यस कारण शिवम् सिमेन्टको सेयर मूल्यमा उछाल
काठमाडौं । शिवम् सिमेन्टले ११ करोड बोरा सिमेन्ट बिक्री गरेको भन्दै व्यवसाय प्रवर्द्धनात्मक प्रचार अभियान थालेपछि यस कम्पनीको सेयर मूल्यमा वृद्धि भएको छ । ठिक महिनाअघि प्रतिकित्ता ६६० रुपैयाँसम्ममा कारोबार भएको शिवम् सिमेन्टकाे सेयर बुधबार प्रतिकित्ता ८४७ रुपैयाँसम्ममा किनबेच भयो । बुधबार मध्यान्य सम्ममा प्रतिकित्ता ६१ रुपैयाँ अर्थात ७.७८ प्रतिशतसम्मले मूल्यवृद्धि भएको छ । सेयर कारोबार रकम, सेयर कारोबार संख्या, कारोबार भएको सेयर कित्ता सबै आधारमा बुधबार शिवम् सिमेन्ट एक नम्बरमा रहेको नेप्सेले जनाएको छ । पछिल्लो एक महिनामा बढी सेयर कारोबार हुने कम्पनीमा पनि शिवम् सिमेन्ट रहेको छ । ‘नेपालमै सर्वाधिक ओपीसी सिमेन्ट बिक्री गर्न सफल’ भनेर व्यवसाय प्रवर्द्धनात्मक प्रचार गरिरहेको छ । त्यसमा कम्पनीले ११ करोड बोरा सिमेन्ट बिक्री गरेको उल्लेख गरेको छ । कम्पनीको अनुसार ११ वर्षमा ११ करोड बोरा सिमेन्ट बिक्री गरेको हो । तर बजारमा एक वर्षमा नै ११ करोड सिमेन्ट बिक्री गरेको भन्ने सन्देश गएको छ । कम्पनीले गत आर्थिक वर्ष २०७८/८९ मा नै यति धेरै सिमेन्ट बेचेको हो कि भन्ने सन्देशले पनि सेयर मूल्यमा सकारात्मक प्रभाव परेको हुन सक्ने बताइएको छ । आर्थिक वर्षको अन्त्यपछिको उक्त प्रचारले पनि एक वर्ष नै यति धेरै सिमेन्ट बिक्री भएको हो कि भन्ने सन्देश प्रवाह भएको देखिन्छ । ‘सेयर मूल्यलाई प्रभाव पार्ने गरी कम्पनी भित्र कुनै परिवर्तन आएको छैन’ कम्पनी सम्बद्ध स्रोतले भन्यो–‘एक वर्षमा नै ११ करोड बोरा सिमेन्ट बिक्री भएको बुझाई कसैलाई परेको छ भने त्यो गलत हो । ११ वर्षमा ११ करोड बोरा सिमेन्ट बिक्री गर्न सफल भएका हौं’ स्रोतले भन्यो ।
१४५ कम्पनीको ६१ अर्ब रुपैयाँको बोनस सेयर दर्ता, कुनको कति ?
