आरटीजीएस कारोबार साढे ६७ प्रतिशतले बढ्यो, कुन माध्यमबाट कति कारोबार ?
काठमाडौं । साउनमा रियल टाइम ग्रस सेटलमेन्ट (आरटीजीएस) मार्फत् हुने कारोबार बढेको छ । नेपाल राष्ट्र बैंकका अनुसार साउनमा ७४ हजार ३८० जनाले आरटीजीएसमार्फत् एक सय खर्ब बढी रुपैयाँ बराबरको कारोबार गरेका हुन् । गत असारमा ८१ हजार ६०५ जनाले ६४ खर्ब ५१ अर्ब १६ करोड रुपैयाँ बराबरको कारोबार गरेका थिए । साउनमा कारोबार गर्ने संख्या घटेको छ भने कारोबार रकम भने बढेको देखिन्छ । यस्तै, गत साउनमा १ करोड १३ लाख १६ हजार ५२० जनाले ८७ अर्ब ८७ करोड रुपैयाँ एटीएमबाट पैसा झिकेको राष्ट्र बैंकले जनाएको छ । गत असारमा भने १ करोड १२ लाख १६ हजार ३० जनाले ९१ अर्ब २६ करोड रुपैयाँ एटीएमबाट पैसा झिकेका थिए । त्यस्तै, साउनमा कनेक्ट आइपीएस गर्नेहरूको संख्या र कारोबार रकम पनि घटेको देखिन्छ । साउनमा ६८ लाख ४४ हजार ६८७ जनाले ५ खर्ब २५ अर्ब ३३ करोड रुपैयाँ बराबरको कारोबार कनेक्ट आइपीएसबाट गरेका छन् । गत असारमा ७७ लाख ८७ हजार २८२ जनाले ६ खर्ब ६६ अर्ब ५८ करोड रुपैयाँ कारोबार कनेक्ट आइपीएसबाट गरेका थिए । त्यस्तै, गत साउनमा इन्टरनेट बैंकिङ गरेर ४ लाख ९ लाख ६५ जनाले २२ अर्ब ४९ करोड रुपैयाँ बराबरको कारोबार भएको राष्ट्र बैंकले जनाएको छ । गत असारमा ३ लाख ५१ हजार ३०१ जनाले इन्टरनेट बैंकिङ प्रयोग गरेर १७ अर्ब ७३ करोड रुपैयाँको कारोबार गरेका छन् । त्यस्तै, मोबाइल बैंकिङ प्रयोग गरेबापत साउनमा ४ करोड ७४ लाख ६० हजार २४५ कारोबार हुँदा ३ खर्ब ७७ अर्ब ६३ करोड रुपैयाँको कारोबार भएको छ । गत असारमा ४ करोड ५६ लाख ६९ हजार ३०१ पटक कारोबार हुँदा ३ खर्ब ७३ अर्ब ९७ करोड रुपैयाँको कारोबार भएको थियो । त्यस्तै, वालेटबाट साउनमा ३ करोड ८ लाख ७८ हजार ९४० पटक कारोबार हुँदा ४३ अर्ब ६९ करोड रुपैयाँको कारोबार भएको छ । गत असारमा ३ करोड २१ लाख ५ लाख ९१७ पटक कारोबार हुँदा ३८ अर्ब १४ करोड रुपैयाँको कारोबार भएको राष्ट्र बैंकले जनाएको छ । साउनमा क्यूआरमा आधारित भुक्तानी २ करोड २९ लाख ३४ हजार ६२७ पटक हुँदा ६२ अर्ब २८ करोड रुपैयाँको कारोबार भएको छ । जबकि असारमा २ करोड ८ लाख २५ हजार ६१५ पटक क्यूआरमा आधारित भुक्तानी हुँदा ६१ अर्ब ७३ करोड रुपैयाँ कारोबार भएको थियो ।
रु रु जलविद्युतको लाभांश घोषणा, बोनसपछि ८० प्रतिशत हकप्रद सेयर जारी गर्ने
