विद्यार्थीलाई उद्योगसँग जोड्न चेम्बर र बागमती विश्वविद्यालयबीच सम्झौता
काठमाडौं । नेपाल चेम्बर अफ कमर्स र बागमती विश्वविद्यालयबीच उद्यमशीलता विकास, नवप्रवर्तन प्रवद्र्धन, सीप विकास तथा उद्योग–शैक्षिक सहकार्यलाई संस्थागत रूपमा सुदृढ बनाउने उद्देश्यसहित पाँच वर्षे समझदारीपत्र (एमओयू) मा हस्ताक्षर भएको छ । समझदारीपत्रमा नेपाल चेम्बर अफ कमर्सका अध्यक्ष कमलेश कुमार अग्रवाल र बागमती विश्वविद्यालयका अध्यक्ष प्रा. डा. चन्द्रमणि पौडेलले हस्ताक्षर गरेका हुन् । सम्झौतामार्फत दुवै संस्थाले शैक्षिक क्षेत्र, उद्योग, स्टार्टअप, लगानी समुदाय तथा नीतिनिर्माताबीच समन्वयात्मक वातावरण निर्माण गर्दै उद्यमशीलता, व्यावसायिक विकास, नवप्रवर्तन क्षमता अभिवृद्धि तथा संस्थागत उत्कृष्टताका क्षेत्रमा दीर्घकालीन सहकार्य गर्ने प्रतिबद्धता जनाएका छन् । सम्झौताअनुसार विशेष तालिम तथा कार्यकारी शिक्षा कार्यक्रम सञ्चालन, क्षमता अभिवृद्धि, स्टार्टअप तथा नवप्रवर्तन प्रवद्र्धन, लगानी प्रोत्साहन, रणनीतिक नेटवर्किङ, अनुसन्धान तथा नीतिगत अध्ययन, ज्ञान आदानप्रदान तथा भविष्यकेन्द्रित शैक्षिक कार्यक्रम विकासका क्षेत्रमा संयुक्त रूपमा काम गरिनेछ । नेपाल चेम्बर अफ कमर्सले आफ्ना सदस्य तथा सरोकारवालाको तालिम आवश्यकता पहिचान गर्ने, संयुक्त कार्यक्रमहरूमा सहभागिता बढाउने तथा व्यवसायिक वातावरणसँग सम्बन्धित कार्यक्रम सञ्चालनमा सहकार्य गर्नेछ । त्यस्तै, बागमती विश्वविद्यालयका विद्यार्थीका लागि इन्टर्नशिप तथा रोजगारी सहयोग केन्द्र स्थापना गर्न सहयोग गर्ने, अनुसन्धान कोष तथा छात्रवृत्ति सहयोग कार्यक्रम स्थापना गर्ने र उद्योग जगत्का अनुभवी व्यवसायिक नेतृत्वलाई अतिथि वक्ताका रूपमा विश्वविद्यालयसँग जोड्ने व्यवस्था गरिएको छ । बागमती विश्वविद्यालयले शैक्षिक विशेषज्ञता उपलब्ध गराउने, तालिम तथा कार्यकारी शिक्षा कार्यक्रम सञ्चालन गर्ने, स्टार्टअप तथा नवप्रवर्तनका लागि परामर्श र मार्गदर्शन प्रदान गर्ने तथा उद्योग–शिक्षा सहकार्यमा आधारित अनुसन्धानलाई प्रोत्साहन गर्ने प्रतिबद्धता जनाएको छ । विश्वविद्यालयले सेमिनार, नीति संवाद तथा सम्मेलनहरू आयोजना गर्नेछ । समझदारीपत्र हस्ताक्षर भएको मितिदेखि पाँच वर्षसम्म लागू हुनेछ । दुवै पक्षको सहमतिमा यसको अवधि थप गर्न सकिने व्यवस्था गरिएको छ । कार्यक्रममा नेपाल चेम्बर अफ कमर्सका अध्यक्ष कमलेश कुमार अग्रवालले आजको समयको आवश्यकताअनुसार विश्वविद्यालयहरूले परम्परागत शिक्षा प्रणालीभन्दा बाहिर निस्किएर उद्यमशीलता र नवप्रवर्तनमा केन्द्रित हुनुपर्नेमा जोड दिए । उनले विश्वविद्यालयहरूको मुख्य उद्देश्य केवल रोजगारी खोज्ने जनशक्ति उत्पादन गर्नु नभई रोजगारी सिर्जना गर्ने उद्यमी र नेतृत्वकर्ता तयार गर्नु रहेको बताए । 