देशभर बन्दैछन् ४० नयाँ विमानस्थल, २ अर्ब ९४ करोड सक्न काम धमाधम
काठमाडौं । आर्थिक वर्ष सकिन लाग्दा देशभरका निर्माणाधिन विमानस्थलको काम धमाधम भैरहेका छन् । ४० विमानस्थलमा ९६ थरी विभिन्न काम भैरहेका हुन् । देशभरको विमानस्थलमा फरक प्रकृतिको काम भैरहेको नागरिक उड्डयन प्राधिकरणका प्रवक्ता विरेन्द्र प्रसाद श्रेष्ठले बताए । निर्माण भैरहेका ४० विमानस्थलमा ९६ प्रकृतिका कामहरु भैरहेका छन्, केहि आन्तरिक विमानस्थलहरु निर्माण सम्पन्न हुन लागेको प्रवक्ता श्रेष्ठले जानकारी दिए । अहिले देशभर २ अन्तराष्ट्रिय विमानस्थल, १ क्षेत्रिय विमानस्थल र ३७ आन्तरिक उडान गर्ने विमानस्थलमा काम भैरहेका छन् । गुल्मीको रेसुङगा, अछामको साँफे बगर, राजविराज र इलामको सुकिलम्बा यहि जेठमा परिक्षण उडान हुने तयारीमा रहेका छन् । यसैगरी अर्घाखाँची विमानस्थल, गुल्मी, इलाम सुकिलम्बा, कालीकोट, कमल बजार, खिजी चण्डेश्वरी र लम्पुङ विमानस्थलको काम तिब्र गतिमा भैरहेका छन् । यस्तै बाजुरा, भरतपुर, भोजपुर, विराटनगर, चन्द्रगढी, दाङ, डोल्पा, धनगढी, गौतम बुद्ध, जनकपुर, जोमसोम, जुम्ला, खानीदण्ड, मनाङ, नेपालगञ्ज, फाप्लु, पोखरा, रामेछाप, रुकुम चौरजाहारी, रुकुम साल्ली, रुम्जाटार, रारा, सिमरा, सिसमकोट, सुर्खेत, तालेजुङ, तेङजिङ हिलारी, त्रिभुवन विमानस्थल, र तुम्लिङटार विमानस्थलको काम भैरहेका हुन् । गत आर्थिक वर्षमा ३९ विमानस्थलका लागि २ अर्ब ९४ करोड बजेट बिनियोजन भएको प्रवक्ता श्रेष्ठले जानकारी दिए । आगामी आर्थिक वर्षमा यो भन्दा धेरै बजेट आवश्यक पर्ने श्रेष्ठले बताए । अहिले प्राधिकरणले देशभरको विमानस्थलको आगामी वर्ष अवश्यक पर्ने बजेटको तथ्याङक संकलन गरिरहेको छ । काभ्रेको नागीडाडा विमानस्थलको पनि काम शरु त्रिभुवन विमानस्थलबाट आन्तरिक उडान अलग गर्ने विकल्पको रुपमा काभ्रेको नागीडाडामा विमानस्थल निर्माणको प्रक्रिया शुरु भएको छ । नागिडाडामा विमानस्थल निर्माणको लागि वातावरणिय प्रभाव मुल्याङकनको काम शुरु हुन लागेको प्राधिकरणका सूचना अधिकृत त्रिलोचन पौडेलले जानकारी दिए । नागीडाडा विमानस्थलको लागि सामान्य भन्दा धेरै खर्च लाग्ने इन्जिनियरहरुले अनुमान गरेका छन् । काम अवरोध नभए ५ वर्षभित्रै विमानस्थल निर्माण सम्पन्न हुने प्रवक्ता श्रेष्ठले बताए । यो विमानस्थल निर्माण सम्पन्न गन १० अर्ब भन्दा बढी खर्च लाग्ने अनुमान गरिएको छ । गौतम बुद्ध विमानस्थल २०१९ भित्र सम्पन्न हुने दोस्रो अन्तराष्ट्रिय विमानस्थलको रुपमा हेरिएको गौतम बुद्ध विमानस्थलको काम सन् २०१९ सम्ममा सम्पन्न हुनेछ । अहिले विमानस्थलमा भवन निर्माण लगायतका कामहरु भैरहेका छन् । देशको