आपतमा कांग्रेस र एमालेबीच सहकार्य हुन्छ, बंशमा आधारित शासन चलाउन दिँदैनौँ: पोखरेल
काठमाडौं । नेकपा (एमाले)का कार्यवाहक अध्यक्ष ईश्वर पोखरेलले अनिर्वाचित र वंश परम्परामा आधारित शासनसत्ता चलाउन नदिने बताएका छन् । पेशागत महासङ्घ नेपालद्वारा आज ललितपुरमा आयोजित तेस्रो राष्ट्रिय परिषदलाई सम्बोधन गर्दै कार्यवाहक अध्यक्ष पोखरेलले लोकतान्त्रिक व्यवस्थामा बंशवादको शासनसत्ता कुनै पनि हालतमा हुन नसक्ने भन्दै सहमति र सहकार्यका आधारमा वर्तमान सरकार अगाडि बढेको बताए । ‘कांग्रेस र एमालेबीच आपतकालीन अवस्थामा सहकार्य हुन्छ, तर चुनावमा प्रतिस्पर्धा हुन्छ, २०८४ मा हामी प्रतिस्पर्धाबाट बहुमत हासिल गर्न लाग्नुपर्छ, राजनीतिक अस्थिरता मुक्त गराउन कांग्रेससँग सहकार्य भएको हो, अनिश्चितता रोक्न कांग्रेससँग सहकार्य भएको हो, त्यो सफल भएको छ, राजनीति मान्छे र बिचार बोकेर आउने हुँदा कुनै समस्या छैन, बंशवाद स्वीकार्य छैन,’ उनले भने । कार्यवाहक अध्यक्ष पोखरेलले कांग्रेस र एमालेबीचको सहकार्य र प्रतिस्पर्धा दुवै रहेको बताउँदै मुलुकको आवश्यकताका आधारमा सहकार्य र परिस्थितिका आधारमा प्रतिस्पर्धा हुने बताए । उनले मुलुकलाई समस्या पर्दा सर्वाहारा श्रमजीवीको पक्षपोषण कम्युनिष्ट र उदारवादी धारको कांग्रेसबीच सहकार्य गर्ने गरेको बताउँदै चुनावी समयमा हार्दिकता पूर्वक प्रतिस्पर्धा हुने बताए । नेता पोखरेलले शिक्षक आन्दोलनप्रति लक्षित गर्दै शिक्षासम्बन्धी ऐन अविलम्ब टुङ्गोमा पुर्याउने काम गर्ने बताए । अहिले लोकतान्त्रिक व्यवस्थामा पञ्चायती शैलीको आन्दोलन गरेर सकारात्मक काम नहुने भन्दै त्यसका लागि सचेत हुनुपर्नेमा उनको जोड छ । ‘शिक्षा विधेयकको कुरा गर्दा विधेयक बनाउने र टुङ्गोमा पुर्याउने कुरामा शिक्षकका विज्ञ प्रतिनिधिहरूको पनि भूमिका हुन्छ, शिक्षकका प्रतिनिधिसहितको सहभागितामा विधेयक टुङ्गोमा पुग्छ, हिजो हामी लोकतन्त्रका लागि लड्दै थियौँ, अहिले हामी लोकतन्त्रभित्र आफ्नो अधिकारका लागि लड्दै छौँ, अब पनि हिजोको जस्तो आन्दोलन हैन, अबको आन्दोलन फरक र वैचारिक हुनुपर्छ,’ उनले भने । उनका अनुसार निजामती कर्मचारी ऐन संसद्मा छ । त्यो पनि छलफलका माध्यमबाट आवश्यक व्यवस्थापन गरी पारित हुन्छ । पार्टीको मान्छे हुँ भन्दा कहिले पेसागत मर्यादा भुल्ने, कहिले पेसागत भूमिकाको हुँ भन्दा पार्टीको जनसङ्गठनको भूमिका बिर्सने नहुने उनले बताए । ‘हिजोका कामको समीक्षा गरेर अबको कार्यको योजना बनाउनुस् । पेसागत मर्यादा र पार्टीको भूमिका दुवैलाई व्यवस्थापन गरेर अगाडि बढ्नुस्,’ उनले भने । एमाले पोलिटब्युरो सदस्य एवं उपत्यका इन्चार्ज सुजिता शाक्यले पेसागत महासङ्घलाई देशव्यापी रुपमा सक्रिय बनाएर अगाडि बढ्न