सीजी कम्युनिकेसनको लिमिडेड मोविलिटीकाे अनुमतिपत्र खारेज
काठमाडौं । नेपाल दूरसंचार प्राधिकरणले सीजी कम्युनिकेशन (तत्कालिन एसटीएम संञ्चार) लाई दिएको अनुमतिपत्र रद्द गरेको छ । प्राधिकरणले ७ जिल्लामा सेवा संचालन गर्न सीजीलाई दिएको लिमिटेड (सर्भिस बेस्ड अन वायरलेस कम्युनिकेसन) मोबिलिटीको अनुमतिपत्र नियम अनुसार नविकरण नभएको भन्दै रद्द गरिएको जानकारी दिएको छ । सीजी कम्युनिकेशनले नवीकरण दस्तुरसहित निवेदन पेश नगरेका कारण अनुमतिपत्र रद्द गरिएको प्राधिकरणको भनाइ छ । सीजी कम्युनिकेसनले बाग्लुङ्ग, पाल्पा, कन्चनपुर, डडेलधुरा बैतडी, बर्दिया र दैलेखमा मोविलिटी सेवा प्रदान गर्ने गरी अनमतिपत्र पाएको थियो । कम्पनीलाई १९ माघ २०६६ मा दिएको अनुमतिपत्र प्राधिकरणले १९ माघ २०७६ देखि लागू हुने गरी रद्द गरिएको प्राधिकरणले जारी गरेको सार्वजनिक सूचनामा उल्लेख छ ।
वैदेशिक रोजगारीको समस्याबारे डा. संग्रौलाको सार्वजनिक महत्वको प्रस्ताव सदनमा
काठमाडौं । प्रतिनिधी सभा सांसद डा. डिला संग्रौलाले वैदेशिक रोजगारीको समस्याबारे सार्वजनिक महत्वको प्रस्ताव सदनमा पेश गरेकी छन् । उनले मंगलबारको संसदमा सो प्रस्ताव पेश गरेकी हुन् । करिब करिब ४० लाखभन्दा बढी युवाहरु रोजगारीका लागि विदेशिएसँगै आएका समस्याको बारेमा उनले सरकारको ध्यान आकर्षित हुनु पर्ने प्रस्ताव पेश गरेकी हुन् । डा.संग्रौलाले विदेशीएका धेरै नेपाली स्वदेश नफर्की विदेशमै जीवन त्याग्न बाध्यता भएको बताइन् । पिडित परिवारलाई सहायता तथा रोजगारी प्रदान गर्न सरकार लाग्नु पर्ने उनको भनाइ छ । वैदेशिक रोजगारीमा गएका ७ हजार ३ सय ९० जनाले एक दशको अवधिमा ज्यान गुमाएका छन् भने दुई दर्जनभन्दा बढी नेपाली युवा विभिन्न मुलुकका अस्पतालमा कोमामा छन् । मुलुकभित्र रोजगारीका सम्भावनालाई खोजेर रोजगारीको दीर्घकालीन प्रबन्धतर्फ सरकार लाग्नु पर्छ, तर यसमा सरकार मौन छ,’ उनले भनिन् । पछिल्लो समय वैदेशिक रोजगारीका लागि मलेशिया सरकारसँग सम्झौता गरेपनि नेपाली कामदार पठाउनका लागि सरकारले नै मलेशियाली कम्पनीहरुसँग सम्वाद गर्नु पर्ने अवस्था छ ।
माछापुच्छ्रे बैंकले दुबईबाट ल्यायो एक अर्ब बढी रूपैयाँ
