रास्वपामा समानुपातिक उम्मेद्वार छनोट प्रक्रिया सुरु
काठमाडौं । राष्ट्रिय स्वतन्त्र पार्टी (रास्वपा)ले बिहीबारदेखि समानुपातिक उम्मेद्वार छनोट प्रक्रिया सुरु गरेको छ । पार्टीले बिहीबार र शुक्रबार ‘ब्लूप्रिन्ट संवाद’ तथा ‘शून्य समय’ कार्यक्रममार्फत आकांक्षीहरूको प्रस्तुति राख्ने व्यवस्था मिलाइएको प्रवक्ता मनिष झाले जानकारी दिए । दुई दिन पछि प्रारम्भिक निर्वाचनअन्तर्गत आन्तरिक मतदान (प्राइमरी भोटिङ) हुने जनाइएको छ । प्रवक्ता झाकाअनुसार यस प्रक्रियामा देशभरबाट निवेदन दिएका करिब चार सय आकांक्षी सहभागी छन् । तीमध्येबाट ११० जनाको नाम समानुपातिक बन्दसूचीमा समावेश गरी निर्वाचन आयोगमा बुझाइने छ । उम्मेद्वार छनोट तथा प्रतिस्पर्धाका सबै कार्यक्रम काठमाडौँको गोंगबुस्थित बिजी ब्याङ्क्वेटमा सञ्चालन भइरहेको छ । प्रवक्ता झाले यही पुस ५ गते आयोजित छलफलमा विशेष कारणवश सहभागी हुन नसकेका वा सहभागी हुन नपाएका समानुपातिक उम्मेद्वारका आकांक्षीहरूलाई पुनः छलफलमा सहभागी गराइने बताए । प्रारम्भिक निर्वाचन बाहेकका छनोट प्रक्रिया सम्पन्न गर्ने जिम्मेवारी पार्टी प्रवक्ता झा र सचिवालय सदस्य दीपक बोहोरालाई दिइएको छ । आवश्यकताअनुसार पार्टी उपसभापति डा. स्वर्णीम वाग्ले र महामन्त्री कविन्द्र बुर्लाकोटीले उक्त प्रक्रियाको अनुगमन गर्ने बताइएको छ । प्रवासमा रहेका उम्मेद्वारका आकांक्षीहरूको मूल्याङ्कन ‘भर्चुअल’ माध्यमबाट गरिने छ । उम्मेद्वार छनोट समितिको प्रस्ताव तथा पार्टी उपसभापति डोलप्रसाद अर्याल र वाग्लेसँगको सहमतिमा छनोट प्रक्रियामा सहजीकरण गर्न केन्द्रीय समितिका सदस्यहरूसमेत सहभागी गराइने रास्वपाले जनाएको छ ।
लेखकले भने– आयोगमा बयान दिन जान्छु
काठमाडौं । नेपाली कांग्रेसका नेता रमेश लेखकले जाँचबुझ आयोगमा उपस्थित भई बयान दिने बताएका छन् । बिहीबार (आज) बसेको पार्टीको केन्द्रीय कार्यसम्पादन समितिको बैठकपछि सञ्चारकर्मीहरूसँग कुराकानी गर्दै उनले आयोगले बोलाएमा आफू कानुनी प्रक्रियाअनुसार बयान दिन तयार रहेको बताएका हुन् । तत्कालीन केपि ओली सरकारका गृहमन्त्रीसमेत रहेका लेखकले सत्य तथ्य बाहिर ल्याउन जाँचबुझ आयोगसँग पूर्ण रूपमा सहकार्य गर्ने प्रतिबद्धता जनाए । उनले आफूले गरेका निर्णय र कार्यहरू विधिसम्मत रहेको दाबी गर्दै निष्पक्ष छानबिनबाट यथार्थ सार्वजनिक हुने विश्वास व्यक्त गरे । लामो समयदेखी गौरीबहादुर कार्की आयोगमा बयान दिन जान आनाकानी गरेका लेखक अन्तत: बयानका लागि उपस्थित हुने मनस्थितिमा पुगेका हुन् । कांग्रेस केन्द्रीय कार्य सम्पादन समितिको बैठकमा बोल्ने धेरै नेताहरूले बयान दिन जानुपर्ने बताएका थिए ।
