मुस्ताङको यात्रामा निस्किए ४० महिला राइडर, रोयल इन्फिल्डको राइड सम्पन्न
काठमाडौं । नेपालका लागि रोयल इन्फिल्डको आधिकारिक वितरक अल्फा अटोमोटिभ प्रालिले महिला राइडरहरूको सहभागितामा ‘मिस्टिक मुस्ताङ राइड २’ सम्पन्न गरेको छ । कात्तिक १२ देखि १५ गतेसम्म चार दिन सञ्चालन भएको उक्त राइडमा ४० महिला राइडर सहभागी भएका थिए । पोखरास्थित क्लासिक ड्राइभबाट सुरु भएको यात्रा मुस्ताङसम्म पुगेको थियो । चारदिने यात्राका क्रममा सहभागी महिला राइडरहरूले नेपालको हिमाली भूगोल, प्राकृतिक सौन्दर्य र साहसिक मोटरसाइकल यात्राको अनुभव लिएका थिए । महिला राइडरहरूलाई लामो दूरीको मोटरसाइकल यात्रामा प्रोत्साहन गर्ने, आत्मविश्वास बढाउने र राइडिङ समुदायमा महिलाको सहभागिता विस्तार गर्ने उद्देश्यले कार्यक्रम आयोजना गरिएको कम्पनीले जनाएको छ । कार्यक्रमले महिला राइडरहरूबीच आपसी सम्बन्ध विस्तार गर्नुका साथै अनुभव आदानप्रदान र सामुदायिक भावनालाई समेत बलियो बनाएको कम्पनीको भनाइ छ । रोयल इन्फिल्डले आफ्नो ‘प्योर मोटरसाइक्लिङ’ अवधारणाअनुरूप नेपालमा राइडिङ संस्कृति, समुदाय निर्माण र साहसिक यात्रालाई प्रवर्द्धन गर्दै आएको छ । कम्पनीले विभिन्न राइड तथा समुदायकेन्द्रित कार्यक्रममार्फत मोटरसाइकल पारखीहरूलाई एकजुट गर्दै आएको छ । अल्फा अटोमोटिभले नेपालमा महिला राइडरहरूको सहभागिता बढाउने, सुरक्षित तथा जिम्मेवार राइडिङ संस्कृतिको विकास गर्ने र रोयल इन्फिल्ड समुदायलाई थप सशक्त बनाउने उद्देश्यले यस्ता कार्यक्रमलाई निरन्तरता दिँदै आएको जनाएको छ ।
ब्याटिङ र बलिङमा चम्किएका १० खेलाडी
काठमाडौं । नेपाल प्रिमियर लिग (एनपीएल) को तेस्रो संस्करणमा सुरुवाती खेलसँगै ब्याटिङ र बलिङ दुवैतर्फ खेलाडीबीच प्रतिस्पर्धा रोचक बन्दै गएको छ । केही खेलाडीले आक्रामक ब्याटिङबाट रनको वर्षा गरेका छन् भने केही बलरले निरन्तर विकेट लिँदै आफ्नो टोलीलाई जित दिलाउन महत्वपूर्ण भूमिका खेलेका छन् । अहिलेसम्म एनपीएलमा विराटनगर किंग्सका लोकेश बम सर्वाधिक रन बनाउने खेलाडीको सूचीमा शीर्ष स्थानमा छन् । उनले चार खेलबाट १८८ रन बनाएका छन् । उनको ब्याटिङ औसत ४७ र स्ट्राइक रेट १६२.०७ छ । उनले ११ चौका र १६ छक्का प्रहार गरेका छन् । दुई अर्धशतक बनाएका बमको सर्वाधिक व्यक्तिगत स्कोर ८७ रन हो । बमपछि विराटनगरकै आन्द्रे रसेल दोस्रो स्थानमा छन् । उनले चार खेलबाट १४१ रन बनाएका छन् । ७०.५० को औसत र १९८.