काठमाडौं । माछापुच्छ्रे बैंकले दुवईस्थित माश्रिक बैंकबाट १० मिलियन अमेरिकी डलर अर्थात एक अर्ब रुपैयाँ भन्दा बढी पैसा नेपाल ल्याएको छ । बैंकले नेपालको बैंकिङ प्रणालीमा देखिएको लगानी योग्यपुँजी (तरलता) अभावको समस्यालाई मध्यनजर उक्त रुपैयाँ नेपाल भित्र्याएको हो । बैंकले माश्रिक बैंकबाट नेपालमा रकम भित्र्याउन गरेको सम्झौता अनुरुप नेपाल राष्ट्र बैंकको स्वीकृति पश्चात उक्त रकम नेपाल ल्याएको हो । राष्ट्र बैंकले कूल प्राथमिक पुँजीको शतप्रतिशत रकम विदेशबाट ऋण ल्याएर नेपालमा लगानी गर्न पाइने व्यवस्था गरेको छ । यही व्यवस्था अनुसार माछापुच्छ्रे बैंकले विदेशबाट पैसा ल्याउने प्रकृया थालेको थियो । बैंकले माश्रिक बैंकबाट ल्याएको उक्त रकम कृषि, ऊर्जा, पर्यटन, साना तथा मझौला व्यवसाय लगायतका अन्य विभिन्न प्राथमिकताका क्षेत्रमा लगानी गर्नेछ ।
बाल्ट्राको दशैं अफरका विजेताहरु घोषित, पाल्पाका सरुले पाए ५५ इञ्च स्मार्ट टिभी
काठमाडौं । बाल्ट्रा होम एप्लाइन्सेस्ले दशैं, तिहार तथा छठपर्वको अवसरमा ल्याएको “दशैं ल्यायो” नामक योजनाका विजेताहरुको नाम घोषित गरेको छ । यस योजना अन्तर्गत कम्पनीले बाल्ट्राको बिग तथा स्मल एप्लाइन्सेसको खरिदमा लक्की ड्र मार्फत ५१ जना भाग्यशाली ग्राहकहरुका लागि आकर्षक उपहारहरुका साथै १ वर्षको अतिरिक्त वारेन्टी जित्ने मौका प्रदान गरेको थियो । कम्पनीले यस योजना अन्तर्गतका विजयी ग्राहकहरुको नाम आफ्नो फेसबुक पेज मार्फत सार्वजनिक गरेको छ । विजयी ग्राहकहरु मध्ये पाल्पाका घन बहादुर सरुले बुटवलकाे भाटभटेनीबाट खरिद गरेका बाल्ट्रा एप्लाइन्सेस्मा बम्पर उपहार स्वरुप बाल्ट्राको ५५ इञ्च स्मार्ट टि.भी. जित्न सफल भएका छन् । त्यसैगरी उक्त योजना अन्तर्गत २ जनाले ४० इञ्च टि.भी., ३ जनाले ३२ इञ्च टि.भी., ५ जनाले साउण्ड बार, १० जनाले मिक्सर ग्राइन्डर, १५ जनाले राईस कुकर, र १५ जनाले आइरन जस्ता आकर्षक उपहारहरु जितेका छन् । बाल्ट्रा होम एप्लाइन्सेस्ले विगत १० वर्षदेखि ईलेक्ट्रोनिक तथा घरेलु सामानहरुमा विविध र नवीन उत्पादनहरु उत्पादन गर्दै आएको छ ।
केदारेश्वर धामलाई सेञ्चुरी बैंकको सहयोग, भक्तजनहरू लाभान्वित हुने
काठमाडौं । सेञ्चुरी कमर्सियल बैंकको बाँसगढी शाखाले केदारेश्वर धामलाई पानी ट्यांङ्की साथै टिकट हस्तान्तरण गरी सहयोग गरेको छ । बैंकले संस्थागत सामाजिक उत्तरदायित्व अन्तर्गत यस धाममा भ्रमणको लागि आउने भक्तजनको लागी सफा पानी उपलब्ध गराउनको निम्ती एक थान एक हजार लिटरको पानी ट्यांङ्की र धामको नियमित सरसफाईको लागी २० रुपैयाँका ५ हजार थान टिकट हस्तान्तरण गरेको हो । बैंकका बाँसगढी शाखाका शाखा