विपद्पूर्व तयारीका लागि आज एक रुपैयाँ खर्च गर्दा भविष्यमा ४ रुपैयाँ बचाउन सकिन्छ
काठमाडौं । नेपालले जलवायु परिवर्तनबाट भएका विपद्जन्य घटनाहरुलाई विश्वसामु स्पष्टसँग लैजान नसकेको विज्ञहरुले बताएका छन् । विज्ञहरुले नेपालको हकमा जलवायु परिवर्तनमा विभिन्न खालका घटना, परिघटनाहरु भइरहेको जिकिर गरे । वातवरण तथा प्रकोपविद् दीपकविक्रम थापा क्षेत्रीले नेपालले जलवायुजन्य विपद्बाट परेका असरहरु विश्वसामु संख्यात्मक हिसावमा मात्रै देखाएको भन्दै जलवायुबाट निम्तिएका घटनाहरुलाई यथेष्ठ प्रमाणसहित लैजान आवश्यक रहेको बताए । उनले जलवायुजन्य विपद्का घटनाहरु कुन कारणले भएका छन् भन्ने यथेष्ठ प्रमाणहरु जुटाउन सरकासँग आग्रह गरे । हिमाल पग्लिरहेको कुरादेखि कृषि र समाजमा परेको असरलाई राम्रोसँग नियाल्न र विश्वसामु देखाउन नसकेको बताए । विश्वलाई देखाउनका लागि नेपालसँग जलवायुजन्य विपद्बाट भएका घटनाहरु यकिन गरि नसकेको बताए । नेपालसँग जलवायु परिवर्तनका कारण भएका विपद्जन्य घटनाहरु वैज्ञानिक रुपमा पनि प्रमाणित भइसकेको केही घटनाहरु रहेको जानकारी दिए । ‘नेपालको हकमा हामीले जलवायु परिवर्तनमा विभिन्न खालका घटना, परिघटनाहरु पनि देखिरहेका छन् । हामी संख्यात्मक हिसावमा देखायौँ तर त्यसले हामीले कति समस्यामा पारेको छ, यस्ता घटनाहरु कुन कारणले भएका छन् भन्ने यथेष्ठ प्रमाणहरु जुटाएर बोल्न सकेका छैनौँ’, उनले भने । ४० वर्षमा भएका विपद्जन्य घटनामध्ये करिब ८० प्रतिशत जलवायु परिवर्तनबाट विज्ञ क्षेत्रीले विगत ४० वर्षमा भएका विपद्जन्य घटनामध्ये करिब ८० प्रतिशत घटना जलवायु परिवर्तनबाट भएको बताए । उनकाअनुसार युएनले गरेको सर्वेक्षणअनुसार १९७० देखि २०१९ सम्मको तथ्यांकलाई हेर्दा नेपालमा भएका विपद्जन्य घटनामध्ये ७९ प्रतिशत घटना जलवायु परिवर्तनका कारणले भएका छन् । नेपाल जस्तो विकासोन्मुख देशहरु ८० प्रतिशत जलवायु परिवर्तनको जोखिममा परेको बताए । पूर्वसूचना प्रणालीको विकास गर्नसके मात्रै नेपाल जस्ता विकासोन्मुख देशहरुले जलवायुजन्य परिवर्तनका कारण हुने घटनालाई कम गर्नसक्ने जिकिर गरे । पूर्वसूचना प्रणालीलाई विकास गर्न नसके झनै भयावह अवस्था आउने बताए । विकसित देशहरु भन्दा १० गुणा