विप्रेषण आप्रवाह २८ % ले बढ्यो, नेपाली युवाले ७ महिनामा पठाए ५ खर्ब
काठमाडौँ । वैदेशिक रोजगारीमा रहेका नेपाली युवाले चालू आर्थिक वर्षको सात महिनामा पाँच खर्ब १५ अर्ब ५५ करोड विप्रेषण नेपाल पठाएका छन् । विप्रेषण आप्रवाहमा २८ दशमलव पाँच प्रतिशतले वृद्धि भएको नेपाल राष्ट्र बैंकले जनाएको छ । अघिल्लो वर्षको सोही अवधिमा विप्रेषण आप्रवाह एक दशमलव सात प्रतिशतले बढेको थियो । अमेरिकी डलरमा विप्रेषण आप्रवाह १६ प्रतिशतले वृद्धि भएको छ । अघिल्लो वर्ष यस्तो आप्रवाह छ दशमलव चार प्रतिशतले बढेको थियो । समीक्षा अवधिमा खुद ट्रान्सफर आय २७.३ प्रतिशतले वृद्धि भई पाँच खर्ब ८६ अर्ब ५५ करोड पुगेको छ । अघिल्लो वर्षको सोही अवधिमा यस्तो आय तीन प्रतिशतले घटेको थियो । अन्तिम श्रम स्वीकृतिका आधारमा वैदेशिक रोजगारीमा जाने नेपालीको सङ्ख्या समीक्षा अवधिमा ३९ दशमलव दुई प्रतिशतले घटेको छ । अघिल्लो वर्षको सोही अवधिमा यस्तो सङ्ख्या चार दशमलव नौ प्रतिशतले घटेको थियो । पुनः श्रम स्वीकृतिका आधारमा वैदेशिक रोजगारीमा जाने नेपालीको सङ्ख्या समीक्षा अवधिमा चार दशमलव नौ प्रतिशतले बढेको छ । अघिल्लो वर्षको सोही अवधिमा यस्तो सङ्ख्या एक दशमलव छ प्रतिशतले घटेको थियो ।
बिदेशी लगानी तथा प्रविधि हस्तान्तरण विधेयक संशोधन, के हटाइयो, के थपियो(संसोधनका बुँदासहित)
काठमाडौं । प्रतिनिधिसभा अन्तर्गतको उद्योग, वाणिज्य, श्रम तथा उपभोक्ता हित समितिको शुक्रबारको बैठकले विदेशी लगानी तथा प्रविधि हस्तान्तरण सम्बन्धी कानूनलाई संशोधन र एकीकरण गर्न बनेको विधेयक, २०७५ माथि परेका विभिन्न संशोधन माथि दफावार छलफल सहित पारित गरेको छ । उद्योग, वाणिज्य, श्रम तथा उपभोक्ता हित समितिले ११ वटा विधेयकको दफा र ३ वटा विधेयकको अनुसूचि संशोधन गरेको छ । २०७५ को दफा ८ का उपदफा १ को उद्योगले भन्ने शव्द प्रचलित कानूनको अधिनमा रही भन्ने शव्दहरु थप गरेको छ । विधेयकको दफा १२ मा रहेको सरकार वा भन्ने शव्दहरु हटाउने, विधेयकको दफा १४ को उपदफा १ मा रहेको वाणिज्य भन्ने शव्द पछि बैंक वा पूर्वाधार विकास भन्ने वाक्यांश थप गर्ने र उपदफा २ मा रहेको वाणिज्य भन्ने शव्द हटाउने निर्णय गरेको छ । विधेयकको दफा १५ को उपदफा २ मा रहेको पन्ध्र भन्ने शव्दको सट्टामा सात भन्ने शव्द राख्ने, उपदफा ३ हटाई त्यस पछि उपदफा क्रम मिलाउने, विधेयकको दफा १७ को सट्टामा देहायको दफा १७ राख्ने, यसमा ६ अर्बसम्मको विदेशी लगानी स्वीकृत विभागले गर्ने र ६ अर्ब भन्दा माथि विदेशी लगानी स्वीकृत लगानी बोर्ड ऐन, २०६८ अन्र्तगत लगानी बोडले गर्ने निर्णय गरेको छ । विधेकको दफा १८ को उपदफा ३ गर्न सक्नेछ भन्ने शव्दहरुको सट्टा गर्नेछ भन्ने शव्द राख्ने, विधेयकको दफा १९ को उपदफा ३ मा रहेको गर्नु पर्नेछ भन्ने शव्दको सट्टमा नगरेसम्म उपदफा १ बमोजिम अभिलेख राखिने छैन भन्ने शव्दहरु थप गरिने भएको छ । विधेयकको दफा २० को उपदफा २ को खण्ड घ मा रहेको प्रतिवन्धात्मक वाक्यांशको सट्ट देहायको प्रतिवन्धात्मक वाक्यांश राख्ने । तर ट्रेडमार्कमा ५ प्रतिशत भन्दा बढी हुने छैन भन्ने बुँदा थप गर्ने निर्णय भएको छ ।
मकवानपुरमा एकीकृत बस्ती बन्दै, १६० वटा घर बनाउने प्रदेश सरकारको तयारी
हेटौँडा । ३ नम्बर प्रदेशका मुख्यमन्त्री डोरमणि पौडेलले प्रदेश सरकारले एकीकृत बस्ती निर्माण प्राथामिकतामा राखेको बताएका छन् । एकीकृत वस्ती निर्माणका लागि सरकारले प्रकृया अगाडि बढाईसकेको समेत जानकारी दिए । शुक्रबार ३ नम्बर प्रदेशको प्रदेश मामिला समितिद्वारा आयोजित कार्यक्रम कार्यान्वयन र प्रगति विषयक अन्तरकृया कार्यक्रममा समितिका सदस्यहरुको प्रश्नको जवाफ दिंदै उनले एकीकृत वस्ती प्राथामिकतामा राखेपनि जग्गा प्राप्ती सबैभन्दा ठूलो समस्या रहेको बताए । सार्वजनिक जग्गा कुनै न कुनै हिसाबले वनसँग जोडिएकोले जग्गा प्राप्तीमा समस्या भएको उनको भनाई थियो । ‘वनसंग जोडिएको जग्गा पाउन निकै सकस छ । त्यसले यो काम सोचेअनुरुप अगाडी बढेको छैन ।’ उनले मकवानपुरमा १ सय ६० वटा घर बनाउने तयारी गरिरहेको जानकारी दिनुभयो । यसैगरी दोलखा, रामेछाप र सिन्धुलीमा पनि एकीकृत वस्तीको प्रकृया अगाडि बढेको जानकारी दिनुभयो । अर्को प्रसंगमा सार्वजनिक खरिद ऐन ‘लेन्दी’ भएको बताए । उनले भने-‘हाम्रो सार्वजनिक खरिद ऐनले एउटा टेण्डर खोल्न अहिले दिन गन्नु भयो भने ९ महिना लाग्छ । कानूनले तोकेको सार्वजनिक खरिद ऐनको एउटा चरण पार गर्दा कुनैलाई २ महिना कुनैलाई ३ महिनासम्म लाग्ने उनको भनाई थियो । सार्वजनिक खरिद ऐन संशोधनको लागि संघीय सरकार पनि सकारात्मक रहेको उनले जानकारी दिए । छिटोभन्दा छिटो यसको समाधान हुनेमा मुख्यमन्त्री पौडेलले विश्वास व्यक्त गरे । कर्मचारीका अभाव अव पुर्ति हुन थालेको जानकारी दिदैं अव कामको परिणाम देखिन थालेको जानकारी पनि दिए । विभिन्न विकास निर्माणका कामहरुको टेण्डर प्रकृया भईसकेको पनि उनले जानकारी दिए । कुनै न कुनै हिसाबले प्रदेश सरकारको १३ वटै जिल्लामा काम भईरहेको जानकारी दिए ।
मानव संशाधन भेला सम्पन्न, विद्युतीय युगमा मानव संशाधनबारे चर्चा
