प्रधानमन्त्री ओलीले गरे पानी जहाज कार्यालय उद्घाटन, अब कहिलेबाट चल्छ ?
काठमाडौँ । प्रधानमन्त्री केपी शर्मा ओलीले बिहीबार पानीजहाज कार्यालयको उद्घाटन गरेका छन् । बिहीबार बिहान ललितपुरको एकान्तकुनामा एक समारोहका बीच कार्यालय उद्घाटन भएको हो । भौतिक पूर्वाधार तथा यातायात मन्त्रालय अन्तर्गत रहने कार्यालयमा सहसचिव नेतृत्वमा १६ कर्मचारीको दरबन्दी छ । पानीजहाज चलाउनु पहिले आवश्यक गृहकार्य गर्नुपर्ने भएकाले कार्यालय स्थापना र कर्मचारी खटाउने काम भएको हो । मन्त्रिपरिषदको पुस ३० गते बसेको बैठकले पानीजहाज कार्यालय खोल्ने र कर्मचारीको दरबन्दी सिर्जना गर्ने निर्णय गरेको थियो । पानीजहाज सञ्चालनबारे योजना बनाउन संलग्न जल तथा ऊर्जा आयोगका सहसचिव माधव बेल्बासेका अनुसार भारतको अन्तरदेशीय जलमार्ग प्राधिकरणले गंगानदीको हल्दीपुरसम्म पानीजहाज चलाउन पूर्वाधार बनाउन थालेको छ । नेपालले पनि नारायणी नदीमा केन्द्रित भएर योजना बनाइरहेको छ । भारतले आफ्नो सीमाभित्रमा एक वर्षमा पूर्वाधार बनाउने र नेपालले त्यसकै सहयोगले पानीजहाज चलाउने सरकारको योजना छ । गंगा नदीबाट नारायणी नदी हुँदै नेपालसम्म आईपुग्ने गरी पानीजहाज चलाउने तयारी हो । यो पानीजहाजलाई नारायणी नदीको दासढुंगासम्म नै ल्याउन सकिने अध्ययन टोलीको ठहर छ । बिहीबार कार्यालय उद्घाटन भएपनि पानी जहाज कहिलेबाट सञ्चालन हुन्छ भन्ने बारेमा अहिले निश्चित भइसकेको छैन । नेपाल आउने पानी जहाजको डीपीआर तयार, ओलीले गर्दैछन् कार्यालय उद्घाटन
लेबनानकाे आर्थिक विकासका लागि बेलायतले गर्याे २० करोड डलर सहयोग
लेबनान । संयुक्त अधिराज्य (बेलायत) ले लेबनानलाई २० करोड अमेरिकी डलर बराबरको सहयोग प्रदान गरेको छ । आर्थिक सङ्कटले ग्रस्त लेवनानको आर्थिक विकासमा सहयोग गरेको लेबनानका लागि बेलायती राजदूत क्रिस रामप्लिङले बताएका छन् । लेबनान र बेलायतबीचको दुईपक्षीय सम्बन्ध पहिलेको तुलनामा थप मजबुत बनिरहेको छ र बेलायतले लेबनानको अर्थतन्त्रको विकासका लागि थप सहयोग गर्न चाहिरहेको लेवनानी विदेशमन्त्री जेब्रान बसिलसँगको भेटपछि रामप्लिङले भने । रामप्लिङले नयाँ सरकार लेबनानी राजासँगको द्वन्द्वमा निष्पक्ष बन्दै संयुक्त राष्ट्र संघ सुरक्षा परिषद्को सङ्कल्प प्रस्ताव १७०१ र १०५९ प्रति प्रतिवद्ध बन्नेमा विश्वास गरे । लेबनानको स्थायित्व र सार्वभौमसत्तालाई कूटनीतिक माध्यमबाट सहयोग गर्ने बताउँदै लेबनानको आर्थिक क्षेत्रमा प्रभाव देखिने गरी गम्भीर सुधारका कामहरू हुनेमा बेलायत आशावादी रहेको जानकारी दिएको छ । रासस/सिन्ह्वा
चालू आर्थिक वर्षमा १३३ उद्योगले पाए एक्जीम कोर्ड