'आजको विश्वमा ज्ञान मात्र पर्याप्त छैन, त्यसलाई व्यवसाय, उद्योग र नवप्रवर्तनसँग जोड्न सक्ने क्षमता आवश्यक छ,' उनले भने । अध्यक्ष अग्रवालले उद्योग र शिक्षाबीचको दूरी घटाउन यस्ता सहकार्य अत्यन्तै महत्वपूर्ण हुने उल्लेख गर्दै विश्वविद्यालयबाट उत्पादन हुने जनशक्ति बजारको वास्तविक आवश्यकताअनुसार दक्ष बन्नुपर्ने बताए । बागमती विश्वविद्यालयका अध्यक्ष प्रा. डा. चन्द्रमणि पौडेलले विश्वविद्यालय शिक्षा र उद्योगबीचको सम्बन्धलाई व्यवहारिक रूपमा जोड्ने अवधारणाअनुसार अघि बढिरहेको बताए । उनले नेपाल चेम्बर अफ कमर्ससँगको सहकार्यले विद्यार्थीलाई उद्योगसँग प्रत्यक्ष जोड्ने, अनुसन्धानलाई व्यवहारिक बनाउने तथा स्टार्टअप र नवप्रवर्तनका नयाँ अवसर सिर्जना गर्ने विश्वास व्यक्त गरे ।
मुक्तिनाथ विकास बैंकका ग्राहकलाई लेमन ट्री र टेस्ला डाइग्नोस्टिक्समा २० प्रतिशत छुट
काठमाडौं । मुक्तिनाथ विकास बैंकले आफ्ना ग्राहकलाई थप सुविधा उपलब्ध गराउने उद्देश्यले काठमाडौंको बूढानीलकण्ठस्थित लेमन ट्री प्रिमियर होटल र बालुवाटारस्थित टेस्ला डाइग्नोस्टिक्ससँग व्यावसायिक सम्झौता गरेको छ । सम्झौताअनुसार बैंकका ग्राहकले विभिन्न सेवा तथा सुविधामा विशेष छुट पाउनेछन् । सम्झौतापछि बैंकका ग्राहकले लेमन ट्री प्रिमियर बूढानीलकण्ठ होटलमा बसाइ तथा खानामा १५ प्रतिशतसम्म छुट पाउनेछन् । त्यस्तै, होटलको स्पामा २० प्रतिशतसम्म छुट उपलब्ध हुनेछ । यसैगरी, टेस्ला डाइग्नोस्टिक्समा प्याथोलोजी परीक्षण, एमआरआई, एक्स–रे, दन्त ओपीजी, औषधिलगायत विभिन्न सेवामा ५ देखि १० प्रतिशतसम्म छुट प्राप्त गर्न सकिनेछ । छुट सुविधा लिन बैंकका ग्राहकले मुक्तिनाथ विकास बैंकको मान्य डेबिट कार्ड वा प्रिभिलेज कार्ड प्रयोग गर्नुपर्नेछ । मोबाइल बैंकिङमार्फत भुक्तानी गर्दा पनि छुट सुविधा प्राप्त गर्न सकिने बैंकले जनाएको छ । मुक्तिनाथ विकास बैंकले ग्राहकको आवश्यकता र बदलिँदो बजार परिवेशअनुसार सरल, सहज तथा प्रतिस्पर्धी वित्तीय सेवा उपलब्ध गराउँदै आएको जनाएको छ । बैंकले हाल विशेष अटो लोन योजनासमेत आधार दरमा शून्य दशमलव ५० प्रतिशत प्रिमियममा उपलब्ध गराएको छ । बैंकका अनुसार विभिन्न क्षेत्रका व्यवसाय तथा संस्थासँग सहकार्य गरी ग्राहकलाई थप सुविधा उपलब्ध गराउने उद्देश्यले यस्ता सम्झौता गर्दै आएको छ ।