काठमाडौँ । ग्रोथ सेलर्स प्रालिको वार्षिक मानव संशाधन भेलाको १२ औँ संस्करण विभिन्न संघसंस्था तथा पेशाकर्मीको सहभागितामा काठमाडौं स्थित सोल्टी होटेलमा फागनु ३० र चैत १ गते सम्पन्न भएको छ । उक्त कार्यक्रम विद्युतिय युगमा मानव संशाधन नारा सहित सम्पन्न भएको हो । कार्यक्रमको उद्घाटन श्रममन्त्री गोकर्ण विष्टले गरेका थिए । संस्थाको तर्फबाट ग्रोथ सेलर्सका प्रवन्ध निर्देशक मोहनराज ओझाले सहभागी तथा श्रोतव्यक्तिहरुलाई स्वागत गरेका थिए । कार्यक्रममा मुख्य वक्ताको रुपमा भारतको इकम प्रालिका वरिष्ठ उपाध्यक्ष सौरभदिप सिंहला र टिचफर नेपालका शिशिर खनाल थिए । त्यस्तै अन्य वक्ताहरुमा विशाल ढकाल, सामाजिक सुरक्षा कोषका निर्देशक शंकर नेपाल, वोधी सत्वस्वामी आनन्द अरुण, लगायतका थिए । मनोजकुमार ज्ञवाली, जयेन्द्र रिमाल, ररिश्वराम गोर्खालीले समानान्तर सत्रहरुको सहजीकरण गरेका थिए । कार्यक्रमको प्रायोजकहरुमा एक्सेस वर्ल्ड, डिएभि कलेज, ग्लोबल आइएमइ बैँक तथा आइएमइ जेनेरल इन्स्योरेन्स, आइएमइ, सिङगापुर एअरलाईन्स, डिशहोम रहेका थिए । ग्रोथ लिडरशिप एकेडेमी सल्लाह साझेदार रहेको थियो भने कार्यक्रमको व्यवस्थापन कर्पोरेट क्लबले र आयोजना ग्रोथ सेलर्सको रहेको थियो । कार्यक्रमको समापनमा ग्रोथ सेलर्सका कार्यकारी निर्देशक जयेन्द्र रिमालले धन्यवाद ज्ञापन गरेका थिए ।
दशैंमा ५ दिन, तिहारमा ३ दिने बिदा दिने सरकारको निर्णय, यस्तो छ सार्वजनिक विदाको तालिका
काठमाडौँ । सरकारले २०७६ सालका सार्वजनिक बिदा हुने दिनको कार्यतालिका सार्वजनिक गरेको छ । सरकारले राजपत्रमा सूचना प्रकाशित गर्दै २०७६ सालका सार्वजनिक बिदा सार्वजनिक गरेको हो । पर्व, महिला कर्मचारीका लागि मात्र बिदा, शिक्षण संस्थाका लागि मात्र बिदा, जात्रा बिदा, दशैँ, तिहार बिदा, दिवस बिदा, दिवस जयन्ती बिदा र सट्टा बिदा भनेर विभिन्न शीर्षकमा बिदा छुट्टयाइको छ । पर्व बिदाअन्तर्गत नववर्ष वैशाख १, शिवरात्रि फागुन ९ र फागु पूर्णिमा पहाडी तथा भित्री मधेशका ५८ जिल्लामा फागुन २६ र अन्य जिल्लामा फागुन २७ गते बिदा दिइने गृह मन्त्रालयका सचिव प्रेमकुमार राईले जानकारी दिए । त्यस्तै सम्बन्धित धर्म, सँस्कृति, भौगोलिक क्षेत्र र स्थान विशेषका आधारमा पनि विभिन्न पर्वमा बिदा दिइने छ । किराँत÷राई याख्था, सुनुवार, लिम्बू जातिका उभौली पर्व जेठ ४, गौरा पर्व भदौ ६, इद पर्वका अवसरमा समेत सरकारले बिदा दिएको छ । छठ पर्व, इस्लाम धर्मावलम्बीको पर्व बकर इद (इदुल जोहा), किराँत जातिको उधौली पर्व, यमरी पुन्ही, ज्यापू दिवस मङ्सिर २६, इसाई धर्मावलम्बीहरुको क्रिसमस डे पुस ९, तमु ल्होसार पुस १५, माघे सक्राङ्न्ति माघ १, सोनाम ल्होसार माघ ११, ग्याल्पो ल्होसार फागुन १२, सिरुवा पावनी पर्व (झापा, मोरङ, सुनसरी, सिरहा र सप्तरी), धवाथाम्बु छेउचिक पर्वका दिन त्यस्तो पर्व मनाउने जिल्लामा सार्वजनिक बिदा दिइने छ । महिला कर्मचारीका लागि भदौ १६ गते हरितालिका तीज र असोज ५ गते जितिया पर्व मनाउने जिल्लामा सार्वजनिक बिदा दिइएको छ । यसैगरी शिक्षण संस्थाका लागि वसन्तपञ्चमी माघ १६ गतेका दिन बिदा दिइने छ । जात्रा बिदामा काठमाडौं उपत्यकाका लागि मात्र चार जात्रामा सार्वजनिक बिदा दिइने भएको छ । गाइजात्रा साउन ३१, इन्द्रजात्रा भदौ २७, मछिन्द्रनाथको भोटो देखाउने जात्रा (सो जात्रा देखाउने दिन) र घोडे जात्रा चैत ११ गते सार्वजनिक बिदा दिइने छ । यस्तै सरकारले दशै बिदा पाँच दिन दिने भएको छ ।फूलपातीदेखि एकादशीसम्म (असोज १८–२२) सम्म दशैँ बिदा हुनेछ । लक्ष्मीपूजादेखि भाईटीकासम्म तीन दिन तिहार बिदा हुनेछ । यसैगरी दिवस बिदाअन्तर्गत विश्व मजदुर दिवस (वैशाख १८), संविधान दिवस (असोज ३), अन्तर्राष्ट्रिय महिला दिवस (फागुन २५) र अन्तर्राष्ट्रिय अपाङ्गता दिवस (मङ्सिर १७) अपाङ्गता भएका सम्पूर्ण कर्मचारीलाई सार्वजनिक बिदा दिइने भएको छ । जन्मजयन्ती बिदामा बुद्ध जयन्ती (जेठ ४), सम्बन्धित धर्मावलम्बीका लागि गुरुनानक जयन्ती (कात्तिक २६), फाल्गुनन्द जयन्ती (कात्तिक २५) बिदा दिइने छ । सरकारले केही दिवसलाई राष्ट्रिय रुपमा मनाइए पनि कार्यालय भने खुल्ने जनाएको छ । गणतन्त्र दिवस (जेठ १५), निजमती दिवस (भदौ २२), राष्ट्रिय एकता दिवस (पुस २७), राष्ट्रिय शहीद दिवस (माघ १६), राष्ट्रिय प्रजातन्त्र दिवस (फागुन ७), जातीय भेदभाव तथा छूवाछूत उत्नमूलन राष्ट्रिय दिवस (जेठ २१) लाई राष्ट्रिय दिवसका रुपमा मनाइए पनि कार्यालय भने खुल्ला रहनेछन् । यसैगरी विदेशस्थित नेपाली नियोगहरुले सम्बन्धित मुलुकको सार्वजनिक बिदालाई समेत दृष्टिगत गरी बढीमा १८ दिनसम्म सार्वजनिब बिदा आफैले व्यवस्थापन र समायोजन गर्न सक्नेछन् । अस्पताल, रोपवे, टेलिफोन, प्रहरी, अध्यागमन, थाना, चौकी, फायर बिग्रेड, टक्सार, रेडियो नेपाल, नेपाल टेलिभिजन, मुद्रण विभाग, हुलाक आदी जस्ता निरन्तर र आकस्मिक सेवा प्रदान गर्ने मन्त्रालय विभाग तथा कार्यलयहरुले सार्वजनिक बिदाका दिनमा समेत कामकाज गर्नुपर्ने हुँदा त्यस्ता कार्यालयमा दैनिक काम नरोकिने गरी सार्वजनिक बिदाका दिन काम गरेबापत प्रचलित कानूनको रित पु¥याइ सट्ट बिदा बस्न सक्नेछन् । वैशाख १ देखि कात्तिक १५ गतेसम्म र माघ १६ देखि चैत मसान्तसम्म कार्यालय समय बिहान १० देखि अपराह्न ५ बजेसम्म र कात्तिक १६ देखि माघ १५ गतेसम्म बिहान १० देखि अपराह्न ४ बजेसम्म तथा शुक्रबार बिहान १० देखि अपराह्न ३ बजेसम्म कार्यालय खुल्नेछन् । रासस
