माछापुच्छ्रे बैंकद्धारा तनहुँमा निःशुल्क आँखा शिविर सम्पन्न
काठमाडौं । माछापुच्छ्रे बैंक लिमिटेडले संस्थागत सामाजिक उत्तरदायित्व अन्तर्गत मंगलबार तनहुँको देवघाटमा बृहत निःशुल्क आँखा शिविर सम्पन्न गरेको छ । उक्त स्वास्थ्य शिविर मार्फत १६३ भन्दा बढी बिरामीको आँखा परिक्षण गराइएको थियो । ४९ जना बिरामीलाई निःशुल्क चस्मा वितरण गरीएको उक्त कार्यक्रममा बिभिन्न आवश्यक औषधी समेत निःशुल्क वितरण गरीएको थियो । त्यसैगरी, उक्त शिविर मार्फत छानिएका १२ जना विरामीको भरतपुर आँखा अस्पतालमा निःशुल्क (मोतियाबिन्दु) पनि गरीएको थियो । यस बैंकले नेपाल अधिराज्यभर छरिएर रहेका आफ्ना शाखा कार्यालयहरु मार्फत देशको सामाजिक, आर्थिक, शैक्षिक तथा खेलकुद लगायतका क्षेत्रको बिकासमा उल्लेख्य योगदान गर्दै आएको छ । साथै भविष्यमा पनि यस्ता कार्यक्रमहरु जारी रहने जनाएको छ । ६ अर्ब ५९ करोड ८७ लाख रुपैयाँ चुक्ता पूँजी रहेको यस बैंकले २०७३ साल चैत्रमसान्त सम्ममा ५८ अर्ब ४८ लाख रुपैयाँ निक्षेप परिचालन गरी ५३ अर्ब ५८ लाख रुपैयाँ कर्जा प्रवाह गरेको छ । साथै, बैंकले सो अवधिमा १ अर्व ५१ लाख रुपैयाँ खुद मुनाफा आर्जन गरेको छ ।
महालक्ष्मी विकास बैंकका अध्यक्ष राजेश उपाध्यायद्धारा शपथ ग्रहण
काठमाडौं । महालक्ष्मी विकास बैंक लिमिटेडका नवनियुक्त अध्यक्ष राजेश उपाध्यायले मंगलबार नेपाल राष्ट्र बैंकका डेपुटी गभर्नर चिन्तामणी शिवाकोटी समक्ष पद तथा गोपनियताको शपथ ग्रहण गरेका छन् । हालै लागु भएको बैंक तथा वित्तीय संस्था सम्बन्धी ऐन २०७३ मा बैंक तथा वित्तीय संस्थाका अध्यक्षले नेपाल राष्ट्र बैंक समक्ष शपथ ग्रहण गर्नु पर्ने व्यवस्था रहेको छ । यति डेभलपमेन्ट बैंक लिमिटेड तथा महालक्ष्मी विकास बैंक लिमिटेड एक आपसमा गाभिए पश्चात बनेको राष्ट्रिय स्तरको महालक्ष्मी विकास बैंक लिमिटेडमा नयाँ संचालक समितिको गठन भएको हो । मर्जर पश्चात बैंकको चुक्ता पूँजी २ अर्ब ६३ करोड रुपैयाँ पुगेको छ । साथै, निक्षेप २४ अर्ब २१ करोड रुपैयाँ र कर्जा सापट २० अर्ब २६ करोड रुपैयाँ पुगेको छ ।
सिद्धार्थ डेभलपमेण्ट बैंकको ३९औं शाखा हेटौंडामा
