डोङफेङ नामीको 'फाइभ स्टार अफर' सार्वजनिक, इभी किन्दा ५ सुविधा पाइने
काठमाडौं । नेपालका लागि डोङफेङ नामीको आधिकारिक वितरक एमएडब्लु वृद्धिले 'नामी फाइभ स्टार अफर' सार्वजनिक गरेको छ । सीमित अवधिको यो योजना नेपालभरिका सबै नामी शोरूमहरूमा उपलब्ध हुनेछ । अफर अन्तर्गत नयाँ विद्युतीय सवारी किन्दा वा पुरानो सवारी अपग्रेड गर्दा ग्राहकहरूले पाँच विशेष लाभहरू प्राप्त गर्नेछन् । कम्पनीका अनुसार ‘नामी फाइभ स्टार अफर’ अन्तर्गत ग्राहकहरूले आकर्षक नगद छुट, ७ केब्लू पल्स ३.५ डब्लू चार्जर, अटो प्लस बीमा, निःशुल्क सडक कर (चालु आर्थिक वर्षको लागि) र निःशुल्क एक्सेसरिजहरू पाउनेछन् । यी पाँच लाभहरूले नामी विद्युतीय सवारी खरिदलाई अझै सहज, सुरक्षित र आकर्षक बनाउने कम्पनीको विश्वास छ । बढ्दो विद्युतीय सवारी बजारमा नामी एक सुलभ, भरपर्दो र आधुनिक विकल्प बनिसकेको छ । ‘बेस्ट इन क्लास’ फिचर, स्मार्ट ड्राइभिङ रेञ्ज र प्रतिस्पर्धी मूल्यले यसलाई धेरै नेपाली उपभोक्ताहरूको पहिलो रोजाइ बनाएको छ । लक्जरी, आधुनिक डिजाइन र प्रविधिको संयोजनले नामीलाई विद्युतीय सवारी चाहने ग्राहकहरूका लागि उत्कृष्ट ब्रान्डका रूपमा स्थापित गराएको छ । कम्पनीले विद्युतीय सवारी पारिस्थितिकी प्रणालीलाई थप मजबुत बनाउन देशभर रिल्याक्स चार्जिङ नेटवर्क विस्तार गरिरहेको छ, जसअन्तर्गत हालसम्म ६६ स्थानमा डीसी र एसी चार्जिङ सुविधा उपलब्ध भइसकेको छ । यी सुविधाहरूको लाभ उठाउन इच्छुक ग्राहकहरूलाई कम्पनीले निकटतम शोरूममा समयमै सम्पर्क गर्न अनुरोध गरेको छ ।
दुम्कीबास पुल भाँचिदा सयौं ट्रक सडकमा, सरकार मौन
काठमाडौं । पूर्व–पश्चिम राजमार्गअन्तर्गत पूर्वी नवलपरासीमा पर्ने दुम्कीबासको पुल भाँचिएको ६ महिना पुग्न लाग्दा पनि सरकारले विकल्प प्रस्तुत नगर्दा सवारी चालक र यात्रुहरूले सास्ती खेप्नुपरेको छ । गत वर्षको पुस २६ गते पूर्वी नवलपरासीमा रहेकामध्ये सबैभन्दा लामो विनयी खोला पुलको पुन अत्यधिक भारसहितको भारतीय मालवाहक लरीका कारण पुल भाँचिएको थियो । पुल भाँचिएपछि पुलभन्दा उत्तरबाट डाइभर्सन बनाएर यातायात सुचारु गरिएको थियो । तर केही हप्तामै भारी वर्षा हुँदा डाइभर्सन बगाएर पूर्व-पश्चिम राजमार्गको यातायात र ढुवानी सेवा अवरुद्ध भएको थियो । पुल सञ्चालनमा नआउँदासम्मका लागि डाइभर्सनको वैकल्पिक मार्ग प्रयोगमा ल्याइए पनि स्थानीयले मालवाहक ट्रक चल्न नदिएपछि समस्या निम्तिएको हो । भैरहवा–काठमाडौं रुटमा ना ५ ख ७४११ नम्बरको ट्रक चलाउँदै