युनाइटेड सिमेन्ट्सको विशेष ग्राहक योजना, कार जित्ने मौका
काठमाडौँ । नयाँ वर्षको उपलक्ष्यमा युनाइटेड सिमेन्ट्सले आफ्ना ग्राहकहरुको लागि ल्याएको छ, ‘यूनाइटेड सिमेन्ट्सको उपहार सररर….. कार’ नामक योजना ल्याएको छ । यो योजना अन्तर्गत २५ बोरा यूनाइटेड सिमेन्ट्सको खरिदमा ग्राहकले १ वटा स्क्र्याच कुपन प्राप्त गर्न सक्नेछन् । कुपन स्क्र्याच गरेर ग्राहकले कम्तीमा पनि ५ ग्राम चाँदी प्राप्त गर्नुका साथै अन्य १० देखि ५० ग्राम चाँदी तथा १ ग्रामदेखि १ तोला सुन जित्ने मौका पाउने छन् । कुपन स्क्र्याच गर्दा ५ ग्राम चाँदी परेमा खरिद गरेको पसलबाट तुरुन्तै प्राप्त गर्न सकिने प्रावधान रहेको छ । यसका साथै योजनाको अन्त्यमा हुने बम्पर लक्की ड्रबाट ५ जोडीले दुबई भ्रमण र १ जना भाग्यशाली विजेताले हुण्डाई स्यान्ट्रो कारपनि जित्न सक्नेछन् । उच्च गुणस्तरको साथै बेला बेलामा विभिन्न उत्साहवद्र्घक योजना ग्राहक माझ ल्याउँदै आएको यूनाइटेड सिमेन्ट्सले यो बम्पर पुरस्कार योजना नेपाली सिमेन्ट जगत मै पहिलो पटक सबै भन्दा ठूलो मूल्यको बम्पर उपहार योजना रहेको दाबी गरेको छ । ललितपुरको लेले स्थित आफ्नै चुनढुङ्गा खानीबाट चुनढुङ्गा उत्खनन गरि सिमेन्ट तथा क्लिङ्गकर उत्पादन गर्दै आएको यूनाइटेड सिमेन्ट्सको फ्याक्ट्री धादिङ्गको नौबिसेमा रहेको छ ।
विश्वको पहिलो भिडियो रिभ्यु क्लिप एप सार्वजनिक
काठमाडौं । डिजिटल टिच सोलुसन प्रालिले रिभ्यु क्लिप ‘एप’ सार्वजनिक गरेको छ । यो विश्वको पहिलो भिडियो रिभ्यु पोर्टल भएको कम्पनीले बताएको छ । यो एपमा ग्राहकहरूको बोलि जस्ताको तस्तै गरेका रिभ्यु क्लिपमा आउने छ । ग्राहकहरूले उनीहरूको साँचो र अनुभव भिडियो क्लिप मार्फत विश्वभरका कम्पनीहरू र ब्रान्डहरूमा साझेदारी गर्न सकने छ । यो एपबाट अन्वेषण र आफ्नो अनुभव सियर गर्न सकिने छ । रिभ्यु क्लिपका सिइयो कन्न शकरले यो एपले विश्वभरका घटना भिडियो मार्फत हेर्न सकिने बताए । यसले नेपालमा पर्यटकलाई आकर्षमा सहयोग पुग्ने शकरले बताए ।
न्यू खिम्ती-बाह्रबिसे प्रसारण लाइनः चिनियाँले काम नगरेपछि भारतीय ठेकेदार छनोट
काठमाडौँ । नेपाल विद्युत् प्राधिकरणले तामाकोशी–काठमाडौँ ४००/२२० केभी प्रसारण लाइन आयोजनाअन्तर्गतको पहिलो खण्ड निर्माणका लागि ठेकेदार छनोट गरेको छ । प्राधिकरणले अन्तर्राष्ट्रिय प्रतिष्पर्धाबाट तामाकोशी–काठमाडौँ प्रसारण लाइनअन्तर्गतको न्यू खिम्ती–बाह्रबिसे खण्ड निर्माणका लागि भारतीय कम्पनी केइसी इन्टरनेशनल लिमिटेडलाई छनोट गरेको हो । चिनियाँ ठेकेदार कम्पनी ग्वाङ्सी ट्रान्समिसन एण्ड सबस्टेसन कन्ट्रक्सन तथा सेन्जेन क्लाउ इलेक्ट्रोनिक्सले काम नगरेपछि प्राधिकरणले ठेक्का तोडी नयाँ ठेक्कामार्फत् ठेकेदार कम्पनी छनोट गरेको हो । प्राधिकरणका कार्यकारी