विकासन्युज

एनबीआईको सीईओमा लम्साल नियुक्त, बैंकिङ क्षेत्रमा दुई दशक भन्दा लामो अनुभव

काठमाडौं । नेशनल बैंकिङ्ग ईन्ष्टिच्यूट(एनबीआई) लिमिटेडको प्रमूख कार्यकारी अधिकृतमा कुमार लम्साल नियुक्त भएका छन् । इन्टिच्यूटको सञ्चालक समितिले मंसिर ३० गतेदेखि लागु हुने गरी लम्साललाई एनबीआईको सीईओको पदमा नियुक्त गरेको हो । नवनियुक्त सीईओ लम्साल बैंकिङ्ग क्षेत्रका चीरपरिचित व्यक्तित्व हुन् । उनले यसअघि सानिमा बैंक, प्रभु बैंक, जनता बैंक नेपाल लि. लगायतका बैंकको प्रमूख कार्यकारी अधिकृतको रुपमा कार्य गरी दुई दशक भन्दा लामो बैंकिङ्ग अनुभव प्राप्त गरेका छन् । पछिल्लो समय जनता बैंक नेपालको सीईओ कार्यकाल पश्चात उनले बैंकिङ्ग क्षेत्रमा विशेषगरी क्रेडिट विषयको प्रशिक्षकको रुपमा योगदान पुर्याउँदै आएका थिए । नवनियुक्त सीईओको नियुक्तीसँगै ईन्स्टिच्यूटले बैंकिङ्ग जगतको मानव संशाधनको क्षमता विकासमा टेवा पुर्याउने किसिमका बस्तु तथा सेवाको विविधीकरण मार्फत अझ बढी योगदान पुर्याउन सफल हुने अपेक्षा गरीएको छ ।

नवौँ राष्ट्रिय खेलकुदमा बाघचाललाई समावेश गर्न माग

काठमाडाैं । नवौँ राष्ट्रिय खेलकुद प्रतियोगितामा नेपालको मौलिक खेल बाघचाललाई पनि समावेश गर्न मौलिक जरोकिलो पार्टीले माग गरेको छ । नेपालका मौलिक खेलहरुको पुनःजागरणका लागि सरकार तथा अन्य सरोकार भएका निकायलाई पहल गर्न अनुरोध गर्दै पार्टीले त्यसका लागि सहयोग गर्न तयार रहेको जनाएको छ । पार्टीका खेलकुद विभाग संयोजक प्रवीण बस्नेतले विज्ञप्ति जारी गर्दै नेपालका मौलिक खेललाई पनि राष्ट्रिय तथा अन्तर्राष्ट्रिय खेलकुद प्रतियोगितामा समावेश गरेर मौलिक खेलको पुनःजागरण गर्नुपर्ने उल्लेख गरेका छन् । पार्टीले १३औँ दक्षिण एशियाली खेलकुद प्रतियोगिता (साग) मा ५१ स्वर्ण पदकसहित दोस्रो स्थान हासिल गर्न सफल भएकामा नेपाली खेलाडीलाई बधाई दिएको छ । साग खेलकुद प्रतियोगिता सफलतापूर्वक सम्पन्न गरेकामा नेपाल सरकारलगायत सबै सरोकार भएका खेलकुद पदाधिकारी, खेलाडी, सुरक्षा निकायलाई पार्टीले धन्यवाद ज्ञापन गरेको छ । साग खेलकुदमा भएका कमीकमजोरीलाई सच्याउँदै आगामी दिनमा खेलसम्बन्धी भौतिक सामग्री तथा पूर्वाधार व्यवस्थापन र नेपालको खेल क्षेत्रको विकासका निम्ति दीर्घकालीन योजना निर्माण गर्न सरकारको ध्यान आकर्षण गराइएको संयोजक बस्नेतले बताए । नेपालमा अझै पनि खेल खेलेरै जीवन निर्वाह गर्न सकिने वातावरण निर्माण गर्न नसकिएको वास्तविकतालाई स्वीकार गर्दै आवश्यक नीति निर्माण गर्न पनि पार्टीले माग गरेको छ ।

काम गर्न भन्दा पनि पढ्ने मानिसकताले बेलायत गए सफल विद्यार्थी बन्न सकिन्छः उद्धव खड्का