बढी क्षति नेपाल लगायतका देशलाई जलवायु परिवर्तनका कारण भएको बताए । जलवायु परिवर्तनबाट हुने क्षति कम गर्न स्पष्ट योजना बनाउन जरुरी रहेको जानकारी दिए । ‘हामीले विगत ४० वर्षको आँकडालाई हेर्ने हो भने जलवायु परिवर्तनका हिसावले आएको कुराहरुमा लगभग ८० प्रतिशत जलवायु परिवर्तनकै कारणले हाम्रोमा विपद्हरु निम्तिएका छन्, त्यो सबै जलवायु परिवर्तनका कारणले भएको भन्ने देखाएको छ’, उनले भने । विपद्पूर्व तयारीका लागि आज एक रुपैयाँ खर्च गर्दा भविष्यमा ४ रुपैयाँ बचाउन सकिन्छ विपद्विज्ञ क्षेत्रीले नेपालले ०.०२ प्रतिशत मात्रै हरित गृह ग्यास उत्सर्जन गरेको भन्दै कम उत्सर्जन गर्ने देशले नै बढी क्षति व्यहोरिरहेको बताए । उनले नेपाल ज्लवायुजन्य विपद् बढी व्यहोर्ने देशमा चौथो नम्बरमा रहेको बताए । उनले यसबारेमा विश्वस्तरमा एक आवाजमा लैजानसके सो बराबरको क्षति विकसित देशहरुले व्यहोर्ने वातावरण बन्ने जानकारी दिए । यस्तै, उनले विकासका बजेटहरुमा नेपालले लगभग ०.४७ प्रतिशत मात्रै लगानी गरेको बताए । विपद्सम्बन्धी बजेटमा ४ प्रतिशत बजेट मात्रै विपद्पूर्व तयारीको लागि प्रयोग हुने गरेको बताए । संयुक्त राष्ट्रसंघका महासचिव एन्टोनियो गुटेरेसको नेपाल भ्रमणमा जलवायु परिवर्तनको बारेमा वकालत गरिएको भएपनि त्यसपछिका दिनमा जलवायु परिवर्तनसम्बन्धी मुद्दालाई कम प्राथमिकता दिइएको बताए । जलवायु परिवर्तनका कारण प्रकोपीय जोखिमका हिसावमा नेपाल खतरायुक्त रहेकोबारे विश्वलाई बुझाउन सक्नुपर्ने जानकारी दिए । ‘नेपाल जस्तो देश जसले ०.०२ प्रतिशत मात्रै हामीले हरित गृह ग्यास उत्सर्जन गर्दछौँ । तर हामी जस्तो देशहरुले धेरै नै क्षति व्यहोरिरहेको छ, त्यो माथि भइसकेपछि उनीहरुले त्यति नै बराबरको क्षति बराबरको पैसा दिइराख्ने भनेको पनि इजि टाक्स होइन’, उनले भने । उनले नेपालमा जलवायु परिवर्तनका कारण नेपालको संस्कृति र हिमाली क्षेत्रका नागरिकमा बढी असर परेको बताए । ग्रामिण भेगसम्म जलवायु परिवर्तनका असरबारे जानकारी गराउन नसके अनुकुलतातर्फ लैजान नसकिने बताए । अहिले १ डलर विपद्पूर्व तयारीका लागि गर्ने हो भने भविष्यमा ४ डलर रुपैयाँ जोगाउन सकिने जानकारी दिए ।
सन् २०२५ मा ७.५ प्रतिशत पर्यटन राजस्व वृद्धि गर्ने थाइल्याण्डको लक्ष्य
