं २ र कर्णाली प्रदेशमा समीक्षा अवधिमा कुनै पनि रकम संघीय सञ्चित कोषबाट हस्तान्तरण नभएको। ४. स्थानीय तहको खर्चमध्ये ६ सय ६६ स्थानीय तहमा मात्र क्गत्च्ब् बाट प्रतिवेदन प्राप्त भई ८७ स्थानीय तहबाट खर्चको प्रतिवेदन प्राप्त हुन नसकेको। गत वर्षको खर्चको प्रतिवेदनसहित निकासा माग नभएकोले २० भन्दा बढी स्थानीय तहमा चाल वर्षको वित्तीय हस्तान्तरण हुन नसकेको। ५. पौष मसान्तसम्म पनि केही ठूला आयोजनारकार्यक्रमहरूको कार्यान्वयन विधिको निर्णय, कार्यविधि तर्जुमा, रकम बाँडफाँट र खरीद प्रक्रिया नै शुरु हुन नसकेको। ६. सार्वजनिक खरीद प्रणाली र निर्माण व्यवसायीका सन्दर्भमा देखिएका समस्या हल हुन समय लागेका कारण केही समयसम्म आयोजना कार्यान्वयनमा ढिलाइ भएकोले अपेक्षाकृत खर्च हुन नसकेको।

६ महिनामा बैंकको नाफाः बढाउनेमा लिड गर्यो एनएमबीले, ग्लोबल आईएमई र एनआईसी एसिया पछ्याउँदै

काठमाडौं । वाणिज्य बैंकहरुको चालु आर्थिक वर्ष (आव) को ६ महिनाको नाफा सार्वजनिक भएको छ । बैंकहरुले गत आवको ६ महिनाको तुलनामा चालु आवमा नाफा ८.८६ प्रतिशतले बढाएका छन् । बैंकहरुले प्रकाशित गरेको चालु आवको दोस्रो त्रैमाससम्मको अपरिष्कृत वित्तीय विवरणले नाफा बढेको देखाएको हो । संचालनमा रहेका २७ वाणिज्य बैंकमा सबैभन्दा धेरै नाफा बृद्धि गर्नेमा एनएमबी बैंक (४७.४ प्रतिशत) र सबैभन्दा धेरै नाफा घटाउनेमा नेपाल बैंक (१८.६ प्रतिशत) रहेका छन् । एनएमबी बैंकले गत आवको ६ महिनामा १ अर्ब १० करोड ९९ लाख रुपैयाँ नाफा गरेको थियो । सो बैंकले चालु आवको ६ महिनामा भने १ अर्ब ६३ करोड ६० लाख रुपैयाँ नाफा गरेको छ । एनएमबीसँग चालु आवको दोस्रो त्रैमासमा राष्ट्रियस्तरको ओम डेभलपमेन्ट बैंक मर्ज भएको थियो । यस्तै, ग्लोबल आईएमई बैंकले नाफा गत आवको तुलनामा ३७.१३ प्रतिशतले बढाएको छ । गत आवको ६ महिनामा १ अर्ब २२ करोड ९३ लाख रुपैयाँ नाफा गरेको ग्लोबल आईएमईले चालु आवको सोही अवधिमा भने १ अर्ब ६८ करोड ५९ लाख रुपैयाँ नाफा गरेको छ । मेगा बैंकको नाफा पनि उल्लेख्य रुपमा बढेको छ । बैंकले गत आवको ६ महिनामा ७३ करोड २० लाख रुपैयाँ नाफा गरेकोमा चालु आवको सोही अवधिमा ९५ करोड २ लाख रुपैयाँ नाफा गरेको छ । मेगाको नाफा बृद्धि २९.८ प्रतिशत छ । गत आवको पुस मसान्तसम्मको तुलनामा सबैभन्दा बढी नाफा भने नेपाल बैंकको घटेको छ । नेपाल बैंकले गत आवको तुलनामा चालु आवको ६ महिनामा नाफा १८.६ प्रतिशतले घटाएको छ । नेपाल बैंकले गत आवको ६ महिनामा १ अर्ब ६६ करोड १४ लाख रुपैयाँ नाफा गरेकोमा चालु आवको सोही अवधिमा १ अर्ब ३५ करोड २३ लाख रुपैयाँ गरेको छ । यस्तै, नेपाल इन्भेष्टमेन्ट बैंकको नाफा पनि घटेको छ । गत आवको ६ महिनामा १ अर्ब ९७ करोड ५५ लाख रुपैयाँ नाफा गरेको इन्भेष्टमेन्ट बैंकले चालु आवको सोही अवधिमा १ अर्ब ६६ करोड ६१ लाख रुपैयाँ नाफा गरेको छ । कृषि विकास बैंकले नाफा २२.८ प्रतिशतले बढाएको छ । गत आवको ६ महिनामा १ अर्ब २८ करोड ८० लाख रुपैयाँ नाफा गरेको कृषि विकास बैंकले चालु आवको सोही अवधिमा १ अर्ब ५८ करोड १७ लाख रुपैयाँ नाफा गरेको छ । बैंक अफ काठमाडूको नाफा १९.८३ प्रतिशतले बढेको छ । बैंकले गत आवको ६ महिनामा ७३ करोड ७५ लाख रुपैयाँ नाफा गरेको थियो भने चालु आवको सोही अवधिमा ८८ करोड ३८ लाख रुपैयाँ नाफा गरेको छ ।