५९ को स्ट्राइक रेटमा ब्याटिङ गरेका रसेलले ८ चौका र १४ छक्का प्रहार गरेका छन् । उनको नाममा एक अर्धशतक छ । ब्याटिङसँगै बलिङमा पनि प्रभाव जमाएका रसेलले ६ विकेट लिएका छन् । जनकपुर बोल्ट्सविरुद्धको खेलमा उनले २९ बलमा अविजित ५२ रन बनाउनुका साथै ६ विकेटसमेत लिएका छन् । कर्णाली याक्सका अरिफुल इस्लाम ११९ रनसहित तेस्रो स्थानमा छन् । उनले तीन खेलमा आठ चौका र १० छक्का प्रहार गरेका छन् । जनकपुरका सैफ हसन ११२ रनसहित चौथो स्थानमा छन् । उनले ५६ को औसतमा एक अर्धशतक बनाएका छन्। उनको सर्वाधिक स्कोर ७१ रन हो । जनकपुरकै मोइन अली १०८ रनसहित पाँचौँ स्थानमा छन् । उनले एक अर्धशतक बनाएका छन् । ब्याटिङभन्दा बलिङमा उनको प्रदर्शन अझ प्रभावकारी देखिएको छ । १४ ओभर बलिङ गरेका उनले सात विकेट लिएका छन् । उनको उत्कृष्ट बलिङ १३ रन दिएर तीन विकेट लिनु हो । बलिङमा उनको इकोनोमी दर ४.८६ छ । कर्णालीका पवन सर्राफले तीन खेलमा १०३ रन बनाएका छन् । उनको औसत ५१.५० छ । विराटनगरका इमरान शेखले १०० रन बनाउँदा एक अर्धशतक पूरा गरेका छन् । उनले १० चौका र चार छक्का प्रहार गरेका छन् । छक्का र चौकामा पनि लोकेशकै दबदबा छक्का प्रहार गर्ने खेलाडीको सूचीमा पनि लोकेश बम पहिलो स्थानमा छन् । उनले १६ छक्का प्रहार गर्दा रसेलले १४ छक्का हानेका छन् । अरिफुल इस्लामले १० छक्का प्रहार गरेका छन् । सैफ हसन र पवन सर्राफले समान आठ छक्का हानेका छन् । चौका प्रहारमा पनि लोकेश ११ चौकासहित अगाडि छन् । इमरान शेखले १०, जनकपुरका त्रितराज दासले नौ तथा रसेल र अरिफुलले समान ८ चौका प्रहार गरेका छन् । यसले विराटनगरका ब्याटरले प्रतियोगितामा आक्रामक खेल देखाइरहेको पुष्टि गर्छ । अर्धशतकको हिसाबले लोकेश बम दुई अर्धशतकसहित अगाडि छन् । रसेल, सैफ हसन, मोइन अली र इमरान शेखले एक-एक अर्धशतक बनाएका छन् । यस्तै, दीपेन्द्रसिंह ऐरी, त्रितराज दास र राशिद खानले पनि एक-एक अर्धशतक बनाएका छन् । विकेटमा तीन खेलाडी शीर्षमा बलिङतर्फ जनकपुर बोल्ट्सका मोइन अली, विराटनगर किंग्सका एन्जेलो म्याथ्युज र कर्णाली याक्सका सोमपाल कामीले समान सात विकेट लिएका छन् । उनीहरू सर्वाधिक विकेट लिने खेलाडीको सूचीमा संयुक्त रूपमा अगाडि छन् । मोइनले १४ ओभर बलिङ गर्दै ६८ रन खर्चेर सात विकेट लिएका छन् । उनको उत्कृष्ट बलिङ १३ रन दिएर तीन विकेट हो । म्याथ्युजले ८ ओभरमा ८० रन खर्चेर सात विकेट लिएका छन् । उनको उत्कृष्ट प्रदर्शन २५ रन दिएर तीन विकेट लिनु हो । कर्णालीका सोमपालले तीन खेलमा सात विकेट लिएका छन् । उनले १० ओभर बलिङ गर्दै ८२ रन खर्चिएका छन् । उनको उत्कृष्ट बलिङ ३३ रन दिएर चार विकेट लिनु हो । चार विकेट लिने प्रदर्शन गर्ने उनी प्रतियोगिताका प्रभावशाली बलरमध्ये एक हुन् । सुदूरपश्चिम रोयल्सका अनिल खरेल र जनकपुरका हरमित सिंहले