७ महिनाको सरकारी कमाई ३८५ अर्ब, बजेट घाटा ७० अर्ब ६९ करोड
काठमाडौं । चालु आर्थिक वर्षको ७ महिनामा लक्ष्यको झण्डै ५३ प्रतिशत राजश्व संकलन भएको छ । चालु आवको माघसम्म सरकारले ३ खर्ब ८५ अर्ब १९ करोड रुपैयाँ राजश्व संकलन गरेको छ । सरकारले चालु आवमा ७ खर्ब ३० अर्ब ५ करोड रुपैयाँ राजश्व संकलन गर्ने लक्ष्य राखेको छ । ७ महिनामा लक्ष्यको आधा भन्दा ३ प्रतिशत बढी राजश्व संकलन गरेको छ । ७ महिनामा सरकारले कुल बजेटको ३५.६४ प्रतिशत खर्च गरेको महालेखा नियन्त्रकको कार्यालयले जनाएको छ । कार्यालयकाअनुसार माघसम्म सरकारले ४ खर्ब ५५ अर्ब ८८ करोड रुपैयाँ बजेट खर्च गरेको छ । चालु आवमा सरकारले १२ खर्ब ७९ अर्ब ९९ करोड रुपैयाँ खर्च गर्ने लक्ष्य लिएको छ । यसमध्ये चालुखर्च ४५.३८ प्रतिशत भएको छ । गत माघसम्म ३ खर्ब ६४ अर्ब ६३ करोड रुपैयाँ चालु खर्च भएको छ । सरकारले चालु आवमा ८ खर्ब ३ अर्ब ५३ करोड रुपैयाँ चालु खर्चका लागि बजेट विनियोजन गरेको छ । यस्तै विकास खर्च २० प्रतिशत नजिक पुगेको छ । चालु आवमा सरकारले ६६ अर्ब १९ करोड रुपैयाँ विकास खर्च गरेको छ । चालु आवमा सरकारले ३ खर्ब ३५ अर्ब १७ करोड रुपैयाँ विनियोजन गरिएको छ । वित्तीय व्यवस्थापनमा विनियोजन गरिएको मध्ये १७.८६ प्रतिशत खर्च भएको छ । यसअन्र्तगत हालसम्म २५ अर्ब ५ करोड रुपैयाँ खर्च भएको महालेखाले जनाएको छ । राजश्व संकलन र खर्चको तुलनामा सरकारको वजेट घाटा ७० अर्ब ६९ करोड १२ लाख रुपैयाँ छ ।
आधा दर्जन गाडी बिक्रेताको फाइल ‘सरकारी वकिलको टेबुलमा’
काठमाडौं । आपूर्ति व्यवस्थापन तथा उपभोक्ता हित संरक्षण विभागमा अनुसन्धान भइरहेको विभिन्न १२ विभिन्न ठूला गाडी बिक्रेता कम्पनीमध्ये ६ कम्पनीको फाइल जिल्ला सरकारी वकिल कार्यालय काठमाडौंमा जाहेर गरिएको छ । इस्टर्न एजेन्सी प्रालि, जिओ अटो मोबाइल्स, कन्टीनेन्टल ट्रेडिङ प्रालि, एड्भान्स्ड अटोमोबाइल्स प्रालि लगायतको फाइल जाहेर गरिएको छ । विभागका शाखा अधिकृत राजेशकाजी श्रेष्ठले उक्त कम्पनीहरुका फाइलहरु बुधबार मुद्वाअगाडी बढाउने उद्धेश्यले राय सुझाबको लागि सरकारी वकिल समक्ष जाहेर गरिएको बताए । ‘उनीहरुबाट विभागले कुन मुद्वा, कसरी लिएर अघि बढ्ने राय सुझाब मिल्ने छ,’ उनले भने । उनका अनुसार विभागले केही हप्तादेखि एक दर्जन गाडी बिक्रेता कम्पनीहले बढी मूल्य लिएको आशंकामा अध्ययन भइरहेको थियो । जसबाट ६ कम्पनीको फाइल वकिलसमक्ष जाहेर गर्ने सोमबार विभागले निर्णय गरेको थियो । कम्पनीहरुले गाडी बिक्री गर्दा २० प्रतिशतभन्दा बढी नाफा लिएको अध्यनको निचोड निस्किएपछि फाइल जाहेर गरिएको हो । त्यस्तै विभागका निर्देशक लक्ष्मण श्रेष्ठले ती कम्पनीहरुलाई हदैसम्मको कार्बाही गर्नको लागि दरिलो आधार बनाउन पनि सरकारी वकिलको रायसुझाब अवश्यक हुने भएकोले विभागले जिल्ला सरकारी वकिल कार्यालय काठमाडौंमा फाइल बुझाएको बताए । ‘वकिलहरुको राय सुझाब आएपछि कार्बाहीको प्रक्रियामा विभाग अघि बढ्ने छ,’ उनले भने । महिनादिनअघि मात्रै विभागले मारुती कारको आधिकारीक बिक्रेता अरुण इन्टरकन्टिनेन्टल टेडर्स र महिन्द्रा स्कोर्पियाको आधिकारीक बिक्रेता अग्नी इन्कपोरेटेडले विभिन्न शिर्षकमा गाडी बिक्री गर्ने क्रममा बढी मूल्य लिएको भन्दै महनागर प्रहरी परिसर टेकुमा फाइल बुझाएको थियो ।
३८ औं राष्ट्रिय शिक्षा दिवस: मनमोहन मेमोरियल इन्ष्टिच्यूट उत्कृष्ट
काठमाडौं । ३८ औं राष्ट्रिय शिक्षा दिवसको अवसरमा मनमोहन मेमोरियल इन्ष्टिच्यूट अफ हेल्थ साइन्सेज सोल्टिमोडलाई सम्मान गरिएको छ । अन्तर्राष्ट्रिय साक्षरता दिवसको अवसरमा आयोजित एक कार्यक्रममा प्राविधिक शिक्षा तथा व्यवसायिकतर्फ उत्कृष्ट नतिजा निकालेको भन्दै पुरस्कृत गरिएको हो । कार्यक्रममा शिक्षामन्त्री गोपलमान श्रेष्ठले कलेजका उपाध्यक्ष जीवन प्रकाश शर्मालाइ नगद पुरस्कार तथा प्रमाण पत्र प्रदान गरेका हुन् । कलेजले उत्कृष्ट शिक्षालयको रुपमा सम्मानित गर्ने शिक्षामन्त्रालय तथा सम्मानजनक परिणामको लागि महत्वपूर्ण भूमिकानिर्वाह गर्ने नेको नेपाल, कलेज व्यवस्थापन समिति, शिक्षक तथा कर्मचारी तथा देशीविदेशी शुभेच्छुकहरुलाई धन्यवाद दिएको छ ।
१४ वटा निर्जीबन बीमा कम्पनीको नाफा एक अर्ब २८ करोड, कसको कति(सूचिसहित)
काठमाडौं । १४ वटा निर्जीबन बीमा कम्पनीहरुले ६ महिनामा एक अर्ब २८ करोड ८२ लाख रुपैंयाँ नाफा कमाएका छन् । हालसम्म वित्तिय विवरण सार्वजनिक गरेका १४ कम्पनीले २०७४ पुस मसान्त अवधीमा २३ करोड ४८ लाख नाफा बढाएर एक अर्ब २८ करोड ८२ लाख पुर्याएका हुन् । २०७३ पुस मसान्तमा यीनै कम्पनीहरुको नाफा एक अर्ब ५ करोड ३४ लाख रुपैंयाँ थियो । १४ कम्पनीमध्ये पनि राष्ट्रिय बीमा कम्पनीले सर्वाधिक ३७ करोड २५ लाख नाफा कमाएको छ । तर कम्पनीले आफ्नो व्यवसायबाट भने सो नाफा आर्जन गरेको होइन् । नविल