निम्बसका २ कम्पनीको एकै वर्ष २० अर्ब नाघ्यो आम्दानी, ६.२९ अर्ब रुपैयाँ ऋण
काठमाडौं । निम्बस ग्रुप अन्तर्गतको प्रोबायोटेक इन्डस्ट्रिज लिमिटेड र निम्बस इन्टरनेशनल कम्पनी प्रालिले एकै वर्ष २० अर्ब रुपैयाँ बढी आम्दानी गरेका छन् । सन् २०२५ मा प्रोबायोटेक इन्डस्ट्रिजले १२ अर्ब ३८ करोड रुपैयाँ र निम्बस इन्टरनेशनलले ८ अर्ब ३ करोड रुपैयाँ गरी २० अर्ब ४१ करोड रुपैयाँ सञ्चालन आम्दानी गरेका हुन् । यस्तै, यी दुई कम्पनीले विभिन्न बैंक तथा वित्तीय संस्थाबाट ६ अर्ब २९ करोड रुपैयाँ बराबर ऋण लिएका छन् । जसमध्ये प्रोबायोटेक इन्डस्ट्रिजले ४ अर्ब ३४ करोड रुपैयाँ र निम्बस इन्टरनेशनलले १ अर्ब ९५ करोड रुपैयाँ ऋण लिएका हुन् । प्रोबायोटेक इन्डस्ट्रिज प्रोबायोटेक इन्डस्ट्रिजले सन् २०२५ मा १२ अर्ब ३८ करोड ३० लाख रुपैयाँ सञ्चालन आम्दानी गरेको छ । यो आम्दानी अघिल्लो वर्षको तुलनामा २४.७२ प्रतिशत अर्थात् २ अर्ब ४५ करोड ५० लाख रुपैयाँ बढी हो । कम्पनीले सन् २०२४ मा ९ अर्ब ९२ करोड ८० लाख रुपैयाँ आम्दानी गरेको थियो । यस्तै, कम्पनीले सन् २०२३ मा ११ अर्ब ४२ करोड १० लाख रुपैयाँ, सन् २०२२ मा १४ अर्ब ९३ करोड २० लाख रुपैयाँ, सन् २०२१ मा ११ अर्ब १० करोड ९० लाख रुपैयाँ सञ्चालन आम्दानी गरेको थियो । सन् २००१ मार्चमा स्थापना भएको प्रोबायोटेक इन्डस्ट्रिज लिमिटेडले सन् २००४ देखि व्यावसायिक उत्पादन थालनी गरेको हो । सन् २०२१ जुलाई १५ मा भने पब्लिक कम्पनीमा रूपान्तरण भएको हो । वीरगञ्ज–२१ मा उत्पादन प्लान्ट रहेको प्रोबायोटेकले पशुको आहार, खाद्य तेल, दाल तथा गेडागुडी उत्पादन तथा प्रशोधन गर्दै आएको छ । साथै, देशभरका डिलरमार्फत व्यञ्जन, शक्ति, शक्ति हाइजीन, सोयम्याक्स, सुनौलो किरण, प्रोविट र प्रोमिन ब्रान्डमा आफ्ना उत्पादन बजारमा बिक्री वितरण गर्दै आएको छ । कम्पनीको कुल उत्पादन क्षमता वार्षिक १ लाख मेट्रिक टनभन्दा बढी रहेको छ । जसमा साढे ६९ हजार मेट्रिक टन भटमास, ४९ हजार मेट्रिक टन खाद्य तेल, २३ हजार मेट्रिक टन पीठो र ३० हजार मेट्रिक टन दाल उत्पादन गर्दै आएको छ । कम्पनीका अनुसार करिब ६२ प्रतिशत आम्दानी फिड सेग्मेन्टबाट हुने गरेको छ भने बाँकी आम्दानी खाद्य (फुड) सेग्मेन्टबाट प्राप्त भएको छ । यसले कम्पनीलाई एउटै