समान ६ विकेट लिएका छन् । जनकपुरकै राहुल यादव र विराटनगरका आन्द्रे रसेलले पनि समान ६ विकेट लिएका छन् । रसेलले चार विकेट लिने प्रदर्शनसमेत गरेका छन् । \ व्यक्तिगत प्रदर्शनमा नयाँ कीर्तिमान एनपीएलको तेस्रो संस्करणमा विराटनगर किंग्सले जनकपुर बोल्ट्सविरुद्धको खेलमा अर्को कीर्तिमान बनाएको छ । उक्त खेलमा लोकेश बम, इमरान शेख र आन्द्रे रसेलले एउटै इनिङ्समा अर्धशतक बनाए । एनपीएल इतिहासमा एउटै इनिङ्समा तीन खेलाडीले अर्धशतक बनाएको यो पहिलो घटना हो । लोकेशले ४० बलमा तीन चौका र तीन छक्कासहित ५० रन बनाए । इमरानले ४५ बलमा पाँच चौका र दुई छक्कासहित ५६ रन बनाए । रसेलले २९ बलमा दुई चौका र पाँच छक्कासहित अविजित ५२ रन बनाए । यी तीन खेलाडीले मात्रै विराटनगरको कुल १७४ रनमध्ये १५८ रन बनाएका थिए ।
प्राधिकरणका नवनियुक्त अध्यक्ष राजनविक्रम थापाले गरे पदभार ग्रहण
काठमाडौं । नेपाल बीमा प्राधिकरणका नवनियुक्त अध्यक्ष राजनविक्रम थापाले पदभार ग्रहण गरेका छन् । बिहीबार (आज) उनले पदभार ग्रहण गरेका हुन् । थापा बुधबार प्राधिकरणको अध्यक्षमा नियुक्त भएका हुन् । अर्थ मन्त्रालयले गठन गरेको छनोट समितिको सिफारिसका आधारमा मन्त्रिपरिषद् बैठकले थापालाई प्राधिकरणको अध्यक्षमा नियुक्त गरेको हो । नवनियुक्त अध्यक्ष थापालाई बुधबार नै अर्थ मन्त्रालयमा आयोजित कार्यक्रममा अर्थमन्त्री डा. स्वर्णिम वाग्लेले पद तथा गोपनीयताको शपथ गराइसकेका छन् । शपथपछि अर्थमन्त्री वाग्लेले थापालाई बीमा क्षेत्रको विकास र विस्तारका लागि निडर तथा निर्धक्क भएर काम गर्न निर्देशन दिएका थिए । गोरखाको नरेश्वरमा जन्मिएका थापा नेपाल राष्ट्र बैंकका कार्यकारी निर्देशक (ईडी) का रूपमा कार्यरत थिए । करिब तीन दशक नेपालको वित्तीय क्षेत्रमा बिताएका उनी आगामी चैतमा अनिवार्य अवकाशमा जाने तयारीमा थिए । तर, अवकाश हुनुअघि नै उनी बीमा क्षेत्रको नियामक निकायको नेतृत्वमा पुगेका छन् । सन् १९९७ अर्थात् २०५४ सालमा नेपाल राष्ट्र बैंकको सेवामा प्रवेश गरेका थापाले २९ वर्षभन्दा बढी समय केन्द्रीय बैंकमा बिताएका छन् । यस अवधिमा उनले सहायक निर्देशक, उपनिर्देशक, निर्देशक हुँदै कार्यकारी निर्देशकसम्मको जिम्मेवारी सम्हालेका छन् । थापासँग बीमा क्षेत्रसँग सम्बन्धित संस्थागत नेतृत्व र सञ्चालक तहको अनुभव पनि छ । उनी निक्षेप तथा कर्जा सुरक्षण कोष र राष्ट्रिय जीवन बीमा कम्पनीको सञ्चालक रूपमा काम गरेको अनुभव छ । व्यवस्थापन सङ्घ नेपालको प्रथम उपाध्यक्षसमेत रहेका त्रिभुवन विश्वविद्यालयबाट व्यवस्थापन विषयमा एमफिल गरेका छन् । त्यस्तै, पाटन बहुमुखी क्याम्पसबाट