निर्देशक कुलमान घिसिङका अनुसार काम गर्न पटक–पटक दिएको निर्देशक चिनियाँ कम्पनीले नमानेपछि सम्झौताको अवधि बाँकी नै रहँदा ठेक्का तोडिएको थियो । कम्पनीले करीब ४४ किलोमिटर प्रसारण लाइनको डिजाइन, उपकरण आपूर्ति, जडान र सञ्चालनका लागि एक करोड ७३ लाख १७ हजार अमेरिकी डलर र रु ७१ करोड ७७ लाख ९७ हजार (करबाहेक) ठेक्का पाएको प्राधिकरणले जनाएको छ । चिनियाँ ठेकेदार कम्पनी ग्वाङ्सी ट्रान्समिसन एण्ड सबस्टेसन कन्ट्रक्सन तथा सेन्जेन क्लाउ इलेक्ट्रोनिक्सले काम नगरेपछि प्राधिकरणले ठेक्का तोडी नयाँ ठेक्का गरी ठेकेदार कम्पनी छनोट गरेको हो । ठेकेदार कम्पनी केइसी इन्टरनेशनलाई २८ दिनभित्र कार्यसम्पादन जमानतसहित ठेक्का सम्झौता गर्न आउन बुधबार पत्र दिइएको आयोजना प्रमुख नवराज ओझाले जानकारी दिए । “असारको अन्तिमबाट ठेकेदारलाई निर्माण स्थलमा परिचालन गर्ने गरी काम भइरहेको छ”, उनले भने, “ठेक्का सम्झौता कार्यान्वयनमा आएको ८२० दिनमा ठेकेदारले प्रसारण लाइन निर्माणको काम सक्नु पर्नेछ ।” प्राधिकरणले चिनियाँ कम्पनीसँग ठेक्का तोडी ठेक्का रकमको १० प्रतिशत अर्थात् १४ लाख ५४ हजार अमेरिकी डलर र रु छ करोड १६ लाख ७४ हजार कार्यसम्पादन जमानत जफत गरेको थियो । यसैगरी, ठेकेदार कम्पनीले अग्रिम भुक्तानीका लागि राखेको १४ लाख ५४ हजार अमेरिकी डलर र रु छ करोड १६ लाख ७४ हजार बैंक जमानत पनि जफत गरिएको थियो । कम्पनीले ठेक्का सम्झौताको ७४ प्रतिशत समय बित्दासमेत निर्माणका प्रारम्भिक काम नै नगरेपछि सम्झौता अवधि बाँकी नै रहेको अवस्थामा ठेक्का तोडिएको थियो । आयोजना नेपाल सरकारको लगानी र एशियाली विकास बैंक तथा नर्वे सरकारको सहुलियतपूर्ण ऋणमा निर्माण गर्न लागिएको हो । खिम्ती र तामाकोशी नदी क्षेत्रमा निर्माण हुने जलविद्युत् आयोजनाको विद्युत् काठमाडौँ उपत्यकामा ल्याउन तामाकोशी–काठमाडौँ उच्च क्षमताको प्रसारण लाइन बनाउन गर्न लागिएको हो । रामेछापको खिम्तीमा बन्न लागेको सवस्टेसनबाट सिन्धुपाल्चोकको बाह्रबिसेसम्मको ४००/२२० केभी डबल सर्किट प्रसारण लाइनको लम्बाइ ४४ किलोमिटर छ । बाह्रबिसे–काठमाडौँ खण्डको ठेक्का भने लार्सन एण्ड टर्वोले पाएको छ । रासस
फोरजीको बजार २०२५ सम्म, फाइभजीको तयारी गर्दै टेलिकम
काठमाडौं । नेपालमा फोरजीको बजार सन् २०२५ सम्म रहने नेपाल टेलिकमको प्रबन्ध निर्देशक डिल्लिराम अधिकारीले बताएका छन् । हाल देशभर विस्तार भैरहेको फोरजीले ६ वर्षसम्मको इन्टरनेटको माग धान्ने निर्देशक अधिकारीले बताएका हुन् । ‘विश्व बजारमा ५जीको प्रयास भैरहेको छ अहिले फाइभजीको लागी नेपाली बजार तयार भैसकेको छैन, निर्देशक अधिकारीले भने विश्व बजारमा ४जी निकै लोकप्रिय छ तोकिएकै मितीमा विस्तार कार्य सम्पन्न हुन्छ ।’ फोर जी विस्तारको लागि पुर्वाधार खरिदको काम अन्तिम चरणमा पुगेको उनले जानकारी दिए । टेलिकमले एडीएसएल विस्थापित गर्दै एफटीटीएच विस्तारमा सुरु गरेको छ । देशको विभिन्न २० स्थानबाट एफटीटीएच इन्टरनेटको विस्तार सुरु गरेको टेलिकमकी प्रवक्ता प्रतिभा वैद्यले बताइन । एडीएसएल इन्टरनेट सेवा निकै असफल भएपछि टेलिकमले एफटीटीएच सेवा विस्तार गरेको हो । सो इन्टरनेटबाट टेलिभिजन समेत हेर्न सकिन्छ ।
