२४ वर्षपछि हरिबोधनी एकादशी मेला
काठमाडौं । कुनै समय एकादशीको दिन बागलुङस्थित निरयघाटको कालीगण्डकी किनारामा लाग्ने हरिबोधनी एकादशी मेला २४ वर्षयता भने सञ्चालनमा छैन । त्यसताका उक्त मेलामा हजारौँको भिड लाग्ने गर्दथ्यो । किनमेल तथा भेटघाटका लागिसमेत उक्त मेला प्रसिद्ध थियो । हजारौँले नागरिकले डोलामा तोरण बोकेर मेलामा लगिने र मेलाको अवसरमा कालीगण्डकीमा तार्ने परम्परा धेरैको आकर्षणको केन्द्र थियो तर शान्ति सुरक्षा र द्वन्द्वका कारण २४ वर्षयता मेला हुनसकेको छैन । पछिल्लो सयम भने यहाँका स्थानीय अगुवाहरूले मेला आयोजना गर्न चासो देखाएका छन् । त्यसका लागि हरिबोधनी एकादशी मेला संरक्षण समिति गठन गरिएको छ । उक्त समितिका अध्यक्ष रमेश राजभण्डारीले औपचारिक रूपमा करिब २४ वर्षसम्म रोकिएको मेला यस वर्षबाट सुनः सञ्चालन गर्ने गरी तयारी सुरु भएको जानकारी दिए । उनले यही कात्तिक २७ गते कालीगण्डकी किनार निरयघाटमा हरिबोधनी एकादशी मेला लाग्ने बताए । ‘विसं २०५७ सालमा जिल्ला प्रशासनले नै शान्ति सुरक्षाको चुनौती देखाएर मेला बन्द गरेपछि त्यसयता उक्त स्थानमा मेला लाग्न सकेको छैन । एकादशीको दिन कालीगण्डकीमा नुहाउन जाने परम्परा रहे पनि संस्थागत रूपमा मेला सञ्चालन हुननसकेपछि पहिलेकै अवस्थामा मेला आयोजना गर्ने हाम्रो योजना छ । त्यसका लागि बुधबारबाटै कालीगण्डीमा तान्ने तोरण बाट्न सुरु गरिएको छ, उक्त दिन व्यक्तिगत रूपमा समेत तोरण लिएर आउन आग्रह गरिएको छ । बाबियो र कुशबाट बनाइने तोरण एक सय ८ मिटरभन्दा बढी लामो हुनेछ । तोरणलाई वैदिक रूपमा निर्माण गरिनेछ,’ अध्यक्ष राजभण्डारीले भने । विसं २०५७ सालअघि एक युवाको छुरा प्रहार गरी हत्या प्रयाससमेत भएपछि रातिमा लाग्ने मेला क्रमशः हराउँदै गएको जानकारहरू बताउँछन् । रातभर जाग्राम बसेर भजनकृतन गर्ने र बिहान कालीगण्डकीमा स्नान गर्ने, तोरण तान्ने र पूजाअर्चना गर्ने, किनमेल गर्ने हरीबोधनी एकादशी मेलालाई २४ वर्षपछि आयोजना गर्न विभिन्न उपसमितिसमेत गठन गरिएका छन् । आरती वाचक तथा गायक रमेश खड्काले पुर्खौँदेखि लाग्दै आएको मेला नेपालकै ठूलो मेलामध्येको एक रहे पनि पछिल्लो समय हराउँदै गएकामा सबै जनाको सल्लाहबमोजिम पुनः सुरु गर्न लागिएको सुनाउनुभयो । मेलाको अवसरमा कालीगण्डकी पुजन, कालीगण्डकी सरसफाइ र दीपसमेत प्रज्वलन गरिने छ । यही २६ गते तोरणलाई बागलुङ बजारमा शोभायात्रासहित परिक्रमा गर्ने र २७ गते कालीगण्डकी नदी किनार निरयघाटमा तोरणसहित प्रस्थान गरिने योजना छ । मेला, धार्मिक पूजा, तोरण तान्नेलगायतका क्रियाकलाप सञ्चालन गर्न यस वर्षबाट सुरुआत गरिएको उद्योग वाणिज्य सङ्घ बागलुङका अध्यक्ष नरेश कँडेलले जानकारी दिए । आफ्नो धर्म, संस्कृति र परम्परालाई आगामी दिनमा पर्यटनसँग जोड्नका लागि मेलालाई २४ वर्षपछि निरन्तरता दिन थालिएको उहाँले बताए । मेलाका लागि तोरण संयोजक, भजन संयोजक, आर्थिक व्यवस्थापन संयोजक, दिप संकलन, गङ्गा पूजन र सरसफाइलगायत कार्यक्रमका लागि उपसमितिसमेत गठन गरिएका छन् ।