काठमाडौं । थाइल्याण्डले २०२५ मा ७.५ प्रतिशत पर्यटन राजस्व वृद्धि गर्ने लक्ष्य लिएको छ । थाइल्याण्डले ३.४ ट्रिलियन भाट (लगभग ९४.१६ बिलियन अमेरिकी डलर) को राजस्व उत्पन्न गर्ने लक्ष्य राखेको हो । उच्च मूल्यको पर्यटनमा रूपान्तरणसँगै राज्यले गुणस्तरीय पर्यटकलाई राम्रोसँग समायोजन गर्न आफ्नो पर्यटन आपूर्ति शृङ्खलालाई स्तरोन्नति गर्दै आयको निष्पक्ष र समन्यायिक वितरण सुनिश्चित गर्न दिगो मापदण्ड र आकर्षक गन्तव्यहरूको प्रवर्द्धनमा ध्यान केन्द्रित गर्ने पर्यटन तथा खेलकुदमन्त्री सेर्मसाक पोङपानीतले पत्रकार सम्मेलनमा बताए । सोमबारदेखि लागु हुने गरी थाइल्याण्डले ९३ देश र क्षेत्रका नागरिकहरूलाई समावेश गर्न आफ्नो भिसा–मुक्त प्रवेश योजना बिस्तार गरेको छ ।
कुसोमको रोजगार मेला सुरु हुँदै, सहभागिताका लागि ३ गतेसम्म कम्पनी दर्ता गर्नुपर्ने
काठमाडौं । काठमाडौं विश्वविद्यालय स्कूल अफ म्यानेजमेन्ट (कुसोम) प्लेसमेन्ट सेलले यही साउन २४ र २५ गते रोजगार मेला गर्ने भएको छ । कुसोम जब तथा इन्टर्नसिप फेयर (केजेआईएफ) ललितपुरको बालकुमारीस्थित कुसोम परिसरमा हुनेछ । विद्यार्थी र रोजगारदातालाई एउटै मञ्चमा ल्याउन यसपालि पनि मेलालाई निरन्तरता दिन लागेको कुसोम प्लेसमेन्ट सेलले जनाएको छ । कम्पनीका अनुसार मेलाले विद्यार्थीलाई आफ्नो क्षमता र दक्ष प्रदर्शन गर्न तथा कम्पनीको प्रत्यक्ष सम्पर्कमा आउन अवसर प्रदान गर्नेछ । मेलामा कुसोमका स्नातक र स्नातकोत्तर विद्यार्थीले प्रतिष्ठित कम्पनीका प्रतिनिधिसँग प्रत्यक्ष भेटघा गर्ने अवसर पाउनेछन् । विद्यार्थीलाई करियरको सही सुरुवात गराउनु र कम्पनीहरुलाई प्रतिभाशाली कर्मचारी चयनमा सहयोग गर्नु मेलाको मुख्य उदेश्य रहेको छ । मेलामा सूचना प्रविधि, उत्पादन, बैंकिङ, अर्थशास्त्र लगायत विभिन्न क्षेत्रका कम्पनीको सहभागिता रहनेछ। सिप्रदी ट्रेडिङ, इन्फोडेभलपर्स, वरुण बेभरेजेस, लिपफ्रग, बिजनेस ब्रेन्ज जस्ता कम्पनी सहभागी हुने सुनिश्चित भइसकेको छ। इच्छुक कम्पनीले मेलामा सहभागिताका लागि साउन ३ गतेसम्म दर्ता गराइ सक्नुपर्ने कम्पनीले बताएको छ ।
उच्च बिन्दुमा पुगेपछि घट्यो सुनको मूल्य, कतिमा हुँदैछ कारोबार ?