दोस्रो अन्तर्राष्ट्रिय विमानस्थलको रुपमा चिनिन लागेको गौतम बुद्ध अन्तर्राष्ट्रिय विमानस्थलको ४० प्रतिशत काम सकिएको छ । विमानस्थलको आगामी असार सम्ममा पीच भैसक्ने विमानस्थल आयोजनाका प्रमुख ओमनारायण शर्माले बताए । ‘विमानस्थलको अहिले उच्च गतिमा काम भैरहेको छ । निर्माणाधिन भवनमा अहिले छाना राख्न लागिएको छ । धावनमार्गको ५ चरणको काम मध्ये अर्दन पेमेन्ट, मिक्स ग्राभेल, रिभर बेस म्याटिरीयलको काम सकिसकेको छ भने अहिले एलिग्रेड बेस लेयरको काम भैरहेको छ । तीन किलोमिटर लामो धावनमार्गमा एलिग्रेड बेसको काम सकिन २ महिना लाग्नेछ । त्यसपछि अन्तिम चरणको बिटामिन लेयरको काम शुरु हुनेछ । बिटामिन लेयरको काम सकिन करिब ४ महिना लाग्नेछ । विमानस्थलको धावनमार्ग पिच भैसकेपछि सन् २०१९ को अन्त्यसम्ममा सबै काम सकिने आयोजना प्रमुख शर्माले बताए ।
शुक्रबार मात्रै ९ कम्पनीको २ करोड ९० लाख सेयर सूचिकृत, सबैभन्दा बढी हकप्रद
काठमाडौं । नेपाल स्टक एक्स्चेञ्ज(नेप्से)मा विभिन्न ९ वटा बैंक तथा वित्तीय संस्थाको २ करोड ९० लाख ५२ हजार ५३ कित्ता सेयर सूचिकृत भएका छन् । उक्त विभिन्न कम्पनीको बोनस र हकप्रद गरी शुक्रबार(एकैदिन) मात्र सो मात्राको सेयर सूचिकृत भएको हो । त्यसमध्ये सबैभन्दा बढी हकप्रद सेयर थपिएका छन् । २ कम्पनीको गरी २ करोड २१ लाख ८३ हजार कित्ता सेयर नेप्सेमा सूचिकृत भएका छन् । हकप्रद सेयर सूचिकृत गर्नेमा पोखरा फाइनान्स र प्रभु बैंक लि. रहेका छन् । त्यस्तै, कूल सूचिकृत सेयर मध्ये विभिन्न ७ कम्पनीको ६८ लाख ६९ हजार कित्ता बोनस सेयर नेप्सेमा थपिएका छन् । जसमध्ये सबैभन्दा बढी शाइन रेसुङ्गा डेभलपमेन्ट बैंकको २७ लाख ५७ हजार २३१ कित्ता बोनस सेयर रहेको छ ।
२० वर्ष पुराना गाडी हटाउनेबारे पुर्नविचार हुन्छ: मन्त्री महासेठ
काठमाडौं । यातायातमन्त्री रघुविर महासेठले २० वर्ष पुराना गाडीलाई पुन सञ्चालनमा ल्याउने बताएका छन् । २० वर्ष पुराना गाडी चलाउन पाउनु पर्ने व्यवसायीको मागलाई सम्बोधन गर्दै यस विषयमा पुन विचार गर्ने बताएका हुन् । महासेठले २० वर्ष पुराना सवारी साधन हटाउने विषयमाआफूले पुनःविचार गर्ने बताए । “२० वर्ष पुराना गाडी हटाउने निर्णयका विषयमा हामी गम्भीर छौँ, चाँडै नै नयाँनीति बनाउँछौँ ।”उनले भने । यद्यपी पुराना गाडी कुनै न कुनै दिन हटाउनै पर्नेउनको तर्क छ । यसअघि नेपाल राष्ट्रिय यातायात सर्वोच्च महासंघले २० वर्ष पुराना गाडीले प्रदुषणको मापदण्ड पास गरे सञ्चालन गर्न पाउनु पर्ने र नयाँ सवारी खरिदमा करछुट दिनुपर्ने माग गरेका थिए ।
मार्जिन ट्रेडिङ कार्यविधि पास, जेठदेखि कारोबार सुबिधा, बढ्ला त सेयर बजार ?