काठमाडौँ । उद्योग विभागले चालू आर्थिक वर्षमा १३३ साना, मझौला तथा ठूलो उद्योगलाई आयात निर्यात कोर्ड (एक्जीम कोर्ड) प्रदान गरेको छ । विसं २०७४ साउन १ देखि रु ५० हजारभन्दा बढी मूल्य बराबरको सामान आयात तथा रु पाँच लाखभन्दा बढी मूल्य बराबरको सामान निर्यातका लागि अनिवार्य रुपमा ‘एक्जीम कोर्ड’ लिनुपर्ने व्यवस्था रहेको छ । उद्योग विभागले एक्जीम कोर्ड लिनका लागि आवश्यक कागजात र मापदण्ड पूरा गरेका उद्योगलाई भन्सार विभागमा सिफारिस गर्दै आएको छ । गत आवमा घरेलु तथा साना उद्योग विभागले ‘एक्जीम कोर्ड’ लिनका लागि भन्सार विभागमा सिफारिस गर्ने भए पनि चालू आवबाट उक्त विभाग उद्योग विभागमा गाभिएपछि उद्योग विभागले ‘एक्जीम कोर्ड’का लागि भन्सार विभागलाई सिफारिस गर्दै आएको छ । विभागका सूचना अधिकारी जीवनराज सेढाईं सरकारले अनिवार्य रुपमा एक्जीम कोर्ड लिई आयात निर्यातको काम गर्नुपर्ने व्यवस्था गरेकाले ‘एक्जीम कोर्ड’ लिनेको सङ्ख्यामा वृद्धि भएको जानकारी दिएका छन् । विभागले प्यान/भ्याटमा दर्ता भएका उद्योग, उद्योग र वाणिज्यमा दर्ता भएका उद्योग, आयातको लागि रु १० लाख र निर्यातका लागि रु ३ लाख बैंक ग्यारेन्टी गरेको तथा कर चुक्ता प्रमाणपत्र भएको उद्योगलाई ‘एक्जीम कोर्ड’ प्रदान गर्दै आएको हो । यस्तै वाणिज्यका सामग्री आयात तथा निर्यातका लागि भने वाणिज्य विभागबाट ‘एक्जीम कोर्ड’ लिनुपर्ने व्यवस्था गरिएको छ । रासस
खानेपानीको समस्या हल गर्न सरकार गम्भीर छ : खानेपानी मन्त्री मगर
काठमाडौं । खानेपानी मन्त्री बिना मगरले काठमाडौं उपत्यकाबासीले झेल्नुपरेको खानेपानीको समस्यालाई निकै गम्भीरतापूर्वक सरकारले हल गर्न खोजिरहेको बताए । काठमाडौं उपत्यका खानेपानी (केयुकेएल) को एघारौं वार्षिकोत्सव समारोहलाई सम्बोधन गर्दै खानेपानी मन्त्री मगरले काठमाडौं बासीले झेल्नुपरेको खानेपानीको समस्या समाधानमा सरकार निकै गम्भीर रहेको जानकारी दिएका छन्र। मेलम्ची आयोजनामा देखिएको समस्या समाधान गर्न सरकार निकै गम्भीर ढंगले अघि बढिरहेको बताएका छन् । बार्षिकोत्सव कार्यक्रमलाई सम्बोधन गर्दै मेलम्चीले नयाँ चुनौतिसँग संघर्ष गरिरहेको छ । केयुकेएलको कार्य क्षमताका विषयमा आम जनताले चासोका साथ हेरिरहेका छन् । केयुकेएलको भूमिका र उद्देश्य निकै महत्वपूर्ण रहेको बताउँदै मन्त्री मगरले यस संस्थाको गरिमा बचाई राख्न आग्रह गरे । उनले मन्त्रालयले केयुकेएललाई सक्षम र मजबुत बनाउन कुनै कसर बाँकी नराख्ने बताए । कार्यक्रममा कीर्तिपुर नगरपालिकाका नगर प्रमुख रमेश महर्जनले केयुकेएलबाट जनताले धेरै आशा राखेको भन्दै केयुकेएललाई काकाकुल कम्पनी नबनाउन आग्रह गरे ।
माघ महिनामा बैंकहरुको निक्षेप र कर्जामा असन्तुलन, निक्षेपको २१४ % कर्जा प्रवाह
