१ अर्ब ७० करोडको म्यूचल फण्ड बजारमा आउँदै, सबै बिक्री होला ?
काठमाडौं । लगानीकर्ताको आर्कषण घटेका बेला २ बैंकले १ अर्ब ७० करोड रुपैयाँ बराबरको सामूहिक लगानीकोष (म्यूचल फण्ड) निष्कासन गर्न लागेका छन् । ग्लोबल आईएमई बैंकले ग्लोबल आईएमई ब्यालेन्स फण्ड १ नेपाल इन्भेष्टमेन्ट बैंकले र एनआईबीएल सहभागिता फण्ड निष्कास गर्न लागेका हुन् । दुई कम्पनीले प्रति इकाई १० रुपैयाँका दरले कुल १७ करोड इकाई निष्कासन गर्ने प्रक्रिया अघि बढाएका छन् । दुबैले निष्कासनका लागि धितोपत्र बोर्डमा निवेदन दिएका छन् । बोर्डले अनुमति दिए पश्चात बजारमा यी दुई कम्पनीले म्यूचल फण्डको बिक्री गर्ने छन् । दुबै बैंकले फण्ड निष्कासन गर्न धितोपत्र बोर्डमा निवेदन दिएका छन् । ग्लोबल आईएमई ब्यालेन्स फण्ड १ ले १ अर्ब २० करोड रुपैयाँ बराबरको १२ करोड इकाई निष्काशन गर्न लागेको छ । ग्लोबल आइएमई क्यापिटल ब्यालेन्स फण्ड निष्कासन हुन लागेको छ । त्यस्तै, एनआइबिएल सहभागिता फण्डको ५० करोड रुपैयाँ बरारबको ५ करोड इकाई बजारमा आउँदै छ । यस फण्डले पनि बोर्डको अनुमति पाए पश्चात एनआईबिएल क्यापिटल मार्फत सो मात्राको म्यूचल फण्ड जारी गर्ने छ । यसअघि निष्कासन गरिएका म्युचल फण्डको बिक्री राम्रो नभएपछि थप निष्कासन हुन लागेका दुई कम्पनीको फण्ड पनि बिक्री नहुने संभावना देखिएको छ । गत वर्ष निष्कासन भएको ग्लोबल, एनएमबी र नविलको म्युचल फण्डको खुदसम्पत्ति (नेटवर्थ) नै ऋणात्मक भएपछि यसको असर बजारमा परेको हो । निष्कासन भएका म्युचअल फण्डको अवस्था राम्रो नदेखिएपछि यसको असर नयाँ निष्कासन गर्नेलाई परेको सीआईबीएल क्यापिटल लिमिटेडका प्रमुख कार्यकारी अधिकृत (सीईओ) समीरप्रसाद दाहाल बताउछन् । “यसअघिका म्युचल फण्डको प्रगति राम्रो भए लगानीकर्तामा सकरात्मक सन्देश जाने थियो” उनले भने “पहिलाको फण्डको खराब नतिजाले नयाँमा लगानीकर्ताको आकर्षण नबढेको हो ।”१ अर्ब रुपैयाँका सिटिजन्स म्युचल फण्ड निष्कासन गर्दा ८५ करोड रुपैयाँ मात्र खरिदका लागि आवेदन परेको उनले सुनाए । उनकाअनुसार अझै १५ करोड रुपैयाँको म्युचल फण्ड बिक्री गर्न बाँकी छ । हालै एनआईसी एसिया बैंकले १ अर्ब रुपैयाँको एनआईसी एसिया ग्रोथ फण्डको पनि बिक्री नभएपछि समय थप गरिएको छ । एनआईसी ग्रोथ फण्ड फागुन १३ गते बन्द गर्ने योजना रहेकाे याेजना व्यवस्थापक एनआईसी क्यापिटल लिमिटेडले जानकारी दिएको छ । म्युचल फण्ड बिक्री नहुनुमा बैंकको महंगो ब्याजदर पनि प्रमुख कारण रहेको एनएमबी क्यापिटल लिमिटेडका सीईओ श्रीजेयस घिमिरे बताउछन् । महंगो ब्याजदरले प्रतिफल नआउने देखेपछि लगानीकर्ताले खरिद नगरेको हुन सक्ने उनको अनुमान छ । “साधारण सेयर (आईपीओ) हकप्रद र एफपीओ आइरहेका बेला एकैपटक २ बैंकको