सभामुखको भूमिका पदीय गरिमा विपरित : कांग्रेस
काठमाडौं । प्रमुख प्रतिपक्षी नेपाली कांग्रेसले संसदमा सभामुखको भूमिका पदीय गरिमा अनुकूल नभएको निष्कर्ष निकालेको छ । कांग्रेसले विपक्षी दलहरूले वेल घेराउ गरेको अवस्थामा संसद्को बैठक अगाडि बढाएर पदीय गरिमा विपरित काम बताएको छ । प्रधानमन्त्री पुष्पकमल दाहाल प्रचण्डले विश्वासको मत लिएपछि कांग्रेस संसदीय दलको बैठक बसेको थियो । बैठकपछि कांग्रेसका प्रमुख सचेतक रमेश लेखकले कुनै एउटा पार्टी विशेषको कार्यकर्ताका रूपमा सभामुख प्रस्तुत भएको बताउँदै यस्तो कुरा सभामुखका लागि शोभनीय नहुने जिकिर गरेका छन् । कांग्रेस संसदीय दलको बैठकले सभामुखलाई संसदीय परम्परा जोगाउन, सभामुखको मर्यादा कायम राख्दै भूमिका निर्वाह गर्नसमेत आग्रह गर्ने निर्णय गरेको छ।
‘बेल-२१२’ ४३२ पटक दुर्घटना, प्रतिघण्टा २६० किलोमिटरको गति
काठमाडौं । अहिले इरानी राष्ट्रपति इब्राहिम रायसीको ‘बेल-२१२’ हेलिकप्टर दुर्घटना हुँदा मृत्यु भएको खबर चर्चामा छ । हेलिकोप्टरमा रायसीसँगै विदेशमन्त्री हुसेन अमिर-अब्दुल्लाहियन, पूर्वी अजरबैजानका गभर्नर मालेक राहमती, इस्लामिक धर्मगुरु मोहम्मद अली अले-हाशेम र अन्य सबै यात्रुहरूको मृत्यु भएको पुष्टि भएको छ । रायसीको काफिलामा तीनवटा हेलिकप्टर थिए, जसमध्ये दुई सकुशल गन्तव्यमा पुगेका थिए । गन्तव्यमा पुग्न नसकेर दुर्घटनामा परेको हेलिकप्टर बेल-२१२ हो । अब बेल-२१२ हेलिकोप्टरबारे चर्चा गरौं । बेल-२१२ हेलिकप्टर भियतनाम युद्धमा प्रयोग भएको ‘यूएच-१ एन ट्वीन’ जस्तै यात्रुवाहक हेलिकोप्टर हो । यो हेलिकोप्टर सरकारी र निजी दुवैले प्रयोग गर्ने गरेका छन् । समाचार एजेन्सी रोयटर्सका अनुसार यो हेलिकोप्टर सन् १९६० को दशकमा क्यानडाली सेनाका लागि निर्माण गरिएको हो । यो यूएच-१ इरोक्वाइसको नयाँ मोडेल थियो । नयाँ डिजाइनमा दुई इन्जिन प्रयोग गरिएको थियो । नयाँ हेलिकप्टरको क्षमता पनि पहिलेको तुलनामा बढी छ । अमेरिकी सैन्य तालिमसँग सम्बन्धित दस्तावेजका अनुसार सन् १९७१ मा यो हेलिकप्टर आएपछि अमेरिका र क्यानडाले चाँडै नै आफ्नो फ्लिटमा समावेश गरेका थिए । यी युटिलिटी हेलिकप्टर हुन्, त्यसैले तिनीहरूलाई यूएच पनि भनिन्छ। यूएचजस्ता नामहरू सेनाले प्रयोग गर्छन् । यो हेलिकप्टर के उद्देश्यका लागि प्रयोग गरिन्छ ? यी हेलिकोप्टरहरू सबै प्रकारका कामका लागि प्रयोग गर्न सकिन्छ । जस्तै, यात्रु ढुवानी, आगो निभाउने, सामान ढुवानी र हतियार आपूर्ति । इरानी राष्ट्रपति इब्राहिम रायसी चढेको हेलिकप्टर उच्च सरकारी