किशोर अपहरण गरी फिरौती माग्ने पाँच भारतीय पक्राउ, काठमाडौंबाट उद्धार
काठमाडौं । चितवनको नारायणगढबाट एक किशोरलाई काठमाडौं ल्याएर बन्धक बनाएको आरोपमा प्रहरीले पाँच जना भारतीयलाई पक्राउ गरेको छ । पक्राउ पर्नेहरूमा भारतको बिहार राज्य, बेतियाका १८ वर्षीय सुजित कुमार, १८ वर्षीय गोलु कुमार, अर्का १८ वर्षीय गोलु कुमार, १८ वर्षीय बिक्की कुमार तथा १८ वर्षीय मोहम्मद साहिद रहेको काठमाडौं उपत्यका अपराध अनुसन्धान कार्यालयले जनाएको छ । सोमबार करिब ६ः३० बजे चितवन जिल्लाको नारायणगढ निवासी १६ वर्षीय रिसब गुप्तालाई ५–६ जनाको समूहले जबरजस्ती भारतीय नम्बर प्लेटको सवारी साधनमा राखी एक किशोरलाई अपहरण गरेको कार्यालयका प्रमुख सन्तोष खड्काले जानकारी दिए । उनका अनुसार अपहरणपछि उनलाई काठमाडौं ल्याई बसपार्कस्थित एक होटलमा बन्धक बनाएर उनीहरूले परिवारसँग रकम माग गरिएको थियो । प्रहरीले घटनाबारे सूचना प्राप्त हुनासाथ खोजतलास तथा अनुसन्धान कार्य अघि बढाएको थियो । काठमाडौंको बसपार्कस्थित होटल फेमिलीबाट अपहरणमा परेका किशोर रिसब गुप्ताको सकुशल उद्धार गरिएको खड्काले बताए ।
फिसिङ लिंकले बैंक खाता रित्याउला भन्दै प्राधिकरणले दियो चेतावनी
काठमाडौं । नेपाल दूरसञ्चार प्राधिकरणले अपरिचित नम्बरबाट आउने ‘फिसिङ लिंक’ मा क्लिक नगर्न अनुरोध गरेको छ । पछिल्लो समय मोबाइल सेवा प्रदायकहरूको नेटवर्क र विभिन्न ओटीटी एप्स (जस्तै ह्वाट्सएप, भाइबर आदि) को दुरुपयोग गरी सर्वसाधारणको मोबाइलमा भ्रमपूर्ण र घातक ‘फिसिङ लिंक’ हरू पठाउने क्रम बढेको भन्दै नेपाल दूरसञ्चार प्राधिकरणले यस्तो अनुरोध गरेको हो । प्राधिकरणले आज (बुधबार) सूचना जारी गर्दै अपरिचित र अनधिकृत नम्बरहरूबाट आउने त्यस्ता शङ्कास्पद लिंकहरू नखोल्न आम उपभोक्ताहरूलाई अनुरोध गरेको हो। प्राधिकरणका अनुसार विभिन्न निर्देशनसहित आउने त्यस्ता मेसेजहरू वास्तविक र आधिकारिक जस्तै देखिने भएकाले आम सर्वसाधारण सहजै भ्रममा पर्ने गरेका छन् । उपभोक्ताहरूबाट व्यापक जनगुनासो प्राप्त भएपछि प्राधिकरणले सूचना सार्वजनिक गरेको हो । प्राधिकरणले सूचनामा भनेको छ, ‘त्यस प्रकारका फिसिङ लिंकहरू वास्तविक जस्तै लाग्न गई सर्वसाधारणहरूमा भ्रम तथा द्विविधा उत्पन्न भई लिङ्कहरूमा क्लिक वा प्रवेश गर्दा विभिन्न आपराधिक क्रियाकलाप, व्यक्तिगत विवरणमा अनधिकृत पहुँच तथा वित्तीय अपराध लगायतका क्षति हुन सक्ने जोखिमहरू हुन्छ ।’ फिसिङ लिंकबाट मोबाइलमा रहेका गोप्य पासवर्ड, इमेल र नागरिकता वा बैंक सम्बन्धी विवरणहरूमा ह्याकरहरूको पहुँच पुग्ने, लिंकमा क्लिक गर्दा बैंक खाता वा डिजिटल वालेट (जस्तै ईसेवा, खल्ती) बाट रकम चोरी हुन सक्ने र मोबाइलमा मालवेयर वा भाइरस प्रवेश गराई डिभाइस नै नियन्त्रणमा लिन सक्ने प्राधिकरणले जनाएको छ ।
ठमेलको बाटामा बसेर यौनधन्दाको मोलमोलाइ गर्ने ३२ नेपाली युवती पक्राउ