व्यवसायमा निर्भर रहनु नपर्ने अवस्था सिर्जना गरेको जनाएको छ । प्रोबायोटेक निम्बस ग्रुप अन्तर्गतको कम्पनी हो । निम्बसको उत्पादन, व्यापारलगायत विभिन्न व्यवसाय क्षेत्रमा लगानी रहेको छ । उद्योगले विभिन्न बैंक तथा वित्तीय संस्थाबाट ४ अर्ब ३४ करोड १० लाख रुपैयाँ ऋण लिएको छ । जसमा ४३ करोड १० लाख रुपैयाँ दीर्घकालीन र ३ अर्ब ९० करोड १० लाख रुपैयाँ अल्पकालीन रहेको कम्पनीले जनाएको छ । निम्बस इन्टरनेशनल यस कम्पनीले सन् २०२५ मा ८ अर्ब ३ करोड ३० लाख रुपैयाँ सञ्चालन आम्दानी गरेको छ । यो आम्दानी अघिल्लो वर्षको तुलनामा ७.४९ प्रतिशत अर्थात् ५६ करोड रुपैयाँ बढी हो । सन् २०२४ मा कम्पनीले ७ अर्ब ४७ करोड ३० लाख रुपैयाँ सञ्चालन आम्दानी गरेको थियो । यस्तै, कम्पनीले सन् २०२१ मा ७ अर्ब २२ करोड ३० लाख रुपैयाँ, सन् २०२२ मा ८ अर्ब ६२ करोड ७० लाख रुपैयाँ र सन् २०२३ मा ७ अर्ब ४ करोड ६० लाख रुपैयाँ सञ्चालन आम्दानी गरेका थिए । सन् २००० मा स्थापना भएको निम्बु इन्टरनेशनल कम्पनी कृषि उत्पादन तथा पशु आहारको आयात र व्यापारमा संलग्न छ । कम्पनीले विभिन्न देशहरूका साथै स्वदेशी किसानहरूबाट खाद्यान्न तथा पशु आहारसम्बन्धी सामग्री खरिद गर्दै आएको छ । निम्बसले खरिद गरिएका वस्तुहरू नेपालभर रहेका आफ्ना डिलर तथा खुद्रा बिक्रेतामार्फत प्रत्यक्ष बिक्री गर्ने गर्दछ । साथै केही वस्तुहरू भने आउटसोर्स्ड कन्ट्र्याक्ट म्यानुफ्याक्चर मार्फत प्रशोधन गरी आफ्नै ब्रान्डमा बजारमा बिक्री गर्छ । कम्पनीको कर्पोरेट कार्यालय सिनामंगल, काठमाडौंमा अवस्थित छ । यस कम्पनीको सम्पूर्ण सेयर स्वामित्व निम्बस होल्डिङ प्रालिको रहेको छ । उक्त होल्डिङ कम्पनीमा आनन्द कुमार अग्रवाल (बगरिया) र जगदीश प्रसाद अग्रवालको समान स्वामित्व रहेको छ । कम्पनीले विभिन्न बैंक तथा वित्तीय संस्थाबाट १ अर्ब ९५ करोड २० लाख रुपैयाँ ऋण लिएको छ ।
‘जे गर्छु नेपालमै गर्छु’ नारासहित राष्ट्रिय घर निर्माण फेस्ट हुँदै, १५० भन्दा बढी स्टलको प्रदर्शनी
काठमाडौं । युवा उद्यमीहरूको समूह र स्कील सेवाको सक्रियतामा आगामी पुस १२ देखि १५ गतेसम्म काठमाडौंको भृकुटीमण्डपमा ‘राष्ट्रिय घर निर्माण फेस्ट २०८२’ आयोजना हुने भएको छ । ‘जे गर्छु नेपालमै गर्छु, जे गरे पनि यही माटोमा गर्छु’ भन्ने मूल नाराका साथ आयोजना हुन लागेको यो मेला केवल प्रदर्शनी मात्र नभएर सुरक्षित र गुणस्तरीय घर निर्माणको एउटा महाअभियान भएको आयोजकले जनाएको छ । बुधवार