आग्रह गरिन् । उनले वर्तमान लोकतान्त्रिक व्यवस्थामा जन्मदेखि मृत्यु पर्यन्त पाउनुपर्ने हकलाई सुरक्षित गरेको अवस्थामा राज्य व्यवस्थालाई सुशासन युक्त रुपमा सञ्चालन गराउन ध्यान दिनुपर्नेमा उनले जोड दिइन् । उनले नेपालीमा विदेशी जीवनस्तर, त्यहाँको परिस्थितिको तुलना गर्ने प्रवृत्तिका कारण भएका प्रगतिलाई ओझेलमा पार्ने काम भएको भन्दै भएको कुरालाई उजागर गर्दै सुशासन र समृद्धिलाई ध्यान दिएर अगाडि बढ्नुपर्नेमा ध्यानाकर्षण गराइन् ।
बन्द होइन, डुब्न लागेको बीमालाई उठाउन खोजेको हो : स्वास्थ्यमन्त्री पौडेल
काठमाडौं । स्वास्थ्य तथा जनसङ्ख्या मन्त्री प्रदीप पौडेलले स्वास्थ्य बीमा कार्यक्रम थप प्रभावकारी बनाउँदै लगिएको बताएका छन् । आजदेखि तानसेनको टुँडिखेलमा सञ्चालन भएको दोस्रो तानसेन महोत्सवलाई उद्घाटन गर्दै उनले स्वास्थ्य बीमाका लागि स्रोत सुनिश्चित गरी व्यवस्थित र प्रभावकारी बनाउने कार्यमा सरकार लागेको बताए । मन्त्री पौडेलले भने, ‘केही व्यक्तिहरूले मलाई भन्ने गर्नुभएको छ, तपाईँले त बीमा बन्द गर्न लाग्नुभयो रे, यो बीमा चल्दैन भन्नुभयो रे, मैले भनेको यसरी चल्दैन, मैले डुब्न लागेको बीमालाई उठाउन खोजेको, अव्यवस्थित बीमालाई व्यवस्थित बनाउन खोजेको, अपूर्ण बीमालाई पूर्णतातिर लिएर जान खोजेको हो, कार्यान्वयन हुने गरी हुनसक्ने गरी हामीले दृष्टिकोणहरू ल्याएका छौँ, के के गर्यौँ भने बीमा सुरक्षित गर्न सकिन्छ, के के गरे बिमामा नियमित आम्दानी गर्न सकिन्छ ? भन्ने कुराको परिकल्पना गरेका छौँ ।’ आफू आम सर्वसाधारणले प्राप्त गरेका सुविधालाई कटाउने पक्षमा नभइ त्यसलाई सुरक्षित कसरी गराउनतर्फ लागेको उनले स्पष्ट पारे । मन्त्री पौडेलले भने, ‘वर्तमान सरकार स्वास्थ्य क्षेत्रको विकास र सुधारलाई प्राथमिकतामा राखेर व्यवस्थित बनाउने योजनामा छ । बिरामीको उपचार सर्व सुलभ गर्ने र उपचार गर्न नसक्नेलाई निःशुल्क बनाउने तथा स्वास्थ्य बीमा कार्यक्रमलाई थप प्रभावकारी बनाउने छौँ ।’ उपचार कसरी गर्ने भन्ने बारेमा केही उपलब्धिहरू भए पनि त्यसले पूर्णता प्राप्त गर्न नसकेको उनले बताए । मन्त्री पौडेलले बिरामी बढाउने नभइ बिरामी हुन नदिने उपाय कसरी खोज्न सकिन्छ त्यसअन्तर्गत काम गर्न जरुरी रहेको उल्लेख गरे ।
जाजरकोट केन्द्रबिन्दु भएर दुई पटक भूकम्पको धक्का
काठमाडौं । जाजरकोटको कुशे गाउँपालिकाको पैङ्क आसपास केन्द्रविन्दु भएर आज साँझ २ पटक भूकम्पको धक्का महसुस भएको छ । प्रथम पटक ८ः०७ बजे ५.२ म्याग्निच्युडको भूकम्पको धक्का महसुस भएको मापन केन्द्र सुर्खेतका कार्यालय प्रमुख चिन्तन तिमल्सेनाले जानकारी दिए । त्यसैगरी दोस्रो भूकम्प पनि सोही केन्द्रविन्दु भएर ८ः१० बजे ५.५ म्याग्निच्युडको भूकम्पको धक्का गएको उनले बताए ।
