आज राति कहाँ कहाँ हुनेछ वर्षा ?
काठमाडौं । हाल नेपालमा पश्चिमी वायुको आंशिक प्रभाव परेको मौसम पूर्वानुमान महाशाखाले जनाएको छ । जसका कारण देशभर आंशिक बदली हुनुका साथै दार्चुला, बझाङ र हुम्लाका एक/दुई स्थानमा हल्का वर्षा र हिमपात भइरहेको छ । महाशाखाका अनुसार आज राति देशभर आंशिक बादल लाग्नेछ । यस क्रममा कोसी, बागमती, गण्डकी, कर्णाली र सुदूरपश्चिम प्रदेशका हिमाली भू-भागका एक/दुई स्थानमा हल्का वर्षा र हिमपातको सम्भावना रहेको छ । साथै, तराई भू-भाग, उपत्यका तथा खोँचहरूमा बिहानीपख केही स्थानमा हुस्सु तथा कुहिरो लाग्ने पूर्वानुमान छ । त्यस्तै, सोमबार हिमाली र पहाडी भू-भागका साथै लुम्बिनी प्रदेशको तराई भू-भागका एक/दुई स्थानमा हल्का वर्षाको सम्भावना रहेको छ । मंगलबार भने कोसी प्रदेशका हिमाली तथा पहाडी भू-भागका एकाध ठाउँमा हल्का वर्षा र हिमपातको सम्भावना देखिएको छ । यसैगरी, बुधबार कोसी, बागमती र गण्डकी प्रदेशका हिमाली र पहाडी भू-भागमा हल्का वर्षा र हिमपात हुन सक्ने महाशाखाले जनाएको छ । आगामी बिहीबारसम्म नै देशका तराई भू-भाग, उपत्यका तथा खोँचहरूमा बिहानीपख हुस्सु र कुहिरो लाग्ने सम्भावना रहेकाले चिसोबाट बच्न आवश्यक सतर्कता अपनाउन महाशाखाले अनुरोध गरेको छ ।
फ्रान्समा प्रदर्शनका क्रममा हिंसा भएपछि ७७९ जना पक्राउ
काठमाडौं । फ्रान्समा लगातार तेस्रो सातासम्म जारी विरोध प्रदर्शनका क्रममा हिंसा भड्किएपछि प्रहरीले झन्डै ८०० जनालाई पक्राउ गरेको छ । शनिबार देशका विभिन्न सहरमा भएको प्रदर्शनमा ३ लाख २० हजारभन्दा बढी मानिस सहभागी भएका थिए । फ्रान्सको गृह मन्त्रालयका अनुसार अधिकांश प्रदर्शन शान्तिपूर्ण रहे पनि केही स्थानमा प्रदर्शनकारी र प्रहरीबीच झडप भएको थियो । त्यसपछि प्रहरीले देशभरबाट ७७९ जनालाई पक्राउ गरेको हो । प्रदर्शनका क्रममा केही समूहले प्रहरीमाथि ढुंगा, बोतल र पेट्रोल बम प्रहार गरेका थिए। प्रहरीले भिड नियन्त्रण गर्न अश्रुग्यास र पानीको फोहोरा प्रयोग गरेको थियो । झडपका क्रममा तीन प्रहरी घाइते भएका छन् । हिंसाका क्रममा केही सवारीसाधन र पसलमा समेत क्षति पुगेको छ । प्रदर्शनलाई ध्यानमा राख्दै फ्रान्स सरकारले देशभर करिब ७० हजार सुरक्षाकर्मी परिचालन गरेको थियो । राजधानी पेरिसमा मात्रै करिब ७० हजार मानिस प्रदर्शनमा सहभागी भएको सरकारी तथ्यांक छ । पछिल्ला तीन सातादेखि फ्रान्समा लगातार प्रदर्शन हुँदै आएको छ । अक्टोबर १७ मा भएको पहिलो ठूलो प्रदर्शनमा ५ लाख ५० हजार र अक्टोबर २४ मा भएको दोस्रो प्रदर्शनमा ४ लाख १० हजार मानिस सहभागी भएका थिए । ती प्रदर्शनका क्रममा पनि तोडफोड र लुटपाटका घटना भएका थिए । विद्यालयको कमजोर पूर्वाधार, शिक्षक अभाव, विश्वविद्यालय भर्ना प्रणालीमा देखिएको असमानता र बढ्दो महँगीको विरोधमा सुरु भएको आन्दोलनमा पछिल्लो समय विभिन्न श्रमिक संगठन तथा सरकारप्रति असन्तुष्ट समूह पनि सहभागी भएका छन् । यसैबीच जर्मनीका ३० भन्दा बढी सहरमा पनि शनिबार युवाहरूले प्रदर्शन गरेका छन् । उनीहरूले शिक्षा, स्वास्थ्य, आवास र जलवायु संरक्षणमा सरकारी लगानी बढाउन तथा दैनिक जीवनयापन सहज बनाउन माग गरेका छन् । जर्मनीमा पनि अधिकांश प्रदर्शन शान्तिपूर्ण रहे पनि फ्र्यांकफर्ट, कोलोन र बर्लिनलगायत सहरमा राति हिंसा भड्किएको थियो । फ्र्यांकफर्टमा केही समूहले पसलमा तोडफोड र लुटपाट गर्नुका साथै प्रहरीमाथि ढुंगा र पेट्रोल बम प्रहार गरेका थिए । उक्त घटनामा ३० जनालाई नियन्त्रणमा लिइएको छ । युरोपका विभिन्न देशमा फैलिएको पछिल्लो प्रदर्शनमा युवाहरूको सहभागिता उल्लेख्य देखिएको छ ।
सही समय आएपछि सबैको गलत समय आउँछ, उम्किन्छु भनेर सपना नदेखे हुन्छ : प्रधानमन्त्री
काठमाडौं । प्रधानमन्त्री वालेन्द्र शाह (बालेन) ले गल्ती वा गलत काम गर्ने जोकसैलाई पनि सही समय आएपछि कारबाहीको दायरामा ल्याइने चेतावनी दिएका छन् । सामाजिक सञ्जाल फेसबुकमार्फत एक सन्देश जारी गर्दै उनले एक/दुई जना उम्किने सपना नदेख्न चेतावनी दिएका हुन् । कुनै विशिष्ट प्रसंग उल्लेख नगरीकन प्रधानमन्त्री शाहले सामाजिक सञ्जालमा लेखेका छन्, ‘सही समय आएपछि, सबैको गलत समय आउँछ, एक/दुई जना उम्किन्छु भनेर सपना नदेखे हुन्छ ।’ अदालतका न्यायाधीशहरूसँग बिचौलियाहरूको अस्वाभाविक सम्पर्क र हालै मिडिया हाउसहरूमा प्रहरी परिचालन गरिएको विषयलाई लिएर चौतर्फी रूपमा सरकारको आलोचना भइरहेका बेला प्रधानमन्त्रीको यो कडा टिप्पणी सार्वजनिक भएको हो ।
एनपीएलको अफिसियल राइड-हेलिङ पार्टनर बन्यो ‘इनड्राइभ’
काठमाडौं । विश्वव्यापी मोबिलिटी तथा डेलिभरी प्लेटफर्म इनड्राइभ नेपाल प्रिमियर लिग (एनपीएल) को तेस्रो संस्करणको आधिकारिक राइड-हेलिङ पार्टनर बनेको छ । अक्टोबर २६ देखि नोभेम्बर २१, २०२६ सम्म आयोजना हुने नेपालको प्रतिष्ठित टी-२० क्रिकेट प्रतियोगितामा इनड्राइभले आधिकारिक राइड-हेलिङ पार्टनरका रूपमा सहकार्य गरेको छ । यस साझेदारीमार्फत इनड्राइभले नेपालमा आफ्नो उपस्थिति थप विस्तार गर्नुका साथै खेलकुद क्षेत्र र युवा पुस्तासँगको सम्बन्धलाई अझ प्रगाढ बनाउने लक्ष्य राखेको छ । यात्रु र चालकबीचको आपसी