नेपाल उद्योग वाणिज्य महासंघकाे साधारणसभा जेठ ७ र ८ गते हुने
काठमाडौं । नेपाल उद्योग वाणिज्य महासंघ को साधारणसभा जेठ ७ र ८ गते हुने भएको छ । सरकारले कोरोना भाइरस (कोभिड -१९) नियन्त्रणका लागि कडाई गरेसँगै चैत २८ र २९ गते हुने भनिएको साधारणसभाको मिति महासंघले सारेको हो । उपप्रधानमन्त्री ईश्वर पोखरेलको संयोजकत्वमा गठित उच्चस्तरीय समितिले कोभिड १९ को संक्रमण नियन्त्रण तथा रोकथाम लागि बसेको बैठकले भिडभाडजन्य कार्यका लागि थप कडाइ गरेसँगै महासंघको उक्त निर्णय गरेको जनाएकाे छ । बिहीबार महासंघको अध्यक्ष भवानी राणा संयोजकत्वमा उपस्थिति पदाधिकारीहरुको सहमतिमा साधारणसभाको मिति सार्ने निर्णय भएको हो ।
फोन पेको ‘पैसा लिने र तिर्ने, दुबइ उड्ने’ योजना तत्कालका लागि स्थगित
काठमाडौं । फोन पेको ‘पैसा लिने र तिर्ने, दुबइ उड्ने’ योजना तत्कालका लागि स्थगित भएको छ । ११ हप्तासम्म सम्पन्न भएको यस उपहार योजनामा हालसम्म चार जनाले दुबई ट्रिप, २२ जनाले २५ हजार रूपैयाँ बराबरको स्मार्ट फोन, दैनिक उपहार योजना अन्तरगत ३ सय ८५ जना ग्राहकले शतप्रतिशत क्यासब्याक पाएका छन् भने ३ सय ८५ जना मर्चेन्टले आकर्षक उपहार प्राप्त गरेका छन् । विश्वव्यापी महामारी निम्त्याएको कोरोना भाइरस (कोभिड १९) का कारण नेपाल सरकार स्वास्थ्य तथा जनसंख्या मन्त्रालयले भिडभाड नगर्न गरेकोे निर्देशन अनुसार फोन पे उपहार योजना कमिटीले अर्को सूचना जारी नभएसम्मका लागि यस उपहार योजना तत्कालका लागी स्थगित गरेको छ । स्वास्थमा पर्ने जोखिमलाई मध्यनजर गर्दै दुबई भ्रमण ट्रिप जित्ने विजेतालाई समेत वर्तमान विकराल अवस्था नियन्त्रणमा आएपछि मात्र भ्रमण गराइनेछ । फोनपेले आफ्ना अन्य सेवा तथा सुविधा निरन्तर रूपमा पूर्ण क्षमताका साथ जारी राख्नेछ ।
पूर्व गभर्नर क्षेत्रीको प्रस्तावः दैनिक उपभोग्य वस्तुको भन्सार घटाऔं, करको किस्ता तिर्ने म्याद पछि सारौं
काठमाडौं । राष्ट्रिय योजना आयोगका पूर्वउपाध्याक्ष दीपेन्द्र बहादुर क्षेत्रीले कोरोना भाइरसका कारण नेपाली अर्थतन्त्रमा परेको असर न्यूनिकरणका कार्यक्रम सुरु गरिहाल्नुपर्ने बताएका छन् । कोरोना भाइरस सन्त्रासको कारण नेपाली अर्थतन्त्रमा गम्भीर असर पर्ने भन्दै क्षेत्रीले असर न्यूनिकरणका कार्यक्रम सुरु गरिहाल्दा दैनिक जीवनयापनमा सहयोग हुने तथा निजी क्षेत्रले राहत महसुस गर्ने भएकोले आर्थिक क्रियाकलापलाई चाढै त्राण दिन सहयोग पुग्ने बताएका हुन् । क्षेत्रीले दैनिक उपभोग्य तथा अत्यावश्यक बस्तुको अभाव सिर्जना हुन सक्ने भन्दै यसको आपूर्ति बढाउन भन्सार महसुल कम गर्नुपर्ने बताए । संकटको समयमा सरकारले कर तथा बैंकिङ सहुलियत दिएर भएपनि निजी क्षेत्रलाई सक्रिय बनाइराख्न जरुरी भएको क्षेत्रीको भनाइ छ । ‘दैनिक उपभोग्य तथा अत्यावश्यक बस्तुको कृत्रिम