बायुसेवा निगमको जापान उडान अनिश्चित, हिराचन र याकुजासँगको सम्बन्धमा शंकास्पद
काठमाडौँ । नेपाल वायु सेवा निगमले जापान उडानका लागि नेपाल नागरिक उड्डयन प्राधिकरण (क्यान) बाट अनुमति प्रमाण–पत्र (एओसी) पाएपनि अझैसम्म उडान भर्न सकेको छैन । उडानका लागि जापानले सहमति नदिदा उडान अनिश्चित भएको छ । जापानको लागि नेपाल वायुसेवा निगमको जीएसए (जनरल सर्भिस अजेन्ट) नियुक्ती विवादस्पद बनेपछि उडान अनिश्चित बन्दै गएको बताईएको छ । निगमले गैर आवासीय नेपाली संघको पूर्व अध्यक्ष देवमान हिराचनको कम्पनीलाई जीएसए दिन लागेको, तर जापानले यसमा असहमति जनाएको बताईएको छ । हिराचनको विजनेश पार्टनरहरु र जापानको अण्डर वल्र्ड भनेर चिनिने याकुजाबीच सम्बन्ध देखिएको जनाउँदै जापानले हिराचनको कम्पनीलाई जिएसए दिन असहमति जनाएको छ । क्यानबाट जापान उडानका लागि माघ १८ गते अनुमति प्राप्त गरेको हो । निगमले अन्तर्राष्ट्रिय उडान बिस्तारका लागि गृहकार्य गरिरहँदा कन्ट्री म्यानेजरका रुपमा सन्तोष पाण्डेलाई नियुक्त गरी जापान पठाइसकेको छ । उनी करिब २ महिना अघि नै जापान गइसकेका छन् । नेपाल एयरलाइन्सले क्यानबाट अनुमति पाएपछि यही फागुन १५ गतेबाट नै उडान गर्ने भनेको थियो । तर, जापान नागरिक उड्डयन प्राधिकरणले अहिलेसम्म स्वीकृति दिएको छैन । त्यसकारण नेपाल नागरिक उड्डयन प्राधिकरणले जापानमा कहिलेबाट उडान भर्छ भन्ने अझै निश्चित भएको छैन । नेपाल वायुसेवा निगमका सहायक प्रवक्ता नवराज कोइरालाले उडान अनुमतिका लागि नागरिक उड्डयन प्राधिकरण जापानमा सबै कागजात बुझाइसकेको बताए । कोइरालाले भने–यही फेब्रुअरी महिना भित्र जापान उडानको अनुमति पाउने संभावना छ । निगमका तर्फबाट बुझाइएको कागजपत्र अहिले जापानले अध्ययन गरिरहेको छ । जापानले थप केही कागज माग्न सक्ने वा कागज सबै पुगेमा अनुमति प्रदान गर्नेछ । उनले भने– जापानबाट अनुमति पाएको १ महिना भित्रै उडान भर्ने निगमको तयारी छ । निगमको नयाँ ए ३३० वाइड बडी जहाजले काठमाडौँ–ओसाका उडान गर्नेछ । नयाँ गन्तव्यमा उडान सञ्चालनका लागि स्वदेश नियामक निकायबाट पनि अनुमति लिनुपर्ने प्रावधान अनुरुप क्यानले निगमलाई एओसी दिएको हो । नेपालमा उडान अनुमति पाएपछि जापानमा उडान अनुमतिका लागि प्रक्रिया अघि बढेको छ, अब जापानका तर्फबाट स्वीकृति आउन मात्र बाँकी रहेको सहायक प्रवक्ता कोइरालाले बताए । त्यस्तै, आगामी चैत १५ गतेसम्म चीनमा पनि उडान सञ्चालन गर्ने लक्ष्यसहित निगमले आवश्यक प्रक्रिया अघि बढाएको छ । नेपाल–ग्वान्जाओ सिधा उठान भर्नका लागि चीनमा पनि कर्मचारी व्यवस्थापन भइसकेको छ । चीनका लागि कन्ट्री म्यानेजरका रुपमा सैलेश कंशाकरलाई नियुक्त गरी पठाइएको छ । जापान र चीनका लागि नियुक्त भएका कन्ट्री म्यानेजद्वय पाण्डे र कंशाकारले सम्बन्धित देशका