सिटिजन्स बैंकको कम्पनी सचिवमा श्रेष्ठ नियुक्त, बैंकिङ क्षेत्रमा १५ वर्षको अनुभव
काठमाडौं । सिटिजन्स बैंक इन्टरनेशनल लिमिटेडको कम्पनी सचिवमा राजेन्द्रलाल श्रेष्ठ नियुक्त भएका छन् । कम्पनीको कात्तिक १ गते बसेको संचालक समितिको ३१६औं बैठकले श्रेष्ठलाई उक्त पदमा नियुक्त गरेको हो । श्रेष्ठले सचिव पदमा नियुक्त भएकै दिनबाटै आफ्नो कार्यभार सम्हालेका छन् । कम्पनीले कात्तिक १ गतेदेखि लागू हुनेगरी श्रेष्ठलाई सचिव पदमा नियुक्त गरेको हो । भारतकाे पुनेस्थित रहेकाे एसआईबीएमबाट एमबीए गरेका नवनियुक्त श्रेष्ठमा व्यापार वित्त, क्रेडिट र शाखा सञ्चालनको क्षेत्रमा १५ वर्षको बैंकिङ अनुभव रहेको छ ।
औषधि व्यवसायी सङ्घकाे अध्यक्षमा साह चयन
जनकपुर । नेपाल औषधि व्यवसायी सङ्घ धनुषा जिल्लाको सम्पन्न प्रथम अधिवेशनले सत्यनारायण साहलाई शाखाको अध्यक्ष पदमा चयन गरेको छ । चयन हुने अन्य पदाधिकारीमा उपाध्यक्षमा रामनाथप्रसाद साह, महासचिवमा तेजनारायण चौधरी, कोषाध्यक्षमा विजयकुमार साह र सचिवमा सरोज राययादव रहेका छन् । त्यस्तै, उपकोषाध्यक्षमा मणिशङ्करप्रसाद साह तथा सदस्यमा विनोद पजियार, चन्द्रभूषणप्रसाद साह र शिवकुमार साह चयन भएका छन् । सङ्घका निर्वाचन अधिकृत किशोरी साहका अनुसार प्रारम्भमा विभिन्न पदमा २६ जनाले उम्मेदवारी दर्ता गराएकोमा १७ जनाले उम्मेदवारी फिर्ता लिएकाले आवश्यक पद सङ्ख्यामा मात्र निर्वाचनका लागि मनोनयनपत्र दर्ता रहन गएकाले उनीहरू निर्विरोध निर्वाचित भएका हुन् । रासस
नेपाल र भारतका सुरक्षाकर्मीद्वारा सीमा क्षेत्रमा संयुक्त गस्ती
काठमाडौं । कञ्चनपुरको दक्षिणी क्षेत्रमा नेपाल भारतका सुरक्षाकर्मीले शनिबारदेखि दशगजा क्षेत्रमा संयुक्त गस्ती कार्य शुरु गरेका छन् । तिहारलगायतको चाडपर्वलाई मध्यनजर गरी सीमा क्षेत्रमा सुरक्षा व्यवस्थालाई चुस्त र दुरुस्त पार्नका लागि संयुक्त गस्तीको कार्य शुरु गरिएको इलाका प्रहरी कार्यालय बेलौरीका प्रहरी निरीक्षक रणबहादुर चन्दले बताएका छन् । सीमा क्षेत्रमा हुने अवैध चोरी शिकारी, तस्करी र आपराधिक कार्य नियन्त्रणसँगै सीमा स्तम्भको सुरक्षाका लागि संयुक्त गस्तीको कार्य भइरहेको छ उनले भने, “चाडपर्वका बेला हुने अवैध सामानको तस्करी रोक्न र सीमा क्षेत्रमा आवतजावतको कार्यलाई सहज बनाउनु गस्तीको उद्देश्य रहेको छ ।” नेपाल भारतका सुरक्षाकर्मीले संयुक्त रुपमा गस्ती गर्दा एकापसमा सम्बन्ध बलियो हुने र सीमा क्षेत्रमा देखा पर्ने चुनौतीको सामना गर्न सहज हुने उनले बताए । गस्तीमा सशस्त्र प्रहरी बल बर्डर आउट पोष्टका ११ जवान, इप्रका बेलौरीका ११ जवान भारतको तर्फबाट एसएसबीका कमलापुरी कम्पनीका प्रहरी निरीक्षक भेरजी सोधाको कमाण्डमा रहेका छ जना र एसएसबीका शारदापुरी कम्पनीका प्रहरी नायब निरीक्षक सन्दीपकुमारसहित चार जनाको टोलीले संयुक्त गस्तीको कार्यमा सहभागिता जनाएको छ । रासस