वा बढी संचयका कारण अभाव सिर्जना हुन सक्छ, यस्ता बस्तुमध्ये नेपालमा उत्पादन हुनेभन्दा पनि आयातितको अंश धेरै ठूलो छ, आपूर्ति बढाउने हो भने यस्ता बस्तुको अभाव हुदैन, त्यसैले दैनिक उपभोग्य तथा अत्यावश्यक बस्तुको भन्सार महसुल कम गर्नु उपयुक्त हुन्छ,’ क्षेत्रीले विकासन्युजसँग भने । कोरोना भाइरस सन्त्रासकै कारण विश्व अर्थव्यवस्थामा गम्भीर असर देखिइसकेको भन्दै क्षेत्रीले असर न्यूनिकरणका लागि विभिन्न देशले विभिन्न प्रकारका राहत कार्यक्रम ल्याएको स्मरण गरे । ‘बेलायत, अमेरिका जस्ता विकसित देशहरुले आर्थिक क्रियाकलापलाई पुनरताजगी गर्न विभिन्न प्रकारका राहत कार्यक्रम घोषणा गरेर कार्यान्वयन थालिसकेका छन्, विकसित देशहरुले जस्तो हामीले राहत दिन सक्ने अवस्था नरहला, तर पनि सरकारले गर्न सक्नेसम्मको राहत दिएर सरकार भएको महसुस गराउनु पर्छ, यसको सबैभन्दा उपयुक्त विकल्प भनेको चैत मसान्तमा तिर्नुपर्ने आयकरको दोस्रो किस्ताको म्याद केही समय पर सार्न सकिन्छ,’ क्षेत्रीले भने । अहिलेको व्यवस्था अनुसार एक आर्थिक वर्षमा हुन सक्ने अनुमानित आयएको पहिलो किस्ताको रुपमा पुस मसान्तमा ४० प्रतिशत, चैत मसान्तमा ३० प्रतिशत र असार मसान्तमा बाँकी ३० प्रतिशत आय कर सरकारलाई बुझाउनु पर्छ । क्षेत्रीले चैत मसान्तमा तिर्नुपर्ने दोस्रो किस्तालाई केही पर सार्नु उपयुक्त हुने सुझाव दिएका हुन् । ‘सरकारले छुट्टयाएको बजेट नै खर्च गर्न नसकेको भन्ने तथ्यहरु बाहिर आएका छन्, भएको पैसा पनि खर्च गर्न नसकिरहेको यथार्थ र करदाताहरु समस्यामा परेको बेलामा सरकारले उचित र साहसिक निर्णय लिन सक्नुपर्छ, यो भनेको चैत मसान्तमा तिर्नुपर्ने आयकरको किस्ता केही पर सार्ने भन्ने हो, यसो गर्दा सरकारलाई खासै नोक्सान पर्दैन, निजी क्षेत्रले ठूलो राहत महसुस गर्छ,’ क्षेत्रले भने । संकटको बेलामा नेपाल राष्ट्र बैंकले पनि नीतिगत निर्णय गरेर उद्योग व्यवसायलाई राहत दिन सक्ने क्षेत्रीले बताए । ‘चैत मसान्तमा सरकारलाई आय कर मात्रै होइन, बैंक तथा वित्तीय संस्थाबाट लिइएको ऋणको साँवा व्याजको किस्ता पनि बुझाउनु पर्छ, बैंक वित्तीय संस्थाले चैत मसान्तमा प्रत्येक चैमासमा प्रकाशित गर्ने अपरिष्कृत वित्तीय विवरण प्रकाशित गर्ने समय पनि हो, त्यसैले चैत मसान्तमा साँवा व्याजको किस्ता असुलीमा बैंक वित्तीय संस्थाले बढी कस्ने गरेका पनि हुन्छन्, यसमा राष्ट्र बैंकले नै नीतिगत निर्णय गरेर केही सहुलियतपूर्ण व्यवस्था गरिदिने हो भने निजी क्षेत्रले राहत महसुस गर्न सक्छ,’ नेपाल राष्ट्र बैंकको पूर्व गभर्नर समेत रहेका क्षेत्रीले भने । राष्ट्र बैंकले यस्तो साँवा व्याजको किस्ता तिर्ने समय केही पर सारिदिन सम्भव नभए पनि तिर्न बाँकी व्याजलाई साँवामा जोड्न मिल्ने व्यवस्था गरिदिने हो भने पनि निजी क्षेत्रले धेरै