मापदण्डविपरीत सञ्चालनमा रहेको शान्ति चामल उद्योगलाई ५० हजार जरिवाना
बाँके । मापदण्डविपरीत सञ्चालनमा रहेको नेपालगञ्ज खजुरा रोडस्थित शान्ति चामल उद्योगलाई रु ५० हजार जरिवाना गरिएको छ । स्थलगत अनुगमन तथा निरीक्षणका क्रममा उद्योगले साइनबोर्ड, मूल्यसूची, उपभोग्य मिति, ब्याच नम्बर नराखेर कानूनविपरीत व्यवसाय सञ्चालन गरेको पाएपछि संयुक्त बजार अनुगमन टोलीले बुधबार तत्कालका लागि रु ५० हजार जरिवाना गराइएको वाणिज्य आपूर्ति तथा उपभोक्ता संरक्षण कार्यालय नेपालगञ्जका निमित्त प्रमुख कृष्णप्रसाद पौडेलले जानकारी दिएका छन् । अनुगमन टोलीले खजुरा रोडमै रहेको गोपाल सोप इण्डष्ट्रिद्वारा सञ्चालित सोडा उद्योगलाई साइनबोर्ड राखेर कारोवार गर्न सात दिनको म्यादसमेत दिएको छ । बाँकेका सहायक प्रमुख अधिकारी कृष्णकान्त उपाध्यायको नेतृत्वमा गएको टोलीमा खाद्य प्रविधि तथा गुण नियन्त्रण कार्यालय, राष्ट्रिय मानवअधिकार आयोग, उपभोक्ता हित संरक्षण मञ्च र प्रहरीलगायतको सहभागिता थियो । रासस
विदेशी लगानी प्रतिबद्धताको ओइरो, २ महिनामा ६ अर्बले बृद्धि
काठमाडौं । नेपालमा लगानी गर्न विदेशी लगानीकर्ताहरुको आर्कषण बढ्दै गएको छ । विदेशीले नेपालमा लगानी गर्न उपयुक्त वातारण छ भनेर बुझ्दै गएका छन् । चालु आर्थिक वर्षको सुरुवाती दुई महिनामा ६ अर्बले विदेशी लगानी प्रतिवद्धता बढेको छ । आर्थिक वर्ष २०७५/७६ को साउन र भदौमा ४ अर्ब २१ करोड ५० लाख मात्रै विदेशी लगानी प्रतिवद्धता आएको थियो भने चालु आर्थिक वर्षको साउन र भदौमा १० अर्ब १० करोड ९० लाख लगानी प्रतिवद्धता आएको छ । यो तथ्याङ्कले नेपालमा विदेशी लगानीकर्ताहरुको आकर्षण बढेको देखाउँछ । नेपालमा विदेशी लगानी मैत्री कानून निर्माण हुँदै जाँदा विदेशी लगानीकर्ता उत्साहित भएका छन् । सरकारले विदेशी लगानीकर्तालाई नेपालका लगानी बढाउन आग्रह गरिरहँदा स्वदेशी लगानी पनि वृद्धि हुँदै गएको छ । उद्योग विभागको तथ्याङ्क अनुसार चालु आवको साउन र भदौ महिनामा १० अर्ब १० करोड ९० लाखको लगानीमा ७० वटा उद्योग स्थापना गर्ने प्रतिबद्धता आएको छ । जसमा ३ हजार ८४१ जनालाई रोजगारी दिने प्रतिवद्धता जनाइएको छ । गत आर्थिक वर्षको सोही अवधिमा ४ अर्ब २१ करोड ५० लाखको लगानीमा १०८ वटा उद्योग दर्ता गर्ने प्रतिवद्धता आएको थियो । जसमा ४ हजार ३६२ जनालाई रोजगारी दिने प्रतिवद्धता गरिएको थियो । गत आर्थिक वर्षको तुलनामा यो आर्थिक वर्षमा उद्योग दर्ताको प्रतिबद्धता भने घटेको छ । गत आर्थिक वर्षमा १०८ वटा उद्योग स्थापना गर्ने प्रतिवद्धता आएको थियो भने चालु आवमा वर्षमा ७० वटा मात्रै उद्योग दर्ता गर्ने प्रतिवद्धता आएको छ । उद्योग विभागमा लगानीका विभिन्न प्रकृतिका उद्योग दर्ता