तनावग्रस्त बन्यो तीनकुने : प्रहरीद्वारा अश्रुग्यास प्रहार, राजावादीको ढुङ्गामुढा
काठमाडौं । काठमाडौंको तीनकुने तनावग्रस्त बनेको छ । राजावादी र सुरक्षाकर्मीबीच अहिले तनाव उत्पन्न भएको हो । राजावादीले काठमाडौंको तीनकुनेबाट बानेश्वरतर्फ जान खोज्दा प्रहरीले बल प्रयोग गरेपछि तनाव सिर्जना भएको हो । अहिले राजावादीले प्रहरीलाई ढुङ्गामुढा प्रहार गरिरहेका छन् । राजावादीको प्रदर्शनको नेतृत्व पूर्वपञ्च ८६ वर्षीय नवराज सुवेदीले गरेका छन् । आजको प्रदर्शनको ‘कमान्डर’ भने मेडिकल व्यवसायी दुर्गा प्रसाईं हुन् । वर्तमान व्यवस्थालाई चुनौती दिँदै राजावादीहरू प्रदर्शनमा उत्रिएका हुन् । आजै गणतन्त्रवादीहरूले पनि प्रदर्शन गरिरहेका छन् । समाजवादी मोर्चा नेपाल नाम दिइएको विशाल जनसभामा (माओवादी केन्द्र, नेकपा एकीकृत समाजवादी, नेपाल समाजवादी पार्टी र विप्लव नेतृत्वको नेकपा सहभागी छन् । जसको प्रमुख वक्ता पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ छन् । समाजवादी मोर्चाका अन्य नेताहरूले पनि आफ्नो धारणा जनसभामा राख्ने कार्यक्रम छ ।
राजावादी बानेश्वरतर्फ जान खोज्दा झडप, प्रहरीले बल प्रयोग गरेपछि फर्किए
काठमाडौं । राजावादी र सुरक्षाकर्मीबीच धकेलधाकल भएको छ । राजावादीले काठमाडौंको तीनकुनेबाट बानेश्वरतर्फ जान खोज्दा प्रहरी र राजावादीबीच धकेलधाकल भएको हो । उनीहरूले निषेधित क्षेत्र तोडेर नयाँ बानेश्वरतर्फ अघि बढ्न थालेपछि प्रहरीले रोकेको थियो । अहिले सो झडप रोकिएको छ । प्रहरीले बल प्रयोग गरेपछि उनीहरू पछि हटेका छन् ।
राजावादी र गणतन्त्रवादीको प्रदर्शन, उपत्यकाको सुरक्षा व्यवस्था चुस्त
काठमाडौं । संघीय राजधानी काठमाडौं उपत्यकामा शुक्रबार भइरहेको फरक–फरक दुई प्रदर्शनलाई मध्यनजर गर्दै नेपाल प्रहरीले सुरक्षा व्यवस्था चुस्त बनाएको छ । काठमाडौंका विभिन्न स्थानमा भइरहेका जुलुस र सभास्थलको सुरक्षा व्यवस्थालाई चुस्त र प्रभावकारी बनाइएको केन्द्रीय प्रहरी प्रवक्ता प्रहरी नायब महानिरीक्षक (डिआइजी) दिनेशकुमार आचार्यले राससलाई जानकारी दिए । उपत्यकाका प्रमुख चोकहरुमा प्रहरीको बाक्लो तैनाथी छ भने भैपरी आउने परिस्थितिका लागि आवश्यक सङ्ख्यामा प्रहरी तम्तयार रहेको उनले बताए । उपत्यकामा आज समाजवादी मोर्चा नेपालले गणतन्त्रका पक्षमा काठमाडौं प्रदर्शनीमार्गमा खबरदारी सभा गरिरहेको छ । यता, राजतन्त्र पक्षधरले नयाँबानेश्वर तीनकुनेमा प्रदर्शन गरिरहेका छन् । दुवै प्रदर्शनअघि उपत्यकाका विभिन्न स्थानबाट सुरु भएर ¥याली जुलुसहरू तोकिएका स्थानमा जम्मा हुने क्रम जारी छ । दुवै समूहको प्रदर्शनले दैनिकीमा अवरोध हुने ठानी सर्वसाधरण सचेत भएर गन्तव्यतर्फ हिँडिरहेका देखिन्छन् । राजावादीको प्रदर्शनमा दुर्गा प्रसाईं हावी, ब्यानरमा जताततै आफ्नो तस्बिर गणतन्त्रवादी र राजवादीको प्रदर्शन : ड्रोनबाट निगरानी, टेलिफोनको टावर बन्ददेखि ठाउँठाउँमा वाटर क्यानन
