वित्त : विविध

काठमाडौं । नेपाल धितोपत्र बोर्ड (सेबोन)ले वस्तु विनिमय बजार (कमोडिटी मार्केट) सञ्चालनको लागि पुनः आवेदन मागेको छ । यसअघि खुलाएको आवेदनमा सर्वोच्च अदालतमा रिट परेको र उक्त रिट खारेजी भएसँगै बोर्डले इच्छुक संस्थासमक्ष पुनः आवेदन माग गरेको हो । बोर्डले २०७९ चैत ३० गते एक सूचना जारी गर्दै आगामी १० दिनभित्र निवेदन पेश गर्न आग्रह गरेको छ । साविकको सूचना बमोजिम तोकिएको म्यादमध्ये बाँकी रहेको म्याद अनुसार उक्त १० दिनको मिति तोकिएको बोर्डले जानकारी गराएको छ । यदि निवेदन दिने अन्तिम दिन सार्वजनिक बिदा परेमा इच्छुकले सोको लगत्तै कार्यालय खुलेको दिन कार्यालय समय भित्र निवेदन बुझाउन सक्नेछन् । बोर्डले २०७९ असोज २ गते एक सूचना जारी गर्दै धितोपत्र बजार सञ्चालनका लागि संगठित संस्था स्थापना गर्ने सिफारिसका लागि एवं कमोडिटी मार्केट सञ्चालन गर्न इच्छुक संस्थालाई निवेदन माग गरेको थियो । जसको समयावधि ४५ दिन तोकिएको थियो । तर सर्वोच्च अदालतबाट २०७९ कार्त्तिक ४ गते जारी भएको अल्पकालिन अन्तरिम आदेश अनुरुप बोर्डबाट अर्को निर्णय नहुँदासम्मका लागि उक्त निवेदन प्रकृया स्थागित भएको थियो । यससँगै अदालतले गत चैत २६ गते रिट खारेजी भएको फैसला गरेसँगै बोर्डले उक्त प्रकृयालाई पुनः अघि बढाउने निर्णय गरेको हो । जसअनुसार नै १० दिनको म्याद तोकिएको सूचनामा उल्लेख छ । ।

काठमाडौं । किसान लघुवित्त वित्तीय संस्थाको प्रस्तावित ७.३६८४२ प्रतिशत लाभांश पारित भएको छ । काठमाडौंको बुढानिलकण्डमा सम्पन्न संस्थाको चौथो वार्षिक साधारण सभाले चुक्ता पुँजीको ७ प्रतिशत बोनस र कर प्रयोजनको लागि ०.३६८४२ प्रतिशत नगद लाभांश पारित गरेको हो । बोनस सेयर जारी पश्चात संस्थाको चुक्ता पुँजी ५० करोड ४३ लाख पुग्ने कम्पनीका अध्यक्ष लोकराज शर्माले बताए । सभाले थप सार्वजनिक सेयर (एफपीओ) निष्काशन गर्ने प्रस्तावलाई समेत सभाले सर्वसम्मतिले पारित गरेको छ । हाल कायम रहेको संस्थापक तथा सर्वसाधारण सेयरधनीहरुको सेयर स्वामित्वमा संशोधन गर्ने निर्णय गर्दै सभाले उक्त प्रस्तावलाई पारित गरेको हो । बोनस सेयर र थप सार्वजनिक निष्कासन पश्चात कम्पनीको चुक्ता पुँजी करिब ६४ करोड २३ लाख रुपैयाँ पुग्ने देखिन्छ । सो सभाले अन्य लघुवित्तसँग एक आपसमा गाभ्ने गाभिने कार्यका लागि बाटो खुला गर्न गाभ्ने गाभिने प्रस्तावलाई पनि पारित गरेको छ । धनगढी, कैलालीमा केन्द्रीय कार्यालय रहेको किसान लघुवित्त वित्तीय संस्थाको कर्पोट कार्यालय काठमाडौंको बुढानिलकण्ठमा रहेको छ । हाल कम्पनीले १३७ वटा शाखा मार्फत लघुवित्त सेवा प्रदान गर्दै आएको छ कम्पनीको साधारण सभाले आर्थिक वर्ष ०७८/७९ को संचालक समितिको तर्फबाट प्रस्तुत वार्षिक प्रतिवेदन, २०७९ असार मसान्तसम्मको वासलात, नाफा नोक्सान हिसाब, नगद प्रवाह विवरण लगायत सोसँग सम्बन्धित अनुसूचीहरु, आर्थिक वर्ष ०७८/७९ का लागि लेखापरिक्षकको नियुक्ति लगायतका प्रस्तावहरु सर्वसम्मतिले पारित गरेको छ ।

काठमाडौं । विजय लघुवित्त वित्तिय संस्थाको प्रस्तावित २१.०५२६ प्रतिशत लाभांश पारित भएको छ । चैत २८ गते सम्पन्न संस्थाको दशौं वार्षिक साधारण सभाले आर्थिक वर्ष ०७८/०७९ को नाफाबाट सेयरधनीलाई २० प्रतिसत बोनस शेयर र कर प्रयोजनका लागि १.०५२६ प्रतिसत नगद लाभांश वितरण गर्ने प्रस्तावलाई पारित गरेको छ । यससँगै, संस्थाको कायम जारी तथा चुक्ता पुँजी ३८ करोड ४० लाख रुपैयाँ पुगेको छ । सभाले विजय लघुवित्त वित्तीय संस्था लिमिटेड र नयाँ सारथी लघुवित्त वित्तीय संस्था लिमिटेड एक आपसमा गाभ्ने र गाभिने वा मर्जरमा जाने प्रस्तावलाई स्वीकृति दिएको छ । दुई संस्थाबीच सेयर आदान प्रदान अनुपात १ः१ (एक सेयर बराबर एक सेयर) लाई स्वीकृत प्रदान गरेको छ । संस्थाका अध्यक्ष कपिल न्यौपानेको अध्यक्षतामा सम्पन्न उक्त सभाले वित्तीय संस्थाको आ.व. २०७८/०७९ को संचालक समितिको प्रतिवेदन, २०७९ असाढ मसान्तको वासलात तथा सोहि मितिमा समाप्त आ.व.२०७८/०७९ को नाफा नोक्सान हिसाब, सोही अवधिको नगद प्रवाह विवरण लगायत वित्तीय विवरणहरु पारित गरिएको छ । उक्त साधारण सभाले आ.व. २०७९/०८० मा लेखा परिक्षण कार्य गर्नका लागि विदुर एसोसियट्सका सिए विदुर लुईटेललाई नियुक्त गर्ने तथा निजको पारिश्रमिक तोक्ने प्रस्ताव समेत अनुमोदन गरेको छ ।