हुँदै आएका छन् । विदेशी लगानीकर्ताहरु पर्यटनमूलक, उर्जामूलक र उत्पादनमूलक उद्योगमा बढी आकर्षण देखिन्छ । तथ्यांक अनुसार विभागमा प्रतिवद्धता गरेका विदेशी लगानीका उद्योगमा सबैभन्दा धेरै पर्यटन क्षेत्रका छन् । विभागमा दर्ता भएका विदेशी लगानी प्रतिबद्धताका ७० उद्योगमध्ये पर्यटन क्षेत्रका ३६ वटा छन् । सेवा क्षेत्रका २०, उत्पादनमूलक ७, सूचना प्रसारण तथा सञ्चार प्रविधिमा ६ वटा, र कृषिजन्यमा १ वटा उद्योग दर्ता गर्ने प्रतिवद्धता आएको छ । विदेशी लगानी शाखाका निर्देशक प्रशान्त बोहराले फिटा संसोधन पछि नेपालमा विदेशी लगानीकर्ताको आकर्षण बढेको बताए । उद्योग दर्ता सहज र सरल भएकाले लगानीमा प्रतिबद्धता बृद्धि भएकोे बताए । नेपाल उद्योग वाणिज्य महासघंका सदस्य तथा प्रदेश ३ का अध्यक्ष दिनेश श्रेष्ठले विदेशीले नेपालमा लगानीको वातावरण निर्माण हुँदै गएको बुझेर लगानी प्रतिवद्धतामा बृद्धि भएको बताए ।
गैरआवासीय नेपाली विश्व सम्मेलनको तयारी अन्तिम चरणमा
काठमाडौँ । ‘म, मेरो एनआरएन ए र मेरो नेपाल’ मूल विषयमा आधारित भएर यस वर्षको नवौँ गैरआवासीय नेपाली विश्व सम्मेलन तथा गैरआवासीय नेपाली सङ्घको अन्तरराष्ट्रिय महाधिवेशन असोजको २८ गतेदेखि ३० गतेसम्म काठमाडौँमा आयोजना गरिने भएको छ । यस वर्षको विश्व सम्मेलन पनि विगतमा झैँ नेपाल सरकार नेपाल उद्योग वाणिज्य महासङ्घ र गैरआवासीय नेपाली सङ्घको संयुक्त आयोजनामा हुन गइरहेको छ । उक्त सम्मेलन आयोजनाका लागि परराष्ट्र मन्त्रीको अध्यक्षतामा एक उच्चस्तरीय आयोजक समितिको गठन भइसकेको छ । यस आयोजक समितिमा नेपाल सरकारका प्रतिनिधि र सरोकारवाला सङ्घसंस्थाका अध्यक्ष रहेका छन् । सङ्घको आन्तरिक आयोजक समिति सङ्घका अध्यक्ष भवन भट्टको अध्यक्षतामा गठन भएको छ । सम्मेलन तथा महाधिवेशनसम्बन्धी तयारीका काम तदारुकताका साथ अघि बढी रहेका छन् । सम्मेलनको मूल विषय ‘म, मेरो एनआरएन ए र मेरो नेपाल’ मा आधारित भएर विभिन्न शत्रको आयोजना गरिने गैरआवासीय नेपाली सङ्घ अन्तरराष्ट्रिय समन्वय परिषद्का प्रवक्ता भुषण घिमिरेले जानकारी दिए । यसै सन्दर्भमा अफ्रिका, अमेरिका, एशिया प्रशान्त, युरोप, मध्यपूर्व र ओसेनिया क्षेत्रमा रहेका एनसिसीको महाधिवेशन सम्पन्न भई अन्तरराष्ट्रिय महाधिवेशन मतदान अधिकारसहितका प्रतिनिधि चयनको कार्य भइरहेका छन् । अन्तरराष्ट्रिय समन्वय परिषद्ले प्रतिनिधिको नामावली जसमा कूल मतदाताको सङ्ख्यामा २० प्रतिशत थप गरी यही ३० सेप्टेम्बरसम्म सचिवालयमा उपलब्ध गराउनुपर्ने गरी निर्णय गरेको छ र उक्त निर्णय राष्ट्रिय समन्वय परिषद्लाई गराइसकिएको छ । यसपछि एनसिसीले पठाएका प्रतिनिधिको नामावलीलाई अन्तिम रुप दिई मतदाताको नामावली प्रकशित गरिने भएको छ । त्यसपछि निर्वाचनको औपचारिक प्रक्रिया (मनोनयन, मनोनयनमाथि दाबी विरोध, उम्मेदवारको अन्तिम नामावली प्रकाशन, मतदान र मतगणना) गरिने छ । यी सम्पूर्ण प्रक्रिया १७ अक्टोबरभित्र पूरा हुने जनाइएको छ ।
