एक वर्षमै सैनिक कल्याणकारी कोषमा थपियो ४ अर्ब ८५ करोड
काठमाडौं । सैनिक कल्याणकारी कोषको सम्पत्ति ८२ अर्ब ८८ करोड ७४ लाख रुपैयाँ पुगेको छ । कोषमा एकै वर्षमा ४ अर्ब ८५ करोड २७ लाख रकम वृद्धि भएको छ । बिहीबार पत्रकार सम्मेलन गर्दै नेपाली सेनाले २०८१ असार मसान्त सम्ममा कल्याणकारी कोषमा ७५ अर्ब ९० करोड ८८ लाख रुपैया पुगेको जानकारी दिएको छ । २०८० असार मसान्त सम्ममा कोषमा ७१ अर्ब ५ करोड ६१ लाख मौज्दात थियो । कोषको ४ करोड ७७ लाख ७४ हजार रुपैयाँ बेरुजु देखिएको छ । बेरुजु फर्छ्योटको प्रक्रियामा रहेको सेनाले जनाएको छ ।
मास्टरसेफ शाहको रेसिपीमा ‘टु पिएम’ भेज र चिकेन मसला करी चाउचाउ बजारमा
काठमाडौं । साढे दुई दशकको इतिहास बोकेको एसियन थाइ फुड्स प्रालिले टु पिएम चाउचाउका थप दुई भेरियन्ट सार्वजनिक गरेको छ । कम्पनीले टु पिएम चाउचाउका ब्राण्ड एम्बास्डर समेत रहेका मास्टरसेफ सन्तोष शाहको रेसिपी अनुसार तयार पारिएको टु पिएम चाउचाउको दुई नयाँ भेरियन्ट भेज मसला करी र चिकन मसला करी बजारमा ल्याएको हो । ‘सही छ’ भन्ने नारासहित बजारमा ल्याइएको यस चाउचाउको स्वाद, गुणस्तर र प्याकेजिङजस्ता सबै पक्षहरूमा उत्कृष्ट रहेको कम्पनीले बताएको छ । टु पिएम चाउचाउको यी दुई नयाँ भेरिएन्ट विकास गर्नलाई धेरै समय लागेको मास्टरसेफ सन्तोष शाह बताउँछन् । उनले यो रेसिपी निकै स्वादिष्ट भएकाले उपभोक्ताले रुचाउने विश्वास लिएको बताए । नेपाललाई प्रोमोसन गर्न यस कम्पनीले योगदान गरेको उनको भनाइ छ । ‘हामी भित्र्याउँछौँ मात्रै तर पठाउँदैनौँ । तर यो कम्पनीले चाउचाउलाई ३० भन्दा बढी मुलुकमा पठाइरहेको सुन्न पाउँदा गर्व लागेको छ’, उनले भने । केही समयअघि देखि उत्पादन रोकिएको टु पिएम चाउचाउको पुनस् उत्पादन तथा बिक्री वितरण सुरू गरेको कम्पनीले जनाएको छ । २०५६ मा स्थापित एसियन थाई फुड्सले २०५७ मा पहिलो चाउचाउ बजारमा ल्याएको थियो । विगतका २५ वर्षमा कम्पनीले रमपम, प्रिती र टु पिएम जस्ता अग्रणी ब्राण्डहरू बजारमा उपलब्ध रहेको छ । यसले टु पिएम र रमपम ब्राण्ड अन्तर्गत विभिन्न स्न्याक्सहररु बजारमा ल्याएको छ । अकबरे चिकन चाउचाउ ५० रुपैयाँमै किन्न सकिने कम्पनीले जनाएको छ । यससँगै अकबरे भेज, कोरियन रामेन, किमची भेज, किमची चिकन, नापोलिटाना, सि फुड, चिज मशरुम जस्ता उत्पादनहरू पनि बजारमा रहिरहने कम्पनीले जनाएको छ । कम्पनीले स्न्याक्सतर्फ भने प्रिमियम चिज बल्स, अकबरे स्टिक्स, फायर बल्स, स्रिम्प क्रैकर, अनियन रिंग, पञ्जाबी तड्का, फायर क्रैकर, लेमन मिन्ट स्टिक्स, मसला स्टिक्स, पास्ता जस्ता उत्कृष्ट उत्पादनहरू रहेको जानकारी दिएको छ । एसियन