बैंकका सञ्चालकले कति पाउँछन् भत्ता ? सानिमाले ५० प्रतिशत बढायो, अरुको उस्तै
काठमाडौं । अर्बौं बराबर वासलात भएका बैंक चलाउनेले कति पारिश्रमिक लिन्छन् होला, यो धेरैको चासो हुन सक्छ । यो वर्ष व्यवस्थापनलाई आवश्यक निर्देशन दिन साधारणसभाले चुनेर पठाउने सञ्चालकहरु र सञ्चालकहरु मध्येबाटै चयन हुने अध्यक्षहरुको लागि भने खासै सुखद अवस्था रहेन । बजारको औसत मूल्य वृद्धि ६ प्रतिशत हाराहारीमा रहेको र औसत ज्यालादर १४ प्रतिशत बढ्दा अधिकांश बैंकका सञ्चालकहरुको भत्ता भने स्थिर नै रहेको देखिन्छ । असोज मसान्तसम्म ६ वटा वाणिज्य बैंकले गत आर्थिक वर्षको वार्षिक साधारणसभा सम्पन्न गरिसकेका छन् । एनआईसी एशिया, सिटिजन्स, कुमारी, माछापुच्छ्रे, सानिमा र बैंक अफ काठमाण्डूले गत आवमा सभा गरी सेयरधनीलाई दिने प्रस्तावित लाभांश समेत पारित गरी बैंक सञ्चालक समितिको प्रतिबैठक भत्ता पनि तोकेका छन् । जसमध्ये चालु आवमा सानिमा बैंक सञ्चालकको प्रतिबैठक भत्ता बढेको छ भने बाँकी ५ वटा कम्पनीको स्थिर नै रहेको छ । सानिमाले सभामा विशेष प्रस्ताव गरी सञ्चालक समितिको प्रतिबैठक भत्ता गत वर्षको भन्दा ३० देखि ५० प्रतिशतसम्म बढाएको छ । एकैचोटि ५० प्रतिशतका दरले भत्ता बढाएमा विरुद्ध सेयरधनी लगानीकर्ताले सभामा चर्को विरोध गर्दा गर्दै पनि सभाले उक्त प्रस्ताव पारित गरेको हो । यससँगै अब सानिमाका अध्यक्षले आर्थिक वर्ष २०७६/७७ मा प्रतिबैठक १३ हजार र सञ्चालकले १२ हजार रुपैयाँका दरले बैठक भत्ता पाउने भएका छन् । बैंकले आव २०७५/७६ मा अध्यक्षलाई प्रतिबैठक १० हजार र सञ्चालकलाई ८ हजार रुपैयाँ दिँदै आएको थियो । यो भन्दै गर्दा अरु बैंकले सभामा भत्ता बढाउने प्रस्ताव नै नलागेको भन्ने चाहिँ होइन । सिटिजन्स बैंकले पनि सञ्चालकको भत्ता वृद्धि गर्ने विशेष प्रस्ताव गरेको थियो । तर, सभामा सेयरधनीले चर्को विरोध गरेपछि बैंकले उक्त प्रस्ताव फिर्ता लिएको थियो । एकैपटक ५३ देखि ६३ प्रतिशतसम्मको दरले संचालकको बैठक भत्ता बढाउने प्रस्ताव विरुद्ध सेयरधनीले विरोध गरि फिर्ता गर्न सफल भएका थिए । बैंकले सञ्चालक समितिको भत्ता बढाएर अध्यक्षलाई प्रतिबैठक २० हजार र सञ्चालकलाई १८ हजार रुपैयाँ दिने प्रस्ताव गरेको थियो । सभाले पारित नगरेपछि अब बैंक सञ्चालक समितिको भत्ता गत वर्षको यथावत् नै हुनेछ । गत वर्ष बैंकले अध्यक्षलाई प्रतिबैठक भत्ता १३ हजार र सञ्चालकलाई ११ हजार रुपैयाँ दिँदै आएको थियो । त्यस्तै, बाँकी चार वटा बैंक(एनआईसी एशिया, कुमारी, माछापुच्छ्रे र बैंक अफ काठमाण्डू)को सञ्चालक समितिको भत्ता यस वर्षपनि गत वर्षकै कायम हुने छ । यी बैंकले गत वर्ष नै बैठक भत्ता बढाएकाले यो वर्ष