टिकटमा उल्लेख भएको सिट पाइएन भन्ने गुुनासो आउन दिन्नौँ-यातायात व्यवसायी
काठमाडौँ । सार्वजनिक यातायात केन्द्रीय महासङ्घ नेपालले दशैँ, तिहार, छठलगायतका चाडपर्व मनाउन घर जाने र फर्कने यात्रुुले टिकट लिएको गाडी भेटिएन, टिकटमा उल्लेख गरेको सिट पाइएन र म ठगिए भन्ने अवस्था सिर्जना हुन नदिने प्रतिबद्धता जनाएको छ । महासङ्घको प्रदेश नं ३ कार्यालयको कोटेश्वरमा उद्घाटनका अवसरमा अध्यक्ष होमप्रसाद अधिकारीले महासङ्घको लोगो अङ्कित निलो ट्रयाकसुुट लगाएका व्यक्तिसँग आधिकारिक काउन्टरबाट टिकट लिएमा यात्रुुले दुुःख झेल्ने र ठगिनुपर्ने अवस्था नआउने स्पष्ट पारे । यात्रुुले अनावश्यक हैरानी खेप्नुु नपरोस् भन्ने हेतुुले लामा तथा मध्यम दूरीमा चल्ने महासङ्घ मातहतका सवारी साधनको टिकट काउन्टरमा बस्ने कर्मचारीको पहिचानका लागि पोशाक वितरण गरिएको उनले बताए । टिकट काउन्टरमा बस्ने करीब ५० जनालाई महासङ्घको लोगो अङ्कित पोशाक प्रदान गरिएको वरिष्ठ उपाध्यक्ष कृष्णबहादुर तिमिल्सिनाले जानकारी दिए । चाडपर्व मनाउन आफ्नो घर जान लागेका यात्रुुलाई टिकट काट्ने नाममा अनावश्यक दुुःख दिने, टिकट दिने सिट उपलब्ध नगराउने, यात्रुुलाई तानातान गरेर हैरानी बनाउने प्रवृत्तिलाई निरुत्साहन गर्न कर्मचारीलाई पोशाक वितरण गरिएको उपाध्यक्ष तिमिल्सिनाले बताए । मुुलुकमा विभिन्न भागमा सवारी साधन सञ्चालन गर्ने ८० भन्दा बढी विभिन्न यातायात प्रालि महासङ्घमा आबद्ध छन् । महासङ्घसँग आबद्ध प्रालिबाट लामो, मध्यम र छोटा दूरीका गरी करीव २० हजारको सङ्ख्यामा सवारी साधन सडकमा गुुड्दै आएको बताइएको छ । कार्यक्रममा महानगरीय ट्राफिक प्रहरी कार्यालयका प्रमुख भीमप्रसाद ढकालले यात्रुुलाई सुरक्षित ढङ्गबाट चाडपर्व मनाउन जाने र फर्कने वातावरण मिलाउने सरकारको नीतिलाई अनुुशरण गरेको भनी महासङ्घका पदाधिकारीलाई धन्यवाद दिए । यात्रुलाई सुुविधासाथ निर्धारित समयमा तोकिएको स्थानमा पुु¥याउन बिग्रिएका सडक र पुलपुुलेसा बाधक रहेको हुुँदा कतिपय स्थानमा तत्काल सुुधारको आवश्यकता देखिएको भनी सो अवसरमा यातायात व्यवसायीले सरकारको गम्भीर ध्यानाकर्षण गराए । रासस
ब्रुमर सञ्चालनको पाँच महिना, सडकको अवस्था उस्तै