काठमाडौं । ठमेलको बाटाबाटामा हिँड्ने पर्यटकलाई यौनधन्दा प्रोत्साहन गराउन खोज्ने ३२ जना नेपाली युवती पक्राउ परेका छन् । सोमबार बेलुकी ठमेलबाट ३२ जना नेपाली युवतीलाई लैनचौर प्रहरी वृत्तबाट खटिएको प्रहरीले नियन्त्रणमा लिएको हो । उनीहरूले काठमाडौं महानगरपालिका २६ ठमेल नरसिंहचोकस्थित सार्वजनिक सडकखण्डमा विदेशी तथा स्वदेशी पर्यटक, सर्वसाधारण मानिसहरूलाई अनावश्यक बाटो छेक्दै याैनधन्दाका लागि मोलमोलाई गर्ने गरेका थिए । पर्यटकलाई दु:ख हैरानी दिने जस्ता कार्य गरिरहेको अवस्थामा प्रहरीले पक्राउ गरेको काठमाडौं जिल्ला प्रहरी परिसरका प्रवक्ता पवन कुमार भट्टराईले जानकारी दिए । प्रहरीमाथि नै जाईलाग्ने, अभद्र व्यवहार गर्ने ३२ जनालाई नियन्त्रणमा लिई अभद्र व्यवहार गर्न नहुने कसुरमा जिल्ला प्रशासन कार्यालय, काठमाडौंबाट पाँच दिनको म्याद थप गरेर अनुसन्धान भइरहेको उनले बताए।
‘हेलो सरकार’मा गुनासोको ओइरो, चालु आवमै ४५ हजार बढी उजुरी
काठमाडौं । सेवा प्रवाहमा नागरिकका गुनासा, सुझाव, जिज्ञासालाई राज्य संयन्त्रसम्म सहज रूपमा पुर्याई तिनको प्रभावकारी सम्बोधन गर्ने उद्देश्यले सञ्चालनमा रहेको ‘हेलो सरकार’ प्रणाली सार्वजनिक प्रशासन र सुशासनको महत्त्वपूर्ण औजारका रूपमा स्थापित हुँदै गएको छ । प्रधानमन्त्री तथा मन्त्रिपरिषद्को कार्यालयअन्तर्गत सञ्चालित यो विद्युतीय गुनासो व्यवस्थापन प्रणालीमा नागरिकको पहुँच विस्तार भएसँगै उजुरी तथा गुनासोको सङ्ख्या उल्लेख्य रूपमा बढेको छ । सरकारले यो प्रणालीलाई गुनासो सुनुवाइको माध्यममा सीमित नराखी नागरिक–सरकार संवाद, नीतिगत सुधार तथा सार्वजनिक सेवा प्रवाहको गुणस्तर मापन गर्ने एकीकृत ‘प्लेटफर्म’का रूपमा विकास गर्ने रणनीतिसहित अघि बढाएको छ । शासकीय सुधारसम्बन्धी सरकारको सयदिने कार्यसूचीको बुँदा नम्बर २४ मा २४ घण्टा नै राष्ट्रिय नागरिक सहायता तथा गुनासो व्यवस्थापन प्रणाली सञ्चालन गर्ने लक्ष्य राखिएको थियो । त्यसलाई प्रधानमन्त्री तथा मन्त्रिपरिषद्को कार्यालयअन्तर्गतको ‘हेलो सरकार’ शाखामार्फत कार्यान्वयनमा ल्याइसकेको छ । कार्यसूचीको सोही बुँदामा रहेको फोन, मोबाइल एप, वेबपोर्टल तथा सामाजिक सञ्जालमार्फत गुनासो दर्ता गर्न सकिने ‘बहुच्यानल’ प्रणाली स्थापना गर्ने काम अन्तिम चरणमा पुगेको प्रधानमन्त्री कार्यालयअन्तर्गतको हेलो सरकार शाखाका उपसचिव कृष्णप्रसाद सापकोटाले जानकारी दिए । बहुच्यानल प्रणाली कार्यान्वयनमा आउनेबित्तिकै विभिन्न माध्यमबाट हेलो सरकारमा आएका उजुरी तथा गुनासोहरू स्वचालित रूपमा सम्बन्धित कार्यालयसम्म जाने मात्र नभई त्यसको निगरानीसमेत प्रभावकारी ढङ्गले हुने र नतिजा प्राप्तिमा समेत सहज हुने अपेक्षा गरिएको छ । त्यस्तै, बुँदा नम्बर २५ मा हेलो सरकारलाई स्तरोन्नति गरी नागरिक संवादको प्लेटफर्मका रूपमा विकास गर्ने, एकीकृत ‘ड्यासबोर्ड’मार्फत सबै मन्त्रालयसँग प्रत्यक्ष समन्वय गर्ने तथा गुनासो समाधानको प्रगति वास्तविक समयमा अनुगमन गर्ने व्यवस्था मिलाइने उल्लेख गरिएको छ । सोही