आएका कृष्णबहादुर श्रेष्ठ ४ दिनदेखि बर्दघाटमै छन् । असार ८ गते भैरहवाबाट पूर्व-पश्चिम राजमार्ग हुँदै पश्चिम नवलपरासीको बर्दघाट पुगेका उनी ४ देखि सडकमै दिन–रात बिताउन बाध्य छन् । दुम्किबासको डाइभर्सन बाढीले बगाएको भन्दै प्रहरीले रोकेपछि उनले सडकमै समय बिताइरहेका हुन् । उनले भने, ‘हामी यो ठाउँमा आएको ४ दिन भयो । वीरगञ्जबाट एक गते लोड गरेर भैरहवा हुँदै यो ठाउँमा आएर बसेको ४ दिन भयो । ४ दिन दुम्कीबास पारी नै खडा भएर बसियो । आज १० दिन भयो । १० दिनमा कति दुःख कति, सुख, कति गर्मी भोग्या होला । प्रशासनलाई भन्यौं, प्रशासनले सुनेन । आज ४ दिन भइसक्यो घाम लागेर बसेको । प्रशासनले चाह्यो भने सबै पुल बनाएर आवतजावत गर्न सकिन्थ्यो । प्रशासनले गाउँलाई भनेको भए सबै गाडी पार भइसक्थ्यो ।’ भैरहवाबाट काठमाडौं हिँडेका अर्का ट्रक चालक बुद्धिसागर न्यौपाने पनि ४ दिनदेखि बर्दघाटमै रोकिएका छन् । ना ६ ख ३२८४ नम्बरको ट्रकका चालक न्यौपानेले सरकारले जनताका पीडा नसुनेको भन्दै आक्रोश व्यक्त गरे । उनले चार दिनसम्म सडकमा रोकिनुपर्दा आफ्ना चालक साथीहरू लामखुट्टेको टोकाइबाट डेंगु सङ्क्रमित भई अस्पताल भर्ना हुनुपरेको समेत बताए । ना ६ ख ३६९९ नम्बरको ट्रकमा आलु र प्याज बोकेका ट्रक चालक सुबोध पासवान पनि ४ दिनदेखि बर्दघाटमै रोकिएका छन् । उनीहरूजस्तै सयौं चालकहरू अहिले सडकमै दिनरात कटाइरहेका छन् । सयौं ट्रकहरूलाई सडकमै राख्दा उनीहरूले सास्ती खेप्नुपरेको हो । कतिपय सवारीसाधनहरू बुटवलबाट पाल्पा, स्याङ्जा, पोखरा र मुग्लिङ हुँदै काठमाडौं जान समेत बाध्य भएका छन् । पुल भाँचिएको ६ महिना पुग्न लाग्दा पनि निर्माण नहुनु तथा वैकल्पिक सडकको व्यवस्था नहुँदा सर्वसाधारणले सास्ती खेप्नुपरेको हो । बुटवल–नारायणगढ खण्डको दुम्कीबासस्थित विनयी खोलाको भाँचिएको पुललाई यहीँ असार भित्र सञ्चालनमा ल्याउने तयारी गरिएको छ ।
जरिवाना नतिर्ने चालकको लाइसेन्स नविकरण नहुने व्यवस्था गर्ने तयारीमा बागमती सरकार
काठमाडौं । सवारी चालकलाई ट्राफिक नियम उल्लङ्घनको सजायस्वरूप सहज डिजिटल माध्यमबाट जरिवाना तिर्न व्यवस्था मिलाउने उद्देश्यले सरकारले लागू गरेको ई–चलान (डिजिटल चिट) प्रणाली प्रभावहीन देखिएको छ । सवारी लाइसेन्स छपाइमा देखिएको समस्याको अन्त्य गर्नुका साथै सवारी नियम उल्लङ्घन गर्दा हुने झन्झट समेत हट्ने भन्दै सरकारले देशभरका ७० जिल्लामा नागरिक एपमार्फत ई-चलानको सुभारम्भ गरेको थियो । तर देशका अधिकांश जिल्लाहरुमा