उच्च शिक्षा अध्ययनको लागि विश्वमै अमेरिका पछि रुचाईएको शैक्षिक गन्तव्य मध्ये एक हो बेलायत। नेपालको सन्दर्भमा पनि अष्ट्रेलिया पछि विद्यार्थीहरुको प्राथमिकता बेलायत र अमेरिका रहेको देखिन्छ । प्रत्येक वर्ष ५ लाख भन्दा बढी अन्तर्राष्ट्रिय विद्यार्थीहरू बेलायतमा अध्ययनको लागि भर्ना हुने गर्छन् । बेलायत, अष्ट्रेलिया, न्युजल्याण्ड, आईरल्याण्ड, क्यानाडा, भारत लगायतका देशमा विद्यार्थी पठाउँदै आएको हव इन्टरनेशनल एजुकेशनका प्रबन्ध निर्देशक उद्धव खड्कासँग बेलायत जाने विद्यार्थीहरुले के के कुरामा बढी ध्यानदिनुपर्छ भनेर कुराकानी गरेका छौं ।  विद्यार्थीहरुले बेलायत किन रोज्ने ? आधुनिक शिक्षाको सुरु भएको नै बेलायतबाट हो । धेरै पहिलाबाट नै अन्तर्राष्ट्रिय विद्यार्थीहरुको रोजाईमा बेलायत पर्ने गरेको छ। पहिला जति पनि अन्तर्राष्ट्रिय विद्यार्थीहरु बाहिर पढ्नको लागि जान्थे, उनीहरु सबै प्राय बेलायत नै जान्थे । बेलायतको शिक्षा प्रणाली एकदमै उत्कृष्ट छ, पुरानो छ र विश्वव्यापी मान्यता प्राप्त रहेको छ। बेलायतको डिग्री भन्ने बित्तिकै लामो कुरा हुँदैन। मैले बेलायतको विश्वविद्यालयबाट एमबीए गरेको हुँ भन्नु नै काफी हुने छ। बेलायतमा एक नेपाली विद्यार्थीलाई पढ्न र बस्न खर्च कति लाग्छ ? ट्युसन शुल्क अन्य देश जस्तै अष्ट्रेलियाको दाँजोमा बेलायतको सस्तो रहेको छ। बेलायतमा पढिसकेपछि विद्यार्थीहरुलाई २ वर्षको कार्य अनुमति भिसा दिने नियम बनाउने तयारीमा छ जुन निकै राम्रो पक्ष हो। विद्यार्थी भिसा भनेको टियर ४ भिसा हो जसलाई टियर २ भिसा अर्थात ‘वोर्क परमिट भिसा’ मा परिवर्तन गर्ने केही मापदण्डहरु छन् र त्यो पुरा गर्नै पर्छ तर त्यसको प्रावधान पनि छ। विद्यार्थीको पढाई खर्च उसले रोजेको विश्वविद्यालय अनुसार फरक पर्दछ। सामान्यत बेलायतमा नेपाली विद्यार्थीलाई स्नातक तह वा त्यसभन्दा माथिको कोर्ष गर्नको लागि वार्षिक खर्च ८ हजार देखि १२ हजार पाउन्डसम्म लाग्छ । यस्तै, औसतमा एउटा नेपाली विद्यार्थीको पढाई खर्च वार्षिक १२ हजार पाउन्ड अर्थात नेपाली करिब १७ लाखको हाराहारीमा खर्च हुन्छ। पढिरहेको समयमा विद्यार्थीहरुलाई बेलायतमा काम गर्ने प्रावधान छ कि छैन ? पढिरहेको समयमा अन्तर्राष्ट्रिय विद्यार्थीहरुलाई काम गर्ने प्रावधान रहेको छ । उनीहरुले पढाईको समयमा हप्तामा २० घण्टा काम गर्न पाउने छन्। यस्तै कलेजहरु बिदाको समयमा हप्ताको ३६ घण्टासम्म काम गर्ने प्रावधान रहेको छ । विद्यार्थीहरुको पे-स्केल न्यूनतम ८ पाउन्ड देखि १२ पाउण्ड रहेको देखिन्छ। बेलायतमा विद्यार्थीले कति अवधिको भिसा पाउँछन् ? यो विद्यार्थीले रोजेको कोर्समा भरपर्छ । बेलायत सरकारले २०२१ मा दीक्षित हुने विद्यार्थीहरुलाई थप २ वर्षको वोर्क पर्मिट भिसा दिने भनेर