भूकम्प प्रभावित जिल्लाहरुमा चैत १५ बाट छुट सर्वेक्षण शुरू, ५५० इञ्जिनियरहरु परिचालन गरिने
काठमाडौं । लाभग्राहीमा नपरेको भनी गुनासो दर्ता गराएका ३२ वटै जिल्लाका गुनासोकर्ताको छुट तथा पुनः जाँच सर्वेक्षण हुने भएको छ । यही चैत १५ देखि सम्पूर्ण भूकम्प प्रभावित जिल्लामा प्राधिकरणबाट हरेक स्थानीय तहमा परिचालित तोकिएका इञ्जिनियरमार्फत् स्थलगत लगत संकलन गरिन लागिएको हो । निजी आवास पुनर्निर्माण लाभग्राहीमा सूचीकृत हुन पाउँ भनी गुनासो दर्ता गराई गुनासो सम्बोधनअन्तर्गत पहिलेको मुख्य सर्वेक्षणमा छुट भएका गुनासोकर्ताहरु, सर्वेक्षणबाट थप यकिन गर्नु पर्ने भनी तोकिएका गुनासोकर्ताहरुको हकमा सर्वेक्षण हुने राष्ट्रिय पुनर्निर्माण प्राधिकरणका प्रवक्ता पिताम्बर घिमिरले जानकारी दिए । घिमिरेका अनुसार छुट तथा पुनःजाँच सर्वेक्षण २०७४ मा लगत संकलन नभएका गुनासोकर्ताहरु र स्थानीय तहमा तोकिएको समयसीमाभित्र नयाँ दर्ता गरिएका गुनासोहरुको पनि सर्वेक्षण गर्न लागिएको हो । प्राधिकरणका सहप्रवक्ता एवं यस सर्वेक्षणको समन्वय गरिरहेका प्राधिकरणका उपसचिव मनोहर घिमिरले यही चैत्र १५ बाट सर्वेक्षण सुरु हुने र यसमा करिब ५ सय ५० इञ्जिनियरहरु परिचालन गरिने जानकारी दिए । ‘कुनै वास्तविक पीडित नछुटुन् भनेर स्थानीय जनप्रतिनिधिहरुको सिफारिस र अनुगमनमा सर्वेक्षण गर्ने व्यवस्था मिलाइएको छ ।’ प्राधिकरणले स्थानीय तहमा परिचालित तोकिएका इञ्जिनियरमार्फत् तोकिएको समयमा आआफ्नो लगत संकलन गराउन सबै गुनासोकर्ताहरुलाई अनुरोध गरेको छ । त्यसैगरी, सम्पूर्ण स्थानीय तहका पदाधिकारीहरुलाई वास्तविक पीडितहरुको यथार्थपरक लगत संकलन कार्यमा सहयोग गरिदिन पनि प्राधिकरणले आग्रह गरेको छ । प्राधिकरणले यस सर्वेक्षण सम्बन्धमा थप जानकारी चाहिएमा सम्बन्धित जिल्लाका जिल्ला आयोजना कार्यान्वयन इकाईमामा सम्पर्क गर्न वा पैसा नलाग्ने टेलिफोन नम्बरहरु १६६०–०१–७२००० र ९८०१५–७२१११ मा फोन गर्न सम्बन्धितलाई अनुरोध गरेको छ । छुट तथा पुनः जाँच सर्वेक्षणका लागि भूकम्पप्रभावित ३२ वटै जिल्लाका फोकल इञ्जिनियर तथा डिस्ट्रिक्ट सर्पोट इञ्जिनियरहरुका लागि ‘प्रशिक्षक प्रशिक्षण’ कार्यक्रम सम्पन्न भएको छ । प्रशिक्षणबाट प्रशिक्षित इञ्जिनियरहरुले आ–आफ्नो जिल्लामा गएर सर्वेक्षणमा खटिने इञ्जिनियरलाई तालिम दिनेछन् । २०७६ बैशाख मसान्तसम्ममा सर्वेक्षण सक्ने कार्यक्रम रहेको छ ।
हेटौँडामा २० दिने जुत्ता चप्पल मेला, छुटै छुटको वहार