नाइमा एक्स्पोमा राखिएका सबैभन्दा सस्ता ७ कार
काठमाडौं । काठमाडौंको भृकुटीमण्डपमा जारी नाइमा नेपाल मोबिलिटी एक्स्पोमा साढे १८ लाखदेखि करिब ३ करोड रुपैयाँसम्मका विलासी तथा सर्वसाधारणका लागि उपयुक्त गाडीहरू प्रदर्शनमा राखिएका छन् । आज हामीले एक्स्पोमा राखिएका सबैभन्दा सस्ता कारको बारेमा चर्चा गर्दैछौं । सीमित बजेटमा आकर्षक, आधुनिक र किफायती गाडी खोज्ने अवलोकनकर्ताका लागि एक्स्पोमा रहेका यी हुन् प्रमुख ७ सस्ता कारहरू । १. भोल्ट्स नाइमा एक्स्पोमा सबैभन्दा सस्तो गाडीका रूपमा भोल्ट्स रहेको छ । नेपालमा हेनरी भोल्ट्स ब्रान्डका विद्युतीय गाडी तथा सवारीसाधनहरूको आधिकारिक बिक्रेता एस क्युव इन्टरप्राइजेजले यसको मूल्य १८ लाख ५० हजार रुपैयाँ तोकेको छ । ३५ किलोवाट इलेक्ट्रिक मोटरका साथमा यो गाडी १७ किलोवाट ब्याट्री प्याकमा उपलब्ध छ । एक्स्पोमा राखिएका गाडीहरूमध्ये पनि सबैभन्दा सस्तो गाडी हो । खासगरी सिटी ड्राइभका लागि उपयुक्त मानिएको भोल्ट्सको अधिकतम रेन्ज २०० किलोमिटर रहेको छ । २.विलिङ मिनी ईभी चिनियाँ अटोमोबाइल ब्रान्ड विलिङको मिनी ईभी पनि सस्तो मूल्यमा एक्स्पोमा राखिएको छ । विलिङका लागि नेपालको आधिकारिक बिक्रेता पारामाउन्ट मोटर्सले मिनी ईभी १९ लाख ९९ हजार रुपैयाँ तोकिएको छ । यद्यपि, विलिङ मिनी ईभीको लङ रेन्ज भेरियन्टको मूल्य भने २१ लाख ९९ हजार रुपैयाँ तोकिएको कम्पनीले जनाएको छ । कम्पनीका अनुसार ‘होङगुआङ’ को पाँचौं जेनेरेसन मोडल नेपालमा भने विलिङ मिनी ईभीको रूपमा आएको हो । कम्पनीले यसमा ३० किलोवाट क्षमताको ‘थ्री इन वान’ मोटर दिएको छ, जसमा ३ वटा ड्राइभिङ मोड पाउन सकिन्छ । मिनी ईभीमा १६.२ किलोवाट आवर र २५.१ किलोवाट आवरको ब्याट्री अप्सन पाउन सकिन्छ । यी ब्याट्रीले एकपटकको फुलचार्जमा क्रमशः २०५ र ३०१ किलोमिटरसम्म रेन्ज दिने कम्पनीले दाबी गरेको छ । ३. होनरी बोमा चिनियाँ ब्रान्ड होनरी अटोमोबाइल अन्तर्गतको सबब्राण्ड भीअटो नेपाल भित्रिएको छ । नाइमा एक्स्पोमा नेपालमा होनरी बोमा ईभी गाडीको आधिकारिक बिक्रेता जेननेक्स्ट मोटर्सले एप्पल, एचपी, डाइसन, डेललगायत ब्राण्डका गाडीहरू बिक्री गर्दै आएको छ । कम्पनीले यसको सुरुआती मूल्य २० लाख ९९ हजार ९९९ रुपैयाँ तोकेको छ । कम्पनीका अनुसार भीअटो होनरी बोमा ईभी आधुनिक, स्मार्ट तथा सहरी जीवनशैलीलाई मध्यनजर गर्दै डिजाइन गरिएको विशेष इलेक्ट्रिक मिनी कार हो । आधुनिक प्रविधि, उत्कृष्ट सुविधा र आकर्षक मूल्यको संयोजनले यो ईभी ग्राहकलाई उत्कृष्ट विकल्प बन्ने कम्पनीको विश्वास छ । ३५ किलोवाटको इलेक्ट्रिक मोटर रहेको होनरी बोमा ईभीमा २९.