गभर्नर नियुक्तिमा अर्बको खेल, राष्ट्र बैंकको स्वायत्ततामा पनि असर
काठमाडौं । नेपाल राष्ट्र बैंकका कर्मचारीहरूले गभर्नर नियुक्तिमा राजनीतिक हस्तक्षेप भएको भन्दै आपत्ति जनाएका छन् । विभिन्न सञ्चारमाध्यममार्फत ठूलो आर्थिक चलखेल तथा राजनीतिक हस्तक्षेप भएको समाचार सम्प्रेषण हुने गरेको बताउँदै यसले राष्ट्र बैंकको स्वायत्ततामाथि ठूलो असर परेको उनीहरूको धारणा छ । नेपाल राष्ट्र बैंक राष्ट्रिय कर्मचारी संगठनका अध्यक्ष कृष्ण केसीले कार्यवाहक गभर्नरबाट राष्ट्र बैंक सञ्चालन हुनु पर्दा दुःख व्यक्त गरे । ‘कानुनी प्रावधानलाई पालना गरेर एक थान गभर्नर उपलब्ध गराउन सकेको छैन । राष्ट्र बैंक ऐनमा भएको स्पष्ट प्रावधान मिचेर चैत २४ गतेबाट कामु गभर्नरबाट राष्ट्र बैंक सञ्चालन भइरहेको छ । नेपाल राष्ट्र बैंकको इतिहासमा यो दुखद विषय हो,’ उनले भने । उनले राष्ट्र बैंकको कर्मचारी गभर्नर बन्न नसक्ने विषयप्रति पनि आपत्ति जनाए । ‘बजारमा हल्ला चलेको छ, करोड अरबका विषय आइरहेका छन् । गभर्नरको मूल्य कति हो ? हामीलाई पनि थाहा भए कर्मचारीको तर्फबाट पनि केही योगदान गर्न सकिन्थ्यो की । किनभने हामीलाई छिट्टै गभर्नर आवश्यक परेको छ,’ उनले भने, ‘साथै केही व्यक्तिको योग्यता पनि अयोग्यतामा परिणत हुने अवस्थामा पुगेको छ । धेरै नाम हामीले सुन्दै आएका छौं, फेरि मेटिँदै, फेरि सुन्नु परेको छ । अब उहाँहरुको योग्यता के हुने हो ? उहाँहरूले मानहानीको मुद्धामा जानु पर्ने हो की भन्ने विषयमा बहस पनि चलेको छ ।’ यस्तै, राष्ट्र बैंक वित्तीय संस्था कर्मचारी संघका अध्यक्ष हरिकृष्ण भट्टराईले राष्ट्र बैंक १८औं गभर्नरको पर्खाइमा रहेको सुनाए । उनले पनि राजनीतिक खिचातानीले गभर्नर नियुक्तिमा ढिलाइ हुँदा राष्ट्र बैंकको स्वायत्ततामाथि आँच आएको धारणा राखे । अन्तर्राष्ट्रिय संस्थाले समेत चासो दिने किसिमले राष्ट्र बैंकमाथि पनि प्रश्न उठ्न थालेको उनको बुझाइ छ । राष्ट्र बैंकले लिएको नीतिले गर्दा उद्योग/व्यवसायी समस्यामा परेको बताउँदै उनले यसमा सुधार गर्न आवश्यक रहेको सुनाए । ‘राष्ट्र बैंक आफैले लिएका नीति पालना हुन सकेको छैन, विगत १३/१४ वर्षदेखि कर्मचारी बढुवा हुन सकिरहेका छैनन्, राष्ट्र बैंकले सुविधा सम्पन्न भवन पाए पनि कर्मचारीले सेवा सुविधा पाउन सकेको छैनन्,’ भट्टराईले भने । यस्तै, नेपाल राष्ट्र बैंक कर्मचारी संघकी अध्यक्ष गीता लम्साल पोखरेलले गभर्नर नियुक्तिको विषय सामाजिक सञ्जालमा तिक्तता पोख्ने वातावरण नबनाउन पनि आग्रह गरिन् ।
हिमालयन बैंकको बत्तीसपुतली शाखा नयाँ भवनबाट सञ्चालनमा
काठमाडौं । हिमालयन बैंक लिमिटेडले बत्तीसपुतली शाखालाई स्थानान्तरण गरी नयाँ स्थानबाट सेवा सञ्चालनमा ल्याएको छ । अबदेखि शाखा काठमाडौं महानगरपालिका–९ स्थित राम मन्दिर जाने बाटोसँगै रहेको नेपाल राष्ट्रिय मारवाडी परिषद्को नयाँ भवनबाट सञ्चालन हुने बैंकले जनाएको छ । शाखाको औपचारिक शुभारम्भ बैंकका प्रमुख कार्यकारी अधिकृत (सीईओ) अशोक शम्सेर राणाले उच्चपदस्थ कर्मचारी तथा विशिष्ट अतिथिहरूको उपस्थितिमा गरेका हुन् । बैंकले हाल नेपालभर १७४ शाखा कार्यालय, २० विस्तारित काउन्टर, २८४ एटिएम, ८,००० भन्दा बढी प्वाइन्ट अफ सेल्सटर्मिनल तथा १५,००० भन्दा बढी विप्रेषण भुक्तानी केन्द्रमार्फत आफ्ना ग्राहकलाई विविध बैंकिङ सेवा प्रदान गर्दै आइरहेको छ । हिमालयन बैंकले शाखा सञ्जाल विस्तार र सेवा प्रवाहलाई अझ प्रभावकारी बनाउँदै आधुनिक बैंकिङ सेवा प्रदान गर्ने लक्ष्य राखेको जनाएको छ ।
पूर्वगभर्नर दीपेन्द्रबहादुर क्षेत्री सम्मानित
काठमाडौं । नेपाल राष्ट्र बैंकका पूर्वगभर्नर दीपेन्द्रबहादुर क्षेत्री सम्मानित भएका छन् । राष्ट्र बैंकको ७०औं वार्षिकोत्सवको अवसरमा उनी सम्मानित भएका हुन् । क्षेत्री राष्ट्र बैंकको चौधौं गभर्नर हुन् । सन् २००९ मा गभर्नर विजयनाथ भट्टराई बर्खास्त हुनासाथ उनी गभर्नरमा नियुक्त भएका थिए । क्षेत्री राष्ट्रिय योजना आयोगका पूर्वउपाध्यक्ष पनि हुन् ।