प्रबन्धक प्रदीप खरेलले केदारेश्वर धामका सञ्चालक समितिका अध्यक्ष कृष्ण प्रसाद बास्तोलालाई उक्त पानी ट्यांङ्की र टिकट हस्तान्तरण गरेको हो । केदारेश्वर धाममध्ये पश्चिम विकास क्षेत्रको बर्दिया जिल्ला बाँसगढीमा रहेको र यो मध्यपश्चिम विकास क्षेत्रकै ठुलो शिबलिङ्ग हुनुका साथै नेपाल सरकारको सय पर्यटकीय गन्तव्यमा पर्न सफल धाम हो । बैंकले आफ्नो संस्थागत सामाजिक उत्तरदायित्व अन्तर्गत शिक्षा, स्वास्थ्य, वातावरण तथा अन्य क्षेत्रमा थुप्रै कार्यक्रमहरु गर्दै आएको छ ।
खुशीकाे खबरः अब घरघरमै वृद्धवृद्धाकाे स्वास्थ्य जाँच
तानसेन । पाल्पा पूर्वखोलामा घरघरमै स्वास्थ्यकर्मी आएर आफूहरुको स्वास्थ्य जाँच गरिदिँदा ज्येष्ठ नागरिक दङ्ग छन् । हिँडेर स्वास्थ्य केन्द्रसम्म पुग्न नसक्ने वृद्धवृद्धालाई औषधि गरिदिन घरमै स्वास्थ्यकर्मी आउँछन् । पूर्वखोलामा दैनिक बिरामी जाँचको सुविधा घरमै छ । पूर्वखोलाका ९० वर्षीय डिल्लीसरा आलेले हिँडेर स्वास्थ्यचौकी पुग्ने अवस्था नहुँदा डाक्टर घरमै आएर जाँच गर्दा निकै खुशी लागेको बताए । ‘आफ्ना छोराछोरीले झैँ घरमै आएर स्वास्थ्य अवस्था बुझ्ने र औषधि दिने गरेको देख्दा अचम्म लाग्छ”, आलेले भने, ‘गाउँमै सिंहदरबार आउँछ भन्थे, हो रैछ । योभन्दा राम्रो खबर के हुन्छ र ?’ वृद्ध र शारीरिक हिसाबले कमजोर नागरिकलाई स्वास्थ्य जाँच तथा उपचारका निम्ति रिङ्नेरह स्वास्थ्यचौकीका कर्मचारी घरघरमै पुग्ने गरेको गाउँपालिकाका अध्यक्ष नुनबहादुर थापाले जानकारी दिए । उनले प्रदेश नम्बर ५ सरकारको समन्वयमा गाउँपालिकाभरिका ज्येष्ठ नागरिकको स्वास्थ्य परीक्षण गरिने अभियान नै रहेको जानकारी दिएका छन् । पूर्वखोला–२ जल्पाका ८९ वर्षीय खडानन्द अधिकारी पनि घरमा स्वास्थ्यकर्मी आएर उपचार गर्छन् भन्ने कहिल्यै नसोचेको बताए । उनले घरमै आएर स्वास्थ्य परीक्षण गरेर औषधि पाउँदा बूढेसकालमा हिँडेर स्वास्थ्य केन्द्र धाउन नपरेकामा खुशी व्यक्त गरे । चौरासी वर्षका नागरिकलाई घरघरमै पुगेर रक्तचाप, ग्याष्ट्रिकलगायत रोगको परीक्षण गरी खानपान, स्याहारसुसार र बसाइका सन्दर्भमा परामर्शसमेत दिने गरिएको रिङ्नेरह स्वास्थ्यचौकीका प्रमुख श्रीराज आचार्यले बताए । ज्येष्ठ नागरिकलाई स्वास्थ्य जाँचसँगै आवश्यकतानुसार निःशुल्क औषधिसमेत प्रदान गरिएको पूर्वखोला गाउँपालिका, स्वास्थ्य शाखा प्रमुख मोहन ढकालले जानकारी दिए । प्रदेश सरकारले ८४ वर्ष उमेरमाथिका