काठमाडौं । नेपाल धितोपत्र बोर्डले मार्जिन ट्रेडिङ कार्यविधि पास गरेको छ । बिहीबार धितोपत्र बोर्ड सञ्चालक समितिले कार्यविधि पारित गरेको बोर्डका सहायक प्रवक्ता निरञ्जय घिमिरेले बताए । कार्यविधि पास भएसँगै आगामी जेठ महिनाभत्रै योग्यता पुगेका ब्रोकरहरुले मार्जिन कारोबार गर्न सक्ने भएका छन् । उक्त कार्यविधि तत्काल कार्यान्यनमा ल्याउन बाेर्डले जेठ ३ गते नै नेप्सेलाई निर्देशन दिएको छ । बाेर्डको निर्देशन बमोजिम नेप्सेले छिट्टै उक्त कार्यविधि कार्यान्वयनमा ल्याउने र सोबाट धितोपत्रको दोस्रो बजारमा नयाँ अध्याय थपिने बोर्डको विश्वास छ । दक्षिण एसियाका कतिपय मुलुकहरुमा समेत कार्यान्वयनमा आइनसकेको यो सुविधाबाट दोस्रो बजारको तरलतामा अभिबृद्धि हुने, लगानीकर्ताहरुलाई शेयर खरिद बिक्री गर्न थप सहज हुने तथा धितोपत्र व्यवसायको दायरा समेत फराकिलो हुनगई धितोपत्र कारोवार बढी गतिशिल हुन मद्दत पुग्ने बोर्डको अपेक्षा रहेको छ । मार्जिन ट्रेडिङको सुबिधाले सेयर बजारको विकास र स्थायीत्वमा सहयोग पुग्ने अनुमान गरिएको छ । तर मार्जिन कारोबार सम्बन्धी निर्देशन अनुसार थोरै ब्रोकर कम्पनीले मात्रै यो सुबिधा दिन सक्ने सेयर ब्रोकरहरुको भनाई छ । अन्तर्राष्ट्रिय मूल्य र मान्यता अनुरुप लगानीकर्तालाई मार्जिन कारोवार सुविधा उपलब्ध गराउने तथा धितोपत्र दलाल व्यवसायीको कार्यक्षेत्र विस्तार गर्ने उद्देश्यले बोर्डले मार्जिन कारोवार सुविधा सम्बन्धी निर्देशन २०७४ र कार्यविधि २०७५ जारी गरेको बोर्डले जनाएको छ ।
एनआईसी एशियाले ल्यायो कृषि तथा पर्यटन व्यवसाय कर्जा, ५ प्रतिशत व्याज अनुदान दिने
काठमाडौं । एनआईसी एशिया बैंकले हालै ‘कृषि ब्यवसाय कर्जा’ र ‘पर्यटन व्यवसाय कर्जा’ योजना सार्वजनिक गरेको छ । बैंकले कृषि तथा पर्यटन क्षेत्रमा लगानी बढाई यस क्षेत्रलाई सबल बनाउने उद्देश्यले उक्त योजना सार्वजनिक गरेको हो । कृषि तथा पर्यटन क्षेत्रमा स्व–व्यवसायलाई थप प्रबद्र्धन तथा भएको व्यवसायलाई विस्तार गर्ने योजना बनाईरहेका व्यवसायीहरुलाई साथ दिने उद्देश्यले बैंकले यो योजना ल्याएको र यस योजनाले कृषि तथा पर्यटन व्यवसाय बृद्धिमा थप टेवा पुर्याउने विश्वास लिएको छ । व्यवसायीक कृषि क्षेत्रमा निर्धारण गरिएको