बैंक र नेपाल इन्भेष्टमेन्ट बैंकले नगद लाभांश बाँढेकाले कम्पनीको नाफा बढेको हो । यी दुबै बैंकमा कम्पनीको सेयर रहेको छ । दोश्रो स्थानमा रहेको शिखर इन्स्योरेन्सले १९ करोेड ६६ लाख र तेश्रो स्थानको नेको इन्स्योरेन्स कम्पनीले ११ करोड ६५ लाख नाफा कमाउन सफल भएको छ । सिद्धार्थ इन्स्योरेन्सले ८ करोड ७८ लाख, लुम्बिनी जनरल इन्स्योरेन्सले ८ करोड ४२ लाख, एनएलजीले ७ करोड ८५ लाख, सगरमाथाले ७ करोड २ लाख नाफा कमाएका छन् । थोरै नाफा कमाउने इन्स्योरेन्स कम्पनीमा भने प्रभु परेको छ, उसले जम्मा एक करोड २९ लाख मात्रै नाफा आर्जन गरेको देखिन्छ ।
सञ्चालनमा आएको ३ महिनामा सन नेपाल लाइफ इन्स्योरेन्सले गर्यो ८ करोड १० लाख नाफा
काठमाडौं । सन नेपाल लाइफ इन्स्योरेन्स कम्पनी लिमिटेडले ३ महिनामा ८ करोड १० लाख रुपैयाँ नाफा गरेको छ । गत असोज ६ गतेबाट जीवन बीमा व्यवसाय सुरु गरेको कम्पनीले ३ महिनामा राम्रो प्रगति गरेको छ । समीक्षा अवधिमा कम्पनीले ३ हजार ५२ बीमालेख बेचेर १० अर्ब २७ करोड रुपैयाँ बीमा शुल्क आर्जन गरेको उल्लेख छ । यस्तै कम्पनीको प्रथम वार्षिक साधारणसभा आउदो शुक्रबार हुने भएको छ ।
वैदेशिक रोजगार वचतपत्रको बिहीबारदेखि बिक्री खुला, १० प्रतिशत ब्याज पाइने
काठमाडौं । नेपाल राष्ट्र बैंकले वैदेशिक रोजगार वचतपत्र बिक्रीका लागि १३ बैंक तथा वित्तीय संस्थालाई तोकेको छ । राष्ट्र बैंकले सिटिजन्स बैंक, माछापुच्छे बैंक, सिद्धार्थ बैंक, एनएमबी बैंक, प्रभु बैंक, सानिमा बैंक, नविल बैंक, सनराईज बैंक र सेञ्चुरी कमर्शियल बैंकलाई तोकेको छ । यस्तै प्रभु मनी ट्रान्सफर, सेवा रेमिट, आईएमई लिमिटेड र सिटी एक्सप्रेस मनि ट्रान्सफरलाई पनि वचतपत्र बिक्रीको एजेन्ट नियुक्त गरेको राष्ट्र बैंकले जनाएको छ । बिहीबारदेखि २५ करोड रुपैयाँको वैदेशिक रोजगार वचतपत्रको बिक्री खुला गर्दैछ । बचतपत्रको बिक्री फागुन २३ गतेसम्म तोकिएको छ । वार्षिक १० प्रतिशत ब्याज पाइने, ६ महिनामा ब्याज भुत्तानी हुने, ५ वर्षमा साँवा फिर्ता र वचतपत्र बैंक तथा वित्तीय संस्थामा धितो राखी कर्जा लिन पनि सकिने व्यवस्था रहेको छ । वचतपत्र रोजगारीका शिलसिलामा मुलुक बाहिर गएका र रोजगारीबाट फर्किएको ४ महिना नपुगेका नेपाली नागरिक र गैरआवासिय नेपालीले आफनो परिवारका सदस्यका नाममा खरिद गर्न सकिने राष्ट्र बैंकले जनाएको छ ।
हिमालयन जनरल इन्स्योरेन्सको लाभांश बुधबारदेखि वितरण
काठमाडौं । हिमालयन जनरल इन्स्योरेन्स कम्पनी लिमिटेडको नगद लाभांश बुधबारदेखि वितरण हुने भएको छ । कम्पनीले गत आर्थिक वर्षमा गरेको नाफबाट दिने भएको १५ प्रतिशत नगद लाभांश एनएमबी क्यापिटल लिमिटेडमा रहेको हितग्राही खाता (डीम्याट एकाउन्ट) मा जम्मा हुने भएको छ । साधारणसभा प्रयोजनका लागि सेयर दाखिला बन्द हुने मितिसम्म कायम रहेका सेयरधनीको हितग्राही खातामा बैंकको खाता अद्यावधिक भएको हकमा नगद लाभांश सोही खातामा जम्मा हुने एनएमबी क्यापिटलले जनाएको छ । हितग्राही खाता नभएका लगानीकर्ताले निवेदनसहित बैंक खाता नम्बर दिएपछि सोही बैंकमा नगद लाभांश जम्मा हुने एनएमीबले जनाएको छ ।
ज्योति लाइफ इन्स्योरेन्सको ६६ करोडको आईपीओ निष्कासन प्रस्ताव पास
काठमाडौं । ३ महिनाअघि मात्र सञ्चालनमा आएको ज्योति लाइफ इन्स्योरेन्स कम्पनी लिमिटेडले सर्वसाधारणलाई सेयर (आईपीओ) निष्कासन गर्ने भएको छ । कम्पनीको प्रथम वार्षिक साधारणसभाले चुक्तापुँजीको ३० प्रतिशत अर्थात ६६ करोड रुपैयाँ बराबरको ६६ लाख कित्ता आईपीओ निष्कासनको विशेष प्रस्ताव पारित गरेको हो । सभाले आईपीओ निष्कासनका लागि धितोपत्र बोर्डबाट अनुमति लिन, धितोपत्र व्यवसायीसंग सम्झौता गर्न लगायत अन्य काम अघि बढाउन सञ्चालक समितिलाई अख्तियारी दिएको छ । यस्तै आईपीओ जारी प्रयोजनाका लागि सम्बन्धित निकायबाट स्वीकृति लिने क्रममा प्रवन्धपत्र तथा नियमावलीको कुनै दफा परिवर्तन गर्न परेमा सोको परिवर्तन गर्न सक्ने अधिकार सञ्चालक समितिलाई दिने प्रस्ताव सभाले पारित गरेको कम्पनीले जनाएको छ । कम्पनीको सञ्चालकमा कल मोवलिटीका तर्फबाट पशुपति मुरारका, नन्दकिशोर शर्मा, आकाश गोल्छा र शर्मिला महर्जनलाई निर्विरोध निर्वाचन गरेको छ । चुक्तापुँजी २ अर्ब २० करोड रुपैयाँ हुने र यसमध्ये १ अर्ब ५४ करोड रुपैयाँ संस्थापक सेयर लगानी हुने छ । ६६ करोड रुपैयाँ सर्वसाधारणको स्वामित्व हुने गरी लगानी संरचना तयार पारिएको छ । कम्पनीले गत असोज ८ गतेदेखि औपचारिक रुपमा जीवन बीमा व्यवसाय सुरु गरेको हो । ज्योतिले आईपीओ निष्कासनको तयारी गरेपनि सञ्चालनमा आएको १ वर्ष नपुगी आईपीओ निष्कासन गर्न नपाउने व्यवस्था रहेको छ । धितोपत्र दर्ता तथा निष्काशन नियमावलीको दफा ९ को उप दफा ३ अनुसार बीमा कम्पनी सञ्चालनमा आएको एक बर्ष नपुगे पनि आइपीओ निष्कास गर्न नपाउने व्यवस्था रहेको छ ।