राहत महसुस गर्ने उनको भनाइ छ । क्षेत्रीले गरेका यी ३ प्रश्ताव कार्यान्वयन हुने वा नहुने भन्ने यकिन भने छैन । निजी क्षेत्रले पनि क्षेत्रीले गरेको जस्तो प्रस्ताव कार्यान्वयन भएमा आफूहरुलाई राहत हुने बताउँदै आएको छ । तर, सरकारले अहिलेसम्म राहत प्याकेज वा के कस्तो सुविधा र सहुलियत दिने भन्नेमा कुनै सार्वजनिक गरेको छैन । कोरोना सन्त्रासको कारण नेपाली अर्थतन्त्रका कुन कुन क्षेत्रमा के कस्तो असर पर्न सक्छ भनेर अर्थमन्त्रालय तथा नेपाल राष्ट्र बैंकले अध्ययन सुरु गरिसकेको सरकारी अधिकारीहरुले बताएका छन् । अर्थमन्त्रालयले असरको बारेमा अझै केही नबताए पनि राष्ट्र बैंकले भने सम्भावित असरको बारेमा प्रारम्भिक अनुमान सार्वजनिक गरेको छ ।
सेयर लगानीकर्ता ब्रोकरको अफिसमा जान नपाउने
काठमाडौं । लगानीकर्ताले धितोपत्र दलाल व्यवसायी (सेयर ब्रोकर) को अफिसमा गएर टिभीमा सेयर कारोबारको लाइभ हेर्न नपाउने भएका छन् । बोर्डले बढी भिडभाड नगर्न र लगानीकर्ता ब्रोकर अफिसमा आउने अवस्था निरुत्साहित होस भने यस्तो निर्णय गरेको हो । कोरोना संक्रमण सन्त्रासको कारण पुँजी बजारको नियामक निकाय धितोपत्र बोर्डले स्क्रीन एक्जिविसन रुम बन्द गर्न निर्देशन दिएको कारण टिभी हेर्न नपाइने भएको हो । पुँजी बजारको नियामक निकाय धितोपत्र बोर्डले सेयर ब्रोकरलाई विभिन्न ५ बुदे निर्देशन दिएको छ । कोरोना संक्रमण नियन्त्रण तथा रोकथामका लागि सरकारले गरेको विभिन्न निर्णय तथा सेयर लगानीकर्ता, धितोपत्र दलाल व्यवसायी र अन्य सरोकारवालासँगको परामर्शमा यस्तो निर्णय गरिएको बोर्डको भनाइ छ । नोभल कोरोना रोग रोकथाम तथा नियन्त्रण उच्चस्तरीय समन्वय समितिले ‘अत्यावश्यक कामका बाहेक आवतजावत, हिडडुल नगर्ने, सार्वजनिक स्थलहरुमा २५ जनाभन्दा बढी मानिसहरु भेला नहुने, स्कूल, कलेज, सरकारी, सामूदायिक तथा निजी क्षेत्रका तालिम केन्द्र तथा प्रतिष्ठानहरु एवं निजी क्षेत्र क्षेत्रका शैक्षिक परामर्श केन्द्रहरुबाट संचालित कार्यक्रमहरु बन्द गर्ने’लगायतका विभिन्न १८ वटा निर्णय गरेको थियो । सोही निर्णयका आधारमा बोर्डले धितोपत्र बजार सम्बद्ध विभिन्न पाँच लगानीकर्ता संघले पेश गरेको ज्ञापन पत्र तथा उक्त पाँच लगानीकर्ता संघहरुका प्रतिनिधिहरु, स्टक एक्सचेञ्जका उच्च पदाधिकारीहरु, स्टक ब्रोकर एशोसिएसनका पदाधिकारी र बोर्डका पदाधिकारीहरु बीच कोरोना भाइरसका कारणबाट फैलिएको त्रास र यसवाट विभिन्न आर्थिक गतिविधिहरुमा परेको प्रभाव तथा असर सम्बन्धमा छलफल भएको थियो । उक्त छलफल पश्चात् नोभल कोरोना रोग रोकथाम तथा नियन्त्रण उच्चस्तरीय समन्वय समितिको पछिल्लो निर्णय र बजार सम्बद्ध पक्षहरुको हालको परिस्थितिप्रतिको चासो तथा गाम्र्भियता समेतलाई दृष्टिगत गरी विभिन्न निर्णय गरिएको बोर्डको भनाइ छ । यस्ता छन् निर्णयहरु (१) धितोपत्र दलाल व्यवसायीहरुले स्क्रीन एक्जिविसन रुम बन्द गर्ने (२) कार्यालयमा कर्मचारी बाहेक एक पटकमा पाँच जनाभन्दा बढीको संख्यामा ग्राहकको भिडभाड नहुने व्यवस्था गर्ने । (३) कार्यालयमा कर्मचारीहरु तथा लगानीकर्ताहरु प्रवेश गर्दा हात सफा गर्ने, स्यानिटाइजर तथा मास्कको प्रयोग र तापक्रम मापन कार्य गर्ने व्यवस्था गर्ने । ४) कोरोना भाइरस तथा यसबाट बच्ने उपायहरु सम्बन्धी सूचनामूलक जानकारी प्रवेशद्वारमा राख्ने । (५) नोभल कोरोना रोग रोकथाम तथा नियन्त्रण उच्चस्तरीय समन्वय समितिको मिति २०७६।१२।०५ को सम्बन्धित निर्णयहरु कार्यान्वयन गर्ने व्यवस्था मिलाउने ।
टेलिकमले ल्यायो ‘एनटी सूचनाको संसार’ सेवा, ३२१०० नम्बर डायल गरी कोरोनाबारे निःशुल्क सुन्न सकिने
काठमाडौं । नेपाल टेलिकमले ‘एनटी सूचनाको संसार’ सेवा उपलब्ध गराएको छ । उक्त सेवामार्फत टेलिकमले कोरोना भाइरस (कोभिड–१९) बारे जानकारीमूलक सामग्री आफ्नो मोबाइलमार्फत ३२१०० नम्बर डायल गरी निःशुल्क सुन्न सकिने व्यवस्था गरेको हो । उक्त नम्बरमा कल गरे पश्चात् कोरोना भाइरस (कोभिड–१९) के हो, यसका लक्षणहरु, पैmलने तरिका, उपचार विधि, संक्रमणबाट बच्न अपनाउनु पर्ने उपायहरु र अपनाउनु पर्ने सावधानी बारे विश्व स्वास्थ्य संगठनले जारी गरेका सूचकहरुका बारेमा जानकारी प्राप्त गर्न सकिन्छ । साथै यस सम्बन्धी थप जानकारी लिनका लागि नेपाल सरकारका हटलाइन नम्बरहरु समेत यहींबाट थाहा पाउन सकिन्छ । नेपाल टेलिकमले गत असार महिना देखि नै ‘एनटी सूचनाको संसार’ सेवा कम्पनीका मोबाइल ग्राहकलाई उपलब्ध गराइरहेको छ । यो एक प्रकारको कल–इन सिष्टम हो, जसमा नेपाल टेलिकमको मोबाइलमार्फत ३२१०० मा कल गरेर ध्वनी निर्देशन पालना गरी नेपाली भाषामा कृषि, स्वास्थ्य, समाचार, मौसम, प्राकृतिक विपत् सम्बन्धी विभिन्न जानकारी निःशुल्क प्राप्त गर्न सकिन्छ । विभिन्न जानकारीहरु नेपाली भाषामा सुन्न पाइने हुनाले ‘एनटी सूचनाको संसार’ सेवाबाट ग्राहकवर्ग लाभान्वित हुने विश्वास बैंकले लिएको छ ।
स्वदेश फर्किने विदेशी पर्यटकको घुइँचो
काठमाडौं । जर्मन नागरिक पेग्गी गेला बिहिबार काठमाडौं स्थित कतारवेजको टिकट काउण्टरमा लाइनमा व्यस्थ देखिन्थिन् । आफ्नै देश जर्मन फर्कनका लागि उनी निराश मुद्रामा एकोहोरो चिहाइरहेकी थिइन् । उनी निराश मात्र होइनन् थकित पनि उतिकै भएको उनको मुहारबाट प्रष्ट झल्किन्थ्यो । स्वदेश फर्किन पाइने होकि होइन भन्ने दोधारमा देखिन्थिन् उनी । उनी जस्तै त्यो पंक्तीमा सयौं विदेशी पर्यटकहरु पंक्तिवद्ध भएर लागेका थिए । ती सबैका मुहार निन्याउरा थिए । सबै आफ्नै देश फर्किने सुरसारमा थिए । तर, टिकट पाइन्छ वा पाइँदैन भन्ने उनीहरु निश्चित थिएनन् । विश्वभर कोरोना भाइरस (कोभिड १९)को संक्रमण फैलिरहेको बेला उनीहरु