ई–चलानमार्फत अपेक्षित रुपमा राजस्व संकलन गर्न सकिरहेको छैन । चालु आर्थिक वर्ष २०८१/८२ को पुसदेखि जेठसम्मको ६ महिनामा जिल्ला ट्राफिक प्रहरी कार्यालय मकवानपुरले २९ लाख १० हजार ५ सय ४५ रुपैयाँ बराबरको ई-चलान काटे पनि ५ लाख ५९ हजार ५२ रुपैयाँ मात्र राजस्व संकलन गर्न सकेको छ । जिल्ला ट्राफिक प्रहरी कार्यालय मकवानपुरका अनुसार २३ लाख ५१ हजार ४ सय ९३ रुपैयाँ राजश्व अझै असुल हुन बाँकी रहेको छ । सो अवधिमा ट्राफिक नियम उल्लंघन गर्ने ३ हजार २ सय ७१ सवारी चालकहरूमध्ये केवल ६ सय ५२ जनाले मात्र तोकिएको जरिवाना तिरेको कार्यालयले जनाएको छ । सवारी चलकहरुमा डिजिटल प्रणालीमार्फत चासो नहुनु र राजस्व दाखिला नगर्दा कुनैपनि असर नपर्ने सोचका कारण डिजिटल राजस्व संकलन चुनौतिपूर्ण बन्दै गएको छ । मकवानपुरमा ई-चलानमार्फत सबैभन्दा कम राजस्व पुस महिनामा संकलन भएको छ । उक्त महिनामा २ सय ६६ जना सवारी चालकमाथि कारबाही हुँदा समेत ६२ जनाले ४९ हजार ५ सय २ रुपैयाँ जरिवाना तिरेका छन् । गत जेठ महिनामा सबैभन्दा धेरै ७ सय ९ जनामाथि कारबाही हुँदा १ सय ५१ जनाबाट १ लाख ३२ हजार ५ सय २० रुपैयाँ राजस्व संकलन भएको छ । बागमती प्रदेश सरकारले डिजिटल चिट काटेर जरिवाना नतिर्ने सवारी चालकहरूको लाइसेन्स नविकरणमा रोक लगाउने तयारी थालेको छ । डिजिटल चिट काट्ने तर जरिवाना नतिरि उम्कने सवारी चालकहरूमाथि कडाई गर्न वागमती प्रदेश सरकारले यस्तो तयारी थालेको हो । यातायात व्यवस्था कार्यालय हेटौंडाका प्रमुख प्रविण श्रेष्ठले लामो समयसम्म ई-चलानको जरिवाना नतिर्ने सवारी चालकहरूको लाइसेन्स नविकरणमा रोक लगाउने प्रणाली लागू गर्ने तयारी भइरहेको बताए । उनले राजस्व नतिर्ने प्रवृत्ति बढ्दै गएकाले कानूनी कारबाही गर्ने प्रदेश सरकारको तयारी रहेको बताए । यस्तो कारबाहीमा जरिवाना नतिर्ने सवारी चालकलाई दोब्बर जरिवाना तिराउनेदेखि सवारी चालक अनुमति पत्र नविकरण हुन नदिनेसम्मका व्यवस्था गर्न सकिने श्रेष्ठको भनाइ छ । ‘सेवाग्राहीको सहजताका लागि वागमती प्रदेशले नयाँ नयाँ प्रविधिहरू लञ्च गरिरहेको छ । अहिले ट्राफिक नियम उल्लङ्घन गर्ने सवारी चालकहरुले विभिन्न पेमेन्ट गेटवेबाट तुरुन्तै जरिवाना तिर्ने प्रणालीको विकास भइसकेको छ । किनभने भोलि राज्यले पेमेन्ट नगरेको सन्दर्भमा लाइसेन्स नै नविकरण हुन नसक्ने व्यवस्था पनि गर्नसक्छ’, उनले भने । नागरिक एपमार्फत सवारी चालकले आफ्नो लाइसेन्स जानकारी हेर्ने, ट्राफिक नियम उल्लङ्घनबारे सूचना प्राप्त