धनगढी उपमहानगरलाई निर्माण व्यवसायीकाे सवा एक लाख रुपैयाँ र माक्स सहयाेग
काठमाडौं । निर्माण व्यवसायी संघ कैलालीले धनगढी उपमहानगरपालिकालाई १ लाख १५ हजार रूपैयाँ र आठ हजार थान मास्क सहयोग गरेको छ। संघले उपमहानगरपालिकालाई सो रकम आज हस्तान्तरण गरेको हो । विश्वभर फैलिरहेको कोरोना भाइरसको संक्रमण रोकथाम तथा जोखिम नियन्त्रणका लागि संघले उपमहानगरपालिकालाई सो रकम र माक्स सहयोग गरेको बताएको हो । धनगढी उपमहानगरपालिका क्षेत्रका विपन्न वर्गलाई सहयोग होस् भन्ने उद्देश्यले आज चेक र मास्क हस्तान्तरण गरिएको संघका अध्यक्ष यज्ञराज उपाध्यायले बताए। अहिले कोरोना भाइरसको उच्च जोखिममा सुदूरपश्चिम छ । कैलालीको सेती प्रादेशीक अस्पतलमा मात्र ५ जना कोरोनाका बिरामीको उपचार भइहेको छ ।
बजारमा देखिन थाले पुराना नोटः ‘कालोधन’ आयो कि खुत्रुकेको पैसा ?
काठमाडौं । सकारले देशभर लकडाउन घोषणा गरेको एक महिना पुग्न लाग्दा बजारमा पुराना नोट देखिन थालेका छन् । सिमित संख्यामा खुलेका दैनिक उपभोग्य र अत्यावश्यक बस्तुका पसलहरुमा राजाको तस्बीर भएका पुराना नोट पनि देखिन थालेका हुन् । केही वर्षदेखि नै फेला नपरेका पुराना नोट पनि अहिले बजारमा देखिन थालेपछि राष्ट्र बैंकले पनि चासो देखाएका छ । तर, दैनिक उपभोग्य र अतिआवश्यक बस्तु विक्री गर्ने पसल मात्रै खुलेका तथा यस्तो सपिङको मात्रा ज्यादै कम हुने हुनाले ‘कालोधन’ आएको भनेर शंका गर्न नसकिने राष्ट्र बैंकका अधिकारी बताउँछन् । ‘केही वर्षयता देखिन छोडेका पुराना नोट मैले पनि बजारमा देखें, पुराना नोटको चलनचल्ती बढेको सूचना पनि आएको छ, तर अहिले दाल, चामल, औषधी, फलफूल, तरकारी जस्ता दैनिक उपभोग्य र अत्यावश्यक बस्तु विक्री गर्ने पसल मात्रै खुलेकोको कसैले लुकाएर राखेको स्रोत नखुलेको नोट नै बाहिर निस्किएको होला भनेर चिन्ता गर्नुपर्ने अवस्था देखिएको छैन,’ राष्ट्र बैंकका एक अधिकारीले विकासन्युजसँग भने । सरकारले लकडाउन गरेर हिडडुल गर्न कडाइ गरेको र कोरोना संक्रमण सन्त्रासको कारण सर्वसाधार आफै सचेत भएकोले पहिला संचय गरेको राखिएको नोट अहिले चलनचल्तीमा आएको हुन सक्ने राष्ट्र बैंकको अनुमान छ । अहिले बजारमा सबै दरका पुराना नोट देखिन थालिएको छ । विशेष गरी राजा बीरेन्द्र तथा ज्ञानेन्द्रका तस्वीर अंकित नोट बजारमा देखिन थालेका छन् । यस्तै, १० रुपैयाँ दरका पोलिमर नोट पनि केही मात्रामा बजारमा फेला परेका छन् । तत्कालिन राजा