यी हुन् इङ्ल्यान्डले नर्वेलाई हराउन गर्नुपर्ने ६ मुख्य काम
काठमाडौं । तीन सातासम्म कडा संघर्ष, पुनरागमन र अन्तिम क्षणका रोमाञ्चक खेलपछि इङ्ल्यान्डले यस सप्ताहान्तमा २०२६ विश्वकपको क्वार्टरफाइनलमा नर्वेको सामना गर्दैछ । थोमस टुखेलको टोलीले प्रतियोगितामा तुलनात्मक रूपमा सहज यात्रा तय गरेको देखिए पनि त्यो यात्रा त्यति सजिलो भने थिएन । अब भने उनीहरूको अगाडि नर्वेजस्तो अझ कठिन चुनौती उभिएको छ । नर्वेको टोलीको मुख्य आकर्षण विश्व फुटबलका सुपरस्टार अर्लिङ हालान्ड हुन् । उनलाई कप्तान मार्टिन ओडेगार्ड, जुलियन रियरसनलगायत च्याम्पियन्स लिगमा अनुभवी खेलाडीहरूको साथ छ । नर्वे आफ्नो उत्कृष्ट दिनमा इङ्ल्यान्डलाई हराउन पूर्ण रूपमा सक्षम टोली हो । तर यदि ह्यारी केन नेतृत्वको इङ्ल्यान्डले यी ६ महत्त्वपूर्ण पक्षमा सफलता हासिल गर्न सक्यो भने सेमिफाइनल पुग्ने सम्भावना निकै बलियो हुनेछ । १. हालान्डलाई रोक्नूहोस् इङ्ल्यान्डका मिडफिल्डर मोर्गन रोजर्सले प्रि–म्याच पत्रकार सम्मेलनमा भनेका थिए, ‘के कसैले अर्लिङ हालान्डलाई साँच्चै रोक्न सकेको छ ? मलाई त लाग्दैन । तर हामी प्रयास गर्नेछौं ।’ इङ्ल्यान्डले हालान्डलाई पूर्ण रूपमा रोक्न सक्दैन भन्ने होइन, तर उनलाई नियन्त्रणमा राख्न निकै कठिन हुने कुरा खेलाडीहरूलाई राम्रोसँग थाहा छ । धेरै टोली त्यसमा असफल भएका छन् । म्यानचेस्टर सिटीका यी फरवार्डले नर्वेका लागि पछिल्ला १४ प्रतिस्पर्धात्मक खेलमा २७ गोल गरेका छन् । उनले ती सबै खेलमा गोल गरेका छन्, जसमा २०२६ विश्वकपका चारवटै खेल पनि समावेश छन् । यदि उनले इङ्ल्यान्डविरुद्ध पनि गोल गरे भने विश्वकपमा आफ्नो पहिलो पाँच खेलमै लगातार गोल गर्ने पहिलो खेलाडी बन्नेछन् । यसअघि यस्तो उपलब्धि २०१४ मा कोलम्बियाका जेम्स रोड्रिगेज र युरोपेली खेलाडीमध्ये १९७० मा जर्मनीका गर्ड मुलरले हासिल गरेका थिए । हालान्डको विशेषता भनेको लामो समय खेलमा खासै सक्रिय नदेखिए पनि अवसर पाएलगत्तै घातक बन्नु हो । विश्वकपमा उनले प्रति ९० मिनेट औसत २४.८ पटक मात्र बल छोएका छन्, तर त्यसैबाट सात गोल गरिसकेका छन् । उनका १८ मध्ये १७ प्रहार पहिलो स्पर्शमै भएका छन् । त्यसैले उनी खेलभर शान्त देखिए पनि कुनै पनि क्षण निर्णायक बन्न सक्छन् । रोजर्सको भनाइमा हालान्डलाई रोक्नेभन्दा पनि उनसम्म बल पुग्ने बाटो बन्द गर्नु अझ प्रभावकारी रणनीति हुन सक्छ । २. ओडेगार्डलाई खेल बनाउन नदिनूहोस् हालान्डसम्म बल पुर्याउने नर्वेको सबैभन्दा ठूलो हतियार कप्तान मार्टिन ओडेगार्ड हुन् । ओडेगार्डले विश्वकपका पहिलो तीन खेलमा लगातार असिस्ट दिएका थिए । यस प्रतियोगितामा