कोशीमा कांग्रेसको निर्वाचन समीक्षा आज, गगन थापा विराटनगर जाँदै
काठमाडौं । नेपाली कांग्रेसले कोशी प्रदेशस्तरीय निर्वाचन समीक्षा कार्यक्रम आज विराटनगरमा आयोजना गर्दैछ । उक्त कार्यक्रममा सहभागी हुन पार्टीका सभापति गगनकुमार थापा आज बिहान विराटनगर प्रस्थान गर्दैछन् । निर्धारित कार्यतालिका अनुसार थापा बिहान ९ः५० बजे विराटनगर विमानस्थलमा अवतरण गर्नेछन् । बिहान १०ः३० बजेदेखि समीक्षा कार्यक्रम सुरु हुने पार्टीकी सहमहामन्त्री डा. डिला संग्रौलाले जानकारी दिइन् । पार्टीको प्रदेशस्तरीय संगठन सुदृढीकरण, हालै सम्पन्न निर्वाचन परिणामको समग्र समीक्षा तथा आगामी राजनीतिक रणनीति तय गर्ने उद्देश्यले कार्यक्रम आयोजना गरिएको संग्रौलाले बताइन् । कार्यक्रममा कोशी प्रदेशका केन्द्रीय पदाधिकारी, केन्द्रीय सदस्य, प्रदेश कार्यसमिति, संघीय तथा प्रदेश सांसद, जिल्ला तथा क्षेत्रीय सभापतिहरू र अघिल्लो निर्वाचनमा प्रत्यक्ष तथा समानुपातिकतर्फका उम्मेदवारहरूको सहभागिता रहनेछ । नेपाली कांग्रेसले पछिल्लो समय विभिन्न प्रदेशमा यस्ता समीक्षा कार्यक्रमलाई तीव्रता दिएको छ । यसअघि गण्डकी, लुम्बिनी, बागमती र मधेश प्रदेशमा समीक्षा बैठक सम्पन्न गरिसकेको पार्टीले आज कोशी प्रदेशमा संगठनात्मक छलफललाई निरन्तरता दिन लागेको हो । पार्टी नेतृत्वले समीक्षा कार्यक्रममार्फत स्थानीय तहदेखि प्रदेश तहसम्म संगठनको अवस्था, चुनावी उपलब्धि तथा कमजोरी तथा सुधारका सम्भावनाबारे प्रत्यक्ष सुझाव संकलन गर्ने जनाएको छ । साथै, आगामी राजनीतिक रणनीति, संगठन विस्तार, क्रियाशील सदस्यता व्यवस्थापन, १५औँ महाधिवेशनको तयारी र कार्यकर्ताको सक्रियताका विषयमा समेत छलफल हुने सहमहामन्त्री संग्रौलाले जानकारी दिइन् ।
अटोमोबाइलमा मूल्यसूची स्टिकर अनिवार्य गर्ने विषयमा नाडाको चासो
काठमाडौं । नाडा अटोमोबाइल्स एसोसिएसन अफ नेपाल (नाडा) का प्रतिनिधिमण्डलले वाणिज्य, आपूर्ति तथा उपभोक्ता संरक्षण विभागका महानिर्देशक रोशन ज्ञवालीसँग अटोमोबाइल वस्तुहरूमा अधिकतम मूल्यसूचीसहितको स्टिकर टाँस्ने विषयमा विस्तृत छलफल गरेको छ । बैशाख ८ गते भएको उक्त भेटमा विभागले मिति २०८२/१२/३० मा जारी गरेको प्रेस विज्ञप्तिका विषयमा नाडाले आफ्नो ध्यान आकृष्ट भएको जनाएको छ । विभागले विदेशबाट पैठारी गरी नेपालमा बिक्री–वितरण गरिने सम्पूर्ण वस्तुहरूमा अनिवार्य रूपमा अधिकतम खुद्रा मूल्य उल्लेख गर्नुपर्ने तथा बिक्री