अर्थशास्त्रमा स्नातकोत्तर र शङ्करदेव क्याम्पसबाट व्यवस्थापनमा स्नातकोत्तर गरेका छन् । नेपाल ल क्याम्पसबाट कानुनमा स्नातक गरेका उनले वाणिज्यशास्त्रमा स्नातकसमेत गरेका छन् । उनले भारतको सिङ्घानिया विश्वविद्यालयबाट विद्यावारिधि हासिल गरेका छन् । नेपाली बैंकहरूमा संस्थागत सुशासनले जोखिम व्यवस्थापनमा पार्ने प्रभाव उनको विद्यावारिधि अनुसन्धानको मुख्य विषय हो । उक्त उपाधिको समकक्षता हाल त्रिभुवन विश्वविद्यालयबाट मूल्याङ्कनको प्रक्रियामा रहेको छ । थापासँग व्यवस्थापन शिक्षण क्षेत्रमा पनि एक दशकभन्दा बढीको अनुभव छ । उनले विभिन्न शैक्षिक संस्थामा अध्यापन गर्नुका साथै बैंकिङ तथा वित्तीय क्षेत्रसँग सम्बन्धित तालिम कार्यक्रममा स्रोत व्यक्तिका रूपमा काम गरेका छन् । बैंकिङ, व्यवस्थापन र संस्थागत सुशासनसम्बन्धी पुस्तकसमेत प्रकाशित गरेका उनका अनुसन्धानमूलक लेख तथा एक सयभन्दा बढी समसामयिक र विश्लेषणात्मक लेख विभिन्न प्रकाशन तथा पत्रपत्रिकामा प्रकाशित छन् । उनले सन् २००८ मा प्रकाशित ‘प्रिन्सिपल्स एन्ड प्राक्टिसेज अफ नेपालीज बैंकिङ’ पुस्तकका सहलेखकका रूपमा काम गरेका छन् । त्यस्तै, सन् २०१० मा ‘प्रिन्सिपल्स अफ म्यानेजमेन्ट’ नामक पुस्तक पनि प्रकाशित गरेका छन् । दक्षिण एसियामा सुशासनका चुनौती तथा नेपाली बैंकिङ प्रणालीमा संस्थागत सुशासनको आवश्यकता र महत्वलगायत विषयमा उनले अन्तर्राष्ट्रिय सम्मेलनमा अनुसन्धानपत्र प्रस्तुत गरेका छन् । वित्तीय स्थायित्व, बैंकिङ नियमन, बेसल ढाँचा, जोखिम व्यवस्थापन तथा केन्द्रीय बैंकिङसम्बन्धी विभिन्न अन्तर्राष्ट्रिय तालिम र गोष्ठीमा सहभागी भएका थापाले अमेरिका, बेलायत, स्विट्जरल्यान्ड, दक्षिण कोरिया, मलेसिया, जापान, भारतलगायत विभिन्न देशमा आयोजित कार्यक्रममा सहभागिता जनाएका छन् । उनले अन्तर्राष्ट्रिय नियामकीय अभ्यास तथा वित्तीय स्थायित्वसम्बन्धी अनुभवसमेत हासिल गरेका छन् ।
सरकारको निर्णयविरुद्ध सर्वोच्च पुगे निवर्तमान आईजीपी कार्की
काठमाडौं । नेपाल प्रहरीका महानिरीक्षक (आईजीपी) पदबाट हटाइएका दानबहादुर कार्की सरकारको निर्णयविरुद्ध सर्वोच्च अदालत पुगेका छन् । मन्त्रिपरिषद्को निर्णयबाट प्रहरी प्रमुखको जिम्मेवारी खोसिएपछि कार्कीले पुनर्बहालीको मागसहित कानुनी उपचार खोजेका हुन् । कार्कीका कानुन व्यवसायीहरूले सरुवा तथा पदमुक्त गर्ने सरकारको निर्णयविरुद्ध रिट लिएर सर्वोच्च अदालत पुगेको जानकारी दिए । प्रधानमन्त्री बालेन्द्र शाह नेतृत्वको सरकारले बुधबार कार्कीलाई प्रहरी महानिरीक्षकको जिम्मेवारीबाट हटाएर प्रधानमन्त्रीको विशेष सुरक्षा सल्लाहकार बनाउने निर्णय