९ किलोवाट आवरको ब्याट्री छ, जसले एकपटकको फुलचार्जमा ३०० किलोमिटरसम्म रेन्ज दिने कम्पनीको दाबी छ । ४. टाटा टियागो टाटा मोटर्सका लागि नेपालको आधिकारिक वितरक सिप्रदी ट्रेडिङले नेपालमा फेसलिफ्ट नयाँ टाटा टियागो ईभी लन्च गरेको छ । नाइमा एक्स्पोमा कम्पनीले पुरानो टियागोको फेसलिफ्ट भर्जन लन्च गरेको हो । यसको मूल्य २८ लाख ९९ हजार रुपैयाँ तोकिएको छ । यो दुई भेरियन्टमा उपलब्ध रहेको छ । जसमा टियागो ईभीको टप भेरिन्टको मूल्य २९ लाख ९९ हजार रुपैयाँ तोकिएको छ । यसमा ५५ किलोवाट मोटर क्षमतामा उपलब्ध छ । फेसिलेफ्ट टियागोमा २४ किलोवाटको ब्याट्री प्याक रहेको कम्पनीले जनाएको छ । सुरक्षाका लागि गाडीमा डुअल एयरब्याग, एबीएस, ईबीडी, रियर पार्किङ सेन्सर, रिभर्स क्यामेरा तथा इलेक्ट्रोनिक स्टेबिलिटी कन्ट्रोलजस्ता फिचर छन् । ५. एट्टो १ नेपालका लागि बीवाईडी गाडीको आधिकारिक बिक्रेता साइमेक्स इंकले नाइमा एक्स्पोमा नयाँ जेनेरेसन एट्टो सिरिज राखेको छ । जसमा कम्पनीले एट्टो १, नयाँ एट्टो २ र २०२६ एट्टो ३ प्रदर्शनमा राखेको हो । नयाँ पुस्ताका यी विद्युतीय गाडीमा प्रविधि, डिजाइन, आराम, सुरक्षा तथा सुविधामा सुधार गरिएको कम्पनीले जनाएको छ । नयाँ एट्टो सिरिजमार्फत विभिन्न मूल्य र सेग्मेन्टका ग्राहकलाई लक्षित गरिएको छ । नयाँ एट्टो १ को डाइनामिक र प्रिमियम दुवै भेरियन्टमा ३६० डिग्री क्यामेरा थप गरिएको छ । यसले पार्किङ तथा साँघुरो स्थानमा गाडी चलाउँदा चालकलाई वरपरको अवस्थाबारे जानकारी लिन सहज बनाउनेछ । एट्टो १ प्रिमियममा अटो-फोल्ड ओआरभीएमसमेत थप गरिएको छ । एट्टो १ डाइनामिकको मूल्य ३० लाख ७५ हजार रुपैयाँ र प्रिमियमको मूल्य ३४ लाख ८० हजार रुपैयाँ तोकिएको छ । यो अरु मोडलभन्दा सस्तो छ । ६. लीपमोटर टी ०३ नेपालका लागि लीपमोटरको आधिकारिक बिक्रेता सांग्रिला मोटर्सले इन्ट्री लेभल ह्याचब्याक टी ०३ नाइमा एक्स्पोमा राखेको छ । यसमा ५० किलोवाटको मोटर रहेको छ । कम्पनीले यसअघि ७० किलोवाटको मोटर भएको टी ०३ बिक्री गर्दै आएको थियो । कम्पनीले नयाँ टी ०३ को मूल्य ३१ लाख ९९ हजार रुपैयाँ तोकेको छ । यो रेगुलर टी ०३ कोभन्दा २ लाख रुपैयाँ सस्तो हो । ७० किलोवाट आवर मोटर भएको टी ०३ को मूल्य ३४ लाख रुपैयाँ रहेको छ । सानो मोटरमा आए पनि टी ०३ को ब्याट्री साइज भने पहिलाको जति नै छ । यसमा ३७.