३ प्रसारण लाइन एकैपटक सञ्चालन, १५ हजार मेगावाट बिजुली निर्यात गर्ने
काठमाडौं । नेपाल र भारतबीच बिजुली खरिदबिक्रीका लागि महत्वपूर्ण मानिएका ३ वटा प्रसारण लाइनको उद्घाटन भएको छ । परराष्ट्रमन्त्री नारायणप्रकाश साउद र भारतीय विदेशमन्त्री एस जयशङ्करले बिहीबार कुशाहा–कटैया, परवानीपुर–रक्सोल र मैनहिया– न्यू नौतनवा प्रसारण लाइनको संयुक्त रुपमा उद्घाटन गरेका हुन् । त्यस अवसरमा उपस्थित ऊर्जा जलस्रोत तथा सिँचाइमनत्री शक्तिबहादुर बस्नेतले दुई देशबीचको विद्युत् व्यापारका लागि बिहीबारदेखि सञ्चालन भएका प्रसारण लाइन द्विपक्षीय ऊर्जा व्यापारका निम्ति उपलब्धिपूर्ण भएको बताए । उनले दुई देशबीच बिजुली खरिदबिक्रीका लागि विद्यमान संरचनाको अधिकतम उपयोग गर्ने विषयमा महत्वपूर्ण काम भएको बताए । ती प्रसारण लाइनमध्ये दुईवटा यसअघि नै सञ्चालनमा आइसकेको भए पनि दोस्रो सर्किट थप भएका हुन् । परवानीपुर–रक्सौल, कुशाहा कटैया प्रसारण लाइनको एक÷एक वटा सर्किट सञ्चालनमा थिए । ती प्रसारण लाइनमा अर्को सर्किट थप गरेर डबल सर्किट गरिएको छ । बिहीबारदेखि सञ्चालन भएका प्रसारण लाइनको क्षमता १३२ किलोभोल्ट छ । ती प्रसारण लाइनबाट हाल ८० मेगावाट बराबरको बिजुली प्रवाह हुँदै आएको थियो । दोस्रो सर्किट सञ्चालनमा आएपछि थप ८० मेगावाट बिजुली प्रवाह गर्न सहज भएको छ । यसैगरी, न्यू नौतनवा मैनाहिया १३२ केभी प्रसारण लाइनको पनि बिहीबारनै उद्घाटन भएको छ । डबल सर्किट क्षमताको सो प्रसारण लाइनबाट दुई सय मेगावाट बिजुली प्रवाह हुनेछ । मन्त्री बस्नेतले १० वर्षमा १० हजार मेगावाट बिजुली भारत निर्यात गर्ने सम्बन्धमा भएको सहमतिलाई ‘ब्रेकथ्रु’को संज्ञा दिए । नेपाली बिजुलीले भारतको विशाल बजारमा सहज प्रवेश पाएको र यसले लगानीको थप वातावरण बनेको राससलाई बताए । प्रधानमन्त्री पुष्पकमल दाहाल ‘प्रचण्ड’ले गत जेठमा गरेको भारत भ्रमणमा क्रममा व्यक्त प्रतिबद्धता कार्यान्वयनको चरणमा प्रवेश गरेकामा प्रसन्नता व्यक्त गर्दै मन्त्री बस्नेतले थप विद्युत् भारत निर्यात गर्न योजनाबद्ध रुपमा अगाडि बढ्नुपर्नेमा जोड दिए । सम्झौता बमोजिम आपसी हित हुने गरी दुई देशबीच दीर्घकालीन विद्युत् व्यापारका लागि आवश्यक प्रक्रिया अगाडि बढाइनेछ । सरकारी र निजी दुवै क्षेत्रले सहज रुपमा अब विद्युत् व्यापार गर्न बाटो खुलेको छ । सम्झौताको अवधि २५ वर्षको रहेको छ । प्रत्येक १० वर्षमा स्वतः नवीकरण हुने व्यवस्था गरिएको छ । क्षेत्रीय व्यापारलाई अझै वृद्धि गर्दै, दुई मुलुकबीच विद्यमान, कार्यान्वयनमा रहेका र प्रस्तावित अन्तरदेशीय प्रसारण लाइनलाई प्रयोग गरिने भएको छ । हाल ढल्केबर–मुजफ्फपुर अन्तरदेशीय प्रसारण लाइन सञ्चालनमा छ । सो प्रसारण लाइनबाट हाल ८ सय मेगावाट बिजुली आयातनिर्यात