ट्रम्पको कर दृष्टिकोण बुझ्न कठिन छ : जापानी प्रधानमन्त्री
काठमाडौं । जापानका प्रधानमन्त्री शिगेरु इशिबाले अमेरिकी राष्ट्रपति डोनाल्ड ट्रम्पको आयातित कार र पार्ट्समा २५ प्रतिशत शुल्क लगाउने निर्णयलाई ‘बुझ्न कठिन’ रहेको बताएका छन् । उनले यो निर्णयलाई एक ठूलो झटका मान्दै, केही हप्ताअघि ट्रम्पसँग भएको मैत्रीपूर्ण वार्तापछि जापानका लागि यो कदम आश्चर्यजनक भएको बताए । ट्रम्पले आफ्नो निर्णयको समयमा भने, ‘मित्र र शत्रु दुवैबाट हामीले धेरै कुरा गुमाएका छौं, र वास्तवमा, मित्रहरूले अझ खराब काम गरेका छन् ।’ यस टिप्पणीसँगै जापानी अटो उद्योगमा असन्तोष फैलिएको छ, र जापानका प्रमुख अटो कम्पनीहरूको सेयर मूल्यमा गिरावट आएको छ । प्रधानमन्त्री इशिबाले यस निर्णयको जापानी अर्थतन्त्रमा गहिरो प्रभाव पर्ने बताएका छन् र भने, ‘यस निर्णयले संयुक्त राज्य अमेरिकालाई कुनै विशेष लाभ प्राप्त हुने छैन ।’ जापानका लागि यो निर्णय एक ठूलो चुनौतीको रूपमा प्रस्तुत भएको छ, र जापानले यसको उपयुक्त प्रतिक्रिया दिने तयारी गरेको छ । यस निर्णयसँगै जापान र अन्य मित्र राष्ट्रहरूकाबीचमा तनाव उत्पन्न भएको छ र विश्वव्यापी अर्थव्यवस्था र बहुपक्षीय व्यापार प्रणालीमा पनि यसको प्रभाव पर्ने आशंका व्यक्त गरिएको छ ।
राजावादीको प्रदर्शनमा दुर्गा प्रसाईं हावी, ब्यानरमा जताततै आफ्नो तस्बिर
काठमाडौं । विवादित मेडिकल व्यवसायी दुर्गा प्रसाईं राजावादीको प्रदर्शनमा हावी देखिएका छन् । प्रसाईं नेतृत्वको सुरु हुन लागेको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’को ब्यानरमा उनी नै हावी देखिएका हुन् । जताततै प्रसाईं र पूर्वराजा ज्ञानेन्द्र शाहका ब्यानर राखिएका छन् । राजावादीहरुले आज (शुक्रबार) तीनकुनेमा प्रदर्शन गर्दैछन् । राजावादीको प्रदर्शनको नेतृत्व पूर्वपञ्च ८६ वर्षीय नवराज सुवेदीले गरेका छन् । आजको प्रदर्शनको ‘कमान्डर’ भने मेडिकल व्यवसायी दुर्गा प्रसाईं हुन् । राजावादीलाई रिङरोड भित्र छिर्न नदिन बानेश्वर–तीनकुने सडकको मुख्य लेनमा पुलिसले बार लगाएको छ । दुई समूहबीच भेट नहोस् भन्ने मनसायका साथ सुरक्षाकर्मीले सडकमा बार लगाएर सुरक्षा व्यवस्थामा कडाइ गरेका हुन् ।
गोगोरोको ४५ ब्याट्री स्वाप स्टेसन सञ्चालनमा, चार्ज गर्न धेरै समय पर्खनु नपर्ने