गर्दा अनिवार्य रूपमा बिल–विजक जारी गर्नुपर्ने व्यवस्थालाई नाडाले सकारात्मक रूपमा लिएको जनाएको छ । यद्यपि, नाडाले सो व्यवस्थाको कार्यान्वयनका क्रममा देखिन सक्ने व्यावहारिक चुनौतीहरूबारे विभिन्न चासो र जिज्ञासा राख्दै थप स्पष्टताको माग गरेको छ । नाडाले पुरानो स्टकमा रहेका सामानहरूको व्यवस्थापन कसरी गर्ने, भन्सार विन्दुमै स्टिकर टाँस्ने व्यवस्था कत्तिको व्यावहारिक हुने जस्ता विषय उठाएको छ । साथै, संस्थाले फेयर ट्रेड र पारदर्शी व्यवसायलाई सधैं प्रवर्द्धन गर्दै आएको जनाएको छ । छलफलका क्रममा महानिर्देशक ज्ञवालीले उपभोक्ता संरक्षण ऐन, २०३५ अनुसारको व्यवस्था कार्यान्वयनमा ल्याइएको र वर्तमान सरकारको १०० बुँदे कार्यक्रममै यस विषयलाई प्राथमिकताका साथ अघि बढाइएको बताए । उनले नाडाबाट उठाइएका चासो र जिज्ञासालाई सकारात्मक रूपमा लिएको उल्लेख गर्दै कार्यान्वयनमा देखिने समस्या समाधान गर्न विभाग तयार रहेको बताए । उनले स्टिकरसहितको अधिकतम मूल्यसूची टाँस्ने विषयमा उद्योगी तथा आयातकर्ताप्रति विभाग कडाइका साथ प्रस्तुत हुने स्पष्ट पारे । साथै, आवश्यक परे विद्यमान कानुनमा सुधारका लागि सुझाव दिन पनि नाडालाई आग्रह गरे । उक्त छलफलमा नाडाका उपाध्यक्ष विक्रम सिंघानिया, महासचिव मिलनबाबु मल्ल, सचिव मेघराज पौडेल, कोषाध्यक्ष पंकज अग्रवाल, सहकोषाध्यक्ष निलमणि पाठक, केन्द्रीय कार्यसमिति सदस्य तथा स्पेयर पार्ट्स समितिका सभापति दीपेन्द्रकुमार मिश्र र सदस्य नारायणप्रसाद पौडेललगायतको उपस्थिति रहेको थियो ।
स्वास्थ्यलाभ र हिरासतपछि पहिलोपटक सार्वजनिक सम्बोधन गर्दै ओली
काठमाडौं । नेपाल कम्युनिस्ट पार्टी (एमाले) का अध्यक्ष केपी शर्मा ओलीले पार्टीको ७७औँ स्थापना दिवसको अवसरमा आयोजित विशेष कार्यक्रमलाई आज सम्बोधन गर्ने भएका छन् । पार्टी केन्द्रीय कार्यालयका सचिव डा. भीष्म अधिकारीका अनुसार दिउँसो २ बजे ललितपुरको च्यासलस्थित केन्द्रीय कार्यालयमा आयोजना हुने कार्यक्रममा अध्यक्ष ओलीको सम्बोधन रहनेछ । सम्बोधनमा समसामयिक राजनीतिक अवस्था, पार्टीको आगामी कार्यदिशा तथा संगठन सुदृढीकरणका विषय समेटिन सक्ने बताइएको छ । स्वास्थ्य अवस्था र प्रहरी हिरासतका कारण केही समय सार्वजनिक कार्यक्रममा अनुपस्थित रहेका अध्यक्ष ओली हाल स्वास्थ्यलाभको क्रममा छन् । गत चैत १४ गते पक्राउ परेका उनी १३ दिनपछि रिहा भएका थिए । त्यसपछि पित्तथैलीमा देखिएको पत्थरीको शल्यक्रिया गराई वैशाख ५ गते अस्पतालबाट डिस्चार्ज भएका ओली पहिलोपटक औपचारिक रूपमा पार्टी कार्यक्रममा सहभागी हुन लागेका हुन् ।