सहमतिमा भाडा निर्धारण गर्ने प्रणालीमा आधारित इनड्राइभले निष्पक्षता, पारदर्शिता र छनोटको स्वतन्त्रतालाई प्राथमिकता दिँदै आएको छ । यी मूल्यहरू क्रिकेटको खेल भावना र एनपीएलको उद्देश्यसँग मेल खाने कम्पनीको विश्वास छ । प्रतियोगिता अवधिभर क्रिकेटप्रेमीहरूले इनड्राइभ एपमार्फत खेलस्थलसम्म आवतजावत गर्न सक्नेछन् । यात्रुले एपमा आफूले तिर्न चाहेको भाडा प्रस्ताव गर्न सक्नेछन् भने चालकले उक्त प्रस्ताव स्वीकार गर्न वा वैकल्पिक भाडा प्रस्ताव गर्न सक्नेछन् । यसरी दुवै पक्षको सहमतिमा यात्रा सुरु हुनुअघि नै भाडा निर्धारण गर्न सकिनेछ । दर्शकहरूको आवतजावतलाई थप सहज बनाउन इनड्राइभले त्रिभुवन विश्वविद्यालय क्रिकेट मैदान परिसरमा निःशुल्क फ्यान सटल सेवा पनि गरि रहेको छ । उक्त सेवाअन्तर्गत गेट नम्बर २ नजिकै रहेको इनड्राइभ पिकअप स्टेसनबाट दर्शकहरूलाई उनीहरूका लागि तोकिएका प्रवेशद्वारसम्म पुर्याइनेछ । यातायात सुविधासँगै इनड्राइभले यस सिजन दर्शकहरूको अनुभवलाई थप मनोरञ्जनात्मक बनाउन विभिन्न गतिविधि पनि सञ्चालन गर्ने भएको छ । मैदान परिसरमा रहने इनड्राइभका एक्टिभेसन स्टलहरूमा दर्शकहरूले निःशुल्क स्लोगन कार्ड, चियरिङ स्टिक र फेस स्टिकर प्राप्त गर्न सक्नेछन् । साथै, इनड्राइभको मस्कटसँग तस्बिर खिचाउने, मनोरञ्जनात्मक खेलमा सहभागी हुने तथा दैनिक आकर्षक उपहार जित्ने अवसरसमेत पाउनेछन् । यसैगरी, प्रत्येक खेलमा क्यामेरामार्फत एक जना उत्साही दर्शकलाई ‘कुल फ्यान अफ द म्याच’ का रूपमा छनोट गरिनेछ । छनोट भएका दर्शकलाई इनड्राइभको तर्फबाट विशेष उपहार ह्याम्पर प्रदान गरिनेछ । इनड्राइभ नेपालकी मार्केटिङ म्यानेजर श्रेया मानन्धरले एनपीएलसँगको सहकार्यप्रति उत्साह व्यक्त गर्दै भनिन्, ‘नेपालको लोकप्रिय क्रिकेट प्रतियोगिता एनपीएलसँग साझेदारी गर्न पाउँदा हामी अत्यन्त उत्साहित छौँ । क्रिकेटले देशभरका लाखौँ नेपालीलाई एउटै उत्साहमा जोड्ने काम गरेको छ । यस साझेदारीमार्फत हामी क्रिकेटप्रेमीहरूसँग अझ नजिक हुन चाहन्छौँ । साथै, दर्शकहरूलाई आपसी सहमतिमा तय गरिएको उचित भाडामा खेलस्थलसम्म पुग्न र फर्कन सहज बनाउने हाम्रो उद्देश्य हो ।’ उनले थपिन्, ‘इनड्राइभको सेवा प्रणाली निष्पक्षता, पारदर्शिता र छनोटको स्वतन्त्रतामा आधारित छ । यी मूल्यहरू क्रिकेटको खेल भावना र एनपीएलको मर्मसँग पनि मेल खान्छन् । यस सहकार्यमार्फत दर्शकहरूको यात्रालाई सहज बनाउनुका साथै मैदानमा उनीहरूको अनुभवलाई थप रोमाञ्चक र अविस्मरणीय बनाउन चाहन्छौँ ।’ नेपाल क्रिकेट संघ (क्यान) का सचिव पारस खड्काले इनड्राइभलाई एनपीएलको आधिकारिक राइड–हेलिङ पार्टनरका रूपमा स्वागत गर्दै भने, ‘नेपाल प्रिमियर लिगको तेस्रो संस्करणमा इनड्राइभलाई आधिकारिक राइड–हेलिङ पार्टनरका रूपमा स्वागत गर्न पाउँदा हामी खुसी छौँ । समुदायलाई सशक्त बनाउने र सेवामा सहज पहुँच विस्तार गर्ने इनड्राइभको प्रतिबद्धता क्रिकेटमार्फत समावेशिता र खेल भावनालाई प्रवद्र्धन गर्ने हाम्रो उद्देश्यसँग मेल खान्छ । यस साझेदारीले प्रतियोगिताको व्यवस्थापनमा सहयोग पुग्नुका साथै दर्शकहरूको समग्र अनुभवलाई अझ उत्कृष्ट बनाउन महत्त्वपूर्ण योगदान पुर्याउने विश्वास लिएका छौँ ।’ एनपीएलसँगको यो साझेदारीलाई इनड्राइभले नेपालमा खेलकुद प्रवद्र्धन र समुदायसँगको सम्बन्ध विस्तार गर्ने आफ्नो प्रतिबद्धताको निरन्तरताका रूपमा लिएको छ । स्थानीय चालकहरूका लागि आम्दानीका अवसरसँगै यात्रुहरूलाई सहज र पारदर्शी यातायात विकल्प उपलब्ध गराउँदै आएको कम्पनीले यस सहकार्यबाट चालक, यात्रु तथा क्रिकेटप्रेमीहरूसँगको सम्बन्ध थप सुदृढ हुने अपेक्षा गरेको छ ।
अब भाटभटेनीको ढुवानीमा १४ फोटोन विद्युतीय सवारी प्रयोग हुने
काठमाडौं । फोटोन मोटर्स नेपालले भाटभटेनी सुपरमार्केटलाई १४ वटा विद्युतीय व्यावसायिक सवारीसाधन हस्तान्तरण गरेको छ । भाटभटेनीले आफ्नो ढुवानी तथा वितरण प्रणालीमा प्रयोग गर्न ती सवारीसाधन लिएको हो । एमएडब्लु वृद्धि कमर्सियल भेइकल्स प्रालिअन्तर्गत सञ्चालित फोटोन मोटर्स नेपालले व्यावसायिक ढुवानीमा विद्युतीय सवारीको प्रयोग विस्तार गर्ने उद्देश्यसहित सहकार्य गरिएको जनाएको छ । कम्पनीका अनुसार विद्युतीय सवारीले इन्धनमा आधारित ढुवानीको विकल्प दिनुका साथै सञ्चालन खर्च न्यूनीकरणमा सहयोग पुर्याउनेछन् । हस्तान्तरण कार्यक्रममा एमएडब्लु वृद्धि कमर्सियल भेइकल्सका प्रमुख कार्यकारी अधिकृत (सीइओ) अनिलकुमार बरालले भाटभटेनीसँगको सहकार्यले नेपालमा विद्युतीय व्यावसायिक सवारीसाधनको प्रयोग विस्तार गर्न योगदान दिने बताए । उनले एकैपटक १४ वटा सवारी हस्तान्तरण हुनुलाई दिगो यातायातप्रतिको व्यावसायिक क्षेत्रको बढ्दो विश्वासका रूपमा व्याख्या गरे । नेपाली व्यवसायको आवश्यकताअनुसार विश्वसनीय र आधुनिक विद्युतीय सवारी उपलब्ध गराउनु कम्पनीको प्राथमिकता रहेको उनको भनाइ छ । भाटभटेनी सुपरमार्केटका निर्देशक पहलमान गुरुङले वातावरणमैत्री व्यवसाय सञ्चालनलाई संस्थाले प्राथमिकता दिँदै आएको बताए । फोटोनसँगको सहकार्यले दिगो ढुवानी प्रणाली विकासमा सहयोग पुग्ने विश्वास उनले व्यक्त गरे । उनका अनुसार