अनुसार अहिले सरकारले ‘हेलो सरकार’मा आउने गुनासोलाई नीतिगत बहसको आधार बनाउने तयारी गरिरहेको छ । नागरिकका गुनासा र सुझावबाट प्राप्त सूचना विश्लेषण गरी आवश्यक नीति निर्माणसहित सुधार प्रक्रियामा उपयोग गर्ने अवधारणा विकास भइरहेको उपसचिव सापकोटाले बताए । त्यस्तै, आगामी आर्थिक वर्ष २०८३/८४ को बजेटले समेत हेलो सरकारलाई ‘सरकार–नागरिक’ संवादको केन्द्रीय प्लेटफर्मका रूपमा विकास गर्ने नीति लिएको छ । बजेटमा सरकारी कार्यालयहरूमा ‘डिजिटल टाइमकार्ड’ लागू गर्ने तथा हेलो सरकारमार्फत प्राप्त गुनासो निश्चित समयसीमाभित्र सम्बोधन गर्नुपर्ने व्यवस्था गर्ने उल्लेख छ । गुनासो सम्बोधनको अवस्थालाई कर्मचारीको कार्यसम्पादन मूल्याङ्कनसँग समेत जोड्ने तयारी भइरहेको छ । यसबाट सार्वजनिक प्रशासनमा उत्तरदायित्व र कार्यसम्पादन संस्कृतिको विकास हुने उपसचिव सापकोटा बताउँछन् । प्रविधिको उपयोगलाई थप विस्तार गर्दै हेलो सरकारले कृत्रिम बौद्धिकता (एआई) आधारित प्रणाली विकासको तयारी पनि गरिरहेको छ । अब गुनासो दर्ता हुनेबित्तिकै स्वचालित रूपमा सम्बन्धित कार्यालयमा पुग्ने, गुनासोकर्तालाई जानकारी गराउने तथा प्रगति अवस्थाबारे नियमित सूचना दिने प्रणाली लागू हुनेछ। टेलिफोनमार्फत प्राप्त हुने गुनासोलाई समेत एआईको सहयोगमा स्वतः शब्दमा रूपान्तरण गरी प्रणालीमा प्रविष्ट गर्ने प्रविधि विकास गर्ने तयारी गरिएको छ । यसबाट हाल प्रणालीमा दर्ता नभई टेलिफोनबाटै समाधान हुने कतिपय गुनासो पनि अभिलेखीकरणको दायरामा आउने अपेक्षा गरिएको छ । हाल हेलो सरकारको विद्युतीय गुनासो व्यवस्थापन प्रणालीमा तीन हजार ७६९ वटा सरकारी तथा सार्वजनिक निकाय आबद्ध छन् । उक्त प्रणाली सञ्चालनका लागि २६ जना कर्मचारी तीन सिफ्टमा २४सै घण्टा खटिएका छन्। प्रधानमन्त्री कार्यालयले हेलो सरकारलाई प्रत्यक्ष गुनासो फर्छ्याैट गर्ने निकायभन्दा पनि नीतिगत सहजीकरण, स्रोत व्यवस्थापन र अनुगमन गर्ने निकायका रूपमा विकास गर्ने रणनीति लिएको छ । गुनासो दर्ता र फर्छ्याैटमा हालसम्मकै उच्च आँकडा हेलो सरकार सार्वजनिक निकायका कामकारबाहीसम्बन्धी जिज्ञासा, गुनासो तथा सुझाव सम्बोधन गर्ने उद्देश्यले स्थापना गरिएको प्रणाली हो । सुशासन (व्यवस्थापन तथा सञ्चालन) ऐन, २०६४ को दफा ४५ ले दिएको अधिकार प्रयोग गरी जारी गरिएको ‘हेलो सरकार गुनासो व्यवस्थापन (पहिलो संशोधन) निर्देशिका, २०७८’ले नागरिकलाई सरकारी निकायका कामकारबाहीसम्बन्धी गुनासालाई प्रत्यक्ष, सरल र व्यवस्थित ढंगले सम्बोधन गर्न सक्ने कानुनी आधार प्रदान गरेको छ । उक्त निर्देशिकाले प्राप्त गुनासोलाई शीघ्र सम्बोधन गर्ने, सेवा प्रवाहसम्बन्धी जिज्ञासाको समाधान गर्ने तथा प्रभावकारी गुनासो सञ्जाल विस्तार गर्ने उद्देश्य लिएको छ । करिब डेढ दशकअगाडि २०६८ कात्तिक १७ गतेबाट हेलो सरकार सेवा सञ्चालनमा आएको भए पनि त्यसलाई प्रभावकारी बनाउन सकिएको थिएन । विद्यमान सरकारले शासकीय सुधारसम्बन्धी १०० बुँदे कार्यसूचीमा नै यो विषय समावेश गरेपछि अहिले नागरिकका गुनासो दर्ता र समस्या समाधान दुवै क्षेत्रमा उल्लेख प्रगति देखिएको छ । पछिल्ला तीन वर्षको तथ्याङ्क हेर्दा आर्थिक वर्ष २०८०/८१ मा ११ हजार ९३२ वटा गुनासो तथा उजुरी प्राप्त भएका थिए । आव २०८१र८२ मा यो सङ्ख्या बढेर १७ हजार ९७७ पुगेको थियो । तर चालु आव २०८२/८३ को जेठ मसान्तसम्ममा उल्लेख्य सङ्ख्यामा वृद्धि भई ४५ हजार ६२३ वटा गुनासो तथा उजुरी दर्ता भइसकेका छन् । यो सङ्ख्या टेलिफोनमार्फत प्राप्त भई तत्काल समाधान भएका गुनासोबाहेकको हो । यो तथ्याङ्कले पनि सार्वजनिक सेवा, सुशासन तथा उत्तरदायित्वका विषयमा नागरिकको चासो र सहभागिता उल्लेखनीय रूपमा बढेको देखिन्छ। प्रधानमन्त्री कार्यालयका अनुसार आज असार २ गते मङ्गलबार बिहान ९ः०० बजेसम्म हेलो सरकार प्रणालीमा कुल एक लाख १६ हजार सातवटा गुनासो दर्ता भइसकेका छन् । तीमध्ये ६५ हजार ४६९ वटा अर्थात् कुल गुनासोको ५६.४४ प्रतिशत फर्छ्याैट भइसकेका छन् । सम्बन्धित निकायबाट हेरिए पनि कार्य प्रक्रियामा प्रवेश नगरेका गुनासो १७ हजार ३७९ अर्थात् १४.९८ प्रतिशत छन् । त्यस्तै, प्रशोधन तथा अनुसन्धानका क्रममा रहेका गुनासो १६ हजार ५३२ अर्थात् कुल गुनासोको १४.२७ प्रतिशत रहेका छन् । वर्तमान सरकार गठन भएको गत चैत १३ गते यही असार १ गते सोमबार दिउँसो १ः०० बजेसम्म सात हजार १५० वटा गुनासो पूर्ण रूपमा फर्छ्याैट भइसकेका छन् । पाँच हजार ३३ वटा गुनासो समाधान भए पनि प्रशासनिक प्रक्रियाका कारण अन्तिम फर्छ्याैट हुन बाँकी रहेका छन् । उपसचिव सापकोटाका अनुसार १९ हजार २३९ वटा गुनासो विभिन्न निकायमा प्रक्रियागत चरणमा रहेका छन् । यो तथ्याङ्कले पनि गुनासो व्यवस्थापनलाई सरकारले उच्च प्राथमिकतामा राखेर काम गरिरहेको देखाउँछ । हेलो सरकारमा प्राप्त गुनासोमध्ये सबैभन्दा धेरै प्रहरी प्रधान कार्यालयसँग सम्बन्धित छन् । प्रहरीसँग सम्बन्धित १० हजार ९७५ वटा गुनासो दर्ता भएका छन् । त्यसपछि नेपाल विद्युत् प्राधिकरणसँग सम्बन्धित पाँच हजार ४५, गृह मन्त्रालयसँग सम्बन्धित तीन हजार १२८, एकीकृत डाटा व्यवस्थापन केन्द्रसँग सम्बन्धित तीन हजार १२३, स्वास्थ्य तथा खाद्य स्वच्छता क्षेत्रसँग सम्बन्धित दुई हजार ९७२ तथा शिक्षा तथा खेलकुद क्षेत्रसँग सम्बन्धित दुई हजार ७९६ वटा गुनासो प्राप्त भएका छन् । सडक विभाग, काठमाडौँ महानगरपालिका, त्रिभुवन विश्वविद्यालय, यातायात व्यवस्था विभागलगायतका निकायसँग सम्बन्धित गुनासो पनि उल्लेख्य सङ्ख्यामा प्राप्त भएको देखिन्छ । नागरिकले विभिन्न माध्यमबाट हेलो सरकारसमक्ष गुनासो दर्ता गर्न सक्ने व्यवस्था गरिएको छ । हाल करिब ४७ प्रतिशत गुनासो हेलो सरकारको वेबसाइटमार्फत प्राप्त हुने गरेका छन् भने ४२ प्रतिशत गुनासो नागरिक एपमार्फत आउने गरेका छन् । यसबाहेक टोल फ्री नम्बरमा फोन गरेर, इमेलमार्फत, फेसबुक, एक्स ९ट्वीटर०, भाइबर, ह्वाट्सएप, एसएमएस, पत्राचार, गुनासो निवेदन