रसुवागढी र साञ्जेनको साढे २ अर्बको आइपिओ शुक्रबारदेखि बिक्री हुँदै
काठमाडौँ । धितोपत्र बजारमा शुक्रबारदेखि २ अर्ब ५१ करोड ६० लाख रुपैयाँ बराबरको साधारण शेयर (आइपिओ) निष्कासन हुने भएको छ । रसुवागढी हाइड्रोपावर कम्पनी लिमिटेड र साञ्जेन जलविद्युत् कम्पनी लिमिटेडले शुक्रबारदेखि एकै पटक आईपीओ बिक्री गर्ने भएका हुन् । दुवै कम्पनीले कर्मचारी सञ्चय कोषमा कोषकट्टी गर्दै आएका ६ लाखभन्दा बढी सञ्चयकर्ता, सञ्चयकोषका कर्मचारी तथा रसुवाका साविक गाविसका कर्मचारी र रसुवा जिल्ला समन्वय समितिमा कार्यरत कर्मचारीले शेयरमा आवेदन दिन सक्ने व्यवस्था गरिएको छ । रसुवागढी आयोजनाका प्रमुख माधव कोइरालाका अनुसार साधारण शेयर निष्कासनको सम्पूर्ण प्रक्रिया पूरा भएको छ । चिलिमे जलविद्युत् कम्पनी लिमिटेडको सहायक कम्पनीका रुपमा रहेका साञ्जेन रसुवागढीले एकै पटक एकै दिनदेखि साधारण शेयर बिक्री गर्ने भएपछि आवेदनकर्तालाई समेत सहज हुने विश्वास लिइएको आयोजना प्रमुख कोइरालाको भनाइ छ । ती दुवै आयोजनामा कर्मचारी सञ्चयकोषको लगानी भएकाले कोषमा कार्यरत कर्मचारीले भने अरु सञ्चयकर्ताको तुलनामा बढी शेयर पाउने छन् । सञ्चयकर्ताले साञ्जेन जलविद्युत् कम्पनीको बढीमा ३०० कित्ता शेयर आवेदन गर्न सक्नेछन् भने रसुवागढीका लागि बढीमा ५०० कित्ता शेयर आवेदन गर्ने व्यवस्था मिलाइएको छ । कोषका कर्मचारीले भने २ हजार ५०० कित्तासम्म साधारण शेयरमा आवेदन दिन सक्ने व्यवस्था मिलाइएको छ । रसुवागढीले १ अर्ब ६४ करोड रुपैयाँ बराबरको आईपीओ निष्कासन गर्नेछ । कम्पनीले कर्मचारी सञ्चयकोषका सञ्चयकर्ता, कोषका कर्मचारी र ऋण लगानी गर्ने संस्थाका कर्मचारीलाई १ करोड ६४ लाख २१ हजार कित्ता साधारण शेयर बिक्री गर्न लागेको हो । रसुवागढी हाइड्रोको साधारण शेयर निष्कासनको बिक्री प्रबन्धकमा सिद्धार्थ क्यापिटल र ग्लोबल आइएमई क्यापिटल लिमिटेडलाई नियुक्त गरिएको छ । सहायक बिक्री प्रबन्धकमा सनराइज क्यापिटल लिमिटेड, सिद्धार्थ क्यापिटल लिमिटेड र एनआइबिएल क्यापिटल लिमिटेड रहेका छन् । रसुवागढीले पहिलो चरणको साधारण शेयर निष्कासन गरेपछि दोस्रो चरणमा आयोजना प्रभावित रसुवावासीलाई १० प्रतिशत र सर्वसाधारणलाई १५ प्रतिशत गरी १ अर्ब ७५ करोड रुपैयाँ बराबरको आईपीओ बिक्री गर्नेछ । रसुवागढीको लगानी संरचनाअनुसार ५१ प्रतिशत संस्थापक र ४९ प्रतिशत सर्वसाधारणको लगानी रहेको छ । रसुवागढीले १११ मेगावाट क्षमताको रसुवागढी जलविद्युत् आयोजना निर्माण गरिरहेको छ । आयोजनाको काम करिब ६० प्रतिशत सम्पन्न भएको छ । आयोजना सन् २०१९ को डिसेम्बरमा सक्ने गरी कार्ययोजना बनाइएको छ । आयोजनाको निर्माण चाइना वाटर एण्ड इलेक्ट्रिसिटी कर्पोरेशनले गरिरहेको छ । यस्तै इलेक्ट्रोमेकानिकलतर्फ भारतको भ्वाइथ हाइड्रो लिमिटेड रहेको छ । १३ अर्ब ६८ करोड रुपैयाँ लागत अनुमान गरिएको उक्त आयोजनामा चिलिमे जलविद्युत् कम्पनीको ३३, नेपाल विद्युत् प्राधिकरणको १८, सर्वसाधारणको १५, आयोजना प्रभावित स्थानीय बासिन्दालाई १०, लगानीकर्ता कर्मचारी सञ्चयकोषका कर्मचारी तथा विद्युत् प्राधिकरण र कम्पनीका कर्मचारीको गरी ३.५ प्रतिशत एवं सञ्चयकर्ताको १९ .५ प्रतिशत लगानी रहनेछ । यस्तै साञ्जेन जलविद्युत् कम्पनीले ८७ करोड ६० लाख रुपैयाँ बराबरको आईपीओ शुक्रबारदेखि बिक्री गर्नेछ । सो कम्पनीको बिक्री प्रबन्धकमा नागरिक लगानी कोष रहेको छ । रसुवामा नै सो कम्पनीले १४.८ मेगावाट क्षमताको माथिल्लो साञ्जेन र ४२.५ मेगावाट क्षमताको साञ्जेन आयोजना निर्माण गरिरहेको छ । आयोजना प्रमुख किरण श्रेष्ठले सबै तयारी सकिएकाले अब शुक्रबारदेखि आईपीओ बिक्री गरिने जानकारी दिए। एकपछि अर्को गर्दै साधारण शेयर जारी गर्ने तयारीमा जलविद्युत् कम्पनी लागेपछि कर्मचारी सञ्चयकोष, नागरिक लगानीकोषलगायतका संस्थाले हितग्राही खाता नभएकालाई तत्काल हितग्राही खाता खोल्न सूचनामार्फत आग्रह गरिरहेका छन् । दुवै कम्पनीको शेयर सी आश्वा’ प्रणालीबाट आवेदन दिने व्यवस्था मिलाइएको छ । शेयर बजारका बारेमा विश्लेषण गर्दै आएका विश्लेषक निरव पुडासैनीका अनुसार पूँजी बजारको विविधीकरणका लागि ठूलो मात्रामा साधारण शेयर आउनु सकारात्मक देखिन्छ । उनले केही समयपछि बजारमा उक्त कम्पनीमा लगानी गरिएको रकमसमेत आउने भएकाले त्यसले लगानीका लागि थप अवसर विस्तार गर्ने विश्वास व्यक्त गरे। रासस
६ महिनामा थपिए १ लाख १४ हजार नयाँ करदाता, कति बढ्ला राजश्व ?
