आईआईएमएस कलेजद्वारा दशैँ कार्निभल तथा नेपाल फुड फेस्टिभलको आयोजना
काठमाडौँ । आईआईएमएस कलेजले दशैँ कार्निभल तथा नेपाल फुड फेस्टिभलको आयोजना गरेको छ । शनिबार काठमाडौंको भृकुटीमण्डपमा मेलाको आयोजना गरेको हो । नेपाली टिपिकल खाना र संस्कृतिको प्रवद्र्धन गर्न मेलाको आयोजा गरिएको आईआईएमएस कलेजका सीर्इओ सविन्द्र महर्जनले जानकारी दिए । फेस्टिभलमा सातवटै प्रदेशका खानाका परिकारलाई मेलामा सहभागी गराइएको थियो । सुदूरपश्चिमको दुप्का, डोटेली सेकुवा र मास पुरी, कर्णालीको मार्सी भात, हिमालको टि–मोम, तराईको घोंगी, पूर्वको एङुबेन, नेवारी खाना, एमरी लगायतका परिकार मेलामा राखिएको थियो । फेस्टिभलमा नेपाली संस्कृति झल्काउने दुर्गा, कुमारी, घिमे, लाखे, मारुनी, कौडा, हुडकेली नाच प्रस्तुत गरिएको सिइओ सविन्द्र महर्जनले जानकारी दिए । भिजिट नेपाल २०२० लाई प्रोमोट गर्ने उद्देश्यले कार्यक्रमको आयोजना गरिएको हो । कलेजले प्रत्येक वर्ष फेस्टिभको आयोजना गर्दै आएको छ ।
नेपालमा उत्तर कोरियाको लगानी माथि प्रतिबन्ध, उद्योग विभागले काट्यो पत्र
काठमाडौं । सरकारले अमेरिकाको दबाबमा उत्तर कोरियाको लगानी माथि प्रतिवन्ध लगाएको छ । नेपाल सरकारले उत्तर कोरियाको लगानीलाई प्रतिबन्ध गर्दै सञ्चालनमा रहेको उद्योग व्यापारलाई फिर्ता लान पत्र काटेको हो । नेपाल सरकारले उत्तर कोरियाको लगानीमा सञ्चालन भइरहेको व्यापार र व्यावसायलाई एक महिना भित्र बन्द गरेर लगानी फिर्ता लैजान पत्र काटेको छ । उद्योग विभागका निर्देशक प्रेम लुइटेलले उत्तर कोरियाको लगानी फिर्ता लैजान र अब लगानी नगर्न पत्र काटेको बताए । अमेरिकाले यूएनको सदस्य भएका राष्ट्रहरुलाई उत्तर कोरियाको लगानी नलिन र भएको लगानी पनि फिर्ता गराउन पत्र कटेको थियो । त्यसै अनुरुप विभागले उत्तर कोरियालाई लगानी प्रतिवन्ध र भएको लगानी फिर्ता लान पत्र काटेको निर्देशक लुईँटेलले बताए । युएनले नेपालको परराष्ट्रलाई पत्र काटेको थियो । परराष्ट्रले उद्योग मन्त्रालयलाई र उद्योग मन्त्रालय मार्फत उद्योग विभागमा पत्र आएको बताए । हामीले उत्तर कोरियाको लगानी रहेको उद्योग लगायत सबै ठाउँमा लगानी फिर्ता गर्न पत्र काटेका छौ । उनले भने–अब उत्तर कोरियाको कुनै लगानी स्वीकृत नहुने र पुराना लगानी पनि फिर्ता लैजाने बताए । उत्तर कोरियाली लागि व्यवसायी प्रयोजनका लागि भिसा थप हुने छाडिसकेको छ । भ्रमण भिसामा भने उत्तर कोरियाली नागरिक नेपाल आउन पाउने छन् । उत्तर कोरियाले आणविक हातहतियार र क्षेप्यास्त्र प्रक्षेपण गर्न थालेपछि संयुक्त राष्ट्र संघ सुरक्षा परिषद्ले सदस्य राष्ट्रहरुलाई उत्तर कोरियासँग आर्थिक कारोबार नगर्न र काममा लगाउन समेत आग्रह गरेको थियो ।
पर्यटकको पर्खाइमा बौडेश्वर झरना, झण्डै तीन करोडको लागतमा बालमैत्री पार्क बन्दै