काठमाडौं । रु रु जलविद्युत परियोजनाले लाभांश घोषणा गरेको छ । कम्पनीको असोज १२ गते बसेको सञ्चालक समितिको बैठकले सेयरधनीहरूलाई १५.७८९ प्रतिशत लाभांश प्रस्ताव गरेको हो । कम्पनीले गत आर्थिक वर्ष २०८०/८१ को नाफाबाट हाल कायम चुक्ता पुँजीको १५ प्रतिशत बोनस सेयर र कर प्रयोजनका लागि ०.७८९ प्रतिशत नगद गरी कुल १५.७८९ प्रतिशत लाभांश प्रस्ताव गरेको हो । कम्पनीले प्रस्ताव गरेको लाभांश पारित गर्न कात्तिक ११ गते नक्साल काठमाडौंमा बिहान ११ बजे १९औं वार्षिक साधारणसभा बोलाएको अध्यक्ष आशिष सुवेदीले जानकारी दिए । बोनस सेयर वितरणपश्चात् कम्पनीको चुक्ता पुँजी १ अर्ब २ करोड ११ लाख रुपैयाँ हुनेछ । कम्पनीको सभाले चुक्ता पुँजीको ८० प्रतिशत हकप्रद सेयर जारी गर्ने प्रस्ताव पनि पारित गर्नेछ ।
अम्बानीले एक कर्मचारीलाई दिन्छन् २४ करोड भारु तलब, नेपाली बैंकरको भन्दा सेफको कमाइ बढी
काठमाडौं । एशियाका सबैभन्दा धनी व्यक्ति मुकेश अम्बानी आफ्नो विलासी जीवनशैलीका लागि परिचित छन् । तर, के तपाईंलाई थाहा छ उनको घरका शेफले कति तलब पाउँछन् ? रिपोर्टका अनुसार मुकेश अम्बानीका शेफले हरेक महिना करिब २ लाख भारु पाउँछन् । यसबाहेक उनीहरूलाई स्वास्थ्य बीमा र उनीहरूको परिवारको लागि शिक्षा सहयोगजस्ता अतिरिक्त सुविधाहरू पनि दिइएको छ । नीता अम्बानीले एक अन्तर्वार्तामा भनेकी थिइन् कि आफ्नो व्यस्त तालिकाको बावजुद मुकेशले सधैं आफ्नो परिवारसँग डिनर गर्न समय निकाल्छन् । परिवारसँग खाना खानु उनीहरूको दैनिक दिनचर्याको एक महत्त्वपूर्ण भाग हो, जसले सँगै बस्नुको महत्त्व देखाउँछ । मुकेश अम्बानी शाकाहारी हुन् । मुकेशलाई स्ट्रीट फूड, विशेषगरी सेभ पुरी र अन्य मसालेदार खाजा मन पर्छ । उनी मुम्बईको लोकप्रिय रेस्टुरेन्ट ‘स्वाती स्न्याक्स’ बाट पनि खाना अर्डर गर्न मन पराउँछन् । तिनीहरूको परिवारमा सामान्यतया दाल, रोटी र भात जस्ता परम्परागत भारतीय खानाहरू समावेश हुन्छन् । मुकेशले सेफका लागि दिने पैसा नेपाली ३ लाख २० हजार हुन्छ । जसको वार्षिक तलब ३८ लाख ४० हजार रुपैयाँ हुन आउँछ । जुन नेपाली बैंकरको हाराहारीमा हो । कतिपय बैंकका प्रमुख कार्यकारी अधिकृत (सीईओ)को तलब यो भन्दा पनि कम हुने गरेको छ । मुकेश अम्बानीले देशका लाखौं मानिसलाई रोजगारी दिँदै आएका छन् । उनले एक कर्मचारीका लागि सबैभन्दा बढी २४ करोड भारतीय रुपैयाँ दिने गरेका छन् । उनले रिलायन्स कम्पनीमा काम गर्ने निखिल मेसवानीलाई सबैभन्दा बढी तलब दिने गरेको भारतीय सञ्चारमाध्यमले उल्लेख गरेका छन् । एजेन्सी