काठमाडौं । बुधबार उच्च बिन्दुमा पुगेको सुनको मूल्य बिहीबार तोलामा ३ सय रुपैयाँले घटेको छ । बुधबार प्रतितोला १ लाख ४९ हजार ८ सय रुपैयाँमा कारोबार भएको छापावाला सुन बिहीबार १ लाख ४९ हजार ५ सय रुपैयाँ निर्धारण भएको छ । बुधबार सनुको मूल्यले नयाँ कीर्तिमान कायम गरेको थियो । बुधबार प्रतितोला १ लाख ४९ हजार १ सय रुपैयाँमा कारोबार भएको तेजाबी सुन बिहीबारका लागि भने १ लाख ४८ हजार ८ सय रुैयाँ निर्धारण भएको छ । त्यस्तै चाँदीको मूल्य तोलामा ३५ रुपैयाँले घटेको छ । बुधबार प्रतितोला १ हजार ८ सय ९५ रुपैयाँमा कारोबार भएको चाँदी बिहीबार १ हजार ८ सय ६० रुपैेयाँमा कारोबार भइरहेको छ ।
महानगर आफैँ डुबानमा, राष्ट्रिय सभागृह जलमग्न
काठमाडौं । जनताको घर तथा बस्ती डुबानमा पर्दा जोखिम मुक्त बनाउने स्थानीय सरकार काठमाडौं महानगरपालिका आफैँ डुबानमा परेको छ । बुधबार रातिको अविरल वर्षाका कारण राष्ट्रिय सभा गृह डुबानमा परेको हो । राष्ट्रिय सभा गृहमा काठमाडौं महानगरपालिकाका प्रमुख र उपप्रमुखको कार्यालय रहेको छ । बुधवार राति भएको वर्षाका कारण सभागृह डुबानमा परेको छ । सभागृहभित्र सञ्चालित राष्ट्रिय परिचयपत्रका लागि फोटो खिचाउने स्थान, मेट्रो एफ।एम, नगर प्रहरी सुरक्षा कक्ष पनि डुबानमा परेको हो । केही दिनअघि परेको वर्षाका कारण काठमाडौंको वागमती, विष्णुमती तथा धोविखोला आसपासका क्षेत्र डुबानमा परेका थिए । त्यसबेला मेयर बालेन्द्र साहले एमाले अध्यक्ष केपी शर्मा ओलीका बिरुद्ध सामाजिक सञ्जालमा आक्रोश पोखेका थिए । सोही दिन उनको कार्यालय सभागृह पनि डुबेको थियो तर त्यसबारे कुनै सोधखोज भने गरिएन । काठमाडौं महानगरपालिकाका प्रमुृख प्रशासकीय अधिकृत प्रदीप परियारको नेतृत्वको टोलीले डुबानको अनुगमन पनि ग¥यो । तर काठमाडौं महानगरपालिकाका प्रमुख, उपप्रमुख एवं प्रशासकीय अधिकृतको कार्यालय रहेको सभागृह डुबानमा पर्दा भने न अनुनगमन भयो न जोखिममुक्त गराउन नगर प्रहरी नै खटियो । हरेक वर्षा याममा घण्टाघर, रन्तपार्क देखिको पानीको भेल प्रदर्शनीको नाला हुँदै टुकुचा खोलामा जाने गर्दथ्यो । तर यो वर्ष सभागृहको गेटदेखि टुकुचासम्मको पैदलमार्ग करोडौ खर्च गरेर फराकिलो बनाउने क्रममा नाला बिस्थापित गरी ह्युम पाईप बिछ्याएका कारण ठूलो भेल सभागृहभित्र प्रवेश गर्ने गरेको छ । त्यस्तै सभागृहको पानी निकासको ढल पुलिस क्लव तर्फबाट टुकुचासम्म लगिएको थियो । अहिले महानगर आफैँले सभागृह पुनःनिर्माणका गर्दैगर्दा