पठाएर तथा प्रत्यक्ष उपस्थित भएरसमेत गुनासो दर्ता गर्न सकिन्छ । निर्देशिकाअनुसार गुनासोकर्ताले आफ्नो व्यक्तिगत विवरण, सम्पर्क नम्बर, इमेल, गुनासोको सङ्क्षिप्त विवरण तथा सम्बन्धित निकायको विवरण खुलाउनुपर्ने व्यवस्था छ । आवश्यक परे आफ्नो परिचय गोप्य राख्न सकिने सुविधा पनि उपलब्ध छ । हेलो सरकारमा हाल ११७ वटा शीर्षकमा गुनासो दर्ता गर्न सकिन्छ । सार्वजनिक सेवामा विभेद, सेवा प्राप्तिमा अवरोध, गैरकानुनी क्रियाकलापबाट भएको क्षति, संवैधानिक तथा कानुनी अधिकारको प्रयोगमा बाधा, भ्रष्टाचार, महिला हिंसा, जातीय विभेद, वातावरण प्रदूषण, सार्वजनिक सम्पत्तिको दुरुपयोग, विकास निर्माणका समस्या, संस्थागत सुधारका सुझाव तथा नीतिगत सुधारका प्रस्तावजस्ता विषयमा गुनासो दर्ता हुने गरेका छन् । गुनासोको प्रकृति हेरेर हेलो सरकारले तिनलाई तुरुन्त, अति जरुरी, जरुरी र साधारण गरी चार वर्गमा विभाजन गर्ने व्यवस्था गरेको छ । देशको शान्तिसुरक्षा, जीउज्यान तथा व्यक्तिगत सुरक्षासँग सम्बन्धित विषय, विपद् व्यवस्थापन तथा संवेदनशील प्रकृतिका विषय तुरुन्त वा अति जरुरी श्रेणीमा राखिन्छन् । यस्ता गुनासो तत्काल सम्बोधन गर्नुपर्ने व्यवस्था छ । त्यस्तै, जरुरी प्रकृतिका गुनासो सात दिनभित्र र साधारण प्रकृतिका गुनासो १५ दिनभित्र सम्बोधन गरिसक्नुपर्ने कानुनी व्यवस्था छ । सो प्रणालीमा गुनासो दर्ता भएपछि सम्बन्धित निकायका गुनासो सुन्ने अधिकारीलाई मोबाइल, एप, एसएमएस वा अन्य विद्युतीय माध्यमबाट स्वचालित सूचना पुग्ने व्यवस्था छ । सम्बन्धित निकायले समयसीमाभित्र प्रगति विवरण अद्यावधिक गर्नुपर्छ भने गुनासो सम्बोधन भएपछि सम्बन्धित कागजातसहित विवरण पोर्टलमा अपलोड गरी फछ्र्यौट गर्नुपर्छ । सम्बन्धित निकायका प्रमुखले समेत पोर्टलमार्फत नियमित अनुगमन गरी आवश्यक निर्देशन दिनसक्ने व्यवस्था रहेको छ । यद्यपि, उक्त प्रणाली सञ्चालनका क्रममा केही चुनौती पनि देखिएका छन् । अदालतमा विचाराधीन विषय, अख्तियार दुरुपयोग अनुसन्धान आयोगमा अनुसन्धानमा रहेको विषय तथा कानुनी प्रक्रियामा रहेका कतिपय उजुरी हेलो सरकारबाट तत्काल फर्छ्याैट गर्न सकिँदैन । त्यसैगरी, एउटै विषयमा पटकपटक गुनासो दर्ता हुने, अपूर्ण वा अपुष्ट विवरणसहितका उजुरी आउने, टुङ्गो लागिसकेका विषय पुनः उठाइने तथा कसैलाई हैरानी दिने उद्देश्यले समेत गुनासो आउने गरेका छन् । प्रधानमन्त्री कार्यालयका अनुसार केही पेसेवर गुनासोकर्ता तथा समूहबाट मात्रै दैनिक ठूलो सङ्ख्यामा उजुरी आउने प्रवृत्ति पनि देखिएको छ । सङ्घीय सरकारसँगै प्रदेश सरकारले ‘हेलो मुख्यमन्त्री’तथा स्थानीय तहहरूले ‘हेलो मेयरजस्ता कार्यक्रम सञ्चालन गरिरहेका छन् । एउटै प्रकृतिका सेवा फरकफरक प्रणालीबाट सञ्चालन हुँदा समन्वय र तथ्याङ्क व्यवस्थापनमा चुनौती देखिएको भन्दै प्रधानमन्त्री कार्यालयले यस्ता प्रणालीलाई क्रमशः एकीकृत गरी एउटै राष्ट्रिय गुनासो व्यवस्थापन संरचनामा आबद्ध गर्ने विषयमा अध्ययन र तयारी गरिरहेको छ ।
