सीईडीबी हाइड्रोको लाभांश घोषणा, बोनस र नगद कति ?
काठमाडौं । सीईडीबी हाइड्रो पावर कम्पनीले लाभांश घोषणा गरेको छ । कम्पनीको बैशाख १० गते बसेको सञ्चालक समितिको बैठकले आर्थिक वर्ष २०७७/७८ र आर्थिक वर्ष २०७८/७९ को लागी ११.५७८९ प्रतिशत लाभांश प्रस्ताव गरेको हो । कम्पनीले हाल कायम चुक्ता पुँजीको ११ प्रतिशत बोनस सेयर र कर प्रयोजनका लागि ०.५७८९ प्रतिशत नगद गरी सो मात्राको लाभांश प्रस्ताव गरेको हो । प्रस्तावित उक्त लाभांशलाई कम्पनीको आगामी वार्षिक साधारण सभाले पारित गरेपश्चात् सेयरधनीहरूलाई वितरण हुने छ । हाल कम्पनीको चुक्ता पुँजी ८३ करोड ९४ लाख रुपैयाँ छ । प्रस्तावित ११ प्रतिशत बोनसपछि कम्पनीको चुक्ता पुँजी ९३ करोड १७ लाख नाघ्ने छ ।
आज सेयर बजार बन्द रहने
काठमाडौं । आज नेपाल स्कट एक्सचेञ्ज (नेप्से) बन्द रहने भएको छ । आइतबार बसेको मन्त्रिपरिषद बैठकले कतारका राजा अमिर शेख तमिम बिन हमाद अल थानीको नेपाल भ्रमणको अवसरमा आज सार्वजनिक बिदा दिने निर्णय गरेको छ । त्यसैले आज देशका सम्पूर्ण सरकारी कार्यालय, सेयर बजार, बैंक वित्तीय संस्था र शैक्षिक संस्था लगायत बन्द रहने छन् । यस कारण आज दोस्रो बजारमा सेयर कारोबार हुने छैन । शेख आज अपराह्न दुई दिने नेपाल भ्रमणमा आउँदैछन् ।
किसान लघुवित्तको संस्थापक सेयर बिक्रीमा
काठमाडौं । किसान लघुवित्त वित्तीय संस्था लिमिटेडले संस्थापक सेयर बिक्री गर्ने भएको छ । लघुवित्तले सोमबार एक सूचना जारी गरी दुई जना संस्थापकको नाममा रहेको १२ हजार ८४० कित्ता र ६ हजार ४२० कित्ता गरी जम्मा १९ हजार २६० कित्ता सेयर बिक्री गर्न लागिएको जनाएको छ । हाल विद्यमान संस्थापक सेयरधनीहरूले मात्रै उक्त सेयर खरिद गर्न पाउनेछन् । सेयर खरिद गर्न इच्छुक सेयरधनीले ३५ दिनभित्र सो सम्बन्धी विवरण खुलाई कैलालीको लम्कीचुहामा रहेको लघुवित्तको केन्द्रीय कार्यालय वा काठमाडौं मण्डीखाटारमा रहेको कर्पोरेट कार्यालयमा आवश्यक कागजातसहित लिखित निवेदन दिनुपर्नेछ । साथै, तोकिएको समयावधिभित्र संस्थापक सेयरधनीबाट खरिद आवेदन नपरेमा सो सेयर अन्य व्यक्ति वा संस्थालाई बिक्री गर्न प्रक्रिया थालिने लघुवित्तले जनाएको छ ।