वित्तीय साक्षरता विस्तार गर्न कैलाश र एनविआईबीच सम्झौता
काठमाडौँ । कैलाश विकास बैंक र नेशनल बैंकिङ ईन्स्टिच्यूट(एनविआइ) बीच वित्तीय साक्षरता कार्यक्रमलाई प्रभावकारी ढङ्गले दु्रत गतिमा विस्तार गर्नको लागि बैशाख ३ गते सम्झौता पत्रमा हस्ताक्षर भएको छ । सम्झौता बैंकका कर्मचारीहरुलाई बिशिष्टिकृत बैंकिङ्ग प्रमाणीकरण जानवी कोर्स प्रदान गर्ने विषयमा पनि सहमति भएको छ । उक्त सम्झौतामा एनविआइ को तर्फबाट प्रमुख कार्यकारी अधिकृत संजिब सुब्बा र कैलाश विकास बैंकको तर्फबाट प्रमुख कार्यकारी अधिकारी अमृत चरण श्रेष्ठले हस्ताक्षर गरे ।
खानेपानी मन्त्री भन्छिन्ः उपत्यकाको खानेपानी समस्या हल गर्न योजना बनाएका छौं
काठमाडौं । खानेपानी मन्त्री बिना मगरले काठमाडौं उपत्यकामा खानेपानीको समस्या हल गर्न योजनाबद्ध ढंगले लागिरहेको बताएकी छिन् । काठमाडौं उपत्यका खानेपानी व्यवस्थापन बोर्ड (भ्याली बोर्ड) को १४ औं वार्षिकोत्सव समारोहलाई उद्घाटन गर्दै खानेपानी मन्त्री मगरले उपत्यकामा खानेपानीको आपूर्ति व्यवस्था सहज बनाउन गम्भीर भएर लागेको बताएकी हुन । कार्यक्रमलाई सम्बोधन गर्दै मन्त्री मगरले भनिन, ‘मेलम्चीको समस्या धेरै दिन रहँदैन । काठमाडौंमा मेलम्चीको पानी ल्याउने मात्रै ठूलो कुरा होइन । यसको वितरण र व्यवस्थापन गर्नुपर्ने सबैभन्दा ठूलो चुनौति छ, यसका लागि मन्त्रालय अन्तर्गतको बोर्ड, केयुकेएल र आयोजना कार्यान्वयन निर्देशनालय (पिआईडी) लगायतका निकायहरु लागिरहेका छन् ।’ जनताको अपेक्षा धेरै भएकाले सबै जनतालाई प्रशोधन सहित खानेपानीको पहुँच पु(याउन मन्त्रालय योजनाबद्ध ढंगले अघि बढिरहेको उनले बताइन । भ्याली बोर्डले गरेको काम प्रति प्रशंसा गर्दै मन्त्री मगरले बोर्डलाई अझ सशक्त ढंगले अघि बढ्न निर्देशन समेत दिइन । कार्यक्रममा खानेपानी मन्त्रालयका सचिव दीपेन्द्रनाथ शर्माले सन् २०३० सम्ममा प्रशोधन सहितको उच्च र मध्यमस्तरको खानेपानीको सेवा ९० प्रतिशत पु(याउन सरकार लागिरहेको जानकारी दिए । सचिव शर्माले भने, ‘ उच्च र मध्यमस्तरको खानेपानीको सेवा २० प्रतिशतले मात्रै पाईरहेका छन् । दीगो विकासका लक्ष्यहरु पुरा गर्नुपर्ने दायित्व हामीसँग छ । ९० प्रतिशत जनतालाई प्रशोधन सहित खानेपानीको पहुँच पु(याउन खर्बौं रुपैयाँ लगानी गर्नुपर्ने आवश्यकता छ । हामी योजना बनाएर अघि बढिरहेका छौं ।’ भ्याली बोर्डका अध्यक्ष एवं मन्त्रालयका सहसचिव तेजराज भट्टले काठमाडौं उपत्यकामा खानेपानी तथा ढल व्यवस्थापनका लागि गुरु योजना बनाईरहेको जानकारी दिए । उपत्यका भित्र रहेका पोखरी, ढुंगेधारा र तालतलैयाहरुको संरक्षण र सम्बद्र्धनका लागि बोर्ड योजना बनाएर अघि बढिरहेको सहसचिव भट्टले बताए ।