पश्चिम तर्फको ढलको मंगलको निर्माण गरेको तर निकास नबनाएका कारण सभागृह डुबानमा परेको हो । सभागृह डुवानमा परेपछि मेयर बालेन्द्र साह तथा उपमेयर सुनिता डंगोल सभागृहमा रहेको कार्यालय आएका छैनन् । मेट्रो रेडियो प्रशारण समेत प्रभावित बनेको छ । त्यस्तै राष्ट्रिय परिचय पत्र बनाउन आउने सेवाग्राही विहानैदेखि डुबानमै लाईन बसिरहेको देख्न सकिन्छ ।
ढिलो विवाह र बदलिँदो जीवनशैलीले बढ्दै बाँझोपन
तपाईं महिला हुनुहुन्छ, अनि तपाईंलाई कुनै पनि जटिल खालको रोग लागेको छैन र तपाईंसँग पाठेघर छ भने अब सन्तान हुँदैन भन्ने पीर लिनुपर्दैन । स्वास्थ्य क्षेत्रमा प्रविधिले निकै फड्को मारिसकेको छ । अब भाग्यलाई सराप्दै रोएर बस्ने दिन गए । बरु तपाईं दम्पतीसँगै हुनुहुन्छ, कुनै पनि परिवार नियोजनका साधान प्रयोग नगरी सम्पर्क राखिराख्नुभएको छ, तर गर्भ रहेन भने तुरुन्तै चिकित्सकको सल्लाह लिनुपर्छ । उमेर पुगेका मात्र हैन बिहे गरिसकेका दम्पतीले एकपटक चिकित्सकको सल्लाह लिन उपयुक्त हुन्छ । अहिले हरेक अस्पतालमा स्त्री रोग विशेषज्ञहरू उपलब्ध छन् । कहिलेकाहीँ सामान्य समस्याले पनि गर्भ नरहने समस्या हुन्छ भने कुनै समस्या जटिल पनि हुन सक्छ । यस्तो अवस्थामा जाँच गरेर उपचार गराउनुपर्छ । धेरैजसो समस्या सामान्य उपचारमा निको हुन्छ । बाँकी दुई/तीन प्रतिशत दम्पतीको हकमा भने फर्टिलिटी अथवा प्रविधिको प्रयोग गरी बच्चा जन्माउनुपर्ने अवस्था हुन्छ । आजभोलि नेपाली महिला र पुरुषमा बाँझोपनको समस्या बढ्न थालेको छ । मैले बााझोपन क्षेत्रमा काम सुरु गरेको १५ वर्ष बढी भयो । आजभन्दा १५ वर्ष पहिले र अहिलेको अवस्थालाई मात्र हेर्ने हो भने पनि बाँझोपनको समस्या बढ्दै गएको पाइन्छ । यस्तै संक्रमण दर पनि बढेको छ । अहिले ओपीडिमा आउने बिरामीहरू संक्रमण र बाँझोपनको समस्या लिएर आउँछन् । यसमा दुइटा कारण हुन सक्छ । पहिलो कुरा हामी पहिले डाइनोज धेरै गर्दैनौँ , अर्काे धेरै बिरामीहरूमा जनचेतना छैन । जीवनशैली (लायफस्टायल) परिवर्तनले पनि समस्या आउँछ, अर्को वातावरण, खानपानको कारण पनि बाँझोपन बढेको छ । महिलामा मात्र हैन पछिल्लो १० वर्षमा बाझोपन हुने पुरुषको संख्यामा पनि बढेको छ । महिलामा बाँझोपन हुनुको कारण सबभन्दा बढ्दो उमेरले भइरहेको मैले पाएको छु। पहिले पहिले केटी मान्छेले कम उमेरमै बिहे गर्थे । मान्छेको जीवनशैली फरक थियो , अभिमुखिकरण पनि कम थियो । अहिले समय परिवर्तन भएकाे छ । मैले उमेर नपुग्दै बिहे गर्नुपर्छ भनेको