त्रासमात्र होइन स्वदेश पुगेपछि जे होस् भन्ने धारणा राखे । घुम्नका लागि नेपाल आएका उनीहरु निकै त्रसित र गम्भीर देखिन्थे । पेग्गीले चाँडोभन्दा चाडो आफु घर फर्किन चाहेको बताइन् । ‘आजर भोलीमात्र एयरलाइन्सहरु चल्ने भनिएको छ, यहाँ यत्रो लाइन छ, टिकट पाइन्छ कि पाइँदैन, समस्यामा परेँ,’ उनले भनिन् । सबै एयरलाइन्सहरु रद्ध भएकोले आफुहरुलाई स्वदेश फर्किन समस्या पारेको उनले बताइन् । धेरै विदेशी पर्यटक नेपालमै भएयकोले उनीहरुलाई स्वदेश फर्कन गाह्रो भइरहेको उनीहरुको गुनोसो छ । सरकारले अन्तर्राष्ट्रिय उडानहरु रोकेसँगै उनीहरुलाई घर फर्किन समस्या भएको हो । संस्कृति पर्यटन तथा नागरिक उडड्यन मन्त्रालयका प्रवक्ता रुद्रसिँह तामाङले विदेशी पर्यटकले सहज रुपमा जान पाउने धारणा राखे । ‘लक डाउन गरेका देशका नागरिकले देश फर्कन सक्दैनन्, तर लक डाउन नगरेका नागरिकलाई हामी पठाइरहेका छौं,’ उनले भने । नेपालमा भएका विदेशी पर्यटकका सरकारसँग समन्वय गरेर उनीहरुलाई पठाउने उनको भनाइ छ । सरकारले विदेशी नागरिकको आगमनमा थप कडाइ गर्ने निर्णय गरेसँगै नेपालमा उडान गर्दै आएका १५ वटा अन्तर्राष्ट्रिय एयरलाइन्सको उडान शुक्रबार मध्यरातिदेखि रोकिने भएको छ । कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिले बुधबार युरोपका सबै मुलुकबाट आउने यात्रुलाई प्रतिबन्ध लगाएपछि उडान रोकिन लागेको हो । हाल काठमाडौंस्थित त्रिभुवन अन्तर्राष्ट्रिय विमानस्थलमा २६ वटा विदेशी र तीन वटा नेपाली गरी २९ वटा एयरलाइन्सले उडान गर्दै आएका छन् । यो विमानस्थल बिहान ६ बजेदेखि मध्यराति ३ बजेसम्म सञ्चालन हुँदै आएको छ । समितिले पश्चिम एसियाअन्तर्गत खाडी मुलुक, टर्की, मलेसिया, दक्षिण कोरिया र जापानबाट आउने तथा ती मुलुकलाई ट्रान्जिट बनाई जुनसुकै मुलुकबाट आउने यात्रुलाई २० मार्च (७ गते शुक्रबार) मध्यरातिदेखि लागू हुने गरी १५ अप्रिल (वैशाख ३ गते) सम्म आगमनमा प्रतिबन्ध लगाउने निर्णय गरेको छ । आवागमनमा सरकारले दोस्रोपटक गरेको कडाइसँगै मध्यपूर्वका एयर अरेबिया, फ्लाई दुबई, यूएईको इत्तिहाद एयरवेज, जजिरा एयरवेज, ओमन एयर, सलाम एयर र कतार एयरवेजको उडान रोकिने भएको छ । युरोप जोड्ने टर्किस एयरलायन्स तथा पूर्वी एसियाबाट काठमाडौं आउने हङकङको क्याथे ड्र्यागन, दक्षिण कोरियाको कोरियन एयर, मलेसियाको मलेसियन एयरलाइन्स मालिन्दो एयरको पनि शनिबार बिहानदेखि उडान रोकिने भएको छ । त्यस्तै मध्यपूर्वमा उडान गर्दै आएका नेपाल एयरलाइन्स र हिमालय एयरलाइन्सका उडान पनि रोकिने छन् । सरकारको निर्णयले भारत, थाइल्यान्ड, बंगलादेश, सिंगापुर र भुटानबाट नेपाल आउने तथा नेपालबाट यी मुलुक जाने एयरलाइन्सलाई रोकेको छैन । अस्ट्रेलिया, अमेरिकालगायतका मुलुकमा रहेका नेपाली राहदानीवाहकले यी मुलुक हुँदै काठमाडौं आउन