विद्युत प्राधिकरण १४ अर्ब बक्यौता उठाउन तात्दै, उद्योगीलाई अदालतको भर
काठमाडौं । विद्युत प्राधिकरणले १४ अर्ब बक्यौता उठाउन ताकेता शुरु गरेको छ । बक्यौता रकम असुली गर्न प्राधिकरणले लिखित र मौखिक रुपमा ताकेता शुरु गरेको हो । प्राधिकरणले विभिन्न २० क्षेत्रका व्यक्ति, व्यवसायी, कम्पनी, सरकारी तथा गैरसरकारी संघसस्थाबाट १३ अर्ब ९९ करोड २३ लाख १३ हजार रुपैयाँ महसुल उठाउन बाँकी रहेको छ । प्राधिकरणको तथ्याङ्क अनुसार घरायसी प्रयोजनको ४ अर्ब ६७ करोड ३१ लाख ५५ हजार, अन्य प्रयोजनको ३ करोड १९ लाख ९२ हजार, व्यापारिक प्रयोजनको ४१ करोड ६९ लाख ८४ हजार, गैरव्यवयिबाट २७ करोड ३४ लाख १२ हजार, मनोरञ्जनबाट २२ लाख ९५ हजार, औद्योगिक क्षेत्रबाट २ अर्ब ६३ करोड ३८ लाख, सडक बत्तिबाट ४ अर्ब ७६ करोड ६२ लाख २ हजार, सिँचाइबाट १८ करोड ७६ लाख, १६ हजार रहेको छ । यसैगरी, खानेपानीबाट ७ करोड ९६ लाख १६ हजार, ट्रान्सपोटेशनबाट १७ लाख ४१ हजार, मन्दिरबाट १६ करोड ५ लाख ७६ हजार, सहकारीबाट २ करोड २९ लाख ७२ हजार, टेम्पोररी सप्लाईबाट १ करोड ३९ लाख ६४ हजार, आन्तरिक खपतबाट ९३ लाख ७८ हजार, विद्युत चोरीबाट १७ लाख ८० हजार, नेपाल बाहिरबाट १ करोड ४९ लाख ३ हजार, लाइन कटौती गरिएकोबाट ५० करोड १२ लाख ५९ हजार, सामुदायिकबाट १० करोड ९२ लाख १२ हजार र अनबिल्ड खपतबाट ८ करोड, ६९ लाख, ४४ हजार रुपैंया बक्यौता उठ्न बाँकी रहेको छ । कुलमानको चिन्ता बक्यौता रकम बढ्न थालेपछि प्राधिकरणका कार्यकारी निर्देशक कुलमान घिसिङले चिन्ता व्यक्त गरेका छन् । व्यवसायी तथा उद्योगीहरुबाट उठ्नु पर्ने रकममा झमेला सृजना भएपछि घिसिङको चिन्ता चुलिएको हो । विगतमा लोडसेडिङ हुदाँ डेडिकेटेड लाइनबाट विद्युत उपयोग गरी महसुल नतिर्ने उद्योगहरु अहिले धमाधम अदालत जान थालेका छन् । डेडिकेटेड लाइनबाट विद्युत प्रयोग गर्ने, तर महशुल नतिर्नेहरु तत्कालीन समयमा लोडसेडिङका बेला विद्युत प्राधिकरणले उद्योगी व्यवसायीहरुलाई डेडिकेटेड लाइनबाट विद्युत उपलब्ध गराएको थियो । तर, त्यतिबेला विद्युत प्रयोग गरे बापत महसुल नतिर्नेहरुमा जगदम्बा स्टिल, घोराही सिमेन्ट, अर्घाखाँची सिमेन्ट, हामा आइरन, मारुती सिमेन्ट, अशोक स्टिल, सम्राट सिमेन्ट, सूर्य नेपाल, हुलास स्टिल, एभरेष्ट पेपर मिलस, रोल्पा सिमेन्ट, सानापुर सिमेन्ट आदी रहेका छन् । यी उद्योगहरुले अर्बौ रकम बराबरको महसुल तिरेका छैनन्, हाल प्रयोग गरिरहेको महशुल भने ती