निर्माण व्यवसायीले भेटे पूर्वाधार विकासमन्त्री लम्साललाई
काठमाडौं । मध्यपूर्वमा जारी युद्धका कारण इन्धनका साथै बिटुमिन लगायतका निर्माण सामग्रीको मूल्यमा अत्यधिक वृद्धि भएको भन्दै निर्माण व्यवसायीहरूले मूल्य समायोजनको माग गरेका छन् । निर्माण सामग्रीको भाउ बढेका कारण विकास आयोजनाहरू प्रत्यक्ष प्रभावित भएको भन्दै नेपाल निर्माण व्यवसायी महासंघको टोलीले सरकारको ध्यानाकर्षण गराएको हो । महासंघका कार्यवाहक अध्यक्ष रामजी पन्त (मुकेश), पूर्वअध्यक्षहरू रवि सिंह, रमेश शर्मालगायतको टोलीले सिंहदरबार पुगेर पूर्वाधार विकासमन्त्री सुनील लम्साललाई भेटेर उक्त आग्रह गरेको हो । भेटका क्रममा महासंघको टोलीले मूल्य समायोजनमा भइरहेको ढिलाइका कारण समग्र निर्माण उद्योग नै गम्भीर संकटमा परेको जानकारी गराएको छ । व्यवसायीहरूले मूल्य समायोजन गरी राहत दिनुपर्ने माग राख्नुका साथै अन्य महत्त्वपूर्ण बुँदाहरूमा पनि मन्त्रीको ध्यानाकर्षण गराएका छन् । ठेक्काको म्याद थप गरिनुपर्ने, रुग्ण आयोजनाहरूको उचित व्यवस्थापन हुनुपर्ने, र सरकारबाट जारी निर्देशनालयका कारण सिर्जित समस्याहरूको तत्काल समाधान खोजिनुपर्ने लगायत मागहरु राखेका थिए । महासंघका अनुसार भेटका क्रममा पूर्वाधार विकासमन्त्री सुनील लम्सालले व्यवसायीहरूले भोगिरहेका यी समस्याहरू समाधानका लागि सरकारको तर्फबाट आवश्यक पहल भइरहेको जवाफ दिएका छन् ।
एलजीले नेपाली बजारमा ल्यायो विशेष ‘इसेन्सियल सिरिज’का घरेलु उपकरणहरू
काठमाडौं । नेपाली उपभोक्ताहरूको आवश्यकता र जीवनशैलीलाई मध्यनजर गर्दै एलजीले नयाँ र किफायती घरेलु उपकरणहरूको श्रृंखला ‘एलजी इसेन्सियल सिरिज’ नेपाली बजारमा सार्वजनिक गरेको छ । ‘हरेक घरको खुशी, घर–घरमा एलजी’ अभियान अन्तर्गत एलजी इलेक्ट्रोनिक्स सिंगापुरले नेपालका लागि आफ्नो आधिकारिक वितरक सीजी इलेक्ट्रोनिक्ससँगको सहकार्यमा यी उत्पादनहरू बजारमा ल्याएको हो । काठमाडौंमा आयोजित एक विशेष भव्य कार्यक्रमका बीच उक्त नयाँ श्रृंखलाको औपचारिक अनावरण गरिएको हो । आधुनिक प्रविधि, उत्कृष्ट कार्यसम्पादन, टिकाउपन र किफायती मूल्यको सम्मिश्रण रहेको यस सिरिजमा नेपाली बजारका लागि विशेष रूपमा डिजाइन गरिएका डबल–डोर रेफ्रिजरेटर, फुल्ली अटोमेटिक टप(लोड वासिङ मेसिन र एसी समावेश छन् । यस अवसरमा चौधरी ग्रुपका प्रबन्ध निर्देशक निर्वाण चौधरीले एलजी र सीजी इलेक्ट्रोनिक्सबीचको चार दशक लामो व्यावसायिक यात्राको स्मरण गर्दै यो नयाँ सिरिजले नेपाली उपभोक्ताहरूको जीवनस्तर सहज बनाउनुका साथै बजारमा नयाँ उत्साह थप्ने विश्वास व्यक्त गरे । त्यसैगरी, एलजी इलेक्ट्रोनिक्स सिंगापुरका होम एप्लायन्स सोलुसनका उत्पादन निर्देशक चाङ्हो हानले नेपाली उपभोक्ताहरूको सल्लाह र आवश्यकताको गहिरो अध्ययन गरी यो सिरिज विकास गरिएको जानकारी दिए। आधुनिक डिजाइन र भरपर्दो कार्यसम्पादनयुक्त यी उपकरणहरूले नेपाली परिवारको