उनी सबैभन्दा धेरै गोलको अवसर सिर्जना गर्ने खेलाडीमध्ये एक हुन् । उनी केवल असिस्ट दिने खेलाडी मात्र होइनन्, विपक्षीको डिफेन्स चिर्दै बल अगाडि बढाउने जिम्मेवारी पनि उनकै काँधमा हुन्छ । क्वार्टरफाइनलअघि उच्च दबाबमा विपक्षीको रक्षापङ्क्ति तोड्ने पास दिने खेलाडीमा उनी संयुक्त रूपमा शीर्ष स्थानमा थिए । साथै उनले नर्वेका अन्य कुनै पनि खेलाडीभन्दा बढी पटक विपक्षीको पेनाल्टी क्षेत्रभित्र पास पुर्याएका छन् । त्यसैले इङ्ल्यान्डले ओडेगार्डलाई प्रभावहीन बनाउन सके हालान्डको प्रभाव पनि स्वतः कम हुनेछ । ३. नर्वेको दाहिने रक्षापट्टिबाट आक्रमण गर्नूहोस् इङ्ल्यान्डले हालान्ड र ओडेगार्डबाट आउने खतरा नियन्त्रण गर्नु त आवश्यक छ नै, त्यससँगै आक्रामक खेल पनि देखाउनुपर्नेछ । किनभने हालान्डले फेरि गोल गर्ने सम्भावना उच्च छ, त्यसैले जित्न कम्तीमा दुई गोल आवश्यक पर्न सक्छ । नर्वेको आक्रमण निकै बलियो भए पनि रक्षापङ्क्ति भने पूर्ण रूपमा भरपर्दो छैन । उनीहरूले विश्वकपका पहिलो पाँच खेलमा १२ गोल गरे पनि ९ गोल खाएका छन् । उनीहरू यहाँसम्म मुख्यतः आक्रमणको बलमा आइपुगेका हुन्, रक्षाको कारण होइन । विशेषगरी नर्वेले आफ्नो दाहिने रक्षापट्टिबाट आएका क्रसमा कमजोरी देखाएको छ । इराक, सेनेगल र फ्रान्सविरुद्ध यही क्षेत्रबाट खुला खेलमा तीन गोल खाएको तथ्याङ्क छ । साथै विश्वकपमा सबैभन्दा धेरै क्रसबाट प्रहार पनि नर्वेकै पोस्टतर्फ भएको छ । उता इङ्ल्यान्डले भने विश्वकपमा चार हेडर गोल गरिसकेको छ, जसमा तीन गोल लेफ्ट विङबाट आएको क्रसमा सम्भव भएको हो । त्यसैले एन्थोनी गोर्डनजस्ता खेलाडीले निर्णायक भूमिका खेल्न सक्छन् । ४. तीव्रता कायम राख्दै ऊर्जा पनि बचाउनुहोस् विश्वकपमा मौसम र खेलस्थलले पनि ठूलो प्रभाव पार्छ । मेक्सिको सिटीमा उचाइ चुनौती बनेको थियो भने यसपटक मियामीको अत्यधिक गर्मी इङ्ल्यान्डका लागि परीक्षा हुनेछ । स्थानीय समयअनुसार साँझ ५ बजे खेल सुरु हुँदा तापक्रम करिब ३३ डिग्री सेल्सियस रहने र आद्र्रताका कारण अनुभूत तापक्रम ४३ डिग्रीसम्म पुग्ने अनुमान गरिएको छ । टुखेलले सुरुदेखि नै आफ्नो टोलीलाई प्रिमियर लिग शैलीको तीव्र, शारीरिक र आक्रामक फुटबल खेलाउन चाहेको बताएका छन् । इङ्ल्यान्डले यस विश्वकपमा उच्च प्रेसिङमार्फत उत्कृष्ट प्रदर्शन पनि गरेको छ । तर यस्तो गर्मीमा निरन्तर प्रेसिङ गर्दा खेलाडीहरू चाँडै थाक्न सक्छन् । त्यसैले इङ्ल्यान्डले आवश्यक बेला बल आफ्नो नियन्त्रणमा राख्दै ऊर्जा बचाउन र विवेकपूर्ण रूपमा प्रेसिङ गर्नुपर्ने विश्लेषण गरिएको छ । ५. सेकेन्ड बलमा नियन्त्रण कायम राख्नूहोस् नर्वे प्राविधिक