गरेको थियो । उनको स्थानमा अतिरिक्त प्रहरी महानिरीक्षक (एआईजी) डा. मनोजकुमार केसीलाई प्रहरी महानिरीक्षकको जिम्मेवारी दिइएको छ । सरकारले प्रधानमन्त्री तथा मन्त्रिपरिषद्को कार्यालयमा प्रहरी महानिरीक्षकस्तरको विशेष सुरक्षा सल्लाहकार पद सिर्जना गरेर कार्कीलाई उक्त जिम्मेवारी दिएको जनाएको छ । सरकारका प्रवक्ताले यसलाई कारबाही नभई जिम्मेवारी हेरफेरका रूपमा व्याख्या गरेका छन् । तर, कार्यकाल बाँकी छँदै प्रहरी प्रमुखलाई पदबाट हटाइएको विषयले सरकारको निर्णय प्रक्रियामाथि प्रश्न उठाएको छ । १७ महिना कार्यकाल बाँकी छँदै हटाइए कार्कीलाई २०८२ कात्तिक २४ गते प्रहरी महानिरीक्षक नियुक्त गरिएको थियो । उनी २०८४ चैतसम्म प्रहरी सेवामा रहन सक्ने अवस्थामा थिए । प्रहरी नियमावलीअनुसार आईजीपीको पदावधि चार वर्षको हुने व्यवस्था छ । उमेर र सेवा अवधिसम्बन्धी प्रावधानका कारण भने वास्तविक कार्यकाल फरक हुन सक्छ । सरकारले उनलाई जिम्मेवारीबाट हटाउँदा करिब १७ महिना कार्यकाल बाँकी रहेको थियो ।
धनतेरसका लागि राष्ट्र बैंकले बेच्न थाल्यो सुन र चाँदीका सिक्का
काठमाडौं । नेपाल राष्ट्र बैंकले तिहारको धनतेरसलाई लक्षित गर्दै बिहीबारदेखि सुन र चाँदीका सिक्का बिक्री सुरु गरेको छ । राष्ट्र बैंकले काठमाडौंको बबरमहलस्थित टक्सार विभागबाट असर्फी र चाँदीका सिक्का बिक्री सुरु गरेको हो । धनतेरसमा सुनका असर्फीको माग बढी हुने भएकाले सर्वसाधारणलाई सहज रूपमा उपलब्ध गराउने व्यवस्था गरिएको राष्ट्र बैंकले जनाएको छ । राष्ट्र बैंकका अनुसार सर्वसाधारणले प्रतिव्यक्ति साढे २ ग्राम, ५ ग्राम र १० ग्रामका एक–एक थान असर्फी खरिद गर्न सक्नेछन् । सुनको प्रचलित बजार मूल्यमा निर्माण लागत जोडेर असर्फीको मूल्य निर्धारण गरिएको छ । व्यक्तिगत खरिदकर्ताका लागि सुनको बजार मूल्यमा प्रतिग्राम २०० रुपैयाँ थप गरी दैनिक मूल्य तय गरिने राष्ट्र बैंकले जनाएको छ । यस्तै, संस्थागत खरिदकर्ताका लागि प्रतिग्राम ३०० रुपैयाँ थप गरी मूल्य निर्धारण गरिएको छ । असर्फी व्यक्ति तथा संस्थाले खरिद गर्न सक्ने व्यवस्था गरिएको छ । धनतेरसका अवसरमा सुन र चाँदीका सिक्का खरिद गर्न बबरमहलस्थित टक्सार विभागमा सर्वसाधारणको बाक्लो भीड लागेको छ । सिक्का खरिदका लागि बिहानैदेखि लामो समय लाइनमा बसेर सर्वसाधारणले सुन तथा चाँदीका सिक्का खरिद गरिरहेका छन् । धनतेरसमा सुनचाँदीका सामग्री तथा सिक्का खरिद गर्नुलाई शुभ र समृद्धिको प्रतीकका रूपमा लिने धार्मिक तथा सांस्कृतिक मान्यता छ ।
प्रमुख प्रतिपक्षी नेता आङ्देम्बेको प्रश्न : सिंहदरबार र बालुवाटारमा रमिता चलिरहेको हो ?