पिँडालु किलोको ५० रुपैयाँ, यस्तो छ कृषिउपजको मूल्य
काठमाडौं । कालीमाटी फलफूल तथा तरकारी बजार विकास समितिले बुधबारका लागि कृषिउपजको थोक मूल्य निर्धारण गरेको छ । समितिका अनुसार गोलभेँडा ठूलो (भारतीय) प्रतिकिलो रु ८०, गोलभेँडा सानो (लोकल) प्रतिकिलो रु ४०, गोलभेँडा सानो (भारतीय) प्रतिकिलो रु ४८, गोलभेँडा सानो (तराई) प्रतिकिलो रु ५५, आलु रातो प्रतिकिलो रु २७ र आलु रातो (भारतीय) प्रतिकिलो रु २४ र प्याज सुकेको (भारतीय) प्रतिकिलो रु ३६ रहेको छ । यसैगरी, गाजर (लोकल) प्रतिकिलो रु ६०, गाजर (तराई) प्रतिकिलो रु ३०, बन्दा (लोकल) प्रतिकिलो रु ५०, काउली स्थानीय प्रतिकिलो रु ४०, काउली स्थानीय (ज्यापु) प्रतिकिलो रु ६०, सेता मूला प्रतिकिलो रु २०, सेतो मूला (हाइब्रिड) प्रतिकिलो रु ३०, भन्टा लाम्चो प्रतिकिलो रु ५५ र भन्टा डल्लो प्रतिकिलो रु ६० कायम भएको छ । त्यसैगरी, बोडी (तने) प्रतिकिलो रु ५५, मटरकोसा प्रतिकिलो रु ७०, घिउ सिमी (लोकल) प्रतिकिलो रु २५, घिउ सिमी (हाइब्रिड) प्रतिकिलो रु ४०, राजमा प्रतिकिलो रु १२०, टाटे सिमी प्रतिकिलो रु १३०, भटमास कोसा प्रतिकिलो रु २००, तीते करेला प्रतिकिलो रु ४०, लौका प्रतिकिलो रु २०, परवर प्रतिकिलो रु १००, परवर (तराई) प्रतिकिलो रु ९०, चिचिन्डो प्रतिकिलो रु ४५, घिरौँला प्रतिकिलो रु ३५, फर्सी पाकेको प्रतिकिलो रु ६०, हरियो फर्सी (लाम्चो) प्रतिकिलो रु ३०, हरियो फर्सी (डल्लो) प्रतिकिलो रु २०, भिन्डी प्रतिकिलो ५५, बरेला प्रतिकिलो रु ५०, सक्खरखण्ड प्रतिकिलो रु ७०, पिँडालु प्रतिकिलो रु ५० र स्कुस प्रतिकिलो रु ५० कायम गरिएको छ । रायोसाग प्रतिकिलो रु ६०, पालुङ्गो प्रतिकेजी रु १००, चमसुर प्रतिकिलो रु ८०, तोरीसाग प्रतिकिलो रु ४०, मेथी प्रतिकिलो रु ८०, हरियो प्याज प्रतिकिलो रु ८०, बकुला प्रतिकिलो रु ७०, च्याउ (कन्य) प्रतिकिलो रु १६०, च्याउ (डल्ले) प्रतिकिलो रु ३५०, राजा च्याउ प्रतिकेजी रु ३०० र सिताके च्याउ प्रतिकेजी रु १,००० निर्धारण गरिएको छ । कुरिलो प्रतिकिलो रु ४५०, निगुरो प्रतिकिलो रु ८०, ब्रोकाउली प्रतिकिलो रु ६०, कोइराला प्रतिकिलो रु ३००, रातो बन्दा प्रतिकिलो रु ५०, जिरीको साग प्रतिकिलो रु १००, ग्याठकोभी प्रतिकिलो रु ५०, पार्सले प्रतिकिलो रु १८०, सेलरी प्रतिकिलो रु १९०, सौफको साग प्रतिकेजी रु ८०, पुदिना प्रतिकिलो रु १००, इमली प्रतिकिलो रु १८०, तामा प्रतिकिलो रु १५०, तोफु प्रतिकिलो रु १५० र गुन्द्रुक प्रतिकिलो रु २५० तोकिएको छ । स्याउ (झोले) प्रतिकिलो रु २५०, स्याउ (फुजी) प्रतिकिलो रु ३००, कागती प्रतिकेजी ३९०, केरा दर्जन रु ३००, अनार प्रतिकिलो रु ३५०, अङ्गुर (हरियो) प्रतिकिलो रु २४०, अङ्गुर (कालो) प्रतिकिलो रु ३८०, तरबुजा हरियो प्रतिकिलो रु ४५, भुइँकटहर प्रतिगोटा रु २४०, काँक्रो (लोकल) प्रतिकिलो रु ४०, काँक्रो (हाइब्रिड) प्रतिकिलो रु १५, काँक्रो (लोकलक्रस) प्रतिकिलो रु ४०, रुखकटहर प्रतिकिलो रु ८०, नासपाती (चाइनिज) प्रतिकिलो रु २५०, मेवा (नेपाली) प्रतिकिलो रु ८०, मेवा (भारतीय) प्रतिकिलो रु ९० र किबी प्रतिकिलो रु ४०० निर्धारण गरिएको छ । यसैगरी, अदुवा प्रतिकिलो रु १००, सुकेको खुर्सानी प्रतिकिलो रु ४५०, खुर्सानी (हरियो) प्रतिकिलो रु ८०, खुर्सानी हरियो (बुलेट) प्रतिकिलो रु ६०, माछे खुर्सानी प्रतिकिलो रु ८०, खुर्सानी अकबरे प्रतिकिलो रु ४००, भेडे खुर्सानी प्रतिकिलो रु ८०, हरियो लसुन प्रतिकिलो रु १२०, हरियो धनियाँ प्रतिकिलो रु ८०, लसुन सुकेको (चाइनिज) प्रतिकिलो रु २२०, लसुन सुकेको (नेपाली) प्रतिकिलो रु १३०, माछा सुकेको प्रतिकिलो रु १,०००, ताजा माछा (रहु) प्रतिकिलो रु ३४०, ताजा माछा (बचुवा) प्रतिकिलो रु ३१० र ताजा माछा (छडी) प्रतिकिलो रु ३०० निर्धारण गरिएको छ ।
वीरगन्ज हुँदै ६ खर्ब ९४ अर्बको सामान आयात, पेट्रोलियम पदार्थ मात्रै डेढ खर्बको भित्रियो
काठमाडौं । वीरगन्ज नाका हुँदै चालु आर्थिक वर्षको ९ महिनामा ६ खर्ब ९४ अर्ब ५ करोड रुपैयाँका वस्तु तथा सामान आयात भएको छ । वीरगन्ज भन्सार कार्यालयका अनुसार गत आवको ९ महिनाको तुलनामा चालु आवको सोही अवधिमा भने ८० अर्ब ४४ करोड रुपैयाँ अर्थात् १३ प्रतिशत बढी आयात भएको हो । जबकि गत आवको नौ महिनामा भने ६ खर्ब १३ अर्ब ६१ करोड रुपैयाँ बराबरको वस्तु तथा सामान आयात भएको थियो । वीरगन्ज भन्सार कार्यालयका सूचना अधिकारी उदयसिंह विष्टले चालु आवमा यो नाका हुँदै हुने आयातमा बढोत्तरी भएको बताए । यो नाका हुँदै चालु आवको ९ महिनामा १ खर्ब ४८ अर्ब १६ करोड रुपैयाँको पाँच थरिको पेट्रोलियम पदार्थ आयात भएको छ । जबकि गत आवको सोही अवधिमा भने १ खर्ब ४० अर्ब १० करोड रुपैयाँको पेट्रोलियम पदार्थको आयात भएको थियो । चालु आवको नौ महिनामा ६२ अर्ब २६ करोड रुपैयाँ पर्ने फलाम तथा फलामबाट बनेका सामान आयात भएका छन् । गत आवको सोही अवधिमा भने ५५ अर्ब ९ करोड रुपैयाँका फलाम तथा फलामबाट बनेका सामान भित्रिएको थियो । चालु आवको ९ महिनामा ५० अर्ब ४० करोड रुपैयाँको भटमासको कच्चा तेल आयात भएको छ । जबकि गत आवको सोही अवधिमा ३८ अर्ब १५ करोड रुपैयाँको भटमासको कच्चा तेल आयात भयो । चालु आवको ९ महिनामा ४९ अर्ब १३ करोड रुपैयाँ पर्ने मेसिनरी तथा पार्टपुर्जा आयात भएको छ । जबकि गत आवको नौ महिनामा भने ४० अर्ब ५७ करोड रुपैयाँको मेसिनरी तथा पार्टपुर्जा भित्रिएको थियो । चालु आवको नौ महिनामा ३४ अर्ब १९ करोड रुपैयाँ पर्ने इलेक्ट्रिक मेसिनरी उपकरण र तिनका पार्टपुर्जा भित्रिएको छ भने गत आवको सोही अवधिमा भने ३० अर्ब १४ करोड रुपैयाँका इलेक्ट्रिक मेसिनरी उपकरण र तिनका पार्टपुर्जा आयात भएको थियो । कार्यालयले चालु आवको ९ महिनामा १ खर्ब ७७ अर्ब ६६ करोड रुपैयाँ राजस्व सङ्कलन गरेको छ ।
झापामा नवीकरणीय ‘पेलेट ऊर्जा’ उत्पादन, भारत निर्यात गरिने
काठमाडौं । खेर गइरहेको स्थानीय स्रोत र साधनको सदुपयोग गरेर झापाको मेचीनगर नगरपालिका-१५ ज्यामीरगढीमा नवीकरणीय ऊर्जा ‘पेलेट’को उत्पादन सुरु गरिएको छ । ‘पेलेट ऊर्जा’लाई वातावरणमा न्यून असर पार्ने इन्धनको स्रोत मानिँदै आएको हुँदा यसलाई पत्थर कोइला, दाउरा र अन्य खनिज इन्धनको विकल्पका रूपमा मानिएको छ । पराजुली बायोमास व्रिकेट उद्योगले ‘पेलेट ऊर्जा’को उत्पादन सुरुआत गरेको हो । उद्योगको १२ घण्टामा ७० हजार किलोग्रामसम्म ‘पेलेट ऊर्जा’ उत्पादन गर्ने क्षमता रहेको जनाउँदै उद्योगका सञ्चालक आदित्य पराजुलीले यहाँबाट उत्पादित पेलेटलाई झापामा मात्र नभएर नेपालका विभिन्न जिल्ला र छिमेकी मुलुक भारतमा समेत निर्यात गरिने बताए । चिया, सिमेन्ट, इँटा, फलामलगायतका उद्योगहरूलाई सस्तो र वातावरणमैत्री इन्धनका रूपमा ‘पेलेट ऊर्जा’को प्रयोग बढिरहेको हुँदा उद्योगले खेर जाने कमल भेनियर सिट, उखुको खोस्टा, सुकेका पातपतिङ्गर, बाँसका चोइटा र काठका टुक्रालाई अत्याधुनिक प्रविधिबाट मेसिनमा प्रशोधन गरी दानेदार ऊर्जा तयार गरिने सञ्चालक पराजुलीले जानकारी दिए । पेलेटले पत्थर कोइलाको आयातलाई प्रतिस्थापन गरेर मुलुकलाई इन्धनमा आत्मनिर्भर बन्न योगदान पुर्याउने भद्रपुर नगरपालिकाका प्रमुख गणेश पोखरेल बताउँछन् ।
पत्रकार महासंघ, रिपोर्टर्स क्लबसहित १८ व्यक्ति तथा संस्थाले अझै तिरेनन् भाडा, कुनको कति ?