रूपमा कमजोर टोली होइन, तर उनीहरू लामो पासमार्फत छिट्टै आक्रमण निर्माण गर्न रुचाउँछन् । राइट विङमा ६ फिट ५ इन्च अग्ला अलेक्जान्डर सोर्लोथलाई खेलाउनु पनि यही रणनीतिको हिस्सा हो । यस विश्वकपमा नर्वेले आफ्नै गोलकिपरबाट विपक्षीको क्षेत्रमा लामो गोल–किक खेलाउने टोलीमध्ये अग्रस्थानमा रहेको छ । गोलकिपर ओर्जान नाइलान्डबाट सोर्लोथतर्फ जाने लामो पास उनीहरूको सबैभन्दा धेरै प्रयोग हुने आक्रमणको माध्यम बनेको छ । यदि इङ्ल्यान्डले उच्च प्रेसिङ गर्यो भने नर्वेले बल सिधै हालान्ड वा सोर्लोथतर्फ उछाल्ने सम्भावना धेरै हुन्छ । त्यसैले पहिलो हेडर जित्नु मात्र पर्याप्त हुँदैन, त्यसपछि खस्ने ‘सेकेन्ड बल’ पनि आफ्नो नियन्त्रणमा लिनुपर्ने हुन्छ । यस पक्षमा इङ्ल्यान्ड बलियो देखिन्छ । विश्वकपमा टोलीको ड्युल जित्ने प्रतिशत ५४.५ रहेको छ, जबकि इलियट एन्डरसन, जुड बेलिङ्घम र डेक्लान राइसले बल पुनः कब्जामा लिन उत्कृष्ट प्रदर्शन गरेका छन् । यी तीन मिडफिल्डरको प्रदर्शन इङ्ल्यान्डको सफलताका लागि निर्णायक बन्न सक्छ । ६. ठूला प्रतियोगिताको अनुभवको फाइदा उठाउनूहोस् इङ्ल्यान्डसँग ठूला अन्तर्राष्ट्रिय प्रतियोगिता खेलेको प्रशस्त अनुभव छ । २०१६ को युरोकपमा आइसल्यान्डसँग अप्रत्याशित हार बेहोरेपछि प्रशिक्षक गारेथ साउथगेटको आगमनसँगै टोलीले निरन्तर उत्कृष्ट प्रदर्शन गर्दै आएको छ । साउथगेटको नेतृत्वमा इङ्ल्यान्ड २०१८ विश्वकपको सेमिफाइनल पुगेको थियो । २०२२ विश्वकपमा फ्रान्ससँग क्वार्टरफाइनलमा पराजित भए पनि त्यसअघि र त्यसपछि दुवै युरोकपको फाइनल खेलेको थियो । यसपटक क्वार्टरफाइनलमा पुगेसँगै इङ्ल्यान्ड विश्वकपको अन्तिम आठमा पुग्ने इतिहासमा ११औं पटक सफल भएको छ । ब्राजिल र जर्मनीमात्र यस मामिलामा इङ्ल्यान्डभन्दा अगाडि छन् । यता नर्वेका लागि भने यो नयाँ अनुभव हो । उनीहरू पहिलो पटक कुनै पनि ठूलो अन्तर्राष्ट्रिय प्रतियोगिताको क्वार्टरफाइनलमा पुगेका हुन् । आइभरी कोस्ट र ब्राजिलमाथिको जित पनि नर्वेको नकआउट चरणमा पहिलो दुई जित हुन् । इङ्ल्यान्डका गोलकिपर जोर्डन पिकफोर्ड, कप्तान ह्यारी केनलगायत खेलाडीहरू दबाबपूर्ण खेल खेल्न अभ्यस्त छन् । पिकफोर्ड मैदान उत्रिए विश्वकपमा इङ्ल्यान्डका लागि आफ्नो १८औं खेल खेल्नेछन् र यससँगै उनी पिटर शिल्टनलाई पछि पार्दै विश्वकपमा इङ्ल्यान्डका सबैभन्दा अनुभवी खेलाडी बन्नेछन् । यही अनुभवलाई सही रूपमा उपयोग गर्न सके इङ्ल्यान्डले नर्वेको चुनौती पार गर्न सक्ने विश्लेषण गरिएको छ । (अप्टा एनालाइसिसबाट अनुदित तथा सम्पादित) अन्य सान्दर्भिक सामग्रीहरू : हालान्डको नाममै उन्माद ‘विश्वकप पहिले नै तय थियो ?’ अर्जेन्टिनालाई लिएर फैलिएका षड्यन्त्रका दाबीहरू विश्वकपमा अनुभवको दबदबा, इतिहासकै सबैभन्दा बढी उमेरका खेलाडी मैदानमा विश्वकपको उपाधि होड थप रोमाञ्चक क्रिस्टियानो रोनाल्डो : इतिहास रचे, तर विश्वकप ट्रफी चुम्न सकेनन् हालान्ड : दि नर्वेजियन हिरो चम्किँदै भिनिसियस जुनियर गोल्डेन बुटका दाबेदार विश्वकै भरपर्दा स्ट्राइकर ह्यारी केन डीआर कङ्गोको ऐतिहासिक यात्रामा इंग्ल्यान्डको चुनौती यी हुन् विश्वकप जित्ने प्रमुख दाबेदार टोली [अप्टा विश्लेषण] विश्वकपमा गोलको वर्षा, नकआउटअघि नै तोडियो सर्वाधिक कीर्तिमान मेसी दि ग्रेट : जसले इतिहासका पानाहरू पुनः लेखे
सर्लाहीमा एक युवकको आत्मदाह प्रयास, काठमाडौं ल्याउने तयारी
काठमाडौं । सर्लाहीमा एक युवकले आत्मदाह प्रयास गरेका छन् । गोडैता १० का ३५ वर्षीय विवेक मण्डलले शरीरमा पेट्रोल खन्याएर आत्मदाह प्रयास गर्न खोजेको सर्लाही जिल्ला प्रहरी कार्यालयका सूचना अधिकारी वेद प्रसाद गौतमले जानकारी दिए । उनका अनुसार ती युवकले आज दिउँसो अढाइ बजेतिर शरीरमा आगो लगाउने प्रयास गरेका थिए । युवकका बुबाका अनुसार मानसिक सन्तुलन अलिक गुमेको जानकारी पाएको उनले बताए । मंलगवामा उपचार भइरहेको र उनलाई थप उपचारका लागि काठमाण्डौं लैजाने तयारी भइरहेको उनले जानकारी दिए । बिहीबार मात्र काठमाडौंस्थित त्रिपुरेश्वरमा मुगुका गणेश नेपालीले आत्मदाह प्रयास गरेका थिए । शुक्रबार उनको निधन भएको छ ।
किर्ते अभिलेख बनाएर गुठीको जग्गा बेचेको आरोपमा २७ जनाविरुद्ध भ्रष्टाचार मुद्दा
काठमाडौं । काठमाडौंको साङ्ला क्षेत्रको निजी गुठीको जग्गा किर्ते कागजात र अभिलेख सच्याएर रैकर कायम गरी बिक्री गरेको आरोपमा मालपोत कार्यालयका कर्मचारीसहित २७ जनाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले शुक्रबार (आज) विशेष अदालत काठमाडौंमा मालपोत कार्यालय टोखा–सरस्वती र डिल्लीबजारका तत्कालीन कर्मचारी तथा अन्य व्यक्तिविरुद्ध आरोपपत्र दायर गरेको हो । आयोगका अनुसार साविक साङ्ला गाविस–९ का कित्ता नम्बर १४९, १५४, १५५ र १५७ लगायतका जग्गा दर्ता श्रेस्तामा निजी गुठीका रूपमा कायम रहेको अवस्थामा अभिलेखमा रहेको ‘गुठी’ शब्द मेटेर रैकर निजी देखाउने गरी अभिलेख सच्याइएको थियो । त्यसपछि नामसारी, कित्ताकाट र राजीनामा पारित गरी जग्गाको किनबेच गरिएको अनुसन्धानबाट खुलेको छ । अनुसन्धानका क्रममा राष्ट्रिय विधि विज्ञान प्रयोगशालाको परीक्षण प्रतिवेदन तथा भूमि व्यवस्थापन तथा अभिलेख विभागको एलआरआईएमएस अभिलेखबाट गुठीसम्बन्धी विवरण हटाएर विद्युतीय अभिलेख संशोधन गरिएको पुष्टि भएको आयोगले जनाएको छ । यस प्रकरणमा मालपोत कार्यालय टोखा–सरस्वतीका तत्कालीन कार्यालय प्रमुख सुबोधकुमार खनाल, नायब सुब्बा रामप्रसाद शर्मा ढकाल, कम्प्युटर अपरेटर जयराम खत्री, नाजोराम भगत, जानुका सापकोटा, नासु कृष्णप्रसाद पोखरेल, खरिदार रुद्रप्रसाद आचार्य तथा मालपोत कार्यालय डिल्लीबजारका तत्कालीन खरिदार सूर्यराज पोखरेलसहित अन्य व्यक्तिविरुद्ध भ्रष्टाचार निवारण ऐन, २०५९ बमोजिम कैद र जरिवानाको माग गरिएको छ। त्यसैगरी, सुरेश प्रधान, शंकरमान प्रधान, पिपल प्रधान, राम प्रधान, कपिलबहादुर प्रधान, पुरुषोत्तम प्रधान र सुरेश ढकाललाई गैरकानुनी लाभ प्राप्त गर्ने मतियारको रूपमा प्रतिवादी बनाइएको छ । हालका जग्गाधनी स्वर्गीय रमा थापाका हकवालासहित केही व्यक्तिलाई भने जग्गाधनी दर्ता श्रेस्ता बदर गरी गुठी कायम गर्ने प्रयोजनका लागि मात्र प्रतिवादी बनाइएको आयोगले जनाएको छ ।
राष्ट्रिय वाणिज्य बैंकको नाममा हुने ठगीबाट सावधान रहन ग्राहकलाई आग्रह
काठमाडौं । राष्ट्रिय वाणिज्य बैंकले आफ्नो नाम दुरुपयोग गरेर भइरहेका ठगीका प्रयासप्रति सचेत रहन ग्राहकलाई आग्रह गरेको छ । बैंकले शुक्रबार विज्ञप्ति जारी गर्दै पछिल्ला दिनमा केही अनधिकृत व्यक्ति तथा ठगी गिरोहले बैंकको नाममा ग्राहकलाई फोन गरी ‘केवाईसी अपडेट’ गर्नुपर्ने भन्दै व्यक्तिगत तथा बैंकिङ विवरण माग्ने, ओटीपी माग्ने, स्क्रिन सेयर गर्न लगाउने, अनधिकृत एप डाउनलोड गराउने तथा फिसिङ लिंक पठाएर क्लिक गर्न लगाउनेजस्ता गतिविधि गरिरहेको जानकारी प्राप्त भएको जनाएको छ । बैंकका अनुसार कुनै पनि कर्मचारी वा आधिकारिक प्रतिनिधिले केवाईसी अपडेट वा अन्य कुनै प्रयोजनका लागि फोन, इमेल, सामाजिक सञ्जाल वा अन्य माध्यमबाट एटीएम पिन, मोबाइल बैंकिङ तथा ई–बैंकिङको ओटीपी, इमेल पासवर्ड वा अन्य गोप्य व्यक्तिगत विवरण कहिल्यै नमाग्ने स्पष्ट गरेको छ । यस्ता फोन, इमेल वा सामाजिक सञ्जालमार्फत आउने सन्देशमा विश्वास नगर्न र कुनै पनि शंकास्पद गतिविधि देखिएमा नजिकको शाखा वा बैंकका आधिकारिक सम्पर्क नम्बरमा मात्र जानकारी गराउन बैंकले ग्राहकलाई अनुरोध गरेको छ । साथै बैंकको आधिकारिक वेबसाइटमार्फत प्रकाशित सूचना मात्र विश्वास गर्न पनि आग्रह गरिएको छ । राष्ट्रिय वाणिज्य बैंकले सुरक्षित बैंकिङ कारोबारका लागि आफू प्रतिबद्ध रहेको उल्लेख गर्दै साइबर ठगीविरुद्ध सचेत र सजग रहन सम्पूर्ण ग्राहकलाई आह्वान गरेको छ ।
धनुषामा माछाका भुरा वितरणमा ७२ लाखभन्दा बढी हिनामिना, चार जनाविरुद्ध भ्रष्टाचार मुद्दा