दैनिक जीवनलाई थप सुविधाजनक र समृद्ध बनाउने उनको भनाइ थियो । यस सिरिज अन्तर्गत सार्वजनिक गरिएको डबल–डोर रेफ्रिजरेटरमा फ्रस्ट-फ्री प्रविधि रहेको छ, जसले गर्दा भित्र जम्ने हिउँलाई हातले सफा गरिरहनु पर्ने झन्झट हुँदैन । यसको स्मार्ट मोडले मौसम अनुसार फ्रिजको भित्री चिस्यानलाई आफैं नियन्त्रण गर्छ भने नेपाली परिवारको आवश्यकतालाई ध्यानमा राखेर यसमा अघिल्ला मोडलहरू भन्दा २० प्रतिशत ठूलो तरकारी राख्ने बास्केट दिइएको छ । त्यसैगरी, नेपालको वातावरणीय अवस्था सुहाउँदो फुल्ली अटोमेटिक टपलोड वासिङ मेसिनमा बलियो प्रो–शिल्ड मोटर, बीएमसी कभर र पानीले नबिग्रिने आईपिएक्स–४ प्रमाणित वाटर(रेजिस्टेन्ट कन्ट्रोल प्यानल राखिएको छ । यसमा प्रयोग गरिएको लो–प्रेशर फिल प्रविधिले नेपालमा भोगिने कम पानीको चापको समस्यामा पनि लुगा उत्कृष्ट तरिकाले धुने सुनिश्चित गर्दछ । सिरिजको अर्को मुख्य उत्पादन रुम एयर कन्डिसनरले जाडोमा कोठा तातो र गर्मीमा चिसो बनाउने दुवै काम गर्दछ । परम्परागत नन–इन्भर्टर एसीको तुलनामा निकै कम बिजुली खपत गर्ने यस एसीमा वातावरणमैत्री आर–३२ रेफ्रिजेरेट ग्यास प्रयोग गरिएको छ र यो चल्दा आवाज पनि निकै कम आउँछ । कम्पनीका अनुसार यो सिरिजका प्रारम्भिक मोडलहरूको सुरुवाती मूल्य करिब रु. ४९ हजार ६९० तोकिएको छ र यसको बिक्री वितरण नेपालभर जुनदेखि नै सुरु भइसकेको छ ।
महानिर्देशक अर्याल र निर्देशक केसीलाई चार दिन म्याद थप
काठमाडौं । राहदानी विभागका महानिर्देशक तीर्थराज अर्याल र सूचना प्रविधि निर्देशक सुनिलकुमार केसीलाई विशेष अदालतले चार दिन थुना राख्न अनुमति दिएको छ । अख्तियारले दुरुपयोग अनुसन्धान आयोगले सोमबार उनीहरू दुवै जनालाई अख्तियारले नियन्त्रणमा लिएको हो । अख्तियारबाट २० दिन थुना राख्न म्याद माग भएको तर अदालतले चार दिनको मात्र अनुमति दिएको विशेष अदालतका प्रवक्ता कृष्णशरण लामिछाने जानकारी दिए । अदालतले सोमबारदेखि गणना हुने गरेर चार दिन हिरासतमा राख्न अनुमति दिइएको उनले उल्लेख गरे । उनका अनुसार विशेष अदालतका अध्यक्ष सुर्यदर्शन भट्ट, उमेश कोइराला र विदुर कोइरालाको इजलासले म्याद थप गरेको हो । उनीहरू विरुद्ध अख्तियारले ‘राहदानी छपाइसम्बन्धी कार्यमा भ्रष्टाचारजन्य कसुर’मा छानबिनका निम्ति म्याद थप माग गरेको हो ।
देउवा दम्पत्तिको पत्र : २ महिनाभित्र नेपाल फर्केर अनुसन्धानमा सहयोग गर्छौं
काठमाडौं । पूर्वप्रधानमन्त्री तथा नेपाली कांग्रेसका निवर्तमान सभापति शेरबहादुर देउवा र उनकी पत्नी डा. आरजु राणा देउवाले आफूहरू दुई महिनाभित्र नेपाल फर्किने र सम्पत्ति शुद्धीकरणसम्बन्धी अनुसन्धानमा पूर्ण सहयोग गर्ने प्रतिबद्धता व्यक्त गरेका छन् । देउवा दम्पत्तिले सम्पत्ति शुद्धीकरण अनुसन्धान विभागलाई इमेलमार्फत पत्र पठाउँदै हाल उपचारका क्रममा विदेशमा रहे पनि साउन २८ गतेभित्र स्वदेश फर्किने जानकारी दिएका हुन् । साथै, आफूहरू अनुसन्धानबाट भाग्न वा कानुनी