थाई फुड नेपालमा प्रिमियम श्रेणीका चाउचाउ उत्पादन गर्ने पहिलो कम्पनी हो । कम्पनीले स्थानीय रूपमा उब्जाइएको अकबरे खुर्सानी प्रयोग गरेर टु पिएम अकबरे चाउचाउ उत्पादन गर्दै आएको छ। चाउचाउ रुचाइएकाले खुर्सानीको समेत आपूर्ति बढिरहेको भन्दै कम्पनीले यसले स्थानीयलाई आर्थिक रुपमा समेत लाभ मिलेको जनाएको छ । ‘किसानलाई अकबरे खुर्सानी खेतीतर्फ आकर्षक बढिरहेको छ’, कम्पनीले भनेको छ । ‘हामी मास्टरशेफ सन्तोष शाहद्वारा तयारी र सिफारिस गरिएका नयाँ टु पिएम चिकन मसला र भेज मसला करी नूडल्स बजारमा ल्याउन पाउँदा निकै उत्साहित छौँ’, कम्पनीका प्रबन्ध निर्देशक महेश जाजुले भने । मास्टरशेफ शाहले आफ्नो वर्षौंको अनुभवलाई प्रयोग गरेर यो प्रामाणिक र स्वादिष्ट टु पिएम चाउचाउ बनाएको जाजुले बताए । ६० ग्रामको प्याकेज २० रुपैयाँमा उपलब्ध हुने यस चाउचाउले उपभोक्तालाई ‘आहा क्या मिठो’ भन्न बाध्य पार्ने जाजु बताउँछन् । कम्पनीले विगतका केही वर्षमा अन्तर्राष्ट्रिय बजारमा चाउचाउको निर्यात समेत बढाउँदै लगेको छ। भारत, मध्य पूर्व, टर्की, अफ्रिका जस्ता मुलुकमा आयोजित विश्वका विभिन्न मुलुकमा चाउचाउहरू निर्यात गरि विश्वव्यापी उपभोक्ताहरूसम्म पुर्याइएको उनले बताए । २७ भन्दा बढी देशहरूमा निर्यात गर्दै नेपालबाट चाउचाउ र स्न्याक्सका सबैभन्दा ठूला निर्यातकर्ताहरूमा कम्पनी पर्ने उनको दाबी छ । उनका अनुसार टु पिएम चाउचाउलाई अष्ट्रेलिया, बहराइन, बेल्जियम, भूटान, क्यानडा, चीन, डेनमार्क, फिनल्याण्ड, जर्मनी, हङकङ, भारत, इजरायल, इटली, जापान, कोरिया, कुवेत, मलेशिया, माल्टा, न्यूजील्याण्ड, ओमान, प्यालेस्टाइन, कतार, साउदी अरब, यूएई, यूके, अमेरिका, यमन जस्ता देशहरूमा उपलब्ध गराउँदै आएको छ । ‘नेपालका उत्पादनहरूलाई यति धेरै देशहरूमा चिनाउन र विदेशी मुद्रा ल्याएर नेपालको व्यापार घाटालाई कम गर्नमा योगदान दिन पाउँदा हामीलाई सन्तुष्टि र राष्ट्रिय गर्वको अनुभव हुन्छ,’ जाजुले भने । कम्पनीले केही समयमै ‘क्यानमा स्न्याक्स’ र ‘कप नूडल्स’ जस्ता अझै प्रिमियम उत्पादनहरू बजारमा ल्याउने जाजुले बताए ।
सिन्धु विकास बैंकको सचिवको जिम्मेवारी प्रमोद न्यौपानेलाई
काठमाडौं । सिन्धु विकास बैंकको कम्पनी सचिवको जिम्मेवारी सहायक प्रमुख अधिकृत प्रमोद न्यौपानेलाई दिइएको छ । साउन ३ गते बैंक सञ्चालक समितिको बैठकले कम्पनी सचिवको जिम्मेवारी न्यौपानेलाई दिने निर्णय गरेको हो ।
पीडितलाई न्याय महसुस हुने गरी कार्यसम्पादन गर्नेछु : महान्यायाधिवक्ता बडाल