काठमाडौँ । काठमाडौँ महानगरपालिकाले ब्रुमर सञ्चालन गरेको पाँच महिना बितिसक्दा पनि काठमाडौँको सडकमा कुनै परिवर्तन आउन सकेको छैन । सडकमा धुलो उस्तै रहेको देखिन्छ भने पानी परेको बेला हिलो पार गर्नुपर्ने काठमाडौँवासीको बाध्यता हो । नियमितजस्तो पानी परेकाले बु्रमर सञ्चालन गर्न समस्या भएको काठमाडौँ महानगरपालिकाले जनाएको छ । कामपाले बु्रमर सञ्चालन गरेको पाँच महिना भयो, महानगरको सडकमा धुलो कम भएको छैन । कामपा वतावरण विभागका अनुसार हरेक दिनजसो पानी पर्दा बु्रमरले नियमित सडक सफा गर्न पाएको छैन, जसका कारण जनअपेक्षाअनुसार धुलो कम हुन सकेको छैन् । कामपा वातावरण विभाग प्रमुख हरिकुमार श्रेष्ठका अनुसार एकातिर पानी परिरहेको छ भने अर्कातिर पानीको कारण हुने हिलो सफा गर्नु अर्को थप चुनौती हो । दैनिक १० टन धुलो सङ्कलन गर्दै आएका सात यान्त्रिकका कुँचोले अहिलेसम्ममा करीब ५०० टन धुलो सङ्कलन गरिसकेको श्रेष्ठको भनाइ छ । सङ्कलित धुलो टेकुमा व्यवस्थापन गरिएको पनि उनले जानकारी दिए । महानगरले सुन्दर, स्वच्छ र सफा शहर निर्माण गर्ने कार्यअनुरुप अत्याधुनिक यन्त्रबाट सडक सफा गर्न थाले पनि नगरवासीले सफा काठमाडौँको अनुभूति गर्न पाएका छैनन् । गत फागुन २८ गते इटालीबाट ल्याइएका पाँच र त्यसको केही समयपछि चीनको सहयोगमा आएको दुई गरी सात बु्रमर प्रयोगमा रहे पनि काठमाडौँको सडक सफा हुनसकेको छैन । सात वटै बु्रमर सञ्चालनका लागि कामपाले पाँच वटा रुट निर्धारण गरेको छ । सोही रुट अनुरुप काम गरिहेको भए पनि सबै दिनमा काम गर्ने वातावरण नहुँदा समस्या भएको बताइएको छ । प्रमुख श्रेष्ठका अनुसार अर्को प्रमुख समस्याको रुपमा सडकमा रहेका खाल्डाखुल्डी हो । यो समस्या समाधानका लागि सडक विभागले केही स्थानको सडकको खाल्डाखुल्डी पुर्ने काम गरे पनि धेरै स्थानको काम हुन बाँकी रहेको छ । जसका कारण बु्रमर सञ्चालन गर्न समस्या भएको छ । न्यूरोड, रत्नपार्क, जमल, कालीमाटी, कलङ्की, पुतलीसडक, बिजुलीबजारलगायतका स्थानमा खाल्डाखुल्डी रहेकाले महानगरले सडक विभागसँग पुर्न आग्रह गरेको छ । यसअघि विशिष्ट व्यक्तिको आवतजावत रहेका बेला सडक विभाग र कामपाले आपसी समन्वय गर्दै विभागसँग रहेका दुई ब्रुमरले सडक सफा गर्दै आएको थियो । महानगरसँग यसअघि रहेको एक बु्रमर पनि काम गर्न नमिल्ने अवस्थामा रहेको छ । उक्त यन्त्रले पानी नपरेको दिन साँझ ८ः०० बजेदेखि बिहान ४ः०० बजेसम्म सडक सफा गर्दै आएको छ । सञ्चालनमा रहेका ब्रुमर रु १० करोड ८० लाखमा ल्याइएको हो । ती ब्रुमर दैनिक १० किलोमिटरसम्मको धुलो सङ्कलन गर्नसक्ने क्षमताको रहेका छन् । यूरो मापदण्डका भनिएका उक्त ब्रुमरमा अगाडि, बीचमा र पछाडि भागको दायाँबायाँ गरी प्लाष्टिकका चार ब्रससहित धुलो तान्न सक्ने शक्तिशाली पाइप जडान गरिएका छन् । खाल्डाखुल्डी र भूकम्पका कारण भत्किएका संरचना पुनःनिर्माणको कामले पनि समस्या भएको विभागले जनाएको छ । मुख्य सडक सुन्धारास्थित धरहरा, दरबार हाइस्कूल, रानीपोखरी, काठमाडौँ भ्यूटावर र बसपार्कमा विभिन्न स्थानबाट आएका सवारी साधनले ल्याएका हिलो माटोका कारण सफा गर्न समस्या भएको विभागले जनाएको छ । कानूनीरुपमा आठ मिटरभन्दा कम चौडाइका सडक मात्र महानगरकोे जिम्मेवारीमा पर्दछन् भने अरु सडकहरु सडक विभागको मातहतमा रहेको छ । रासस