काठमाडौं । गोगोरोको नेपालका लागि आधिकारिक वितरक नेबुला इनर्जीले काठमाडौं उपत्यकाभर ४५ ब्याट्री स्वाप स्टेसनहरू सफलतापूर्वक स्थापना गरेको छ । कम्पनीका अनुसार गोगोरोले आफ्नो बिक्री प्रक्रिया सुरु गर्नु अघि नै बलियो नेटवर्क पूर्वाधार निर्माण गरेको हो । यससँगै अब ईभी (इलेक्ट्रिक भेहिकल) प्रयोगकर्ताहरूलाई चार्ज सकिने चिन्ता गर्न नपर्ने भएको छ । गोगोरोको ब्याट्री-स्वापिङ प्रविधिले ‘रेन्जको चिन्ता’लाई अन्त्य गर्दै राइडरहरूले अब चार्ज गर्नको लागि धेरै समय पर्खनु पर्ने छैन । चार्जिङका लागि अब समयको चिन्ता छैन गोगोरोका ४५ स्वाप स्टेसनहरू २ देखि ३ किलोमिटरको दायरामा रहेका छन् । जसले गर्दा यात्रुहरूलाई फुल चार्ज गरिएका ब्याट्रीहरूमा सहज पहुँच मिल्छ । प्रत्येक ब्याट्री स्वाप ६ सेकेन्डको छोटो समयमै सम्पन्न हुन्छ । जसले ईभी प्रयोगकर्ताहरूलाई बिना कुनै अवरोधका साथ यात्रा गर्न मद्दत पुर्याउँछ । यी स्टेसनहरू प्रमुख सहरी क्षेत्र र आसपासका स्थानहरूमा स्थापित गरिएको छ, जसले सबै प्रयोगकर्ताहरुलाई सहजता र पहुँचको लागि रणनीतिक कभरेज सुनिश्चित गरेको छ। यी स्टेसनहरू २४ घण्टा सञ्चालनमा रहनेछन् र प्रयोगमा सहज इन्टरफेसको साथ ब्याट्री स्वाप प्रणाली उपलब्ध हुनेछ। गोगोरोका ब्याट्री स्वाप स्टेसनहरूले रियल टाइम ब्याट्री हेल्थ निगरानी र अन्य सुरक्षा मापदण्डहरू प्रदान गर्छन् । यसका साथै भविष्यमा बढ्दो मागलाई व्यवस्थापन गर्न सक्षम संरचनाहरू पनि उपलब्ध छन् । गोगोरोका स्वाप स्टेसनहरू एआई प्रणालीद्वारा सञ्चालित छन् र इनबिल्ट युपीएस प्रणालीले बिजुलीको अवरोधको अवस्थामा पनि ७ दिनसम्म सञ्चालन सुनिश्चित गर्दछ । ब्याट्री स्वापिङ प्रविधिको प्रभाव गोगोरोको ब्याट्री स्वापिङ प्रविधि स्कुटरका प्रयोगकर्ताहरूलाई चार्ज गर्ने झन्झटबाट मुक्त बनाउँछ । यस प्रणालीमा प्रयोगकर्ताले चार्ज सकिएको ब्याट्रीलाई निकालेर नयाँ चार्ज गरिएको ब्याट्री राख्न सक्नेछन् । सबै प्रक्रिया अनलाइन भुक्तानीको माध्यमबाट गर्न सकिन्छ र केवल ६ सेकेन्डको समय लाग्छ । गोगोरोले आफ्नो स्कुटर विकास गरेको छ र अन्य स्कुटर निर्माता कम्पनीहरूसँग पनि आवश्यक सहकार्यको आह्वान गरेको छ । यसले न केवल गोगोरोका स्कुटर, बल्कि अन्य स्कुटरहरूको लागि पनि सस्तो र सुविधाजनक चार्जिङ विकल्प उपलब्ध गराउनेछ । नेबुला इनर्जीका अध्यक्ष मनोज गोयलले नेपालमा गोगोरोको प्रविधि ल्याएर ईभी इकोसिस्टमलाई बलियो बनाउनको लागि आफूहरूको प्रतिबद्धता पूरा गरेकोमा गर्व व्यक्त गरे । उनका अनुसार यी ४५ स्वाप स्टेसनहरू कम्पनीको दीर्घकालीन सोचको पहिलो कदम हो र भविष्यमा अझ स्मार्ट र दिगो यातायात प्रणालीको निर्माण गर्ने लक्ष्य राखिएको छ । नेबुला इनर्जीका म्यानेजिङ डाइरेक्टर चिरञ्जिवी शाहले भने, ‘नेपालमा गोगोरोको प्रविधि ल्याएर हामीले नयाँ युगको सुरुवात गरेका छौं। भविष्यमा हामी यो नेटवर्कलाई अझ विस्तार गर्नेछौं ।’ यो ब्याट्री स्वापिङ प्रविधिले नेपाली बजारमा इलेक्ट्रिक सवारीसाधनहरूको प्रयोगलाई अझ प्रोत्साहन गर्ने र दीर्घकालीन दिगो यातायात समाधानको लागि योगदान पुर्याउने विश्वास गरिएको छ ।