काठमाडौं । नवनियुक्त महान्यायाधिवक्ता रमेश बडालले संविधान र कानुनको दायरमा रहेर पीडितलाई न्याय महसुस हुने गरी कार्यसम्पदान गर्ने बताएका छन् । उनले बिहीबार पदवहालीका क्रममा संविधान र कानुनले निदृष्ट गरेका अधिकार पालना गर्दै पीडितलाई न्याय हुनेगरी कार्यसम्पादन गर्ने बताए । ‘पीडितलाई न्याय दिने दायित्व यस कार्यालयको हो, संवैधानिक दायराभित्र रहेर आफ्नो दायित्व पूरा गर्नेछौँ’, महान्यायाधिवक्ता बडालले भने, ‘मुद्दाको अभियोजन गर्दा दोषी व्यक्तिलाई मात्र गर्ने गर्छौँ ।’ उनले सरकारी वकिललाई पहिलो न्यायाधीश मानिने भएकाले मुद्दाको राम्रो अध्ययन गरेर अघि बढ्न सुझाव दिए । महान्यायाधिवक्ता कार्यालयले अभियोजन र सरकारलाई उचित कानुनी सल्लाह दिने, सरकारलाई परेको मुद्दाको प्रतिरक्षा गर्नेलगायत काम गर्ने भएकाले आफूले संवैधानिक दायित्व पूरा गर्ने बडालले प्रतिबद्धता व्यक्त गरे । उनले बिगो प्रणालीमा मापदण्ड निर्धारण गरी क्षतिपूर्ति निर्धारण गर्ने विषयमा छलफल गर्ने र अभियोजनमा एकरुपता ल्याई अदालतलाई न्याय प्रदान गर्ने काममा सबैबाट सहयोग पाउने विश्वाससमेत व्यक्त गरे । राष्ट्रपति रामचन्द्र पौडेलको समुपस्थितिमा प्रधानन्यायाधीश विश्वम्भरप्रसाद श्रेष्ठले नवनियुक्त महान्यायाधिवक्ता रमेश बडाललाई पद तथा गोपनीयताको शपथग्रहण गराएका थिए । प्रधानमन्त्रीको सिफारिसमा बुधबार राष्ट्रपतिले सरकारको कानुनी सल्लाहकारका रूपमा बडाललाई नियुक्त गरेका थिए । यसअघि, बडाल छोटो समयका लागि महान्यायाधिवक्ता हुनुभएको थियो ।
राष्ट्रिय दायित्व पूरा गर्न उद्योगमा लगानी वृद्धि आवश्यक : उद्योगमन्त्री भण्डारी
काठमाडौँ, साउन ३ गते । उद्योग वाणिज्य तथा आपूर्तिमन्त्री दामोदर भण्डारीले मुलुकको राष्ट्रिय दायित्वलाई पूरा गर्न उद्योगमा लगानी वृद्धि गरी सञ्चालन गर्न आवश्यक रहेको बताएका छन् । बिहीबार बसेको प्रतिनिधि सभाअन्तर्गतको उद्योग तथा वाणिज्य र श्रम तथा उपभोक्ता हित समिति बैठकमा बोल्दै मन्त्री भण्डारीले यस्तो बताएका हुन् । उनले रोजगारी सिर्जना गरी विदेश पलायन हुने युवा जनशक्ति रोक्नका लागि उद्योग सञ्चालन गर्नु जरुरी रहेको बताए । उनले मुलुकमा उद्योगमा लगानी वृद्धि गरी रोजगारी सिर्जना गरेर युवाहरूलाई स्वदेश फर्काउन सकिने बताए । उनले उद्योग मन्त्रालय नीतिगत रूपमा अहिले पनि ओझेलमा परेको जिकिर गरे । मन्त्री भण्डारीले उद्योग तथा आपूर्ति मन्त्रालयले माग गरे अनुसारको नीतिगत व्यवस्था अझै पनि प्राप्त गर्न नसकेको बताए । उनले मन्त्रालयले नीतिगत सुधारका पक्षहरूलाई विशेष महत्त्वका साथ सुधारका पक्षमा काम गरिरहेको बताए । उनले लगानी सम्मेलनपछि लगानी सहजीकरणका लागि आवश्यक ऐन संशोधनले सबैभन्दा बढी प्रभाव सेजमा देखिएको बताए। सेजलाई मर्ज गर्नुपर्छ भन्ने ठाउँमा पुगेको सरकार अहिले सेजका उद्योगहरू सञ्चालन हुने ठाउँमा पुगेको उनको भनाइ छ । उद्योग मन्त्री भण्डारीले सुर्तीजन्य पदार्थहरूको प्रयोगलाई नीतिमार्फत निरुत्साहित गर्न आवश्यक रहेको बताए । उनले सरकारले नीतिमार्फत निरुत्साहित गर्न आवश्यक भए पनि सरकारले नीतिगत व्यवस्था गरेर उद्योगहरू सञ्चालन गरी रहेको जानकारी दिए । उनले छिमेकी मुलुकमा सुर्तीजन्य पदार्थको उत्पादन र वितरणमा ७५ प्रतिशतसम्म कर लगाएर रोक लगाएको बताए । उद्योग मन्त्री भण्डारीले नेपाल अझै सुर्तीजन्य पदार्थहरूको प्रयोगसम्बन्धी ऐन, कानुन र नीतिमा अभ्यस्त बन्न नसकेको बताए । उनले सुर्तीजन्य उद्योगको क्षमता वृद्धि गर्नेकुरा भन्दा पनि निरुत्साहित गर्न आवश्यक भए पनि उद्योग सञ्चालन गर्नु अहिलेको आवश्यकता भएको बताए । उनले कोभिडपछि नेपालको अर्थतन्त्र आएको शिथिलतले सबैभन्दा ठुलो प्रभाव उद्योग र उत्पादन क्षेत्र भएकाले अर्थतन्त्र र उद्योगमा सङ्कुचन आएको जिकिर गरे ।
कार्यकाल दोहोर्याउने लबिङमा गभर्नर अधिकारी, बाधक बन्न सक्छ ओली-चौधरीको सम्बन्ध
काठमाडौं । गत सोमबार नेपाल राष्ट्र बैंक गभर्नर कार्यालयको सचिवालयबाट बैंकरहरूलाई एउटा सूचना आयो । सूचनामा मौद्रिक नीतिको विषयमा छलफल तथा बैंकरबाट सुझाव माग गर्ने उल्लेख थियो । चालु आर्थिक वर्ष २०८१/८२ को मौद्रिक नीतिका लागि लिखित सुझाव दिइसकेका बैंकरहरू एकछिन अलमलमा परे । पछि सचिवालयमा सम्पर्क गरेर सोध्दा गभर्नरको सचिवालयका व्यक्तिले भने, ‘यो अनौपचारिक छलफल नै हो, कुनै छुटपुट सुझावहरू छन् भने लिनका लागि सबैलाई डाकिएको हो ।’ त्यसपछि नेपाल बैंकर्स संघको कार्यसमिति, डेभलपमेन्ट बैंकर्स एसाेसिएसन नेपाल, नेपाल वित्तीय संस्था संघ, नेपाल लघुवित्त बैंकर्स संघका अध्यक्ष र उपाध्यक्षसहितको समूह मंगलबार साढे १२ बजे राष्ट्र बैंक पुग्यो । गभर्नर महाप्रसाद अधिकारीसहित राष्ट्र बैंकका कार्यकारी निर्देशकहरू पनि उपस्थित भएको उक्त छलफल कार्यक्रम करिब दुई घण्टासम्म चल्यो । छलफलमा बैंकरहरूले गभर्नरको अन्तिम मौद्रिक नीति भएकाले लचिलो र कर्जा विस्तार हुने गरी मौद्रिक नीति ल्याउनुपर्ने माग गरे । बैंकरहरूको भाव थियो, ‘गभर्नरको अन्तिम कार्यकाल भएकाले पनि बजार विस्तार हुने मौद्रिक नीति आओस् ।’ मौद्रिक नीतिको सुझाव दिन आयोजना गरिएका अधिकांश कार्यक्रममा गभर्नर अधिकारीले सुन्न परेको शब्द हो ‘अन्तिम कार्यकाल’ । विभिन्न उद्योगी व्यवसायी तथा बैंकरहरूले पनि हरेक कार्यक्रममा यही शब्द उफार्ने गरेका छन् । तर, त्यो शब्दप्रति उनी सन्तुष्ट छैनन् । वर्तमान प्रधानमन्त्री केपी शर्मा ओली नेतृत्वको सत्ता गठबन्धन आउनुअघि उनले त्यो सहज रूपमा स्वीकारे पनि पछिल्लो समय भने उनी आफ्नो अन्तिम कार्यकाल मान्न तयार छैनन् । किनकि गभर्नर अधिकारीले पृथक रणनीति र योजना अगाडि सारिसकेका छन् । मंगलबार बैंकरहरूसँगको छलफलमा पनि उनले त्यो संकेत देखाए । एक बैंकका सीईओले गभर्नरको अन्तिम कार्यकाल भन्दा उनले त्यसको ‘ट्याकल’ गरे । अर्थात् उनले त्यो शब्दलाई स्वीकार गर्न चाहेनन् । र, उनले हँसिलो मुहारमा भनेको कुरा उदृत गर्दै एक बैंकरले भने, ‘सबैले मलाई अन्तिम मौद्रिक नीति ल्याउँदै भनिरहनुभएको छ, तर मेरो अन्तिम मौद्रिक नीतिभन्दा पनि पहिलो कार्यकालको अन्तिम मौद्रिक नीति हुन सक्छ भन्नुभयाे ।’ ती बैंकरका अनुसार गभर्नर अधिकारीले छलफलमा गभर्नरका रूपमा दोहोरिन चाहेको संकेत व्यक्त गरेका थिए । विसं २०७६ चैतमा राष्ट्र बैंकको गभर्नर बनेका अधिकारीको कार्यकाल आगामी चैतमा सकिँदैछ । पूर्वअर्थमन्त्री डा. युवराज खतिवडाको सिफारिसमा अघिल्लाे कार्यकालमा प्रधानमन्त्री ओली हुँदा उनले ने अधिकारीलाई गभर्नरमा नियुक्त गरेका थिए । र, अहिले पनि प्रधानमन्त्री ओली नेतृत्वको सरकार भएकाले अधिकारले गभर्नरमा दोहोरिने चासो राखेको बुझिएको छ । कार्यकाल दोहोर्याउने लबिङमा गभर्नर अधिकारी कार्यकाल दोहोर्याउने मनस्थितिमा पुगिसकेको बुझिएको छ । नेपाल राष्ट्र बैंकको नेतृत्व लिनका लागि पूर्वकार्यकारी निर्देशकहरू, डेपुटी गभर्नर तथा बैंकिङ क्षेत्रका विज्ञहरूको ठूलो तछाडमछाड हुन्छ । अधिकारी पनि त्यही भुमरीबाट गभर्नर बनेका हुन् । उनी पुनः गभर्नर बन्ने लबिङमा लागेको बुझिएको छ । उनको गभर्नर बन्ने रणनीति नयाँ बनेको सत्ता गठबन्धनले थप मलजल गरेको हो । उनकै ट्युनिङ मिल्ने व्यक्ति विष्णु पौडेल अर्थमन्त्री छन् भने ओली प्रधानमन्त्री छन् । यी दुवै व्यक्ति गभर्नर अधिकारीका लागि फराकिलो हात गर्ने व्यक्ति हुन् । गभर्नर अधिकारीले पदमा बस्दा कुनै राजनीतिक दलको गन्ध आफ्नो कार्यशैली र व्यवहारमा नदेखाए पनि उनी एमाले निकट हुन् भन्ने बुझाइ धेरैको छ । एकताका उनी एम अधिकारीको नामले पनि चर्चित पनि बने । अहिले ओली नेतृत्वको सत्ता गठबन्धनले उनलाई गभर्नरमा दोहोर्याउन सक्ने सम्भावना पनि देखिन्छ । किनकि उनले आफ्नो कार्यकालमा सन्तोषजनक काम पनि गरेका छन् । उसो त अहिलेको प्रमुख सत्ता साझेदार दल नेपाली कांग्रेसले पनि राष्ट्र बैंकको नेतृत्व आफूले पाउनुपर्ने माग गर्न सक्छ । यसअघि नै कांग्रेस र माओवादी केन्द्रको गठबन्धन हुँदा कांग्रेस निकट केही व्यक्तिहरू गभर्नरको लबिङमा लागिसकेको बुझिएको थियो । त्यतिखेर हाल नबिल बैंकका प्रमुख कार्यकारी अधिकृत (सीईओ) ज्ञानेन्द्र ढुङ्गाना