म्युचल फण्ड आउँदा पनि बिक्रीमा असर परेको देखिएको छ” उनले भने “केही समय अघिपछि गरेर ल्याएको भए बिक्री हुने थियो ।” उनले एनएमबीको ३ गुणा आवेदन परेको सुनाए । चालु आर्थिक वर्षमा सिद्धार्थ इक्विटी फण्ड, सानिमा इक्विटी फण्ड, एनआईसी एशिया ग्रोथ फण्ड र सिटिजन म्यूचल फण्ड १ ले म्यूचल फण्ड निष्काशन गर्ने बोर्डको अनुमति पाई बिक्री पनि गरिसकेका छन् । बजारमा सिद्धार्थ इक्विटी फण्ड र सानिमा इक्विटी फण्डले बिक्रीमा ल्याएको म्यूचल फण्डको सजिलै बिक्री भएको थियो ।
मञ्जुश्री फाइनान्सको सेयर मूल्य समायोजन
काठमाडौं । बुधबार मञ्जुश्री फाइनान्सको सेयर मूल्य समायोजन भएको छ । नेपाल स्टक एक्स्चेञ्ज(नेप्से)ले कम्पनीको ५ प्रतिशत हकप्रद सेयर पछिको सेयर मूल्य समायोजन गरेको छ । समायोजन पछि नेप्सेले यस संस्थाको सेयर मूल्य प्रतिकित्ता १४० रुपैयाँ तोकेको छ ।
ऊर्जामा परनिर्भरता घटाउँछौं: लालबाबु पण्डित
काठमाडौँ । नेपालीले अब उर्जा क्षेत्रमा परनिर्भता घटाउँदै लैजाने जनसंख्या तथा वातावरण मन्त्री लालबाबु पण्डितले बताएका छन् । बुधबार व्यावसायीहरुसँगको भेटमा मन्त्री पण्डितले सो कुरा बताएका हुन् । मन्त्रीसँगको भेटमा व्यावसायीहरुले संघीय संरचनाअन्तर्गत नवीकरणीय ऊर्जा प्रवद्र्धनका साथै प्रविधि परिचालनका लागि विद्यमान ऐन, कानूनमा परिमार्जन तथा नयाँ कानूनको तर्जुमा गरी आम जनताको पहुँचमा सुलभ, भरपर्दो ऊर्जाको पहुँच विस्तार गर्न सरकारलाई सुझाव दिएका छन् । नेपाल नवीकरणीय ऊर्जा परिसंघको प्रतिनिधिमण्डलले मन्त्री पण्डितलाई भेट गरी लघु जलविद्युत्, बायोग्यास, सौर्य विद्युत्, सौर्य तापीय ऊर्जा, बायोमास, प्रविधिबाट जनताको ऊर्जाको बढ्दो माग पूरा गराउन सम्बद्ध निकायबाट सशक्त कार्यक्रम सञ्चालन गर्न आवश्यक रहेकामा जोड दिएका हुन् । सो अवसरमा मन्त्री पण्डितले वातावरण संरक्षण तथा जलवायु परिवर्तनका नकारात्मक प्रभाव न्यूनीकरणका लागि नीति तथा कार्यक्रम सहज प्रक्रियाबाट कार्यान्वयन गरी वातावरणको अवस्था सुधारका लागि सरकार क्रियाशील हुने बताए । उनले वैकल्पिक ऊर्जाका कार्यक्रमबाट दुर्गम हिमाली, पहाडी जिल्लाका साथै तराईका बासिन्दामा ऊर्जाको पहुँच बढाउन सरकार, सहयोगी निकाय र निजी क्षेत्र एकजुट भई उर्जा क्षेत्रको परनिर्भरता घटाउने बताए ।रासस
नेपाल रेडक्रस सोसाइटीले स्वर्णजयन्ती बर्षमा ३६५ कार्यक्रम आयोजना गर्ने