काठमाडौं । समाज कल्याण परिषदले नेपाल पत्रकार महासंघ, रिपोर्टर्स क्लब नेपाल लगायत १८ जना व्यक्ति तथा संस्थालाई ७ दिनभित्र बक्यौता बुझाउन ताकेता गरेको छ । समाज कल्याण परिषदले भृकुटीमण्डप क्षेत्रमा रहेका स्टल, भवन तथा संरचना भाडामा लिएर प्रयोग गरिरहेका व्यक्ति तथा संस्थाहरूलाई बक्यौता भाडा बुझाउन पुनः ७ दिनको अन्तिम म्याद दिएको हो । यसअघि परिषदले २०८२ चैत ३० गते तालाबन्दी गरी वैशाख १ गते ७ दिने म्यादसहित सूचना प्रकाशित गरेको थियो । उक्त अवधिमा केही व्यवसायी तथा संस्थाले आंशिक रकम बुझाए पनि अधिकांशले अझै भाडा नतिरेको परिषदले जनाएको छ । परिषदका अनुसार अब थपिएको ७ दिनभित्र पनि बक्यौता नबुझाएमा प्रचलित कानूनअनुसार असुलउपर तथा अन्य कानुनी कारबाही अघि बढाइनेछ । बक्यौता नतिर्ने सूचीमा उपभोक्ता मंच नेपाल, नेपाल पत्रकार महासंघ, रिपोर्टर्स क्लब नेपाल, काठमाडौं उपत्यका सार्वजनिक पुस्तकालय समाज, नेपाल फोटो पत्रकार महासंघ, राष्ट्रिय अपाङ्ग महासंघलगायत विभिन्न संघसंस्था तथा व्यक्तिहरू रहेका छन् । परिषदका अनुसार उपभोक्ता मंच नेपालको ४५ लाख ५७ हजार ९०७ रुपैयाँ, लोकतान्त्रिक सहिद तथा घाइते समाजको १४ लाख ६१ हजार ३७० रुपैयाँ, नेपाल पत्रकार महासंघको ३३ लाख ७ हजार ४२१ रुपैयाँ बक्यौता रहेको छ । यस्तै, मनकला श्रेष्ठको ३ लाख ८२ हजार ४०३ रुपैयाँ, टीकाराम सिटौलाको ११ लाख ८० हजार ६२५ रुपैयाँ, कृष्णप्रसाद लामिछानेको ५ लाख ९८ हजार १६३ रुपैयाँ, रिपोर्टर्स क्लब नेपालको ६३ लाख ४० हजार ९०१ रुपैयाँ, सेन्थेसिस एक्जिविसन एण्ड इभेन्ट्सको ११ लाख २७ हजार १२१ रुपैयाँ बक्यौता रहेको छ । काठमाडौं उपत्यका सार्वजनिक पुस्तकालय समाजको २ करोड ९० लाख २३ हजार ३७६ रुपैयाँ, हरि अमात्यको ५ लाख १५ हजार ६६४ रुपैयाँ, बुद्धिराम भुसालको ६ लाख ८७ हजार ७३४ रुपैयाँ, नेपाल फोटो पत्रकार महासंघको २० लाख ६७ हजार ६७२ रुपैयाँ, नेपाल राष्ट्रिय मानव अधिकार संरक्षण मञ्चको २१ लाख ८५ हजार ९५७ रुपैयाँ, राष्ट्रिय अपाङ्ग महासंघको १ करोड १६ लाख ३२ हजार २७ रुपैयाँ बक्यौता रहेको छ । यस्तै, बालबालिकाका निम्ति गैरसरकारी संस्थाहरूको महासंघ नेपालको ८९ लाख ९० हजार ७६४ रुपैयाँ, यशोदा कुमारी सेठीको १० लाख १९ हजार १५६ रुपैयाँ, चित्रबहादुर पण्डित क्षेत्रीको १ लाख ४१ हजार ५७३ रुपैयाँ र मञ्जु तिमिल्सिनाको ८ लाख ७ हजार ७१० रुपैयाँ उठ्न बाँकी रहेको परिषदले जनाएको छ ।