गर्ने, अनलाइन कक्षा लिने र जरिवाना तिर्ने सुविधा उपलब्ध गराइए पनि अपेक्षाकृत रूपमा सेवा प्रयोग न्यून देखिएको छ । यातायात कार्यालय धाउनुपर्ने झन्झट अन्त्य गर्ने मुख्य लक्ष्य बोकेको प्रणालीले व्यवहारमा सरकारी राजस्व संकलनमा ठोस परिणाम दिन नसकेको बताइएको छ । पछिल्लो समय विभिन्न जिल्लाबाट प्राप्त विवरणले समयमै ई-चलान जरिवाना नतिर्नेहरूको संख्या उच्च रहेको देखाउँछ ।
हुन्डाई क्रेटा ईभी धनगढीमा सार्वजनिक, विद्युतीय बजारप्रति विश्वास बढाउँदै
काठमाडौं । नेपालमा हुन्डाई सवारीसाधनको एकमात्र आधिकारिक वितरक लक्ष्मी इन्टरकन्टिनेन्टलले धनगढीमा नयाँ क्रेटा ईभी (विद्युतीय गाडी) सार्वजनिक गरेको छ । बुधबार दिनेश फोर व्हील्सको आयोजनामा सम्पन्न विशेष कार्यक्रममा नयाँ क्रेटा ईभीको अनावरणसँगै हुन्डाईका अन्य मोडलहरू पनि प्रदर्शन गरिएका थिए । धनगढीको होटल फ्लोरा, छटकपुरमा आयोजित कार्यक्रममा ग्राहकहरूको उल्लेखनीय सहभागिता देखिएको थियो । कार्यक्रममा सहभागीहरूसँग प्रत्यक्ष अन्तरक्रिया गर्दै कम्पनीका प्रतिनिधिहरूले ईभी खरिद, सेवा सुविधा, स्पेयर पार्ट्स, चार्जिङ नेटवर्क लगायतका विषयमा विस्तृत जानकारी प्रदान गरे । हुन्डाईको क्रेटा ईभी र आईसीई (पेट्रोल) दुवै मोडल एउटै प्लेटफर्ममा आधारित भएकाले बिक्रीपछिको सेवा, पार्ट्स उपलब्धता र दीर्घकालीन ब्रान्ड सपोर्टमा कुनै समस्या नहुने कम्पनीको दाबी छ । साथै, विद्युतीय सवारी साधनमा विश्वास बढाउन कम्पनीले देशभर ६६ वटा रिल्याक्स चार्जिङ स्टेशन (डीसी र एसी) सञ्चालनमा ल्याइसकेको जनाएको छ । यस अभियानलाई राष्ट्रिय सन्देशका रूपमा फैलाउने उद्देश्यले कम्पनीको उच्च व्यवस्थापन टोलीले देशभर डिलरहरूसँग प्रत्यक्ष संवाद गर्दै आएको छ । सफा र स्मार्ट भविष्यतर्फको यात्रालाई सघाउने लक्ष्यसहित हुन्डाई नेपालले ग्राहकहरूसँगको सम्बन्ध अझ बलियो बनाउने अठोट व्यक्त गरेको छ ।
सेनाको रेकर्ड ब्रेक काम : ४५ दिनमै पुल निर्माण सम्पन्न, सडक सञ्जालमा जोडिँदै सिमकोट
काठमाडौं । विकास निर्माण कार्यमा नेपाली सेनाले ऐतिहासिक रेकर्ड ब्रेक गर्ने काम गरेको छ । कर्णाली करिडोर तथा राष्ट्रिय सडक सञ्जालसँग हुम्लाको सदरमुकाम सिमकोटलाई जोड्ने सडकअन्तर्गत खार्पु खोलामा नेपाली सेनाले ४५ दिनमै पुल निर्माण सम्पन्न गरेको हो । गत जेठ १ गतेबाट निर्माण सुरु गरिएको खार्पु-सिमकोट जोड्ने बेलिब्रिज नेपाली सेनाले असार ११ गते सम्पन्न गरेको नेपाली सेनाका प्रवक्ता, सहायक रथी राजाराम बस्नेतले