सिद्धार्थ बैंकका ग्राहकहरूलाई जर्मन होम्समा १० प्रतिशत छुट
काठमाडौं । सिद्धार्थ बैंक र जर्मन होम्स प्रालिबीच बैंकका ग्राहकलाई विभिन्न सेवामा छुट प्रदान गर्ने सम्बन्धी सम्झौता भएको छ । सम्झौता अनुसार बालकोट, भक्तपुरस्थित जर्मन होम्स्मा बैंकका ग्राहकहरूले बैंकको कार्ड वा मोबाइल बैंकिङ प्रयोग गरी भुक्तानी गर्दा १० प्रतिशतसम्मको छुट प्राप्त गर्न सक्नेछन् । यस सम्झौताले ग्राहकहरूलाई छुटको सुविधा उपलब्ध गराउनुका साथै नगद कारोबारबाट डिजिटल कारोबारमा जान पनि उत्प्रेरित गर्ने विश्वास बैंकले लिएको छ । यस समन्वयको बारेमा थप जानकारीका लागि बैंकको २४ सै घण्टा सञ्चालनमा रहने ग्राहक सेवा केन्द्र, ‘सिद्धार्थ केयर’ मा सम्पर्क गर्न सकिने बैंकले जनाएको छ ।
तिलिचो बेसक्याम्पमा टुजी र फोरजी सेवा सुरु, च्छो रोल्पामा भोइस सेवा
काठमाडौं । नेपाल टेलिकमले मनाङको प्रसिद्ध पदयात्रा र पर्यटन क्षेत्र तिलिचो बेस क्याम्पमा नयाँ बीटीएस (बेस ट्रान्सीभर स्टेशन) स्थापना गरी टुजी र फोरजी मोबाइल सेवा शुक्रबारबाट सञ्चालनमा ल्याएको छ । करिब ४ हजार ३५० मिटर उचाइमा अवस्थित तिलिचो ताल जाने रुटमा नेपाल टेलिकमले माइक्रोवेभ प्रविधिमार्फत सेवा विस्तार गरेको हो । यससँगै खाङसार–श्रीखर्क–तिलिचो बेसक्याम्प–बाइसघुम्ती क्षेत्रका स्थानीय बासिन्दा, पदयात्री र व्यवसायीहरू अब सजिलै सञ्चार सम्पर्कमा रहन सक्ने भएका छन् । टेलिकम सेवाको विस्तारपछि उक्त क्षेत्रका पर्यटन, होटल र व्यवसायिक सेवा प्रदायकहरूले डिजिटल भुक्तानी प्रणालीमा आवद्ध हुन सजिलो हुने भएको छ । साथै पदयात्राका क्रममा स्वास्थ्य समस्या परेमा आपतकालीन उद्धार कार्यमा पनि नेपाल टेलिकमको सेवा जीवनरक्षक हुने स्थानीयवासीहरूको विश्वास रहेको छ । यसै क्रममा नेपाल टेलिकमले दोलखा जिल्लाको रोल्वालिङ उपत्यकामा पर्ने च्छो–रोल्पा ट्रेकिङ रुटको अन्तिम बस्ती नागाउँमा पनि भ्वाइस सेवा सुरु गरेको छ । सो सेवा मिति असोज २८ गतेदेखि भी–एसएटी प्रविधिमार्फत सुचारु गरिएको हो । समुद्री सतहदेखि ४ हजार १९० मिटरको उचाइमा अवस्थित नागाउँ साइटबाट च्छो–रोल्पा, बेदिङ–ना, दूधकुण्ड, यालुङ बेसक्याम्प, टासी लेप्चा पास बेसक्याम्प लगायतका क्षेत्रका स्थानीय तथा पर्यटकहरूले अब सहज सञ्चार सम्पर्क गर्न पाउनेछन्। उच्च उचाइ, कठोर मौसम र जनशक्ति अभावबीच पनि नेपाल टेलिकमका प्राविधिक कर्मचारीहरूले गरेको अथक प्रयासका कारण दुर्गम हिमाली क्षेत्रमा आधुनिक सञ्चार सेवा विस्तार सम्भव भएको हो । नेपाल टेलिकमले भविष्यमा पनि देशका अन्य दुर्गम पर्यटन र सीमावर्ती क्षेत्रमा आधुनिक प्रविधियुक्त सेवा विस्तार गर्ने प्रतिबद्धता जनाएको छ ।