बीरेन्द्रको हत्या भएपछि २०५८ सालयता बीरेन्द्रको तस्बीर भएका नोट छापिएको छैन भने २०६२/६३ सालको जनआन्दोलन सफल भएपछि २०६३ सालयता तत्कालिन राजा ज्ञानेन्द्रको तस्वीर भएका नोट पनि छापिएको छैन । यस्तै, १० रुपैयाँ दरको पोलिमर नोट पनि २०६० सालयता छापिएको छैन । सामान्यतः राष्ट्र बैंकबाट बजारमा गएको कुनै पनि दरको नोट बढीमा २ वर्षभित्रमा राष्ट्र बैंकमा फिर्ता आइसक्ने आकंलन गरिन्छ । आजभन्दा १२/१५ वर्षअघि बजारमा गएका नोट अहिले देखिदा किन र कसरी आयो भने शंका गरिएको हो । तर, संकटको बेलामा काम लाग्दा भनेर कसैले साचेर राखेका नोट बैंक बन्द भएको, बैंकसम्म जान सहज नभएको जस्ता प्रतिकूल परिस्थितिको कारण प्रयोगमा आएको हुन सक्ने राष्ट्र बैंकको अनुमान छ ।
सरकारले भन्याे: डा. शेरबहादुर पुनकाे बिषयमा अनर्गल प्रचार नगरौं
काठमाडौं । सरकारले शुक्रराज ट्रपिकल तथा सरुवा रोग अस्पतालमा कार्यरत डा.शेरबहादुर पुनका बिषयमा अनर्गल प्रचार नगर्न आग्रह गरेको छ । आइतबार एक सुचना जारी गर्दै पुनका सम्बन्धमा केही पत्रपत्रिका तथा सामाजिक सञ्जालमा सत्य तथ्य बङ्ग्याइँ मन्त्री भानुभक्त ढकालको नामसमेत मुछि अनर्गल तथा दुष्प्रचार गर्ने कार्य भएकामा ध्यानाकर्षण भएको जनाउँदै त्यस्तो नभएको जनाएको हो । मन्त्रालयले कोही पनि स्वास्थ्यकर्मीको मनोवल घटाउन काम नगरेको उल्लेख गर्दै स्वास्थ्यकर्मीलाई सरकारले शतप्रतिशत भत्ता र २५ लाखको बीमासमेत व्यवस्था गरेकाले डा.पुनका सन्दर्भमा सत्यतथ्य नबुझीकन अनर्गल प्रचारप्रसार वा लेख लेखाउने कार्य नगर्न नगराउन आग्रह गरिएकाे छ ।
काेराेनाले २८ नेपालीले ज्यान गुमाए, १ हजार १ सय ३५ जना संक्रमित
काठमाडौं । कोरोना भाइरस संक्रमण (कोभिड-१९) काे कारण २८ जना नेपालीले ज्यान गुमाएका छन् । गैर आवासीय नेपाली संघका अनुसार विदेशमा रहेका २८ जनाले काेरेाना भाइरसका कारण ज्यान गुमाएका हुन् । याे शनिबार साँझसम्मकाे तथ्याक हाे । हालसम्म १ हजार १ सय ३५ जना संक्रमित भएकाे बताइएकाे छ । यस्तै, २० देशमा रहेका नेपालीलाई कोरोना संक्रमण भएको भेटिएको संघले जनाएको छ । त्यस्तै, बहराइनमा ४९ जनालाई संक्रमण भएको छ । संक्रमण भएका नेपालीमध्ये सबैभन्दा धेरै युरोपमा ६४ प्रतिशत, अमेरिकामा २९ प्रतिशत, मध्यपूर्वमा ७ प्रतिशत छन् ।
नयाँ दिल्लीमा आठ स्वास्थ्यकर्मी संक्रमित, छलफलकाे लागि अस्पतालले बाेलायाे बैठक