अधिकारी र नेताहरूको यात्रामा प्रयोग गर्न सकिने गरी परिमार्जन गरिएको थियो । यो हेलिकप्टर अमेरिकी कम्पनी बेल टेक्सट्रोनले निर्माण गरेको हो । कम्पनीको मुख्यालय अमेरिकाको टेक्सासमा छ । बेल हेलिकोप्टरको पछिल्लो मोडल बेल-४१२ को बारेमा कम्पनीले विज्ञापन गरेअनुसार प्रहरी, मेडिकल यातायात, सैनिकको आवतजावत, ऊर्जा उद्योग र आगो निभाउने काममा प्रयोग गर्न सकिन्छ । युरोपियन एभिएसन सेफ्टी एजेन्सीबाट प्राप्त कागजात अनुसार यसमा चालक दलका सदस्यसहित १५ जना बस्न सक्छन् । हेलिकोप्टरसम्बन्धी जानकारी दिने वेबसाइट हेलिसका अनुसार बेल-२१२ हेलिकप्टरको लम्बाइ १७ मिटर र उचाइ करिब चार मिटर हुन्छ । ग्लोबल एयरको वेबसाइटका अनुसार बेल-२१२ हेलिकप्टर सञ्चालन गर्न प्रतिघण्टा करिब १ लाख ३५ हजार रुपैयाँ खर्च लाग्छ । वेपन सिस्टम वेबसाइटका अनुसार यो हेलिकोप्टर २ सय ३० देखि २ सय ६० किलोमिटर प्रतिघण्टाको गतिमा उड्छ । बेल-२१२ हेलिकप्टर कहाँ प्रयोग गरिन्छ ? यो हेलिकोप्टर जापानी समुद्री बन्दरगाह गार्डले प्रयोग गर्छन् । अमेरिकामा यो हेलिकोप्टर अग्नि विभाग र कानुन प्रवर्तन एजेन्सीहरू प्रयोग गर्छन् । थाइल्यान्डको राष्ट्रिय प्रहरीले पनि यो हेलिकोप्टर प्रयोग गर्छ । समाचार एजेन्सी रोयटर्सका अनुसार इरानले त्यस्ता हेलिकोप्टर कति प्रयोग गर्छ भन्ने अझै स्पष्ट भइसकेको छैन । तर, फ्लाइट ग्लोबलको २०२४ को विश्व वायुसेना निर्देशिका अनुसार इरानको वायुसेना र नौसेनासँग त्यस्ता १० वटा हेलिकोप्टर छन् । यसअघि यो हेलिकोप्टर सेप्टेम्बर सन् २०२३ मा दुर्घटना भएको थियो । त्यसपछि निजी अपरेटरको यो हेलिकोप्टर यूएईमा दुर्घटना भएको थियो । यस प्रकारको दुर्घटना इरानमा सन् २०१८ मा भएको थियो । त्यतिबेला दुर्घटनामा चार जनाको मृत्यु भएको थियो । सेप्टेम्बर सन् २०१३ मा बेल-२१२ ट्वीन ब्लेड हेलिकोप्टर मुम्बईमा दुर्घटनाग्रस्त भएको थियो । उक्त दुर्घटनामा पाँच जनाको मृत्यु भएको थियो । एभिएसन सेफ्टी नेटवर्क वेबसाइटको दाबी अनुसार सन् १९७२ देखि सन् २०२४ सम्म बेल-२१२ सम्बन्धी ४ सय ३२ घटना भएका छन् । जसमा करिब ६ सय ३९ जनाको मृत्यु भएको छ । इरानको एभिएसन क्षेत्र हेलिकप्टर दुर्घटनाको कारण भने खुल्न सकेको छैन । तर, हवाई यातायात सुरक्षाको मामलामा इरानको रेकर्ड कमजोर छ । यसको एउटा कारण दशकौंदेखि लगाइएको अमेरिकी प्रतिबन्ध पनि रहेको बताइएको छ । जसका कारण इरानको उड्डयन क्षेत्र कमजोर भएको छ । राष्ट्रपति रायसी बेल-२१२ हेलिकोप्टरमा सवार थिए । यो मोडेल अमेरिका मा बनाइएको थियो । विगतमा इरानका