काठमाडौं । निक्षेप र कर्जाको विस्तारमा बैंकहरु फेरि असन्तुलित देखिएका छन् । अघिल्लो महिना कर्जा विस्तारभन्दा निक्षेप संकलनको विस्तार बढी देखाएर सन्तुलन कायम गरेका बैंकहरुले तेस्रो त्रैमासको पहिलो महिनामा फेरि असन्तुलन कायम गरेका हुन् । नेपाल बैंकर्स संघको तथ्याङ्क अनुसार २८ वाणिज्य बैंकहरुले पुस महिनामा २१ अर्ब निक्षेप वृद्धि गर्दा ४५ अर्ब रुपैंया कर्जा प्रवाह बढाएका हुन् । कर्जा र निक्षेपको वृद्धिदर अनुपात करिब २१४ प्रतिशत हो । बैंकहरुले पुस महिनाको अन्त्यमा कुल २६ खर्ब ५० अर्ब निक्षेप संकलन गरेका वाणिज्य बैंकहरुले माघ महिनाको अन्त्यसम्ममा कुल निक्षेप २६ खर्ब ७१ अर्ब रुपैंया पुर्याएका छन्, जसमध्ये २५ खर्ब ६८ अर्ब रुपैंया नेपाली मुद्रामा र १ खर्ब २ अर्ब रुपैंया बराबरको निक्षेप विदेशी मुद्रामा संकलन गरिएको छ । यो निक्षेप नेपाली र विदेशी मुद्रामै अघिल्लो महिनाभन्दा क्रमशः १४ अर्ब र ७ अर्ब रुपैंया बढी हो । त्यस्तै, एक महिनाको उक्त अवधिमा वाणिज्य बैंकहरुले करिब ४५ अर्ब रुपैंया कर्जा प्रवाह बढाएका छन् । कुल २३ खर्ब ८९ अर्ब रुपैंया कर्जा लगानी गर्दा २३ खर्ब १५ अर्ब रुपैंया नेपाली रुपैंयामा र ७३ अर्ब विदेशी मुद्रामा ऋण प्रवाह गरेका हुन् । यो लगानी स्वदेशी र विदेशी मुद्रामा अघिल्लो महिनाको कर्जा लगानीको आकारभन्दा क्रमशः ३८ अर्ब र ७ अर्ब विदेशी बढी हो । त्रैमासिक विवरण सार्वजनिक गर्नुपर्ने भएकोले त्रैमासको अन्त्यमा सम्हालिने बैंकहरु पहिलो र दोस्रो महिना भने असन्तुलित हुने गरेका छन् । अघिल्लो त्रैमासमा पनि कात्तिक महिनामा असन्तुलित देखिएका बैंकहरु मंसिर र पुस महिनामा ‘करेक्सन’ गरेका थिए, यो त्रैमासमा पनि सोही प्रवृत्ति देखिएको छ । सामान्यतया निक्षेपको ८० प्रतिशत कर्जा वृद्धिले बैंकहरुको व्यवसाय विस्तारलाइृ सन्तुलित बनाउँछ तर गत महिना बैंकहरुले निक्षेपको दोब्बर भन्दा बढी कर्जा प्रवाह वृद्धि गर्दा यसले बैंकिङ क्षेत्रको सीसीडी अनुपातमै चाप पर्ने देखिएको छ ।
राष्ट्रिय स्तरमा आयोजित खेलकुद प्रतियोगितामा गैरआवासीय नेपाली खेलाडी सहभागी हुने
काठमाडौं । नेपालमा राष्ट्रिय स्तरमा आयोजना हुने खेलकुद प्रतियोगितामा गैरआवासीय नेपाली खेलाडी सहभागी गराउने सम्बन्धमा गैरआवासीय नेपाली संघ तथा राष्ट्रिय खेलकुद परिषदबीच सम्झौता भएको छ । राष्ट्रिय खेलकुद परिषदको आयोजनामा राष्ट्रिय स्तरमा आयोजना हुने खेलकुद प्रतियोगिताहरुमा गैरआवासीय नेपाली खेलाडीहरु सहभागी गराई प्रतिभा प्रस्तुत गर्ने आधार तयार गर्ने उद्देश्यले सम्झौता गरिएको हो । संघका तर्फबाट अध्यक्ष भवन भट्ट र राष्ट्रिय खेलकुद परिषदका तर्फबाट सदस्यसचिव केशव कुमार विष्टले मंगलबार सम्झौता पत्रमा हस्ताक्षर गरेका हुन् । सम्झौता अनुसार संघ र