एनआईसी एसिया र खल्तीबीच डिजिटल भुक्तानी सम्झौता

काठमाडौं । एनआईसी एसिया र खल्ती डिजिटल वालेट बीच डिजिटल भुक्तानी सेवा प्रदान गर्नका लागि सम्झौता पत्रमा हस्ताक्षर भएको छ । एनआईसी एसिया बैंकका तर्फबाट सीईओ रोशन कुमार न्यौपाने र खल्तीका तर्फबाट डाइरेक्टर अरविन्द साहले बैंकको थापाथली स्थित प्रधान कार्यालयमा आयोजित हस्ताक्षर समारोहमा उक्त सम्झौतापत्रमा हस्ताक्षर गरेका छन् । सम्झौता अनुसार अब एनआईसी एसिया बैंकका ग्राहकहरुले उक्त बैंकको मोबाईल बैंकिङ तथा इन्टरनेट बैंकिङ सेवा प्रयोग गरी ‘खल्ती’मा सजिलै पैसा लोड गर्न र ‘खल्ती’ को प्लाटफर्ममा उपलब्ध सबै प्रकारका सेवाहरुको डिजिटल भुक्तानी गर्न सक्नेछन् । उक्त सम्झौताको बारेमा बोल्दै खल्तीका निर्देशक साह भन्छन्, “हामी एनआईसी एसिया बैंकसँग यो सम्झौता गर्न पाउँदा उत्साहित छौँ । अब एनआईसी एसिया बैंकका ग्राहकहरुले बैंकबाट नगद झिकिराख्ने झन्झट गर्नुपर्दैन । उहाँहरुले बैंकबाट सिधै ‘खल्ती’ मा पैसा लोड गरी वस्तु तथा सेवाको डिजिटल भुक्तानी गर्न सक्नुहुनेछ । नगद पैसा बिनाको सरल भुक्तानीको यो एउटा सुरुवात हो । यस सहकार्य सँगै हामीले नगदपैसा बिनाको नेपालको लागि एउटा अर्को पाइला अगाडी सारेका छौँ जस्तो लागेको छ ।” त्यसै गरी एनआईसी एसिया बैंकका सीईओ न्यौपाने भन्छन्, “हामी प्रविधिको प्रयोग गरेर मानिसहरुका विभिन्न बैंकिङ्ग तथा वित्तिय समस्याहरु समाधान गर्न खोजिराखेका छौँ, जसको माध्यमबाट ग्राहकहरुले मोबाईलबाटै सबै किसिमका सेवाहरु प्राप्त गर्न सक्नुहुनेछ । हामी खल्ती वालेटसँग सहकार्य गरी हाम्रा ग्राहकहरुमाझ खल्तीको सजिलो मोबाईल भुक्तानी सेवा उपलब्ध गराउन पाउँदा अत्यन्तै उत्साहित भएका छौँ । यसबाट हामी दैनिक कारोबारलाई डिजिटल बनाउन एक कदम अगाडि बढेको महसुस गरेका छौँ ।” सन् २०१७ को जनावरी २६ बाट नेपाली बजारमा आरम्भ भएको खल्ती नेपाल राष्ट्र बैंकबाट अनुमती प्राप्त, एक उदयमान र रुचाइएको पेमेन्ट गेटवे हो । खल्तीको मोबाईल एप तथा वेबसाइट प्रयोग गरी मोबाइल रिचार्ज, बिजुली र पानीको बिल भुक्तानी, इन्टरनेट तथा डीटीएचको बिल भुक्तानी, फिल्म टिकेटिङ, प्लेन टिकेटिङ, इभेन्ट्स टिकेटिङ, होटेल रुम बुकिङ आदि गर्ने, इ–कमर्स मार्फत किनिएको सामानको भुक्तानी, दैनिक पत्रिकाहरुको ग्राहक–शुल्क तिर्ने जस्ता अन्य थुप्रै सेवाहरु लिन सकिन्छ । हाल खल्ती प्रयोगकर्ताहरुको संख्या १० लाख भन्दा बढि रहेको छ ।

लुम्बिनी जनरल इन्स्योरेन्सको बीमाशुल्क ३१ करोड बढी, पुर्नबीमा कमिशन आयमा वृद्धि

काठमाडौं । लुम्बिनी जनरल इन्स्योरेन्स कम्पनीको बीमाशुल्क चालु आर्थिक वर्षको दोस्रो त्रैमासमा ५ करोड रुपैयाँले घटेको छ । चालु आवको दोस्रो त्रैमासमा कम्पनीको बीमाशुल्क ३१ करोड ३७ लाख रुपैयाँ रहेको छ । गत आवमा भने कम्पनीको बीमा शुल्क ३६ करोड ८३ लाख रुपैयाँ रहेको थियो । आय: कम्पनीकाे आय चालु आवको दोस्रो त्रैमासमा ९७ करोड २० लाख रुपैयाँ रहेको छ भने गत आवको दोस्रो त्रैमासमा कम्पनीको आय ३६ करोड ८३ लाख रुपैयाँ रहेको छ । कम्पनीको आय गत आवको दोस्रो त्रैमासको तुलनामा चालुको दोस्रो त्रैमासमा ३ करोड रुपैयाँले घट्न पुगेको हो । पुर्नबीमा कमिशन आय चालु आवको दोस्रो त्रैमासमा कम्पनीको पुर्नबीमा कमिशनबाट आय ७ करोड ९५ लाख रुपैयाँ रहेको छ भने गत आवमा ५ करोड ८८ लाख रुपैयाँ रहेको थियो । लगानी, कर्जा तथा अन्य आयः कम्पनीको चालु आवको दोस्रो त्रैमासमा लगानी, कर्जा तथा अन्य आयमा ३ करोड १७ लाख रुपैयाँ रहेको छ भने गत अवाको दोस्रो त्रैमासमा कम्पनीको लगानी, कर्जा तथा अन्य आय ३ करोड १ लाख रुपैयाँ रहेको छ । हाल कम्पनीको बीमा कोषमा ५८ करोड ९ लाख रुपैयाँ रहेको छ ।