सक्नेछन् । हाल भारतबाट इन्डिगो, एयर इन्डिया र भिस्तारा एयरलाइन्सले काठमाडौंका लागि उडान गर्दै आएका छन् भने बंगलादेशबाट विमान बंगलादेश, थाइल्यान्डबाट थाई एयर र थाई लायन एयरले उडान गर्दै आएका छन् । अन्तर्राष्ट्रिय एयरलाइन्स तथा तिनका उडानमा शनिबारदेखि कटौती हुने भएपछि २१ घण्टा सञ्चालन हुँदै आएको विमानस्थल सञ्चालनको समय पनि हेरफेर गर्नेबारे छलफल सुरु भएको प्राधिकरणले जनाएको छ ।
लोक सेवाका सबै लिखित परीक्षा स्थगित
काठमाडौं । लोक सेवा आयोगले लिने लिखित परीक्षा स्थगित भएका छन् । आयोगले ८ चैतदेखि चैत मसान्तसम्मका सबै प्रकारका लिखित परीक्षा स्थगित गर्ने निर्णय गरेको हो । कोरोना भाइरस सन्त्रासको कारण सरकारले उच्च सतर्कता अपनाइरहेको समयमा लोक सेवाले पनि आफ्ना सबै प्रकारका लिखित परीक्षा रोक्ने निर्णय गरेको हो । आयोगले निजामती कर्मचारी, सुरक्षा निकाय र संगठिन संस्थाको कर्मचारी भर्नाको लागि लिखित परीक्षा लिने गर्छ । कोरोन सन्त्रासको कारण आयोगले सबै परीक्षा रोक्ने निर्णय गरेको हो ।
हिमालयन बैंकका ग्राहकलाई सिद्धार्थ बिजनेस ग्रुप सहित १०० भन्दा बढी स्थानमा विशेष छुट
काठमाडौं । हिमालयन बैंकका ग्राहकले सिद्धार्थ बिजनेस ग्रुप सहित १०० भन्दा बढी स्थानमा विशेष छुट पाउने भएका छन् । बैंकले आफ्नो २७औं वार्षिकोत्सवको अवसरमा सेवा अभिबृद्धि गर्ने उदेश्यले, आफ्ना सम्पूर्ण ग्राहकलाई काठमाडौं, पोखरा, चितवन लगायत देशका विभिन्नस्थानमा विशेष छुटको व्यवस्था गरेको हो । यसै सन्दर्भमा बैंकले आफ्ना ग्राहकका लागि नेपालको हस्पिट्यालिटीको क्षेत्रको समुह सिद्धार्थ बिजनेस ग्रुप अफ हस्पिट्यालिटीसँग एक सम्झौता पत्रमा हस्ताक्षर गरी उक्त समुहको नेपालका विभिन्न स्थानमा रहेका १९ वटा होटल, रिसोर्ट, रेष्टुराँ, क्याफेहरुमा १० प्रतिशतको आकर्षक तथा विशेष छुटको व्यवस्था गरेको छ । बैंकका महाप्रबन्धक उज्जल राजभण्डारी तथा सिद्धार्थ बिजनेस ग्रुपका तर्फबाट निर्देशक प्रभाकर खड्काले उक्त सम्झौता पत्रमा हस्ताक्षर गरेका हुन् । बैंकका ग्राहकहरुले देशका विभिन्न स्थानमा रहेका प्रसिद्ध होटल, रेष्टुराँ, अस्पताल, गहना गृह, कपडा, चश्मा तथा घडी पसल, मोबाइल, ल्यापटप तथा सम्बन्धित समाग्री, खेलकुद समाग्री, फर्निचर, विद्युतीय दुई पांग्रे सवारी, कस्मेटिक, बुटिक लगायत अन्य स्थानहरुमा आफु हिमालयन बैंकका ग्राहक भएको कुनै पनि परिचय (डेबिट÷क्रेडिट कार्ड, चेक बुक, स्टेटमेन्ट आदि) प्रस्तुत गरेमा भारी छुट पाउने छन् । बैंकले देशभरिका विभिन्न ७५ स्थानबाट सुरु गरेका विषेश छुटको व्यवस्था हाल बढेर १०० वटा भन्दा बढी स्थानमा लागु भएको तथा निकट भविष्यमा बैंकले यस योजना देशभरि कम्तिमा २०० वटा थप स्थानहरुमा विस्तार गरि आफ्ना ग्राहकवर्गहरुलाई छुट सुविधा प्रदान गर्ने लक्ष्य लिएको छ ।