गभर्नर बन्ने लबिङमा रहेको विषय बाहिरिएको थियो । ढुङ्गानाका दाजु आनन्द ढुङ्गाना नेपाली कांग्रेसका नेता हुन् । यदि नेपाली कांग्रेसले राष्ट्र बैंकको गभर्नरमा दाबी गरेमा माहोल पृथक बन्न सक्छ । किनकि नबिल बैंककै मुख्य लगानीकर्ता विनोद चौधरी र प्रधानमन्त्री ओलीको सम्बन्ध अहिले निकै राम्रो छ । ओली र चौधरीको अहिले नियमित भेटघाट हुने गरेको पनि स्रोत बताउँछ । त्यसैले पनि कांग्रेस निकटकै व्यक्ति राष्ट्र बैंकको जिम्मेवारी लिएमा चौधरी निकटको व्यक्तिले पाउन सक्ने अड्कलबाजी पनि बैंकिङ बजारमा हुुन थालेको छ ।
सिटिजन्स बैंकका ग्राहकलाई मर्सी सिटी अस्पतालमा १५ प्रतिशत छुट
काठमाडौं । सिटिजन्स बैंक र मर्सी सिटि अस्पतालबीच समझदारी भएको छ । बैंक र बुटवलस्थित मर्सी सिटी अस्पतालबीच बैंकका ग्राहकहरूलाई छुट दिने समझदारीपत्रमा हस्ताक्षर भएको छ । सो समझदारीपत्रमा हस्ताक्षर पश्चात् सिटिजन्स बैंकका कार्डबाहक र मोबाइल बैंकिङ ग्राहकहरूले मर्सी सिटी अस्पतालमा १५ प्रतिशतसम्मको आकर्षक छुट पाउनेछन् । यस किसिमको सहकार्यबाट बैंकका ग्राहकहरु लभान्वित हुनुका साथै नगद कारोबारबाट डिजिटल कारोबार तर्फ उत्प्रेरित हुने विश्वास बैंकले लिएको छ । बैंकले डिजिटल बैंकिङ माध्यमहरुको प्रयोगलाई बढाउन र ग्राहकहरुलाई डिजिटल माध्यमबाट भुक्तानी गर्न प्रोत्साहन गर्न समय समयमा ग्राहकमैत्री सुविधाहरु सञ्चालनमा ल्याउँदै आएको छ । डिजिटल कारोबार गर्दा पाइने छुट सम्बन्धी विस्तृत विवरणहरू सिटिजन्स बैंकको वेबसाइटमा प्राप्त गर्न सकिनेछ ।
महालक्ष्मी विकास बैंकमा क्युआर कोडबाटै कर्जा आवेदन दिन सकिने
काठमाडौं । महालक्ष्मी विकास बैंकमा क्युआर कोडबाटै कर्जा आवेदन दिन सकिने भएको छ । बैंकले आफ्ना सेवा सुविधाहरुलाई डिजिटलमैत्री तथा स्वचालित बनाउँदै जाने उद्धेश्य अनुरुप क्युआर कोडमार्फत कर्जा आवेदन दिन सकिने सुविधाको सुरुवात गरेको हो । यस प्रकारको सेवा प्रदान गर्नेमा विकास बैंकहरुमा महालक्ष्मी विकास बैंक अग्रणी बैंक रहेको बताइएको छ । यस अन्तर्गत कर्जा लिन चाहने ग्राहकहरुले बैंकको आधिकारिक वेबसाइट, सामाजिक सञ्जालहरु, सम्पूर्ण शाखा कार्यालयहरु तथा पत्रपत्रिकामा रहेको क्युआर कोड स्क्यान गरी आवेदन दिन सक्नेछन् । ग्राहकले आवदेन गरे पश्चात ग्राहकले रोजेको शाखा कार्यालयबाट कर्जाको सम्पूर्ण कर्जा प्रक्रिया सम्बन्धमा सहजीकरण गर्न सोही शाखा कार्यालयका कर्मचारीले सम्पर्क गर्ने बैंकले जनाएको छ । साथै, बैंकको हालै सम्पन्न भएको २२ औ वार्षिक साधारण सभाबाट विदेशी बैंक वा वित्तीय संस्थालाई रणनीतिक साझेदारको रुपमा ल्याउन प्रस्ताव समेत पारित भएको छ ।