पत्रकार सम्मेलनको आयोजना गर्दै घर निर्माण फाउन्डेसनका अध्यक्ष उपेन्द्र तिमल्सिना, निर्देशकहरू सफल प्रधान र शक्ताक्षी मिश्रले मेलाको तयारी र यसका उद्देश्यबारे जानकारी दिए । आयोजकका अनुसार मेलामा १५० भन्दा बढी स्टलहरू रहनेछन् । जसमा घर निर्माणका लागि आवश्यक जगदेखि छतसम्मका सामग्रीहरू (सिमेन्ट, डन्डी, पाइप, पेन्ट्स, फर्निचर, इन्टेरियर) एउटै छानामुनि उपलब्ध हुनेछन् । उपभोक्ताले विभिन्न ब्रान्डहरूबीच तुलना गरी सही निर्णय लिन सक्नेछन् । मेलामा विश्वकै सबैभन्दा ठूलो पुस्तक प्रदर्शन गरेर गिनिज बुक अफ वर्ल्ड रेकर्डमा नाम दर्ता गर्ने प्रयाससमेत गरिनेछ । देशका ५० भन्दा बढी इन्जिनियरिङ कलेजका विद्यार्थीहरूले तयार पारेका ६० भन्दा बढी घरका मोडेलहरू प्रतिस्पर्धामा रहनेछन् । उत्कृष्ट तीन मोडेलले क्रमशः १ लाख, ६० हजार र ४० हजार नगद पुरस्कार पाउनेछन् । मेलामा निर्माण क्षेत्रका विज्ञहरूसँग घर निर्माणका चुनौती, प्रविधि र अवसरबारे दैनिक रूपमा छलफल हुनेछ । अध्यक्ष तिमल्सिनाले कमाउने घरको अवधारणा प्रस्तुत गरे । उनका अनुसार १ करोडको लगानीमा बनाइने यस्ता लग्जरी घरबाट दैनिक १५ देखि २० हजारसम्म आम्दानी गर्न सकिन्छ । आधुनिक प्रणालीबाट घरका कोठा वा फ्ल्याट भाडामा दिएर दैनिक आम्दानी गर्ने सकिने मोडल ह्वाइट रुम्स रहेको छ । यस्तै, डोम हाउस जुन ७ देखि १० लाखको लगानीमा बन्ने भूकम्प प्रतिरोधी र इको-फ्रेन्डली घरहरू, जसले महिनामा २ देखि ३ लाखसम्म आम्दानी दिन सक्छन् । आयोजकले यी आम्दानीका आधारहरू वर्तमान बजारको हस्पिटालिटी र डिजिटल प्लेटफर्मको मागलाई हेरेर तय गरिएको बताए । साथै, पुरानो घरलाई पनि नयाँ मोडालिटीमा लैजान सकिने र त्यसका लागि आवश्यक रेनोभेसन र इन्टेरियर सेवाबारे पनि मेलामा विज्ञहरूले परामर्श दिने जानकारी दिइएको छ । निर्देशक सफल प्रधानले देशमा आर्थिक मन्दीको चर्चा भइरहँदा युवाहरूले सामूहिक रूपमा काम गरेर देखाउन यो मेला आयोजना गरेको बताए । मेलामा मुख्य प्रायोजक प्लम्बर पाइप्स र सगुन प्लाइलगायतका स्वदेशी ब्रान्डहरूको बलियो उपस्थिति रहनेछ । सगुन प्लाइका बुद्धिप्रसाद पौडेल र प्लम्बर पाइप्सका सन्जीव धिमालले नेपाली उत्पादनहरू अन्तर्राष्ट्रिय गुणस्तरका रहेको र उपभोक्ताले यस मेलाबाट सही सामग्री छनोट गर्न सक्ने विश्वास व्यक्त गरे । प्रवेश निःशुल्क रहेको यो मेलाले घर बनाउन चाहने साधारण नागरिक, इन्जिनियरिङका विद्यार्थी र लगानीकर्ताहरूका लागि एउटा