ढुवानी तथा वितरणमा विद्युतीय सवारी समावेश गर्ने पहलले अन्य व्यवसायलाई पनि यस्ता सवारी प्रयोग गर्न प्रोत्साहित गर्न सक्छ । कम्पनीले वातावरणमैत्री प्रविधि, सञ्चालन खर्चमा बचत र कार्यक्षमताका आधारमा आफ्ना विद्युतीय सवारी व्यावसायिक ढुवानीका लागि उपयोगी हुने दाबी गरेको छ । भाटभटेनीसँगको सहकार्यबाट विद्युतीय व्यावसायिक सवारी बजारमा आफ्नो उपस्थिति विस्तार हुने अपेक्षा फोटोन मोटर्स नेपालले गरेको छ ।
जनकपुरले पोखरालाई दियो १४८ रनको लक्ष्य
काठमाडौं । नेपाल प्रिमियर लिग (एनपीएल) को तेस्रो संस्करण अन्तर्गत जनकपुर बोल्ट्सले पोखरा एभेन्जर्ससामु १४८ रनको लक्ष्य प्रस्तुत गरेको छ । जनकपुरले कुल २० ओभरमा ७ विकेट गुमाउँदै १४७ रन बनाएको थियो । जनकपुरका लागि ओपनर तृतराजले सर्वाधिक ६१ रन बनाए । उनले ४९ बलमा ६ चौका र १ छक्का सहयोगमा अर्धशतक पूरा गरेका हुन् । अभिषेक तिवारीले आक्रामक ब्याटिङ गरे । उनी १० बलमा २४ रनमा अविजित रहे । सैफ हस एक, कप्तान हर्मीत सिंह ९, जिम्मी निशम ११, अमरसिंह रौटेला र अनिलकुमार शाह ९ रनमा आउट भए । पोखराका लागि सकिबले ३ विकेट लिए । मौहम्मद सैफुदिन र चमिका करुणारत्नेले समान एक विकेट आफ्नो नाममा गरे । मेहदी हसनले आफ्नो स्पेलमा १ मेडन राख्दै २४ रन खर्चेर १ विकेट लिए ।
हिमालयन बुलियनको न्युरोड आउटलेट सुरु
काठमाडौं । हिमालयन बुलियन कम्पनी (एचबीसी) ले काठमाडौंको न्युरोडमा पनि आउटलेट सञ्चालनमा ल्याएको छ । हालसम्म काठमाडौंको ज्ञानेश्वरबाट मात्र शुद्ध चाँदीका बार र सिक्काको कारोबार गर्दै आएको एचबीसी आइतबार (आज) न्युरोड मलको पहिलो तलामा आउटलेट सुरु गरेको कम्पनी सञ्चालक भीष्म गौतमले जानकारी दिए । ‘आजबाट न्युरोड मलको पहिलो तल्लामा पनि हाम्रो आउटलेट सञ्चालनमा आएको छ,’ सञ्चालक गौतमले भने । न्युरोड आउटलेट कम्पनीको व्यवसाय विस्तारको एक हिस्सा हो । यसबाट ग्राहकलाई सहज हुने विश्वास कम्पनीले लिएको छ । कम्पनीले भविष्यमा देशका अन्य प्रमुख सहरमा पनि आउटलेट विस्तार गर्ने सञ्चालक गौतमले जानकारी दिए । न्युरोड आउटलेटमा ग्राहकले चाँदीका बार र सिक्का प्रत्यक्ष अवलोकन गरेर खरिद गर्न सक्छन् । कम्पनीको ‘एचबीसी एप’मार्फत खरिद गरेको चाँदी पनि उक्त आउटलेटबाट संकलन गर्न सकिने सञ्चालक गौतमले जानकारी दिए । कम्पनीले चाँदी कारोबारलाई सहज र पारदर्शी बनाउन घटस्थापनाको दिन आफ्नो मोबाइल एप–– ‘एचबीसी एप’ सार्वजनिक गरेको थियो । एपमार्फत ग्राहकले आफ्नो अनुकूलता अनुसार चाँदीका सिक्का तथा बार खरिद गर्न सक्छन् । ग्राहकले एपमा