गर्न सकिनेछ । सो प्रसारण लाइनको क्षमता वृद्धि गरेर १ हजार मेगावाट बराबर बनाउने सम्बन्धमा सहमति भइसकेको छ । सन् २०२५ को मे सम्ममा न्यू–बुटवल गोरखपुर अन्तरदेशीय प्रसारण लाइन निर्माण सम्पन्न गर्ने लक्ष्य छ । सो प्रसारण लाइन निर्माणलाई उच्च प्राथमिकतामा राखिएको छ । ऊर्जा मन्त्रालयले तयार पारेको प्रस्तावमा नानपारा–कोहलपुर १३२ केभी प्रसारण लाइनको विषय पनि समावेश छ । भारतीय कम्पनी सतलज विद्युत् निगमले निर्माण गरिरहेको ९ सय मेगावाट क्षमताको अरुण तेस्रो जलविद्युत् आयोजनाको प्रसारण लाइनको क्षमता उपयोगका बारेमा पनि सहमति भएको छ । नेपालले सो प्रसारण लाइनको उपभोग गरेर थप बिजुली भारत निर्यात गर्न सकिने बताउँदै आएको छ । अरुण तेस्रोको हाल भौतिक प्रगति ६५ प्रतिशतमाथि छ । यसअघि नै प्रस्तावित अन्तरदेशीय प्रसारण लाइनको रुपमा रहेका चार सय केभी क्षमताको दोदोधारा– बरेली र इनरुवा– पूर्णीया प्रसारण लाइन निर्माण हुनेछ । सन् २०२८ सम्म ती प्रसारण लाइन निर्माण सम्पन्न गर्ने लक्ष्य राखिएको छ । सरकारले सन् २०३५ सम्म कूल २८ हजार ५ सय मेगावाट बिजुली उत्पादन गर्ने रणनीतिक कार्ययोजना तयार पारिसकेको छ । सो कार्ययोजनामा १३ हजार मेगावाट आन्तरिक खपतका लागि र १५ हजार मेगावाट निर्यात गर्ने लक्ष्य राखको छ । सोही लक्ष्यअनुसार सरकारले निजी क्षेत्रलाई साथमा लिएर अगाडि बढ्ने लक्ष्य लिएको मन्त्री बस्नेतले बताए । चालु आवको अन्त्यसम्म भारतबाट आयात गरिने बिजुली र नेपालबाट निर्यात हुने बिजुलीको मात्रामा गुणात्मक बदलाव आउने मन्त्री बस्नेतको भनाइ छ । “यसवर्षदेखि हामी आयातभन्दा बढी निर्यात गर्ने स्थानमा पुग्नेछौ ” उनले भने, “एकाध वर्षपछि हामी पूर्ण रुपमा बिजुली निर्यातक देशका रुपमा परिवर्तन हुनेछौँ ।” नेपाल विद्युत् प्राधिकरणले पछिल्लो एक वर्षमा १५ अर्ब २७ करोड रुपैयाँ बराबरको बिजुली निर्यात गरेको छ । यो आफैँमा महत्वपूर्ण उपलब्धि भएको टिप्पणी गर्दै मन्त्री बस्नेतले भने, “हामीले निर्यातलाई मात्रै जोड दिएका छैनौँ । आन्तरिक खपतलाई पनि उत्तिकै प्राथमिकतामा राखेका छौँ ।” प्रधानमन्त्रीले आगामी डेढ वर्षभित्र आधारभूत रुपमा सबै नेपालीको घरमा बिजुली पु¥याउने लक्ष्य सार्वजनिक गरेका छन् । सोही आधारमा मन्त्रालयले योजना बनाएर कार्यान्वयन गरिरहेको मन्त्री बस्नेत बताउनुहुन्छ । प्राधिकरणका कार्यकारी निर्देशक कुलमान घिसिङले पनि भारतसँग आज भएको सम्झौता र प्रसारण लाइन सञ्चालनबाट द्विदेशीय बिजुलीको व्यापारका लागि ‘बजार’ सुनिश्चित भएको प्रतिक्रियालाई दिए । उनले बजार सुनिश्चित भएकाले ऊर्जा उत्पादनमा लगानी विस्तार हुने विश्वास व्यक्त गरे ।
होटल व्यवसायलाई उद्योग सरहको सुविधा माग