काठमाडौं । प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले १७ महिना कार्यकाल बाँकी छँदै प्रहरी महानिरीक्षक (आईजीपी) दानबहादुर कार्कीलाई पदबाट हटाउने सरकारको कदमको आलोचना गरेका छन् । आङ्देम्बेले नागरिक बाढीपहिरो, विस्थापन र महँगीको मारमा परिरहेका बेला सरकार भने प्रहरी नेतृत्व परिवर्तनमा केन्द्रित भएको भन्दै असन्तुष्टि पोखेका हुन् । ‘के अहिले देशको राष्ट्रिय आवश्यकता नै आईजीपी परिवर्तन गर्नु हो ? भोटेकोशी र बूढीगण्डकीको बाढीले नागरिकहरू पीडामा छन् । विस्थापित सुकुम्बासीको बेहाल छ । महँगीले जनजीवन आक्रान्त छ । देश गम्भीर सङ्कटतिर फस्दैछ । तर, सरकारको प्राथमिकता आईजीपी हटाउनेमा भयो,’ उनले बिहीबार भनेका छन् । उनले प्रहरी महानिरीक्षक कार्कीलाई कुन मुद्दा, तथ्य र प्रमाणका आधारमा हटाइएको हो भन्नेबारे सरकारले जवाफ दिनुपर्ने बताएका छन् । सरकारका प्रवक्ता र राष्ट्रिय स्वतन्त्र पार्टीका प्रवक्ताको अभिव्यक्तिमा समेत विरोधाभास देखिएको भन्दै उनले सरकार कसको निर्देशनमा चलिरहेको छ भन्ने प्रश्न गरेका छन् । ‘सरकारका प्रवक्ता पार्टीको निर्देशनमा हटाइएको भन्छन् । तर, रास्वपाकै प्रवक्ता पार्टीको निर्देशन नभएको बताउँछन् । आखिर सरकार कसको निर्देशनमा चलिरहेको छ ? सिंहदरबार र बालुवाटारमा कस्तो रमिता चलिरहेको हो ?’ आङ्देम्बेले प्रश्न गरेका छन् । उनले एक जना बिचौलियाको मोबाइल प्रहरीले अनुसन्धानका लागि बरामद गरे पनि उक्त मोबाइल प्रधानमन्त्रीका प्रमुख राजनीतिक सल्लाहकारको घरमा पुगेको विषयलाई पनि गम्भीर रूपमा उठाएका छन् । ‘अनुसन्धानका लागि बरामद गरिएको मोबाइल त्यहाँ किन पुग्यो ? मोबाइलमा भएको के मेटाउनु थियो ?’ उनले प्रश्न गरेका छन् । आङ्देम्बेले प्रहरी सङ्गठनलाई राजनीतिक नियन्त्रणमा राख्ने प्रयास सुशासन नभई शक्ति प्रदर्शन भएको टिप्पणी गरेका छन् । जनताले वर्तमान सरकारलाई सुशासन कायम गर्न, भ्रष्टाचार अन्त्य गर्न र जनताको जीवनस्तर बदल्न मत दिएको उल्लेख गर्दै उनले सत्ता र शक्तिको दुरुपयोग नगर्न सरकारलाई सचेत गराएका छन् । ‘अनेक तानाबाना र षड्यन्त्रको जालो बुनेर आईजीपी हटाउनु गलत छ । यो सुशासन होइन, शक्ति प्रदर्शन हो,’ उनले भनेका छन् ।
सुनको मूल्य १३ हजार ३०० रुपैयाँ बढ्यो