जानकारी दिए । उनका अनुसार उक्त स्थानमा सेनाको १४ बाहिनी अन्तर्गतको निर्माण टोलीले काम गरेको थियो । प्रवक्ता बस्नेतका अनुसार पुलको लम्बाइ ५२ मिटर र चौडाइ ७ मिटर रहेको छ । बेलिब्रिज मोडेलमा निर्माण गरिएको यस पुलमार्फत अब सिमकोट राष्ट्रिय सडक सञ्जालमा जोडिएको छ, जसले हुम्लाका नागरिकमा खुशी ल्याएको छ । उक्त पुलको उद्घाटन प्रधानमन्त्री केपी शर्मा ओलीबाट असार ११ गते नै हुने भनिएको थियो, तर मौसम प्रतिकूलताका कारण सम्भव नभएको प्रवक्ता बस्नेतले बताए । प्रवक्ता सहायक रथी बस्नेतका अनुसार मुगु-हुम्ला लिंक रोड अन्तर्गतको ६७ किलोमिटर सडक यातायात सञ्चालन योग्य भइसकेको छ। उक्त सडकमा दशैंदेखि नियमित सवारीसाधन सञ्चालन हुने तयारी गरिएको छ ।
असार १५ गते सार्वजनिक बिदा
काठमाडौं । कर्णाली प्रदेश सरकारले असार १५ गते 'राष्ट्रिय धान दिवस'को अवसरमा सार्वजनिक बिदा दिने निर्णय गरेको छ । बुधबार जारी सूचनामार्फत प्रदेशको आन्तरिक मामिला तथा कानुन मन्त्रालयले जुम्लाबाहेक अन्य ९ जिल्लामा सरकारी तथा सार्वजनिक कार्यालयहरू बन्द रहने जानकारी दिएको हो । शाखा अधिकृत राजेश चौधरीका अनुसार मन्त्रिपरिषद्को २०८१ चैत १७ गतेको निर्णयअनुसार यो बिदा दिइएको हो । सूचनामा भनिएको छ, 'जुम्ला जिल्लाबाहेकका जिल्लाहरूमा मात्र सार्वजनिक बिदा लागू हुनेछ ।' जुम्लामा धान रोपाइँ चैत महिनामै सम्पन्न हुने परम्परा रहेकाले प्रदेश सरकारले प्रत्येक वर्ष चैत १२ गते जुम्लामा छुट्टै बिदा दिँदै आएको छ । कर्णाली प्रदेशको भूमि व्यवस्था, कृषि तथा सहकारी मन्त्रालयले असार १५ गते धान दिवसको अवसरमा विशेष औपचारिक कार्यक्रम पनि आयोजना गर्दै आएको छ ।
बाफिया विधेयक हुबहु पारित गराउने रणनीतिमा अर्थमन्त्री र गभर्नर, बैंकर र व्यवसायी छुट्टिने निश्चित
काठमाडौं । अहिले अर्थसमितिमा छलफलका क्रममा रहेको बैंक तथा वित्तीय संस्था ऐन, २०७३ (बाफिया) लाई संशोधन गर्न बनेको विधेयक हुबहु नै पारित हुने भएको छ । संशोधनका लागि प्रस्ताव गरिएका विभिन्न दफामाथि छलफल भएपनि सरकारले पेस गरेअनुसार नै बाफिया पारित हुने संकेत देखिएको हो । छलफलको क्रममा बाफिया पुनर्लेखन गर्नुपर्ने, केही बुँदा हटाउनु पर्ने तथा केही थप गर्नु पर्ने राय समितिका सदस्यहरूले राखे पनि अन्ततः हुबहु नै पारित हुने अवस्था देखिएको हो । यस विषयमा प्रतिनिधिसभा अन्तर्गतको अर्थ समितिले अर्थमन्त्रालयको राय माग गरेको थियो । अर्थमन्त्रालयले पत्र पठाउँदै पुनर्लेखनको आवश्यकता नभएको तर्क