काठमाडौं । नेपाल उद्योग वाणिज्य महासङ्घअन्तर्गतको पर्यटन तथा हवाई यातायात समितिले होटल व्यवसायलाई उद्योग सरहको सुविधा प्रदान गर्न कानुनमन्त्रीसमक्ष माग गरेको छ । महासङ्घका उपाध्यक्ष हेमराज ढकाल नेतृत्वको प्रतिनिधिमण्डलले बिहीबार कानुन न्याय तथा संसदीय मामिलामन्त्री धनराज गुरुङलाई भेटेर होटल व्यवसायलाई राष्ट्रिय प्राथमिकता प्राप्त उद्योगमा वर्गीकरण गर्न माग गरेको हो । होटल क्षेत्रले ठूलो पूँजी लगानी गरी सोही अनुरुप रोजगारी दिनुका साथै अर्थतन्त्रमा टेवा दिएको भन्दै सो क्षेत्रलाई उच्च प्राथमिकतामा राख्न माग गरिएको समितिका संयोजक देशबन्धु बस्नेतले जानकारी दिए । कानूनमन्त्री गुरुङले विदेशी पर्यटक भित्राउने तारेहोटललाई उच्च प्राथमिकता साथ उद्योगको रुपमा समावेश गर्न आफूले प्रयास गर्ने बताए । उनले उद्योग व्यवसाय सञ्चालनमा सरकारले आवश्यक सहयोग गर्ने भन्दै व्यवसायीको मागका सम्बन्धमा आफू सकारात्मक रहेको बताएका थिए ।
नेपाल-भारत सम्झौता : १० हजार मेगावाट विद्युत् व्यापारदेखि नवीकरणीय उर्जा क्षमता विकाससम्म
काठमाडौं । नेपालको विद्युत् भारतमा व्यापार गर्नेदेखि नवीकरणीय उर्जाको विकासमा एकआपसमा सहकार्य गर्ने लगायतका विभिन्न विषयमा नेपाल भारत स्तरीय सम्झौता भएको छ । बिहीबार उर्जा जलश्रोत तथा सिंचाई सचिव गोपाल प्रसाद सिग्देल र भारतको विद्युत् मन्त्रालयका सचिव पंकज अग्रवाल बीच नेपाल–भारत दीर्घकालीन विद्युत् व्यापार सम्झौतामा हस्ताक्षर गरे भने नवीकरणीय उर्जाको विकास र उर्जा क्षेत्रमा क्यापासीटी बिल्डिङमा सहकार्य गर्न नेपाल विद्युत् प्रधिकरण र एनटिपीसी भारत बीच एमओयु सम्झौता भयो । नेपालका परराष्ट्र मन्त्री एनपी साउद, भारतीय समकक्षी विदेश मन्त्री एस जयशंकर र नेपालका उर्जा जलश्रोत तथा सिचाई मन्त्री शक्ति बहादुर बस्नेतको उपस्थितिमा भएको सम्झौता समारोहमा तीनवटा प्रसारण लाइनको उद्घाटन र नवीकरणीय उर्जा को विकास र उर्जा क्षेत्रमा क्यापासीटी बिल्डिङमा सम्झौता भएका हुन् । उर्जा जलस्रोत तथा सिंचाई मन्त्रालयका प्रवक्ता नविनराज सिंहका अनुसार सम्झौता बमोजिम आपसी हित हुने गरी नेपाल भारत बीच दीर्घकालिन विद्युत् व्यापार गर्न आवश्यक कदम चाल्ने, क्षेत्रीय व्यापारलाई अझ वृद्धि गर्ने र दुई मुलुक बीच विद्यमान, कार्यन्वयनमा रहेका र प्रस्तावित अन्तरदेशीय प्रशारणलाई महतम उपयोग गरिने छ । दुवै पक्ष बीच विद्युत् निर्यातको परिमाण १० बर्षमा १० हजार मेगावाटसम्म पु¥याउने तथा यसको लागि आवशयक विद्युत् उत्पादन तथा प्रशारण संरचनाहरुको निर्माण र विकास गर्ने विषयमा सम्झौता भएको प्रवक्ता सिंहले बताए । सम्झौताको अवधि २५ वर्ष हुने र सम्झौता प्रत्येक १० वर्षमा स्वतः नविकरण हुने उनको भनाइ छ । ‘यस सम्झौता बमोजिम सम्झौताको अवधि वा द्वीपक्षीय व्यापारको