नेपाल प्रहरीले गर्यो ८५ वटा पीकअप खरिदको प्रक्रिया सुरु
काठमाडौं । नेपाल प्रहरीले ८५ वटा पीकअप खरिद गर्ने प्रक्रिया सुरु गरेको छ । जेनजी आन्दोलनका क्रममा धेरै गाडीमा क्षति पुगेसँगै प्रहरीले गस्तीमा प्रयोग गर्ने पीकअप खरिद गर्न लागेको हो । प्रहरीले खुलाएको टेन्डरमा ७५ युनिट पेट्रोलबाट चल्ने पीकअपको लागि बोलपत्र माग गरिएको छ । विद्युतीय पीकअप भने १० युनिट खरिद गर्न लागिएको हो । प्रहरी प्रधान कार्यालयले बिहीबार सूचना जारी गर्दै गाडी किन्न टेण्डर आह्वान गरेको हो । इच्छुक कम्पनी/टेण्डरदाताले आगामी कात्तिक ९ गते (२६ अक्टोबर) मा हुने प्रिबिड मिटिङमा सहभागिता जनाउन पाउने छन् । त्यसपछि विद्युतीय टेण्डर कात्तिक १४ (३१ अक्टोबर) भित्र पेस गर्नुपर्ने सूचनामा उल्लेख छ। प्रहरी प्रधान कार्यालयका अनुसार टेण्डर १४ कात्तिक अपराह्न २ बजे खोलिने छ ।
गगन थापाले गरे मंसिरमै कांग्रेसको १५औं महाधिवेशन प्रस्ताव
काठमाडौं । नेपाली कांग्रेसका महामन्त्री गगन थापाले पार्टीको १५औं महाधिवेशन यही मंसिर महिनाभित्र सम्पन्न गर्ने कार्यतालिका प्रस्ताव गरेका छन् । थापाले दुई विकल्पसहित महाधिवेशनको विस्तृत कार्यतालिका पेश गरेका हुन् । पहिलो विकल्पअनुसार मंसिर २७ देखि २९ गतेसम्म केन्द्रीय महाधिवेशन सम्पन्न गर्ने लक्ष्य राखिएको छ । थापाले पेश गरेको कार्यतालिकामा कात्तिक २१ सम्म नयाँ सदस्यता वितरण तथा नवीकरणको इन्ट्री गर्ने, मंसिर ७ मा क्रियाशील सदस्यहरूको नामावली निर्वाचन समितिमा बुझाउने र मंसिर १२–१३ मा वडा अधिवेशन गर्ने प्रस्ताव गरिएको छ । यस्तै, मंसिर २१ मा प्रतिनिधि सभा क्षेत्रीय अधिवेशन, केन्द्रीय प्रतिनिधि चयन र जनसम्पर्क समिति अधिवेशन सम्पन्न गरी अन्ततः मंसिर २७ देखि २९ भित्र केन्द्रीय महाधिवेशन गर्ने योजना रहेको छ । दोस्रो विकल्पमा भने सबै तहको अधिवेशन चरणबद्ध रूपमा सम्पन्न गर्ने प्रस्ताव गरिएको छ । सोअनुसार मंसिर ५ बाट वडा अधिवेशन सुरु गरी, मंसिर २१ मा प्रदेश अधिवेशन र मंसिर २७–२९ मा केन्द्रीय महाधिवेशन सम्पन्न गर्ने तालिका प्रस्तुत गरिएको हो । थापाले विधान संशोधनमार्फत क्रियाशील सदस्यबाटै सिधा नेतृत्व चयन गर्न सकिने सम्भावनासमेत