२७.९३ प्रतिशत बढ्यो मञ्जुश्री फाइनान्सको नाफा, वितरणयोग्य रकम साढे ३० करोड
काठमाडौं । मञ्जुश्री फाइनान्सको चालु आर्थिक वर्ष २०८२/८३ को तेस्रो त्रैमासमा खुद नाफा २७.९३ प्रतिशत बढेर २१ करोड ८९ लाख १० हजार रुपैयाँ आर्जन गरेको छ । गत वर्षको सोही अवधिमा फाइनान्सले १७ करोड ११ लाख १९ हजार रुपैयाँ खुद नाफा आर्जन गरेको थियो । चालु आवको चैत मसान्तसम्ममा फाइनान्सको खुद ब्याज आम्दानी १०.२४ प्रतिशत बढेर ६८ करोड ४७ लाख ७२ हजार रुपैयाँ आर्जन गरेको छ । गत वर्षको सोही अवधिमा फाइनान्सले ६२ करोड ११ लाख ६५ हजार रुपैयाँ खुद ब्याज आम्दानी गरेको थियो । समीक्षा अवधिमा फाइनान्सको खुद शुल्क तथा कमिशन आम्दानी २.९५ प्रतिशत बढेर ९ करोड २ लाख ४५ हजार रुपैयाँ, कुल सञ्चालन आम्दानी १०.१५ प्रतिशत बढेर ८० करोड ३ लाख १४ हजार रुपैयाँ र सञ्चालन नाफा १०.२९ प्रतिशत बढेर ३२ करोड ३३ लाख ३९ हजार रुपैयाँ रहेको छ । गत वर्षको चैत मसान्तसम्ममा फाइनान्सको खुद शुल्क तथा कमिशन आम्दानी ८ करोड ७६ लाख ६१ हजार रुपैयाँ, कुल सञ्चालन आम्दानी ७२ करोड ६५ लाख ७५ हजार रुपैयाँ र सञ्चालन नाफा २९ करोड ३१ लाख ६० हजार रुपैयाँ थियो । चालु आवको चैतसम्ममा फाइनान्सको वितरणयोग्य नाफा ३० करोड ५४ लाख ५८ हजार रुपैयाँ रहेको छ । १ अर्ब ३५ करोड १५ लाख ५२ हजार रुपैयाँ चुक्ता पुँजी रहेको फाइनान्सको जगेडा कोषमा ८० करोड ५५ लाख १७ हजारर रुपैयाँ रहेको छ । चालु आवको चैत मसान्तसम्म फाइनान्सले २२ अर्ब ७३ करोड ८७ लाख ९८ हजार रुपैयाँ निक्षेप संकलन गरी १९ अर्ब ८५ करोड ४७ लाख ९ हजार रुपैयाँ कर्जा लगानी गरेको छ । गत वर्षको चैतसम्म फाइनान्सले २१ अर्ब ३ करोड ४६ लाख ३० हजार रुपैयाँ निक्षेप संकलन गरी १७ अर्ब ७१ करोड ७९ लाख ३० हजार रुपैयाँ कर्जा लगानी गरेको थियो । समीक्षा अवधिमा फाइनान्सको निक्षेप ८ प्रतिशत र कर्जा लगानी १२ प्रतिशत बढेको देखिन्छ । साथै चैत मसान्तमा फाइनान्सको कर्जा निक्षेप अनुपात ८४.९९ प्रतिशत रहेको छ । समीक्षा अवधिमा फाइनान्सले खराब कर्जा घटाएको छ । गत वर्षको चैतमा ४.२ प्रतिशत रहेको खराब कर्जा चालु आवको चैतमा ३.९९ प्रतिशतमा झारेको हो । फाइनान्सका अनुसार आधार दर ६.३८ प्रतिशतमा झरेको छ । जबकि गत वर्षको चैतमा ८.७५ प्रतिशत थियो । फाइनान्सको नाफा बढेसँगै प्रतिसेयर आम्दानी पनि बढेर २१.६० रुपैयाँ पुगेको छ । यस्तै, फाइनान्सको प्रतिसेयर नेटवर्थ १८२.२ रुपैयाँ छ भने मूल्य आम्दानी अनुपात ३८.८४ गुणा छ ।