परिमाण थप गर्नु परेमा प्रशारण लाइनको क्षमताको आधारमा कुनै पक्षले पेश गरेको प्रस्तावको आधारमा नेपाल भारत विद्युत् क्षेत्रको सहकार्यको लागि गठित जोइन्ट स्टेरिङ कमिटि÷जोइन्ट वर्किङ ग्रुपले गरे बमोजिम हुने छ’, प्रवक्ता सिंहले बताए । नवीकरणीय उर्जाको विकास र उर्जा क्षेत्रमा क्यापासीटी बिल्डिङमा सहकार्य गर्न नेपाल विद्युत् प्रधिकरण र एनटिपीसी भारत बीच एमओयु सम्झौतामा नेपाल विद्युत् प्रधिकरणको तर्फबाट उपकार्यकारी निर्देशक प्रदिप थिके र एनटिपीसी भारतको तर्फबाट अन्तर्राष्ट्रिय व्यापार जनरल मेनेजर डा. जतिंदर सिंह चाँडोकले हस्ताक्षर गरेका छन् । साथै, बिहीबार नै परराष्ट्रमन्त्री नारायणप्रकाश साउद र भारतीय विदेशमन्त्री एस जयशंकरले बिहीबार कुशाहा–कटैया, परवानीपुर–रक्सौल र मैनहिया–न्यू नौतनवा प्रसारण लाइनको संयुक्त रुपमा गरे । कुशाहा (नेपाल) कटैया (भारत) १३२ केभीको सेकेण्ड सर्किट, परवानीपुर (नेपाल) रक्सौल (भारत) १३२ केभी सेकेण्ड सर्किट र मैनहिया (नेपाल)–न्यू नौतनवा (भारत) १३२ केभी प्रसारण लाइन रहेका छन् ।
विदुषी राणा रिपब्लिक अफ आइसल्याण्डको अवैतनिक महावाणिज्यदूतमा नियुक्त
काठमाडौं । रिपब्लिक अफ आइसल्याण्ड सरकारले विदुषी राणालाई नेपालका लागि रिपब्लिक अफ आइसल्याण्डको अवैतनिक महावाणिज्यदूतमा नियुक्त गरेको छ । उनलाई परराष्ट्र मन्त्रालयका चिफ अफ प्रोटोकल दिलीपकुमार पौडेलले बिहिबार ओहदाको प्रमाणपत्र हस्तान्तरण गरेका हुन्। दुई देशबीचको कूटनीतिक सम्बन्धलाई सुमधुर बनाउने प्रतिबद्धतालाई जोड दिंदै रिपब्लिक अफ आइसल्याण्ड सरकारले उनलाई नेपालका लागि रिपब्लिक अफ आइसल्याण्डको अवैतनिक वाणिज्यदूतमा नियुक्त गरेको हो । अवैतनिक वाणिज्यदूतको हैसियतमा विदुषी राणाले नेपाल र रिपब्लिक अफ आइसल्याण्डबीचको पर्यटन, सांस्कृतिक आदानप्रदान, व्यापार र लगानीलाई सहज बनाउन प्रयास गर्दै दुवै राष्ट्रको पारस्परिक हितका लागि समझदारी र सहयोगलाई बढावा दिने प्रयास गर्ने छन्। विदुषी राणा किरण सुज (गोल्डस्टार शूज)का कार्यकारी निर्देशक हुन् । उनले आगामी दिनमा नेपाल–रिपब्लिक अफ आइसल्याण्डको बहुआयामिक सम्बन्धलाई नयाँ उचाइमा पुर्याउने प्रतिबद्धता व्यक्त गरेकी छन् । राणाको अवैतनिक वाणिज्यदूतमा नियुक्तिले विभिन्न क्षेत्रमा सहयोग अभिवृद्धिको महत्त्वलाई जोड दिने विश्वास गरिएको छ । साथै उनको नियुक्तिसँगै दुई देशबीचको आपसी सहकार्यले व्यापार, पर्यटन र शिक्षाजस्ता प्रमुख क्षेत्रहरूको विकासमा सहयोग पुग्ने अपेक्षा गरिएको छ ।
मुक्तिनाथ विकास बैंक १८औं वर्षमा, राष्ट्रिय आविष्कार केन्द्रलाई गर्यो आर्थिक सहयोग