उच्चको आदेशपछि घरबाटै पक्राउ परे रवि, आज काठमाडौंको हिरासतमा राख्ने
काठमाडौं । राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेलाई प्रहरीले नियन्त्रणमा लिएको छ । आज उच्च अदालत तुलसीपुरको बुटवल इजलासले उनलाई सहकारीको रकम ठगी गरेको कसुरमा पुर्पक्षका लागि थुनामा पठाउन आदेश गरेसँगै काठमाडौं उपत्यका अपराध अनुसन्धान कार्यालयका प्रहरी वरिष्ठ उपरीक्षक रमेशकुमार बस्नेत नेतृत्वको टोलीले नियन्त्रणमा लिएको उपत्यका अपराध अनुसन्धान कार्यालयका प्रहरी उपरीक्षक अङ्गुर जिसीले जानकारी दिए । उनका अनुसार लामिछानेलाई काठमाडौंको बूढानीलकण्ठ स्थित हेपाली हाइटबाट नियन्त्रणमा लिइएको हो । सङ्गठित रूपमा सहकारी ठगी गरेको आरोप खेपिरहेका लामिछानेलाई उच्च अदालत तुलसीपुरको बुटवल इजलासका न्यायाधीशद्वय रमेश ढकाल र स्वीकृति पराजुलीले पुर्पक्षका लागी थुनामा पठाउन आदेश गरेका थिए ।
रविलाई थुनामा पठाउने उच्च अदालतको आदेश
काठमाडौं । उच्च अदालत तुलसीपुरको बुटवल इजलासले रास्वपा सभापति रवि लामिछानेलाई थुनामा पठाउने आदेश गरेको छ । जिल्ला अदालत रुपन्देहीको आदेश बदर गर्दै उच्च अदालतले थुनामा पठाउने आदेश गरेको हो । उच्च अदालत तुलसीपुर बुटवल इजलासका सूचना अधिकारी यमप्रसाद बास्कोटाले छविलाल जोशीको हकमा भने जिल्लाको आदेश सदर गरेको बताए । छविलाललाई जिल्ला अदालतले पुर्पक्षका लागि थुनामा पठाउने आदेश दिएको थियो । रवि र पूर्वडीआईजी जोशीको मुद्दाको उच्च अदालत तुलसीपुरको बुटवल इजलासमा बहस भएको थियो । बुटवलको सुप्रिम सहकारी ठगी र संगठित अपराधसम्बन्धी कसुरमा उनीहरुविरुद्धको मुद्दा उच्च अदालतमा छ ।
विशेष न्यू ईयर, न्यू अफर र देशव्यापी टेस्ट ड्राइभ क्याम्पको साथ नयाँ वर्षको उत्साह बढाउँदै नामी
काठमाडौं । नयाँ वर्षको अवसरमा नेपालका लागि नामी ईभीको आधिकारिक वितरक एमएडब्लू वृद्धिले शनिबारदेखि चैत्र ३० गतेसम्म सन्चालन हुने आफ्नो न्यू ईयर, न्यू अफर देशव्यापी एक्सचेन्ज र टेस्ट ड्राइभ क्याम्प गर्ने घोषणा गरेको छ। एक हप्तासम्म चल्ने यस कार्यक्रमको उद्देश्य ग्राहक संग्लग्नता बढाई उनीहरूलाई बिग ह्याच र फाइभ स्टार लक्जरी भएको नामीको प्रत्यक्ष अनुभव प्रदान गर्नु हो । योसँगै ग्राहकहरूले अब तोकिएको नामी गाडीको बुकिङको लागि केवल ५ लाख ९९ हजार रुपैयाँदेखि सुरु हुने सजिलो डाउनपेमेन्टबाट फाइदा लिन सक्नेछन् । यो अफरमा बुकिङ भएको मितिदेखि दुई वर्किङ डे भित्र ग्यारेन्टीपूर्ण डेलिभरीका साथै १ लाख सम्मको फाइदाहरू समावेश हुनेछन् । खरिद प्रक्रियालाई थप सजिलो बनाउन नामीले ८० प्रतिशतसम्मको फाइनान्सिङ सहायता प्रदान गर्नेछ जसले गर्दा गाडी लिने प्रक्रिया सहज हुने र ग्राहकले सुरूमै गर्नु पर्ने खर्च पनि कम हुनेछ । साथै टेस्ट ड्राइभ लिने सबै सहभागीहरूलाई निःशुल्क उपहार प्रदान गरिनेछ ।