मापदण्ड पुरा गरेका कृषि उद्यमीलाई नेपाल सरकारको नीति बमोजिम ५ प्रतिशत व्याज अनुदानको लागि आवश्यक व्यवस्था मिलाउनुका साथै शुन्य प्रशासनिक शुल्कमा कर्जा प्रवाह गरिने यस योजनाबाट कृषि उद्यमीलाई आफ्नो व्यवसाय विस्तारमा लाभ पुगि मुलुकको कृषि क्षेत्रको विकासमा थप टेवा पुग्ने विश्वास बैंकले लिएको छ । उपरोक्त व्यवसायीक कृषि क्षेत्रमा निर्धारण गरिएको मापदण्ड भित्र नपर्ने कृषि तथा पर्यटन व्यवसायीहरुलाई समेत यस बैंकले सुलभ ब्याजदरमा कर्जाको व्यवस्था गरेको र सो बाट सम्पुर्ण कृषि तथा पर्यटन व्यवसायी लाभान्वित हुने बैंकको विश्वास छ ।
नागरिक लगानी कोषले ४२५ मा नकिन्ने भनेपछि एनएमबी बैंकको एफपीओ रोकियो, अब के होला ?
काठमाडौं । सेयर निष्कासन तथा बिक्री प्रवन्धक नागरिक लगानी कोषले प्रतिकित्ता ४२५ रुपैयाँमा थप निष्कासन (एफपीओ) नकिन्ने भएको छ । लगानी कोषले नकिन्ने भनेपछि एनएमबीको एफपीओ अन्यौलमा परेको छ । बैंकको एफपीओ निष्कासनको जिम्मा कोषले पाएको छ । लगानी कोष सञ्चालक समितिले प्रतिकित्ता ४२५ रुपैयाँमा प्रत्याभूति (अण्डरराइटिङ) गर्ने प्रस्ताव अस्वीकृत गरेपछि एफपीओ निष्कासन अन्यौलमा परेको हो ।बिक्री प्रवन्धक लगानी कोषले प्रतिकित्ता ४२५ रुपैयाँमा लिने मौखिक सहमति जनाएपछि एनएमबीले सोही दर प्रस्ताव गरेको थियो । तर कोषको सञ्चालक समितिले बैंकको यथास्थिती भन्दा बढी भएको भन्दै अस्वीकृत गरेपछि एफपीओको प्रक्रिया रोकिएको कोष स्रोतले बतायो । बुटबल पावर कम्पनी लिमिटेड (बीपीसी) को एफपीओ बढी मूल्य निर्धारण भएर बिक्री नभएपछि प्रत्याभूतिकर्ता मर्चेन्ट बैंकरले सकार्नुपरेको देखेपछि कोष सञ्चालक समितिले सो दरमा प्रत्याभूति गर्न नसक्ने भनेको हो । बीपीसीको ५५ करोड रुपैयाँ बराबरको एफपीओ बिक्री नभएपछि ८ वटा अण्डरराइटरले सकारेका थिए । ४२५ रुपैयाँ दर सञ्चालक समितिले अस्वीकृत गरेपछि कति दरमा गर्ने भन्ने विषयमा अझै सहमति जुटन नसकेको कोषे स्रोतको भनाई छ । चुक्तापूँजी न्युनतम् ८ करोड रुपैयाँ पुर्याउन बैंकले गत वर्षको जेठ २२ गते प्रिमियम मूल्यमा १ करोड १४ लाख १५ हजार १६३ कित्ता एफपीओ निष्कासन गर्न धितोपत्र बोर्डमा निवेदन दिएको थियो । एफपीओका लागि बैंक बोर्डमा गएको १ वर्ष पुगेको छ । बैंकले