काठमाडौँ । धुँवाधुलो र कोलाहलबाट एकछिन मुक्ति पाउन चाहनुहुन्छ ? यदि चाहानुहुन्छ भने तपाईँका लागि उपर्युक्त गन्तब्य बन्न सक्छ बौडेश्वर झरना । शामाखुसीचोकबाट करिब १० किलोमिटर दुरीमा रहेको बौडेश्वर झरना काठमाडौं उपत्यकाबाट सबैभन्दा नजिक पर्ने पर्यटकीय स्थल हो । साँस्कृतिक, ऐतिहासिक र प्राकृतिक महत्व बोकेको बौडेश्वर क्षेत्र हेर्दा मनमोहक मात्र होइन धार्मिक दृष्ट्रिकोणले पनि उतिकै चिरपरिचित छ । काठमाडौंको टोखा नगरपालिका १ झोरमा अवस्थित बौडेश्वर झरना पछिल्लो समय सबैको रोजाई बनेको छ । निश्चल, स्वच्छ र गडगडाहट छहराहरु छर्केर बहेको बौडेश्वर झरनाको सौन्दर्यतामा जो कोहि पनि मन्त्रमुग्ध हुन्छन् । प्राकृतिक संरचनामै यथावथ रहेको यो झरनाको मनोरञ्जन र आनन्द लिन दिनहुँ आन्तरिक र बाह्य पर्यटकहरुको चाप बढ्दै गएको छ । कर्मचारीहरु शनिबारे बिदा मनाउन होस्, साथीहरु मिलेर पिक्निक खान होस् वा परिवारजन धार्मिक संस्कार गर्नकै लागि भएपनि मानिसहरु मनोकाक्षां पुरा गर्ने विश्वासका साथ झोर पुग्ने गरेका छन् । बौडेश्वर पर्यटकिय क्षेत्रका रुपले मात्र होइन धार्मिक हिसावले पनि महत्वपूर्ण क्षेत्रका रुपले चिन्ने गरिन्छ । भगवान महादेवको शक्ति पिठका रुपमा लिएको बौडेश्वरमा मानिसहरु ब्रतबन्ध, विवाह र धार्मिक कार्यका लागि पनि पुग्ने गर्दछन् । मनमोहक र सुन्दर झरनाको छेउमै एउटा अलौकिक गुफा पनि छ । जसभित्र छिरे भगवान महादेवलाई मागेको बर पाइने धार्मिक विश्वास रहि आएको छ । गुफा भित्र भगवान महादेवको मन्दिर पनि छ । हिँउदको समयमा भन्दा पनि बर्खायाममा बढि पर्यटकहरु बौडेश्वरमा पुग्ने गरेको एक स्थानियले बताए । ‘हिउँदमा पानी अलि कम हुने गरेको छ’, उनले भने,बर्खामा पानी बढि भएका कारण पर्यटकहरु पानी सँग रमाउन बढि आउने गर्दछन् ।’ यो समय पर्यटकका लागि बौडेश्वर उचित पर्यटकिय स्थल हो । काठमाडौं कोलाहल र धुलोधुवाँबाट छुट्कारा पाउन अहिले बौडेश्वरमा जाने मानिसहरुको भिँड लाग्ने गरेको छ । २४ करोडको बौडेश्वर गुरुयोजना तयार टोखा नगरपालिकाले झोर क्षेत्रको पूर्वाधार विकासका लागि २४ करोड ६७ लाख ९२ हजारको गुरुयोजना तयार पारेको छ । बौडेश्वर क्षेत्रमा पर्यटकहरुको आकर्षित गन्तब्य बनाउनका लािग नगरपालिकाले सो रकमको गुरुयोजना तयार पारेको बताएको हो । नगरपालिकाले गुरुयोजनामा मनोरञ्जनपार्क, मन्दिर, रक क्लाइम्बिङ, पिक्निक स्पोट्स र फुटवल ग्राउण्ड निर्माण गर्ने गुरुयोजनामा उल्लेख गरेको छ । बौडेश्वर क्षेत्रमा सडक स्तरोन्नतीका लागि ३ करोड, झरनाको ड्याम निर्माणका लागि १ करोड, मनोरञ्जनात्मक पार्क,पिक्निक स्पोट र रक कलाइम्बिङका लागि ५ करोड, झुलुङ्गे पुलका लागि ३ करोड, खेलकुद संरचनाका लागि ३ करोड र बालमैन्त्री पार्क नजिकै अन्य संरचनाहरुका लागि २ करोड ५० लाख रुपैयाँ लागत लाग्ने गुरुयोजनामा उल्लेख गरिएको छ । नगरपालिकामा यी संरचनाहरु निर्माण भएपछि बौडेश्वर क्षेत्रको विकास र पर्यटक भित्र्याउन उल्लेख्य भूमिका खेल्न सक्ने अपेक्षा गरिएको छ । नगरपालिकाले प्रथम चरणमा बालमैत्री पार्क, दित्तिय चरणमा पिक्निक स्पोटस्, तेस्रो चरणमा मनोरज्नात्मक