भन्दै आए पनि यस कुराको पूर्ण निर्णय भने हुनसकेको छैन । हाल ब्रेक्जिटको कारणले सरकार फेरि चुनावमा गएको छ । त्यसैले यो कार्यान्वयनमा थोरै समस्या आएको छ । नयाँ सरकारले नियम लागू नगर्ने हो कि भन्ने दुविधा हो । त्यसकारण पनि हामी विद्यार्थीहरुलाई बारम्बार यस विषयमा ध्यान दिन भन्दै आएका छौं। यसको कार्यान्वयन हुन्छ कि हुँदैन भन्ने कुरालाई बुझ्न थप एक दुई महिना कुर्नुपर्ने हुन्छ। विद्यार्थीहरुले बेलायत जानुभन्दा अगाडि कस्ताे सोच लिएर जानुपर्छ? हामीले पढ्नको लागि पठाउने हो ।  विद्यार्थीहरुले पढ्छु भनेर जानुपर्छ, काम गर्न जाने हो भने नगए हुन्छ । तर पढाई सकेपछि करियर, कमाई र रोजगार एकदम राम्रो छ। त्यसैले पढ्नको लागि जाने सोचका साथ हरेक विद्यार्थी जानुपर्छ। कमसेकम आफ्नो आर्थिक पाटोको योजना बनाएर जानुहोस् । पार्ट टाईम काम गरेर पढ्छु भन्नेलाई गार्हो छ यद्यपी पार्ट टाईम कामले विद्यार्थीलाई बसोबासमा केही हदसम्म मद्दत भने पुर्याउँछ। तर त्यसमै भर परेर जाने हो र पहिलो वर्षको खर्चहरु पनि ऋण लिएर जाने र गईसकेपछि जे पर्ला पर्ला भनेर सोच्नेहरु बेलायत नजादा हुन्छ। हामी त्यस्तो विद्यार्थीहरुलाई जान प्रोत्साहन पनि गर्दैनौं। तर पढिसकेपछि भविष्य उज्यालो छ। त्यसैले लगानी त गर्नुपर्यो नि । लगानी गरेपछि प्रतिफल आउँछ र यो एकदम सुरक्षित लगानी हो। बेलायत, अष्ट्रेलिया, न्युजल्याण्ड जस्ता देशहरुले त भनेकै छन् कि तिमीहरु पढ, २ वर्ष काम गर तर यो कुरा विद्यार्थीहरुलाई बुझ्न मुस्किल भईरहेको छ । हामीलाई पनि उनीहरुलाई बुझाउन मुस्किल भईरहेको छ। त्यसैले पनि हब इन्टरनेशनल एजुकेशनले यस विषयमा ‘हामी शिक्षाको लागी पठाउँछौं’ भन्ने नाराको साथ जनचेतनाको कार्यक्रम आयोजना गर्दै छ।  हव इन्टरनेशनल एजुकेशनले कहाँ कहाँबाट शैक्षिक परामर्श सेवा दिइरहेको छ ?  २००६ मा स्थापित हब ईन्टरनेशनल एजुकेसन कम्पनीले हाल संसारभरका अंग्रेजी भाषा बोलिने देश अमेरिका, बेलायत, अष्ट्रेलिया, न्युजल्याण्ड, आईरल्याण्ड, क्यानडा र भारतमा विद्यार्थी पठाउँदै आएको छ । हामी जुन कुरा गर्छौ त्यसमा हामी एकदमै राम्रो छौं। हाम्रो यस क्षेत्रमा १३ वर्षको अनुभव रहेको छ । यो क्षेत्रमा मेरो करिब २० वर्षको अनुभव छ। हामीले सबै देशका राम्रा विश्वविद्यालयहरुलाई प्रतिनिधित्व गर्दै आएका छौं । हामीले काठमाडौंको बागबजारसहित ललितपुरको कुमारीपाटी, पोखरा, चितवन, दमक शाखा कार्यलयहरुबाट शैक्षिक परामर्श सेवा दिँदै आएका छौं । यस्तै विदेशमा अष्ट्रेलियाको पर्थ, फिलिपिन्स, श्रीलंका, पाकिस्तान, भारतमा यसको शाखा कार्यालय संचालनमा छ र भियतनाममा पनि यसले आफ्नो शाखा कार्यालय सुरु गर्दै छ। भाषा परिक्षणका आएएलटिएस, स्याट, जि म्याट, जिआरई पढाउने व्यवस्था हबले गरेको छ।