वार्षिक १५ प्रतिशत लाभांश दिने र सो बराबर लाभांश दिने बैंकको सेयर मूल्य ३०० रुपैयाँमा पाइने भन्दै सञ्चालक समितिले अस्वीकार गरेको स्रोतको भनाई छ । आउदो असारसम्म बैंकले न्युतम चुक्तापुँजी पुर्याउनु पर्ने छ । न्युनतम चुक्तापुँजी नपुगे निक्षेप संकलन, कर्जा लगानी, लाभांश वितरणमा प्रतिवन्ध लगाउने निर्देशन केन्द्रीय बैंकले जारी गरिसकेको छ । ८ अर्ब रुपैयाँ पुँजी नपुर्याउन वाणिज्य बैंकलाई केन्द्रीय बैंकले निगरानीमा राखेको छ । विषयमा नेपाल राष्ट्र बैंकको सञ्चालक समितिमा गम्भिर बहस शुरु भएको छ । बैंक अफ काठमाडौं, सिभिल बैंक, कुमारी बैंक, नेपाल क्रेडिट एन्ड कमर्श (एनसीसी) बैंक र एनएमबी बैंकको ८ अर्ब पुँजी पुगेको छैन । पुँजी नपुगेकै कारण उनीहरुलाई राष्ट्र बैंकले वार्षिक साधारणसभा गर्न अनुमति पनि दिएको छैन ।
सिन्धु विकास बैंकको ५ लाख ३५ हजार कित्ता संस्थापक हकप्रद लिलामीमा
काठमाडौं । सिन्धु विकास बैंकको संस्थापक हकप्रद सेयर लिलामी हुने भएको छ । बैंकको ५ लाख ३५ हजार ३०१ कित्ता हकप्रद सेयर बिक्री नभएपपिछ लिलामी प्रक्रियाबाट बेच्न लागिएको हो । खरिदका लागि बोलपत्र पेश जेठ ११ देखि सुरु भई २७ गतेसम्म तोकिएको छ । बोलपत्रका लागि आवेदन एनआईबीएल एस क्यापिटल लिमिटेडको लाजिम्पाट र लालदरबार, लगनखेल, चिप्लेढुङा, बुटलबल, बीरगञ्ज, र विराटनगरबाट पाइने छ । यस्तै नेपाल इन्भेष्टमेन्ट बैंकको सुर्खेत, नेपालगञ्ज, नारयणगढ र धनगढी शाखाबाट पाइने एनआईबीएल एसले जनाएको छ । बैंकले चुक्तापूँजी बढाउन गत भदौ १८ देखि कात्तिक ५ गतेसम्म बिक्री खुला गरेकोमा आवेदन नपरेको संस्थापक हकप्रद सेयर लिलामी गर्न लागेको हो ।
नविल ब्यालेन्स फण्ड १ खारेजीमा, बाँकी रहेका सेयर र ऋणपत्र स्वामित्व बोलकबोलबाट बिक्रीमा
काठमाडौं । नविल बैंकले नविल ब्यालेन्स फण्ड १ को स्वामित्वमा रहेको सेयर बिक्री गर्ने भएको छ । नविल कोष प्रवद्र्धक र नविल इन्भेष्टमेन्ट बैंकिङ लिमिटेड योजना व्यवस्थापक रहेको सामुहिक लगानी कोष (म्युचअल फण्ड) को गत चैत २९ गते परिपक्व भएकाले खारजीमा लैजान लागेको हो । परिपक्व भएको ३ महिनाभित्र इकाइ स्वामित्व खारेजीमा लैजानुअघि नगदमा प्ररिणत गरी सेयरधनीलाई फिर्ता दिने भएको छ । स्वामित्व