प्रक्रियालाई प्रभावित पार्न खोजेको भन्ने प्रचार निराधार रहेको दाबी पनि गरेका छन् । ललितपुरको पुल्चोकस्थित विभागका महानिर्देशकलाई सम्बोधन गरी पठाइएको पत्रमा २०८२ भदौ २४ गते बुढानीलकण्ठस्थित आफ्नै निवासमा जेनजी समूहले प्रवेश गरी ज्यान लिन खोजेको, घरभित्र लुटपाट गरेको तथा भवनमा आगजनी गरेको उल्लेख गरिएको छ । देउवा दम्पत्तिले नेपाली सेनाको उद्धारका कारण मात्रै आफूहरू ज्यान जोगाउन सफल भएको दाबी गरेका छन् । उक्त घटनापछि लामो समय सैनिक अस्पताल तथा विदेशमा उपचार गराइरहेको अवस्थामा आफूहरूविरुद्ध अख्तियार दुरुपयोग अनुसन्धान आयोग र सम्पत्ति शुद्धीकरण अनुसन्धान विभागमा उजुरी परेको उनीहरूको भनाइ छ । घरमा नगद जलेको भन्ने दाबी गलत पत्रमा विभागकै अनुसन्धान टोलीले गरेको स्थलगत निरीक्षणको उल्लेख गर्दै निवासमा आगजनीका क्रममा ठूलो परिमाणमा नगद वा बहुमूल्य सामग्री जलेर नष्ट भएको भन्ने दाबी तथ्यहीन रहेको जिकिर गरिएको छ । उनीहरूका अनुसार विभागका उपमहानिर्देशक निर्मल ढकालको संयोजकत्वमा गठित टोलीले घटनास्थलमा पुगेर खानतलासी गर्दा कुनै पनि नगद रकम वा बहुमूल्य वस्तु जलेको प्रमाण फेला पारेको थिएन । देउवाका नातेदार रामबहादुर देउवाको रोहबरमा तयार पारिएको खानतलासी मुचुल्काले पनि घरका विभिन्न तला, जलेका धातु तथा कागजातहरूको निरीक्षण गर्दा नगद वा बहुमूल्य वस्तु नष्ट भएको पुष्टि नगरेको उनीहरूको दाबी छ । यही आधारमा आफूहरूलाई पक्राउ गरेर अनुसन्धान गर्नुपर्ने कुनै औचित्य नरहेको तर्क पत्रमा गरिएको छ । पूर्वाग्रहपूर्ण प्रचार देउवा दम्पत्तिले आफूहरू लामो समयदेखि सार्वजनिक जीवनमा सक्रिय रहेको, कानुनअनुसार नियमित रूपमा सम्पत्ति विवरण बुझाउँदै आएको र राज्यका उच्च जिम्मेवारी सम्हालिसकेको व्यक्तिलाई पूर्वाग्रहका आधारमा लक्षित गरिएको गुनासो गरेका छन् । उनीहरूले आफूहरू उपचारका लागि विदेशमा रहेको अवस्थालाई बहाना बनाएर इन्टरपोलमार्फत ‘रेड कर्नर नोटिस’ जारी गर्ने तयारी भइरहेको जानकारी कानुन व्यवसायीहरूबाट प्राप्त भएको उल्लेख गर्दै त्यसप्रति समेत आपत्ति जनाएका छन् । पत्रमा सर्वोच्च अदालतबाट यसअघि नै अन्तरिम आदेश जारी भइसकेको अवस्थामा आफूहरूविरुद्ध पक्राउ अनुमति लिनुपर्ने कुनै संवैधानिक वा कानुनी आधार नरहेको दाबी गरिएको छ । पूर्वप्रधानमन्त्री र पूर्वपरराष्ट्रमन्त्रीजस्ता जिम्मेवार राजनीतिक पद सम्हालिसकेका व्यक्तिका रूपमा आफूहरूको अनुसन्धान रोक्ने वा कानुनी प्रक्रियाबाट बच्ने कुनै उद्देश्य नरहेको देउवा दम्पत्तिले स्पष्ट पारेका छन् । ‘पारदर्शी र निष्पक्ष अनुसन्धानमार्फत आफ्नो निर्दोषिता प्रमाणित गर्न हामी तयार छौं,’ पत्रमा उल्लेख छ । हाल स्वास्थ्य उपचारका क्रममा विदेशमा रहेकाले तत्काल उपस्थित हुन नसक्ने अवस्था रहेको जनाउँदै उनीहरूले आजको मितिले दुई महिनाभित्र नेपाल फर्किएपछि विभागलाई जानकारी गराई अनुसन्धानमा पूर्ण सहयोग गर्ने प्रतिबद्धता व्यक्त गरेका छन् ।