३ किलोवाट आवरको ब्याट्री छ । जसले एकपटकको फुलचार्जमा ४०३ किलोमिटर सीएलटीसी रेन्ज दिने कम्पनीको दाबी छ । यसको लम्बाइ ३६२० एमएम, चौडाइ १६५२ एमएम र उचाइ १५७७ एमएम छ । यसमा २४०० एमएमको ह्वीलबेस पाउन सकिन्छ । यसमा १६५ एमएम अग्लो ग्राउण्ड क्लियरेन्स पाउन सकिन्छ । यसको क्याबिनमा ८ इन्चको इन्स्ट्रुमेन्ट क्लस्टर, १० इन्चको सेन्टर कन्सोल छ । सुरक्षाका लागि यसमा एडप्टिभ क्रुज कन्ट्रोल, अटोनोमस इमरजेन्सी ब्रेक, लेन डिपार्चर वार्निङ, ब्लाइण्ड स्पट डिटेक्स्न, लेन किपिङ एसिस्ट लगायत सुविधा भएको लेभल टु एडास उपलब्ध छ । लिप मोटर टी ०३ लेभल २ एडभान्स्ड लिप पाइलट ड्राइभर एक्टिभ सेफ्टि असिस्टेन्स प्रणाली पनि समावेश गरिएको छ । जसले स्मार्ट र सुरक्षित ड्राइभिङ अनुभव प्रदान गर्द । कम्पनीले नाइमा अफर अन्तर्गतद लीपमोटर टी ०३ किन्ने गहकलाई १ वर्षको बीमा र सडक कर निःशुल्क दिएको छ । ७. टाटा पन्च सिप्रदी ट्रेडिङ प्रालिले अर्को मोडल अर्थात् नयाँ ‘पञ्च ईभी’ नाइमा एक्स्पोमा राखेको छ । नयाँ पञ्च ईभीको सुरुवाती मूल्य ३३ लाख ९९ हजार रुपैयाँ तोकिएको छ । तर, एक्स्पो अवधिभर बुकिङ गर्ने ग्राहकहरूले यसलाई विशेष अफरअन्तर्गत ३२ लाख ९९ हजार रुपैयाँमै खरिद गर्न सक्नेछन् । एक्स्पोमा गाडी बुकिङ गर्ने ग्राहकका लागि कम्पनीले ११ वर्ष वा २ लाख २० हजार किलोमिटरसम्मको विस्तारित वारेन्टी सुविधा उपलब्ध गराएको कम्पनीले जनाएको छ । नाइमा एक्स्पोमा राखिएका ७ महँगा कार
सीएफमोटो र जिहो किन्दा २० हजार रुपैयाँ नगद छुट
काठमाडौं । नाइमा मोबिलिटी एक्स्पो २०२६ को अवसरमा नेपालमा सीएफमोटो मोटरसाइकल तथा जिहो विद्युतीय स्कुटरको आधिकारिक वितरक रिषी ट्रेड सेन्टर प्रालिले ‘नाइमा विशेष अफर’ सार्वजनिक गरेको छ । अफरअन्तर्गत सीएफमोटो तथा जिहोका सबै मोडल खरिदमा २० हजार रुपैयाँको हस्तान्तरणयोग्य नगद छुट कुपन उपलब्ध हुनेछ । ग्राहकले उक्त कुपन आफैं प्रयोग गर्न वा परिवारका सदस्य, साथीभाइ तथा आफूले चाहेको अन्य व्यक्तिलाई हस्तान्तरण गर्न सक्नेछन् । त्यस्तै, सीएफमोटो २५० ड्युअल ईएफआई खरिद गर्ने ग्राहकका लागि थप आकर्षक सामग्रीको प्याकेज उपलब्ध गराइएको छ । यस मोडलमा ५ वर्ष वा ६० हजार किलोमिटरमध्ये जुन पहिले हुन्छ, त्यही अवधिसम्मको इन्जिन वारेन्टी उपलब्ध हुनेछ । अफरअन्तर्गत ग्राहकले