काठमाडौं । मुक्तिनाथ विकास बैंकले डा. महावीर पुनद्धारा संचालित राष्ट्रिय आविष्कार केन्द्रलाई ५ लाख रुपैयाँ बराबरको आर्थिक सहयोग गरेको छ । बैंकले आफ्नो वार्षिकोत्सवको अवसरमा संस्थागत सामाजिक उत्तरदायित्व अन्तर्गत उक्त केन्द्रलाई ग्रिन इनर्जी, वातवरण संरक्षण तथा प्लास्टिक रिसाईकलको लागि सो रकम बराबरको सहयोग गरेको हो । बैंक १७ औं वर्ष पार गरी १८ औं वर्षमा प्रवेश छ । सो अवसरमा विभिन्न कार्यक्रमहरु आयोजना गरेको बैंकले बृहत रक्तदान, विभिन्न सामाजिक कार्यहरु र बैंकमा १० वर्षभन्दा लामो समयसम्म कार्यरत १३५ कर्मचारीहरुलाई सम्मान गरेको छ । यसैगरी बैंकका क्षेत्रीय कार्यालय र केन्द्रीय कार्यालयमा संचालित बृहत रक्तदान कार्यक्रम मार्फत १६६ युनिट रगत संकलन गरेको छ । यस अवसरमा बैंकले देशका क्षेत्रीय तथा शाखा कार्यालयहरु मार्फत गरीब तथा जेहेन्दार विद्यार्थीहरुलाई छात्रवृत्ति वितरण, दृष्टिविहिन नागरिकहरुलाई सेतो छडी वितरण, अनाथलय, बाल आश्रम तथा बृद्धा आश्रममा विभिन्न सामाग्री वितरण, फोहोरमैला व्यवस्थापनको लागि डस्टविन वितरण र वित्तीय साक्षरता तथा डिजिटल बैंकिङ्ग साक्षरता जस्ता विभिन्न सामाजिक उत्तरदायित्व कार्यक्रमहरु संचालन गरेको छ । बैंकका अध्यक्ष भरतराज ढकालले सधैं गुणस्तरीय सेवा प्रदान गर्दै अगाडी बढ्ने र विभिन्न वित्तीय तथा गैर वित्तीय सेवाको माध्यमद्धारा देशको अर्थतन्त्र र आवश्यकतामा बैंकले पनि योगदान दिने प्रतिबद्धता व्यक्त गरेका छन् । साथै, बैंकले डिजिटल कारोबारलाई प्रोत्साहन गर्न यस विकास बैंकको एटीएम कार्ड प्रयोग गरी नेपालभरी रहेको भिसा नेटवर्कमा आवद्ध अन्य जुनसुकै बैंकको एटीएम मेसिनबाट निशुल्क रकम झिक्न सकिने व्यवस्था गरेको छ ।
नेपाल एसबिआई बैंक र ओम कृष्ण अस्पतालबीच सम्झौता
काठमाडौं । नेपाल एसबिआई बैंक र कैलाली टिकापुरको ओम कृष्ण अस्पताल एण्ड रिसर्च सेन्टरबीच स्वास्थ्य सेवामा छुट दिने सम्झौता भएको छ । उक्त सम्झौता सूदूरपश्चिम प्रदेश प्रमुख सन्तोष कूमार भण्डारी तथा अस्पतालका अध्यक्ष रत्ना उपाध्याय (बजगाई) बीच भएको हो । सम्झौता अनुसार बैंकका भिसा डेबिट कार्ड तथा मोबाइल बैंकिङ सेवा प्रयोगकर्ता ग्राहकले उक्त अस्पतालमा कार्ड तथा मोबाइल बैंकिङ प्रयोग बापत विभिन्न स्वास्थ्य सेवामा छुट पाउने छन् । उक्त सम्झौता सूदूरपश्चिम प्रदेश प्रमुख सन्तोष कूमार भण्डारी तथा अस्पतालका अध्यक्ष रत्ना उपाध्याय (बजगाई) बीच सम्पन्न भयो । उक्त सम्झौतामा अस्पतालका तर्फबाट कृष्ण पर्साद उपाध्याय बजगाइं तथा बैकका कर्मचारीहरुको पनि उपस्थिति थियो ।
स्ट्याण्डर्ड चार्टर्ड बैंकको फस्यो ४९ करोड रुपैयाँ कर्जा