रक्षा र यातायात मन्त्रीहरूबाहेक इरानको सेना र वायुसेनाका कमान्डरहरूको पनि विमान वा हेलिकोप्टर दुर्घटनामा मृत्यु भएको थियो । मे २००१ मा इरानको यातायातमन्त्रीको विमान पनि दुर्घटनाग्रस्त भयो र यसको भग्नावशेष पत्ता लगाउन धेरै प्रयास गर्नुपरेको थियो । उक्त विमानमा २८ जना सवार थिए र दुर्घटनामा सबैको मृत्यु भएको समाचार प्रकाशित भएका थिए । इरानी सरकारमा सुधारवादीहरूको नेतृत्वमा देशको विमानलाई आधुनिकीकरण गर्ने प्रयास गर्दा पश्चिमी देशहरूसँग केही सम्झौताहरू पनि भएका थिए । त्यसमा प्रतिबन्ध खुकुलो पार्ने जस्ता कुराहरू समावेश थिए । यद्यपि, यी प्रयासहरू अमेरिकाका तत्कालीन राष्ट्रपति डोनाल्ड ट्रम्पले सम्झौता फिर्ता लिएर प्रतिबन्ध लगाएपछि रोकिएका थिए । एजेन्सी
गिरीबन्धु जग्गाको विषय छानबिनमा ल्याउनुपर्छ : गृहमन्त्री लामिछाने
काठमाडौं । उपप्रधान तथा गृहमन्त्री रवि लामिछानेले प्रधानमन्त्रीलाई विश्वासको मत लिन अवरोध गरेर नेपाली कांग्रेसले लोकतन्त्रको भद्दा मजाक गरेको आरोप लगाएका छन् । सोमबार संसद भवन बाहिर सञ्चारकर्मीहरुसँग प्रतिक्रिया दिँदै गृहमन्त्री लामिछानेले यस्तो आरोप लगाएका हुन् । प्रधानमन्त्रीलाई कुनै एक दलले दिएको समर्थन फिर्ता लिएपछि संसदमा विश्वासको मत लिने संवैधानिक व्यवस्था रहेको भन्दै संसदको विधि अनुसार विश्वासको मत लिँदा समेत कांग्रेसले अवरोध गरेको बताए । गृहमन्त्री लामिछानेले सरकार व्यक्ति केन्द्रित नभई विषय केन्द्रित भएर सहकारीका समस्या समाधान गर्नतिर लाग्ने बताए । उनले संसदीय समिति गठन गर्ने र सहकारी ठगलाई कारबाही गर्नुपर्ने माग जाहेज भएको तर व्यक्ति केन्द्रित माग सम्बोधन हुन नसक्ने बताए । सरकारले सहकारी पीडितहरुको न्यायको लागि दु्रत गतिमा काम गर्ने प्रतिवद्धता जनाए । प्रमुख प्रतिपक्षले व्यक्ति केन्द्रित भएर समिति बनाउन नाराबाजी गरे पनि सरकार व्यक्ति केन्द्रित नभई संवेदनशिल र विषय केन्द्रित भएर समस्या समाधान गर्नतिर लाग्ने जानकारी दिए । ‘गिरीबन्धु जग्गाको विषय विर्सेको होइन । त्यसलाई पनि छानबिनमा ल्याउनुपर्छ । कोको सहभागि छन् छानबिन गर्नुपर्छ तर हिजो प्रसंग त्यो थिएन। मैले संसदमा के भने त्यसको लागि जिम्मेवार छु । के बुझियो र बुझाइयो त्यसको जिम्मेवार छैन । संसदीय समिति गठन गर,सहकारी ठगलाई कारबाही गर म पनि भन्छु । सरकारले सहकारी पीडितहरुको न्यायको लागि दु्रतगतिमा काम गर्छ’, उनले भने । उनले आफूले संसदमा बोल्दा प्रतिपक्षका नेताहरुलाई कुनै आरोप लगाउने र धम्काउने काम नगरेको जानकारी दिए ।