बिक्रीका लागि आइतबारदेखि जेठ १३ गतेसम्म बोलपत्र पेश गर्न नविल इन्भेष्टमेन्टले भनेको छ । नेपाल स्टक एक्सचेन्ज लिमिटेडमा कारोबार भएका सबै इकाइ बिक्री भएको छ । यस्तै लगानीमा रहेका ऋणपत्र र डिबेञ्चरको समय अझै केही वर्ष बाँकी रहेकाले ब्यालेन्स फण्ड खारेजीमा जानुअघि बोलकबोलबाट बिक्री गर्न लागेको हो । सेयरको मूल्य प्रतिकित्ता १०० र ऋणपत्र न्युनतम १ हजार रुपैयाँ तोकिएको छ । हालै घोषित बोनस सेयर तथा सुचिकरण हुन बाँकी हकप्रद सेयर रहेको, केही सेयरहरुको बजारमा स्वच्छ र पर्याप्त माग नदेखिएको र केहीको मूल्य निर्धारण प्रक्रिया पुरा भइनसकेको र केहीको मर्जर प्रक्रियामा रहेर कारोबार रोक्का भएकाले यी सेयरलाई बोलकबोलबाट बिक्री गर्न लागेको नविल इन्भेष्टमेन्टले जनाएको छ । बोलकबोलबाट बिक्री गरेपछि सुचिकरण र कारोबार योग्य भएपछि खरिदकर्ताको नाम धितोपत्र नियमावलीअनुसार नामसारी गर्ने शर्तमा बिक्री गर्न लागेको नविलले जानकारी दिएको छ । नबिल ब्यालेन्स फण्ड आरम्भ माइक्रोफाइनान्स वित्तीय संस्था लिमिटेड, मेगा बैंक, स्वदेशी लघुवित्त वित्तीय संस्था लिमिटेड, सर्पोट माइक्रोफाइनान्स वित्तीय संस्था, टुरिजम डेभलपमेन्ट बैंक, उन्नती माइक्रोफाइनान्स वित्तीय संस्था, सेञ्चुरी कमर्शियल बैंक, डिप्रोक्स डेभलपमेन्ट बैंक, फस्र्ट माइक्रोफाइनान्स डेभलपमेन्ट बैंक, हिमालयन बैंक र मितेरी डेभलपमेन्ट बैंकमा लगानी रहेको छ । यस्तै नेको इन्स्याुेरेन्स कम्पनी लिमिटेड,नेपाल सेवा लघुवित्त वित्तीय संस्था, नेरुड लघुवित्त वित्तीय संस्था, निर्धन उत्थान विकास बैंक, एनएलजी इन्स्योरेन्स कम्पनी, ओम डेभलपमेन्ट बैंक, आरएसडीसी लघुवित्त वित्तीय संस्था, समता माइक्रोफाइनान्स वित्तीय संस्था, सामुदायिक लघुवित्त, साना किसान विकास बैंक, साइन रेसुङा डेभलपमेन्ट बैंक, सिद्धार्थ बैंक र सुर्योदय लघुवित्त वित्तीय संस्थामा लगानी रहेको नविलले जनाएको छ । यस्तै ब्यालेन्स फण्ड ग्लोबल बैंक, लक्ष्मी बैंक, बीओके डिबेञ्चरमा पनि लगानी रहेको छ । एसबीएल ऋणपत्र, एभरेष्ट बैंक ऋणपत्र र सिटिजन्स बैंकको ऋणपत्रमा पनि लगानी रहेको छ । यी ऋणपत्रको परिपक्व हुन समय अझै लाग्ने भएपछि पछि हस्तान्तरण हुने गरे इकाई बोलकबोलबाट बिक्री गर्न लागेको हो ।