पार्क, चौथो चरणमा झुलुङ्गे पुल र रक कलाइम्बिङ र पाँचौं चरणमा बाँकी र छुटपुटका कामहरु गर्ने गुरुयोजनामा उल्लेख गरिएको छ । २ करोडको लागतमा बालमैत्री पार्क बन्दै टोखा नगरपालिकाले २ करोड ७६ लाख ७५ हजारको लागतमा बालमैत्री पार्क निर्माण शुरु गरेको छ । बौडेश्वर गुरुयोजना अन्तर्गत पहिलो चरणको काममा पर्ने बालमैत्री पार्कको निर्माण कार्य शुरु गरेको नगरपालिकाले जनाएको छ । टोखा नगरपालिकाका प्रमुख प्रकाश अधिकारीले नगरसभाबाट प्रत्येक वडामा उद्यान निर्माण गर्ने योजना रहेको बताउँदै वडा न १ बाट बालमैत्री पार्कको निर्माणे शुरु गरिएको बताए । यसरी ठाउँठाउँमा उद्यान निर्माण गर्नाले सौन्दर्यतासँगै सार्वजनिक जग्गाको संरक्षणमा समेत टेवा पुग्ने उनको भनाई छ । चार रोपनी जग्गामा निर्माणाधीन पार्कमा टोखा नगरपालिका, काठमाडौं महानगरपालिका र अर्थ मन्त्रालयको लगानी रहेको जनाइएको छ । साईट इञ्जिनियर रुद्रनाथ आचार्यले ३ करोड ८४ लाख अनुमानित रकम भएपनि माथि उल्लेखित रकममा पार्क बनाउन शुरु गरिएको बताए । उनले बौडेश्वरमा प्राकृतिक झरना मात्र भएकोले पर्यटकहरुलाई भुलाउन र मनोरञ्जन गराउनको माध्यमका रुपमा पार्कले महत्वपूर्ण भूमिका खेल्ने बताए । ‘काठमाडौंमा पर्यटकका लागि निशासिने अवस्था छ’, उनले भने, बौडेश्वर प्राकृतिक सुन्दरताले रमणिय भएकोले पर्यटकको सहजताका लागि भौतिक पूर्वाधारका संरचनाहरु निर्माण गर्न शुरु गरिएको बताए । श्रृंखला निर्माण सेवाले पार्कको निर्माणको ठेक्का लिएको छ । पाकको निर्माण कार्य चालु आर्थिक वर्षको असार सम्म सक्ने लक्ष्य लिएको छ । नगरपालिकाको झोरमा अवस्थित बौडेश्वर क्षेत्र प्राकृतिक रुपमा मात्र होइन साँस्कृतिक र धार्मिक रुपले पनि भरिपूर्ण छ । सरकारले बौडेश्वरलाई उचित प्राथमिकताका साथ भौतिक संरचनाहरु निर्माण गरे पर्यटकहरुको आकर्षण बढ्ने कुरामा दुईमत छैन । सरकारले नेपाल भ्रमण वर्ष २०२० मा २० लाख पर्यटक भित्र्यायने लक्ष्यलाई सहयोग गर्न पनि बौडेश्वरले महत्वपूर्ण भूमिका खेल्न सक्छ ।
सानिमा बैंक लिमिटेड र यु.के.एडको सक्षमबीच सम्झौता
काठमाडौं । सानिमा बैंक लिमिटेड र यु.के.एडको सक्षमबीच भदौ ३० गते कृषि कर्जा प्रबर्धनका लागि सम्झौता भएको छ । उक्त सम्झौता पत्रमा सानिमा बैंकको तर्फबाट बैंकका प्रमुख कार्यकारी अधिकृत भुवन कुमार दाहाल र सक्षमको तर्फबाट टिम लिडर निर्मल दाहालले हस्ताक्षर गरेका हुन् । यो परियोजनाको मुख्य उद्देश्य कृषि क्षेत्रमा कर्जा विस्तार गर्नको लागि आवश्यक संरचना स्थापना गर्ने, आवश्यक अध्ययन गर्ने र यस संग सम्बन्धित नीति तथा कार्य योजना बनाइ लागु गर्ने हुनेछ । यसका लागि सानिमा बैंकका शाखाहरुबाट कृषि क्षेत्रमा धेरै भन्दा धेरै कर्जा प्रदान गर्न आवश्यक पर्ने साधन सक्षमसँगको सहकार्यमा परिचालन गरिनेछ । यस परियोजना सक्षमको च्यालेन्ज फण्ड अन्तर्गत संचालन गर्न लागिएको हो, जुन नेपाल सरकार र यु.के. सरकारको सम्झौता अनुरुप यु.के. एडको आर्थिक सहयोगमा संचालित कार्यक्रम हो ।सानिमा बैंकका सातवटै प्रदेशमा गरी हाल ७९ वटा शाखा, १ एक्सटेन्सन काउन्टर र ७५ वटा एटिएम रहेका छन् ।