सांकेतिक तस्विर नयाँ दिल्ली । भारतको नयाँदिल्लीमा रहेको एउटा अस्पतालका चिकित्सक र नर्सहरुलाई नै कोरानाभाइरसको संक्रमण भएको छ । नयाँदिल्लीस्थित लेडी हार्डिङ्ग हस्पिटलमा कार्यरत २ चिकित्सक, ६ नर्स र १ जना दश महिने बच्चा संक्रमित भएका हुन् । अग्रपंक्तिमा रहेर काम गर्ने आठ जना स्वास्थ्यकर्मी कोरोनाभाइरसबाट प्रभावित भएको अस्पतालले आइतबार पुष्टि गरेको छ । उनीहरुलाई अहिले क्वारेन्टाइनमा राखिएको र उनीहरुले को को सँग सम्पर्क गरेका थिए भन्ने बारेमा विवरण संकलन भइरहेको पनि अस्पतालले जनाएको छ । स्वास्थ्यकर्मी नै संक्रमित भएपछिको योजनाका बारेमा छलफल गर्न अस्पतालले उच्च अधिकारीहरुको बैठक बोलाएको छ । यसैबीच, भारतको दिल्ली प्रदेशका मुख्यमन्त्री अरविन्द केजरीवालले कोरोना विरुद्धको लडाईंमा मृत्यु हुनेको परिवारलाई एक करोड भारतीय रुपैयाँ राहत दिने घोषणा गरेका छन् । कोरोनाभाइरस विरुद्ध काम गर्ने क्रममा कुनै व्यक्तिको मृत्यु भएमा उनीहरुका परिवारलाई प्रतिव्यक्ति भारु एक करोड दिइने उनले शनिबार घोषणा गरेका हुन्। नयाँदिल्लीमा आयोजित पत्रकार सम्मेलनमा उनले भने, ‘यदि कुनै चिकित्सक, नर्स, सरसफाई कर्मचारी, प्रयोगशालाका प्राविधिक वा यस्तै कोही व्यक्ति उपचारका लागि खट्दा निधन हुनसक्छ, उनीहरुका परिवारलाई राहत स्वरुप भारु एक करोड दिइने छ ।’ मुख्यमन्त्री केजरीवालले ६० ओटा सेनिटाइजेसन मेसिन मार्फत् सहर बजारमा सरसफाई गर्ने कार्य भइरहेको पनि जानकारी दिए । उनले सामाजिक दुरी कायम गर्न आम नागरिकलाई आग्रह गरेका छन् । शिविर बनाइएका क्षेत्रमा सामाजिक दुरीको अलि बढी ख्याल गर्नु पर्ने उनको भनाई छ । शहरी क्षेत्रमा ७१ ओट शिविर बनाइएको उनले जानकारी दिए । अलपत्र परेका तथा खान बस्न नपाएकाहरुलाई त्यस्ता शिविरहरुमा राखिएको मुख्यमन्त्री केजरीवालले जानकारी दिए। (रासस/एएनआई)
सप्तरीका ७१ वर्षीय वृद्धमा देखियो कोरोनाविरूद्धको एन्टिबडी
काठमाडौं । सप्तरीमा एकजना वृद्धमा कोरोनाभाइरसविरूद्ध लड्ने एन्टिबडी देखिएको छ। जिल्लाकाे सप्तकोशी नगरपालिका- १ फत्तेपुरका ७१ वर्षीय वृद्धको आरडिटी टेस्ट गर्दा एन्टिबडी देखिएको बताइएकाे छ । र्यापिड डाइग्नोस्टिक टेस्ट गर्दा उनमा कोरोनाभाइरसविरूद्ध लड्ने एन्टिबडी देखिएको छ। आरडिटीमा एन्टिबडी देखिएपछि अहिले उनलाई अस्पतालको आइसोलेसन वार्डमा राखिएको छ भने पिसिआर परीक्षण गर्न उनको थ्रोट स्वाबको नमूना संकलन गरी धरानस्थित बिपी कोइराला स्वास्थ्य विज्ञान प्रतिष्ठान पठाउन लागिएको छ।