चारवटा अतिरिक्त सर्भिस कुपन पनि पाउनेछन् । यसबाट नियमित सर्भिसिङमा थप सुविधा प्राप्त हुने कम्पनीले जनाएको छ । सीएफमोटो तथा जिहोका हरेक मोडल खरिदमा निःशुल्क फुल–फेस हेल्मेट उपलब्ध गराइनेछ । ग्राहकका लागि सहज किस्ता सुविधा तथा पुरानो मोटरसाइकल साटफेरको सुविधा पनि राखिएको छ । रिषी ट्रेड सेन्टरका अनुसार ‘नाइमा विशेष अफर’ नगद छुटमा मात्र सीमित नभई खरिद, सुरक्षा, सर्भिस तथा दीर्घकालीन स्वामित्व अनुभवलाई समेटेर ल्याइएको हो । अफरअन्तर्गत २० हजार रुपैयाँको हस्तान्तरणयोग्य नगद छुट, चारवटा अतिरिक्त सर्भिस कुपन, २५० ड्युअल ईएफआईमा सामग्रीको प्याकेज, सबै मोडलमा निःशुल्क फुल–फेस हेल्मेट, ५ वर्ष वा ६० हजार किलोमिटरको इन्जिन वारेन्टी, सहज किस्ता तथा साटफेर सुविधा रहेका छन् । ग्राहकले नाइमा मोबिलिटी एक्स्पोमा सीएफमोटो तथा जिहोको स्टलमा पुगेर विभिन्न मोडल अवलोकन गर्दै अफरबारे विस्तृत जानकारी लिन सक्नेछन् । कम्पनीका अनुसार यो सुविधा नेपालभर रहेका आधिकारिक सोरुम तथा बिक्री केन्द्रमा समेत उपलब्ध हुनेछ ।
सर्वोत्तम पेन्ट्स र माउन्ट एभरेष्टको सेयर मूल्यमा सकारात्मक सर्किट
काठमाडौं । बिहीबार सेयर बजार सामान्य अंकले बढेको छ । नेपाल स्टक एक्सचेन्ज (नेप्से) परिसूचक ८.८१ अंकले बढेर २६५१ बिन्दुमा पुगेको छ । नेप्सेका अनुसार १७१ कम्पनीको सेयर मूल्य बढ्दा ८६ कम्पनीको सेयर मूल्य घटेको छ । १९ कम्पनीको सेयर मूल्यमा भने कुनै परिवर्तन आएको छैन । बिहीबार ३४७ कम्पनीको १ करोड कित्ता सेयर किनबेच हुँदा ३ अर्ब ७२ करोड रुपैयाँ बराबरको कारेबार भएको छ । जसमध्ये सबैभन्दा धेरै कारोबार घलेम्दी हाइड्रोको भएको छ । घलेम्दीको २९ करोड रुपैयाँ बराबरको कारोबार भएको छ । साथै एनआरएन इन्फ्राइस्ट्रक्चरको १६ करोड, सोलु हाइड्रोको १५ करोड, सेन्ट्रल फाइनान्सको १२ करोड र युनाइटेड मोदीको ११ करोड रुपैयाँ बराबरको कारोबार भएको छ । आज सर्वोत्तम पेन्ट्स र माउन्ट एभरेष्टको सेयर मूल्य १५ प्रतिशतले बढेर सकारात्मक सर्किट लागेको छ ।
आयुर्वेद चिकित्सा परिषदको अध्यक्षमा डा. सिद्धार्थ कुमार ठाकुर नियुक्त
काठमाडौं । आयुर्वेद चिकित्सा परिषदको अध्यक्षमा डा. सिद्धार्थ कुमार ठाकुर नियुक्त भएका छन् । उनलाई स्वास्थ्य तथा खाद्य स्वच्छतामन्त्री निशा मेहताले आयुर्वेद चिकित्सा परिषदको अध्यक्षमा पदमा नियुक्त गरेकी हुन् । ठाकुरले मेहतासमक्ष पद तथा गोपनीयताको शपथ पनि लिएका छन् । शपथ ग्रहणसँगै ठाकुरले अब परिषद्को नेतृत्व सम्हाल्नेछन् ।