छठ पर्वको मुख्य दिन आज, अस्ताउँदो सूर्यलाई अर्घ दिइँदै
काठमाडौं । छठ पर्वको मुख्य दिन आज साँझ अस्ताउँदो सूर्यलाई पूजाआराधना गरी अर्घ दिइँदैछ । कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व मङ्गलबारदेखि सुरु भएको हो । ऐतिहासिक पौराणिक ग्रन्थ महाभारतमा उल्लेख भएअनुसार द्रोपदीसहित पाँच पाण्डव अज्ञातवासमा रहँदा उक्त गुप्तवास सफलहोस् भनी सूर्यदेवलाई आराधना गरिएको थियो । त्यस समयमा पाण्डव विराट राजाको दरबारमा बास बसेको उल्लेख छ । लोक कथनबमोजिम सोही समयदेखि छठ मनाउने परम्पराको थालनी भएको हो । सूर्य पुराणअनुसार सर्वप्रथम अत्रिमुनिकी पत्नी अनुसूयाले छठ व्रत गरेकी थिइन् । फलस्वरूप उनले अटल सौभाग्य र पतिप्रेम प्राप्त गरिन् । त्यही बेलादेखि ‘छठ पर्व’ मनाउने परम्पराको सुरुआत भएको हो । संसारका सम्पूर्ण भौतिक विकास सूर्यमाथि नै आधारित छन् । सूर्यको शक्तिविना रुख, बिरुवा, वनस्पति, प्राणी, जीवजन्तु कसैको पनि अस्तित्व रहन सक्दैन । सूर्यकिरणको चिकित्सामाथि कैयाँै चिकित्सकले ग्रन्थ लेखेको पाइन्छ । सूर्यको किरणवाट कैयौँ असाध्य तथा अक्षय रोगको आश्चर्यजनक उपचारसमेत खोजिएको जानकारहरू बताउँछन् । साम्व पुराणमा आफ्नै पिता श्रीकृष्ण तथा महर्षि दुर्वासाको सरापद्वारा कुष्ठरोगबाट पीडित साम्व सूर्यको आराधनाको फलस्वरूप रोग मुक्त हुन गएको भन्ने चर्चा छ । छठ पर्वमा व्रत गरे दुःख र दरिद्रताबाट मुक्ति पाइन्छ भन्ने जनविश्वास छ । यसमा झुप्पा–झुप्पा फल चढाउँदा सूर्य देवता प्रसन्न भई व्रतालुका कुटुम्बसहित सबै सन्तानको भलो हुन्छ भन्ने मान्यता पाइन्छ । यस पर्वमा जो व्रत बस्न सक्दैन उसले अर्को व्रत गर्नेबाट कामना पूरा गराउने गर्छन् । आर्थिक अभाव भएका मानिस भिक्षा मागेरै भए पनि यो पर्व मनाउने परिएको छ । व्रतविधि कार्तिक शुक्ल चतुर्थीका दिन स्नान गरी एक छाक खाएर बस्ने गरिन्छ । दोस्रो दिन कार्तिक शुक्ल पञ्चमीमा सखर हालेर बनाइएको खीर ९खरना¬० षष्ठी मातालाई चढाई व्रतालुले प्रसादस्वरूप खाने र नुन नखाई एक छाक फलाहार गरिन्छ । यो पर्वको मुख्य दिन कार्तिक शुक्ल षष्ठीका दिन कठोर निराहार व्रत गरी बेलुकी अस्ताउँदो सूर्यलाई पूजाआराधना गरी अर्घ दिने विधि विधान रहेको गुह्येश्वरी