काठमाडौं । सिद्धार्थ डेभलपमेण्ट बैंक लिमिटेडले आफ्नो ३९औँ शाखा हेटौंडामा विस्तार गरेको छ । नवनिर्मित शाखाको उद्घाटन कार्यक्रमका प्रमुख अतिथि हेटौंडा उपमहानगरपालिकाका नवनिर्वाचित मेयर हरिबहादुर महतले गरेका हुन् ।सो अवसरमा महतले बैंक तथा वित्तीय संस्थाहरुले बैकिङ्ग सेवालाई शहरमामात्र केन्द्रित नगरी ग्रामिण तथा सुदुर क्षेत्रका स्थानीय तहहरुमा विस्तार गर्नु पर्ने आजको आवश्यक्ता भएको बताए । कार्यक्रममा बैंकका अध्यक्ष रामबहादुर भण्डारीले सो शाखामा जडान गरिएको एटिएम मेशिनको उद्घाटन गर्दै डेभलपमेण्ट बैंकको जनता बैंक नेपालसँग एक्विजिशन सम्बन्धी प्रकृया टुंगिन लागेको जानकारी दिए । दुई सवल बैंकहरुको एकिकृत कारोबारबाट उच्चस्तरको बैकिङ्ग सेवा अभिबृद्विका लागि सहयोग पुग्ने बताए । सिद्धार्थ डेभलपमेण्ट बैंक जनता बैंक नेपाललिसँग एक्विजिशन हुने अन्तिम चरणमा रहेको छ । उक्त एक्विजिशन पश्चात जनता बैंक नेपालका ११३ वटा शाखाहरुबाट बैकिङ्ग सेवा सुविधा प्राप्त गर्न सकिने बैंकले जनाएको छ ।
नेप्सेमा एकै दिन एक करोड ९६ लाख कित्ता सेयर सूचिकृत, सबैभन्दा बढी हकप्रद सेयर
काठमाडौं । नेपाल स्टक एक्स्चेञ्जमा एकै दिन एक करोड ९६ लाख ६० हजार ९५२ कित्ता सेयर सूचिकृत भएको छ । मंगलबार मात्रै ६ वटा कम्पनीको बोनस र हकप्रद सेयर गरी सो मात्राको सेयर सूचिकृत भएको हो । सो दिन सबैभन्दा बढी हकप्रद सेयर सूचिकृत भएको छ । बजारमा एक करोड ८४ लाख ४७ हजार ५३६ कित्ता हकप्रद सेयर सूचिकृत भएको छ भने १२ लाख १३ हजार ४१६ कित्ता बोनस सेयर सूचिकृत भएको छ । मंगलबार ज्योति विकास बैंकको ७६ लाख ६५ हजार ६६३ कित्ता, गरिमा विकास बैंकको ८७ लाख ३० हजार ३७८ कित्ता र प्रभु इन्स्योरेन्सको १९ हजार २५ हजार ७८ कित्ता हकप्रद सेयर थपिएको छ । त्यस्तै, नागबेली लघुवित्त विकास बैंकको एक लाख २६ हजार ४१७ कित्ता हकप्रद र एक लाख ५० हजार कित्ता बोनस सेयर थपिएको छ । महालक्ष्मी विकास बैंकको ९ लाख १३ हजार ४१६ कित्ता र आरएसडीसी लघुवित्त वित्तीय संस्थाको १ लाख ५० हजार कित्ता बोनस सेयर सूचिकृत भएको छ ।
नेप्सेको हाकिम बन्न आधा दर्जनको प्रतिष्पर्धा, कस्ले पाउँछ १८ खर्बको नेतृत्व ?