नागरिक त्यहाँको नागरिक उड्डयन प्राधिकरणबाट अनुमतिका लागि संयोजनको काम गरिरहेका छन् । साथै ती देशमा कार्यालय व्यवस्थापन, मार्केटिङ, टिकेटिङ, ट्राभल एजेन्ट नियुक्तिको काम गर्दै आएका छन् । जापान र चीनबाट यात्रु पाउलान् त ? जापानमा नेपालीको वसोबास पनि राम्रै छ, जापानीहरुका लागि पर्यटकीय गन्तव्य पनि हो नेपाल । अहिलेसम्म जापानबाट नेपाल आउनका लागि सिधा उडान एउटा पनि छैन । कि मलेसिया, कि चाइना अथवा थाइल्याण्ड र कोरिया हुँदै नेपाल आउनु पर्ने बाध्यात्मक अवस्था छ । यस्तो अवस्थामा नेपाल–ओशाका सिधा उडान भएको खण्डमा यात्रुको कमी नहुने र यो अवसरलाई सदुपयोग गर्न सकिने निगमका सहायक प्रवक्ता कोइरालले बताए । यता, चीनको ग्वान्जाओ उडानका लागि पनि यात्रुको कुनै कमी नहुने उनको भनाई छ । चीन आफैँमा ठूलो देश हो, नेपालीको बसोबास पनि छ । चीनका लागि नेपाल व्यापारिक गन्तव्य पनि हो । अहिले फ्लाइट चार्टर गरेर सामान आइरहेका छन् । ग्वान्जाओबाट चाइना साउथले १ मात्र उडान भर्दै आएको छ । चीनका लागि नेपाल पर्यटकीय गन्तव्यपनि भएका नाताले त्यहाँपनि विमान चलाउन कुनै समस्या नहुने र नेपाल एयरलाइन्स राम्रो चल्यो भने देशलाई पनि राम्रो हुने सहायक प्रवक्ता कोइराला बताउँछन् । कहाँ कहाँ भइरहेको छ अन्तर्राष्ट्रिय उडान ? नेपाल एयरलाइन्सले हाल विभिन्न भारतको नयाँदिल्ली, बैङ्लोर, मुम्बई सहितका ८ गन्तव्यमा उडान भर्दै आएको छ । मलेसियाको क्वालालाम्पुर, हङकङ, बैंकक, दुबई र दोहामा उडान भर्दै आएको छ । निकट भविष्यमै चीन, दक्षिण कोरिया र साउदी अरबमा सिधा उडान गर्ने योजनाका साथ प्रक्रिया अघि बढाइएको सहायक प्रवक्ता कोइरालाले बताए । नेपाल एयरलाइन्ससँग हाल दुई अन्तर्राष्ट्रिय वाइड बडी ए–३३० जहाज, दुई न्यारो बडी ए–३२० जहाज र एक बोइङ ७५७ जहाज छन् ।
स्पार्क अस्पतालले मनायो २७ औं वार्षिकोत्सब, विभिन्न व्यक्तित्व सम्मानित
काठमाडौं । प्राकृतिक चिकित्सा क्षेत्रमा छुट्टै पहिचान बनाउन सफल नेपालकै पुरानो र ठूलो मध्ये एक स्पार्क अस्पतालले २७ औं वार्षिकोत्सब मनाएको छ । वार्षिकोत्सब कै अवसर पारेर अस्पतालले सोही अस्पताल उपचारपछि निको भएका विरामीहरुको विचार, उनीहरुको भोगाई र उनीहरुको अस्पताल बसाईबारेमा समेटेर तयार पारेको ‘स्पार्कले दिएको नयाँ जीवन’ नामक पुस्तक विमोचन गरेको छ । सोल्टीमोडस्थित अस्पताल प्राङ्गणमा भएको उक्त कार्यक्रममा सोही अस्पतालमा उपचार पछि निको भएका बिरामीहरुलाई अथिति बनाइएको थियो । कार्यक्रममा बोल्दै कलाकार एवं पत्रकार शैलेन्द्र सिंखडाले आफ्नै विरामीलाई अगाडि बढाएर फरक कार्यक्रम गरेको भन्दै प्रशंशा गरे । योग तथा प्राकृतिक चिकित्सक संघका अध्यक्ष जनक बस्नेतले प्राकृतिक चिकित्सा पद्दतिबाट अगाडि बढेको अस्पतालले २७ वर्ष पार गर्नु ठूलो उपलब्धि भएको बताए । प्राकृतिक चिकित्सा पद्दतिका अस्पताल आजको दिनमा समेत टिक्ट गाह्रो रहेको उल्लेख गर्दै उनले भने–‘यस्तो अवस्थामा स्पार्क अस्पतालले पाएको सफलता प्रशांशा योग्य छ । यसलाई निरन्तरता दिन सबैले सहयोग गर्नुपर्छ ।’ कार्यक्रमका सभापति तथा अस्पतालको अध्यक्ष टंकनाथ पौडेलले अस्पतालको यो सफलता र यो यात्रा आफ्नो भन्दा पनि सहयात्रीहरुको कारणले सम्भव भएको र विरामीहरुको विश्वास र मायाको कारणले सम्भाव भएको बताए । कार्यक्रममा अस्पतालमा कार्यरत डाक्टर विजय फुँयाललाई नगद पुरस्कारसहित उत्कृष्ट कर्मचारीको पुरस्कार दिईयो । त्यस्तै विगत २६ वर्षदेखि स्पार्क अस्पतलाले सञ्चालन गरेको योग कक्षामा सहभागी भई आएका मोहनचण्डी श्रेष्ठ र कृष्णप्रसाद श्रेष्ठलाई समेत सम्मान गरियो । पुस्तक विमोचन कार्यक्रमपछि अस्पतालबाट निको भएका विरामी केदार भट्टराईले ३२ दिन अस्पताल बस्दाको क्षण अविस्मरणीय रहेको बताए । ‘प्यारालाईलिस भएर आफू अब जीवनभरका लागि थला परे भन्ने सोचेको थिएँ । तर, अस्पतालले नयाँ जीवन दिएको छ । मैले यस अस्पतालको प्रशंशा शब्दमा गर्न सक्दिन’ उनले भने । वार्षिक उत्सावकै अवसरमा नेपाली स्वस्थ्य क्षेत्रमा अनवर कलम चलाउदै आएका पत्रकार अतुल मिश्रलाई पनि सम्मान गरिएको छ ।
एनसीसी बैंक र प्रिमियर इन्स्योरेन्सबीच बीमा सेवामा सहकार्य
काठमाडौं । नेपाल क्रेडिट एण्ड कमर्स बैंक लि.र प्रिमियर इन्स्योरेन्स कम्पनी (नेपाल) लि.बीच बीमा सेवा प्रदान गर्ने सम्बन्धी सहकार्यात्मक सम्झौता भएको छ । सम्झौता अनुसार एनसीसी बैंकको कर्पोरेट तथा बिभिन्न शाखा कार्यालयहरुबाट बैंकका ग्राहकहरूले प्रिमियर इन्स्योरेन्सले प्रदान गर्ने निर्जीवन बीमा सम्बन्धी सेवा सुविधाहरू प्राप्त गर्न सक्नेछन् । सम्झौतामा नेपाल क्रेडिट एण्ड कमर्स बैंकका तर्फबाट प्रमुख कार्यकारी अधिकृत रमेशराज अर्याल र प्रिमियर इन्स्योरेन्सका तर्फबाट प्रमुख कार्यकारी अधिकृत सुद्युम्न प्रसाद उपाध्यायले संयुक्त रुपमा हस्ताक्षर गरेका छन् ।
चौधरी ग्रुपको नयाँ उत्पादन ‘माल्टोजीङ्ग’ बजारमा, प्रतिस्पर्धी भन्दा २५ रुपैयाँ सस्तो
काठमाडौं । चौधरी ग्रुपले नयाँ उत्पादन ‘माल्टोजीङ्ग’ अफिसियल रुपमा सार्वजनिक गरको छ । चौधरी ग्रुप अन्तर्गतको बिएलसी होल्डीङ्स अन्तर्गतको ‘इन्सट्यान्टमिल्स प्रा. लि.’को उत्पादन र प्रर्बधनमा माल्टोजीङ्ग बजारमा ल्याईएको हो । शनिबार काठमाडौंमा आयोजित एक कार्यक्रममा नेपालका लागि फ्रान्सका राजदूत अर्नुद जेन च्याम्पीले ‘माल्टोजीङ्ग’को सार्वजनिकरण गरेका थिए । माल्टोजीङ्ग आजैदेखि नेपालका सबै किराना पसलमा उपलब्ध हुने कम्पनीका कार्यकारी निर्देशक पारस शाक्यले बताए । माल्टोजङ्ग बजारमा रहेका अन्य उत्पादन भन्दा गुणस्तरीय तथा सुपत मूल्यमा उपलब्ध गराईएको कम्पनीले जनाएको छ । कम्पनीका प्रमुख