अन्तर बैंक ब्याजदर ह्वात्तै घट्यो, पौने ७ खर्ब लगानीयोग्य रकम
काठमाडौं । बैंक तथा वित्तीय संस्थामा तरलता थुप्रिँदा अन्तर बैंक ब्याजदर पनि ह्वात्तै घटेको छ । अहिले बैंक तथा वित्तीय संस्थामा पौने ७ खर्ब लगानीयोग्य रकम हुँदा अन्तर बैंक कारोबार पनि घटेको छ भने ब्याजदर पनि न्यूनतम बिन्दुमा छ । बैंकहरूबाट कर्जा प्रवाहमा सुधार नआउँदा बैंकमा पैसा थुप्रिएको छ । अहिले बैंकहरू अधिक तरलताको अवस्थामा पनि छन् । नेपाल राष्ट्र बैंकका अनुसार बैंक तथा वित्तीय संस्थाहरूबीचको अन्तर बैंक कारोबारको भारित औसत ब्याजदर २०८० कात्तिकमा ३.४७ प्रतिशत रहेकोमा २०८१ कात्तिकमा २.९१ प्रतिशत रहेको छ । २०८० कात्तिकमा ९१-दिने ट्रेजरी बिलको भारित औसत ब्याजदर ४.३९ प्रतिशत रहेकोमा २०८१ कात्तिकमा २.७७ प्रतिशत रहेको छ । एक वर्षको अवधिमा अन्तर बैंक ब्याजदर करिब ३७ प्रतिशत घटेको छ । २०८१ कात्तिकमा वाणिज्य बैंकहरुको औसत आधार दर ७.०२ प्रतिशत, विकास बैंकहरूको ८.९६ प्रतिशत र वित्त कम्पनीहरूको १०.०३ प्रतिशत रहेको छ । २०८० कात्तिकमा वाणिज्य बैंकहरूको औसत आधार दर ९.७४ प्रतिशत, विकास बैंकहरूको १२.०० प्रतिशत र वित्त कम्पनीहरूको १३.३३ प्रतिशत रहेको थियो । २०८१ कात्तिकमा वाणिज्य बैंकहरूको निक्षेपको भारित औसत ब्याजदर ५.०१ प्रतिशत, विकास बैंकहरूको ५.८३ प्रतिशत र वित्त कम्पनीहरूट्कोठ ७.१८ प्रतिशत रहेको छ । २०८० कात्तिकमा वाणिज्य बैंकहरुको निक्षेपको भारित औसत ब्याजदर ७.७६ प्रतिशत, विकास बैंकहरूको ९.११ प्रतिशत र वित्त कम्पनीहरूको १०.०२ प्रतिशत कायम भएको थियो । त्यसैगरी, २०८१ कात्तिकमा वाणिज्य बैंकहरूको कर्जाको भारित औसत ब्याजदर ९.०७ प्रतिशत, विकास बैंकहरूको १०.४३ प्रतिशत र वित्त कम्पनीहरूको ११.७० प्रतिशत रहेको छ । २०८० कात्तिकमा वाणिज्य बैंकहरूको कर्जाको भारित औसत ब्याजदर ११.९६ प्रतिशत, विकास बैंकहरूको १३.७० प्रतिशत र वित्त कम्पनीहरूको १४.४८ प्रतिशत रहेको थियो ।
कुमारी क्यापिटल र ध्रुव क्यापिटलबीच सम्झौता, वैदेशिक लगानी प्रवर्द्धन गर्न सहकार्य हुने
काठमाडौं । कुमारी क्यापिटल लिमिटेड र भारतको प्रतिष्ठित ध्रुव क्यापिटल सर्भिसेज लिमिटेडबीच बिहीबार एक सहमतिपत्रमा हस्ताक्षर भएको छ । अब सहमतिमा हस्ताक्षरपश्चात क्यापिटलले प्रदान गर्ने संस्थागत परामर्श सेवाअन्तर्गत नेपालमा वैदेशिक लगानी प्रवर्द्धन गर्न सहकार्य गर्नेछ। कुमारी क्यापिटलले नेपालमा वित्तीय