नागरिकको उपचारमा समन्वय गरेको र गाउँपालिकाको पनि छुट्टै ८० वर्षमाथिका नागरिकको परीक्षण अभियान जारी रहेको गाउँपालिकाले जनाएको छ । पालिकाका छवटै वडामा पोषणका निम्ति हर्लिक्सलगायत गाउँपालिकाले दिन मिल्ने खालका औषधि वितरण तथा ज्येष्ठ नागरिकको स्वास्थ्य अवस्थाबारेमा अभिलेख राख्ने कार्यक्रम भइरहेका छन् । गाउँपालिकाले नागरिक स्वास्थ्य परीक्षणसँगै अनिवार्य स्वास्थ्य संस्थामै सुत्केरी हुनुपर्ने व्यवस्था, गर्भवतीलाई अण्डा वितरण, सुत्केरीलाई जाउलो र जुवानोको झोल खुवाउने अभियान, स्वास्थ्य संस्थामै सुत्केरी हुनेका निम्ति नेपाल सरकारले दिनेबाहेक गाउँपालिकाबाट रु ३०० देखि ६०० प्रदान, सुत्केरीलाई अनिवार्य बेलाबेला घरमै पुगेर स्वास्थ्य परीक्षणलगायत काम गर्दै आएको पूर्वखोला १ का वडाध्यक्ष भोगबहादुर थापाले जानकारी दिनुभयो । गाउँपालिकामा अहिले ८० वर्षमाथिका करिब २५० को हाराहारीमा ज्येष्ठ नागरिक रहेको गाउँपालिकाको तथ्याङ्क छ ।रासस
कम उतार चढावको माछापुच्छ्रे बैंकको सेयरमा लगानी गर्नु कति उत्तम ? (समग्र विश्लेषण)
काठमाडौं । माछापुच्छ्रे बैंकले चालु आर्थिक वर्षको ६ महिनामा ८२ करोड ९१ लाख रुपैयाँ नाफा गरेको छ । गत वर्षको यही अवधिको तुलनामा बैंकको नाफा ५.१८ प्रतिशतले बढेको छ । पहिलो त्रैमाशको तुलनामा भने बैंकको नाफा १८ प्रतिशतले बढेको छ । बैंकले पहिलो त्रैमाशसम्ममा ३७ करोड ६० लाख नाफा गरेकोमा दोस्रो त्रैमाशको तीन महिनामा ४४ करोड ५८ लाख गरेको थियो । बैंकले हालसम्मको नाफाको आधारमा लगानीकर्तालाई ६० करोड ६३ लाख रुपैयाँ वितरण गर्न सक्छ । यो भनेको चुक्ता पुँजीको आधारमा ७.१६ प्रतिशत हो । सेयर प्रिमयमको रुपमा बैंकसँग ३ करोड ८ लाख छ । योसहित लाभांश क्षमता ७.५३ प्रतिशत रहेको देखिन्छ । –दोस्रो त्रैमाशमै करीब ८ प्रतिशतको लाभांश क्षमता –महतो समूहको पकड –इक्रा भन्छः मध्यम खेलाडी –लगानी अगाडी ध्यान दिनुपर्ने अवस्था यद्यपि माछापुच्छ्रे बैंकको सेयर मूल्यमा धेरै उतार चढाब देखिदैन । यही सन्दर्भमा बैंकको सेयरमा लगानीका लागि कस्तो रणनीति अपनाउनु पर्ला भन्ने दृष्टिको यो सामग्री तयार पारिएको छ । सन् १९९८ मा पहिलो क्षेत्रीय वाणिज्य बैंकको रुपमा माछापुच्छ्रे बैंकको स्थापना भएको हो । सन् २००० अघिसम्म यो बैंकको केन्द्रीय कार्यालय पोखरामा नै रहेर सञ्चालन भइरहेको थियो । हाल १ सय ५१ शाखाबाट सेवा दिइरहेको बैंकको १ सय ३८ वटा