हेटौंडा । ३ नम्बर प्रदेशको राजधानी हेटौँडामा २० दिने चुत्ता चप्पल मेला सुरु भएको छ । ‘स्वदेशी वस्तुको प्रवद्र्धन हाम्रो अभियान’ भन्ने मुल नारासहित जुत्ता चप्पल व्यापार मेला–२०७५ सुरु भएको हो । मकवानपुर उद्योग वाणिज्य संघ र जुत्ता चप्पल उद्योग संघले मेला आयोजना गरेका हुन् । फागुन २९ गते प्रदेश नम्बर ३ का उद्योग, वन, वातावरण तथा पर्यटन मन्त्री अरुण नेपालले उद्घाटन गरेका थिए । हेटौंडा–२ स्थित पल्पसा हलमा जारी मेलामा मकवानपुरबासीको उत्साहप्रद सहभागीता रहेको मेलाका संयोजक होमनाथ उपाध्यायले जानकारी बताए । मेलामा देशभरका ७ वटा जुत्ता चप्पल उत्पादन गर्ने कम्पनीका ६० वटा र अन्य स्थानीय व्यवसायी गरि करिब ८५ वटा स्टल रहेका छन। छुट र अफरहरु मेलामा १५ देखि ६० प्रतिशतसम्म जुत्ता चप्पल खरिदमा छुट उपलब्ध रहेको छ । निःशुल्क प्रवेश पाइने मेलामा बालबालिकादेखि युवा पुस्ता र वृद्धवृद्धाहरुलाई समेत उपयुक्त हुने जुत्ता चप्पलहरु राखिएका छन् । ३ नम्बर प्रदेशको राजधानी समेत रहेको औद्योगीक नगरी हेटौँडामा नेपाली जुत्ता चप्पलहरुका बजार प्रवद्र्धनका लागि मेलाले महत्वपूर्ण भूमिका खेल्ने विश्वास मेला संयोजक उपाध्यायले व्यक्त गरे । यस अघि उनीहरुले विराटनगरमा नेपाली जुत्ता चप्पलको वृहत मेला सफल रुपमा सम्पन्न गरिसकेका थिए । के के पाइन्छन मेलामा ? मेलामा नयाँ डिजाइनका जुत्ता, चप्पल तथा छालाजन्य वस्तुहरु अवलोकन तथा खरिद गर्न पाइन्छ । नयाँ शैक्षिक सत्र सुरु हुन लागेकाले युनिफर्म, जुत्ता तथा शैक्षिक सामग्री प्रदर्शनीमा राखिएका छन् । मेलामा खरिद गरिएका जुत्ता चप्पलहरुम ६ महिनाको वारेण्टी सुविधा समेत उपलब्ध् रहेको छ । मेलामा बिएफ डियर हिल सुज, कोशेली, हाईलाईफ, क्रस रोड, रोयल सुज, रन सुज र सु ल्याण्डका जुत्ता चप्पलहरु समावेश छन् ।
ब्रिटिश काउन्सिलको नेपालमा ६० वर्ष पुरा
काठमाडौं। सन् १९५९ बाट नेपालमासँग सहकार्य सुरु गरेको ब्रिटिश काउन्सिलले नेपालमा आफ्नो ६० बर्ष पुरा गरेको छ। काउन्सिलले शुक्रबार लैनचौरी स्थित आफ्नै कार्यलयमा कार्यक्रम गरेर अबको १ बर्ष कार्यक्रम गरेर सम्बन्धको ६० बर्षलाई मनाउने जनाएको छ। कार्यक्रममा काउन्सिलले आफुले ६० बर्षमा नेपालमा सम्बन्धको सुरुवातसँगै आफुले गरेका कामहरुको विवरण प्र्स्तुत गरेको थियो। ब्रिटिश काउन्सिल नेपालको लागि परियोजना निर्देशक रहेका जोभान इलिकले नेपालसँग बेलायतले अझ सुमधुर सम्बन्धको अपेक्षा राखेको बताए। १९५९ बाट नेपालमा आफ्नो काम शुरु गरेको ब्रिटिस काउन्सिलले काठमाडौंको लाईब्रेरी बनाएर आफ्नो काम सुरु गरेको थियो। काउन्सिलले नेपालमा शिक्षा र संस्क्रिती क्षेत्रमा योगदान पुर्याउँदै आएको छ।