३५० सीसीकाे रोयल इनफिल्ड क्लासिक नेपाली बजारमा , मूल्य ६ लाख रूपैयाँ

काठमाडौं । नेपालका लागि आधिकारीक बिक्रेता एभ.भी.दुगड ग्रुपको विवेक अटोमोबाइल्स प्रा.लि.ले रोयल इनफिल्डको मोडल क्लासिक ३५० सी.सी.ड्युअल च्यानल एबिएस सहितको बिएस आइभि नेपाली बजारमा सार्वजनिक गरेको छ । विवेक अटोमोबाइल्सले आफ्ना १९वटा शाखा एवं डिलहरु मार्फत रोयल इनफिल्डको मोडल क्लासिक ३५० सी.सी. विक्री वितरण शुरु गरेको छ । रोयल इनफिल्ड दोस्रो विश्वयुद्ध पश्चातको व्रिटिस मोटर साईकलहरुको स्मरण गराउँदछ । रोयल इनफिल्ड क्लासिक ३५० सी सी इन्जिन,फ्युल इन्डिकेटर, हेडलाइट केसिङ,फ्युल ट्याङक, ड्युअल डिक्स ब्रेक, ओभल टुल बक्स, एक्सहस्ट फिन्स, स्पिड मिटर डायल,सिङगल सिट स्प्रिङ, सेडल टेल लाइट एसेम्बली र हेडलाइट क्यापमा देख्न सकिन्छ । हाल थपिएको ड्युअल च्यानल एबिएस का कारण टुरिङ्ग, दैनिक राइडिङ्गका लागि सुरक्षित भेैरहेको रोयल इनफिल्ड अब झन सुरक्षित हुनेमा कम्पनी विश्वस्त छ । रोयल इनफिल्ड क्लासिक–३५० सीसी ड्युअल च्यानल एबिएस सहितको बिएसलाई केही समय सम्मका लागि मात्र रु. ६ लाखमा उपलब्ध गराईएको छ । रोयल इनफिल्ड क्लासिकड्युअल च्यानल एबिएस सहितकोे बिएस आइभिको १९वटै शाखा तथा डिलहरुबाट बिक्री भइरहेको पि.आर.हेड बिमला थापाले बताएकी छन् ।

प्रभु लाईफ इन्स्योरेन्सद्वारा सातै प्रदेशमा फोहर फाल्ने गार्बेज बिन वितरण

काठमाडौं । प्रभु लाइफ इन्स्योरेन्स लिमिटेडले आफ्नो तेश्रो वार्षिकोत्सवका अवसरमा देशका सातै प्रदेशमा विभिन्न कार्यक्रमको आयोजना गरी फोहर फाल्ने गार्बेज बिन वितरण गरेको छ । कम्पनीले प्रदेश नं. ३ अन्तर्गतको कार्यक्रममा, त्रिभुवन विश्वविद्यालय शिक्षण अस्पताल, महाराजगंज, काठमाण्डौंलाई अस्पताल परिसरमा फोहर ब्यवस्थापनका लागि फोहर फाल्ने गार्बेज बिनहरु वितरण गरेको छ । अस्पतालका नि. निर्देशक, अन्य विभागीय प्रमुख तथा कर्मचारीहरुको उपस्थितिमा कम्पनीका प्रमुख कार्यकारी अधिकृत नारायण प्रसाद पौडेलले हस्तान्तरण गरेका थिए । प्रदेश नं. १, २, ३, गण्डकी प्रदेश, ५, कर्णाली प्रदेश र सुदूरपश्चिम प्रदेशहरुमा पनि कम्पनीका विभिन्न शाखा कार्यालयहरुले आ–आफ्नो क्षेत्रका सार्वजनिक उद्यान, पार्क, मठ–मन्दिर, सरकारी बिद्यालय तथा सरकारी अस्पतालको सरसफाई गरी उक्त स्थानहरुमा समेत गार्बेज बिनहरु उपलब्ध गराएको छ । गत वर्ष पनि यसैगरी कम्पनीले सातै प्रदेशका विभिन्न सरकारी विद्यालयका बिद्यार्थीहरुलाई पोशाक स्वेटर बितरण गरेको थियो ।

चालु आवमा करिब ३ हजार निजामति कर्मचारीले अवकाश पाउँने, विशिष्ट श्रेणीकामात्रै ११ जना