शाखारहित बैंकिङ सेवा र १ सय ८६ वटा एटिएम छन् । अन्तिम दुई दिनमा पहिलो दिन सानो सेतो मैनवत्ति र अन्तिम दिन कालो मैनवत्ति बनाएको छ । यसले मूल्य घट्न सक्ने संकेत देखाइरहेको छ । यद्यपि यो दरिलो संकेत देखिदैन । कम्पनीले हालै धितोपत्र बजारमा बिक्री प्रबन्धक, सेयर प्रत्याभूतीकर्ता, सेयर रजिष्ट्रार, लगानी व्यवस्थापकको रुपमा काम गर्ने गरी मर्चेन्ट बैंकर कम्पनी स्थापनाको अनुमति पाएको छ । १०.२६ प्रतिशत बेस रेट रहेको बैंकले यसमा अधिकतम ६ प्रतिशतसम्म कर्जाको व्याजदर तोकेको छ । बचतमा बैंकले ४ प्रतिशतदेखि अधिकतम ९.२५ प्रतिशतसम्म व्याज तोकेको छ । उपलब्धि एक वर्षअघि बैंकले आइएसओ सर्टिफिकेशन पाएको छ । बैंकले १७ डिसेम्बर २०२१ सम्मको लागि यो प्रमाणपत्र पाएको हो । बैंकको गुणस्तर व्यवस्थापन प्रणालीको लागि यस्तो प्रमाणपत्र दिइएको उल्लेख छ । महतो समूहको पकड बैंकको अध्यक्षमा डा. विरेन्द्र महतो छन् भने प्रमुख कार्यकारी अधिकृतमा सुमन शर्मा छन् । महतो समूहको बैंकमा २५ प्रतिशतभन्दा धेरै र पूर्व अध्यक्ष सूर्यबहादुर केसीलगायतको समूहको १५.३३ प्रतिशतभन्दा बढी सेयर लगानी छ । औसत १६ प्रतिशतको लाभांश बैंकले विगत ५ वर्षमा बार्षिक औसत १६ प्रतिशत लाभांश दिएको छ । गत आवमा नाफापछि बैंकले ५ प्रतिशत बोनस र ११ प्रतिशत नगद लाभांश दिएको हो । वित्तीय अवस्था बैंकले चालु आर्थिक वर्षको दोस्रो त्रैमाशमा ८२ करोड ९१ लाख रुपैयाँ नाफा गरेको छ । गत वर्षको यही अवधिको तुलनामा बैंकको नाफा ५.१८ प्रतिशतले बढी हो । पहिलो त्रैमाशको तुलनामा भने बैंकको नाफा १८ प्रतिशतले वृद्धि गर्न सफल भएको छ । बैंकले पहिलो त्रैमाशसम्ममा ३७ करोड ६० लाख नाफा गरेकोमा दोस्रो त्रैमाशको तीन महिनामा ४४ करोड ५८ लाख गरेको थियो । बैंकले हालसम्मको नाफाको आधारमा लगानीकर्तालाई ६० करोड ६३ लाख रुपैयाँ वितरण गर्न सक्छ । यो भनेको चुक्ता पुँजीको आधारमा ७.१६ प्रतिशत हो । सेयर प्रिमियमको रुपमा बैंकसँग ३ करोड ८ लाख छ । यो सहित लाभांश क्षमता ७.५३ प्रतिशत रहेको देखिन्छ । बैंकको सञ्चित तथा जगेडा कोषमा २ अर्ब ६६ करोड रुपैयाँ रकम छ । बैंकलाई पुँजी केही सस्तो पर्न थालेको कोष लागतमा भएको सामान्य कमीले देखाउछ । कोष लागत ७.९८ प्रतिशतबाट घटेर ७.