धनुषा डिष्टिलरीले आईपीओ ल्याउने, विक्री प्रबन्धकमा मुक्तिनाथ क्यापिटल
काठमाडौं । धनुषा डिष्टिलरी लिमिटेडले सर्वसाधारणमा साधारण सेयर (आईपीओ) जारी गर्ने निर्णय गरेको छ । कम्पनीले सेयर निष्काशन प्रक्रिया अघि बढाउन मुक्तिनाथ क्यापिटललाई विक्री प्रबन्धकमा नियुक्त गरेको हो । मुक्तिनाथ क्यापिटलको कार्यालयमा आयोजित एक कार्यक्रममा धनुषा डिष्टिलरीका अध्यक्ष किसन कुमार धनावत र मुक्तिनाथ क्यापिटलका प्रमुख कार्यकारी अधिकृत कबिन्द्र ध्वज जोशीबीच यससम्बन्धी सम्झौतापत्रमा हस्ताक्षर भएको छ । सम्झौताअनुसार कम्पनीले भविष्यमा जारी हुने पूँजीको २० प्रतिशत साधारण सेयर सर्वसाधारणलाई विक्री गर्नेछ । सन् १९९८ मा स्थापना भएको धनुषा डिष्टिलरीले उद्योग विभागबाट उत्पादन तथा बजारीकरणको दर्ता प्रमाणपत्र लिई गुणस्तरीय मदिरा उत्पादन गर्दै आएको छ । कम्पनीको वार्षिक उत्पादन क्षमता ९१ लाख ८० हजार लिटर रहेको छ । हाल कम्पनीले प्रिमियम ब्रान्ड मुस्ताङ गोल्ड ह्विस्की र मुस्ताङ भोड्का उत्पादन गरी बजारमा वितरण गर्दै आएको छ । कम्पनीले आगामी दिनमा थप नयाँ उत्पादन बजारमा ल्याउने र गुणस्तर कायम राख्दै उत्पादन विविधीकरण तथा विस्तार गर्ने योजना बनाएको छ । साथै, नेपाली बजारका साथै अन्तर्राष्ट्रिय बजारमा समेत प्रतिस्पर्धा गर्न सक्षम बन्ने लक्ष्य कम्पनीले राखेको छ ।
एक मृतकबाट ८ जनालाई जीवनदान, नेपालमा अंगदानको अवस्था यस्तो
काठमाडौं । एक व्यक्तिको जीवन समाप्त भएपछि पनि उसका अंगले अरू धेरैको जीवन बचाउन सक्छन् । यद्यपि नेपालमा अंगदानप्रतिको चेतना र सामाजिक सोचको अभावका कारण यस्तो सम्भावना अझै सीमित छ । भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा पछिल्लो नौ वर्षमा मस्तिष्क मृत्यु भएका नौ जनाबाट २३ वटा अंग झिकेर प्रत्यारोपण गरिएको छ । केन्द्रका अनुसार ती मृतकबाट प्राप्त १७ वटा मिर्गौला, पाँच वटा कलेजो र एक वटा संयुक्त कलेजो–मिर्गौला प्रत्यारोपण गरिएको हो । केन्द्रमा मस्तिष्क मृत्यु भएका व्यक्तिबाट अंग झिकेर प्रत्यारोपण गर्ने कार्यक्रमको सुरुवात २०७४ वैशाख २८ गते भएको थियो । त्यस दिन मस्तिष्क मृत्यु भएका व्यक्तिबाट झिकिएको मिर्गौला दुई जनामा प्रत्यारोपण गरिएको थियो । त्यसयता नौ वर्षमा नौ जना मस्तिष्क मृतकबाट २३ वटा अंग प्रत्यारोपण सम्भव भएको केन्द्रले जनाएको छ । एउटै व्यक्तिबाट लिन सकिन्छ आठवटा अंग मस्तिष्क मृत्यु भएका एक व्यक्तिबाट आठ प्रकारसम्मका