सेवा, लगानी व्यवस्थापन, संस्थागत परामर्श सेवा प्रदान गर्दै आएको छ र भारतमा अवस्थित ध्रुव क्यापिटल सर्भिसेज लिमिटेड एक गैर–बैंकिङ वित्तीय कम्पनी हो । साथै यो आरबीआईद्वारा इजाजतपत्र प्राप्त कम्पनी पनि हो, जसले नेपालको सूचीकृत तथा गैर–सूचीकृत कम्पनीहरूमा लगानी गर्ने योजना बनाएको छ । साथै, कम्पनीले सूचीकृत बैंक तथा वित्तीय संस्थाहरूको संस्थापक सेयरहरू, अस्पताल, फार्मास्युटिकललगायत जलविद्युत परियोजनाहरूमा समेत लगानी गर्ने उद्देश्य राखेको छ । यी लगानीहरू नेपालको ऊर्जा, वित्तीय र सामाजिक क्षेत्रको दिगो विकासमा योगदान पुर्याउन केन्द्रित हुनेछन् । दुबै कम्पनीबीच भएको यो सम्झौताअन्तर्गत उक्त कम्पनीले नेपालमा गर्ने लगानीहरूलाई व्यवस्थित गर्न, सहजीकरण प्रदान गर्न, नेपालमा वैदेशिक लगानी र रणनीतिक योजना कार्यान्वयनमा कुमारी क्यापिटलले मध्यस्थकर्ताको रूपमा काम गर्नेछ । यस साझेदारीले नेपालमा वैदेशिक लगानीको प्रवाहलाई तीव्र बनाउन र दिगो आर्थिक विकासलाई टेवा पुर्याउने विश्वास लिइएको छ । सम्झौताअनुसार कुमारी क्यापिटलले नेपालमा लगानी अवसरहरूको पहिचान, कानूनी र वित्तीय परामर्श, परियोजनाको मूल्यांकन र ध्रुव क्यापिटल सर्भिसेज लिमिटेडको लगानी प्रक्रियाको व्यवस्थापनमा सहयोग पुर्याउनेछ ।
ज्योति विकास बैंकले सेयरधनीलाई लाभांश नदिने
काठमाडौं । ज्योति विकास बैंकले गत आर्थिक वर्षको मुनाफाबाट सेयरधनीहरूलाई लाभांश वितरण नगर्ने घोषणा गरेको छ । मंसिर २७ गते बसेको बैंकको सञ्चालक समितिको बैठकले मुनाफाबाट सेयरधनीहरूलाई कुनै पनि लाभांश (बोनस सेयर र नगद) वितरण नगर्ने निर्णय गरेको हो । योसँगै सेयरधनीहरूको हात खाली हुने भएको छ। बैंकले उक्त आर्थिक वर्षको लेखपरीक्षणसहितको वित्तीय विवरण स्वीकृतिका लागि नेपाल राष्ट्र बैंकमा पेस गर्ने निर्णय गरेको हो । राष्ट्र बैंकबाट वित्तीय विवरण स्वीकृत भएर आएपछि आगामी वाषिृक साधारणसभामा पेस गरेर अनुमोदन गरिने बैंकले जनाएको छ ।
१० प्रतिशत लाभांश वितरण गर्ने डिप्रोक्स लघुवित्तको घोषणा
काठमाडौं । डिप्रोक्स लघुवित्त वित्तीय संस्थाले लाभांश घोषणा गरेको छ । कम्पनी सञ्चालक समितिको मंसिर २७ गते बसेको बैठकले गत वर्षको नाफाबाट १० प्रतिशत लाभांश प्रस्ताव गरेको हो । कम्पनीले गत आर्थिक वर्ष २०८०/८१ को वितरणयोग्य मुनाफाबाट हाल कायम चुक्तापुँजी १ अर्ब ७० करोड ६१ लाख ९६ हजार ९८२.७२ रुपैयाँको कुल १० प्रतिशतले हुन आउने १७ करोड ६ लाख १९ हजार ६९८.