पूर्वी पहाडका तीन जिल्लामा विद्युत् सेवा अवरुद्ध
पाँचथर । पहिरोले काबेली करिडोर विद्युत् प्रसारण लाइनमा क्षति भएपछि पूर्वी पहाडका तीन जिल्लामा विद्युत् सेवा अवरुद्ध भएको छ । पहिरोले काबेली करिडोर एक सय ३२ केभी प्रसारण लाइनको इलामको महामाईमा रहेको ५१ नम्बरको टाबर ढलेको छ । टावर ढलेपछि इलाम, पाँचथर र ताप्लेजुङमा विद्युत् सेवा अवरुद्ध भएको हो । यसैबीच, नेपाल विद्युत् प्राधिकरणले वैकल्पिक माध्यमबाट बत्ती बाल्ने प्रयास जारी रहेको जनाएको छ । काबेली करिडोर एक सय ३२ केभी प्रसारण लाइन निर्माण भएपछि पूर्वी पहाडमा उत्पादित विद्युतलाई राष्ट्रिय प्रसारणमा जोड्ने तथा यी क्षेत्रमा विद्युत् सेवा वितरणको कार्य सोही करिडोरको माध्यमबाट हुँदै आएको थियो । रासस
नेशनल लाईफले गर्यो गण्डकी प्रदेशका अभिकर्ताहरूलाई सम्मान
काठमाडौं । नेशनल लाईफ इन्स्योरेन्स कम्पनीले पोखराको होटल ल्याण्डमार्कमा कम्पनीका प्रमुख कार्यकारी अधिकृतको सभापतित्वमा सिइओ क्लब सदस्य सम्मान कार्यक्रम सम्पन्न गरेको छ । आर्थिक वर्ष २०८०/८१ मा तोकिएको बीमाशुल्क संकलन गरी गण्डकी प्रदेशबाट योग्य भएका २२५ जनाभन्दा बढी अभिकर्ताहरू, विभागिय प्रमुख, प्रदेश प्रमुख एवं शाखा प्रमुखहरूको सहभागितामा कम्पनीले सिईओ क्लब सदस्य बन्न सफल अभिकर्ताहरूलाई सम्मान कार्यक्रम सम्पन्न गरेको छ । प्रमुख कार्यकारी अधिकृत सुरेश प्रसाद खत्रीले पानसमा द्वीप प्रज्वलन गर्दै शुभारम्भ गरिएको सम्मान कार्यक्रममा गण्डकी प्रदेशबाट सिइओ क्लबका सदस्य हुन सफल अभिकर्ताहरूलाई सिइओ क्लब सदस्यता वितरण गरिएको थियो । प्रदेशबाट आफ्नो कोडमा र सञ्जलमा प्रथम, द्वितीय र तृतीय हुन सफल अभिकर्ताहरूलाई विशेष सम्मान तथा पुरस्कृत पनि गरिएको थियो । समारोहमा सिइओ क्लब सदस्य र नेशनल रत्नबाट सम्मानित हुन सफल बिजनेश लिडरहरूले प्रमुख कार्यकारी अधिकृतबाट सम्मान ग्रहण गर्न पाउँदा आफूले गरेको मेहनतको कदर भएको र अत्यन्तै गर्व लागेको बताएका थिए ।
विमानस्थल खुले, खुलेनन् नाका, दशैंमा टिकट महँगिने