भक्तपुर । नेपाल रेडक्रस सोसाइटीको भक्तपुर शाखाको स्थापनाको ५० औँ बर्षको अवसरमा भक्तपुर दरबार क्षेत्रमा आयोजित एक समारोह बीच पूर्वमन्त्री तथा सँसद सदस्य महेश बस्नेतले स्वर्णमहोत्सव कार्यक्रमको सुभारम्भ गरेका थिए । भक्तपुर रेडक्रसका सभापति तथा स्वर्णमहोत्सव समारोहका सँयोजक मनोज थापाले जिल्लामा रहेका २१ वटा उपशाखा, ७७ वटा जुनियर सर्कल र १५ वटा यूवा सर्कलको सहयोगमा स्वर्णजयन्ती वर्षभरी विपद पूर्वतयारी र स्वास्थ्य क्षेत्रमा सेवा तथा चेतनामूलक ३ सय ६५ वटा कार्यक्रम गरिने घोषणा गरेका छन् । कार्यक्रमका प्रमुख अतिथि बस्नेतले स्थानीय, प्रादेशिक तथा सँघीय तहमा भरखरै निर्वाचित जनप्रतिनिधिहरुसँग रेडक्रस लगायतका सँस्थाले सहकार्य गर्ने अवसर आइरहेको बताएका छन् । उनले भने “भक्तपुर लगायत देशैभरी विकासको नयाँ लहर ल्याउन खोजिएको छ, तर प्रदुषण, सडक दुर्घटना घटाउँदै शुरक्षित शहरहरु बनाउन सँघसँस्थाले योगदान गर्नुपर्दछ ।” हरेकहप्ता औषतमा भक्तपुरको ६ लेनको सडकमा दुर्घटनाको कारण एक जना युवाले ज्यान गुमाएका छन्, त्यतातर्फ थप काम गर्नु छ । भक्तपुर रेडक्रसका सभापति मनोज थापाले रगत नपाए भक्तपुर जानु भन्ने अभियानलाई सुदृढ बनाइने प्रतिवद्धता व्यक्त गरेका छन् । उनले भने शुरक्षित शहरका लागि विपद् पूर्वतयारीका क्षेत्रमा सँस्था क्रियाशिल छ । गत वर्ष २२ हजार युनिट रगत सँकलन र ४० हजार युनिट रगत वितरण गरिएको तथा २५०० परिवारको लागि राहत सामग्री भक्तपुरमा भण्डारण रहेको छ । कार्यक्रममा ५० वटा बेलुन उडाइएको थियो । कार्यक्रममा नेपाल रेडक्रसका का.वा अध्यक्ष अजीत शर्मा, महामन्त्री देवरत्न धाख्वा, वाराही उपशाखाका सभापति राम खाटाखो, जुनियर युवाको तर्फबाट टेक नारायण, प्रधानाध्यापक तथा जुनियर सँरक्षकको तर्फबाट पद्म माध्यामिक विद्यालयका प्राचार्य राम हाडा, जिल्ला समन्वय समितिका प्रतिनिधि लगायतले शुभकामना मन्तव्य दिएका थिए । विभिन्न पुरस्कारहरु प्रदानः जिल्ला शाखाको २३ औँ बार्षिक सभा समेतको कार्यक्रमको अवसरमा प्रमुख अतिथि बस्नेत तथा नेपाल रेडक्रस सोसाइटीका अध्यक्ष शर्माले गत आर्थिक बर्षको मूल्याँकनका आधारमा दुवाकोट उपशाखालाई अवाल अवार्ड तथा उत्कृष्ट उपशाखाको प्रमाण पत्र प्रदान गरे । बालकोट उपशाखा र झौखेल उपशाखाले उत्कृट दोस्रो र तेस्रो उपशाखाको पुरस्कार प्राप्त गरे । यसैगरी राकेश थापलाई उत्कृष्ट स्वयँसेवक, जुनियर सर्कलतर्फ विकास दाहाल, कर्मचारीतर्फ प्रतीक चासी र उत्कृष्ट यूवा सर्कल तर्फको लागेजु अवार्ड बाराही यूवा सर्कललाई प्रदान गरियो । २०२५ फागुन ७ गते भक्तपुरमा रेडक्रस शाखाको स्थापना भएको थियो ।
दुईदिने महिला र कानुन सम्बन्धि तालिम सम्पन्न, उद्यमसिलता र विकासमा अघि बढ्न जोड