काठमाडौं । नेपाल धितोपत्र बोर्ड (सेवोन) मा एक वर्षको अवधिमा ६१ अर्ब रुपैयाँ बराबरको सेयर दर्ता भएको छ । बोर्डले सार्वजनिक गरेको तथ्याङ्क अनुसार एक वर्षको अवधिमा ६१ अर्ब ७९ करोड ४३ हजार १३१ रुपैयाँ बराबरको बोनस सेयर दर्ता भएको हो । बोर्डका अनुसार २०७८ साल साउन ३ गतेदेखि २०७९ अषाढ ३१ गतेसम्ममा १४५ कम्पनीको ६१ करोड ७९ लाख ४३१ कित्ता शेयर बोर्डमा भएको हो । कम्पनीहरुले आर्थिक वर्ष २०७६/०७७ र आर्थिक वर्ष २०७७/०७८ मा वितरण गरेको बोनस सेयर रहेको छ । यो अघिल्लो वर्षको तुलनामा ३३.८० प्रतिशत अर्थात् साढे १५ अर्ब रुपैयाँ बढी हो । यसअघि २०७७ साउन २ गतेदेखि २०७८ अषाढ २९ गतेसम्ममा १३४ कम्पनीको ४६ अर्ब १७ करोड ८१ लाख ३८ हजार ६६२ रुपैयाँ बराबरको ४६ करोड १७ लाख ८१ हजार ३८६ कित्ता बोसन सेयर दर्ता भएको थियो । गत वर्ष भने सबैभन्दा धेरै जीवन विकास लघुवित्तको बोनस सेयर दर्ता भएको छ । लघुवित्तले आर्थिक वर्ष २०७७/०७८ मा ७० प्रतिशत बोनस सेयर वितरण गरेको थियो । त्यस्तै, मञ्जुश्री फाइनान्स र नेशनल माइक्रोफाइनान्सले समान ४० प्रतिशत बोनस सेयर वितरण गरेका थिए । महिला लघुवित्तले भने ४७ प्रतिशत बोनस सेयर बोर्डमा दर्ता भएको छ भने हिमालयन डिस्टिलरी कम्पनीले ७५ प्रतिशत बोनस दर्ता भएको हो । यसअघि आर्थिक वर्ष २०७६/०७७ मा भने जनउत्थान सामुदायिक लघुवित्तको ४९.४० प्रतिशत बोनस बोर्डमा दर्ता भएको देखिन्छ । गत वर्ष बोर्डमा ५० वटा माइक्रोफाइनान्स कम्पनी, २६ इन्स्योरेन्स कम्पनी, १२ वटा फाइनान्स कम्पनी, २५ वटा वाणिज्य बैंक, १० वटा विकास बैंक र ९ वटा हाइड्रोपावर कम्पनी गरी १४५ वटा कम्पनीको बोनस दर्ता भएको हो । [pdf id=340449]
श्वेत गंगा हाइड्रोको आईपीओ खुल्यो, कति दिने आवेदन ?
काठमाडौं । श्वेत गंगा हाइड्रोपावर एण्ड कन्स्ट्रक्सन लिमिटेडले आज (साउन ४ गते) देखि आईपीओ निष्काशन तथा बिक्री खुला गरेको छ । कम्पनीले सर्वसाधारण लगानीकर्ताका लागि आईपीओ निष्काशन तथा बिक्री खुला गरेको हो । कम्पनीले प्रतिकित्ता १ सय रुपैयाँ अंकित मूल्यका २३ लाख ८९ हजार ५ सय कित्ता साधारण शेयर बिक्री गरेको हो । जसमध्ये ५ प्रतिशत अर्थात १ लाख १९ हजार ४७५ कित्ता शेयर सामूहिक लगानी कोषहरुका लागि र २२ लाख ७० हजार २५ कित्ता साधारण शेयर सर्वसाधारण लगानीकर्ताका लागि छुट्याएको छ । कम्पनीको आईपीओ निष्काशन तथा बिक्री प्रबन्धकमा सानिमा क्यापिटल लिमिटेड रहेको छ । कम्पनीको आईपीओमा लगानीकर्ताले न्यूनतम १० कित्ता र अधिकतममा १० हजार कित्ताका लागि आवेदन दिन सक्नेछन् । कम्पनीको आईपीओमा छिटोमा साउन ८ गतेसम्म र ढिलोमा साउन १८ गतेसम्म आवेदन दिन सकिनेछ । कम्पनीको आईपीओमा लगानीकर्ताले नेपाल धितोपत्र बोर्डबाट स्वीकृतिप्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सक्नेछन् । साथै, मेरोशेयर वेब तथा एपमार्फत पनि आवेदन दिन सकिनेछ । कम्पनीको आईपीओलाई केयर रेटिङ्ग नेपालले केयरएनपी डबल बी आइएस रेटिङ्ग प्रदान गरेको छ । यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।