बजेट अभावमा खानेपानी आयोजना निर्माण ठप्प
म्याग्दी । म्याग्दीको सदरमुकाम बेनी बजारमा खानेपानी आपूर्तिको वैकल्पिक व्यवस्था मिलाउन र गुणस्तर सुधार गर्न सञ्चालित आयोजना निर्माण बजेट अभावमा ठप्प भएको छ । निर्माण कम्पनीलाई अघिल्लो आर्थिक वर्षदेखिको एक करोड ३८ लाख रुपैयाँ भुक्तानी गर्नुपर्ने योजनाका लागि चालु आवमा एक लाख रुपैयाँमात्र बजेट प्राप्त भएपछि निर्माण प्रभावित भएको हो । सङ्घीय खानेपानी तथा ढल व्यवस्थापन आयोजना म्याग्दीले बेनी खानेपानी आयोजनाको क्षमता विस्तार कार्यक्रमअन्तर्गत विसं २०७८ असोजमा काठमाडौंको एएम प्याराडाइजसँग दुई करोड ४६ लाख रुपैयाँमा ठेक्का सम्झौता गरेको थियो । निर्माण कम्पनीका इञ्जिनियर अजय तिमिल्सिनाले यसअघि गरेको कामको भुुक्तानी नपाएको भन्दै थप बजेट प्राप्त हुने सुनिश्चित नभएपछि गत फागुनदेखि निर्माण रोकिएको बताए । ‘९० प्रतिशत भौतिक प्रगति भएको आयोजनामा गत वर्ष काम गरेको ५६ लाख भुक्तानी पाउन बाँकी छ’, उनले भने, ‘समयमा भुक्तानी नपाएको र खरिद ऐन संशोधनसँगै ठेक्काको म्याद थप हुने भएपछि काम रोकिएको हो ।’ उनका अनुसार १८ महिनाको ठेक्का अवधि बढेर तीन वर्ष पुग्न लागेको छ । आयोजनामार्फत खडेरी, मुहान सुक्दा, पाइप फुटेको, पहिरोका कारण बेनीमा खानेपानी आपूर्ति बन्द भई हाहाकार हुने समस्या हटाउन विकल्पकारुपमा म्याग्दी नदीको पानी तानेर वितरण गर्ने व्यवस्था मिलाउन पानी शुद्धीकरण गर्ने संरचना तयार पारिएको बेनी खानेपानी उपभोक्ता संस्थाका अध्यक्ष रमेश गिरीले बताए । उनका अनुसार बराहपाखोमा तीन लाख ४० हजार लिटर क्षमताको रिजर्भ ट्याङ्की निर्माण भइसकेको छ । साथै ५।९४ घनलिटर क्षमताको दुई वटा पानी शुद्धीकरण गर्ने गर्ने फिल्टर पलान्ट निर्माण सकिएको छ । नयाँ प्रविधिको ‘सेडिमेशन’ र सो ‘साण्डफिल्टर’ ट्याङ्कीमा प्रयोगमा ल्याउन नसक्दा पानी शुद्धीकरण गर्न अतिरिक्त खर्च बढेको अध्यक्ष गिरीले बताए । ‘बजेट अभावमा पानी शुद्धीकरण गर्ने ट्याङ्कीमा राख्ने सामग्री ल्याउन नसक्दा नयाँ संरचनाको प्रयोग हुन सकेको छैन’, उनले भने, ‘पुरानो ट्याङ्कीमा पानी शुद्धीकरण गर्ने संरचना मर्मत गर्दा धेरै खर्च बढिरहेको छ ।’ बेनी नगरपालिका–२ स्थित कालीगण्डकी नदी किनारको इनारदेखि एक सय ३० मिटर उचाइमा बेनी बजारको शिरमा रहेको बराहपाखोस्थित रिजर्भ ट्याङ्कीसम्म करिब नौ सय मिटर चार इञ्चको जिआइ पाइप जडान गरेर लिफ्ट प्रविधिमार्फत पानी तान्ने व्यवस्था मिलाइएको बेनी खानेपानी उपभोक्ता संस्थाले जनाएको छ । हाल दुई वटा पम्पबाट प्रतिसेकेण्ड १० लिटरका दरले पानी तानिएको छ । तीनवटै पम्प चलाउँदा प्रतिसेकेण्ड १५ लिटरका दरले पानी आपूर्ति गर्न सकिने सङ्घीय खानेपानी तथा ढल व्यवस्थापन आयोजनाका इञ्जिनियर नवीन सुवेदीले बताए । लिफ्ट प्रविधि सञ्चालन भए पनि पानी शुद्धीकरण गर्ने संरचना प्रयोगमा आउन नसकेको उनले बताए । योजनालाई पूर्णता दिन खानेपानी मन्त्रालयमा थप बजेट माग गरिए पनि सफल नहुँदा समस्या परेको इञ्जिनियर सुुवेदीले बताए । आयोजनाले दुई वर्षअघि बेनी खानेपानी आयोजनाको क्षमता विस्तारका लागि ४२ लाख ८१ हजार आठ सय २० रुपैयाँको लागतमा दुई लाख लिटर क्षमताको ट्याङ्की निर्माण गरेको थियो । आयोजनाको हाल एक लाख लिटर क्षमताको एउटा र दुई लाख लिटर क्षमताको दुई वटा रिजर्भ ट्याङ्की छन् । मुहानबाट ट्याङ्कीमा सङ्कलन हुने पानी शुद्धीकरण गरेर वितरण गर्ने संरचना तयार पार्न लागिएको इञ्जिनियर सुवेदीले बताए । उनका अनुसार बेनी–७, ८ र २ का एक हजार एक सय घरधुरीलाई रिठाखर्क, पुम्दी र कोप्रेको मुहानबाट प्रति सेकेण्ड ३३ लिटरका दरले पानी आपूर्ति हुने क्षमता छ । दैनिक पाँच लाख ६० हजार लिटरका दरले खानेपानी वितरण गरिँदै आइएको बेनी खानेपानी तथा सरसफाइ उपभोक्ता संस्थाका प्रबन्धक यामबहादुर विकले जानकारी दिए । उनका अनुसार २७ किलोमिटर दूरीको रिठाखर्क र पुम्दीको मुहानबाट आपूर्ति हुने पानी पहिरो र निर्माणाधीन बेनी–जोमसोम सडकका कारण प्रभावित भएको छ । रासस
नेप्सेमा हरियाली, बैंकिङ समूह ४ प्रतिशतले बढ्यो
काठमाडौं । नेपाल स्टक एक्सचेञ्ज (नेप्से) परिसूचक सोमबार पनि सकारात्मक देखिएको छ । नेप्से परिसूचक आज २७.५४ अकंले बढेर २०९२.०० को बिन्दुमा कायम भएको हो । नेपाल राष्ट्र बैंकले चालु आर्थिक वर्ष २०८०/८१ को मौद्रिक नीतिको त्रैमासिक समीक्षामार्फत् कर्जा प्रवाह विस्तारमा केहि लचिलो नीति लिएपछि त्यसको सकारात्मक प्रभाव पुँजीबजारमा देखिएको छ । जसका कारण सेयर बजार लगातार आइतबार र सोमबार बढेको हो । आज बैंकिङ समूह सबैभन्दा धेरै बढेको छ । यस उपसमूह आज ४.१८ प्रतिशतले बढेको छ । त्यस्तै सबैभन्दा धेरै वित्त समूह घटेको छ । यो समूह ०.५८ प्रतिशतले घटेको छ । आज ३ सय १५ कम्पनीको १ करोड ४३ लाख कित्ता सेयर ८० हजार ९०२ पटक खरिदबिक्री हुँदा ५ अर्ब ८५ करोड रुपैयाँ बराबरको बारोबार भएको छ । आज नेप्सेसँगै कारोबार रकम पनि बढेको हो । हिजो ५ अर्ब २५ करोड १० लाख रुपैयाँ बराबरको कारोबार भएको थियो । पोखरा फाइनान्सको आज सर्वाधिक कारोबार भएको छ । फाइनान्सको आज १९ करोड ९२ लाख रुपैयाँ बराबरको सेयर कारोबार भएको हो । चार कम्पनीको सेयरमा आज सकारात्मक सर्किट लागेको छ । सामुदायिक लघुवित्त, बुद्धभुमि नेपाल, भगवती हाइड्रोपावर र नेरुडे लघुवित्तको सेयरमा सकारात्मक सर्किट लागेको हो ।
