खोटाङ ट्राफिक प्रहरीबाट ५० लाख राजस्व संकलन
खोटाङ । जिल्ला ट्राफिक प्रहरी कार्यालयले आर्थिक वर्ष २०८०/८१ मा सवारी नियम उल्लंघन गरेका छ हजार सात सय २० जनाबाट ५० लाख ३२ हजार रुपैयाँ राजस्व संकलन गरेको छ । बिनाअनुमतिपत्र सवारी साधन चलाएको, कागजपत्र साथ नभएको, मादक पदार्थ सेवनगरी सवारी चलाएको, पटके इजाजतपत्र नलिएको, सिट क्षमताभन्दा बढी यात्रु बोकेको, सिटबेल्ट नबाँधेको, हेलमेट नलगाएको तथा दर्ता नम्बर बिना सवारी साधान चलाउने उपर कारबाही गरेर उक्त रकम संकलन भएको हो । दश स्थानीय तह रहेको जिल्लामा आव २०८०/८१ मा १५ वटा सवारीसाधन दुर्घटना हुँदा पाँचजनाले ज्यान गुमाएका थिएभने १६ जना घाइते भएका थिए । जिल्लाका ग्रामीण सडकमा सञ्चालन हुने अधिकांश साना तथा ठूला सवारी साधन बिना अनुमति सञ्चालन भइरहेका पाइएको जनाउँदै प्रहरीले त्यस्ता सवारीचालकलाई पनि कानुनको दायरमा ल्याइएको बताएको छ । यात्रुबाहक हरेक सवारी साधनले अनिवार्य ‘रुट परमिट’ (सम्बन्धित सडक सवारी अनुमतिपत्र) लिनुपर्ने कानुनी प्रावधान छ । विसं २०६४ मा नेपाली सेनाको हेलिकोप्टरमा बोकेर ल्याइएको सवारी साधनमार्फत यातायात सेवा सुरु गरिएको जिल्लामा सानाठूला गरी करिब सात सयको हाराहारीमा सवारीसाधन सञ्चालनमा छन् । मध्यपहाडी लोकमार्ग र सगरमाथा राष्ट्रिय राजमार्गले छोएको जिल्लाका सबै स्थानीय तह राष्ट्रिय सडक सञ्जालमा जोडिएका छन् ।
कर्णालीमा पर्यटकीय क्षेत्रबाट २ करोड १४ लाख राजस्व संकलन
कर्णाली । कर्णाली प्रदेश सरकारले प्रदेशका केही पर्यटकीय क्षेत्रबाट २ करोड १४ लाख ७५ हजार ९ सय १७ रुपैयाँ राजस्व संकलन गरेको छ । आर्थिक वर्ष २०८०र८१ मा प्रदेश सरकारले रारा राष्ट्रिय निकुञ्जबाट ४१ लख १२ हजार २ सय, सुर्खेत प्रादेशिक सहिद पार्कबाट ९० लाख ९० हजार, काक्रेबिहारबाट ११ लाख ५० हजार ३ सय र बुलबुले उद्यानबाट ७१ लाख १४ हजार ४ सय १७ रुपैयाँ राजस्व संकलन गरेको हो । उद्योग, पर्यटन, वन तथा वातावरण मन्त्रालय पर्यटन विकास शाखाका प्रमुख प्रशासकीय अधिकृत देवकुमारी शाहीका अनुसार से–फोक्सुण्डो ताल, गुराँसे गाउँपालिकामा रहेको दैलेख‘भ्यूटावर’बाटसङ्कलन भएको राजस्व यसमा समावेश भएको छैन । पर्यटकीयस्थलले युक्त कर्णालीका सल्ल्यानको कुपिण्डे ताल, रुकुमपश्चिमको स्यार्पुताल, जुम्लाको गिडी दह, चन्दननाथ मन्दिर, कनकासुन्दरी, डोल्पाको त्रिपुरासुन्दरी, कालिकोटको पचाल झरना, दैलखेको पञ्चकोशी, दुल्लु दरबार, गढी क्षेत्र, हुम्लाको लिमी उपत्यका, जाजरकोट दरबार, सुर्खेतको बराहताल, जाजुरा दहलगायत स्थानको अभिलेख पनि मन्त्रालयसँग नभएको उनले बताइन् ।