राखेको हो । अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखाले उपप्रधान तथा अर्थमन्त्री विष्णुप्रसाद पौडेललाई जेठ २८ गते निर्णय गर्न लगाएर विधेयक पुनर्लेखन गर्न आवश्यक नरहेको पत्र समितिमा पठाएको हो अहिले यो विधेयक विशेषगरी बैंकर र व्यवसायी छुट्टिने व्यवसायीले चर्चामा छ । धेरैले बैंकर र व्यवसायी छुट्टिनु पर्ने धारणा राखिरहेका छन् भने कतिपयले अहिले उपयुक्त समय नभएको तर्क राखिरहेका छन् । यसअघि नेपाल राष्ट्र बैंकका गभर्नर डा. विश्वनाथ पौडेलले बैंकर र व्यवसायी छुट्टिने व्यवस्थाले बैंकिङ क्षेत्रमा भूकम्प नै आउने बताएका थिए । उनले बैंक तथा वित्तीय संस्थाको अधिकांश कर्जा निश्चित व्यक्ति तथा समूहले उपभोग गरेको बताउँदै यो समस्याको समाधान गर्न आवश्यक नै रहेको धारणा राखेका थिए । उनले तत्काल बैंकिङ क्षेत्रमा भूकम्प नै आएपनि यसले बैंकिङ क्षेत्रको दिगो विकासमा टेवा पुर्याउने धारणा राखेका थिए । विधेयकमा बैंकको उल्लेख्य स्वामित्वको सेयर हिस्सामा २ प्रतिशतको सीमालाई १ प्रतिशतमा झार्न प्रस्ताव गरिएको छ । बाफिया विधेयकमा सञ्चालकको योग्यतामा थप कडाइ गरिएको छ । अर्थमन्त्रालय र राष्ट्र बैंकले विधेयकलाई जस्ताको त्यस्तै अगाडि बढाउनु पर्ने अडान राखिरहेका छन् ।
मस्कको ‘रोबोट्याक्सी’परीक्षणमा गम्भीर गल्ती, टेक्सासका सडकमा ‘ट्राफिक हैरानी’
काठमाडौं । टेस्लाले टेक्सासको अष्टिनमा सुरु गरेको पहिलो सार्वजनिक ‘रोबोट्याक्सी’ परीक्षणमा गम्भीर ट्राफिक समस्या देखिएको छ । कम्पनीले छानेका केही प्रयोगकर्ताले सार्वजनिक गरेका भिडियोहरूमा पहिलो केही दिनमै यस्ता समस्याहरू देखिएका हुन् । टेस्लाका प्रमुख कार्यकारी एलन मस्कले कम्पनीको भविष्य स्वचालित गाडी प्रविधिसँग जोडेका छन् । अहिले टेस्लाको बिक्री घटिरहेको अवस्थामा उनले यो सेवा अमेरिकाभर विस्तार गर्ने योजना सार्वजनिक गरेका छन् । मस्कले २०२६ को दोस्रो अर्धसम्म ‘पुरै स्वचालित रूपमा चल्ने लाखौं टेस्लाहरू’ सञ्चालनमा आउने दाबी गरेका छन् । परीक्षणमा सामेल भएका टेस्लाका प्रशंसकहरूले समस्या नभएको घण्टौंको यात्रा भिडियोमा देखाए पनि केही गम्भीर समस्याहरूले अमेरिकी ट्राफिक सुरक्षा नियामकहरू र सवारी विशेषज्ञहरूलाई चासोको विषय बनाएको छ । गलत लेनमा प्रवेश गर्नु, यात्रुहरूलाई छ लेनको सडकको बीच वा जंक्शनमा झारिदिनु, अचानक ब्रेक लगाउनु, अत्यधिक गतिमा चलाउनु, फुटपाथ चढ्नुजस्ता समस्या देखिएका छन् । एउटा भिडियोमा टेस्लाको रोबोट्याक्सी उल्टो