खाता खोलेर ग्राहक पहिचान प्रक्रिया पूरा गरेपछि चाँदीको दैनिक मूल्य हेर्न र खरिदको लक्ष्य तोक्न सक्छन् । एपमार्फत १०, २०, ५० र १०० ग्रामका सिक्का तथा ५०० ग्राम वा सोभन्दा बढी तौलका चाँदीका बार खरिद गर्न सकिनेछ । कम्पनीले एपका ग्राहकलाई १० लाख रुपैयाँसम्मको व्यक्तिगत दुर्घटना बीमा उपलब्ध गराउने घोषणा पनि गरेको छ । सगरमाथा लुम्बिनी इन्स्योरेन्स कम्पनी (सलिको) र हिमालयन बुलियन कम्पनी (एचबीसी) बीचको सहकार्यमा उपलब्ध हुने उक्त सुविधा बीमालेखका सर्त र प्रावधानअनुसार लागू हुनेछ । दुर्घटना बीमा प्रयोजनका लागि ग्राहकलाई तीन श्रेणीमा बाँडिएको छ । एपमार्फत चाँदी खरिद गरेको पटकको आधारमा ग्राहकलाई स्ट्यान्डर्ड, गोल्डेन र प्लाटिनम श्रेणीमा राखेर क्रमशः स्ट्यान्डर्डलाई १ लाख रुपैयाँ गोल्डेनलाई ५ लाख रुपैयाँ र प्लाटिनम ग्राहकलाई १० लाख रुपैयाँको दुर्घटना बीमा सुविधा उपलब्ध गराइनेछ । कम्पनीका अनुसार एचबीसी एप भौतिक चाँदी खरिद गर्ने माध्यम हो । एपमार्फत बुक गरेको चाँदी त्यसको सम्पूर्ण रकम भुक्तानीपछि ग्राहकले आफूलाई पायक पर्ने कम्पनीको आउटलेटबाट संकलन गर्न सक्छन् । यस कम्पनीबाट उत्पादित चाँदीका सिक्का र बारहरु प्रमाणिकताको प्रमाणपत्र र बिलसहित उपलब्ध हुन्छन्, जसले चाँदीको ९९.९९ प्रतिशत शुद्धता र गुणस्तरको गायरेन्टी गर्छ । कम्पनीले दुबई र हङकङबाट चाँदीको ग्रान्युल्स आयात गर्दै आएको छ । सन् २००० मा स्थापना भएको हिमालयन बुलियन कम्पनी गुणस्तर र शुद्धताका हिसाबले उच्चस्तरीय चाँदीका बार र सिक्काको कारोबार गर्ने कम्पनी हो । यसले विशेष गरी ग्रान्युल्स आयात गरी बार र सिक्काको स्वरुपमा चाँदीको कारोबार गर्छ । यो कम्पनी नेपालको बहुमूल्य धातु बजारमा विश्वास, पारदर्शिता र विश्वसनीयता अभिवृद्धि गर्न प्रतिबद्ध छ । कम्पनीले लगानीकर्तालाई सुरक्षित र गुणस्तरीय चाँदीमा लगानी गर्ने अवसर प्रदान गर्छ । ९९.९९ प्रतिशत शुद्धता प्रमाणित चाँदी, पारदर्शी मूल्य निर्धारण, अदृश्य शुल्क नलाग्ने व्यवस्था तथा शतप्रतिशत पुनः खरिदको ग्यारेन्टीमार्फत हिमालयन बुलियन कम्पनीले चाँदीमा लगानीलाई थप सहज, विश्वसनीय र ग्राहककेन्द्रित बनाउने लक्ष्य लिएको छ । १० हजारभन्दा बढी सन्तुष्ट ग्राहक रहेको हिमालयन बुलियनले स्थापनायता १५ करोड अमेरिकी डलरभन्दा बढीको चाँदी कारोबार गरिसकेको छ ।
मंसिर १७ गतेदेखि ११औं नेपाल अन्तर्राष्ट्रिय व्यापार मेला, २०० भन्दा बढी स्टल रहने