ऊर्जा मन्त्रालयलाई सवा १ खर्बकाे बजेट सिलिङ
काठमाडौं । राष्ट्रिय योजना आयोगले ऊर्जा, जलस्रोत तथा सिँचाइ मन्त्रालयलाई १ खर्ब १२ अर्ब बराबरको बजेट सिलिङ दिएको छ । आयोगले आगामी आर्थिक वर्ष २०७७/०७८का ालगि साे मन्त्रालयलाई साे बजेट सिलिङ दिएको हाे । अब ऊर्जा, जलस्रोत तथा सिँचाइ मन्त्रालयले ऊर्जातर्फ विशेष गरेर प्राधिकरणको कार्यक्रमले बढी प्राथमिकता पाउने बताइएकाे छ । चालू आर्थिक वर्ष २०७६/७७ मा ऊर्जा क्षेत्रको विकासका लागि ८३ अर्ब ४९ करोड विनियोजन गरिएको थियो । चालू आर्थिक वर्षमा ऊर्जा मन्त्रालयले १ खर्ब १५ अर्बको सिलिङ पाएको थियो । चालू आवको बजेट खर्च अपेक्षाअनुसार हुन नसकेपछि यो बजेट सिलिङ आगामी आर्थिक वर्षका लागि घटेर आएको हो । राष्ट्रिय योजना आयोगले ऊर्जा, जलस्रोत तथा सिँचाइ मन्त्रालयलाई १ खर्ब १२ अर्बको सिलिङ दिएको हाे ।
माल्दिभ्सका १८ नागरिक बोकेर उड्यो नेपाल एयरलाइन्स, आजै स्वदेश फर्कने
काठमाडाैं । नेपाल वायु सेवा निगम (नेपाल एयरलाइन्स) ले माल्दिभ्सका १८ नागरिक बोकेर बङ्गलादेशको राजधानी ढाका उडेको छ । निगमको न्यारोबढी ए३२० जहाजले आइतबार(आज)त्रिभुवन अन्तर्राष्ट्रिय विमानस्थलबाट ढाकाका लागि उडान भरेको विमानस्थलका महाप्रबन्धक देवेन्द्र केसीले जानकारी दिए । लकडाउनका कारण नेपालमा रोकिएका आफ्ना नागरिकलाई माल्दिभ्सले निगमको जहाज चार्टर्ड गरी स्वदेश फिर्ता लगेको हो । काठमाडौं-ढाका उडान करिब एक घण्टाको हुनेछ । ढाका पुगेर निगमको जहाज आजै स्वदेश फर्कनेछ । ढाकाबाट ती १८ मल्दिभ्सका नागरिक अर्को जहाजमार्फत गन्तव्यमा पुग्ने जनाइएको छ । पछिल्लो पटक यही वैशाख २ गते निगमको न्यारोबडी जहाजले ३४ ब्राजिलियनलाई भारतको नयाँदिल्ली पुर्याइदिएको थियो । यसअघि निगमको वाइड बडी जहाजले गत चैत १९ गते अष्ट्रेलियाको शहर ब्रेश्वनमा सिधा उडान गरेको थियो । त्यस्तै चैत २८ गते जापानको नारितामा उडान गरेको थियो । ती सबै चार्टर्ड उडान हुन् । निगमका दुई वाइड बडी ए३३० जहाजले गत चैत १६, २० र वैशाख ४ गते दुई गरी चार वटा कार्गो उडान गरी चीनको ग्वाङ्जाओबाट अत्यावश्यक स्वास्थ्य सामग्री ल्याएका थिए । लकडाउनको अवधिमा निगमका अन्तर्राष्ट्रिय उडान सर्वाधिक भएका छन् । यस अवधिमा निगमले आठ अन्तर्राष्ट्रिय उडान भरेको छ । यीमध्ये चार उद्धार उडान र चार कार्गो उडान हुन् । वाइड बडी बडी ए–३३० दुई र न्यारोबडी ए–३२० दुई थान जहाजबाट अन्तर्राष्ट्रिय उडान भर्दै आएको छ । रासस