विकासन्युज

‘हिरोे एक्सपल्स २००’, नेपाली बजारमा सस्तो मूल्यमै स्तरीय एडभेन्चर बाइक

काठमाडाैं । हिरोको नेपालका लागि आधिकारिक विक्रेता नेपाल जेनेरल मार्केटिङ्गले हिरोको नयाँ उत्पादन ‘एक्सपल्स २००’ लाई तीन लाख ८५ हजार रुपैयाँ मूल्य तोक्दै नेपाली बजारमा केहि दिन अघि बाटविक्री वितरण शुरु गरेको छ । ‘एक्सपल्स २००’ एउटा अफरोड मोटरसाइकल हो जसलाई भ्रमणमा जान रुचाउने युवा पुस्तालाई लक्षित गरी निर्माण गरिएको हो । हाइ माउण्टेड मडगार्ड, अफरोडिङ्ग नव्बी टायर्स, इञ्जिन गार्ड, विन्ड सिल्ड, माथिपट्टि लगाइएको एक्जस्ट पाइप र नकल गार्डस् लगायतका फिचर्सले यस बाइकलाई एउटा उत्कृष्ट अफरोड मेशिन बनाएको छ । यस बाइकको अफरोडिङ्ग विशेषतालाई ध्यानमा राखेर कम्पनीले यसमा २२० मिलिमिटरको ग्राउण्ड क्लियरेन्स र त्यसैगरी अगाडि २१ इञ्चको र पछाडि भने १८ इञ्चको स्पोक व्हिल्स दिएको छ । यी ठूला चक्काहरुले जस्तोसुकै अप्ठ्याराहरुलाई पनि पार गरेर अगाडि बढ्न सक्छ । खास फिचरको रुपमा एक्सपल्स २०० मा ब्लूतुथ कनेक्टिभिटी र नेभिगेसनको फिचर सहितको फूल डिजिटल इन्स्ट्रुमेन्ट कन्सोल दिइएको छ । यस बाइकमा २०० सीसीको सिङ्गल सिलिण्डर, २ भल्भ, एयर–कुल्ड कार्बुरेटेड इञ्जिन समावेस गरिएको छ जसले १८.४ पिएसको पावर र १७.१ एनएमको टर्क प्रोड्युस गर्दछ । त्यसैगरी यस बाइकमा ट्रान्समिशन ड्यूटीको काम चाहिँ ५–स्पिड गियरबक्सले गर्दछ । दुवै चक्कामा डिस्क ब्रेक दिइएको यस बाइकमा सेफ्टि फिचरका रुपमा सिङ्गल च्यानल एबीएस दिइएको छ । त्यसैगरीअगाडि १९० मिलिमिटर सस्पेन्सन ट्राभल भएको टेलिस्कपिक फर्क दिइएको छ भने पछाडि चाहिँ १०–स्टेप एड्जस्टेवल मोनोसक पनि दिइएको छ । सिएट टायर्स प्रयोग भएको हिरो एक्सपल्स २०० को निर्माण क्वालिटी मजबुत रहेको कम्पनीको दावी छ । यस बाइकले नेपाली बजारमा होण्डाको एक्सआर १५० एल, रोयल इन्फिल्डको हिमालयन, यामाहाको एक्सटिजेड १२५ जस्ता मोडेलहरुसँग प्रतिष्पर्धा गर्नेछ ।