उल्लेख गरेका छन् । महामन्त्री थापाले क्रियाशील सदस्यता नवीकरणमा लचकता अपनाउने प्रस्ताव पनि गरेका छन्। । उनका अनुसार १४औं महाधिवेशनमा सहभागी भएकामध्ये मृत्यु भएका र पार्टी परित्याग गरेका बाहेक सबै सदस्यको सदस्यता स्वतः नवीकरण भएको मान्ने सकिने छ । यद्यपि क्रियाशील सदस्यता व्यवस्थापन समितिका अनुसार असोज मसान्तसम्म ८१ प्रतिशत सदस्यता नवीकरण भइसकेको भए पनि इन्ट्री कार्य अझै बाँकी रहेको छ । २८ असोजदेखि जारी केन्द्रीय समितिको बैठकमा भने महामन्त्री थापाको प्रस्ताव पेश हुन सकेको छैन । संस्थापन पक्षीय नेताहरू मंसिरमा महाधिवेशनको पक्षमा नरहेकाले थापाको कार्यतालिका अगाडि बढ्न नसकेको हो । तर, महामन्त्री थापा, विश्वप्रकाश शर्मा र डा. शेखर कोइरालाको समूह मंसिरमै नियमित महाधिवेशन हुनुपर्ने अडानमा छन् । उनीहरूका अनुसार यदि मंसिरमा महाधिवेशन सम्भव नभए विशेष महाधिवेशनमा जानुपर्नेछ ।
गणपति सिमेन्टमा नयाँ लगानीकर्ताको प्रवेश, ‘विनायक’ र ‘गणपति’ ब्रान्डका नयाँ सिमेन्ट ल्याउँदै
काठमाडौं । कपिलवस्तुको शिवराज नगरपालिका- ६ मा रहेको गणपति सिमेन्ट इन्डस्ट्रीजमा नयाँ लगानीकर्ताको आगमन भएको छ । शुक्रबार कम्पनीले विज्ञप्ति जारी गर्दै यो जानकारी दिएको हो । उद्योगलाई पुनः पूर्ण क्षमतामा सञ्चालनमा ल्याउने तयारी तीव्र गतिमा अघि बढेको कम्पनीले जनाएको छ । कम्पनीका अध्यक्ष अर्जुन चौलागाईंको नेतृत्वमा गठित नयाँ लगानीकर्ता समूहले उद्योगलाई पुनर्जीवित गरी देशको निर्माण क्षेत्रमा सशक्त योगदान पुर्याउने लक्ष्य लिएको छ । अध्यक्ष चौलागाईसँगै अमेरिकामा करिब १५ वर्षदेखि निर्माण तथा विभिन्न व्यवसायमा संलग्न एनआरएन विषम पाण्डे र नेपालमा विभिन्न व्यवसायिक क्षेत्रमा सक्रिय शालिक पाठकले उद्योगमा नयाँ ऊर्जा, लगानी र दिगो सञ्चालनको दृष्टिकोणसहित सहकार्य गर्न थालेका हुन् । विगत केही वर्षदेखि सीमित मात्रामा सञ्चालनमा रहेको गणपति सिमेन्टलाई पुनः पूर्ण क्षमतामा सञ्चालनमा ल्याउने कार्ययोजना अघि बढाइएको अध्यक्ष चौलागाईंले जानकारी दिए । उनका अनुसार कम्पनीले ‘विनायक’ र ‘गणपति’ ब्रान्डका नयाँ सिमेन्ट बजारमा ल्याउँदै देशभरका प्रमुख सहरहरूमा बिक्री सञ्जाल विस्तार गर्ने तयारी गरेको छ । उद्योगको पुनः सञ्चालनसँगै कपिलवस्तु तथा आसपासका क्षेत्रमा रोजगारीका अवसर सिर्जना, स्थानीय उत्पादन प्रवर्द्धन र स्वदेशी ब्रान्डको सुदृढीकरण हुने कम्पनीको विश्वास छ । गणपति सिमेन्ट इन्डस्ट्रीजले आगामी दिनमा उत्पादन क्षमता विस्तार, गुणस्तर सुधार र दिगो बजार सञ्जाल निर्माणलाई प्राथमिकता दिने योजनासमेत सार्वजनिक गरेको छ।