काठमाडौं । समान पहुँच नेपालद्धारा आयोजित महिला र कानुन सम्बन्धि दुईदिने सचेतना सम्बन्धि तालिम सम्पन्न भएको छ । नार्गाजुन नगरपालिकाका महिलाहरुका लागी कानुनी सचेतना सम्बन्धि प्रशिक्षण कार्यक्रममा नार्गाजुन नगरपालिका झण्डै ६० महिला दिदी बहिनीहरुको सहभागीता रहेको थियो । सो कार्यक्रमका अधिवक्ता विष्णु माया भुसाल, रमा श्रेष्ठ लगाएतले विवाहवारी सम्बन्धित कानुनी व्यवस्था र उजुरी तथा सजाय सम्बन्धि कार्यविधी र महिलाको सम्पती सम्बन्धि अधिकार र यसको उजुरी सम्बन्धि कार्यविधीका बारेमा प्रशिक्षण दिएका थिए । कार्यक्रममा नेकपा एमालेका केन्द्रिय सदस्य एंव प्रतिनिधी सभा सदस्य कृष्णगोपाल श्रेष्ठले महिलाहरु अब घरायसी काममा मात्र सिमित हुन नहुने भन्दै उद्यमसिलता र विकासमा अघि बढ्न सुझाव दिएका छन् । सो अवसरमा सहभागी दिदी बहिनीलाई प्रमाण पत्र उपलब्ध गराइएकोे समान पहुँच नेपालकी महासचिव शान्ता वस्यालले बताए । सो दुई दिनै प्रशिक्षण कार्यक्रमको सहयोगीका रुपमा चन्द्रागिरी नगरपालिका रहेको बताइएको छ ।
गुण्डा नाइके पुन र आले मारिए
बुटवल । गुण्डा नाइके भनेर चिनिने मनोज पुन र उनका सहयोगी सोम आले प्रहरी इन्काउन्टरमा बुधबार बिहान मारिएका छन् ।रुपन्देहीको देवदहमा बिहान ३ः३० बजे प्रहरीसँगको मुठभेडमा पुन र उनका सहयोगीमाथि प्रहरीले गोली चलाएको बताइएको छ । देवदह नगरपालिका–४ भवानीपुरमा गोली लागेर ढलेका दुवै जनालाई लुम्बिनी अञ्चल अस्पताल लगिएकामा अस्पतालले दुवैलाई मृत घोषणा गरेको जिल्ला प्रहरी कार्यालय रुपन्देहीका प्रमुख प्रहरी उपरीक्षक श्याम ज्ञवालीले बताए । नेपाल प्रहरी, केन्द्रीय अनुसन्धान ब्यूरो (सिआइबी)को विशेष सूचनाका आधारमा देवदह–४ भवानीपुरमा प्रहरीले गरेको सर्च अपरेशनमा मोटरसाइकलमा सवार दुई जनासँग प्रहरीको मुठभेड भएको प्रहरी उपरीक्षक ज्ञवालीले बताए। प्रहरीले पुनका साथबाट एउटा पेस्तोल पनि बरामद गरेको छ । प्रहरीलाई नै आक्रमण गरेर भाग्न खोजेपछि गोली चलाइएको प्रहरी उपरीक्षक ज्ञवालीले बताए । पुनलाई गत वर्ष देवदहमा युवा संघका नेता दुर्गा तिवारीको हत्या गरेको, गत असोजमा काठमाडौँमा निर्माण व्यवसायी शरदकुमार गौचनको हत्यामा संलग्न भएको र गत पुस २२ गते देवदहमा काठ व्यवसायी वसन्त पौडेलको हत्या गराएको आरोप लगाइएको छ । व्यापारीको हत्या गर्ने र फिरौती असुल्ने धन्दा उनले चलाउँदै आएको अभियोग पनि छ । अभियुक्त पुनलाई पक्राउ गर्न एक वर्ष पहिलेदेखि प्रहरी टोली सक्रिय थियो । सिआइबीले विशेष समूह बनाएर पुनको समूहलाई खोजी गर्दै आएको थियो । रासस
शाश्वत धाममा ल्याइयो श्रीलंकाबाट बुद्धको अस्तु, बुद्धिष्ट सेन्टरमा राखिने
काठमाडौं । सनातन धर्मको प्रख्यात धार्मिक सम्पदा शास्वतधाममा श्रीलंकाबाट भगवान गौतम बुद्धको अस्तु ल्याइएको छ । उक्त अस्तु शाश्वतधाममा निर्माण गर्न लागिएको बुद्धिष्ट सेन्टरमा राखिनेछ । शाश्वतधाममा बुद्धिष्ट सेन्टर शिलान्यास समारोहमा सहभागी बौद्ध भिक्षु । शाश्वतधाममा बनाइएको विशेष मण्डपमा राखिएको बुद्ध अस्तुको पुजा गरिदै । बुद्धिष्ट सेन्टर स्थापना हुनु अघि भक्तजनहरूको