निर्माण सामग्रीमा ठगिँदै उपभोक्ता, २३ सञ्चालक पक्राउ, ३५ गाडी नियन्त्रणमा

काठमाडौँ । अन्यत्र जस्तै पछिल्लो समय निर्माण सामग्री ‘सप्लाई’ गर्ने व्यवसायीले उपभोक्तालाई ठगी गर्दै आएको खुलेको छ । उनीहरुले गाडीमा ढुङ्गा, गिटी, बालुवा वा इँट्टा कम राख्न मिल्ने बनाएर उपभोक्तालाई ठगी गर्दै आएको पाइएको हो । सर्वसाधारणहरुलाई निर्माण सामग्री इँट्टा, गिट्टी, बालुवा, चिप्स र ढुङ्गा ढुवानी गर्ने मिनि ट्रकहरुमा परिमाण कम राख्न मिल्ने गरी पाँच इन्चसम्मको फलामे र काठको बक्स बनाइ ठगी गरेको पाइएको महानगरीय अपराध नियन्त्रण महाशाखाका प्रमुख सहकुलबहादुर थापाले जानकारी दिए । उनले यो पनि एक प्रकारको फल्स बटम बनाएर गरिएको ठगी जस्तै भएको बताए । काठमाडौँको स्वयम्भू, बालाजु र महाराजगञ्जमा गरिएको खोजी अभियानका क्रममा आज बिहान २३ डिपोका सञ्चालकलाई पक्राउ गरिएको थापाले जानकारी दिए । उनीहरुले त्यसरी प्रयोग गरिएको ३५ मिनि ट्रकलाई रङ्गेहात नै फेला पारी नियन्त्रणमा लिइएको छ । काठमाडौँ उपत्यकामा भएका अन्य डिपोका सञ्चालकसमेत खोजी भइरहेको बताए । पक्राउ पर्ने जयमहालक्ष्मी सप्लायर्सका प्रकाश श्रेष्ठ, बज्र इन्टरप्राइजेज सप्लायर्सका वीरेन्द्र कुँइकेल, शिवशक्ति सप्लायर्सका अर्जुन भुजेल, गरिमा सप्लायर्सका दीपेन्द्र केसी, कामना इन्टरप्राइजेजका बद्री गिरी, जेबिएस सप्लायर्सका बाघे भन्ने सुकबहादुर लामा, शुभकामना सप्लायर्सका सुरेन्द्र केसी, खाँडादेवी निर्माण सप्लायर्सका प्रकाश भण्डारी, सेतीदेवी सप्लायर्सका राजु थापा र पञ्चेश्वर सप्लायर्सका महेश्वर श्रेष्ठ रहेका छन् । यस्तै धनेश्वर सप्लायर्सका सन्तोष कुँवर, श्रीभूमि सप्लायर्सका श्यामबहादुर मगर, नो नेम सप्लायर्सका पुष्कर थापा, श्रीकाली भैरव सप्लायर्सका वुद्धिराज थापामगर, कुण्डला सप्लायर्सका मदन प्रधान, कालिका सप्लायर्सका तोपनारायण श्रेष्ठ, आर्कष सप्लायर्सका अर्जुन श्रेष्ठ, स्वयम्भू सप्लायर्सका कृष्णहरि नगरकोटी, महालक्ष्मी सप्लायर्सका मनोहर श्रेष्ठ, भ्याली क्वालिटी सप्लायर्सका विजय भन्ने जोगबहादुर तामाङ, गोरखाली सप्लायर्सका गोपाल भण्डारी, विज्ञान सप्लायर्सका सिंहबहादुर तामाङ र नवअरुण सप्लायर्सका रामकृष्ण श्रेष्ठसमेत पक्राउ परेका छन् । महानगरीय अपराध महाशाखा टेकुबाट खटिएको प्रहरीले लोड गरी ढुवानी गर्न तयारी अवस्थामा रहेका सामग्रीसहित सवारीसाधन समेत नियन्त्रणमा लिएको छ । यस्तो गुनासो आएपछि अनुसन्धानका लागि टोली खटाइएको थियो । ग्राहकहरुलाई १०० क्यूफिट ढुवानी भनि बिक्री गर्दा जम्मा ८२ दशमलब ६३ क्यूफिट मात्र सामग्री ढुवानी हुने गरेको र प्रति ढुवानीमा एक हजार ६२० रुपैयाँदेखि दुई हजार २०० रुपैयाँसम्म ग्राहकहरुलाई नोक्सानी हुने प्रारम्भिक अनुसन्धानबाट खुल्न आएको महाशाखाले जनाएको छ । एक टिपमा झण्डै २०० इँट्टा कम हुने देखिएको प्रहरीले जनाएको छ । महाशाखा प्रमुख थापाले भन्नुभयो, “एकै टिपमा यति धेरै ठगी छ भने एउटा घर बनाउँदा उपभोक्ता कति ठगिन्छन् होला ।” आज भएको पत्रकार सम्मेलनमा बोल्दै महाशाखाका प्रमुख थापाले केही उजुरी प्राप्त भएको र बाँकी रहेका पीडित सर्वसाधारणलाई पनि जाहेरी दिन आग्रह गरे । उनीहरुलाई ठगी मुद्दा चलाउने तयारी प्रहरीले गरेको छ । उक्त मुद्दामा दोषी ठहर भए पाँच वर्ष जेल र बिगो बराबरको जरिवाना हुने कानूनी व्यवस्था छ । यस्तो ठगी अन्य जिल्लामा पनि हुन सक्ने भएकाले कारवाही अभियान देशव्यापी बनाउने प्रहरीले जनाएको छ । रासस