गौरीघाट छठ पूजा समिति गुह्येश्वरीका अनिल सिंहले बताए । ‘षष्ठीका दिन रातभर जागा बसी कार्तिक शुक्ल सप्तमीका दिन बिहान उदाउँदो सूर्यलाई पूजाआराधना गरी विधिपूर्वक अर्र्घ दिएपछि यो पर्व समापन हुन्छ,’ उनले भने । कार्तिक शुक्ल पक्षमा विधिपूर्वक सूर्यको पूजाआराधना गरी अर्घ दिएमा चर्म अर्थात् छाला रोग लाग्दैन भन्ने धार्मिक विश्वास छ । विसं २०४६ अघि तराई मधेशलगायत सीमित क्षेत्रमा मनाइने छठले अहिले राष्ट्रियस्वरूप ग्रहण गरेको छ । विसं २०४६ देखि नै सरकारले यो पर्वका अवसरमा देशभर सार्वजनिक बिदा दिने गरेको छ । बीचमा केही वर्ष बिदा काटिएकामा अहिले फेरि दिन थालिएको छ । छठ पर्वका लागि राजधानीको गुह्येश्वरीबाट गौरीघाट क्षेत्र, कमलपोखरीलगायत वागमती, नख्खु र विष्णुमतीलगायत नदी किनारमा सजावट गरिएको छ । छठका बर्तालुले कार्तिक शुक्ल चतुर्थीदेखि नै चोखो खानपान गरी शुद्ध भएर बस्ने गर्छन् । केही बर्तालुले भने कोजाग्रत पूर्णिमाको भोलिपल्ट अर्थात् कार्तिक कृष्ण प्रतिपदादेखि नै लसुन, प्याजलगायत तामसी खाद्यपदार्थ नखाई चोखो अर्थात् सात्विक भोजन गरेर बस्छन् । यसैले यो पर्व अत्यन्तै पवित्र भएर मनाउने चाडका रूपमा स्थापित भएको छ ।
ट्रम्पले गरे मस्कको खुलेर प्रशंसा, ट्रम्प राष्ट्रपति हुँदा मस्कलाई के-के हुनसक्छ फाइदा ?
काठमाडौं । अमेरिकी राष्ट्रपतीय निर्वाचनमा डोनाल्ड ट्रम्प विजयी भएका छन् । उनले आफ्नो प्रतिद्वन्द्वी कमला ह्यारिसलाई पराजित गरेका हुन् । विजयपछि ट्रम्पले फ्लोरिडाको पाम बीचमा आफ्नो विजयी भाषण दिएका थिए । सम्बोधनका क्रममा ट्रम्पले अमेरिकी व्यापारी तथा विश्वका सबैभन्दा धनी व्यक्ति एलन मस्कको निकै तारिफ गरे । आफ्नो सम्बोधनका क्रममा ट्रम्पले मस्कलाई नयाँ स्टार भनेका थिए । उनले भनेका छन्, ‘उनी (एलन) सुपर जिनियस हुन् । हामीले हाम्रा प्रतिभाशाली मानिसहरूलाई जोगाउनु पर्छ । हामीसँग त्यस्ता व्यक्तिहरू थोरै छन् ।’ आफ्नो सम्बोधनका क्रममा पूर्वराष्ट्रपति ट्रम्पले मस्कको कम्पनी स्पेसएक्सले अमेरिकाको अन्तरिक्ष क्षेत्रलाई अगाडि बढाउनका लागि गरेको प्रयासको खुलेर प्रशंसा गरे । मस्कले चुनावी अभियानका क्रममा ट्रम्पलाई खुलेर समर्थन गरेका थिए । मस्कको तारिफमा ५ मिनेट खर्च ट्रम्पले आफ्नो भाषणमा करिब ५ मिनेट मस्कको उल्लेख गरेका थिए । ट्रम्पले मस्कलाई अद्भूत व्यक्तिको रूपमा व्याख्या गरेका छन् । मस्कले फिलाडेल्फिया र पेन्सिल्भेनियाका विभिन्न भागमा दुई साता प्रचार अभियानका क्रममा ट्रम्पसँग बिताएका थिए । आफ्नो भाषणमा ट्रम्पले मस्कका धेरै कामको चर्चा गरे । ट्रम्प राष्ट्रपति बन्दा मस्कलाई के-के फाइदा ? प्रशासनमा स्थान पाउन सक्ने मस्कले ट्रम्पको प्रशासनमा स्थान पाउन सक्ने अथवा आयोगको नेतृत्व गर्न सक्ने अनुमान गरिएकाे छ । ट्रम्पका वरिष्ठ सल्लाहकार ब्रायन ह्युजका अनुसार मस्कले ‘आयाेग’को नेतृत्व गर्ने ट्रम्पको विश्वास छ । यसको उद्देश्य सरकारलाई थप प्रभावकारी बनाउन र करदाताको पैसाको राम्रो उपयोग सुनिश्चित गर्नु हो । मस्कको इच्छाअनुसार कर कटौती हुनसक्ने एलन मस्कले पनि कर कटौतीबाट लाभ उठाउन सक्छन् । ट्रम्प कर्पोरेशन र धनीहरूका लागि कम कर कायम राख्ने कुरा गर्दै आइरहेका छन् । आफ्नो पहिलो कार्यकालमा उनले कर्पोरेट कर दर ३५ बाट २१ प्रतिशतमा झारेका थिए । मस्कका कम्पनीलाई छुट ट्रम्पको जितसँगै मस्कका कम्पनीहरूले पनि धेरै छुट पाउन सक्छन् । मस्कको कम्पनी स्पेसएक्सले सबैभन्दा बढी फाइदा लिनसक्छ । यस कम्पनीले यसअघि पनि धेरै सरकारी सम्झाैता पाइरहेको छ । यी सम्झौताहरू ट्रम्पको शासनमा पनि जारी रहन सक्छन् र यी सम्झौताहरूको संख्या पनि बढ्न सक्छ । यी चुनौतीबाट राहत पाउन सक्ने मस्कका धेरै कम्पनीहरूले जो बाइडेन प्रशासनबाट धेरै चुनौतीको सामना गरेका छन् । यसमा स्पेसएक्स र टेस्ला कारखानालगायतका कम्पनी समावेश छन् । मस्कको अमेरिका पीएसीसँग पनि अदालतमा मुद्दा चलिरहेको छ । यसमा दैनिक एक मिलियन डलर मूल्य तिर्ने कुरा पनि समावेश छ । एक्सलाई पनि मिल्न सक्छ लाभ मस्कले पनि ट्रम्प प्रशासनबाट सोशल मिडिया प्लेटफर्म एक्स (पुरानो ट्वीटर) को बारेमा पनि विभिन्न अपेक्षा गर्न सक्छन् । मस्कले यसलाई अक्टोबर २०२२ मा ४४ बिलियन डलरमा किनेका थिए । तर, यसपछि प्लेटफर्मले धेरै समस्याबाट गुज्रनुपर्यो । यसको प्रयोगकर्ताको संख्या पनि घट्न थालेको छ । ट्रम्पको विजयपश्चात मस्कले आफ्नो व्यवसायमा वृद्धिको आशा गर्न सक्छन् । (एजेन्सीको सहयोगमा)
प्राइम बैंकको डीजीएम बने सुमितबाबु खत्री, कर्जा तथा मार्केटिङमा लामो अनुभव
काठमाडौं । प्राइम कमर्सियल बैंकको नायव महाप्रबन्धक (डीजीएम)मा सुमितबाबु खत्री नियुक्त भएका छन् । कात्तिक २० गतेदेखि लागू हुनेगरी बैंकको डीजीएममा खत्री नियुक्त भएका हुन् । साढे दुई दशक बढी बैंकिङ क्षेत्रको अनुभव भएका उनी यसअघि सिटिजन्स बैंकको वरिष्ठ नायव प्रमुख कार्यकारी अधिकृत (सिनियर डीसीईओ) पदमा कार्यरत थिए । २ दशक सिटिजन्स बैंकमा काम गरेका खत्री एक महिनाअघि मात्रै बाहिरिएका थिए । कर्जा तथा मार्केटिङ क्षेत्रमा लामो अनुभव रहेका खत्रीले फाइनान्समा एमबीए गरेका छन् । खत्री मेरो माइक्रोफाइनान्स लघुवित्त वित्तीय संस्थाको सञ्चालक समिति अध्यक्षसमेत हुन् ।
टेलिकमले मल्टीपल टीभी जडान गर्ने, मूल्य कति ?