डेडिकेटेड लाइनको बक्यौता तिर्दै उद्योग
काठमाडौं । डेडिकेटेड र टंक लाइनको सुविधा प्रयोग गरेबापत उद्योगहरूले धमाधम बक्यौता रकम नेपाल विद्युत प्राधिकरणलाई तिर्न थालेका छन् । लामो समयदेखि बक्यौता रहेका औद्योगिक समूहहरूले अन्ततः किस्ता तिर्न सुरु गरेका हुन् । सिमरास्थित हामा आइरन एन्ड स्टील इन्डस्ट्रीजले डेडिकेटेड ट्रंक अन्तर्गतको कुल ५ करोड ८५ लाख रुपैयाँ बक्यौतामध्ये पहिलो किस्ताका रूपमा २० लाख ९० हजार बुझाएको छ । त्यस्तै, वैशाखदेखि किस्ता तिर्न रोकेको परासीस्थित लक्ष्मी स्टीलले पनि पुनः तिर्न सुरु गर्दै ८४ लाख ९८ हजार रुपैयाँको किस्ता बुझाएको छ । केही समयदेखि किस्ता तिर्न रोकेको सर्वोत्तम सिमेन्टले पनि ४० लाख बुझाएको छ । प्राधिकरणले उद्योगहरूलाई बक्यौता तिर्न बारम्बार दबाब दिँदै आएको छ ।
जेलब्रेकपछि ५४२ नेपाली र ६४५ विदेशी कैदी फरार
काठमाडौं । जेनजी आन्दोलनका क्रममा भएको जेलब्रेकपछि हालसम्म ५४२ जना नेपाली र ६४५ जना विदेशी कैदी फरार रहेको नेपाली सेनाले जनाएको छ । नेपाली सेनाले सार्वजनिक गरेको तथ्यांकअनुसार उक्त आन्दोलनका क्रममा देशका विभिन्न जेलमा तोडफोड भएपछि सयौं कैदीहरू फरार भएका थिए । तीमध्ये अहिलेसम्म पनि १ हजार १८७ जना कैदी पक्राउ परेका छैनन् । सेनाको विवरणअनुसार फरारमध्ये नेपाली कैदीको संख्या ५४२ र विदेशी कैदीको संख्या ६४५ रहेको छ । जेल तोडफोडपछि भागेका कैदीहरूमध्ये केहीलाई पछिल्ला दिनहरूमा पुनः पक्राउ गरिए पनि केही फरार रहेको सेनाले बताएको छ ।
एनसेलको नयाँ सीईओमा माइकल फोले नियुक्त
काठमाडौं । एनसेलको नयाँ प्रमुख कार्यकारी अधिकृत (सीईओ)का रूपमा माइकल फोले नियुक्त भएका छन् । उनको यो नियुक्ति यही कार्तिक १५, २०८२ देखि लागू हुने कम्पनीले जनाएको छ । नयाँ सीईओ नियुक्तिसँगै कार्यवाहक सीईओका रूपमा समेत कार्यभार सम्हाल्दै आएका सैयद इनामुल कबीरले कम्पनीको प्रमुख वित्तीय अधिकृत (सीएफओ)को आफ्नो महत्त्वपूर्ण भूमिकालाई निरन्तरता दिनेछन् । दुई दशकभन्दा बढी दूरसञ्चार क्षेत्रमा वरिष्ठ नेतृत्वको अनुभव बोकेका फोलेले यस क्षेत्रका प्रमुख कम्पनीहरूमा कुशल नेतृत्वका साथ सफलता हासिल गरेका रेकर्डहरू रहेका छन् । एनसेलमा आवद्ध हुनुअघि फोलेले एयरटेलमा