दिशातर्फको लेनमा करिब ६ सेकेन्डसम्म गुडेको देखिन्छ । अर्को घटनामा गाडीले बिना बाधा अचानक ब्रेक लगाउँछ, यात्रु अगाडि लड्छन् र सामान भुइँमा खस्छ । अर्को भिडियोमा गाडी प्रहरीको गाडी नजिकै दुईपटक बिनाकारण रोकिन्छ । टेस्लाले यस्ता गाडीमा अगाडिको सिटमा मानव सुरक्षा निरीक्षक राखेको छ । एउटा भिडियोमा निरीक्षकले अगाडिको डेलिभरी ट्रक ब्याक गर्न थालेपछि बटन थिचेर रोबोट्याक्सी रोकेको देखिन्छ । ‘पहिलो दिनमै यति धेरै गल्तीहरूको भिडियो देखिनु अत्यन्तै चासोको कुरा हो,’ क्यानेर्गी मेलोन विश्वविद्यालयका प्रोफेसर तथा स्वचालित प्रविधि विज्ञ फिलिप कुपम्यानले भने । टेस्लाले अहिले करिब १० देखि २० वटा मोडल वाई गाडीहरूमा रोबोट्याक्सी सेवा परीक्षण गरिरहेको छ । स्थानीय प्रशासनको प्रतिक्रिया अष्टिन सिटी प्रशासनले टेस्लाको समस्याबारे सामाजिक सञ्जालमा आएका विवरणहरूप्रति ध्यान दिएको जनाएको छ । यदि कुनै कानुनी वा सुरक्षासम्बन्धी चिन्ता आयो भने तुरुन्तै टेस्लासँग जानकारी साट्ने बताएको छ । प्रहरी विभाग पनि टेस्लासँग सहकार्य गरिरहेको जनाइएको छ । यी घटनाहरू दुर्घटनासम्म नपुगे पनि केही दृश्यहरू सुरक्षालाई प्राथमिकता दिइएको देखिन्छ । प्रिन्सटन विश्वविद्यालयका प्रोफेसर एलन कोर्नहाउजरले भने, ‘सुरुवातमा हेर्दा धेरै ठिकै देखिएको छ । केही अवस्थामा त यी गाडीहरू सामान्य चालकभन्दा राम्रोसँग चलेको देखिन्छ ।’ टेस्लाको यो परीक्षण अन्य कम्पनीभन्दा धेरै सार्वजनिक छ । गुगलको वेमो र जीएमको क्रुजले पनि अष्टिनका सडकमा यस्तै समस्याहरू सामना गरेका थिए । पछिल्ला दुई वर्षमा दर्जनौं घटनाहरूमा रोबोट्याक्सीले सडकको बीचमा गाडी रोकेको, प्रहरीको निर्देशन नमान्ने, आपतकालीन गाडी वा सडक बन्द व्यवस्थापन गर्न नसकेको रेकर्ड गरिएको थियो । २०२३ मा एक पैदलयात्रीसँग गम्भीर दुर्घटना भएपछि क्रुजले सेवा बन्द र्गयो । अहिले अमेरिकामा मानव निरीक्षकबिना भाडामा यात्रु चलाउने एकमात्र रोबोट्याक्सी सेवा वेमो हो, जसले हालै अष्टिनमा उबरसँग साझेदारीमा सेवा सुरु गरेको छ । एलन मस्कले वर्षौंदेखि टेस्लाको गाडीहरू निकट भविष्यमै पूर्ण स्वचालित हुने वाचा गर्दै आएका छन्, तर अझै त्यो पूर्ण रूपमा कार्यान्वयन भएको छैन । हाल टेस्लाले सीमित क्षेत्रभित्र यात्रुहरूलाई ४.२० डलर शुल्कमा सेवा दिइरहेको छ । स्वचालित ड्राइभिङ फिचरकै कारण दुर्घटना ? टेस्लाविरुद्ध मृतक परिवारको मुद्दा अब बिना ड्राइभर ट्याक्सीमा यात्रा, मस्कको रोबोट्याक्सी सार्वजनिक