परिषदले नेपाली खेलकुद क्षेत्रको विकासका लागि संयुक्त रुपमा नीति नियमको निर्माण, स्रोत साधनको विकास तथा योजना कार्यक्रम तर्जुमा गर्ने सहमति गरिएको छ । यस्तै परिषदले आयोजना गर्ने राष्ट्रियस्तरका खेलकुद प्रतियोगिताहरुमा संसारभर रहेका सम्पूर्ण गैरआवासीय नेपाली खेलाडीहरुको सहभागिता सम्बन्धि व्यवस्था एकद्वार प्रणाली अनुसार गैरआवासीय नेपाली संघ मार्फत गरिने सम्झौतापत्रमा उल्लेख गरिएको छ । परिषदले आयोजना गर्ने राष्ट्रिय स्तरका खेलकुद प्रतियोगिताहरुमा गैरआवासीय नेपाली संघले जारी गरेको परिचय पत्र वा परराष्ट्र मन्त्रालयले जारी गरेको गैरआवासीय नेपाली परिचयपत्रका साथै संघको सिफारिसको आधारमा खेलको नियम अनुसार गैरआवासीय नेपाली खेलाडी सहभागी हुने व्यवस्था समेत मिलाइने भएको छ । गैरआवासीय नेपाली खेलाडीले अरु स्थानीय नेपाली खेलाडी सरह सेवा सुविधा पाउनेछन् । परिषदका विभिन्न खेलकुद सम्बन्धि गतिविधि एवं संरचनाहरुमा नेपाल बाहिर रहेर प्रवासमा सिकेको खेलकुद सम्बन्धि नवीनतम सिप, प्रविधि र कौशल नेपालमा भित्र्याउन संघले सहयोग गर्ने सहमति समेत गरिएको छ । राष्ट्रिय खेलकुद परिषदको कार्यकारी परिषदमा गैरआवासीय नेपाली संघका तर्फबाट अन्तर्राष्ट्रिय युवा संयोजक पदेन सदस्यका रुपमा गैरआवासीय नेपाली संघको प्रतिनिधिका रुपमा व्यवस्था गरिएको छ । त्यस सम्बन्धमा परिषदको विद्यमान ऐनमा आवश्यकता अनुसार संशोधन परिवर्तनको पहल गरिने सम्झौता पत्रमा उल्लेख छ । यस्तै संघका तर्फबाट अन्तर्राष्ट्रिय युवा संयोजक र परिषदका तर्फबाट तोकिएका एक अधिकारी सम्मिलित दुई सदस्यीय टोलीले नै राष्ट्रिय खेलकुद प्रतियोगिताहरुमा गैरआवासीय नेपालीका सहभागिताका लागि संयोजनकारी भूमिका खेल्नेछ । संघका लागि अन्तर्राष्ट्रिय समन्वय परिषद तथा परिषदका तर्फबाट कार्यकारी परिषद नै विभिन्न गतिविधिलाई कार्यन्वयनका लागि अन्तिम मान्यता दिने निकाय हुने सहमति गरिएको छ । संघ र परिषदको संयुक्त गतिविधि समेटी वार्षिक रुपमा एक प्रतिवेदन तयार गर्ने, गैरआवासीय नेपाली खेलाडीहरुको सहभागिता र गैरआवासीय नेपाली खेलाडीको प्रतिनिधित्व गर्ने गरि विभिन्न खेलकुद क्लब दर्ता एवं संचालनका लागि हाल विद्यमान ऐन नियमहरुमा आवश्यकता अनुसार परिषदले संशोधनको प्रक्रिया अगाडी बढाउने र त्यसरी संचालन हुने क्लब गैरआवासीय नेपाली संघको वैधानिक निर्णय एवं सिफारिसमा परिषदले दर्ता गर्ने सहमति पत्रमा उल्लेख गरिएको छ ।
किङ्स लाउन्जले पोखराको लेकसाइडमा पहिलो शाखा खेल्ने, सेवा शुरु गरेको वर्ष दिन पुरा