काठमाडौं । चालु आर्थिक वर्षको ६ महिनामा १ लाख भन्दा बढी व्यक्ति तथा संस्था करको दायरामा आएका छन् । गत पुससम्म सरकारले १ लाख १४ हजार ३८० लाई करको दायरामा ल्याएको हो । जसअनुसार आयकरतर्फ ९४ हजार ८५०, मूल्य अभिवृद्धि कर (भ्याट) मा १० हजार ३६० र अन्तशुल्कमा ९ हजार १७० लाई करको दायरामा ल्याएको अर्थ मन्त्रालयले जनाएको छ । ६ महिनामा करदाताको संख्या बढेर १७ लाख ३७ हजार ९८७ पुगेको छ । कर तिर्नेको संख्या बढेपछि राजश्व पनि थप हुने छ । चालु आवमा सरकारले कर, भन्सार, भ्याट, अन्तशुल्क र अन्य गैरकर गरी ७ खर्ब ३० अर्ब ५ करोड रुपैयाँ उठाउने लक्ष्य लिएको छ । आउदो आवमा बढेर साढे ९ खर्ब रुपैयाँ पुग्ने अनुमान गरिएको छ । सरकारले कर प्रशासनमा सुधार गरी दायरा बढाएपछि करदाताको संख्या थप भएको हो । सरकारले ५ वर्षयता मदिरा र सुर्तिजन्य वस्तुको बाहेक अन्य वस्तुको करको दरमा हेरफेर गरेको छैन् । पछिल्ला वर्ष सरकार करको दर भन्दा पनि दायरा बढाउने अभियानमा लागेपछि ठुलो संख्यामा करदाता दायरामा आउन थालेका हुन् । गत वर्षसम्म मुलुकभर करको दायरामा रहेको संख्या १६ लाख २३ हजार २३१ थियो । गत आवमा मात्रै १ लाख ९२ हजार ७८६ नयाँ करदाता थप भएका थिए । अघिल्लो आवमा १४ लाख ३० हजार ४४५ करको दायरामा थिए । कुल जनसंख्याको झण्डै ७ प्रतिशत हारहारीमा मात्र करको दायरामा आएको सरकारी तथ्याँक छ । व्यवसायिक स्थायी लेखा नम्बर (प्यान) लिएर व्यवसाय गर्नेको संख्या ९ लाख ६३ हजार ९९६ पुगेको आन्तरिक राजश्व विभागले जनाएको छ । यसैगरी व्यक्तिगत स्थायी लेखा नम्बर लिनेको संख्या ७ लाख ४ हजार ६११ छन् । प्यान लिनेतर्फ मूल्य अभिवृद्धि कर (भ्याट) मा दर्ता भएका १ लाख ८१ हजार ९२८ र अन्तशुल्कतर्फ ६० हजार २७४ रहेको विभागले जानकारी दिएको छ । गत आर्थिक वर्षमा सरकारले भ्याट, आयकर, अन्तशुल्क, स्वास्थ्य सेवा कर, शिक्षा सेवा शुल्क गरी कुल २ खर्ब ५८ अर्ब १७ करोड रुपैयाँ संकलन गरेको थियो । पछिल्लो ५ वर्षयता मदिरा र चुरोटजन्य बाहेक अन्य बस्तुको कर नीतिमा खासै परिवर्तन नगरी दायरा विस्तारमा जोड दिएकाले करदाताको संख्या थप भएको हो । पछिल्लो समय प्रशासनमा सुधार र दायरा विस्तारले कर असुली लक्ष्य भन्दा बढी हुन थालेको छ । पछिल्लो समयमा करधारको विस्तार र कर प्रणाली सुध्रिढीकरण हुदै गएको छ । करको दायरा विस्तार, कर परिपालनाको स्तरमा अभिवृद्धि, राजश्व प्रशासनमा प्रविधि उन्मुख सेवाको विकास र विस्तार, चुहावट नियन्त्रण र प्रशासकीय सुधारबाट लक्ष्य भन्दा बढी राजश्व संकलन भएको हो । ५ वर्षयता राजश्व प्रशासनमा भएकाले सुधारले वार्षिक राजश्व दर २७ प्रतिशतसम्म वृद्धि भएको छ ।
९ स्थान सुधार गर्दे नेपाल भ्रष्ट्राचारको सूचकांकमा १२२ औं स्थानमा
काठमाडौं । ट्रान्सपरेन्सी इन्टरनेशनलले जारी गरेको बढी भ्रष्टाचार हुने देशमा नेपाल १२२ औं स्थानमा परेको छ । ट्रान्सपरेन्सीले १८० देशहरूलाई आधारमानी निकालेको सूचिमा नेपाल १२२ औं स्थानमा परेको हो । गत वर्ष नेपाल २९ अंक सहित १३१ औं स्थानमा रहेको थियो । यो वर्ष नेपालले ३१ अकं प्राप्त गर्दे ९ स्थान माथी उक्लिन सफल भएको हो । ट्रान्सपरेन्सीको सूचिमा सबैभन्दा कम भ्रष्टाचार हुने देशमा न्युजिल्याण्ड पहिलो र डेनमार्क दोस्रो रहेका छन् । दक्षिण एशियामा सबैभन्दा धेरै भ्रष्टाचार हुने देशमा अफगानस्थान १७७ औं नम्बरमा रहेको छ । त्यस्तै कम भ्रष्टाचार हुने देशमा भुटान २९ औं स्थानमा रहेकाे छ। त्यसैगरी सबैभन्दा धेरै भ्रष्टाचार हुने देश सोमालिया र दक्षिणी सुडान रहेका छन् ।
उपत्यकावासी खान्छन् दैनिक ७ सय राँगा/भैंसी, आधुनिक बधशाला निर्माण कहाँ पुग्यो ?