होइन । तर, धेरै उमेरपछि बिहे गर्नु पनि राम्रो मानिँदैन । अहिले मान्छेलाई पहिले पढाइ त्यसपछि जागिर र पछिमात्र विवाह अर्थात विवाहलाई तेस्रो प्राथमिकतामा राखेका छन् । विवाह गरिहाले पनि बच्चा ढिला जन्माउने निर्णयले महिलाको हकमा अण्डा घटाउँदै जान्छ । महिलाको उमेर ३० भन्दा उकालो लागेपछि अण्डाको मात्रा तीव्र रूपमा घट्दै जान्छ र जसका कारण बाँझोपन हुन्छ । त्यसैगरी संक्रमणका कारण पनि यो समस्या आउँछ । समयमै अथवा ३० वर्षभन्दा कम उमेरमा विवाह भयो र बच्चा जन्मियो भने संक्रमण हुन पाउँदैन । अहिले ढिलो विवाह गरे पनि कतिपय सेक्सुअल्लीरूपमा एक्टिभ भइरहेका हुन्छन् र संक्रमण भएको हुन्छ । सम्पर्क गरिरहने तर धेरै लामो समयसम्म बच्चा नपाउने हँदा संक्रमण पाठेघरमा गएर ट्युब्सलाई ब्लक गर्छ र इन्फर्टलिटी हुन्छ । त्यस्तै आजभोलि जाँड, रक्सी, चुरोट सेवनले गर्दा पनि यो समस्या भएको हुन्छ भने अर्का कारण तनाव पनि हाे । त्यस्तै मान्छेको खानपान जीवनशैलीले पनि यसमा धेरै भूमिका खेल्छ । ५८ वर्षको महिला पनि आमा बन्छन् अहिले मसँग उपचारका लागि आउने महिलाहरू बढ्दो उमेरले बच्चा जन्माउन नसकेकाहरू बढी छन् । ४० देखि ४५ वर्ष उमेरका बढी महिलाहरू आउँछन् । तर, उमेर बढ्दैमा बच्चा जन्माउन मिल्दैन भन्ने होइन । म ४० पुगिसके अब मेरो बच्चा हुँदैन, बच्चा भए पनि त्यति स्वस्थ हुँदैन भन्ने गुनासो धेरैको सुनिन्छ । तर, त्यस्तो हुँदैन । हामीले कुनै पनि प्रेगनेन्सी प्लान गर्दा स्किृनिङ गर्छौँ त्यसपछि बच्चा पेटमा आइसकेपछि पनि केही जाँच गर्छौँ । यसो गर्दा बच्चा स्वस्थ भएको थाहा हुन्छ । ४० वर्ष पुगे पनि बच्चा जन्माउन सकिन्छ । मैले आफै ५७–५८ वर्ष पुगेका महिलाहरूको पनि बच्चा जन्माइदिन गरेको प्रयास सफल भएको छ । जसको महिनावारी सुकिसकेको थियो । यस्तो अवस्थामा जवान महिलाको अण्डा लिएर उनको श्रीमानको स्पोम लिएर गर्भवती बनाइदिन्छौँ । तर, उमेर बढी हुनेबित्तिकै डाउनसिन्ड्राेम हुने जोखिम बढी हुन्छ । यस्तोमा पनि हामीले पटक पटक जाँच गरेर जोखिम कम गर्न सक्छौँ । ३०– ३५ वर्षको हुने बित्तिकै डाउनसिन्ड्रोमका लागि स्किृनिङ गर्छाैं यसको मतलब जुनसुकै उमेरको महिलाले बच्चा जन्माउँदा ठिक हुन्छ तर सबैकुरा ट्याकलक गर्न सकिन्छ । कुनै पनि महिला अथवा दम्पती अब बच्चा जन्माउन सकिदैन भनेर त्यत्तिकै बस्नुपर्ने अवस्था छैन । तर, यसका लागि स्वस्थ हुुनुपर्यो । महिनावारी रोकिएका पनि आमा बन्न सक्छन् महिनावारी रोकिएका महिलाहरूलाई