कम्पनीहरुले तिरिरहेको प्राधिकरणका प्रवक्ता प्रवल अधिकारीले जानकारी दिए । उद्योगीलाई अदालतको भर विगतको महसुल रकमबारे उद्योगी र व्यवसायीबीच विवाद बढेपछि उद्योगीले उच्च अदालत जनकपुरमा मुद्दा दायर गरेका थिए । मुद्दामा अदालतले बक्यौता रकम नउठाउन प्राधिकरणलाई अन्तरिम आदेश दिएको छ । सोही प्रक्रियालाई अनुसरण गर्दै उद्योगीहरु धमाधम अदालत धाउन थालेका छन् । यता, प्राधिकरणले भने उच्च अदालतको अन्तरिम आदेश विरुद्ध सर्वोच्च अदालतमा मुद्दा दायार गरेको छ । २ महिना अघि दायर गरिएको मुद्दा हाल विचाराधीन अवस्थामा रहेको छ । अब व्यवसायीसँग डेडिकेटेड लाइन प्रयोग गरे बापतको बक्यौता उठाउने/नउठाउने निर्णय सर्वोच्चको आदेशबाट हुनेछ । हाल प्राधिकरणसँग ३ महिनासम्म महशुल नतिरे लाइन काट्न सक्ने अधिकार रहेको छ । महशुल निर्धारण आयोग खारेज भएको र ट्यारिफ आयोग बन्ने क्रममा रहेकोले बक्यौता रकम बारे अन्यौलता बढ्दै गएको छ । विद्युत वितरण बिनियमावली २०६९ को दफा ५, उपदफा २ अन्तरगत डेडिकेटेड विद्युत प्रयोग गरे बापत महशुल उठाउने सम्बन्धी व्यवस्था गरिएको छ । सोही दफाको उपदफा ५ मा डेडिकेटेड लाइन प्रयोग गर्नका लागि निवेदन दिएको हुनु पर्ने उल्लेछ, तर तत्कालीन समयमा उद्योगीहरुले निवेदन नशै नदिई विद्युत प्रयोग गरेका थिए । प्राधिकरणको सोही कमजोरीलाई समातेर उद्योगीहरु अदालत गएपछि विवाद बढेको हो ।
के बजार ओरालो लाग्ने दिन सकिएकै हो त ? बिहीबार पनि १५ अंकले बढ्यो नेप्से
काठमाडौं । नयाँ वर्ष शुरु भएयता सेयर बजारले नयाँ गति लिएको छ । गत वर्षको अन्तिम दिन अर्थात चैत २८ गते ११८४.०१ अंकमा रहेको नेप्से एकसातामै निरन्तर बढेर १२३२.२६ अंकमा पुगेको छ । वैशाख २ गते सोमबारदेखि ५ गते बिहीबारसम्म कारोबार भएको बजारमा नेप्से ४८.२२ अंकले बढेको छ । गत सोमबार नेप्से ११८३ अंकदेखि कारोबार शुरु भएको थियो । साताको अन्तिम कारोबार बिहीबारसम्म नेप्से परिसूचक निरन्तर बढेर हाल १२३२.२६ अंकमा आईपुगेको छ । पछिल्लो समय नेप्से परिसूचक सँगै कारोबार रकममा पनि वृद्धि भएको छ । बिहीबार कुल १६५ कम्पनीको ७५ करोड १२ लाख रुपैयाँ बराबरको सेयर कारोबार भएको छ । त्यस्तै, वाणिज्य बैंकको कारोबारमा पनि निरन्तर वृद्धि हुँदै गएको छ । बिहीबार सबैभन्दा बढी कुमारी बैंकको ८ करोड ५८ लाख रुपैयाँ बराबरको सेयर किनबेच भएको छ । सेयर बजारमा अधिकांश कम्पनीको सेयर मूल्य सस्तिदैँ गएपछि लगानीकर्ताहरु कम्पनीहरुको सेयरमा आकर्षित देखिएका हुन् । साथै, बजारमा तरलताको समस्या कम हुँदै गएको र बैंक ब्याजदर घटिरहेकोले सेयर बजारमा उछाल आएको हो । त्यस्तै, पछिल्लो समय बैंक तथा वित्तीय संस्थाको कमाइ र कम्पनीहरुको प्रतिसेयर आम्दानी बढ्दै गएकाले नेप्सेमा थप सुधार हुने सेयर विज्ञहरु बताउँछन् ।