काठमाडौं । नेपाल स्टक एक्सचेञ्ज(नेप्से)का महाप्रबन्धक सिताराम थपलियाको कार्यकाल असार २२ गते सकिँदैछ । १८ खर्ब भन्दा बढि सेयर क्यापिटलाइजेशन भएको नेपाली पुँजी बजारको फ्रन्टलाइन रेगुलेटशन गर्ने निकायका रुपमा रहेको नेप्सेको नेतृत्वका लागि करिब एक दर्जन व्यक्तिहरु प्रतिष्पर्धामा छन् । त्यसो त थपलिया आफैं पनि कार्यकाल दोहोर्याउने अभियानमा छन् । श्रोतका अनुसार थपलिया बाहेक नेप्सेको जीएम बन्न नेपाल राष्ट्र बैंकका पुर्व कार्यकारी निर्देशक शिवनाथ पाण्डे पनि लागिपरेका छन् । त्यस बाहेक, एनआइबीएल क्यापिटका विनोद प्याकुरेल, ज्योति विकास बैंकका डेप्युटी सिईओ मनोज ज्ञवाली, चाटर्ड एकाउण्टेण्ट प्रकाश लम्साल र भोला पाण्डे लगायतले लबिङ तिब्र पारेका छन् । नेपाल धितोपत्र बोर्ड र नेप्सेका बिचमा यतिबेला सम्बन्ध बिग्रिएको छ तर त्यस्तो सम्बन्ध संस्थागत नभएर व्यक्तिगत मात्रै हो । बोर्डका अध्यक्ष डा. रेवत बहादुर कार्की र नेप्सेका महाप्रबन्धक सिताराम थपलियाको व्यक्तिगत इगोका कारण दुई नियामक बिच सम्बन्ध बिग्रिएको हो । यी दुबैलाई नेपाली काँग्रेसको सिफारिसमा नियुक्त गरिएको थियो । यतिबेला पनि काँग्रेसकै नेतृत्वमा सरकार रहेकाले थपलियाले दोश्रो कार्यकाल थप्ने अपेक्षा गरेका छन् । तर बोर्डका अध्यक्ष कार्की र अर्थमन्त्री ज्ञानेन्द्र बहादुर कार्कीको नजिकको सम्बन्धका कारण थपलियाको योजना सफल हुनेमा आंशका उब्जिएको छ । श्रोतका अनुसार बोर्डका अध्यक्ष कार्कीलाई रिजाउन सक्ने व्यक्ति मात्रै यतिबेला नेप्सेको महाप्रबन्धक बन्न सक्नेछ ।
तेश्रो वार्षिकोत्सवको अवसरमा नेशनल माइक्रोफाइनान्सद्धारा बालबालिकालाई सहयोग
काठमाडौं । नेशनल माइक्रोफाइनान्स वित्तीय संस्था लिमिटेडले आफ्नो तेश्रो वार्षिकोत्सवको अवसरमा अनाथ र असहाय बालबालिकालाई सहयोग गरेको छ । उक्त अवस्थामा संस्थाले ४० जना बालबालिकालाई शैक्षिक सामाग्री वितरण गरेको छ । संस्थाले सो अवसरमा विभिन्न जिल्लाहरुमा रहेका शाखाहरुबाट बित्तीय साक्षरता कार्यक्रमको आयोजना पनि गरेको थियो । संचालनको तेश्रो वर्ष पुरा गरी चौथो वर्षमा प्रवेश गरेको उक्त संस्थाले हाल सम्ममा १९ वटा जिल्लामा ३१ वटा शाखा कार्यालयहरु बिस्तार गरेको छ । साथै, संस्थाले आफ्नो सेवा पूर्याउनको लागी थप शाखा बिस्तार गर्दै क्रमशः ७५ वटै जिल्लामा संस्थाको पहूंच पूर्याउने लक्ष्य राखेको संस्थाका प्रमूख कार्यकारी अधिकृत रामबहादूर यादवले बताए ।
गोठाले किसानहरुलाई मालिक बनाउन ८ अर्ब ऋण प्रस्ताव
