जेन जीलाई संयमित हुन डा. रुइतको आग्रह
काठमाडौं । डाक्टर सन्दुक रुइतले प्रदर्शनमा रहेका जेन जीलाई संयमित हुन आग्रह गरिएको छ । सार्वजनिक सम्पती तोडफोडमा उत्रिएका जेनजीहरूलाई असहिष्णु र भ्रष्ट राजनीतिक नेतृत्व पछाडी हटिसकेकाले संयम हुन आग्रह गरेका हुन् । सामाजिक सञ्जालमा बिशेष अनुरोध गर्दै डा. रुइतले युवाहरूलाई आग्रह गरेका हुन् । उनले लेखेका छन्, ‘परिवर्तनका लागि सडकमा विरोध प्रदर्शन गरिरहनुभएका भाइबहिनीहरू तपाइले देखाउनुभएको आदम्य साहसका कारण असहिष्णु र भ्रष्ट राजनीतिनेतृत्व पछाडि हटिसकेको छ । यस्तो अवस्थामा सार्वजनिक सम्पतीमाथि आगजनी गर्नु र नष्ट गर्नु उचित हुँदैन ।’ डा. रुइतले सार्वजनिक सम्पतीको संरक्षण गर्नु हरेक नागरिकको पहिलो दायित्व भएकाले सार्वजनिक सम्पतीको नोक्सानी नगर्न आग्रह गरेका हुन् ।
प्रदर्शन शान्तिपूर्ण बनाउन आयोगको आग्रह
काठमाडौं । राष्ट्रिय मानव अधिकार आयोगले प्रदर्शनलाई शान्तिपूर्ण, मर्यादित र संयमित बनाउने कार्यमा जिम्मेवार हुन प्रदर्शनरत पक्षलाई आग्रह गरेको छ । आयोगका प्रवक्ता डा टीकाराम पोखरेलले आज जारी गरेको प्रेस विज्ञप्तिमा विगतका घटनाबाट शिक्षा लिँदै आजको प्रदर्शनमा थप मानवीय र भौतिक क्षति हुन नदिनका लागि प्रदर्शनलाई गम्भीरतापूर्वक लिन आयोगले आग्रह गरेको हो । प्रदर्शनका क्रममा भएको मानव अधिकारको उल्लङ्घनको अनुसन्धानका लागि आयोगले आज आयोगका सदस्य डा. लिली थापाको संयोजकत्वमा अनुसन्धान टोली गठन गरेको जनाएको छ ।
जेनजीले प्रकाशमान सिंहको घरसहित ६ वटा गाडी जलाए
काठमाडौं । नेपाली कांग्रेसका नेता प्रकाशमान सिंहको ठमेल चाक्सीबारीस्थित घरमा जेनजीले आगजनी गरेका छन् । जेनजीले सिंहको निवास र ६ वटा गाडी जलाएका हुन् । नेता सिंह र उनको परिवारका सदस्यहरूलाई भने सुरक्षाकर्मीले पहिल्यै सुरक्षित स्थानमा पठाएका थिए । सिंह नेपाली सेनाको सुरक्षामा छन् । आक्रोशित समूह सिंह निवासमा प्रवेश गरेपछि सुरक्षाकर्मीले रोक्न सकेका थिएनन् । त्यसपछि जेनजीले सिंह निवासमा आगो लगाएका थिए ।
भाटभटेनी सपिङ सेन्टरमा आगजनी
काठमाडाै । भाटभटेनी सपिङ सेन्टरमा पनि आगजनी गरिएको छ। मंगलबार प्रर्दशनकारीहरुले नक्सालस्थित भाटभटेनी सपिङ सेन्टरमा पनि आगजनी गरेका हुन् । जेनजी युवा पुस्ताले गरेको प्रर्दशनमा सरकारी कार्यालयदेखि धेरै सम्पतिमा क्षति पुगेको छ ।
थापाथलीस्थित सीजी मोटर्सको शोरूममा आगजनी