दर्शनकालागि शाश्वतधाममा विशेष मण्डप तयार गरि अस्तु राखिएको छ । अस्तु दर्शनकालागि अहिले बौद्ध र हिन्दु धर्माबलम्बिहरुको भिड लागेको छ । धाममा राखिएको अस्तुलाई श्रीलंकाबाट आएका भिक्षुहरुको टोलीले विधिपूर्वक दैनिक पुजा अर्चना गरिरहेका छन् । श्रीलंकाको राजधानी कोलम्बो नजिकैको २६ सय बर्ष पुरानो राजमाया बिहारबाट उक्त अस्तु नेपालको शाश्वत धाममा ल्याइएको हो । विश्वभरका बौद्ध धर्मावलम्वीहरूकाबीच उक्त विहार निकै प्रतिष्ठित मानिन्छ । बौद्ध भिक्षु खेम्पो पेमा सम्बा लामाले भगवान बुद्धको अस्तुलाई प्राणीको उद्धार गर्नकालागि साक्षात् भगवान मानिने भएकाले बुद्ध धर्ममा यस्को सबैभन्दा उच्च महत्व रहेको बताए । राजामाया बिहारका जनका ईडिरेसंघेले भगवान बुद्धका अनुयायिहरुले अस्तु (बुद्धको खरानी)रहेको स्थानलाई साक्षात् भगवान बुद्धको स्वरुपका रुपमाश्रद्धा गर्ने बताए । मंगलबार शाश्वतधाम परिसरमा बुद्धिष्ट सेन्टरको शिलान्यास गरिएको छ । श्रीलंका, लुम्बिनीस्थित श्रीलंका गुम्बा र दाउन्नेमा रहेको बौद्ध गुम्बाका भिक्षुहरुबाट विधिपूर्वक बुद्धिष्ट सेन्टरको शिलान्यास गरिएको हो । आगामी बैशाख पूर्णिमाका दिन उक्त सेन्टरको उद्घाटन गर्ने लक्ष्य राखिएको छ । बुद्धिष्ट सेन्टर संचालनमा आएपछि भक्तजनहरूले सोही स्थानमा अस्तुको दर्शन गर्न पाउनेछन् । गत शुक्रवार श्रीलंकाबाट त्रिभूवन अन्तर्राष्ट्रिय विमानस्थल हुँदै काठमाडाैं ल्याइएको अस्तुलाई एक रात काठमाडाैंको एक चैत्यमा राखी शनिवार शाश्वतधाममा पुर्याइएको हो । भरतपुर बिमानस्थलबाट शाश्वतधाममा अस्तु ल्याइदा बौद्ध परम्परा अनुसार विशेष पुजा अर्चना गरिएको थियो । पुरातत्व बिभागका पुरातत्व बिज्ञ रामबहादुर कुंवरका अनुसार आजभन्दा २५६२ वर्षअघि देह त्याग गरेका भगवान गौतम बुद्धलाई उनका अनुयायीहरु (भिक्षु)ले जलाएका थिए । उनलाई जलाईएपछि बनेको खरानी आ–आफनो चैत्यमा राख्न उनीहरूबीच होडबाजी चलेको थियो । बौद्ध धर्म विज्ञहरूका अनुसार त्यतिबेलाका शासकमध्ये मगतकामौर्य, बैशालीका लिक्ष्छवी, कपिलवस्तुका शाक्य, रामग्रामको कोलीया(हालनवलपरासी सदरमुकामवाट ५ किलोमिटर दक्षिण) कुशिनगरकामल्ल, पावाकामल्ल, बेथडिपका ब्राम्हीन र अलपप्पाकाबुलिजहरुले अस्तु भाग लगाएर बा“डेका थिए । ती ८ वटै स्थानमा निर्माण गरिएका भब्य चैत्यहरू अहिले पनि उत्तिकै प्रख्यात छन् । तत्कालिन सम्राट अशोकले ती ८ पबित्र स्थल (तत्कालिन चैत्य मन्दिर)मा रहेको अस्तुलाई उत्खनन् गरि आफ्ना ८४ हजार भिक्षुहरुलाई बितरण गरेको भनाई छ । त्यतिबेला बितरित अस्तुलाई संसारका ८४ हजारभन्दा बढि स्थलका चैत्यहरूमा राखिएको विज्ञहरू बताउछन् । सनातन धर्मको प्रवर्धनकालागि गत बर्ष उद्घाटन गरिएको शाश्वतधाम एक बर्षको अवधीमै नेपाल र नेपाल बाहिरका भक्तजनहरूकालागि प्रख्यात धार्मिकस्थलका रुपमा स्थापित भएको छ । ११ महिनाको अवधीमा १२ लाख दर्शनार्थीले शाश्वतधामको दर्शन गरेका छन् ।