सुनौलो अवसर प्रदान गर्ने आयोजकको दाबी छ । आयोजकले २ सय करोडको आर्थिक कारोबार हुने अपेक्षा गरेको छ । शिवम् सिमेन्ट पावरर्ड वाई रहेको यस मेलामा प्लम्बर पाइपले मुख्य सहकार्य गरेको छ । यस्तै, सेनेटरी पार्टनरका रुपमा नेपोभिट, युपीभीसी, पञ्चाकन्या मीम्याक्स, प्रोपटी, पार्टनरका रुपमा सारा सेवास्वाती इन्टरप्राइजेज, सोफाहबलगायत रहेका छन् ।
भरतपुर नगर प्रमुख दाहाललाई चितवन–३ बाट प्रत्यक्ष उम्मेदवार बनाउन नेकपाको सिफारिस
काठमाडौं । नेपाली कम्युनिस्ट पार्टी (नेकपा)ले भरतपुर महानगरपालिकाकी प्रमुख रेनु दाहाललाई चितवन निर्वाचन क्षेत्र नं ३ बाट आगामी निर्वाचनका लागि प्रत्यक्षतर्फको उम्मेदवारका रूपमा सर्वसम्मत सिफारिस गरेको छ । पार्टीको चितवन क्षेत्र नं ३ क्षेत्रीय कमिटीको जगतपुरमा बसेको बैठकले दाहाललाई उम्मेदवार बनाउने निर्णय गरेको हो । बैठकमा सहभागी नेताहरूले दाहालको कार्यकालमा भरतपुर महानगरपालिकामा भएका विकास निर्माणका काम, सेवा प्रवाहमा आएको सुधार तथा पार्टी संगठन सुदृढीकरणमा खेलेको भूमिकाको सकारात्मक मूल्याङ्कन गर्दै उनलाई उम्मेदवारका रूपमा अघि सारेको बताएका छन्। पार्टी स्रोतका अनुसार क्षेत्रीय समितिबाट सिफारिस गरिएको नाम केन्द्रमा पठाइनेछ । उम्मेदवारीसम्बन्धी अन्तिम निर्णय भने नेकपाको केन्द्रीय कमिटीले गर्नेछ ।
एनआईसी एशिया बैंकका नवनियुक्त अध्यक्ष अग्रवालले लिए सपथ
काठमाडौं । एनआईसी एशिया बैंकका नवनियुक्त अध्यक्ष अशोककुमार अग्रवालले शपथ लिएका छन् ।बिहीबार अध्यक्ष अग्रवालले नेपाल राष्ट्र बैंकका गर्भनर प्रा. डा. विश्वनाथ पौडेल समक्ष पद तथा गोपनीयताको शपथ लिएका हुन् । बैंक तथा वित्तीय क्षेत्रमा लामो अनुभव संगालेका अग्रवाल एनआईसी एशिया बैंकको अध्यक्ष पदमा नियुक्त भएका हुन् । पुस ९ गते बसेको बैंकको सञ्चालक समितिको ७४४औँ बैठकले आजकै मितिदेखि लागू हुने गरी उनलाई अध्यक्ष पदमा नियुक्त गर्ने निर्णय गरेको थियो । बैंकको अध्यक्षजस्तो गरिमामय पदमा नियुक्त अग्रवालले नेपालको बैंक तथा वित्तीय क्षेत्र, बीमा तथा कर्पोरेट क्षेत्रमा लामो समयदेखि कार्यअनुभव हासिल गर्दै सफल नेतृत्व प्रदान गर्दै आएका छन् । उनले मुलुकको आर्थिक विकासमा समेत महत्वपूर्ण योगदान पुर्याउँदै आएका छन् । उच्च नेतृत्वदायी क्षमता, दूरदृष्टि र स्पष्ट रणनीतिका साथ दीर्घकालीन योजनामा विश्वास राख्ने अग्रवालको कार्यकालमा बैंकले महत्वपूर्ण उपलब्धिहरू हासिल गर्ने तथा संस्थालाई सफलताको थप उचाइमा पुर्याउँदै प्रतिष्ठाको नयाँ शिखरमा लैजाने विश्वास बैंकले व्यक्त गरेको छ ।
सर्वसम्मत भएनन् चन्द्र भण्डारी, गुल्मी– १ बाट सातजना सिफारिस
काठमाडौं । नेपाली कांग्रेसका नेता चन्द्र भण्डारी फागुन २१ मा हुने निर्वाचनका लागि प्रत्यक्षतर्फ सर्वसम्मत सिफारिस हुन सकेनन् । गुल्मी क्षेत्र नम्बर १ का सचिव मार्कण्ड भण्डारीका अनुसार नेपाली कांग्रेस केन्द्रीय कार्यसमितिको निर्देशनअनुसार भएको क्षेत्रीय कार्यसमितिको बैठकमा आकाङ्क्षीहरू स्वयं आफै र वारेसमार्फत उपस्थित भएका थिए । उमेदवार हुनका लागि आकाङ्क्षा राखेकाहरूको नाम सङ्कलन गरिएको छ । प्रत्यक्षतर्फ डा. चन्द्रकान्त भण्डारी, श्रीप्रसाद भलामी, भरत बस्नेत, अमृत ज्ञवाली, रवि ज्ञवाली, राधिका न्यौपाने र धनकुमारी रानाले इच्छा देखाउएको भण्डारीले जानकारी दिए । त्यसैगरी, समानुपातिकतर्फ उम्मेदवार बन्नका लागि झकबहादुर पुन, भानुभक्त सुवेदी, मीना भण्डारी, गङ्गा पाण्डे, निर्मला सुवेदी र भगवती काफ्ले भण्डारीले इच्छा देखाएको भण्डारीले जानकारी दिए ।
वस्तेलीले गरे रूपन्देहीमा रक्तदान
काठमाडौं । गुल्मी धुर्कोट वस्तु रूपन्देही सम्पर्क समाजको आयोजनामा रक्तदान कार्यक्रम सफलतापूर्वक सम्पन्न भएको छ । समाजले सामाजिक उत्तरदायित्व र मानवीय सेवाको भावनालाई आत्मसात् गर्दै आयोजना गरेको उक्त कार्यक्रममा विभिन्न क्षेत्रका व्यक्तित्वहरूको उल्लेखनीय सहभागिता रहेको थियो । रक्तदान कार्यक्रममा वस्तुबाट रूपन्देहीमा बस्नेहरूको बाक्लो उपस्थितिमा रक्तदान गरिएको समाजका सचिव भानुभक्त पाण्डेले जानकारी दिए । रक्तदान कार्यक्रमलाई सहज र व्यवस्थित बनाउन चिया–नास्ता तथा खाना व्यवस्थापन गर्ने स्वयंसेवकहरू, टेन्ट, कुर्सी तथा साउन्ड सिस्टमको व्यवस्थापनमा सहयोग गर्ने सबै सहयोगीहरूप्रति समाजले उच्च सम्मान र आभार व्यक्त गरेको सदस्य जीवलाल भण्डारीले बताए । समाजका कार्यक्रम सफल बनाउन प्रत्यक्ष वा अप्रत्यक्ष रूपमा योगदान गर्ने सम्पूर्णको भूमिकाको समाजले खुलेर प्रशंसा गरेको छ। उक्त कार्यक्रममा जम्मा ५३ जना रक्तदाताहरूले रक्तदान गरी मानवीय सेवामा महत्वपूर्ण योगदान पुर्याएका छन् । जीवन बचाउने यस पवित्र कार्यमा सहभागी सबै रक्तदाताहरूलाई समाजले विशेष सम्मान गर्दै धन्यवाद ज्ञापन गरेको छ । रक्तदानजस्तो पुण्य कार्यले आपत्कालीन अवस्थामा रहेका बिरामीहरूको जीवन रक्षा गर्न ठूलो सहयोग पुग्ने विश्वास समाजले व्यक्त गरेको छ ।