काठमाडौं । पशुपंछी विकास मन्त्रालयले ‘लाइभस्टक इनोभेसन पोजेक्ट’ सञ्चालन गर्ने तयारी गरेको छ । करिव आठ अर्ब रुपैयाँका लगानीमा मन्त्रालयले सो कार्यक्रम सञ्चालन गर्ने प्रस्ताव अघि सारेको हो । पशुपन्छीको व्यवसायीकरण गरी एक नाफामूलक व्यवसायको रुपमा विकास गर्न सो प्राजेक्ट अघि सारिएको मन्त्रालयका प्रवक्ता श्यामप्रसाद पौडेलले जानकारी दिए । ‘यो परियोजनाले देशलाई आत्मनिर्भर बनाउन सघाउँछ,’उनले भने ‘दुध, डेरी, मासु तथा च्यांग्रा पश्मिनाको उत्पादन तथा प्रशोधनमा परियोजनामा केन्द्रीत हुनेछ । साथै पशुपन्छी सम्बन्धि समय सापेक्ष नीति नियम तर्जुमा गर्न, अत्याधुनिक प्रयोगशाला निर्माण गर्न, खोप तथा उन्नत नश्ल सुधारका परियोजना सञ्चालन गर्न उक्त रकम खर्च गर्ने मन्त्रालयको योजना छ । गुणस्तर खाद्य स्वच्छतालाई ध्यानमा राखेर कार्यक्रमहरू प्रर्वद्धित हुनेछन् । च्यांग्रा पश्मिना उत्पादन बढाउन तथा प्रशोधन गर्न प्राय सबै हिमाली जिल्लाहरूमा परियोजना लागू गर्ने बताइएको छ । साथै १० वर्षे कृषि रणनीतिमा पशुपंछी मन्त्रालयअन्र्गत परेका कार्यक्रमहरूलाई कार्यान्वयनमा लैजान पनि मन्त्रालयलाई ठूलो रकमको आवश्कता पर्ने उनको भनाइ छ । उक्त कार्यक्रम सञ्चालनका लागि मन्त्रालयले विश्व बैंकसँग ऋण सहयोग माग गरिदिन अर्थ मन्त्रालयसँग अनुरोध गरेको छ । परियोजनाको प्रस्तावना फाइल अर्थ मन्त्रालय आएपछि अर्थले ऋण सहयोगका लागि फाइल अघि बढाउने छ । सरकार ग्यारेन्टी बसेर ऋण सहयोगका लागि अर्थ मन्त्रालयले फाइल अघि बढाउने हो,’ अर्थ मन्त्रालयका अन्तर्राष्ट्रिय आर्थिक सहायता समन्वय महाशाखाका उपसचिव सूर्यप्रसाद पोखरेलले भने । कार्यक्रम गर्नका लागि ऋण सहयोग उपलब्ध गराउन हामी विश्व बैंकसँग आग्रह गछौं । किसानहरुलाई पशुपालनतर्फ आकर्षित गरी व्यवसायिकरण र बजारीकरण गर्न उक्त कार्यक्रम अघि सारिएको हो । मन्त्रालयले यस अघिनै ४० बुँदे घोषणा पत्र जारी गरेर किसानहरुलाई गोठाले नबनाएर मालिक बनाउन प्रतिवद्धता जाहेर गरिसकेको छ । गोठदेखि ओठसम्म स्वस्थता सवाललाई उठाएर मन्त्रालयले पैसा तिरेर उपभोग गर्ने पशुजन्य उत्पादन स्वस्छ र स्वस्थ हुनु पर्ने बताएको छ । आगामी तीन वर्षभित्र मुलुकलाई अण्डा, मासु र दूधमा आत्मनिर्भर बनाउने योजना अघि सारेको छ । पशुपंछीजन्य पदार्थको आयात प्रतिस्थापन गरी उत्पादनमा आत्मनिर्भर बनाउने लक्ष्य मन्त्रालयले लिएकोे हो । अण्डा, मासु र दूधमा क्रमशः एक, दुई र तीन वर्षभित्र आयात प्रतिस्थापन गरी आत्मनिर्भर बनाउन मन्त्रालयले आगामी आर्थिक वर्षमा विशेष कार्यक्रम ल्याउने जनाएको छ । त्यस्तै पशुपन्छी मन्त्रालयले एक प्रदेश, एक नमुना पशु अस्पताल निर्माण गर्ने भएको छ । पशुपन्क्षी नश्ल सुधार, पौष्टिक दाना, आहाराको व्यवस्था सरल बनाउनुको साथै एकीकृतरुपमा अगाडी बढाउने कार्यक्रम तर्जुमा गर्ने जनाइएको छ ।