काठमाडौं । नेपाली बजारमा बिहीबार सुन र चाँदी दुवैको मूल्य उल्लेख्य वृद्धि भएको छ । एकैदिन सुनको मूल्य प्रतितोला १३ हजार ३०० रुपैयाँ र चाँदीको मूल्य २६५ रुपैयाँले बढेको हो । नेपाल सुनचाँदी व्यवसायी महासंघका अनुसार बिहीबार सुनको मूल्य प्रतितोला २ लाख ८८ हजार ९०० रुपैयाँ कायम भएको छ । बुधबार सुन प्रतितोला २ लाख ७५ हजार ६०० रुपैयाँमा कारोबार भएको थियो । त्यस्तै, चाँदीको मूल्य पनि बढेको छ । महासंघका अनुसार बिहीबार चाँदी प्रतितोला ३ हजार ९२० रुपैयाँ पुगेको छ । बुधबार चाँदी प्रतितोला ३ हजार ६५५ रुपैयाँमा कारोबार भएको थियो । तिहार नजिकिँदै गर्दा सुनको मूल्यमा आएको यो ठूलो वृद्धिले सुन खरिद गर्ने उपभोक्तालाई थप महँगो पर्ने देखिएको छ ।
डेमोक्रेट्सको जितपछि कच्चा तेलको मूल्य १०० डलरमुनि, सेयर बजारमा उछाल
काठमाडौं । अमेरिकाको मध्यावधि निर्वाचनमा रिपब्लिकन पार्टीको हार र डेमोक्रेट्सको जितपछि अन्तर्राष्ट्रिय बजारमा कच्चा तेलको मूल्य प्रतिब्यारेल १०० डलरभन्दा तल झरेको छ । यससँगै विश्वका प्रमुख सेयर बजारमा उछाल आएको छ । बुधबार दिउँसो कच्चा तेलको अन्तर्राष्ट्रिय मूल्य मापन गर्ने ब्रेन्ट क्रुडको मूल्य ८ प्रतिशतभन्दा बढीले घटेर प्रतिब्यारेल करिब ९५ डलरमा झरेको थियो । यो पछिल्लो दुई महिनायताकै न्यून मूल्य हो । अमेरिकी उपराष्ट्रपति जेडी भान्सले इरानसँगको युद्धका कारण रिपब्लिकन पार्टीले निर्वाचनमा हार बेहोर्नुपरेको बताएका थिए । उनको यो टिप्पणीपछि लगानीकर्ताले मध्यपूर्वमा जारी द्वन्द्व थप चर्किने सम्भावनाबारे पुनः मूल्यांकन गरेका छन् । भान्सले युद्ध अन्त्य गर्न, सर्वसाधारणको जीवनयापन खर्च घटाउने विषयमा ध्यान केन्द्रित गर्न र इजरायलसँग अमेरिकाको सम्बन्धको समीक्षा गर्नुपर्ने बताएका थिए । उनको यो भनाइलाई बजारले सकारात्मक रूपमा लिएको देखिएको छ । निर्वाचनको परिणामलाई मध्यपूर्वमा जारी तनाव कम हुने संकेतका रूपमा पनि हेरिएको छ । यसले तेलको मूल्य घटाउन र सेयर बजारलाई उकास्न भूमिका खेलेको देखिन्छ । बुधबार अमेरिकाका प्रमुख सेयर बजार परिसूचकमा उल्लेख्य वृद्धि भएको थियो । डाउ जोन्स इन्डस्ट्रियल एभरेज ३ प्रतिशतले बढेको थियो । त्यस्तै, एसएन्डपी ५०० मा १.६ प्रतिशत र प्रविधि कम्पनीका सेयर समेटिएको न्यास्डाक कम्पोजिटमा १.४ प्रतिशतको वृद्धि भएको थियो । भारतको सेयर बजारमा पनि उल्लेख्य सुधार देखिएको छ । सेन्सेक्स १ हजार ३८८.४३ अंक अर्थात् १.८ प्रतिशतले बढेको थियो । त्यस्तै, निफ्टी ३८२.१५ अंक अर्थात् १.५९ प्रतिशतले उकालो लागेको थियो ।