काठमाडौं । नेपाल उद्योग वाणिज्य महासंघको नेतृत्वमा आगामी मंसिर १७ गतेदेखि २१ गतेसम्म काठमाडौंको भृकुटीमण्डपमा नेपाल अन्तर्राष्ट्रिय व्यापार मेला आयोजना हुने भएको छ । नेपाल सरकार, उद्योग वाणिज्य तथा आपूर्ति मन्त्रालयको सहयोग, व्यापार तथा निकासी प्रवर्द्धन केन्द्रको प्रवर्द्धन तथा ललितपुर उद्योग वाणिज्य संघ र नेपाल हस्तकला महासंघको सहआयोजनामा सञ्चालन हुने यस मेलाको यो ११औं संस्करण हो । क्यालेन्डर इभेन्टको रूपमा प्रत्येक वर्ष हुँदै आएको यस मेलामा चीन, भारत, पाकिस्तान, बंगलादेश, र भुटानलगायत सार्क राष्ट्र तथा कोरिया, जापान लगायतका देशका क्रेता र व्यापारीहरूको सहभागिता रहने आयोजकले जनाएको छ । मेलामा २०० भन्दा बढी स्टलहरू रहनेछन् जहाँ स्वदेशी एवं विदेशी वस्तु तथा सेवाको प्रदर्शन गरिनेछ । यस वर्षको मेलाको मुख्य आकर्षणमा ‘मेड इन नेपाल’ हस्तकला उत्पादनहरू, वस्तुगत संघहरूका उत्पादनहरू र विद्युतीय गाडीहरू (ईभी) को छुट्टै पेभेलियन रहनेछ । यसका साथै हस्तकला, पर्यटन सूचना तथा प्रविधि एवं व्यावसायिक सूचना, कृषि उत्पादन, ऊर्जा, भवन तथा निर्माणसम्बन्धी शिक्षा आदिका छुट्टाछुट्टै स्टलहरू पनि राखिनेछन् । मेलाको मुख्य उद्देश्य नेपालको अन्तर्राष्ट्रिय व्यापार प्रवर्द्धन गर्नुका साथै नेपाल व्यापार एकीकृत रणनीतिमा विशेष रूपमा पहिचान गरिएका अलैंची, चिया, अदुवा, औषधीय तथा सुगन्धित जडीबुटी, हस्तकला तथा पश्मिना, गलैंचा, कफी, नेपाली कागज तथा कागजजन्य वस्तु, तयारी पोशाक लगायतका निर्यातयोग्य वस्तुहरूको उत्पादन तथा निर्यात वृद्धि गर्न सहयोग पुर्याउनु रहेको छ । यसका साथै, अन्तर्राष्ट्रिय खरिदकर्तासँग प्रत्यक्ष अन्तरक्रिया, नेपाली र चिनियाँ व्यापारीबीच प्रत्यक्ष भेटघाट तथा विभिन्न देशबाट आउने व्यापारिक प्रतिनिधिहरूसँग द्विपक्षीय व्यापार प्रवर्द्धन र लगानीबारे छलफल गराउने लक्ष्य राखिएको छ । यस वर्षको मेलामा स्वदेशी र विदेशी गरी करिब एक लाख अवलोकनकर्ताहरूले अवलोकन गर्ने अपेक्षा गरिएको छ । महासंघकै नेतृत्वमा यस वर्ष पनि मुलुकभित्र प्रादेशिक, जिल्ला स्तर एवं वस्तुगत रूपमा विभिन्न भागमा आयोजना हुने पत्रहरू प्राप्त भईरहेका छन् र विभिन्न जिल्लाहरूमा आयोजना भएका मेलाहरूमा उत्कृष्ट स्टल तथा उत्पादनलाईमा निःशुल्क स्टल उपलब्ध गराइनेछ । राष्ट्रिय तथा अन्तर्राष्ट्रिय तहमा विशिष्ट पहिचान बनाइसकेको यस मेलाको नियमित आयोजनबाट नेपालमा अन्तर्राष्ट्रिय लगानी तथा प्रविधि आकर्षण गर्ने, नेपाली उत्पादनहरूको अन्तर्राष्ट्रिय बजार प्रवर्द्धन गरी समग्र मुलुकको अर्थतन्त्रलाई माथि उठाउन सघाउ पुग्ने दृढ विश्वास महासंघले लिएको छ ।