१२ किलो चरेशसहित १८ वर्षीय कुञ्जन नियन्त्रणमा
काठमाडौं । सशस्त्र प्रहरी बलले पर्सा जिल्लाको पोखरीया नगरपालिका–१ स्थित बनकटवाबाट १२ किलो चरेश, विभिन्न किसिमका सामान र एउटा मोटरसाइकलसहित एक जनालाई नियन्त्रणमा लिएको छ । भारतको पश्चिम चम्पारन विसनपुर मटेरवा बस्ने १८ वर्षीय कुञ्जनकुमार महतोलाई साउन १२ गते सशस्त्र प्रहरी बल, नेपाल सुरक्षा बेश पोखरीयाले नियन्त्रणमा लिएको हो । बीआर २२ एबी १२९२ नम्बरको मोटरसाइकलमा नेपालबाट भारततर्फ जाँदै गरेका उनलाई शंका लागि जाँच गर्दा महतोको साथबाट १२ केजी चरेश, ५ हजार ४ सय २० भारतीय रुपैयाँ, १ थान मोबाइल सेटसहित नियन्त्रणमा लिइएको हो । नियन्त्रणमा लिइएका महतोलाई बरामद सामान र मोटरसाइकलसहित आवश्यक कारबाहीका लागि नेपाल प्रहरीलाई बुझाइएको छ ।
४०औं वर्षमा नबिल बैंक, देशव्यापी ‘नबिल दिगो पाइला’ वाकाथन
काठमाडौं । नबिल बैंकले देशव्यापी ‘नबिल दिगो पाइला’ वाकाथन गरेको छ । दिगो भविष्यको प्रतिवद्धतासहित जनचेतना जगाउने उद्देश्यले वाकाथन गरिएको बैंकले जनाएको हो । शनिबार स्थापनाको ४०औं वार्षिकोत्सवको अवसरमा बैंकले दिगो भविष्य निर्माणको प्रतिवद्धता जनाउँदै देशव्यापी वाकाथन आयोजना गरेको हो । बैंकले हालसम्म प्राप्त गरेका उपलब्धिलाई संस्थागत गर्दै दिगो भविष्यप्रति प्रतिवद्धताका लागि वाकाथनमार्फत ऐक्यवद्धता जनाएको छ । वाकाथन शुभारम्भ गर्दै बैंकका अध्यक्ष उपेन्द्र पौड्यालले नबिलले ४० वर्ष अगाडि नै दिगो पाइला चालेका कारण अहिलेसम्म आइपुगेको र आगामी दिनमा पनि यसलाई निरन्तरता दिँदै जाने प्रतिवद्धता जनाए । बैंकका प्रमुख कार्यकारी अधिकृत (सीईओ) ज्ञानेन्द्र ढुंगानाले दिगो भविष्यको प्रतिवद्धतासहित देशव्यापी वाकाथन आयोजना गरिएको बताए । वाकाथन शनिबार दरबारमार्गको तीनधारास्थित केन्द्रिय कार्यालयबाट शुरु भइ कमलादी, घण्टाघर, भद्रकाली मन्दिर, शहीद गेट, न्युरोड गेट, वसन्तपुर दरबार स्क्वायर हुँदैफेरि केन्द्रिय कार्यालायमा पुगेर टुंगिएको थियो । बैंकका अनुसारनारायणगढ, बिराटनगर, बिर्तामोड, वीरगञ्ज, जनकपुर, पोखरा, बुटवल, नेपालगञ्ज,सुर्खेत, धनगढी, हेटौँडा र दाङमा पनि एकैसाथ आज वाकाथन आयोजना गरिएको थियो । बैंकले २४ लाखभन्दा बढी सेवाग्राहीलाई २६८ शाखा र ३१६ एटिएममार्फत सेवा प्रदान गर्दै आएको जनाएको छ ।
टर्कीमा ३० बिलियन अमेरिकी डलर हाई-टेक इन्सेन्टिभ कार्यक्रम सुरु