काठमाडौं । काठमाडौं उपत्यकाका बासिन्दाले दैनिक ७ सय राँगा र भैसी, २ हजार खसी बोका र २ लाख किलो कुखुराको मासु खाने गरेका छन् । तर यती ठुलो मात्रामा मासुको उपभोग हुने शहरमा अझै पनि व्यवस्थित बध स्थल निर्माण भएको छैन र निकट भविष्यमा बन्ने सम्भावना पनि देखिन्न । काठमाडौं महानगरले उपत्यकाबाट पशु बधशाला हटाउने तयारी गरेको छ । तर अझै काम भने अघि बढाउन सकिरहेको छैन् । हाल सञ्चालनमा रहेका कुनै पनि बधस्थलले कानुनी मान्यता पाएको छैन् । सैंयौको संख्यामा रहेका बधस्थलहरुले राजधानीवासीलाई फोहर मासु त ख्वाईरहेकै छन् साथमा सिंगो वातावरणलाई पनि दुषित र दुर्गन्धित बनाईरहेका छन् । मासु जाँच ऐन २०५५ आए पनि यसको कार्यान्वयन फितलो भएको पशु सेवा विभागकी सूचना अधिकृत गौरीदेवी थापाले बताइन् । सो ऐनमा धुलो नपर्ने आधुनिक संरचना , फोहोर व्यवस्थापनको राम्रो व्यवस्था, बध गर्ने प्रकृया पशु मैत्री, मृत जनावरको रगत निखार्न झुन्डयाउने व्यवस्था, मासुका भागहरु हड्डीबाट राम्ररी निकाल्ने व्यवस्था सम्बन्धी उल्लेख गरिएको छ । बधशाला सञ्चालन गर्नको लागि पशुपंक्षी बध गर्नु अघि र बध गरी सकेपछिको मासुको जाँच गर्ने व्यवस्था, प्रारम्भिक वातावरणीय प्रभाव हुनुपर्ने, घरेलु उद्योग र स्थानीय निकायसंग स्वीकृति लिएको हुनुपर्ने स्पष्ट व्यवस्था रहेको छ । तर उपत्यकामा सञ्चालित बधस्थलले यस एेनको खिल्ली उडाएको अधिकृत थापले बताइन् । राजधानीमा सञ्चालित बधस्थलहरु मापदण्ड विपरीत रहेका छन् । यसले उपत्यकालाई थप प्रदुषित पारिरहेको छ भने उपभोक्ताहरु स्वच्छ मासु खान पाउने अधिकारबाट पनि बञ्चित भैरहेका छन् । काठमाडौँ महानगरपालिकाले सबेै बधस्थलहरुलाई उपत्यका भन्दा बाहिर लैजाने तयारी गरेको छ । नयाँ बन्ने बधशाला पुर्ण रुपमा आधुनिक र मापदण्ड अनुसार बन्न नसकेको पशु चिकित्सक योगेन्द्र प्रसाद शर्माले बताए । नयाँ बन्ने बधशाला धादिङमा बनाउने तयारी भैरहेको बताइएको छ । हरेक नगरपलिकामा स्थानीय स्वायत्त शासन ऐन २०५५ अनुसार पशु वधशालाका निर्माण गर्नुपर्ने व्यवस्था छ । उपत्यकाका बधशालाले दैनिक ६० टन फोहोर मैला उत्पादन गर्दै आएको छ ।
धितोविना ऋण पाउने युवा उद्यम कार्यक्रममा प्रस्ताव बुझाउनु भएको छ ? १५ दिनमै पाउनु हुन्छ ५ लाख