सांग्रिला डेभलपमेन्ट बैंकद्वारा आर्थिक सहयोग हस्तान्तरण
काठमाडौँ । सांग्रिला डेभलपमेन्ट बैंक लिमिटेडले ललितपुर महानगरपालिका वडा नं. ७ ग्वार्कोमा सञ्चालित क्वेस्ट इन्टरनेशनल कलेज अन्तगर्तको क्वेस्ट सोसल क्लबका बिधार्थीहरुलाई आर्थिक सहयोग प्रदान गरेको छ । बैंकको सहकार्यमा क्वेस्ट इन्टरनेशनल कलेज अन्तरगतको क्वेस्ट सोसल क्लबका बिधार्थीहरुद्घारा मंगलबजार, ग्वार्को र इमाडोलमा सरसफाई कार्यक्रम र कलेज प्राङ्गणमा रक्तदान कार्यक्रम, दाँत तथा आँखाको निःशुल्क जाँच कार्यक्रम गरिएको छ । साथै, बैंकले अनाथ बालबालिका तथा असहाय महिलाहरुको लागि बनेको संस्था नेपाल स्नेहिकालाई आवश्यक समाग्री सहयोग प्रदान गरेको जनाएको छ ।
मुक्तिनाथद्वारा अटीजम केयरलाई १ लाख सहयोग प्रदान
काठमाडौँ । मुक्तिनाथ विकास बैंक लिमिटेडले अटीजम केयर नेपाल सोसाइटी, कास्कीलाई तालिम भवन निमार्णका लागि एक लाख रुपैँयाको चेक प्रदान गरेको छ । उक्त चेक मुक्तिनाथ विकास बैंकका नायब प्रमुख कार्यकारीअधिकृत समीरशेखर बज्राचार्यले अटीजम केयर नेपाल सोसाइटीका कोषाध्यक्षसरु अधिकारीलाई हस्तान्तरण गरेका हुन् । अटीजम केयर नेपाल सोसाइटी, कास्कीले जिल्ला भरी रहेका अटीजम (फरक रुपमा सक्षम) बालबालिकाहरुको क्षेत्रमा विभिन्न तालिम तथा क्रियाकलापहरु गर्दै आइरहेको छ ।
लक्ष्मी बैंक र लक्ष्मी केयर्सद्वारा सांगीतिक कार्यक्रम आयोजना
काठमाडौँ । लक्ष्मी बैंक र लक्ष्मी केयर्सले संयुक्त रुपमा नेपालका प्रतिष्ठित गायक दीप श्रेष्ठको सांगीतिक यात्राको ५० वर्षको अवसरमा कोष स्थापनाको लागि सांगीतिक कार्यक्रमको आयोजना गरेको छ । कार्यक्रममा नेपाली गीतसंगीतसँग सम्बन्धित विभिन्न सर्जक, पारखी एवम् संगीतकारहरुको उपस्थिति रहेको थियो । कोष स्थापनाको लागि आयोजना गरिएको कार्यक्रमबाट संकलन भएको रकम सम्पदा सूचीमा परेका दुईवटा स्थानहरुका लागि विद्युतीय सवारी साधनको व्यवस्थामा प्रयोग गरिने जनाइएको छ । यी विद्युतीय गाडीको प्रयोग बृद्ध एवम् शारीरिक रुपमा अशक्त व्यक्तिहरुका लागि निःशुल्क रुपमा प्रयोग गरिने छ ।
नेपाल दालमोठ उत्पादक संघको अध्यक्षमा नारायण कार्की चयन
काठमाडौँ । नेपाल दालमोठ उत्पादक संघको १४औँ साधारण सभा शनिबार सिद्धार्थ कटेज तीनकुने काठमाण्डौमा सम्पन्न भएको छ । उक्त सभाले नयाँ कार्य समिति चयन भएको छ । साधारण सभाले अध्यक्षमा नारायण कार्की, उपाध्यक्षमा रमेशचन्द कसौधन, सचिवमा विनयकुमार पौडेल र कोषाध्यक्षमा राजिव मथिकर्मी चयन भएका छन् । सदस्यहरुमा नरेश मल्ल, संजिवकुमार ठाकुर, सरस्वती घिमिरे चयन भएका हुन् । भबिश्यमा देशको आन्तरिक माग बमोजिमको गुणस्तरीय दालमोठ उत्पादन गरी देशलाई आत्मनिर्भर बनाउने र आयात प्रतिस्थापन गर्ने कार्यमा नवगठित समिति लागि पर्नेसंघका सचिव पौडेलले जानकारी गराए ।