२७ रुपैयाँबराबरको लाभांश वितरण गर्ने निर्णय गरेको हो । प्रस्तावित लाभांशमा ९.५ प्रतिशतले हुन आउने १६ करोड २० लाख ८८ हजार ७१३.३६ रुपैयाँबराबरको बोसन सेयर र कर प्रयोजनार्थ ०.५ प्रतिशतले हुन आउने ८५ लाख ३० हजार ९४८.९१ रुपैयाँबराबरको नगद लाभांश छन् । प्रस्तावित लाभांश नेपाल राष्ट्र बैंकको स्वीकृतिपछि आगामी वार्षिक साधारणसभाबाट अनुमोदन गरी सेयरधनीहरूलाई वितरण गरिने कम्पनीले जनाएको छ ।
एक महिनामै नेपालका सडकमा गुड्न थाले ३०० नामी कार
काठमाडौं । एक महिनामै ३०० नामी कार बिक्री भएका छन् । नेपालका लागि नामीको आधिकारिक विक्रेता एमएडब्लू वृद्धि मोटर्सले ३०० कार बिक्री भएको जानकारी दिएको हो । नाडा अटो शोमा नामीले नाडाभरि ७२० वटाभन्दा बढी बुकिङहरू प्राप्त गरेको थियो। नामीले बिग ह्याच विथ फाइभ-स्टार लक्जरी, अटोमोबाइल उद्योगमै नेपालमा पहिलो पटक एक विशेष फेसन शो थिममा लन्च गरेको थियो । फ्रेमलेस ढोका, मेमोरी सिटदेखि लेभल २ एडीएएस सुरक्षा प्रणाली र १२.८ इन्चको एड्भान्सड इन्फोटेनमेन्ट कन्सोलसम्म भएको नामीले आराम, सुरक्षा र प्रविधिको इनोभेटिव फ्युजन प्रदान गर्ने एमएडब्लू वृद्धि मोटर्सले जनाएको छ । नामी कार विभिन्न रङमा उपलब्ध छन् । एमएडब्लू वृद्धि मोटर्सका बिजनेस हेड प्रसन्न पन्तले ब्रान्डको अहिलेसम्मको यात्राप्रति उत्साह व्यक्त गरे ।
१४ करोडमा कुश्मा नगरपालिकाको भवन बन्दै
पर्वत । कुश्मा नगरपालिकाले १४ करोड रुपैयाँको लागतमा पालिका भवन निर्माण सुरु गरेको छ । नगरप्रमुख रामचन्द्र जोशीले बिहीबार भवनको शिलान्यास गरे । आगामी १५ महिनामा निर्माण सम्पन्न गर्ने लक्ष्य छ । भवनका लागि जिल्ला समन्वय समितिले जग्गा उपलब्ध गराएको हो । भवन लिफ्टसहित साढे छ तलाको हुनेछ । साथै पर्वतका सातवटै स्थानीय तहमा भवन निर्माण प्रारम्भ भएको छ । महाशिला, जलजला र फलेवास नगरपालिकाका निर्माणाधीन भवन अन्तिम चरणमा पुगेका छन् ।
नाफिजमा चुनावी रौनक, दुई प्यानल प्रतिस्पर्धामा
काठमाडौं । आर्थिक पत्रकारहरुको संस्था नेपाल आर्थिक पत्रकार संघ (नाफिज)को चुनावी माहोलले पत्रकारहरुबीच रौनक बढाएको छ । नाफिजको १५औं साधारणसभा तथा सातौं महासभामार्फत् हुने चुनावमा दुई प्यानल प्रतिस्पर्धामा उत्रिएका छन् । नाफिज निर्वाचन समितिका अनुसार अध्यक्ष पदका लागि वर्तमान कार्यसमिति उपाध्यक्ष तथा हाम्रोअर्थ डटकमकी सम्पादक मेनुका कार्की र आर्थिकन्यूज डटकमका प्रबन्ध सम्पादक इन्द्र बानिया प्यानल बनाएर प्रतिस्पर्धामा देखिएका छन् । कार्की नेतृत्वको प्यानलमा उपाध्यक्षमा निरोज कुमार थापा र विजय दमासे, महासचिवमा निकेश खत्री, सचिवमा राजाराम न्यौपाने, कोषाध्यक्षमा मिलन विश्वकर्मा, सदस्यहरूमा अनिष मिजार, चित्रराज भण्डारी (सीआर), अनुप आचार्य र शुक्र गिरी रहेका छन् । त्यस्तै, बानिया नेतृत्वको प्यानलबाट उपाध्यक्षमा परमेश्वर अधिकारी र पिताम्बरी खतिवडा (प्रमिला), महासचिवमा नबिन ढुङ्गाना, सचिवमा चेत नारायण पाण्डेय, कोषाध्यक्षमा भोला देवकोटा (परिवर्तन) र सदस्यमा आशुतोष अर्याल रहेका छन् । दुवै टिमले जित्ने दाबीका साथ सदस्यहरुलाई भोटको अपील गरिरहेका छन् ।
महासंघको विधान सर्वसम्मत संसोधन, प्रत्यक्ष निर्वाचित अध्यक्ष, कार्यकाल दुइ बर्ष मात्र
काठमाडौं । नेपाल उद्योग वाणिज्य महासंघको मंगलबार सम्पन्न विशेष साधारण सभाले सर्वसम्मत रुपमा विधान संसोधन गरेको छ । महासंघको विधान २०४९ मा गरिएको सातौ संसोधनले संस्थागत बिकासतर्फ महत्वपूर्ण निर्णय गरेको छ । महासंघको अध्यक्ष प्रत्यक्ष रुपमा निर्वाचित हुने व्यवस्था गरिएको छ । कार्यकाल दुइ बर्षको हुनेछ । २०७३ यता वरिष्ठ उपाध्यक्ष स्वतः अध्यक्ष हुने व्यवस्था गरिएको थियो । नयाँ संसोधन अनुसार वर्तमान वरिष्ठ उपाध्यक्ष अध्यक्ष भएर कार्यकाल सकिएपछि हुने बार्षिक साधारण सभाले प्रत्यक्ष निर्वाचनबाट अध्यक्षको चयन गर्नेछ । महासंघ कार्यकारिणी समितिमा तीन जना उपाध्यक्ष रहँदै आएकोमा पाँच पुर्याइएको छ । यसैगरि एक जना वरिष्ठ उपाध्यक्ष रहनेछ । वरिष्ठ उपाध्यक्षको चयन पनि कार्यकारिणी समितिले गर्नेछ । जिल्ला नगरतर्फ एक थप गरि दुइ जना उपाध्यक्ष रहने व्यवस्था गरिएको छ । यसैगरि महिला उपाध्यक्ष रहने पनि व्यवस्था गरिएको छ । महिला उपाध्यक्षलाई कार्यकारिणी समितिले चयन गर्नेछ । तर यसका लागि कार्यकारिणी समितिमा कम्तीमा १२ जना महिला सदस्य रहेको हुनुपर्ने व्यवस्था गरिएको छ । महिला उपाध्यक्षको सभापतित्वमा महिला उद्यमी परिषद पनि महासंघमा गठन हुने व्यवस्था गरिएको छ । महासंघको नेतृत्व तहमा महिला सहभागिता बढाउन जिल्ला नगर, वस्तुगत र एसोसिएट तर्पm महिला सदस्य निर्वाचित हुने गरि आरक्षणको व्यवस्था गरिएको छ । महासंघ अन्तर्गतको नेपाल युवा उद्यमी फोरमका अध्यक्ष महासंघ केन्द्रिय कार्यकारिणी समितिमा पदेन सदस्यका रुपमा रहने व्यवस्था पनि नयाँ विधानमा गरिएको छ ।