कार्यकारी अधिकृत होम न्यौउपानेका अनुसार माल्टोजीङग हाल क्लासिक माल्ट र चोकलेट गरी दुई स्वादमा बजारमा ल्याईएको छ । चोकलेट स्वादमा प्रतिबट्टा ३५० रुपैयाँ र क्लासिक माल्ट स्वादमा प्रतिबट्टा ३३० रुपैयाँ मूल्य तोकिएको छ । माल्टोजीङग बजारमा विद्यामान विभिन्न खालका ब्राण्ड भन्दा पच्चीस रुपैयाँ सस्तोमा उपभोक्ताहरुलाई उपलब्ध गराइएको उनले बताए । नेपालमा विद्यमान कुपोषण तथा पुड्कोपनाको समस्यालाई पनि सम्बोधन गर्ने उदेश्य राखिएको उनले बताए । यसमा ब्रेन, बोन र बडी (मष्तिष्क, हाड र शरिर) लाई अति आवश्यक तत्वहरु प्रोटिन, फ्याट, काब्रोहाईड्रेट्स, भिटामीन बि सिरिज, बायोटिन, आयोडिन, भिटामीन ए, भिटामीन सि, भिटामीन डी र अत्यावश्यक सम्पूर्ण खनिज तत्वहरु जस्तै म्याग्नेसियस, क्याल्सियम, फस्फोरस, कपर, सेलेनियम, जिङ्क, पोटासियम र आईरन लगायतको मिश्रण रहेको छ । ‘माल्टोजीङ्ग’को प्रयोगले सबै उमेर समूहका उपभोक्ताहरुको दैनिक पोषणको आवश्यकतालाई परिपूर्ती गर्ने कम्पनीको दावी छ । ‘मल्टिभिटामिन र मिनरल्सको समिश्रण गरिएको हुनाले यसको प्रयोगले नेपालको कपोषणको समस्यालाई केहि हदसम्म अन्त्य हुने हामीले विश्वास गरेको छौं । यस उत्पादनको प्रयोग र प्रवद्र्धनमा हामी सरकारसँग साझेदारी गर्न इच्छुक छौं’ न्यौउपानेले भने । ‘माल्टोजङ्ग’ ब्राण्ड चौधरी ग्रुपले लिएको छ भने यसको उत्पादन भारतमा गरिएको छ । माल्टोजाङ्गको बजारिकरण हाललाई नेपालमा गर्ने र केही समयपछि विश्व बजारमा लैजाने तयारी गरेको छ ।
चन्द्रनिगाहपुरमा हुने प्रथम अन्तराष्ट्रिय कराँते प्रतियोगिताको तयारी पूरा
रौतहट । रौतहटको चन्द्रनिगाहपुरमा हुने प्रथम अन्तराष्ट्रिय कराँते प्रतियोगिताको तयारी पूरा भएको छ । सितोरियो कराँते संघ रौतहटको आयोजनामा फागुन १७ र १८ गते चन्द्रनिगाहपुरको तुलसीलाल स्मृती रंगशालामा प्रतियोगिता सञ्चालन हुनेछ । नेपालका सातै प्रदेश, भारतका बिभिन्न प्रान्त, भुटान र बंगलादेशका खेलाडीले बिभिन्न तौल समुहमा प्रतिष्पर्धा गर्ने सितोरियो कराँते संघ रौतहटले जनाएको छ । । २४ स्वर्ण, २४ रजत र ४८ कास्य पदकका लागि चार देशका खेलाडी बीच प्रतिष्पर्धा हुनेछ । सातै प्रदेश, भारत, भुटान र बंगलादेशका खेलाडीको लागि आवास र खानाको ब्यवस्था भईसकेको आयोजकले जानकारी दिएको छ । प्रदेश नं २ मै पहिलो पटक आयोजना हुन लागेको अन्तराष्ट्रिय स्तरको कराँते प्रतियोगितामा आयोजक टिम सहित नेपालका ८ टिमको सहभागिता रहने छ । प्रतियोगितामा चन्द्रपुर नगरपालिका मुख्य सहयोगीका रुपमा रहेको छ भने टेन्सवर्ग बियर सह प्रायोजक रहेको आयोजक संस्थाले जानकारी दिएको छ । १७ गते बिहानबाट सुरु हुने र १८ गते साँझ सम्पन्न हुने प्रतियोगिताम चार देशका खेलाडी तथा निर्णायक गरेर करिव चार सय जनाको सहभागिता रहने छ । प्रतियोगितामा महिला र पुरुषतर्फ उत्कृष्ट हुने एक–एक जनालाई नगद पुरस्कारको समेत ब्यवस्था गरिएको आयोजक नेपाल सितोरियो कराँते संघ रौतहटले जनाएको छ ।
