आइएमइ, यूनियन र ज्योति लाइफले बीमा समितिबाट लाईसेन्स पाए
काठमाडौं । बीमा समितिले तीन वटा जीवन बीमा कम्पनीलाई सेवा सञ्चालन गर्न अनुमति दिएको छ । सोमबार बीमा समितिको सञ्चालक समितिले आईएमई लाइफ इन्स्योरेन्स, यूनियन लाइफ इन्स्योरेन्स र ज्योति लाइफ इन्स्योरेन्स कम्पनीलाई सञ्चालन अनुमति दिने निर्णय गरेको हो । तीन वटै कम्पनीले मंगलबार बीमा समितिबाट सेवा सञ्चालन अनुमतिको प्रमाणपत्र लिएका छन् । ‘सबै प्रक्रिया पुरा गर्ने र संस्थापकको तर्फबाट कबुल गरेको सेयर पुँजी कम्पनीको खातामा जम्मा गरेका तीन कम्पनीलाई लाईसेन्स दियौं । प्रक्रिया पुरा गरेपछि बाँकी ७ कम्पनीलाई पनि लाईसेन्स वितरण गछौं’ बीमा समिति स्रोतले भन्यो । ‘आइएमइ लाईफ इन्स्योरेन्स कम्पनीले बीमा समितिबाट सञ्चालन अनुमति पाएको छ । हामी छिट्टै सेवा सञ्चालन गर्ने तयारीमा जुटेका छौं’ आइएमइ ग्रुपका अध्यक्ष चन्द्रप्रसाद ढकालले भने । यस कम्पनीको अध्यक्ष डा रामहरि अर्याल छन् । नेपाल सरकारको सचिव पदबाट अवकाश पाएको अर्याल यसअघि नेपाल राष्ट्र बैंकमा सञ्चालक थिए । प्रमुख कार्यकारी अधिकृतबारे अहिले टुङ्गो नलागेको उनले बताए । शंकर ग्रुपको अगुवाईमा स्थापना भएको यूनियन लाइफको प्रमुख कार्यकारी अधिकृतमा मनोजलाल कर्ण नियुक्त हुने सम्भावना अधिक छ । ‘कम्पनीले कर्णको नाम सिफारिस गरेको छ, बीमा समितिबाट स्वीकृत हुन बाँकी छ’ स्रोतले भन्यो । अर्थमन्त्रालयले १० वटा जीवन बीमा कम्पनीलाई लाइसेन्स दिन सैद्धान्तिक सहमति दिई सकेको छ । निर्जीवनतर्फ पनि ४ वटा कम्पनी प्रक्रियामा रहेका छन् । पहिला प्रक्रियामा रहेका जीवन बीमा कम्पनीलाई लाईसेन्स वितरण गरेपछि निर्जीवन बीमा कम्पनीलाई लाईसेन्स वितरण गर्ने समितिको योजना रहेको स्रोतले बतायो ।
विमकको व्यवस्थापन खर्च सीमा १८ प्रतिशत, अभिकर्ता इन्सेन्टिभ अन्य शीर्षकमा
काठमाडौं । जीवन बीमा कम्पनीहरुले अबदेखि १८ प्रतिशतसम्म व्यवस्थापन खर्च गर्न पाउने भएका छन् । बीमा अभिकर्ताहरुले इन्सेन्टिभ दिन गठित अध्ययन उपसमितिले बुधबार बीमा समितिलाई आफ्नो राय बुझाउदै कम्पनीहरुको व्यवस्थापन खर्चको सीमा तोकेको हो । उपसमितिले दिएको राय अनुसार कम्पनीहरुले संकलन गरेको प्रथम बीमाशुल्कबाट अभियकर्ता तालिम, अभिकर्ता अन्य र व्यापार प्रवद्र्धन शीर्षकमा खर्च गर्न पाउने उपसमितिका सदस्य एवम् पेशागत बीमा अभिकर्ता संघ नेपालका कार्यवाहक अध्यक्ष नन्दप्रसाद तिवारीले बताए । बीमा अभिकर्तालाई दिइने इन्सेन्टिभ खर्च भने कम्पनीहरुले अन्य खर्च शीर्षकमै राख्नुपर्ने छ । साथै अभियकर्तालाई दिइने इन्सेन्टिभमा बैदेशिक रोजगार (म्यादी) जीवन बीमाको बीमाशुल्क भने गणना गरिने छैन । कारोबार दैनिकबाट ।
निर्जीवन बीमा कम्पनीले लघुबीमा कार्यक्रम सञ्चालन गर्ने, दुई लाखसम्मको सम्पत्ति बीमा
काठमाडौं । निर्जीबन बीमा कम्पनीहरुले ‘घ’ वर्गका वित्तीय संस्थासँग मिलेर लघुबीमा कार्यक्रम शुरु गर्ने भएका छन् । विपन्न वर्ग र किसानलाई फाइदा पुर्याउने उद्देश्यले सो लघुवित्त बैंकसँगको सहकार्यमा सो कार्यक्रम गर्न लागिएको बिमा समितिका अध्यक्ष चिरञ्जिवी चापागाइँले बताए । ‘निर्जीबन बीमा कम्पनीहरुको तर्फबाट करिब चार करोड रुपैयाँ र बेलायती सहयोग संस्था सक्षम एक्सेस टु फाइनान्स कार्यक्रमको करिब चार करोड रुपैयाँ गरी करिब ८ करोड रुपैयाँको माइक्रोइन्स्योरेन्स पूल बनाएर लघुबीमा कार्यक्रम सुरु गर्न लागिएको हो,’ उनले भने ‘कार्यक्रमको व्यवस्थापन जिम्मा बिमक संघलाई दिइएको छ ।’ लघुबीमा कार्यक्रमको संचालन लघुवित्त कम्पनीहरुले गर्ने छन् । कृषि विकास बैंकका पूर्व कर्मचारी द्रोण आचार्यलाई लघुबीमा कार्यक्रम सञ्चालन गर्नका लागि प्रमुख कार्यकारी अधिकृतको कम्पनीले नियुक्त गरेको छ । पहिलो वर्षका लागि पूल मेनेजरमा प्रुडेन्सियल इन्स्योरेन्स कम्पनी छनोट भएको अध्यक्षले बताए । चालु आवमै कार्यक्रम कार्यान्वयनमा लैजाने चापागाइँले बताए । ‘लघुबीमा कार्यक्रम संचालन मोडालिटी तयार भइसकेको छ,’ चापागाइँले भने ‘लघुवित्त कम्पनीका कर्मचारीहरुले लघुबीमा गराउने छन् ।’ यसरी लघुबीमा गराए वापत कम्पनीहरूले २५ प्रतिशत शुल्क पाउने छन् । सो मध्ये १५ प्रतिशत कमिसन र १० प्रतिशत व्यवस्थापन खर्च हुनेछ । कार्यक्रममा दुई लाख रुपैयाँसम्मको सम्पत्तिको बीमा समेटिने छ । यो बीमा कार्यक्रममा सहभागी हुन चाहने व्यक्ति वा फर्महरुले शुन्य दशमलव २५ प्रतिशत अर्थात वार्षिक ५ सय रुपैयाँ बीमा शुल्क तिर्नुपर्ने हुन्छ । हालसम्म बीमा समितिले लघुबीमा कार्यक्रमको लागि स्वास्थ्य, दुर्घटना, पशु तथा पन्छी, बाली, म्यादी लगायत सात प्रकारका ७ प्रकारका बीमालेख स्वीकृत गरेको अध्यक्षले जानकारी दिए ।