काठमाडौं । चालु आर्थिक वर्ष १६५ निर्वाचन क्षेत्रमा विना धितो सरकारी ऋण पाएका युवा उद्यमीको व्यवसाय चैतदेखि सञ्चालनमा आउने भएको छ । युवा तथा खेलुकुद मन्त्रालय राष्ट्रिय युवा परिषदले गएको मङ्सिरमा मुलुकभरका १६५ निर्वाचन क्षेत्रबाट उद्यम खोल्न इच्छुक युवा समूह÷संस्थाहरुसँग प्रस्ताव माग गरेको थियो । निर्वाचन क्षेत्रहरुबाट माग गरिएको निवेदनसहितको प्रस्तावना फाइलहरु धमाधम राष्ट्रिय युवा परिषदमा आइरहेको छ । ‘आगामी एक हप्ताभित्र सम्पूर्ण फाइल केन्द्रमा आइपुग्ने छ,’ परिषदका प्रसासकीय प्रमुख मुक्तिसिंह ठकुरीले भने ‘बाँकी १५ दिनको अबधिमा उद्योगहरु छनौंट भइसक्नेछ ।’ उनका अनुसार चैतभित्र छनौटमा परेका सम्पूर्ण उद्यमहरुसँग सम्झौता गरिसकिनेछ । सम्झौता भए लगत्तै ती उद्योगहरु सञ्चालनमा आउन सुरु हुनेछन् । सम्झौता गरिएको उद्यमहरुलाई परिषदले वित्तीय संस्थाहरुमार्फत रकम उपलब्ध गराउनेछ । उद्योगीलाई उद्यमप्रति अपनत्व जगाउने उद्देश्यले आफ्नै उद्यमको खातामा १ लाख रुपैयाँ जम्मा गर्न पर्ने र सोको भौचर समेत सम्बन्धित निकायलाई पेश गर्नुपर्ने परिषदले बताएको छ । परिषदका अनुसार उक्त कार्यक्रमको लागि चालु आर्थिक वर्षमा ८ करोड ९१ लाख रुपैयाँ बजेट सरकारले छुट्याएको छ । मुलुकभरको सम्पूर्ण जिल्लाका युवा समितिको कार्यालयबाट उद्यमीहरुले निवेदन तथा प्रस्ताव पेश गरेका छन् । ती कार्यालयमा घरेलु उद्योग, महिला उद्योग लगायतसँग सम्बन्धित प्राविधिक समितिहरुले आएका प्रस्तावमध्येबाट तीनवटालाई सिफारिस गरी केन्द्रमा पठाउने प्रक्रिया अघि बढेको छ । केन्द्रमा आएको प्रस्तावलाई सम्बन्धित मन्त्रालय संघ संस्था तथा सरोकारवाला निकायहरु रहेको विशेषज्ञहरुको सिफारिस समिति र राष्ट्रिय कार्यकारी समितिमा पेश गरिन्छ । त्यहाँबाट ती तीनमध्येबाट पनि एक उद्यमको प्रस्तावलाई छनौट गरी ऋण उपलब्ध गराइने प्रशासकीय प्रमुख ठककुरीले जानकारी दिए । ‘छनौट भएका उद्यम÷उद्यमीहरुलाई सरकारले आवश्यक तालिम दिने व्यवस्था गरिसकिएको छ,’ उनले भने । उनका अनुसार चैतदेखि छनौट भएका उद्योगहरुलाई बिना ब्याज, बिना धितो प्रत्येकलाई ५ लाख रुपैयाँको दरले रकम उपलब्ध गराइनेछ । उद्योगको प्रकृति अनुसार एक अथवा दुई किस्तामा ऋिण उपलब्ध गराइनेछ । कम्तीमा पनि ऋण उपलब्ध भएको एक वर्षभित्रमा उद्योगहरु सञ्चालनमा आइसक्नु पर्ने प्रावधान छ । छनौटको लागि उद्योगका सर्त उद्योग छनौट हुनका लागि सरकारले केही निश्चित शर्तहरु राखेका छन् । जसअनुसार उद्योग खोल्नका लागि जम्मा ५ देखि १० जनासम्मका युवा उद्यमीहरुको समूह तथा संस्था रहनुपर्ने छ । जसमा ५० प्रतिशत महिला अनिवार्य हुनुपर्नेछ । समूहका उद्यमीहरुको उमेर १६ देखि ४० वर्षसम्मको