साताको शेयर बजारः अर्ब पनि पुगेन कारोबार
काठमाडौँ । धितोपत्र बजारमा यस साता कूल १७३ कम्पनीको शेयर कारोबार भए पनि कारोवार रकम एक अर्बसमेत पुग्न सकेन । निरन्तर ओरालो लाग्दै आएको बजार यस साता पनि असन्तुलित रह्यो । नेपाल स्टक एक्सचेञ्जकाअनुसार ९९ करोड पाँच लाख ६७ हजार ४६३ मूल्य बराबरको ३५ लाख ७६ हजार ८४१ कित्ता शेयर कारोवार भएको छ । स्टकका अनुसार यस साता कारोवार मापक नेप्से परिसूचक ३.३४ विन्दुले बढेको छ । साताभरको कारोवारमा बजार घटबढको अवस्थामा रह्यो । मङ्गलबार बजारमा उच्च अङ्कको वृद्धि भएपनि अन्य दिन बजार सामान्य अवस्थामा रहेको स्टकले जनाएको छ । आइतबार शेयर कारोवार मापक नेप्से परिसूचक ३.१५ विन्दुले घटेर एक हजार १०९.७२ विन्दुमा पुग्यो । उक्त दिन कूल १७३ कम्पनीको आठ लाख २८ हजार ८५३ कित्ता शेयर रु २१ करोड सात लाख ३२ हजार १४७ मूल्यमा खरिद–बिक्री भए । यस्तै सोमबारसमेत बजार ओरालो लागेर एक हजार १०० को आसपासमा आइपुग्यो । सो दिन कारोवार मापक नेप्से परिसूचक सात दशमलव २१ विन्दुले घटेर एक हजार १०२ दशमलव ५१ विन्दुमा झर्यो । कूल १६१ कम्पनीको आठ लाख ७६ हजार २०८ कित्ता शेयर रु २३ करोड ४५ लाख ९४ हजार ३८१ मूल्यमा खरीद बिक्री भए । यस्तै मङ्गलबार भने कारोवार मापक नेप्से परिसूचक २२.४४ विन्दुले बढेर एक हजार १२४.९६ विन्दुमा पुग्यो । स्टकका अनुसार सो दिन कूल १६७ कम्पनीको सात लाख १४ हजार ८७६ कित्ता शेयर रु २१ करोड ४५ लाख ८८ हजार ६१९ मूल्यमा खरीद बिक्री भए । मङ्गलबार उच्च अङ्कले वृद्धि भएको शेयरबजार बुधबार भने पुनः घट्यो । सो दिन कारोवार मापक नेप्से परिसूचक १२।७२ विन्दुले घटेर एक हजार ११२.२३ विन्दुमा झर्यो । यस्तै साताको अन्तिम दिन बिहीबार कारोवार मापक नेप्से परिसूचक शून्य दशमलव ८४ विन्दुले बढेर एक हजार ११३ दशमलव ०७ विन्दुमा पुग्यो । स्टकका अनुसार सो दिन १५५ कम्पनीको चार लाख ७५ हजार ७६६ कित्ता शेयर रु १६ करोड ४४ लाख ७८ हजार ६८८ मूल्यमा खरिद बिक्री भए । रासस
पत्रकार महासंघले प्रत्यक्ष निर्वाचन प्रणाली अवलम्बन गर्ने
कास्की । नेपाल पत्रकार महासङ्घले यही फागुन ९ र १० गते पोखरामा सम्पन्न भएको साधारणसभा तथा विधान अधिवेशन ऐतिहासिक रहेको बताएको छ । महासङ्घको इतिहासमा पहिलोपटक प्रत्यक्ष निर्वाचन प्रणाली अवलम्बन गर्ने गरी विधानमा व्यवस्था गरिनु ऐतिहासिक भएको र यसबाट महासङ्घको जीवनमा दूरगामी महत्व रहने महासङ्घले जनाएको छ । विधान अधिवेशनबाट पारित विशेष प्रस्ताव तथा निर्णय सार्वजनिक गर्न आज पोखरामा आयोजित पत्रकार भेटघाटमा केन्द्रीय अध्यक्ष गोविन्द आचार्यले सभामा प्रस्तुत विधान संशोधनको मस्यौदा