अनुमति बिना सडक खन्नेलाई महानगरले तिरायो २५ हजार जरिवाना
काठमाडौं । काठमाडौं महानगरपालिका वडा नम्बर १५, स्वयम्भूमा अनुमति बिना सार्वजनिक सम्पत्ति कालोपत्रे सडक खनेर क्षति पुर्याएपछि महानगर प्रहरीले कारबाही गरेको छ । महानगर प्रहरी बलले दोषी ठहर गर्दै छिरिङ गुरुङलाई २५ हजार रुपैयाँ जरिवाना गरेको हो । महानगरपालिकाले सार्वजनिक संरचना र सडक सुरक्षामा कडाइ गर्दै अवैध गतिविधिमा संलग्नलाई कानुनी कारबाही गर्ने नीति अपनाएको जनाएको छ । अनुमति नलिई सडक खन्दा यात्रु तथा सवारी आवागमनमा बाधा पुर्याइनुका साथै पूर्वाधारको क्षति बढ्ने भएकाले महानगरले निगरानी बढाएको हो । महानगर प्रहरी बलले आगामी दिनमा पनि अनधिकृत रूपमा सार्वजनिक सम्पत्तिमा हस्तक्षेप गर्ने जो-कोहीलाई कारबाही गरिने चेतावनी दिएको छ । महानगरका अनुसार, यस्ता कार्यले सहरी संरचनामा क्षति पुग्ने मात्र नभई सर्वसाधारणलाई समेत असुविधा पुर्याउने भएकाले निगरानी अझ कडा बनाइने छ ।
नेपालमा ३५ लाख पर्यटकलाई सेवा दिनसक्ने होटल छन्, पर्यटकको खाँचो छ : अध्यक्ष शाह
काठमाडौं । नेपाल होटल संघ (हान) का अध्यक्ष विनायक शाहले नेपालभरि ३५ लाख पर्यटकलाई सेवा दिनसक्ने होटल संरचना तयार भइसकेको बताएका छन् । शुक्रबार आयोजित ‘२०औं फेवा नववर्ष महोत्सव’ घोषणा कार्यक्रममा बोल्दै उनले मुलुकमा स्तरीय होटलहरू निर्माण भइसके पनि पर्यटकको अभाव रहेको बताए । शाहका अनुसार विशेषगरी पोखरा उच्चस्तरीय होटल संरचनासहित प्रमुख पर्यटकीय गन्तव्य बनेको छ। अध्यक्ष शाहका अनुसार नेपालमा लगानीको राम्रो वातावरण रहे पनि पर्यटकको संख्या अपेक्षाअनुसार बढ्न सकेको छैन । उनका अनुसार पर्यटन क्षेत्रले आर्थिक उन्नतिमा योगदान दिन सक्छ, तर आवश्यक संख्यामा पर्यटक भित्र्याउन चुनौती भइरहेका छन् । उनले पछिल्लो समय नेपालमा भइरहेका विभिन्न प्रदर्शन तथा आन्दोलनका कारण अन्तर्राष्ट्रिय पर्यटक आगमन प्रभावित भएको समेत उल्लेख गरे । चैत ३० देखि वैशाख १ गतेसम्म पोखराको फेवाताल किनारमा आयोजना हुने ‘२०औं फेवा नववर्ष महोत्सव’ ले पर्यटन प्रवर्द्धनमा सकारात्मक प्रभाव पार्ने विश्वास आयोजकहरूले लिएका छन् । महोत्सव अवधिभर होटल सेवामा २० प्रतिशत छुट प्रदान गरिने आयोजकको भनाइ छ । महोत्सवले स्वदेशी तथा विदेशी पर्यटक आकर्षित गर्न मद्दत गर्ने अपेक्षा गरिएको छ । नेपाल होटल संघका अनुसार, आगामी दिनमा आन्तरिक तथा बाह्य पर्यटक आगमनलाई प्रोत्साहित गर्ने नीति अवलम्बन गर्नुपर्ने देखिएको छ । संघका अध्यक्ष शाहले पर्यटन क्षेत्रलाई मजबुत बनाउन दीर्घकालीन योजनाका साथै सहजीकरण आवश्यक रहेको बताए ।