फ्रेन्च अफ्रिकाका प्रमुखको रूपमा कार्यरत रहँदै सातवटा फ्राङ्कोफोन अफ्रिकी बजारहरूको सञ्चालन जिम्मेवारी वहन गरेका थिए । त्यसअघि उनले टेलिनोर पाकिस्तान (टीपी)का सीईओका रूपमा कार्य गर्दै कठिन व्यवसायिक परिस्थितिमा पनि कम्पनीलाई अगाडि बढाउँदै बजारमा अग्रणी वृद्धि, नाफा, र कर्मचारी संलग्नताका साथ उल्लेखनीय सफलता हासिल गरेका थिए । उनका अघिल्ला नेतृत्वदायी भूमिकाहरुमा, ग्रामीणफोन (बंगलादेश) र टेलिनोर (बुल्गेरिया)मा सीईओको पदसमेत समावेश छन्, जहाँ उनले उल्लेखनीय व्यवसायिक परिवर्तनको नेतृत्व गर्दै ग्राहक संख्या ७ करोडभन्दा माथि पुऱ्याएका थिए र ईबिट्डामा ६० प्रतिशतभन्दा बढी वृद्धि हासिल गरेका थिए । फोलेले टामीर माइक्रोफाइनान्स (हालको इजीपैसा, पाकिस्तान)का अध्यक्ष र टेलिनोर हेल्थका अध्यक्षको रूपमा पनि काम गरेका छन् । हाल उनी अफ्रिकाको अग्रणी एसेट माइक्रोफाइनान्स कम्पनी वाटु अन्तर्गतको वाटु डीआरसी एसएका अध्यक्षका रूपमा कार्यरत छन् । नियुक्ति सम्बन्धी आफ्नो धारणा व्यक्त गर्दै फोलेले भने, ‘काठमाडौंमा एनसेलको यो जिम्मेवारी लिन पाउँदा म अत्यन्त खुसी र सम्मानित महसुस गरिरहेको छु । एनसेल देशका लागि महत्त्वपूर्ण पूर्वाधार हो, जसले नेपाली जनताका लागि नयाँ अवसरहरू सृजना गर्दै, डिजिटल रूपान्तरणलाई अघि बढाउने, आर्थिक प्रतिस्पर्धात्मकता बढाउने र विदेशी लगानी आकर्षित गर्ने अपार सम्भावना बोकेको छ । आजको डिजिटल, एआई पावर्ड र सामाजिक सञ्जालको युगमा दूरसञ्चार कम्पनीहरू केवल सेवा प्रदायक मात्र होइनौं, हामी समाजको डिजिटल संरचना बुन्ने भूमिका निभाइरहेका छौं ।’ ‘हामी आधुनिक अर्थतन्त्रको सञ्चालन प्रणाली बनिसकेका छौं । यसैले राष्ट्रको सेवा गर्न, हाम्रा सेवाहरू सुदृढ बनाउन र सबैभन्दा महत्त्वपूर्ण रूपमा आगामी पुस्तालाई सशक्त बनाउनका लागि यी महत्त्वपूर्ण सम्पत्तिहरूलाई जिम्मेवारीपूर्वक व्यवस्थापन गर्नु अत्यावश्यक छ,’ उनले थपे । एनसेलको सञ्चालक समितिले नेतृत्व भूमिकामा फोलेलाई कम्पनीमा स्वागत गर्न पाउँदा अत्यन्त खुसी भएको जनाएको छ । फोल म्याकगिल विश्वविद्यालयका स्नातक हुन् र इनसीडबाट उनले ग्लोबल म्यानेजमेन्ट एन्ड गभर्नेन्समा एक्सिक्युटिभ सर्टिफिकेटस् प्राप्त गरेका छन् । उनी क्यानडा–केन्या दुबैको नागरिक हुन् । एनसेल सन् २००४ मा स्थापना भई २००५ बाट सेवा प्रदान गर्दै आइरहेको नेपालको पहिलो निजी मोबाइल सेवाप्रदायक कम्पनी हो ।