गणतन्त्रवादी र राजवादीको प्रदर्शन : ड्रोनबाट निगरानी, टेलिफोनको टावर बन्ददेखि ठाउँठाउँमा वाटर क्यानन
काठमाडौं । गणतन्त्रवादी र राजावादीहरूले शुक्रबार काठमाडौंमा शक्ति प्रदर्शन गर्दैछन् । गणतन्त्रवादीहरूले प्रदर्शनीमार्गमा र राजावादीहरूले तीनकुनेमा आफ्नो शक्ति प्रदर्शन गर्दैछन् । उनीहरूले आफूलाई परीक्षण गर्न पनि यो प्रदर्शन गर्ने तयारी गरेका हुन् । समाजवादी मोर्चा नेपाल नाम दिइएको विशाल जनसभामा (माओवादी केन्द्र, नेकपा एकीकृत समाजवादी, नेपाल समाजवादी पार्टी र विप्लव नेतृत्वको नेकपा)ले सहभागी छन् । जसको प्रमुख वक्ता पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ छन् । समाजवादी मोर्चाका अन्य नेताहरूले पनि आफ्नो धारणा जनसभामा राख्ने कार्यक्रम छ । राजावादीहरूले पनि तीनकुनेमा विशाल प्रदर्शन गर्दैछन् । राजावादीको प्रदर्शनको नेतृत्व पूर्वपञ्च ८६ वर्षीय नवराज सुवेदीले गरेका छन् । आजको प्रदर्शनको ‘कमान्डर’ भने मेडिकल व्यवसायी दुर्गा प्रसाईंलाई तोकिएको छ । काठमाडौंमा दुई ठूला प्रदर्शन भएपनि सवारीसाधन आवागमन प्रभावित भएको छ । प्रदर्शनमा कुनै अप्रीय घटना नहोस् भनेर सुरक्षा व्यवस्थामा पनि कडाइ गरिएको छ । सुरक्षाका लागि २५ सय प्रहरी खटाइएको छ । प्रदर्शन शान्तिपूर्ण रूपमा गराउन नेपाल प्रहरी, सशस्त्र प्रहरी बल, राष्ट्रिय अनुसन्धान विभाग (गुप्तचर)का सुरक्षाकर्मी ठूलो संख्यामा परिचालन गरिएको छ । सुरक्षालाई मध्यनजर गर्दै सादा पोशाकका प्रहरीसमेत परिचालन गरिएको बताइएको छ । सशस्त्र प्रहरीले पनि तयारी गरेको छ । सशस्त्र प्रहरी बलका प्रवक्ता तथा डीआईजी कुमार न्यौपानेका अनुसार १७ सय शसस्त्र प्रहरी परिचालन गरिएको छ । नेपाली सेनाको ‘इन्टेलिजेन्स’ टोलीसमेत खटाइएको छ । उपत्यका प्रहरी कार्यालयअन्तर्गत नियमित खटिने टोलीभन्दा करिब चार हजार प्रहरी थप गरिएको छ । सादा पोसाकका प्रहरीले दुवै पक्षका प्रदर्शनकारीको गतिविधि नियाल्न ड्रोन क्यामेरासमेत प्रयोग गर्ने उपत्यका प्रहरी कार्यालयका प्रवक्ता एवं एसएसपी शेखर खनालले बताए । यस्तै, प्रहरीले भीड नियन्त्रणका लागि ‘वाटर क्यानन’ पनि राखिएको छ भने प्रदर्शन स्थलमा टावर बन्द गरिएको छ ।
सर्वोच्चमा कुलमान भर्सेस हितेन्द्र, कसरी अघि बढ्छ मुद्दा ?