पनि प्रविधिको सहयोगले आमा बनाउन सकिन्छ । यसका लागि सबैभन्दा पहिले महिलालाई हर्मोन थेरापी दिएर महिनावारी गराउनुपर्छ । जवान केटीको अण्डा लिएर श्रीमानको स्पोम लिएर बच्चा बनाएर पाठेघरमा हाल्नुपर्छ । पुरुषको हकमा महिलाको जस्तै अण्डा घट्ने समस्या ३०–३५ वर्षको उमेरमै हुँदैन । महिलाको ३० वर्षपछि अण्डाको मात्रा सवाट्ट घट्छ भने पुरुषको ४०–४५ पछि कम हुँदै जान्छ । यसमा पनि कुनै समस्या देखियो भने डोनरको स्पोम प्रयोग गर्न पनि सकिन्छ । १५ वर्षमा यस्ता धेरै दम्पतीहरूलाई सेवा दिएर हजारौं बच्चा जन्माउन सफल पनि भएको छु । यस्ता धेरै दम्पती बच्चा लिएर फ्लोअपमा आउँछन् । १५–२० वर्ष हुँदा पनि बच्चा नबसेकाहरू लामो समयपछि हामी कहाँ आएर बच्चा जन्माउँछन्, उनीहरूमा खुसी कति हुन्छ हामीले भन्न सकिँदैन । उनीहरू खुसी भएको देख्दा खुसी लाग्छ । पहिलेभन्दा अहिले धेरै कुरामा परिवर्तन हुँदै आएको छ । १५ वर्षअघि आइभिएफ सुरु गर्दा धेरै फरक थियो । अहिले मेसिनरी राम्रो भइसक्यो । सक्सेस रेट पनि राम्रो भइरहेको छ । प्रोटोकल पनि राम्रो छ । याे वर्षैपिच्छे राम्रो हुँदै जान्छ । आजभोलि मान्छे खुल्न थालेका छन् । सबैजना सुरक्षित छन् । अण्डा निकालेर फ्रिज गर्नेहरू पनि आउँछन् । प्रविधिले सबैकुरा सम्भव बनाएको छ । तर, म उमेर ढल्कन नदिनुहोस् भन्छु । समयमै बच्चाको योजना बनाउनुहोस र बच्चा जन्माउने योजना बनाउनुअघि चेकजाँच अनिवार्य गराउनुहोस् । यति गर्नुभयो भने तपाईंको खुसी दुःखमा परिणत हुन सक्दैन । (स्त्री रोग एवं टेस्ट्युब बेबी विशेषज्ञ डा.नुतन शर्मासँग गरिएकाे कुराकानीका आधारमा)
उत्पादनमा आधारित अनुदानले दूध उत्पादन बढ्यो
बलेवा । भेटेरिनरी अस्पताल तथा पशु सेवा विज्ञ केन्द्रले दूध उत्पादक किसानलाई १६ लाख ५७ हजार रुपैयाँ अनुदान वितरण गरेको छ । व्यावसायिक रूपमा पशुपालन गरिरहेका किसानलाई प्रोत्साहन गर्न केन्द्रले गत आर्थिक वर्षमा अनुदानस्वरुप उक्त रकम प्रदान गरेको हो । केन्द्रले जिल्लाका छवटा सहकारीमार्फत दूध बिक्री गर्ने किसानलाई उत्पादनका आधारमा अनुदान दिएको केन्द्र प्रमुख डा ऋषिराम सापकोटाले बताए । कार्यालयले प्रतिलिटर दुई रुपैयाँ ५० पैसाका दरले अनुदान उपलब्ध गराएको हो । ‘स्थानीय तहमा उत्पादनमा आधारित अनुदान कार्यक्रम भए पनि विज्ञ केन्द्रसँग किसान जोडिनुभएको छ’, सापकोटाले भने, ‘संस्थागत बिक्रीका आधारमा मात्र अनुदान दिने मापदण्ड भएकाले संस्थागत बिक्री नगर्ने किसान अझै छुट्नुभएको छ ।’ कार्यालय तथा सरोकारवालाले पशुपालनमा अनुदानको व्यवस्था गरेपछि पछिल्लो केही वर्षयता बागलुङ दूध र मासु आत्मनिर्भर बनेको छ भने अण्डामा आत्मनिर्भर उन्मुख छ । प्रतिव्यक्ति प्रतिवर्ष न्यूनतम ९१ लिटर दूध आवश्यक पर्नेमा बागलुङमा ९३ लिटर उपलब्ध छ । ‘दूध र मासु निर्यात हुन्छ, यो सङ्गठित किसानको तथ्यांक हो, किसान आफैँले बजार पुर्याएर बिक्री गरेको अझै धेरै परिमाणमा निर्यात हुन्छ’, विज्ञ केन्द्रका वरिष्ठ पशु प्राविधिक केशव शर्माले भने, ‘हामी पशुजन्य उत्पादनमा आत्मनिर्भर हुने चरणमा छौँ ।’ विज्ञ केन्द्रले अघिल्लो आवमा बाँझो जग्गामा घाँसखेती गर्नेलाई अनुदान उपलब्ध गराएको थियो । घाँसखेती प्रवर्द्धन कार्यक्रममार्फत घाँसखेती गर्ने किसानलाई प्रतिरोपनी तीन हजार रुपैयाँका दरले अनुदान उपलब्ध गराइएको हो ।
नेपाल मेडिसिटी हस्पिटल र नेपाल एसबिआई मर्चेण्टबीच व्यवसायिक सम्झौता
काठमाडौं । नेपाल मेडिसिटी हस्पिटल र नेपाल एसबिआई मर्चेण्ट बैंकिङबीच व्यवसायिक सम्झौता भएको छ । बुधबार हस्पिटल र नेपाल एसबिआई मर्चेण्ट बैंकिङबीच व्यवसायिक सहकार्य गर्ने सहमतिपत्रमा हस्ताक्षर भएको छ । सहमतिपत्रमा नेपाल मेडिसिटी हस्पिटलका कर्पाेरेट डेभलपमेण्ट प्रमुख पंकज बास्कोटा र नेपाल एसबिआई मर्चेण्ट बैंकिङका प्रबन्ध सञ्चालक तथा प्रमुख कार्यकारी अधिकृत लेखनाथ पोख्रेलले हस्ताक्षर गरेका हुन् । उक्त सहमतिपत्रमा उल्लेख भए बमोजिम नेपाल एसबिआई बैंकका सम्पूर्ण शाखा कार्यालयहरु तथा नेपाल एसबिआई मर्चेण्ट बैंकिङ लेखनाथमार्ग ठमेल, काठमाडौंमार्फत नयाँ डिम्याट खाता खोल्दा वा हाल कायम डिम्याट खाता सञ्चालन गर्दै आएका डिम्याट सेवा प्रयोगकर्ता ग्राहकहरुले नेपाल मेडिसिटी हस्पिटलले प्रदान गर्ने विभिन्न स्वास्थ्य सेवामा विशेष छुट प्रदान गर्ने सहमति भएको छ । एनएसएमबीएल एक्सक्लुसीप हेल्थ चेकअप प्याकेज अन्र्तगत ४० वर्ष भन्दा माथिका पुरुष तथा महिला, ४० वर्ष भन्दा मुनिका महिला तथा पुरुषहरुलाई औषतमा ४० प्रतिशतसम्म छुट प्रदान गर्ने सम्झौता भएको हो । सम्झौता कार्यक्रममा नेपाल एसबिआई मर्चेण्ट बैंकिङ लिमिटेडका प्रबन्ध सञ्चालक तथा प्रमुख कार्यकारी अधिकृत लेखनाथ पोख्रेलले यो सहकार्यमा जोडिन पाउँदा खुसी व्यक्त गरे भने नेपाल मेडिसिटी हस्पिटलका कर्पाेरेट डेभलपमेण्ट प्रमुख पंकज बास्कोटाले पनि आपसी सहकार्यबाट व्यवसायिक उचाइ हासिल हुने अपेक्षा राखे । समारोहमा दुईवटै संस्थाका कर्मचारीहरुको उपस्थिति रहेको थियो ।