काठमाडाैं । मौसमअनुकूल भएसँगै त्रिभुवन अन्तर्राष्ट्रिय विमानस्थलका साथै अन्य आठवटा विमानस्थलबाट हवाई सेवा सञ्चालन भएको छ । त्रिभुवन अन्तर्राष्ट्रिय विमानस्थलका महाप्रबन्धक जगन्नाथ निरौलाका अनुसार आज राति १० बजेसम्म ‘इन्स्ट्रुमेन्ट फ्लाइट रुल्स’ (आइएफआर) प्रणालीमा उडान अनुमति दिइएको छ । त्रिभुवन अन्तर्राष्ट्रिय विमानस्थलबाट सबै आन्तरिक र अन्तर्राष्ट्रिय उडान भइरहेका छन् । प्रतिकूल मौसमका कारण शुक्रबार र शनिबार चार सयभन्दा बढी उडान रद्द भएका थिए । त्रिभुवन अन्तर्राष्ट्रिय विमानस्थलबाट दैनिक एक सय ५० देखि एक सय ६० उडान हुने गरेका छन् । सुर्खेत विमानस्थलबाहेक सबै विमानस्थलबाट उडान भइरहेको छ । यसअघि प्राधिकरणले प्रतिकूल मौसमका कारण शुक्रबार साँझ ७ः०० बजेदेखि शनिबार दिउँसोसम्म सबै आन्तरिक उडान स्थगन गरेको थियो । विमानस्थल सञ्चालनमा आएपनि काठमाडौं उपत्यकाबाट आवागमन भने प्रभावित भएको छ । काठमाडौं भित्रिने क्रममा रहेका गाडीहरु भने बीचबाटोमै अलपत्र छन् । पश्चिमतर्फबाट काठमाडौं भित्रिने मुख्य नाका नागढुंगाको अवस्था सबैभन्दा खराब छ । झ्याप्ले खोलानेर ठूलो पहिरो झर्दा केही गाडीहरू पुरिएका छन् । त्यहाँको पहिरो पन्छाउने काम भइरहेको छ । काठमाडौं उपत्यका ट्राफिक प्रहरी कार्यालयका प्रवक्ता विश्वराज खड्काले धादिङ र काठमाडौं दुवैतिरबाट नागढुंगाको पहिरो पन्छाउने काम भइरहेको जानकारी दिए । उनका अनुसार पहिरोमा परेर केही गाडी पनि पुरिएका छन् । सवारीसाधनको आवागमन प्रभावित भएसँगै अब दशैंमा घर जानेहरूले महँगो मूल्यमा हवाइ टिकट काटेर जानुपर्ने बाध्यता देखिएको छ । यसले यात्रुलाई थप आर्थिक भार हुने भएको छ ।
साढे २ करोड लगानीमा म्याग्दीको मालिकामा स्वास्थ्यचौकी भवन निर्माण
म्याग्दी । मालिका गाउँपालिका–२ चिमखोला गाउँमा सुविधासम्पन्न स्वास्थ्यचौकी भवन निर्माण भएको छ । संघीय सरकारको अनुदानमा मालिका गाउँपालिकाले दुई करोड ६४ लाख १४ हजार दुई सय ६२ रुपैयाँको लागतमा उक्त भवन निर्माण गरेको हो । हाल कच्ची भवनको साँघुरो कोठाबाट सेवा प्रवाह हुँदै आएको स्वास्थ्यचौकी चाँडै सुविधासम्पन्न भवनमा सारिने मालिका गाउँपालिका–२ का वडाध्यक्ष उदयबहादुर बुढाथोकीले बताए ।
चांगानले पोखरामा सार्वजनिक गर्यो दिपल ईभी, ७१ लाख ९९ हजारमा किन्न सकिने
पोखरा । नेपालका लागि चांगानको आधिकारिक विक्रेता एमएडब्लु वृद्धिले नेपालले छोटो समयमा निकै रुचाइएको दिपल ईभीहरुलाई पोखरामा सार्वजनिक गरेको छ । शुक्रबार पोखरामा आयोजित विशेष कार्यक्रममा गण्डकी प्रदेशका सामाजिक विकास, युवा तथा खेलकुदमन्त्री बिन्दुकुमार थापा, नेपाली क्रिकेट लेजेन्ड तथा दिपल ईभीका ब्रान्ड एम्बास्डर पारस खड्का, चांगानको पोखरा डिलर हिमालय अर्गनाइजेसनकी