काठमाठौं । स्ट्याण्डर्ड चार्टर्ड बैंकले प्रवाह गरेको ४९ करोड रुपैयाँ कर्जामा शतप्रतिशत प्रोभिजनिङ गर्नु परेको छ । बैंकको गत असारसम्मको तथ्याङ्क अनुसार ४८ करोड ९२ लाख ६९ हजार रुपैयाँ खराब कर्जा छ । बैंकको उक्त कर्जा वापत शतप्रतिशत कर्जा नोक्सानी (प्रोभिजनिङ) गर्नु परेको हो । सो वापत बैंकले ४६ करोड २२ लाख ५३ हजार रुपैयाँ कर्जा नोक्सानीमा छुट्याएको हो । २०८० असारसम्म बैंकले ९५ अर्ब ७ करोड ३ लाख रुपैयाँ कर्जा प्रवाह गरेको छ । कर्जा कर्जा नोक्सानी वापत २ अर्ब २० करोड ९२ लाख रुपैयाँ छुट्याएको बैंकले जनाएको छ । ९० अर्ब ३८ करोड ७८ लाख रुपैयाँ कर्जामा १.३ प्रतिशत अर्थात् १ अर्ब ३६ करोड ३३ लाख रुपैयाँ नोक्सानीमा राखेको छ । यस्तै, ३ अर्ब ५० करोड ७४ लाख रुपैयाँ कर्जा वाच लिष्टमा छ । सो कर्जामा बैंकले ५ प्रतिशत अर्थात् १७ करोड ४९ लाख १९ हजार रुपैयाँ कर्जा नोन्सानीको व्यवस्था गरेको छ । यस्तै, पुनरसंरचना गरेको ५ करोड ७१ लाख रुपैयाँ कर्जामा १२.५ प्रतिशत अर्थात् ७१ लाख ४९ हजार रुपैयाँ नोक्सानी राखेको छ । बैंकको ४५ करोड ६ लाख १४ हजार रुपैयाँ कमसल छ । सो कर्जामा २५ प्रतिशत अर्थात् ११ करोड २६ लाख ५३ हजार रुपैयाँ नोक्सानी राखेको बैंकको भनाइ छ । यस्तै, बैंकको शंकास्पद कर्जा १ करोड ७७ लाख ९६ हजार रुपैयाँ छ । सो कर्जामा बैंकले ५० प्रतिशत अर्थात् ८ करोड ८९ लाख ६३ हजार रुपैयाँ प्रोभिजन गरेको छ ।
लुम्बिनी र कर्णाली प्रदेशमा ग्लोबल आइएमई बैंकको निःशुल्क स्वास्थ्य शिविर
काठमाडौं । ग्लोबल आइएमई बैंकले लुम्बिनी प्रदेश र कर्णाली प्रदेशमा निशुल्क स्वास्थ्य शिविर सञ्चालन गरेको छ । बैंकले आफ्नो १७औँ वार्षिकोत्सवको अवसरमा बैंकको संस्थागत सामाजिक उत्तरदायित्वअन्तर्गत उक्त प्रदेशमा स्वास्थ्य शिविर सञ्चालन गरेको हो । बैंकले लुम्बिनी प्रदेश अन्तर्गत पाल्पा जिल्ला रैनादेबी छहरा गाँउपालिका वडा नं. ४ स्थित छहरा स्वास्थ्य चौकी र कर्णाली प्रदेश सुर्खेत जिल्ला बिरेन्द्रनगर नगरपालिका वडा नं. १३ जर्बुटा स्वास्थ्य चौकी उक्त शिविर आयोजना गरेको हो । लुम्बिनी प्रदेशमा २०० र कर्णाली प्रदेशमा १५० भन्दा बढि महिलाहरुले आफ्नो स्वास्थ्य चेकजाँच गरेका छन् । यही पौष १७ गते मंगलबारदेखि ग्लोबल आइएमई बैंक १७औं वर्ष पुरा गरी १८औं वर्षमा प्रवेश गरेको छ । उक्त अभियानअन्तर्गत बैंकले नेपाल परिवार नियोजन संघसँगको सहकार्यमा सातवटै प्रदेशहरुमा एकदिने निःशुल्क महिला स्वास्थ्य शिविर सञ्चालन गरिरहेको छ । शिविरमा स्त्रीरोग विज्ञहरुले स्त्रीरोगसम्बन्धी विभिन्न सेवाहरु-महिलाको स्वास्थ्य परिक्षण, पाठेघरको क्यान्सर (भीआईए) परीक्षण, गर्भाशय प्रोल्याप्स केसको उपचार, औषधी वितरण लगायतका सेवाहरु निःशुल्क रुपमा उपलब्ध हुनेछन् । प्रत्येक शिविरबाट पाठेघरको क्यान्सरको प्रारम्भिक लक्षण पत्ता लागेका र पाठेघरको क्यान्सरको गम्भीर बिरामी पहिचान गर्नेछ, जसलाई स्वस्थ नारी पहल कार्यक्रमको दोस्रो चरणमा शल्यक्रिया गरी उपचार गरिनेछ ।