६४ मा सिमित भएको छ । यद्यपि ५ अर्ब ६८ करोड ब्याज आम्दानी गरेको बैंकको खुद व्याज आम्दानीमा पनि १७ प्रतिशतले वृद्धि भएर १ अर्ब ९८ करोड पुगेको छ । बैंकको व्याज खर्च ३ अर्ब ६९ करोड छ । खराब कर्जाको दरमा सीमान्त दरमा बढेको बैंकले खराब कर्जाको आधारमा सो रकमको २ सय ७९ प्रतिशत रकम राखेको छ । बैंकले ५६ प्रतिशतले प्रावधान रकम वृद्धि गरेर १७ करोड राखेको छ । निक्षेप प्राथमिक पुँजीको आधारमा कर्जा लगानी अनुपात ७८.७२ छ । बैंकसँग थप लगानीको लागि मार्जिन कम नै छ । बैंकको प्रतिसेयर आम्दानी १९.४३ प्रतिशत, मूल्य आम्दानी अनुपात ११.७८ प्रतिशत र प्रतिसेयर नेटवर्थ १ सय ३३ प्रतिशत छ । केही महिनाअघि बैंकले इक्रा नेपालबाट ऋणपत्रको रेटिङ समेत गरेको छ । बैंकले ए माइनस रेटिङ पाएको थियो । इक्रा नेपालका अनुसार बैंकका केही पक्षहरु यी हुन्ः –३/४ वर्ष यता खुद व्याज मार्जिन ३.५ प्रतिशत –आवधिक निक्षेप उच्च, बजारमा रहेको तरलता समस्याबाट केही राहत –निक्षेप संरचना मध्यम किसिमको (सस्तो लागतको निक्षेप ३४ प्रतिशत, समग्र क्षेत्रको यस्तो औसत निक्षेप ४१ प्रतिशत छ) –निक्षेप र कर्जा केन्द्रीकरण (प्रमूख २० ग्राहकमा निक्षेप २३ प्रतिशत, कर्जा २२ प्रतिशत लगानी) –भाका नाघेका कर्जाको दर बढ्दो क्रममा, भाका पुगेको कर्जा ४ महिनामा ५ प्रतिशतबाट बढेर ७.५ प्रतिशत –समग्र वाणिज्य बैंकहरुमा मध्यमस्तरको खेलाडी (बजार हिस्सामा बैंकको निक्षेप ३.०२ प्रतिशत र कर्जा ३.२३ प्रतिशत) प्राविधिक विश्लेषण बैंकको सेयर मूल्यले एक वर्षयता २ सय ७८ को उच्च विन्दु बनाएको छ । सो बिन्दुबाट घटेर २ सय १३ को न्युनसम्म पुगेको मूल्य फर्किएर २ सय ४० रुपैयाँसम्म आएको छ । यसले हालसम्म सो उच्च विन्दुबाट ४१ प्रतिशतको रिट्रेस गरेको देखाउँछ । हालै ३८ प्रतिशतको रिटे«स पार गरेकोले यसमा ठूलो प्रतिरोध भने देखिदैन । रिटे«समेन्टमा २३, ३८, ६० र ७८ को विन्दुलाई प्रतिरोधको विन्दु पनि मानिन्छ । बैंकको सेयरमा खासै उतार चढाव छैन । एक वर्षमा ७३ रुपैयाँको मूल्य अन्तरमा तल माथि गरिरहेको छ । बैंकको सो अवधिको स्ट्याण्डर्ड डेभिएसन ०.२२ (२२) छ । बैंकिङ समूहको गत अप्रिल ८ यता सूचकको स्टेयाण्डर्ड डेभिएसन ४० हुँदा सोही अवधिको यस बैंकको २० छ । समूह सूचकभन्दा यसमा कम उतार चढाव देखिन्छ । मूल्य केही सातादेखि कारोबारको सन्तुलिन क्षेत्रमा रहेको १४ दिने आरएसआई सुचकले देखाइरहेको छ । आरएसआईको स्केल ६० मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ । वित्तीय विवरण प्रकाशन भएयता बैंकको सेयर मूल्य झिनो रुपमा भएपनि वृद्धिको दिशामा छ । हुन त पछिल्लो समय सेयर बजारमा उत्साह नै थपिएको आभास मिल्छ । रेखाचित्रको आधारमा केहीदिन अघि मात्र बैंकको सेयर मूल्यले डब्लु आकृति बनाएर बढ्न लागेको संकेत गरेको छ । हालै सिम्पल मुभिङ एभरेज रेखा नजिकिएका छन् । तर ७ दिने रेखा नै २१ दिने रेखा माथि छ । यद्यपि ध्यान दिनुपर्ने देखिन्छ । पीभट विश्लेषणले भने अब बजार बढ्ने क्रममा नै रहे एक महिनामा २ सय ५१ मा पहिलो प्रतिरोध र घट्ने क्रममा रहे २ सय २५ मा पहिलो टेवा पाउने देखाउँछ । बैंकको सेयर मूल्यले अन्तिम दुई दिनमा पहिलो दिन सानो सेतो मैनवत्ति र अन्तिम दिन कालो मैनवत्ति बनाएको छ । यसले मूल्य घट्न सक्ने संकेत देखाइरहेको छ । यद्यपि यो दरिलो संकेत देखिदैन । लगानीको लागि आगामी दिनको कारोबार हेर्नु उपयुक्त हुन्छ । सम्बन्धित सामग्री ६ महिनामा माछापुच्छ्रे बैंकको नाफा ८३ करोड रुपैयाँ
नेप्से १२ अंकले घट्दा साढे एक अर्बको कारोबार, दुई कम्पनीका लगानीकर्ताले कमाए ९ प्रतिशत बढी
काठमाडौं । मंगलबारको नेप्से परिसूचक १२.०९ अंकले घटेको छ । बजार खुलेदेखि उतारचढाव देखिएको बजारमा काराेबार बन्द हुँदा परिसूचक ०.९० प्रतिशतले घटेर १३३७ अंकमा झरेकाे छ । दिनभरको बजारमा कूल एक अर्ब ५७ करोड रुपैयाँ बराबरको सेयर कारोबार भएको छ । कूल १७६ कम्पनीको कारोबार भएको बजारमा सबैभन्दा बढी कारोबार गर्नेमा बीमा कम्पनीहरु अग्रस्थानमा रहेका छन् । सबैभन्दा बढी नेपाल इन्स्योरेन्स कम्पनीको १० करोड ७० लाख रुपैयाँ बराबरको सेयर कारोबार भएको छ । त्यस्तै, दोश्रो र तेश्रो स्थानमा नेको इन्स्योरेन्स कम्पनी र नेपाल लाइफ इन्स्योरेन्स कम्पनी रहेको छ । यी कम्पनीको क्रमशः ६ करोड १३ लाख र ४ करोड ५२ लाख रुपैयाँ बराबरको सेयर खरिद बिक्री भएका छन् । दोहोरो अंकले ओरालो लागेको बजारमा दुई कम्पनीका सेयरधनीले ९ प्रतिशतभन्दा बढी कमाएका छन् ।सर्पोट माइक्रोफाइनान्स वित्तीय संस्थाका सेयरधनीले सबैभन्दा बढी अर्थात ९.९९ प्रतिशत कमाएका छन् । त्यस्तै, दिब्यश्वरी हाइड्रोपावर कम्पनीको सेयर मूल्य ९.६२ प्रतिशतले बढेको छ । बजारमा चार समूह बाहेक बाँकी समूह राताम्मे देखिएका छन् । सबैभन्दा बढी जीवन बीमा समूह ७६ अंकले घटेको छ । होटल ७४, माइक्रोफाइनान्स २२, हाइड्रोपावर १६, बैंकिङ १३ र उत्पादनमूलक ११ अंकले घटेका छन् । सबैभन्दा निर्जीवन बीमा समूह २८ अंकले बढेको छ । विकास बैंक, फाइनान्स र अन्य समूह सामान्य अंकले बढेका छन् ।