संस्थापक मिलन थापा तथा डाइरेक्टर सौरभ थापाले फ्युचरिस्टिक डिजायन र कटिंग एज टेक्नोलोजीले भरिएको दिपल एस०७ र एल०७ ईभी सार्वजनिक गरेका हुन् । दिपल ईभी सार्वजनिक गर्दै मन्त्री थापाले पोखरामा चांगानको सफलताको कामना गरे। साथै, उनले चांगान र अन्य ब्रान्डहरुले बिक्री मात्र नभइ बिक्रीपछिको सेवा र ग्राहक सन्तुष्टिलाई प्राथमिकतामा राख्नुपर्ने बताए । त्यसैगरी, दिपल ईभीका ब्रान्ड एम्बास्डर खड्काले दिपल ईभी भ्यालु फर मनि भएको बताए । ‘यसमा यति धेरै फिचरहरु छन् कि जुन अझै पनि अन्य ब्रान्डका ईभीमा उपलब्ध छैन’, उनले भने, ‘म दिपलको पर्फमेन्सबाट पूर्णरुपमा सन्तुष्ट छु । म पोखरालाई आफैँ आएर दिपलको प्रविधि र फिचरको फस्ट ह्यान्ड अनुभव गर्न आग्रह गर्न चाहन्छु ।’ चांगान पोखराकी संस्थापक मिलन थापाले दिपल ब्रान्डलाई लिएर आफू निकै उत्साहित रहेको बताए । ‘औपचारिक रुपमा पोखरामा सार्वजनिक हुनुभन्दा पहिले नै हामीले बजारबाट निकै राम्रो प्रतिक्रिया पाउन थालिसकेका छौँ,’ उनले भने । त्यसैगरी, चांगान नेपालका मार्केटिंग हेड रमेश दनेखूले एमएडब्लु ग्राहक सन्तुष्टिमा प्रतिबद्ध रहेको बताए । ‘चांगान चीनको सबैभन्दा पुरानो अटोमोबाइल कम्पनी हो जसको एकसय ६२ वर्ष लामो विरासत छ । र नेपालमा यसलाई प्रतिनिधित्व गर्न पाउँदा एमएडब्लु गर्व गर्छ,’ उनले भने, ‘नेपालमा सार्वजनिक भएको पाँच महिनामै पाँच सयभन्दा दिपल बिक्री भएका छन् र उहाँहरु सबैजना यसको डिजाइन र टेक्नोलोजीका कारण सन्तुष्ट छन् ।’ दिपलमा वेलकम सिट, सनफ्लावर टचस्क्रिन, अग्मेन्टेड रियालिटी हेडअप डिस्प्ले, जेस्चर कन्ट्रोल, हेडरेड र आउट डोर स्पिकर लगायत १५ भन्दा बढी फस्ट टाइम फिचरहरु छन् जसका कारण यो ईभी नेपाल बजारमा छोटो समयमै लोकप्रिय बन्न सफल भएको छ। एमएडब्लु वृद्धिले अर्को साता पोखराकै सबैभन्दा ठूलो एक्सचेन्ज एन्ड टेस्ट ड्राइभ क्यामको आयोजना गर्दैछ जहाँ ग्राहकले दिपल, सेरस र नामीले नाडा अटो सोमा जारी गरेको विशेष अफर उपयोग गर्न सक्नेछन्, जसअन्तर्गत दिपल एस ०७ बजेटअघिको मूल्य ७१ लाख ९९ हजार रुपैयाँमा खरिद गर्न सक्नेछन् । साथै, नयाँ सेरेस ३ लाई ४५ लाख ४९ रुपैयाँमा खरिद गर्न सक्नेछन् भने नामी ईभीमा ७ किलोवाटको चार्जर पाउनेछन्। ग्राहकले हरेक टेस्ट ड्राइभ र पुरानो गाडीको मूल्यांकनमा आकर्षक उपहार पाउनेछन् । यसबाहेक ‘अनस्पट फाइनान्सिङ’ र ‘अनस्पट डेलिभरी’ पनि लिन सक्ने कम्पनीले जनाएको छ।