काठमाडौं । नेपाल टेलिकमले कर्पोरेट ग्राहकहरूको मागलाई ध्यानमा राखी मल्टीपल टीभी जडान गर्ने भएको छ । जसअन्तर्गत चारवटा वा सोभन्दा धेरै जडान गर्ने कर्पोरेट ग्राहकहरूले सहुलियत दरमा बेसिक तथा प्रिमियम प्याकेजहरू खरिद गर्न सक्ने टेलिकमका प्रवक्ता हरि ढकालले जानकारी दिए । उनका अनुसार ४ देखि १० वटा मल्टीपल टीभी जडान गर्ने ग्राहकले प्रति सेटटप बक्स २ हजार ९३८ रुपैयाँमा १ वर्ष वारेन्टीसहित खरिद गर्न सक्नेछन् भने ११ वटाभन्दा बढी मल्टीपल टीभी जडान गर्ने ग्राहकले प्रति सेटटप बक्स २ हजार ८२५ रुपैयाँमा १ वर्ष वारेन्टीसहित खरिद गर्न सक्नेछन् । यस सेवासम्बन्धी आवश्यक जानकारीका लागि १९८ मा कल गरेर वा नजिकैको कम्पनीको कार्यालयहरूमा सम्पर्क गर्न सकिने टेलिकमले जनाएकाे छ ।
सञ्चार सेवा सहज बनाउन मन्त्री गुरुङको निर्देशन
मनाङ । सञ्चार तथा सूचना प्रविधिमन्त्री पृथ्वीसुब्बा गुरुङले सञ्चार सेवा सहज बनाउन निर्देशन दिएका छन् । सञ्चारमन्त्री गुरुङले बुधबार जिल्ला हुलाक कार्यालयको अनुगमन गर्दै जिल्लाका सबै क्षेत्रसम्म सञ्चार सेवा सहज बनाउन निर्देशन दिएका हुन् । सो अवसरमा उनले टेलिफोन नेटवर्कका बारेमा स्थानीयको रायसुझाव लिएका थिए । यसैगरी जिल्लास्थित सरकारी कार्यालयहरुको अनुगमनपछि सञ्चारमन्त्री गुरुङले बेँसीसहर–चामे सडक निर्माणलाई तीव्रता दिन आग्रह गरे । उनले भने, ‘हरेक क्षेत्रका व्यक्ति सञ्चार सेवाबाट वञ्चित हुनु हुँदैन, हुलाक र टेलिकम सेवालाई सहज बनाउन आवश्यक छ ।’
राति १० बजे विमानस्थल बन्द हुनुभन्दा १५ मिनेट अगाडि नै यात्रुलाई चेकइन गर्न आग्रह
काठमाडौं । आन्तरिक वायुसेवा कम्पनीहरूको छाता संस्था वायुसेवा सञ्चालक संघले शुक्रबारदेखि राति १० बजे विमानस्थल बन्द हुनुभन्दा १५ मिनेट अगाडि नै यात्रुलाई चेकइन गर्न आग्रह गरेकाे छ । बुधबार विज्ञप्ति जारी गर्दै संघले यस्ताे आग्रह गरेकाे हाे । ‘विमानस्थल स्तोरोन्नतिको काम जाडो महिनामा हुने भएकोले अधिकांश विमानस्थलमा हुस्सु तथा कम भिजिविलिटिका कारण नियमित उडान प्रभावित हुने, आईएफआर उडान हुने विमानस्थलमा रात्रि उडान भएतापनि १० बजेभित्र सम्पन्न गरिसक्नु पर्ने, सदस्य वायुसेवा कम्पनीहरूका चेक इन काउण्टर उडान समयभन्दा करिब १५ मिनेट अगाडि नै बन्द हुने भएकोले यात्रु महानुभावहरूले वायुसेवा कम्पनीहरूले जारी गरेको टिकटमा उल्लेखित समयमा नै चेक इन काउण्टरमा रिपोर्टिङ गरिदिनु हुनका लागि समेत यो संघ हार्दिक अनुरोध गर्दछ,’ विज्ञप्तिमा भनिएकाे छ । नेपाल नागरिक उड्डयन प्राधिकरणले कार्तिक २३ गतेदेखि करिब ५ महिनासम्म त्रिभुवन अन्तर्राष्ट्रिय विमानस्थलको स्तरोन्नति गर्न लागेकाे छ । ट्याक्सीवे विस्तार गर्न दैनिक राति १० बजेदेखि बिहान ८ बजेसम्म विमानस्थल बन्द हुने भएकाे हाे । विमानस्थल दैनिक १० घण्टा बन्द हुन लागेकाे हाे । यो अवधिमा हाल उडान गरिरहेको आन्तरिक वायुसेवाको कम्तिमा ३० प्रतिशत उडान कतौती हुने भएको छन् । विमानस्थलको विस्तार तथा पूर्वाधार निर्माणको विषयमा संघ सदैव सकारात्मक रहनुका साथै पूर्वाधार निर्माणपश्चात सदस्य वायुसेवा कम्पनीहरू तथा अन्तर्राष्ट्रिय वायुसेवा कम्पनीहरूका जहाज आउजाउ तथा ट्राफिकमा समेत दीर्घकालीन रूपमा सहज हुने विश्वास संघकाे छ । प्राधिकरणले विमानस्थलको मर्मतका क्रममा वायुसेवा कम्पनीहरुलाई पोखरा र भैरहवा विमानस्थलबाट उडान गर्न आग्रह गरेको छ । संघका सदस्य वायुसेवा कम्पनी (हेलिकप्टर) हरूले भिएफआर उडानअन्तर्गत नलिञ्चोक हेलिप्याडबाट सूर्योदयदेखि सूर्यास्तसम्म नै हेलिकप्टर उडान तथा अवतरण हुने र त्रिभुवन अन्तर्राष्ट्रिय विमानस्थलबाट बिहान ८ बजे देखि उडान तथा अवतरण हुने भएकोले सम्बन्धित सरोकारवाला सबैलाई सोहीअनुसार गर्न/गराउन पनि संघले अपिल गरेको छ । संघले नेपाल नागरिक उड्डयन प्राधिकरणले धावनमार्ग तथा समानन्तर ट्याक्सी वे वीचको लिकंरोड निर्माण कार्य तोकिएको समयसम्ममा नै सम्पन्न गर्ने छ भन्ने विश्वाससमेत लिएको छ । सन् २०२५ को वसन्त ऋतुसम्म पनि निर्माण कार्य सम्पन्न नभएको खण्डमा सदस्य वायुसेवा कम्पनीहरु अत्याधिक आर्थिक घाटामा गई कम्पनी नै बन्द गर्नु पर्ने अवस्था सृजना हुन जाने भएकोले पनि तोकिएको समयमा ट्याक्सी वे बीचको लिंकरोड निर्माण गर्न पनि वायुसेवा सञ्चालक संघले अपिल गरेको छ ।
अमेरिकाको ४७ औं राष्ट्रपति बने डोनाल्ड ट्रम्प
काठमाडौं । डोनाल्ड ट्रम्प अमेरिकाको ४७ औं राष्ट्रपति बनेका छन् । रिपब्लिकन पार्टीका उम्मेदवार ट्रम्पले डेमोक्र्याटिक्स पार्टीकी उम्मेदवार कमला ह्यारिसलाई पराजित गर्दै राष्ट्रपति बनेका हुन् । निर्वाचन आयोगले भने आधिकारिक घोषणा गर्न बाँकी नै छ । राष्ट्रपतिमा ट्रम्पको इलेक्टोरल भोट २७९ पुगेको छ । जबकि राष्ट्रपतिमा निर्वाचित हुनका लागि २७० इलेक्टोरल भोट भए पुग्छ । जित निश्चित भएपछि ट्रम्पले आफ्ना समर्थकलाई सम्बोधन गर्दै धन्यवाद दिएका थिए । उनले अमेरिकाले पुन एकपटक जितेको बताए । राष्ट्रपतिको निर्वाचनसँगै अमेरिकी संसद्को दुबै सदन सिनेट र हाउस अफ रिप्रिजेन्टेटिभमा ट्रम्पको पार्टी रिपब्लिकनले अग्रता बनाएको छ । यस्तोमा सिनेटमा भने ट्रम्पको पार्टीले बहुमतसहितको जित निकालेको छ । सन् २०१६ मा पहिलो कार्यकाल राष्ट्रपति बनेका ट्रम्प सन् २०२० मा डेमोक्रेटिकका उम्मेदवार जो बाइडनसँग पराजित भएका थिए । अहिले ट्रम्प तेस्रो पटक चुनावी प्रतिस्पर्धामा उत्रिएका हुन् ।