काठमाडौं । धनुषामा कृषकलाई वितरण गर्न छुट्याइएका माछाका भुरा खरिद तथा वितरणमा ७२ लाख ५९ हजार ९० रुपैयाँ हिनामिना गरेको आरोपमा तत्कालीन कार्यालय प्रमुखसहित चार जनाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले शुक्रबार विशेष अदालत काठमाडौंमा तत्कालीन जिल्ला कृषि विकास कार्यालय, धनुषाका कार्यालय प्रमुख सुकेश्वर झा, तत्कालीन लेखापाल रामचन्द्र ठाकुर, तत्कालीन प्राविधिक सहायक देवेन्द्रलाल कर्ण तथा सुदिश माछापालन केन्द्रका सञ्चालक राम सुदिश शरणविरुद्ध आरोपपत्र दायर गरेको हो । आयोगका अनुसार आर्थिक वर्ष २०७४/७५ मा कृषि विकास रणनीति अनुगमन तथा समन्वय कार्यक्रमअन्तर्गत मत्स्य भुरा वितरणका लागि विनियोजित २ करोड ३४ लाख २८ हजार रुपैयाँमध्ये माछाका भुरा वितरणका क्रममा अनियमितता गरिएको थियो । अनुसन्धानबाट केही मात्रामा सरकारी फार्मबाट माछाका भुरा खरिद गरी बाँकी निजी माछा फार्मबाट खरिद गरेको देखाइएको, तर वास्तविक रूपमा प्राप्त नभएका भुराको नक्कली बिल तयार गरिएको तथा वितरण नै नगरेका कृषकका नाममा नक्कली भरपाई, विवरण र हस्ताक्षर तयार गरी सरकारी रकम भुक्तानी गरिएको खुलेको आयोगले जनाएको छ । आयोगका अनुसार उक्त कार्यबाट ७२ लाख ५९ हजार ९० रुपैयाँ बराबरको सरकारी रकम हिनामिना भएको देखिएकाले तीन सरकारी कर्मचारीविरुद्ध भ्रष्टाचार निवारण ऐन, २०५९ अनुसार बिगो बराबर जरिवाना, कैद तथा बिगो असुलको माग गरिएको छ । निजी माछापालन केन्द्रका सञ्चालक शरणलाई पनि गैरकानुनी लाभ प्राप्त गर्नेमतियारको रूपमा मुख्य कसुरदारसरह सजायको माग गर्दै मुद्दा दायर गरिएको आयोगले जनाएको छ ।
बीमा दाबी भुक्तानीमा कुनै समस्या भएमा उजुरी दिन प्राधिकरणको आह्वान
काठमाडौं । नेपाल बीमा प्राधिकरणले बीमा दाबी भुक्तानीमा कुनै समस्या भएमा उजुरी दिन आह्वान गरेको छ । प्राधिकरणले आज एक सूचना जारी गर्दै यस्तो आह्वान गरेको हो । प्राधिकरणका अनुसार बीमाको दायित्व निर्धारण एवं दाबी भुक्तानी गर्ने क्रममा केही बीमक, बीमकका कर्मचारी तथा सर्भेयरले बीमासम्बन्धी प्रचलित कानुन, नियामकीय व्यवस्था तथा व्यावसायिक आचारसंहिताविपरीत कार्य गरेको भन्ने सम्बन्धमा प्राधिकरणमा विभिन्न गुनासा प्राप्त भएकाले यस्तो आह्वान गरेको प्राधिकरणले जनाएको छ । प्राधिकरणद्वारा जारी सूचनामा भनिएको छ, ‘ बीमाको दायित्व निर्धारण एवं दाबी भुक्तानी गर्ने क्रममा केही बीमक, बीमकका कर्मचारी तथा सर्भेयरले बीमासम्बन्धी प्रचलित कानुन, नियामकीय व्यवस्था तथा व्यावसायिक आचारसंहिताविपरीत कार्य गरेको भन्ने सम्बन्धमा प्राधिकरणमा गुनासोहरु प्राप्त भइरहेको सन्र्दभमा यदि कुनै बीमक, बीमकका कर्मचारी, बीमा सर्भेयर वा अन्य कुनै पक्षले दुखः दिएमा, गलत विवरण तयार गरेको, तथ्य लुकाएको वा तोडमोड गरेको, पक्षपातपूर्ण मूल्यांकन गरेको, अनुचित लाभ लिएको वा अन्य कुनै कानुनविपरीत कार्य गरेको भए त्यस्तो कार्यमा संलग्न व्यक्तिका विरुद्ध बीमा ऐन, २०७९ बमोजिम कारबाहीका लागि सम्बन्धित सबै सरोकारवालालाई प्रमाणसहित उजुरी पेस गर्न आग्रह छ ।’ प्राधिकरणले उजुरी पेस गर्दा उजुरीकर्ताको नाम, ठेगाना तथा सम्पर्क नम्बर सम्बन्धित बीमा कम्पनीको नाम, समस्याको व्यहोरा, बीमा दाबी नम्बर तथा बीमालेख नम्बर, पुष्टि हुने कागजात, फोटो, भिडियो वा अन्य विवरण पेश गर्न भनेको छ । उजुरी नेपाल बीमा प्राधिकरणको दर्ता शाखामा प्रत्यक्ष दिन सक्नेछन् । हुलाकमार्फतः नेपाल बीमा प्राधिकरणको केन्द्रीय कार्यालय ललितपुर म. न.पा. १०, कुपण्डोल, ललितपुरमा पठाउन आग्रह गरेको छ । प्राप्त उजुरी तथा प्रमाणको गोपनीयता कायम राखी बीमा ऐन, २०७९ तथा अन्य प्रचलित कानुनबमोजिम अनुसन्धान गरी आवश्यक कारबाही प्रक्रिया अगाडि बढाइने प्राधिकरणले जनाएको छ ।
दक्षिणपूर्वका मुलुकबाट ८३६ जना नेपालीको उद्धार
काठमाडौं । सरकारले दक्षिणपूर्वका कम्बोडिया, म्यानमार, लावस र थाइल्याण्डको सीमा क्षेत्रबाट अनलाइन स्क्यामिङमा परेका ८३६ जना नेपालीको उद्धार गरिएको जनाएको छ । परराष्ट्र मन्त्रालयको शुक्रबार आयोजित नियमित प्रेस ब्रिफिङमा मन्त्रालयका प्रवक्ता लोकबहादुर पौडेलले कम्बोडियाबाट ७०९ जना, म्यानरमारबाट ११३ जना, लावसबाट आठ जना र थाइल्याण्डबाट छ जनाको उद्धार गरिएको जानकारी दिए । उनले भने, 'दक्षिण पूर्वका कम्बोडया, म्यानमार, लावस र थाइल्याण्डको सीमा क्षेत्रमा सञ्चालित विभिन्न अनलाइन स्क्यामिङ सेन्टरहरुमा ठगिन पुगेका नेपालीको उद्धार तथा त्यस विषयमा सचेतनाका लागि निरन्तर समन्वय र पहल जारी राखेका छौँ ।' दूतावासको निरन्तर अनुरोधमा कम्बोडिया सरकारले भिसा अवधिभन्दा बढी बसेका नेपालीको भिसा शुल्क र जरिवाना मिनाहा गर्ने विषयमा छलफल भएको पनि मन्त्रालयले जनाएको छ । यस वर्ष कम्बोडिया सरकारले जम्मा ६०२ जनाको शुल्क मिनाहा गरेको प्रवक्ता पौडेलले बताए । आर्थिक कुटनीतिलाई सघन रुपमा सञ्चालन गर्न आर्थिक वर्ष २०८१/०८२ मा भारत, चीन, अमेरिका, बेलायत, अष्ट्रेलिया, जापान, जर्मनी, बेल्जियम, दक्षिण कोरिया र युएइ गरी १० र यो वर्ष बाँकी १० देश गरी हाल २० वटा देशका लागि छुट्टाछुट्टै रणनीति तयार पारिएको पनि उनले बताए । मन्त्रालयले नेपाली नागरिकलाई सहज, सरल र प्रभावकारी राहदानी सेवा उपलब्ध गराउने उद्देश्यले परराष्ट्र मन्त्रालय र मन्त्रालयअन्तर्गत रहेको राहदानी विभाग प्रतिबद्ध रहेको पनि जनाएको छ । राहदानी सेवालाई समय सापेक्ष, भरपर्दो र प्रविधिमैत्री बनाउन र नागरिकलाई सहजै सेवा उपलबध गराउन सरकारले राहदानी ऐन २०७६ को पहिलो संशोधनको विधेयकमा सर्वसाधारणको राय प्रतिक्रियाका लागि वेबसाइटमा राखिएको छ भने राय परामर्श एंव सहमतिका लागि कानुन, न्याय तथा संसदीय मामिला मन्त्रालयमा पेस गरेको छ । 