स्वावलम्बन लघुवित्तले एसईईमा उत्कृष्ट अंक ल्याउनेलाई दियो १० हजार
काठमाडौं । स्वावलम्बन लघुवित्त वित्तीय संस्थाको वित्तिय साक्षरता तथा केन्द्र प्रमुख अन्तर्क्रिया कार्यक्रम सम्पन्न भएको छ । लघुवित्तको शाखा कार्यालय लेले, ललितपुरको आयोजनामा वित्तीय साक्षरता तथा केन्द्र प्रमुख अन्तर्क्रिया कार्यक्रम शुक्रबार सम्पन्न भएकाे हाे । कार्यक्रममा आथिक बर्ष २०७९/८० मा शाखा अन्तर्गत रहेका केन्द्रमध्ये उत्कृष्ट ३ वटा केन्द्रलाई नगदसहित पुरस्कार वितरण गरिएको थियो । त्यस्तै, शाखा कार्यालय अन्तर्गत शैक्षिक सत्र २०७९ मा एसईई परिक्षामा ग्राहक सदस्यका छोराछोरी मध्येबाट उत्कृष्ट अंक प्राप्त गर्न सफल केन्द्र न ७५ समूह नं. ४ मा आबद्ध सदस्य साइलीमाया लामाकी छोरी लक्ष्मी लामालाई १० हजार रुपैयाँ नगद पुरस्कार वितरण गरिएको थियो । केन्द्र नं. ६३ का प्रमुख पुना देवी राईको अध्यक्षता तथा प्रहरी कार्यालय लेले, ललितपुरका प्रहरी सहायक निरीक्षक भिम बहादुर कोइरालाको प्रमुख आतिथ्यमा सञ्चालित कार्यक्रमका विशिष्ठ अतिथिको रूपमा वित्तीय संस्थाको केन्द्रीय कार्यालयका नायब विभागीय प्रबन्धक मोहित नारायण यादवको उपस्थिति थियो । कार्यक्रममा प्रमुख अथिति प्रहरी सहायक निरीक्षक कोइरालाले लघुवित्तले लिएको महान लक्ष्य गरिवी निवारण रहेकोले यसमा प्रहरीको साथ रहेको बताए । विशिष्ठ अतिथि मोहित नारायण यादवले हाल देशमा वित्तीय संस्थाका बारेमा भइरहेका नराम्रा कुराबाट सर्तक रहन सदस्यलाई आग्रह गरे । त्यस्तै इलाका कार्यालय ठिमी, भक्तपुर क्लस्टरका रेखा कुमारी खैरगोलीले लघुवित्तबाट प्रदान भैरहेको सेवा सुविधाको प्रयोग गरी आय आर्जनमा वृद्धि गर्न सल्लाह दिए । कार्यक्रममा करीब ७० जना ग्राहक सदस्य तथा अभिभावकको सहभागीता थियो ।
ललितपुरको कुमारीपाटीमा राइटपाथले ‘ग्रान्ड एजुकेसन कन्क्लेभ’ गर्ने
काठमाडौं । राइटपाथ करियर काउन्सिलिङले ललितपुरको कुमारीपाटीमा ‘ग्रान्ड एजुकेसन कन्क्लेभ–२०२४’ गर्ने भएको छ । देशका विभिन्न स्थानहरूमा ‘ग्रान्ड एजुकेसन कन्क्लेभ’ सम्पन्न गरिसकेको शैक्षिक परामर्शदाता संस्था राइटपाथले मंगलवार कुमारीपाटी स्थित आफ्नै कार्यालयमा ‘ग्रान्ड एजुकेसन कन्क्लेभ’ गर्न लागेको हो । उक्त कन्क्लेभमा विद्यार्थीले २० भन्दा धेरै ख्यातिप्राप्त विश्वविद्यालयका प्रतिनिधिहरूलाई एकै छानामुनि