काठमाडौं । काठमाडौंको थापाथलीमा रहेको सीजी मोटर्सको शोरूममा जेनजीहरूले आगजनी गरेका छन् । मंगलबार प्रदर्शनको क्रममा उनीहरूले शोरूममा आगो लगाएका हुन् । घटनाबारे थप विवरण आउन बाँकी छ । सुरक्षाकर्मीहरू घटनास्थलमा पुगिसकेका छन् र स्थिति नियन्त्रणमा लिने प्रयास भइरहेको छ ।
पूर्वप्रधानमन्त्री झलनाथकी श्रीमतीलाई जिउँदै जलाइयो
काठमाडौं । प्रर्दशनकारीहरूको आगजनीमा परी पूर्वप्रधानमन्त्री झलनाथ खनालकी श्रीमती रविलक्ष्मी चित्रकार शख्त घाइते भएकी छन् । मंगलबार जेनजी प्रदर्शनकारीले खनालको डल्ल्लुस्थित निवासमा आगजनी गर्दा श्रीमती चित्रकार जलेकी हुन्। उनलाई कीर्तिपुरस्थित बर्न अस्पतालमा पुर्याइएको छ । उनको अवस्था गम्भीर रहेको छ ।
सिंहदरबारपछि राष्ट्रपति कार्यालय शीतलनिवासमा पनि आगजनी
काठमाडौं । काठमाडौंमा जारी जेनजीहरुको प्रदर्शन चर्किंदै जाँदा राष्ट्रपति कार्यालय शीतलनिवासमा समेत आगजनी भएको छ । उग्र प्रदर्शनमा उत्रिएका जेनजी आन्दोलनकारीहरूले शीतलनिवासको एक भागमा आगो लगाएको छ । यसअघि सिंहदरबार, संसद् भवन, सर्वोच्च अदालत, विशेष अदालत, जिल्ला अदालत, प्रमुख राजनीतिक दलका शीर्ष नेताहरूको निवास र कार्यालयहरूमा समेत आगजनी र तोडफोडका घटना भइसकेका छन् । संसद् भवन परिसरमा समेत जेनजीहरूले सुरक्षाकर्मीको बन्दुक खोसेर गोली पड्काएका थिए । सिंहदरबार आसपासमा सुरक्षाकर्मीहरूसँग झडप भइरहेको छ । प्रधानमन्त्री केपी शर्मा ओलीले यसबीचमा राजीनामा गरिसकेका छन् । यद्यपि जेनजीहरूको आक्रोश अझै शान्त भइसकेको छैन, र उनीहरूले विभिन्न सरकारी तथा संवैधानिक निकायहरूमा आक्रमण जारी राखेका छन् ।
जेनजीद्वारा देउवा चोकलाई ‘जेनजी चोक’ नामाकरण
काठमाडौं । आन्दोलनका प्रदर्शनकारीहरूले बुढानिलकण्ठस्थित देउवा चोकलाई सांकेतिक रूपमा ‘जेनजी चोक’ नामाकरण गरेका छन् । मंगलबारको आन्दोलनका क्रममा प्रदर्शनकारीहरूले सडक छेउको भित्तामा लेखेर देउवा चोकलाई नयाँ नाम दिएका हुन् । यसअघि प्रदर्शनकारीहरूले नेपाली कांग्रेसका सभापति तथा पूर्वप्रधानमन्त्री शेरबहादुर देउवा र परराष्ट्रमन्त्री आरजु राणा देउवामाथि आक्रमण गरेका थिए। आक्रमणमा परेर देउवा दम्पती घाइते भएको बताइएको छ । ‘जेनजी’ आन्दोलन चर्किँदै जाँदा प्रदर्शनकारीहरूले विभिन्न राजनीतिक दलका कार्यालय, नेताहरूका निजी निवास र सरकारी निकायहरूमा तोडफोड तथा आगजनी गरिरहेका छन् ।