सडक विस्तारमा क्षतिपुर्ति बढ्दै, तीन महिनामा राजधानीका सबै सडक कालोपत्रे
काठमाडौं । काठमाडौं उपत्यकामा सडक विस्तारको चपेटामा परेका स्थानीयहरुको क्षतिपुर्ति रकम बढ्ने भएको छ । आगामी आर्थिक बर्षदेखि लागु हुने गरि सडक विस्तारका क्रममा भत्काइने भौतिक संरचनाको क्षतिपुर्ति रकम वृद्धि गर्न लागिएको हो । ‘आगामी आर्थिक बर्षदेखि उपत्यकामा सडक विस्तारका क्रममा भत्काइने भौतिक संरचनाको क्षतिपुर्ति रकममा वृद्धि हुन्छ’, काठमाडौं उपत्यका विकास प्राधिकरणका विकास आयुक्त भाइकाजी तिवारीले भने । व्यवस्थापिका संसदको विकास समितिमा आयोजीत छललफलमा सहभागी भएका तिवारीले भत्किएका संरचनाको पुननिर्माणका लागि पुग्ने गरि क्षतिपुर्ति दिने बताएका हुन् । ‘सडक विस्तारमा आधा घर भत्किँदा त्यसलाई टाल्न पुग्ने गरि क्षतिपुर्ति दिनुपर्छ भन्ने नागरिकको माग छ, हामीले पनि त्यसै गरि क्षतिपुर्ति बढाउने तयारी गरेका छौं’, तिवारीले भने । उनले सडक विस्तारका क्रममा पुर्णरुपले विस्थापित हुनेहरुलाई पुनर्वास वा उचित क्षतिपुर्ति र मुआब्जा दिने पनि बताए । ‘सडक विस्तारबाट नागरिक सुकुम्बासी बन्ने अवस्था आयो भने मुआब्जा, क्षतिपुर्ति वा पुनर्बासको व्यवस्था हुन्छ’, तिवारीले भने । विकास समितिका सभापति रबिन्द्र अधिकारीले पनि पुर्णरुपमा विस्थापित हुने नागरिकको पुनर्बासका लागि सडक जमिन खोज्नुपर्ने बताएका थिए । हालसम्म उपत्यकामा ३५० किलोमिटर सडक विस्तार भैसकेको छ । ३ महिनाभित्रै सबै सडक कालोपत्रे विकास समितिले आगामी तीन महिना भित्रै उपत्यकामा बिभिन्न प्रयोजनका लागि भत्काइएका सडक कालोपत्रे गरिसक्न निर्देशन दिएको छ । ‘समितिको यो बैठक उपत्यकाभित्रका सडकहरुलाई तत्काल स्तरोन्नति गर्न, मापदण्ड अनुसार सडकको चौडाई तत्काल विस्तार गर्न, आगामी दिनमा बिजुलीका तारहरुलाई युटिलिटिटनेल अन्तर्गत अन्डर ग्राउन्ड गर्न र सडकहरुलाई तीन महिना भित्र दुरुस्त अवस्थामा राखिसक्ने व्यवस्था मिलाउन भौतिकपूर्वाधार तथा यातायात मन्त्रालय, उपत्यका विकास प्राधिकरण, सडक विभाग, काठमाडौँ महानगरपालिकालाई र नेपाल विद्युत प्राधिकरणलाई निर्देश गर्दछ ।’, समितिले भनेको छ । हाल उपत्यका १५९४ दशमलब ६७ किलोमिटर सडक रहेको छ । त्यसमा ९ लाख ६३ हजार ५ सय भन्दाबढी सवारी साधन गुड्ने गरेका छन् । उपत्यकामा कुल जमिनको ७ दशमलब ५ प्रतिशत मात्रै सडकले ओगटेको छ ।