सो सुविधा वृद्धि गर्ने प्रस्ताव सभामा लगेनन् । यी ६ वाणिज्य बैंकमध्ये एनआईसी एशिया र माछापुच्छ्रे बैंकका अध्यक्षले बढी भत्ता खाएका छन् । यी दुई बैंकका अध्यक्षले प्रतिबैठक १५ हजार रुपैयाँ भत्ता बुझिलिएका छन् र चालु आवमा पनि सोहि रकम लिने छन् । त्यसपछि बैंक अफ काठमाण्डूका अध्यक्षले पनि १४ हजार रुपैयाँका दरले बैठक भत्ता लिएका छन् । त्यस्तै, सिटिजन्स र सानिमाका अध्यक्षले १३ हजार र कुमारी बैंकका अध्यक्षले १२ हजारका दरले बैठक भत्ता पाएका छन् । त्यसैगरी, सञ्चालक पदमा रहेका ४ बैंकका सञ्चालकहरुले बराबर रकम भत्ताको रुपमा पाउने छन् । चालु आवमा एनआईसी एशिया, माछापुच्छ्रे, सानिमा र बैंक अफ काठमाण्डू बैंकले आ-आफ्ना सञ्चाकलहरुलाई प्रतिबैठकमा उपस्थित भएबमोजिम १२ हजार रुपैयाँ दिने भएका छन् । त्यस्तै, सिटिजन्स बैंकका सञ्चालकले प्रतिबैठक ११ हजार र कुमारी बैंकका सञ्चालकले १० हजार रुपैयाँ भत्ता पाउँने छन् । बैंक तथा वित्तीय संस्था सम्बन्धि ऐनको प्रावधान अनुसार कुनै पनि बैंक तथा वित्तीय संस्थाको सञ्चालक समितिको बैठक वर्षमा कम्तीमा १२ पटक बस्नु पर्नेछ । तर, दुई वटा बैठकको बीचको फरक ६० दिनभन्दा बढी हुन नपाउने व्यवस्था रहेको छ ।
सनराइज बैंकले बार्षिकोत्सवको अवसरमा गर्यो प्रभातफेरी
काठमाडौँ । सनराइज बैंकले आफ्नो १२औं वार्षिक उत्सवको अवसरमा शनिबार प्रभातफेरी कार्यक्रम आयोजना गरेको छ । ‘समृद्घ नेपालको सहयात्रामा सनराइज बैंक-हामी संग संगै’ भन्ने नाराको साथ बैंकले प्रभातफेरी कार्यक्रम आयोजना गरेको हो । सो प्रभातफेरी कार्यक्रम केन्द्रिय कार्यालय गैरीधाराबाट सुरु भई नक्साल भगवती, कमलपोखरी, कमलाधि गणेश मन्दिर, रत्नपार्क, दरबारमार्ग, नागपोखरी हुदैं पुनः गैरीधारामा आएर समापन भएको थियो । उक्त कार्यक्रममा बैंकका संचालक समितिका सदस्यहरु दीपक नेपाल र शारदा शर्मा पुडासैनी, बैंकका प्रमुख कार्यकारी अधिकृत जनक शर्मा पौड्याल लगायत काठमाडौं भरिका शाखाहरुबाट करिब ५०० कर्मचारीहरुको उपस्थिति रहेको बैंकले जनाएको छ ।
गुहेश्वरीस्थित फोहोर पानी प्रशोधन केन्द्रको खानेपानी मन्त्री मगरले गरिन् निरीक्षण
काठमाडौँ । खानेपानी तथा सरसफाई मन्त्री बिना मगरले गुहेश्वरीस्थित फोहोर पानी प्रशोधन केन्द्र आयोजनाको निरीक्षण गरेकी छिन् । खानेपानी मन्त्रालय अन्र्तगतको आयोजना कार्यान्वयन निर्देशनालयले गुहेश्वरीमा निर्माण गरिरहेको फोहोर पानी प्रशोधन केन्द्र निर्माण अन्तिम चरणमा पुग्दै गर्दा मन्त्री मगरले शनिबार स्थलगत निरीक्षण गरेकी हुन् । निरीक्षणपछि उनले पशुपति क्षेत्रस्थित बागमति नदीमा बग्ने पानीलाई सफा पानी बनाउने लक्ष्य अन्तिम चरणमा पुगेको जानकारी दिइन् । आयोजनाको ९५ प्रतिशत काम सम्पन्न भईसकेको भन्दै उहाँले सबैको चाहाना अनुसार