मेगाले गण्डकी विकास बैंकलाई प्राप्ती गर्ने सैद्धान्तिक सहमति
काठमाडौं । मेगा बैंक नेपालले गण्डकी विकास बैंकलाई प्राप्ती गर्ने सैद्धान्तिक सहमति भएको छ । मेगा बैंक सञ्चालक समितिका अध्यक्ष भोजबहादुर शाह र गण्डकी विकास बैंकका सञ्चालक समितिका अध्यक्ष शुशील गौचनले सैद्धान्तिक सहमतिपत्रमा आज हस्ताक्षर गरेका हुन् । यो प्राप्ती पश्चात् मेगा बैंकको पुँजी, व्यवसायको आकारका साथसाथै शाखा सञ्चालनमा बृहत वृद्धि भई देशकै एक ठूलो क वर्गको वाणिज्य बैंकको रुपमा स्थापित हुने मेगा बैंकका अध्यक्ष शाहले बताए । गण्डकी विकास बैंकको शेयर रोक्काको प्रक्रिया लगायत नेपाल राष्ट्र बैंक समक्ष संयुक्त निवेदन दर्ता गर्ने कार्य यथाशिघ्र अघि बढाइने उनले जानकारी दिए । उक्त सहमतिमा दुबै बैंकको सञ्चालक समितिका सदस्यहरु लगायत प्रमुख कार्यकारी अधिकृतहरुको उपस्थिति रहेको थियो । असार मसान्त २०७६ को तथ्यांक अनुसार दुबै बैंकको संयुक्त निक्षेपको आकार १ खर्ब १२ अर्ब रुपैयाँ तथा कर्जा लगानीको आकार ९८ अर्ब रुपैयाँ रहेको र हालको बैंकको शाखा १९१ पुगेको बैंकले जानकारी दिएको छ ।
नेपाल इन्स्योरेन्स उद्घोष, ‘दुई वर्षमा नम्बर वान बन्छौं, हात हातमा बीमा पोलिसी पुर्याउँछौ’
काठमाडौ । नेपाल इन्स्योरेन्स कम्पनी लिमिटेडले आगामी २ वर्षमा निर्जीवन बीमातर्फ नेपालको नम्बर वान बीमा कम्पनी बन्ने उद्घोष गरेको छ । ७२ वर्ष पुरा गरी ७३ औ वर्षमा प्रवेश गरेको अवसरमा बुधबार आयोजित पत्रकार सम्मेलनमा कम्पनीका प्रमुख कार्यकारी अधिकृत विजय बहादुर शाहले दुई वर्षमा नम्बर वान बन्ने आधारहरु समेत पेस गरेका छन् । ‘दुई वर्षपछि हामी प्लाटिनियम जुब्ली (हिरक महोत्सव) मनाउँदै छौ । त्यतिबेला हामी नेपालको टप थ्री कम्पनी बन्ने छौं । टप थ्री भित्र टप वान पनि हुन्छ’ सीईओ शाहले भने । ‘विगत दुई वर्षमा कम्पनीको व्यवसाय ६० प्रतिशतले वृद्धि भएको छ । आगामी दुई वर्षमा उच्च दरको वृद्धि हासिल गर्ने आधारहरु हामीले तयार गरिसकेका छौं’ शाहले भने । प्रमुख कार्यकारी अधिकृतको घोषणालाई कम्पनीको अध्यक्ष अर्जुन पौडेल शर्माले समर्थत गरे । ‘नेपाल इन्स्योरेन्स कम्पनीको साधारणसभाले सञ्चालक समितिलाई मर्जर तथा एक्जिशनको अख्तियारी दिएको छ । हामीले मर्जर कमिटि बनाएर काम थालेका छौं’ अध्यक्ष शर्माले भने–‘बीमा कम्पनीको संख्या बढी नै भएको भन्ने महसुश बजारले गरेको छ । नियामक निकाय बीमा समितिको चाहानालाई समेत ध्यानमा राखेर हामीले मर्जर प्रक्रियालाई प्राथमिकतामा राखेका छौं ।’ आक्रामक बजार विस्तर र मर्जरको प्रक्रियाबाट दुई वर्षमा नेपालको सबैभन्दा ठूलो बीमा कम्पनी बन्ने अध्यक्ष र सीईओको भनाई रहेको छ । ‘हवाई बीमाको बीमा शुल्क बढी भएपनि पुर्नबीमामा ९९.५ प्रतिशत जान्छ । हामीले हवाई बीमामा जोड नदिएकोले बीमा शुल्कको आधारमा हामी टप थ्री बन्न नसकौला, अरु सबै परिसूचकको आधारमा हामी टप थ्री, हुन सक्स टप वान बन्ने छौं’ सीईओ शाहले भने । स्थापनाको आधारमा सबैभन्दा जेष्ठ कम्पनी रहेको नेपाल इन्स्योरेन्स कम्पनीका सेवाको आधारममा श्रेष्ठ बन्ने उनको दावी छ । ‘साईबर क्राइम इन्स्योरेन्स हामीले नै पहिलो पटक ल्याएका छौं । हामी बीमालाई गाउँ गाउँ पुर्याउछौ भनिरहेका छैनौ, प्रविधिको प्रयोग गरेर सबैको हातहातमा बीमा पुर्याउने रणनीतिक योजनासहित हामी अगाडि बढेको छौ’ शाहले भने । कम्पनीका नायब महाप्रबन्धक बिक्रान्त पाण्डेले नेपाल इस्योरेन्स कम्पनीले लामो इतिहास बोकेको जनाउँदै भने–‘इतिहासले विश्वास बोक्छ । विश्वासको आधारमा नै बीमा व्यवसाय संचालन हुन्छ । नेपाल इन्स्योरेन्सले सबै नेपालीको विश्वास जितेको छ । कर्मचारीहरु पुरस्कृत ७२ औ वार्षिक उत्सवको अवसरमा नेपाल इन्स्योरेन्सले आयोजना गरेको अर्को कार्यक्रममा कम्पनीमा २५ वर्षसम्म काम गर्ने कर्मचारीलाई दीर्घ सेवा पदक, २० वर्षसम्म काम गर्ने कर्मचारीलाई प्रशंसा पत्र तथा उत्कृष्ट कर्मचारीहरुलाई समेत नगद पुरस्कार प्रदान गरिएको थियो । कार्यक्रममा नेपाल इस्योरेन्स कम्पनीका विरागटनगर, हेटौडा, धनगढी, सतुङ्गल, न्युरोड, तथा कम्पनीको प्रधान कार्यालय कर्मचारीहरु पुरस्कृत भएका हुन् ।
३ महिनाभित्र एकीकृत कारोबार गर्न निर्देशन दिंदै राष्ट्र बैंकले दियो ग्लोबल र जनतालाई एलओआई
काठमाडौं । नेपाल राष्ट्र बैंकले ३ महिनाभित्र एकीकृत कारोबार गर्न निर्देशन दिंदै ग्लोबल आईएमई बैंक र जनताको मर्जर गर्न सैद्दान्तिक सहमति (एलओआई) दिएको छ । केही दिन अघि बसेको राष्ट्र बैंक संचालक समितिको बैठकले ग्लोबल आइएमई बैंक र जनता बैंकको मर्जरलाई सैद्दान्तिक सहमति दिएको हो । बुधबार दुई बैंक मर्जर जानका लागि सैद्दान्तिक सहमतिको पत्र आएको ग्लोबल बैंकका अध्यक्ष चन्द्र ढकालले बताए । ‘बैंकहरूको डीडीए यसै साता सम्पन्न हुँदैछ,’ उनले भने ‘ढिलोमा पनि हामी मंसिर आधासम्म एकीकृत कारोबारमा गइसक्छौ ।’ ग्लोबल आइएमई र जनता बैंकबीच मर्जरको सम्झौतालाई सैद्दान्तिक सहमति दिँदै तीन महिनाभित्र एकीकृत कारोबार गर्नुपर्ने निर्देशन दिएको राष्ट्र बैंकले जानकारी दिएको छ । ग्लोबल आइएमई र जनता बैंकले एक आपसमा मर्जरमा जाने सम्झौता गत असारमा नै गरेका थिए ।