केन्द्रीय समितिमा एकजना महिला उपाध्यक्ष र एक महिला सदस्य थप्ने गरी संशोधनसहित सर्वसम्मतरुपमा पारित भएको बताए । नौ वर्षअघि नेपालगञ्ज, त्यसपछि पोखरा र चितवनमा गरी तीनवटा साधारणसभामा विधान संशोधनको प्रस्ताव सफल नभए पनि यसपटक पोखरामा संशोधन हुनु महासङ्घको इतिहासमा बिरलैमध्येको घटना भएकोे भनाइ अध्यक्ष आचार्यले राखे । उनले भने,“पोखराको यस अधिवेशन ऐतिहासिक र नमूनायोग्य भएको छ । साधारणसभाको मूल भावनाअनुसार विधानमा व्यवस्था हुन्छ । अब महासङ्घ आफ्ना मुद्दामा केन्द्रित रहन्छ ।” महासङ्घका उपाध्यक्ष विपुल पोखरेलले प्रत्यक्ष निर्वाचनको व्यवस्थाले महासङ्घलाई लोकतान्त्रिक पद्दतिमा लगेको बताए । महासङ्घका महासचिव रमेश विष्टले विगतमा केन्द्रीय प्रतिनिधिको राजनीतिले महासङ्घलाई कमजोर बनाएको उल्लेख गर्दै सदस्यता शुद्धीकरणमार्फत महासङ्घलाई व्यावसायिक पत्रकारको छाता संस्थाको रुपमा विकास गरिने बताए । स्थानीय व्यवस्थापन समितिका संयोजक एवं महासङ्घ कास्की शाखाका अध्यक्ष दीपेन्द्र श्रेष्ठले केन्द्रले कास्की शाखालाई प्रदान गरेको जिम्मेवारी पूरा गर्न पाउँदा गौरवको अनुभूति भएको बताए । महासङ्घको पोखरा साधारणसभा तथा विधान अधिवेशन विभिन्न १७ बुँदे प्रश्ताव पारित गर्दै शुक्रबार साँझ सम्पन्न भएको थियो ।
मोरङको मधुमल्लामा खुल्यो राष्ट्रिय वाणिज्य बैंकको शाखा
काठमाडौँ । राष्ट्रिय वाणिज्य बैक लिमिटेडको मोरङ जिल्लाको मिल्काजुङ्ग गाउँपालिका वडा नम्बर–९ स्थित शाखा कार्यालय मधुमल्लाको औपचारिक रुपमा शुभारम्भ गरिएको छ । यो समेत बैंकको शाखा कार्यालयको संख्या २१७ पुगेको छ । नेपाल सरकार अर्थ मन्त्रालयका आर्थिक सल्लाहकार डा. रामशरण खरेल र बैंकका प्रमुख कार्यकारी अधिकृत किरणकुमार श्रेष्ठलेले संयुक्त रुपमा शनिबार एक समारोहका बीच मधुमल्ला शाखाको उद्घाटन गरे । सो समारोहमा प्रमुख अतिथि डा. खरेलले राष्ट्रिय वाणिज्य बैंक देशकै ब्राण्ड एम्बासडर बन्नुपर्ने बताउंदै सरकारी नीति तथा कार्यक्रमलाई थप सघाउ पुर्याउनु पर्ने बताए । बैंकका प्रमुख कार्यकारी अधिकृत किरणकुमार श्रेष्ठले समृद्ध नेपाल सुखी नेपाली अभियानलाई सार्थकता बनाउन बैंकले सहुलियतपूर्ण कर्जा प्राथमिकताका साथ लगानी गरिरहेको बताए । बंैकको प्रदेश नम्बर १ का निमित्त प्रमुख ऋषब भट्टराईको सभापतित्वमा सम्पन्न उक्त समारोहमा मिल्काजुङ्ग गाउँपालिकाका अध्यक्ष देबीप्रसाद आचार्य, उर्लाबारी उद्योग वाणिज्य संघका अध्यक्ष प्रितम खड्गी, नेको इन्सुरेन्सका प्रमुख कार्यकारी अधिकृत विश्व तिमिला, स्थानीय राजनीतिक दलका प्रतिनीधि, उद्यमी व्यवसायी तथा सर्वसाधारणको उपस्थिति रहेको थियो । कार्यक्रममा बेदमाया अर्याल न्यौपानेलाई सहुलियतपूर्ण कृषि कर्जा र गणेश दर्जीलाई विपन्नवर्ग कर्जा समेत प्रदान गरिएको थियो ।