नेपाल औषधीले सिटामोलको पुनः उत्पादन थाल्यो, १ ट्याब्लेटको १ रुपैयाँमा पाइने
काठमाडौं । सरकार स्वामित्वको नेपाल औषधी लिमिटेडले बुधबारदेखि सिटामोलको पुनः उत्पादन थालेको छ । अन्तर्राष्ट्रिय मापदण्ड लगायतका विभिन्न कारणले २०६६ सालदेखि उद्योगले सिटामोल लगायतको सम्पूर्ण औषधी उत्पादन गर्न बन्द गरेको थियो । बुधबारदेखि परिक्षणका रुपमा उत्पादन सुरु गरी फागुनभित्रै सिटामोललाई बजारमा लैजाने तयारी भएको उद्योगका महाप्रबन्धक डा. रोभसकुसुम सुवेदीले बताए । सरकारी उद्योगले सुरु गरेको सिटामोल उत्पादनले औषधीको मूल्य नियन्त्रणमा सहयोग पुग्ने अपेक्षा गरिएको छ । कम्पनीले दैनिक ३ लाख २० हजार ट्याबलेट सिटामोल उत्पादन गर्ने सक्ने क्षमताको उपकरण जडान गरेसँगै सिटामोलको उत्पादन थालनी हुने भएको हो । सिटामोलको खुद्रामूल्य प्रति ट्यावलेट १ रुपैयाँ तोकिएको छ । ‘दुई हप्ताअघि नै भारतबाट सिटामोल उत्पादन गर्ने ट्याब्लेट पञ्जिङ मेसिन उद्योगमा ल्याइसकेका छाै,’ उनले भने ‘प्राविधिक टोली नआएको कारण मेसिन सञ्चालनमा ल्याउन सकिएको थिएन ।’ कम्पनीको उत्पादन प्रमुख विजय श्रीरत्न बज्रचार्यले परीक्षण उत्पादनपछि दैनिक एक ब्याज साईजमा सिटामोलको उत्पादन गर्ने बताए । ‘एक ब्याज साईजमा ३ लाख २० हजार ट्याप्लेड सिटामोलको उत्पादन हुन्छ,’ उनले भने ‘साथै आवश्यकता अनुसार उत्पादनको क्षमता बढाउन सकिन्छ ।’ उनले सिटामोलको उत्पादनसँगै बाँकी ८ थरीका ट्याब्लेट औषधीहरु ३ महिनाभित्र उत्पादन सुरु गर्ने बताए । ‘कम्पनीले आवश्यक विभिन्न मेसिनहरु थपिरहेको छ, भवनभित्र पुनःसंरचना गरेका छौं,’ उनले भने ‘कम्पनीले २० लाख ट्याब्लेट उत्पादन गरिसकेपछि मात्रै बजारमा बिक्री गर्ने छौं ।’ उनका अनुसार तीन महिनाभित्र आइरन चक्की, भिटामिन, कोडिन, साल्बुमोल लगायतका खोकी, पिसाब, एलर्जी, ग्यास्टीक जस्ता अत्यावश्यक रोगहरुको औषधिहरु उत्पादन गर्ने भएको छ । २०२९ सालमा स्थापना भएको कम्पनी २०६६ सालमा पूर्ण रुपमा बन्द भएको थियो । यसै वर्ष वैशाख २४ गते तत्कालीन उद्योगमन्त्री नवीन्द्रराज जोशीको पहलमा कम्पनीले जीवन जलको उत्पादन सुरु गर्दै पुनःसञ्चालनमा आएको थियो । कम्पनीले औषधी उत्पादनको लागि विश्व स्वास्थ्य संगठन( डब्ल्युटीओ)ले गरेको कुशल निर्माण विधि (जीएमपी) सुरु गर्नका लागि सरकारले १४ करोड ६५ लाख रुपैयाँ ऋिण साह्यता गर्ने निर्णय गरेको छ । जसअनुसार हालसम्म पहिलो किस्ता ६ करोड ४८ लाख रुपैयाँ खर्च भइसकेको कम्पनीको भनाइ छ । जसमा सिटामोल उत्पादन गर्न करिब डेढ करोड रुपैयाँ खर्च भएको छ ।