हुनुपर्ने छ । उद्यमीले आधारभूत तह (कक्षा–८) उत्तीर्ण गर्नु पर्ने हुन्छ । परिषदका प्रसासकीय प्रमुख ठकुरीले कृषि तथा पशुपन्छी, वन तथा जडिबुटी, सूचना प्रविधि तथा सञ्चार, पर्यटन, निर्माण, कला संस्किृति लगायत स्थानिय स्रोत साधन परिचालन गरी संञ्चलन गर्न सकिने उघमहरु सञ्चालन हुने बताए । ऋण प्रदान गरिएको उद्यमले किस्ता अन्तर्गत दोस्रो वर्षदेखि ऋिण बुझाउदै जानुपर्ने हुन्छ । जसअनुसार दोस्रो वर्ष १० प्रतिशत, तेस्रो वर्ष २०, चौथो वर्ष ३० र पाँचौ वर्ष ४० प्रतिशत गरी सम्पूर्ण ऋिण चुक्ता गर्नुपर्नेछ । सो संकलित रकमलाई परिषदले घुम्ती कोषमा जम्मा गरी फेरी युवाहरुकै लागि लगानी गर्ने उनको भनाइ छ । सरकारले स्वदेशमै स्वरोजगार तथा उद्यमशीलताको विकास गरी विदेश पलायन भइरहेका युवाहरुलाई रोक्ने उद्देश्यले गएको वर्षदेखि उक्त कार्यक्रम सञ्चलन भएको हो । गएको वर्ष २४० निर्वाचन क्षेत्रमा उक्त युवा उद्यम कार्यक्रम सञ्चालन गर्ने भनिएता पनि २३३ स्थानमा मात्र सञ्चालनमा आएको थियो । धनुषा जिल्लामा कार्यक्रम सञ्चलन हुन सकेन । तीमध्ये हाल १५८ ओटा युवा उद्यमहरु सक्रिय सञ्चालन रहेको परिषदको दावी छ । गएको वर्षको कार्यक्रममा १२ करोड रुपैयाँ बजेट छुट्याइएको थियो । निर्वाचन क्षेत्र घटेसँगै हाल कार्यक्रम तथा बजेट पनि घटेको परिषदको भनाइ छ ।
व्यवस्थापन संकायकाे परीक्षाफल प्रकाशित
काठमाडौं । त्रिभुवन विश्वविद्यालय, परीक्षा नियन्त्रण कार्यालयले परिक्षाफल प्रकाशित गरेको छ । त्रिवीले २०७४ कात्तिक/मंसिर महिनामा सञ्चालन गरेको व्यवस्थापन संकायतर्फको स्नातकोत्तर तह (एमबिएस) दोस्रो वर्ष २०७३ सालको परीक्षाको परीक्षाफल केन्द्रीय परीक्षा सञ्चालक समितिको निर्णयानुसार प्रकाशित गरिएको हो। परीक्षा नियन्त्रण कार्यालयले जनाए अनुसार उक्त परीक्षाको परीक्षाफल वेबसाइटमा गई हेर्न सकिन्छ । नेपाल टेलिकमको १६०२ मा डायल गरी प्राप्त निर्देशानुसार थाहा पाउन सकिनेछ ।
एनसीसी बैंकको संस्थापक सेयर १७० मा पनि बिक्री भएन
काठमाडौं । नेपाल इन्स्योरेन्स कम्पनी लिमिटेडको नेपाल क्रेडिट एण्ड कमर्श (एनसीसी) बैंकमा रहको संस्थापक (प्रमोटर) सेयर बिक्री भएन् । संस्थापक सेयर बिक्रीका लागि मंगलबारसम्म म्याद थप गर्दा जम्मा ५ हजार ६ सय कित्ताका लागि मात्र आवेदन परेको छ । नेपाल इन्स्योरेन्सले एनसीसीमा रहेको ४ लाख ३३ हजार ४२ कित्ता संस्थापक सेयर प्रतिकित्ता १७० रुपैयाँ न्युनतम मूल्य राखेर लिलामी गर्न लागेको हो । प्रतिकित्ता २५१ रुपैयाँसम्ममा किन्नका लागि आवेदन परेको बिक्री प्रवन्धक एनआईबीएल एस क्यापिटल लिमिटेडले जनाएको छ । नेपाल इन्स्योरेन्सको निर्णय पर्खेको एनआईबीएलले जनाएको छ । सेयर खरिदका लागि बोलपत्र पेश गर्ने अन्तिम दिन माघ २८ गतेसम्म पर्याप्त आवेदन नपरेपछि नेपाल इन्स्योरेन्सले फागुन ८ गतेसम्मलाई म्याद थप गरेको हो । सेयर खरिद गर्नेले बैंकले यसअघि घोषणा गरेको हकप्रद सेयर र अघिल्ला आर्थिक बर्षहरुको नाफाबाट दिने बोनस सेयर समेत पाउने व्यवस्था गर्दा पनि संस्थापक सेयर बिक्री भएन । प्रतिकित्ता न्युनतम १७० रुपैयाँ राखेर बोलपत्र आब्हान गर्दा पनि बिक्री नभएपछि एनबी समूहको २१० रुपैयाँको संस्थापक सेयर पनि बिक्री नहुने संभावना देखिएको छ । एनबीको संस्थापक सेयर नेपाल इन्स्योरेन्सको भन्दा ४० रुपैयाँ महंगो छ । एनबी समूहले न्युनतम मूल्य २१० रुपैयाँ राखेर ७० लाख कित्ता संस्थापक सेयर बिक्री खुला गरेको भोलिपल्ट नेपाल इन्स्योरेन्सले पनि कम मूल्यमा बैंकमा रहेको संस्थापक सेयर लिलामी गर्ने सूचना प्रकाशित गरेको थियो ।
पोखरा र चितवनमा टिभिएसकोे पहिलो जुपिटर क्लासिक सार्वजनिक
काठमाडौं । नेपालको लागि टिभिएस स्कूटर र मोटरसाइकलको आधिकारिक वितरक जगदम्बा मोटर्सले टिभिएसको पहिलो जुपिटर क्लासिक पोखरा र चितवनमा सार्वजनिक गर्ने भएको छ । नयाँ जुपिटर क्लासिक यसअघि नै नेपाली युवाहरुमाझ स्थापित भइसकेको कम्पनीले जनाएको छ । कम्पनीको अनुसार क्लासिक संस्करणमा सनलाइट आइभोरी बडी कलर, डिकल्स, इलिगेन्ट फुलक्रोम मिरर, क्रोम बास्केट, आर्कषक डिजाइन, स्मार्ट युएसबी चार्जर, आरामदायी दुई जना बस्न मिल्ने सिट लगायतका सुबिधाहरु राखिएको छ । सडकमा आर्कषक देखिने उक्त टिभिएस जुपिटरले चालकलाई सुखद अनुभूति र उच्च गति प्रदान गर्ने कम्पनीको दावी छ । उक्त टिभिएस जुपिटर क्लासिक पुरै आल्मुनियम बढि, ११० सिसि इन्जनबाटमा उपलब्ध हुनेछ । जसकारण सुपेरियर एक्सीलेरेशन, फियुल इफिसेन्सी तथा उच्चतम शक्ति प्रदान गर्ने कम्पनीको भनाइ छ । कम्पनीको अनुसार स्कुटरमा टिभिएस प्याटेन्ट इकोमिटर जडान गरिएको छ । जसको सहायताले इको मोड र पावर मोड दुबैमा चलाउन सकिन्छ । इको मोडमा गुडाउँदा स्कुटरको इन्धन बचतमा सहयोग पुग्नेछ । क्षेत्रीय शुभारम्भ कार्यक्रमको उद्घाटनमा जुपिटर क्लासिकको ब्राण्ड एम्बेस्डर आयुष्मान जोशी, प्रियंका कार्कीले र नेपाल आइडलका लोकप्रिय प्रतिस्पर्धी मध्येका एक सुरज थापाकाले संयुक्त रुपमा गरेको बताइएको छ ।