काठमाडौं । नेपाल विद्युत्त प्राधिकरणका वर्तामान र निःवर्तमान कार्यकारी निर्देशकले दायर गरेको रिट सर्वोच्च अदालतको एकै इजलासमा पेशी तोकिएको छ । न्यायाधीश अब्दुल अजिज मुसलमानको इजलासमा पेशी गोलावाट तोकिएको हो । सरकारले हालै बर्खास्त गरेका कार्यकारी निर्देशक कुलमान घिसिङको मुद्दा ख (दुई) नम्बरमा पेशी तोकिएको छ । वर्तमान कार्यकारी निर्देशक ङ (पाँचौं ) नम्बरमा हितेन्द्रदेव शाक्यको निवेदनमा पेशी तोकिएको छ । बिहीवार सर्वोच्च अदालतमा विद्युत प्राधिकरणवाट बर्खास्तीमा परेका कार्यकारी निर्देशक घिसिङ र नवनियुक्त शाक्य दुवैको रिट निवेदन दर्ता भएको थियो । आफूलाई अन्याय भएको भनी कुलमानले बुधवार अबेर पेश गरेको रिट सर्वोच्चले बिहीबारमात्र दर्ता गरेको थियो । कुलमान सर्वोच्च पुगे लगत्तै हितेन्द्रदेव शाक्य पनि सर्वोच्च पुगेका थिए । ४ वर्षअघि आफूलाई अन्यायपूर्वक पदबाट हटाएको र अदालत आउँदा समेत न्याय नपाएको तथा उक्त अवधिको सेवासुविधा पाउनुपर्ने दाबी शाक्यले गरेका छन् । कसरी अघि बढ्छ कुलमान र हितेन्द्रको मुद्दा ? निःवर्तमान कार्यकारी निर्देशक कुलमानले दायर गरेको यो मुद्दा पहिलो हो भने कार्यकारी निर्देशक हितेन्द्रले दायर गरेको रिट दोस्रो हो । शुक्रवार दुवै मुद्दा एक न्यायाधीश(एकल)को इजलासमा पेशी तोकिएको छ । दुवैको मुद्दामा अलग-अलग पेशी तोकिएको छ । इजलासले पहिलो सुनुवाइ गर्ने भएकाले अलग अलग बहस हुने भएको हो । सरकारी पक्षले चाहेमा भने इन्टरभेन्सन(हस्तक्षेप) वहस पनि हुन सक्नेछ । सरकारी पक्षले पहिलो सुनुवाइमै आफ्नो उपस्थिति आवश्यक छ भनी ठानेमा इन्टरभेन्सन बहसका लागि निवेदन दिन पाउने न्यायिक अभ्यास रहेको छ । यही अभ्यासअन्तर्गत सरकारी पक्ष पनि मिसिएमा यी दुवै मुद्दा एकै विषय र एउटा क्षेत्रका भएकाले साथै राखेर सुनुवाइ गर्नसक्ने छ । इजलासलाई फरक-फरक सुनुवाइ गर्नुपर्ने लागेमा भने अलग अलग नै सुनुवाइ गर्नेछ । कसरी सुनुवाइ गर्ने भन्ने विषय अब इजलासको अधिकारभित्र पुगेको छ । आज सर्वोच्चमा कारण देखाऊ आदेश र अन्तरिम आदेश जारी गर्ने कि नगर्ने विषयमा बहस हुनेछ । सर्वाेच्चले रिट निवेदकसहितका कानुन व्यवसायीको बहस सुनेपछि अन्तरिम आदेशबारे निर्णय लिनेछ । सर्वोच्चले घिसिङलाई पदबाट हटाउने निर्णय तत्काल प्राप्त प्रमाणले कार्यान्वयनमा रोक लगाउनुपर्ने देखेमा अन्तरिम आदेश, अन्तरकालिन अन्तरिम आदेश वा अल्पकालिन अन्तरिम आदेश जारी गर्ने छ । यी मध्ये कुनैपनि अन्तरिम आदेश जारी गरेमा घिसिङ केही समयमा लागि पदमा पुनर्बहाली हुनेछन् । तर सरकारले नियुक्ति गरेका हितेन्द्रदेव शाक्यले शपथसमेत लिएर जिम्मेवारी सम्हालिसकेका कारण अन्तरिम आदेश हुने सम्भावना देखिन्छ । सर्वोच्चले अन्तरिम आदेश जारी नगरेमा कारण देखाऊ आदेश जारी गर्दै सबै पक्षलाई छलफलमा बोलाउनेछ । सर्वोच्चले लिखित जवाफ पनि माग गर्नेछ । सर्वोच्चले कारण देखाऊ आदेश जारी गरेमा कुलमान प्राधिकरणमा फर्कने च्याप्टर फैसला नभएसम्मका लागि क्लोज हुनेछ । ४ वर्षदेखि विचाराधीन मुद्दा सर्वोच्चले शुक्रबार २०७८ सालदेखि विचाराधीन हितेन्द्रदेव शाक्यले दायर गरेको मुद्दा सँगै राख्ने सम्भावना धेरै देखिन्छ । शाक्यले पनि निवेदन दर्ता गराएकाले ४ वर्ष पुरानो मुद्दा र नयाँ दुई वटा मुद्दा एकै ठाउँमा राखेर फैसला सुनाउँदै सबै पक्षमाथि सर्वोच्चले एकै पटक न्याय निरुपण गर्नसक्ने देखिन्छ । ४ वर्षअघि शाक्यलाई हटाएर घिसिङ कार्यकारी निर्देशक भएका थिए भने । मंगलबार निर्वतमान कार्यकारी निर्देशक घिसिङलाई पदबाट हटाउँदै शाक्यले यस पटक प्राधिकरणमा फर्केका हुन् । यही कारण यी सबै मुद्दा एक आपसमा परस्पर सम्बन्धित छन् । २०७८ साउन २४ गतेको मन्त्रीपरिषद् बैठकले घिसिङलाई प्राधिकरणको कार्यकारी निर्देशकमा नियुक्त गर्ने निर्णय गरेको थियो । त्यसको तीन दिनपछि साउन २७ मा नियुक्तिपत्र बुझेलगत्तै घिसिङले शाक्यलाई प्रतिस्थापन गरेका थिए । तत्कालीन समयमा आफूलाई हटाएर नियुक्ति पाएका घिसिङको नियुक्ति बदर माग गर्दै शाक्य सर्वोच्च पुगेका थिए । पुरानो मुद्दामा के छ अवस्था ? कुलमान घिसिङ विरुद्ध प्राधिकरणका तत्कालीन कार्यकारी निर्देशन शाक्यले दायर गरेको रिट सर्वोच्च अदालतमा विचाराधीन छ । २०७८ सालदेखि सर्वोच्च धाउन थालेका प्राधिकरणका पूर्वकार्यकारी निर्देशक शाक्य माघको अन्तिममा अनिवार्य अवकाश भए । शाक्यले अन्तिम समयमा अग्राधिकारको निवेदन पनि दिएर छिटो सुनुवाइ गराउने प्रयास गरेका थिए । शाक्यले अवकाश पाउनु अघि माघ २१ गते सर्वोच्चमा पेसी थियो । न्यायाधीशद्वय कुमार रेग्मी र टेकप्रसाद ढुङ्गाना इजलासमा तोकिएको पेसी हेर्न नमिल्ने हुदै स्थगित भयो योसँगै शाक्यको प्राधिकरण फर्केने च्याप्टर क्लोज भएको थियो । तर कुलमानको दोस्रो नियुक्ति संवैधानिक कि असंवैधानिक भन्ने विवाद भने बाँकी नै छ । यो मुद्दालाई अबको पेसी २०८२ असार १० गते तोकिएको छ । २०७८ साउन २४ गतेको मन्त्रीपरिषद् बैठकले घिसिङलाई प्राधिकरणको कार्यकारी निर्देशकमा नियुक्त गर्ने निर्णय गरेको थियो । त्यसको तीन दिनपछि साउन २७ मा नियुक्तिपत्र बुझेलगत्तै घिसिङले सोही दिन पदबहाली गरेका थिए । पद बहाली गरेको दिन ४ वर्षको पदावधी २०८२ साउन २७ गतेसम्म कायम थियो । अव सर्वोच्च अदालतले घिसिङले अवकाश पाउनु भन्दा एक महिना अघि मुद्दाको सुनुवाइ गर्नेछ । यस्तो हुदाँ २०७८ सालमा नियुिक्तको निर्णय र २०८२ मा हटाउने निर्णय एकै पटक न्यायीक परीक्षण हुनेछ ।