काठमाडौं । चालु आर्थिक वर्ष २०७६/७७ मा दुई हजार नौ सय ३७ जना ले अवकाश पाउने भएका छन् । सरकारी सेवामा विभिन्न क्षेत्र र स्तरमा कार्यरत करिब तीन हजार कर्मचारीले अवकाश पाउने निजामति किताबखानाले जानकारी दिएको छ । अवकाश पाउने कर्मचारीहरूमा कार्यालय सहायकदेखि विशिष्ट श्रेणीका कर्मचारी समेत रहेको निजामति किताबखानाका महानिर्देशक गिताकुमारी हुमागाईँले जानकारी दिइन् । चालु आवमा विशिष्ट श्रेणी (सचिव) का ११ जनाले अवकाश पाएका छन् । यहि पुस २१ गते सचिव अनिल कुमार ठाकुरले अवकाश पाउँदैछन् भने माघ महिनामात्रै चार सचिवले अवकाश पाउने भएका छन् । हाल ठाकुर प्रधानमन्त्री तथा मन्त्री परिषद्को कार्यालयमा कार्यरत छन् । माघ ३ गते अवकाश पाउने सचिव बालाराम शर्मा हाल कर्णाली प्रदेश सुर्खेतको मुख्यमन्त्री हुन् । माघमा अवकाश पाउने सचिवमा अर्थ सचिव राजन खनाल, नेपाल ट्रष्टको कार्यालयका सचिव गजेन्द्रकुमार ठाकुर र प्रेम कुमार राई रहेका छन् । राई गृह सचिव हुन् । दिल्लीराज घिमिरे, राजीव गौतम भने आगामी जेठमा अवकाश पाउँदैछन् । यस अघिनै विष्णु लम्साल, दीपेन्द्रनाथ शर्मा, अर्जुनकुमार कार्की, आनन्दराज रेग्मीले अवकाश पाइसकेका छन् । यी बाहेक यहि पुसमामात्रै विभिन्न पदका २ सय ३१ निजामति कर्मचारीले अवकाश पाउँदैछन् । माघमा २ सय २८ जनाले अवकाश पाउदैछन् भने फागुनमा २ सय ३ कर्मचारीले अवकाश पाउँदैछन् । चैतमा १ सय ९८ कर्मचारीले अवकाश पाउँदैछन् । वैशाखमा ३ सय ९, जेठमा २ सय ३१ र असारमा २ सय ७८ जना कर्मचारीले अवकाश पाउँदैछन् ।

चलचित्र विकास बोर्डका अध्यक्ष भट्टराईको निधन

काठमाडौं । चलचित्र विकास बोर्डका अध्यक्ष केशव भट्टराईको गए राति हृदयाघातका कारण निधन भएको छ । ५२ वर्षका भट्टराई वैवाहिक कार्यक्रमबाट निवास फर्कदै गर्दा बाटोमा बेहोस भएका थिए । उनलाई उपचारार्थ ओम अस्पताल लगिएकामा राति निधन भएको हो । उनको अहिले महाराजगञ्जस्थित त्रिभुवन विश्वविद्यालय, शिक्षण अस्पतालमा शव परीक्षण भइरहेको बोर्डका सदस्य नरेन्द्र महर्जनले जानकारी दिएका छन् । भट्टराई चलचित्रका निर्देशक साथै जनपक्षीय चलचित्रकर्मी मञ्चका पूर्वअध्यक्षसमेत थिए । उनका श्रीमती र एक छोरा रहेका छन् । उनको आजै अन्त्येष्टि गरिनेछ ।

सीता एयरलाइन्सद्वारा भद्रपुर–ताप्लेजुङ सीधा उडान आजदेखि शुरू

भद्रपुर । निजी हवाई कम्पनी सीता एयरलाइन्सले झापाको भद्रपुरदेखि ताप्लेजुङसम्म सीधा उडान भर्न शुरु गरेको छ । आजदेखि सो स्थानमा उडान शुरु गरेको कम्पनीले यही हप्तामा भद्रपुर–लुक्कासमेतको उडान भर्ने जनाएको छ । भद्रपुरदेखि ताप्लेजुङसम्म सीधा उडान भर्न शुरु गरेको छ । आजदेखि सो स्थानमा उडान शुरु गरेको कम्पनीले यही हप्तामा भद्रपुर–लुक्कासमेतको उडान भर्ने जनाएको छ । ताप्लेजुङस्थित पाथीभरा देवीको दर्शन र सगरमाथाको प्रवेशद्वारसम्म यात्रा गर्ने यात्रुलाई सजिलो बनाउन उडान शुरु गरेको नागरिक उड्डयन प्राधिकरण चन्द्रगढी विमानस्थलका प्रमुख पूर्ण चुँडालले जानकारी दिएका छन् । उनले ती क्षेत्रका उडानले भ्रमण वर्ष सन् २०२०लाई सफल बनाउने विश्वास व्यक्त गरेका छन् । उनका अनुसार १८ सिट रहेको विमानले ताप्लेजुङ सुकुटारसम्म १४ र लुक्लामा १२ जना मात्र बोक्नेछ । हरेक दिन बिहान ७ बजेबाट भद्रपुरबाट उड्ने विमानलाई लुक्ला विमानस्थल पुग्न आधा घण्टा लाग्ने छ । यात्रुको रुचिअनुसार भद्रपुरदेखि लुक्का हुँदै एक घण्टा १० मिनेटको समयमा काठमाडौँसम्म पुग्ने व्यवस्थासमेत गरिएको छ ।