अंग झिकेर अन्य बिरामीमा प्रत्यारोपण गर्न सकिन्छ । अर्थात्, एक व्यक्तिको मृत्युपछि गरिने अंगदानले एक होइन, आठ जनासम्मको जीवन बचाउन सक्ने सम्भावना हुन्छ । तर नेपालमा अंगदानको सम्भावना र वास्तविकता भने निकै फरक छ । स्वास्थ्यकर्मीका अनुसार परम्परागत सोच, अन्धविश्वास र अंगदानसम्बन्धी पर्याप्त जनचेतना नहुँदा मृतकका आफन्त अंगदान गर्न सहजै तयार हुँदैनन्। कतिपय अवस्थामा लामो परामर्शपछि आफन्त अंगदान गर्न तयार भए पनि सबै अंग दिन भने इच्छुक हुँदैनन् । एउटा अंग दान गर्न तयार भए पनि अन्य अंग दिन अस्वीकार गर्ने अवस्थासमेत रहेको स्वास्थ्यकर्मीहरू बताउँछन् । यसका कारण प्रत्यारोपण गर्न सकिने धेरै अंग प्रयोगविहीन हुने गरेका छन् । सडक दुर्घटनामा हजारौंको मृत्यु, अंगदान भने न्यून नेपालमा सम्भावित मृत अंगदाताको संख्या निकै ठूलो भए पनि त्यसअनुसार अंगदान हुन सकेको छैन । नेपाल प्रहरीको तथ्यांकअनुसार नेपालमा हरेक वर्ष तीन हजारभन्दा बढी मानिसको सडक दुर्घटनामा मृत्यु हुने गरेको छ । त्यसमध्ये ठूलो संख्यामा मस्तिष्क मृत्यु हुने गरेको स्वास्थ्य क्षेत्रका अधिकारीहरू बताउँछन् । उपलब्ध तथ्यांकलाई आधार मान्दा नौ वर्षको अवधिमा मात्रै सडक दुर्घटनासहित विभिन्न कारणले हजारौं व्यक्तिको मस्तिष्क मृत्यु भएको हुनसक्छ। तर त्यसमध्ये अत्यन्तै थोरै व्यक्तिबाट मात्रै अंगदान भएको छ । यसले नेपालमा समस्या अंगदाताको सम्भावित अभावभन्दा पनि अंगदान गर्ने सामाजिक वातावरण र प्रणालीको कमजोरीमा छ कि छैन भन्ने प्रश्न उठाएको छ । नेपालमा मानव शरीरको अंग प्रत्यारोपणसम्बन्धी कानुनमा २०७२ सालमा संशोधन गरिएको थियो । संशोधनमार्फत नातेदार दाताको दायरा विस्तार गर्नुका साथै गैरनातेदारबीच अंग साटासाट र मस्तिष्क मृत्यु भएपछि हुने अंगदानलाई थप व्यवस्थित गर्ने व्यवस्था गरिएको छ । कानुनी व्यवस्था विस्तार भए पनि व्यवहारमा भने अंगदान अझै सहज बन्न सकेको छैन । मृतकका आफन्तलाई अंगदानका लागि तयार पार्ने, मस्तिष्क मृत्यु पहिचान गर्ने, समयमै अंग सुरक्षित गर्ने र आवश्यक बिरामीसम्म पुर्याउने प्रक्रियामा चुनौती रहेको स्वास्थ्य क्षेत्रका जानकारहरू बताउँछन् । विश्व स्वास्थ्य संगठनका अनुसार सन् २०२४ मा विश्वभर करिब १ लाख २७ हजार ७२७ वटा अंग प्रत्यारोपण भएका थिए । विश्वभर अंग प्रत्यारोपणको दायरा विस्तार भइरहेका बेला नेपालमा भने सम्भावित अंगदाताको तुलनामा प्रत्यारोपणका लागि उपलब्ध हुने अंगको संख्या निकै न्यून छ ।