'छापिएका राहदानी शीघ्र सम्बन्धित जिल्ला र इलाका कार्यालयमा पुर्याउन हुलाक विभागसँग सहकार्य गर्ने विषयमा यही असार १९ गते सम्झौता सम्पन्न भएको छ, सोही दिनबाट उक्त सम्झौता लागू पनि भएको छ', उनले भने । मन्त्रालयले जनमैत्री सेवा प्रवाह गर्ने उद्देश्यअनुरुप जुनसुकै जिल्लाबाट पनि राहदानीका लागि आवेदन दिन सकिने व्यवस्थाका लागि आवश्यक प्रक्रिया सुरु गरेको छ । प्रवक्ता पौडेलले भने, 'अर्थात् जो जहाँ बसेको भए पनि नजिकको जिल्ला वा इलाका प्रशासन कार्यालयबाट राहदानीका लागि आवेदन दिनसक्ने व्यवस्थाका लागि हाल काम भइरहेको छ ।'
त्रिपुरेश्वर विद्यालयमा कामना सेवाको सहयोग, पानी ट्याङ्की र वाटर प्युरिफायर हस्तान्तरण
काठमाडौं । कामना सेवा विकास बैंकले सुर्खेतको वीरेन्द्रनगर–१, धोदेखालीस्थित त्रिपुरेश्वर माध्यमिक विद्यालयलाई पानी ट्याङ्की र इलेक्ट्रिक वाटर प्युरिफायर हस्तान्तरण गरेको छ । बैंकका पश्चिम क्षेत्र प्रमुख महेन्द्र खनालले वीरेन्द्रनगर नगरपालिका–१ का वडाध्यक्ष दिनेश खत्रीलाई उक्त सामग्री हस्तान्तरण गरेका हुन् । विद्यालयमा डिप बोरिङ प्रणालीमार्फत खानेपानीको आपूर्ति भए पनि पानी शुद्धीकरणको व्यवस्था नहुँदा विद्यार्थी र शिक्षकले स्वच्छ खानेपानी उपभोग गर्न कठिनाइ हुँदै आएको थियो । सोही आवश्यकतालाई सम्बोधन गर्ने उद्देश्यले बैंकले पानी ट्याङ्की र इलेक्ट्रिक वाटर प्युरिफायर उपलब्ध गराएको जनाएको छ । कार्यक्रममा वडाध्यक्ष खत्रीले विद्यालयको आवश्यकता पहिचान गरी सहयोग गरेकोमा बैंकलाई धन्यवाद दिए । विद्यालय व्यवस्थापन समितिका अध्यक्ष ईश्वर भक्त सुनारले बैंकको सहयोगबाट विद्यार्थी र शिक्षकले स्वच्छ, सुरक्षित तथा गुणस्तरीय खानेपानी उपभोग गर्न पाउने विश्वास व्यक्त गर्दै यसले स्वस्थ शैक्षिक वातावरण निर्माणमा टेवा पुग्ने बताए । बैंकका पश्चिम क्षेत्र प्रमुख खनालले संस्थागत सामाजिक उत्तरदायित्वअन्तर्गत समुदायको आवश्यकता पहिचान गरी यस्ता सहयोगमूलक कार्यक्रम सञ्चालन गर्न पाएकोमा खुसी व्यक्त गरे । कार्यक्रममा बैंकका कर्मचारी, वडाध्यक्ष, विद्यालय व्यवस्थापन समितिका पदाधिकारी, प्रधानाध्यापक, शिक्षक तथा विद्यार्थीको सहभागिता रहेको थियो । बैंकले आगामी दिनमा पनि सरोकारवालासँगको समन्वय र सहकार्यमा सामाजिक उत्तरदायित्वका यस्ता कार्यक्रमलाई निरन्तरता दिने जनाएको छ ।