भेटेर आफ्ना जिज्ञासाहरू मेटाउन सक्नेछन् । युनिभर्सिटीका प्रतिनिधिबाटै विश्वविद्यालयका बारेमा सत्य तथ्य जानकारी पाउने राइटपाथका प्रमुख कार्यकारी अधिकृत (सीईओ) फिलिप्स डिसीले बताए । यस्ता एजुकेसन कन्क्लेभहरूले विद्यार्थीहरूको हौसला बढ्ने उनको भनाई छ । राइटपाथले उक्त कन्क्लेभमा सहभागी हुने विद्यार्थीहरूका लागि विभिन्न अफरहरूको पनि व्यवस्था गरेको छ । सीईओ डिसीका अनुसार कन्क्लेभमा सहभागी हुने विद्यार्थीहरूका लागि एप्लिकेसन प्रोसेसिङमा शत प्रतिशत अफर राखिएको छ भने फ्री मुभी टिकेट तथा एक्साइटिङ गिफ्टह्याम्फरहरूको पनि व्यवस्था गरिएको छ । उनले यूएस लक्षित अफरदेखि ६ हजार लाग्ने आएल्स जम्मा २०८१ रुपियाँमै गर्ने अफर ल्याएको पनि बताए । ग्राण्ड एजुकेसन कन्क्लेभमा वरिष्ठ गायिका अन्जु पन्त र मिस नेपाल २०१६ की विजेता तथा राइटपाथकी ब्राण्ड एम्बेस्टर अस्मी श्रेष्ठ पनि सहभागी हुनेछन् । गायिका पन्त र श्रेष्ठ यसअघिका कन्लेभमा सहभागी भई प्रत्यक्षरुपमा विद्यार्थीहरूलाई हौसला समेत प्रदान गरेका थिए । यसअघि काठमाडौं, धनकुटा, हेटौँडा, चितवन, बुटवल र दाङमा ‘ग्रान्ड एजुकेसन कन्क्लेभ–२०२४’ सम्पन्न भइसकेको छ । वैशाख २९ गते काठमाडौंबाट सुरु भएको ग्रान्ड एजुकेसन कन्क्लेभमा करिब ६ हजारभन्दा बढी अभिभावक तथा विद्यार्थीहरूले सहभागी जनाइसकेका समेत डिसीले जानकारी दिए । राइटपाथले वैशाख २९ गते पुतलीसडक स्थित मुख्य कार्यालयमा सहभागी हुन नसकेका अभिभावक तथा विद्यार्थीहरूका लागि कुमारीपाटीमा उक्त एजुकेसन कन्क्लेभ गर्न लागेको हो । विद्यार्थीहरूले भोली हुन गइरहेको एजुकेसन कन्क्लेभमा सहभागी भई वैदेशिक शिक्षाको लागि परामर्श लिन सक्नेछन् ।
कांग्रेसको अवरोधपछि मंगलबारसम्मका लागि राष्ट्रिय सभा बैठक स्थगित
काठमाडौं । प्रमुख प्रतिपक्ष दल नेपाली कांग्रेसको अवरोधसँगै राष्ट्रिय सभा बैठक पनि स्थगित भएको छ । सोमबारको राष्ट्रिय सभा बैठकमा पनि कांग्रेसका सांसदहरुले उठेर विरोध जनाएपछि बैठक स्थगित भएको हो । कांग्रेसको विरोधपछि बैठक मंगलबार सवा १ बजेसम्मका लागि स्थगित भएको छ । सो क्रममा राष्ट्रिय सभा अध्यक्ष नारायणप्रसाद दाहालले बैठक अवरुद्ध हुँदा काम कारबाही अघि बढ्न नसकेको र प्राप्त उपलब्धिहरुमाथि औंला ठड्याउने काम भइरहेको बताए । उनले राष्ट्रिय सभा सबै समस्या हल गर्ने थलो भएकाले आसन ग्रहण गरेर बैठक सञ्चालन गर्न दिन आग्रह गरे । अध्यक्षको आग्रहपछि पनि कांग्रेसले उठेर विरोध जनाएपछि बैठक मंगलबारसम्मका लागि स्थगित गरिएको अध्यक्ष दाहालले घोषणा गरे ।