काठमाडौं । टर्कीका राष्ट्रपति रेसेप तैयप एर्दोगानले राष्ट्रिय उच्च प्रविधि प्रोत्साहन कार्यक्रम प्रश्तुत गरेका छन् । इस्तानबुलमा एक प्रक्षेपण कार्यक्रममा बोल्दै एर्दोगानले सरकारले अनुदान र कर प्रोत्साहनको एक श्रृंखलाको योजना बनाएको बताए । २०२४–२०२८ का लागि विद्युतीय सवारी साधन, ब्याट्री उत्पादन, अर्धचालक उत्पादन र नवीकरणीय ऊर्जामा लगानी बढाउन आग्रह गरे । कार्यक्रमको उद्देश्य अन्तर्राष्ट्रिय प्रत्यक्ष लगानीमा बलियो पुनरुत्थान र देशमा निजी क्षेत्रको लगानीमा कम्तीमा २० बिलियन डलर आकर्षित गर्ने रहेको बताए । टर्किएले विद्युतीय सवारीको आन्तरिक उत्पादन क्षमता प्रतिवर्ष कम्तिमा १० लाख युनिटसम्म पुर्याउन पाँच अर्ब डलरको प्रोत्साहन प्याकेज प्रश्ताव गर्ने बताए ।
साउन ३० गते एकीकृत कारोबार गर्दै आइएमई र जिएमइ रेमिट
काठमाडौं । आइएमई लिमिटेड र जिएमइ रेमिट प्रालि बीचको एकीकृत कारोबार साउन ३० गतेदेखि हुने भएको छ । जिएमइ रेमिट प्रालिलाई गाभेर आइएमई लिमिटेडले साउन ३० गतेदेखि एकीकृत कारोबार गर्ने भएको हो । मर्जरपश्चात् आइएमई लिमिटेडको नामबाट कारोबार हुनेछ । गत जेठ ९ गते सम्पन्न दुइटै कम्पनीको विशेष साधारण सभाले एकआपसमा गाभ्ने विशेष प्रस्ताव पारित गरेका थिए । साथै नेपाल नेपाल राष्ट्र बैंकले साउन २ गते र कम्पनी रजिष्ट्रारको कार्यालयले साउन ४ गते एकीकृत कारोबारका mागि अन्तिम स्वीकृति दिएको थियो ।
मैलुङ खोलाको सञ्चालकबाट डा. पोखरेलले दिए राजीनामा
काठमाडौं । मैलुङ खोला जलविद्युत कम्पनीको सञ्चालक डा. तारा प्रसाद पोखरेलले राजीनामा दिएका छन् । लामो समयदेखि कम्पनीको सञ्चालक पदमा रहेका डा. पोखरेलले व्यक्तिगत कारण देखाई राजीनामा दिएका कम्पनी सचिव विनय चिपालुले जानकारी दिए । साथै कम्पनी सञ्चालक समितिले डा. पोखरेलले दिएको राजीनामा स्वीकृत गरेको छ । साउन १० गतेदेखि लागू हुने गरी उनको राजीनामा स्वीकृत भएको कम्पनी सविच चिपालुले बताए ।
एनआईसी एशियाले १७१ रुपैयाँमा सूर्यज्योती लाइफको सेयर बेच्दै
काठमाडौं । एनआईसी एशिया बैंकले सूर्यज्योती लाइफ इन्स्योरेन्सको सेयर बिक्रीमा राखेको छ । बैंकले आफ्नो स्वामित्वमा रहेको ९२ हजार ३४९ कित्ता संस्थापक सेयर आज साउन १३ गतेदेखि बिक्रीमा राखेको हो । बैंकले बिक्रीमा राखेको सूर्यज्योती लाइफको उक्त सेयरको मूल्य प्रतिकित्ता १७१ रुपैयाँ तोकिएको छ । खरिद गर्न इच्छुक बैंक तथा वित्तीय संस्था र बीमा कम्पनीले साउन १८ गतेसम्म आवेदन दिनुपर्नेछ । उक्त सेयरमा न्यूनतम ५ हजार कित्ताका लागि आवेदन दिनुपर्नेछ बैंकको स्वामित्वको इन्स्योरेन्सको उक्त सेयर बिक्री प्रबन्धकमा एनआर्ईसी एशिया क्यापिटल रहेको छ ।