काठमाडौं । किङ्स लाउन्जले पोखरामा पनि आफ्नो सेवा विस्तार गर्ने भएको छ । स्थापनाको पहिलो वर्ष पुरा गरेको उपलक्ष्यमा आगामी बैशाख १ गतेदेखि पोखराको लेकसाईडमापारिवारिक वाताबरणमा आधुनिक लाउञ्ज सञ्चालनमा ल्याउन लागिएको हो । पहिलो वर्षको समाप्तिसँगै पहिलो शाखाका रुपमा पोखराबाट सेवा सुरु गर्न लागिएको भन्दै किङ्स लाउञ्ज व्यवस्थापनले आगामी दिनमा अझै प्रभावकारी सेवा दिने प्रतिबद्धता जनाएको छ । काठमाडाैंको दरबारमार्गबाट उपलब्ध गराउँदै आएका सेवालाई अझै परिष्कृत रुपमा पोखराका सेवाग्राहीलाई सेवा दिने लाउञ्जका अध्यक्ष रामचन्द्र श्रेष्ठले बताए । काठमाडौंको दरबारमार्गमा अवस्थित किङ्स लाउन्जले ग्राहकहरुको चाहनालाई मध्यनजर गर्दै सेवा विस्तारलाई तिब्र पारेको श्रेष्ठको भनाई छ । यसैगरी प्रेम दिवसको दिन मंगोलियन हर्टले दरबारमार्गस्थित किङ्स लाउन्जमा प्रस्तुती दिने भएको छ । मंगोलियन हर्टका राजु लामाले व्याण्डको सिरिज कन्सर्ट अन्तरगत किङ्स लाउन्ज दरबार मार्गमा सांगितिक प्रस्तुती दिन लागेका हुन् । प्रेम दिवशका दिन साँझ ६ बजेदेखि लामाले आफ्नो व्याण्डको साथमा सांगितिक प्रस्तुती दिने छन् । लाउञ्जले दिउसोको समयमा आउने ग्राहकहरुलाई २५ प्रतिशत छुट दिने व्यवस्था मिलाएको छ । लाउञ्जले बिहान ११ बजेदेखि राती साढे १२ बजेसम्म सेवा दिँदै आएको छ ।
एनबीआईले वृहत सम्मेलन आयोजना गर्दै, विभिन्न देशका विज्ञहरूकाे सहभागीता
काठमाडौं । नेशनल बैंकिङ्ग इन्स्टिच्यूटले स्थापना भएको दशौँ वर्षको अवसरमा “डेलिबेरेसन फर द नेक्स्ट डिकेड” विषयक वृहत सम्मेलनको आयोजना गर्न लागेको छ । उक्त सम्मेलन फागुन ५ गते आइतबार र्याडिसन हाेटलमा हुँदै छ । सो सम्मेलनमा विभिन्न देशहरुबाट क्षेत्रियस्तरका विज्ञहरुको सहभागी हुनेछन् । त्यस्तै, कार्यक्रममा स्टेट बैंक लि. भारतका एमडि दिनेश खारा, आईडिएफसी बैंकका एमडि एवँ सिईओ भि. बैद्यानाथन, स्टेट बैंक लि. भारतका स्वतन्त्र संचालक एवम् बैंकिङ्ग विज्ञ संजिव मल्होत्रा, एचडिएफसी बैंकका ट्रेजरर आशिष पार्थसारथी, फरेन एक्सचेन्ज डिलर्स एशोसिएसन अफ इन्डियाका प्रमूख कार्यकारी अधिकृत अश्विनी सिंधवानी तथा भारतका प्रख्यात आर्थिक पत्रकार तमल बन्दोपाध्यायको पनि सहभागीता रहने छ । उक्त सम्मेलन कार्यक्रममै बैंक अफ काठमाण्डूका प्रमूख कार्यकारी अधिकृत शोभन देव पन्त, नविल बैंकका प्रमूख कार्यकारी अधिकृत अनिल केशरी शाह, एसविआई बैंकका मूख्य महाप्रबन्धक पि. सी. कन्डपाल, इन्डियन इन्स्टिच्यूट अफ बैंकिङ्ग एण्ड फाईनान्सका प्रमूख कार्यकारी अधिकृत डा. जे. एन. मिश्रा तथा नेतृत्व तालिमका बिज्ञ प्रकास रोहेरा समेतको छलफल कार्यक्रम रहेको छ । साथै सोही कार्यक्रममा नेपाल राष्ट्र बैंकका पूर्व गर्भनर गणेशबहादुर थापा, बिजय नाथ भट्टराई तथा दिपेन्द्रबहादुर क्षेत्रीको लगायत पूर्व बैंकर शशिन जोशीले सहजकर्ताको भूमिका निर्वाह गर्ने छन् ।