बागमतिलाई प्राण भरेर कंचन पानी बग्ने व्यवस्था मिलाउने बताइन् । उनले बढ्दो शहरीकरणले सबै शहरमा ढल व्यवस्थापनको समस्या बढ्दै गएको उल्लेख गर्दै काठमाण्डौमा भने चुनौतिपूर्ण नै बनेको बताइन् । उनले फोहरको व्यवस्थापकिय पक्ष प्रति मन्त्रालय गम्भीर रहेको भन्दै बागमतीको महत्वलाई कायम राख्दै जीवन्त बनाई सबै किसिमको धार्मिक संस्कारलाई सहजीकरण हुने गरि व्यवस्था मिलाईने आश्वासन पनि दिइन् । नदी सफाइका लागि अब गुहेश्वरीमा फोहोरपानी प्रशोधन केन्द्र बन्दैछ, जहाँ गोकर्णदेखि गुहेश्वरीसम्मको ढल जोडिनेछ । बाँकी सबै काम आगामी डिसेम्बरसम्म सकेर उद्घाटन गर्ने लक्ष्य रहेको खानेपानी मन्त्री मगरले जानकारी दिइन् । बाग्मतीलाई ढलरहित बनाउने अभियानमा यो निकै महत्वपूर्ण आयोजना भएको भन्दै मन्त्री मगरले भनिन,-‘पशुपतिनाथका भक्तजनहरुले बाग्मतीको पानी पिउन नसके पनि नुहाउनसक्ने बन्नेछ ।’ अहिले काठमाडौं उपत्यकामा घरघरबाट निस्कने ढल सिधै नदीमा मिसाइन्छ । यसले पानीकास्रोत प्रदुषित मात्रै भएको छैन, काठमाडौंको सभ्यतामाथि नै प्रश्न उठेको छ । ढललाई प्रशोधन केन्द्रसम्म पुर्याएर विभिन्न चरणमा प्रशोधन गरिनेछ । त्यसक्रममा ग्यास समेत निस्कनेछ । त्यो ग्यास प्रयोग गरेर बिजुली निकाल्ने योजना छ । गुह्येश्वरीबाट मात्र ३२० किलोवाट बिजुली निकाल्ने बताइएको छ । गुहेश्वरीमा दैनिक ३ करोड २४ लाख लिटर फोहोर पानी प्रशोधन गर्न सक्ने प्लान्ट बनेको छ । २ अर्ब ५५ करोड रुपैयाँ लागत रहेको गुहेश्वरीको प्रशोधन केन्द्रको निर्माण भारतीय कम्पनी भा टेक वाबाग लिमिटेडले गरिररहेको छ ।
नेपालमा आर्टिफिसयल इन्टिलिजेन्स सेवा बिस्तार, बैंकिङ प्रणालीको जोखिम न्यूनीकरणमा सहयोग पुर्याउने
काठमाडौँ । सूचना प्रविधि क्षेत्रमा काम गर्दै आएको अमेरिकी कम्पनी सिथोसले नेपालमा पनि सेवा विस्तार गर्ने भएको छ । अमेरिकामा केन्द्रीय कार्यालय भएको सिथोसले भारतमा पनि सेवा प्रदान गर्दै आएको छ । नेपालको बैंकिङ क्षेत्र मार्फत सूचना प्रविधि तथा आर्टिफिसियल इन्टिलिजेन्स (एआई) को सेवा प्रदान गर्ने गरी नेपाल भित्रिएको राजधानीमा आयोजित कार्यक्रममा बताइयो । कार्यक्रममा सिथोस अमेरिकाका अध्यक्ष खगेन्द्र जिसीले आर्टिफिसियल इन्टिलिजेन्स नेपालमा ज्यादै आवश्वक भएकाले सिथोस नेपाल प्रवेश गरेको बताए । नेपालको बैंकिङ प्रणालीमा रिस्क मेनेजमेण्ट, ह्याकिङ लगायतका समस्या न्यूनीकरणमा सिथोसको एआई प्रणालीले सहयोग पुर्याउने विश्वास जिसीको छ । कम्पनीले बैंकिङ क्षेत्रमा आर्टिफिसियल इन्टिलिजेन्स मार्फत ग्राहकलाई सेवा प्रदान गर्छ । त्यसका साथै कर्जाको भ्यालुएसन र कर्जा दिन मिल्ने रकमलाई समेत गणना गरी छिटो छरीतो र प्रभावकारी सेवा प्रदान गर्छ । सिथोसले बैंकिङ क्षेत्रको नियमन, परिपालना तथा सम्भावीत ठगीलाइ पहिचान तथा नियन्त्रण गर्ने प्रविधिक सेवा प्रदान गर्ने सिथोस नेपालका अध्यक्ष दक्ष पौडेल सुवासले जानकारी दिए । उनले भने–‘सिथोसले बैंकिङ क्षेत्रमा मात्र नभई आर्टिफिसियल इन्टिलिजेन्सले धेरै क्षेत्रको व्यवसाय व्यवस्थापनलाई सरल र सहज बनाईदिने छ, यसले नेपालको बैंकिङ क्षेत्रको प्राविधिक पक्षलाई पनि झनै मजबुत र अझै सरल बनाउन सहयोग गर्नेछ ।’ पौडेलका अनुसार सिथोसले विकास गर्ने एआई बैंकिङ, बिमा, रियलस्टेट, हस्पीटालिटी लगायत विविध क्षेत्र तथा व्यापार व्यवसायमा प्रयोग गरेर खर्च कम गरी आम्दानी वढाउन सकिन्छ । आगामी दिनमा सिथोसले नेपालको सहकारी क्षेत्रमा पनि यो सेवा बिस्तार गर्ने पौडेलले बताए । सिथोसले मार्केट रिसर्चका साथै सेन्टीमेन्ट एनालीसिस, जोखिम व्यवस्थापना, लगानी प्रक्षपण लगायतका सेवाहरु प्रविधिको मद्दत मार्फत प्रदान गर्न सकिने एआइको विकास गरेको छ । सिथोसको एआई सेवा लिने तथा दिने दुबैलाइ प्रविधिको प्रयोग मार्फत सहज, सरल र प्रभावकारी क्रियाकलापका लागि मद्दत गर्छ । यसले औठा छाप, आवाज, तस्वीर, सन्देश, फोन मार्फत सम्बन्धीत व्यक्तिको पहिचान गरी कारोबार गर्नमा सहज गराउने कम्पनीले जनाएको छ । सिथोसले कर्मचारीको उत्पादकत्व वढाउनुका साथै संस्थागत खर्चमा कमी ल्याइ सेवा प्रदान गर्न मुख्य भूमिका निर्वाह गर्ने सिथोस नेपालका विज्ञ केएन मिश्राको भनाई छ । भारतमा पनि सिथोसले विकास गरेको एआईलाई बैंकिङ, बीमा, रियलस्टेट, हस्पीटालिटी लगायत क्षेत्रले प्रयोग गरिरहेको छन् भने अमेरिकामा यसको प्रयोग अझै वढी छ ।
१२ अर्ब लगानी भित्र्याउन काम सुरु गरिसक्यौंः एनआरएनएका अध्यक्ष कुमार पन्त
काठमाडौँ । गैर आवासीय नेपाली संघ (एनआरएनए) का नवनिर्वाचित पदाधिकारीहरुले एक स्वरमा नेपाललाई समृद्ध बनाउनको लागि आफ्नो प्रतिबद्धता जनाएका छन् । शनिबार नवनिर्वाचित पदाधिकारीलाई राजधानीमा आयोजित सम्मान तथा बधाई कार्यक्रममा बोल्दै उनीहरुले यस्तो प्रतिबद्धता जनाएका हुन् । कार्यक्रममा बोल्दै नवनिर्वाचित अध्यक्ष कुमार पन्तले मुलुक समृद्ध बनाउनको लागि गैरआवासीय नेपालीहरुले अहम भूमिका खेल्दै आएकोले आगामी दिनमा नेपालको विकास र समृद्धिको लागि झन ठूलो योगदान पुर्याउने विश्वास दिलाए । उनले भने,‘हामी यो देशको विकासमा केही गर्छौं भनेर लागिरहेका छौं । नयाँ भिजनसहित हाम्रो फ्रेश टिम निर्वाचित भएर आएको छ ।’ पन्तले आफूहरुसँग अत्यन्त छोटो समय रहेकोले आफ्नो २ वर्षे कार्यकालमा यसअघि गरेका वाचा तथा प्रतिबद्धताहरु पूरा गरेरै छोड्ने पनि स्पष्ट पारे । उनले भने,‘हामीसँग अब टाईम लिङगरिङ गर्ने छुट छैन् । यो २४ महिनामा हामीले गरेका सबै वाचा तथा प्रतिबद्धताहरु पूरा गर्नुपर्छ । हामी आजैबाट दत्तचित्त भएर लागिपरेका छौं ।’ अध्यक्ष पन्तले मुलुकमा रोजगारीको अवसर सिर्जना गर्नको लागि एनआरएनएले ठूलो भूमिका निर्वाह गर्ने पनि बताए । उनले भने,‘गैरआवासीय नेपालीहरुले विदेशमा हाँसिल गरेको ज्ञान, सिप, पुँजी र लगानी नेपाल भित्र्याउनेछौं । हामी यो देशको विकास र समृद्धिको लागि सामूहिक लगानी ल्याउँछौं । पछिल्लो समय हामीले नेपालमा सामूहिक लगानी सुरु गरिसकेका छौं । यसैको उदाहरण हो २७ मेगावाटको तोर्दी खोला हाईड्रोपावर, जुन हामीले निर्माण सम्पन्न गरिसकेका छौं ।’ त्यस्तै, नेपाल सरकारसँग १२ अर्व लगानी भित्र्याउने भनेर एमओयु पनि गरिसकेको उनले सुनाए । विश्वभरि छरिएर रहेका ८० लाख गैरआवासी नेपालीहरुले मातृभूमी नेपाल समद्ध र धनी भएको हेर्न चाहेको सुनाउँदै त्यसकै लागि काम गर्ने पनि पन्तले बताए । उनले भने,‘हामी मुलुक समृद्ध बनाउने अभियानमा होमिएका छौं । अहिले स्वर्णिम अवस्था हो । अहिलेको पुस्ताले केही नगरे आउने पुस्ताले हामीलाई धिक्कार्नेछ । हामीले अर्को पुस्ताले वाह भन्ने काम गर्नुपर्छ ।’ नवनिर्वाचित पदाधिकारी उच्च मनोबलका साथ आएकोले नेपाललाई समृद्ध बनाउनेगरि काम गर्ने र नेपालको विकसित हुने भाग्य रहेको पनि उनले बताए । नवनिर्वाचित उपाध्यक्ष मन केसीले आफूहरुले दिर्घकालिन योजनासहित काम गर्ने बताए । त्यस्तै, अर्का उपाध्यक्ष सोनाम लामाले आफूले सुरुदेखि नै दोहोरो नागरिकताको निरन्तरताको बारेमा वकालत गरिरहेकोले उक्त काम पूरा गर्नको लागि सदैव प्रयास गर्ने स्पष्ट पारे । कार्यक्रममा अर्का उपाध्यक्ष अर्जुन कुमार श्रेष्ठले अहिलेको नयाँ निर्वाचित टिमले धेरै कुरा बोल्नेभन्दा पनि बोलेका कुरा पूरा गर्ने र पूरा गर्नसक्ने कुरामात्रै बोल्ने स्पष्ट पारे । कार्यक्रममा नवनिर्वाचित महासचिव डा. हेमराज शर्माले नवौं विश्व सम्मेलनमा निर्वाचनको क्रममा उत्पन्न समस्याका कारण संघको छविमा केही प्रश्न उठेको भएपनि त्यसलाई छिटपुट घटनाको रुपमा चित्रण गरे । नवनिर्वाचित सचिव आर.के. शर्माले मध्यपुर्व एशियामा रहेका श्रमिक नेपालीहरुको समस्या समाधानको लागि आफूहरु सधैं लागिपर्ने बताए । त्यस्तै, सह–कोषाध्यक्ष लोक दाहालले पनि आफूहरु देशको विकास र समृद्धिमा एकजुट भएर लागिपर्ने बताए । अमेरिका क्षेत्रीय महिला संयोजक उमा कार्की थापाले विदेशमा बसेपनि आफूहरुको मन, मस्तिष्कमा नेपाल रहेको सुनाउँदै मातृभुमीको विकासमा जहिल्यैपनि जोडिने विश्वास दिलाईन् । त्यस्तै, एशिया प्यासिफिक डेपुटी रिजनल कोअर्डिनेटर खगेन्द्र न्यौपानेले पनि श्रमिकको समस्या समाधानको लागि आफूहरुले पहल गर्ने र नेपालको विकास र समृद्धिमा टेवा पुर्याउने बचनबद्धता व्यक्त गरे । एसिया प्यासिफिक क्षेत्रीय संयोजक रोविन्द प्रसाद श्रेष्ठ ‘गोविन्द’ ले श्रमिकको मुद्दालाई आफूहरुले जोडदार रुपमा उठाउने र श्रमिक फण्ड बलियो बनाउने बताए ।