दुहबी-कटहरी प्रसारण लाइन ४५ दिनभित्रमा सम्पन्न गरिने

काठमााडोँ । विवादको भूमरीमा फसेको दुहबी–कटहरी प्रसारण लाइन आगामी ४५ दिनभत्र निर्माण सक्ने गरी सहमति भएको छ । सो प्रसारण लाइनको क्षमता ३३ केभी रहेको छ । मोरङको ग्रामथान गाउँपालिकास्थित गिदनीय टोलका स्थानीयले करीब तीन किलोमिटर तार तान्न नदिएपछि निर्माणमा अवरोध भएको थियो । अवरोध हटाउन प्रदेश–१ का मुख्यमन्त्री शेरधन राईले शुक्रबार त्यस क्षेत्रका सङ्घीय सांसद अमनलाल मोदी, प्राधिकरणका कार्यकारी निर्देशक कुलमान घिसिङ, गाउँपालिका अध्यक्ष, उद्योग सङ्गठन मोरङका अध्यक्ष भीम घिमिरेलगायतसँग छलफल गरेका गर्नुभएपछि उक्त सहमति भएको हो । छलफलमा प्रसारण लाइन निर्माणको अवरोध हटाउन आवश्यक प्राविधिक पक्षको अध्ययन गरी ४५ दिनभित्रमा निर्माण सक्ने निर्णय गरिएको मुख्यमन्त्री राईले जानकारी दिए । “यो प्रसारण लाइन बन्न नसन्दा मोरङका उद्योग तथा आम उपभोक्तालाई गुणस्तरीय र भरपर्दो विद्युत् पाउन सकिरहेका छैनन्, त्यसैले विधि सम्वत् रुपमा समस्या समाधान गरी निर्माण तत्काल शुरु गरौँ”, उनले भने, “तारलाई भूमिगत गर्ने या अन्य विकल्प के के हुन्छन् प्राविधिक विकल्पको तत्काल खोजी गरी ४५ दिनभित्र काम सम्पन्न गरौँ, यसका लागि सम्पूर्ण उपायहरु अपनाइने छ ।” मुख्य मन्त्री राईले निर्माणमा अवरोध हटेपछि समस्या समाधान गर्न पहल गर्दै यसअघि मोरङ क्षेत्र नम्बर ४ का सङ्घीय सांसद अमनलाल मोदीसहित ग्रामथान गाउँपालिका अध्यक्ष, उद्योगी, व्यवसायी लगायतसँग छलफल गरेका थिए । आज भएको छलफलमा सांसद मोदीले यो प्रसारण लाइन निर्माणमा आफूले कहिले पनि अपरोध नगरेको प्रष्ट पारे । “प्रसारण लाइन निर्माणमा मोदीले पैसा मागेर अवरोध गर्यो भन्ने सम्मका गलत आरोप म माथि लगाइयो, तर मैलै अवरोध गरको छैन, लाइन निर्माण हुनुपर्छ भन्दै शुरुबाटै निरन्तर सहयोग गरिरहेको व्यक्तिमाथि झुटो आरोप लगाइयो”, उनले भने, “यस्ता आरोपमा कुनै सत्यता छैन, लाइन निर्माण गर्न तत्काल शुरु गरौँ यसमा मेरो पूर्ण सहयोग रहने छ ।” प्राधिकरणका कार्यकारी निर्देशक घिसिङले त्यस क्षेत्रमा विद्युत् आपूर्तिलाई सुधार गर्न पहल गरिने बताउनुभयो । प्राधिकरणले कहिले पनि प्रसारण लाइन निर्माणमा सङ्घीय सांसदले पैसा मागेर अवरोध गरेको नभनेको स्पष्ट पारे । प्रसारण लाइनको ग्रामथानको गिदनीय टोलमा तीन किलोमिटर क्षेत्रमा बाहेक सबै स्थानमा लाइन निर्माण भइसकेको छ । सबस्टेसन निर्माण भइसकेको छ । तीन किलोमिटर तार तानिसकिएपछि प्रसारण लाइन र सबस्टेसनको चार्ज गरी सञ्चालनमा ल्याइने छ । उद्योग सङ्गठन मोरङ अध्यक्ष घिमिरेले विद्युत्भार कटौतीको अन्त्य भए पनि ट्रिपिङ र लो भोल्टेज लगायतको समस्या समाधान नभएकाले उद्योगी÷व्यवसायीले ठूलोे आर्थिक नोक्सानी व्यर्होनु परिरहेको गुनासो गरे । अहिले कटहरी क्षेत्रमा टंकीसिनबारी र विराटनगर रानी सबस्टेसनको ११ केभी प्रसारण लाइनबाट विद्युत् आपूर्ति भइरहेको छ । टंकिसिनबारी सबस्टेसन अब थप लोड धान्न सक्ने अवस्थामा छैन । दुहबी–कटहरीको ३३ केभी प्रसारण लाइन सञ्चालनमा आउना साथ कटहरी–रंगेली करिडोरमा देखिएको विद्युत् आपूर्तिको समस्या समाधान हुन्छ, विराटनगरमा समेत भोल्टेजको समस्या देखिँदैन । रासस

एनआईबीएल र इसेवा फोन पेबीच अनलाईन भुक्तानी सम्झौता

काठमाडौँ । नेपालको पहिलो पेमेन्ट गेटवे इसेवा फोन पे प्रालि र नेपाल इन्भेष्टमेन्ट बैंक लिमिटेड(एनआईबीएल) बीच अनलाइन भुक्तानी सम्झौता भएको छ । सम्झौतासँगै अब नेपाल इन्भेष्टमेन्ट बैंकबाट इसेवामा रकम लोड गर्न तथा विभिन्न वस्तु तथा सेवाहरूको सहजै भुक्तानी गर्न सकिनेछ । ग्राहकहरूले बैंकको इन्टरनेट बैंकिङ तथा कुनै पनि शाखा मार्फत सहजै इसेवामा रकम लोड गर्न सक्नेछन् भने इसेवा खातामा भएको रकम पनि सिधै बैंकमा जम्मा गर्न सक्नेछन् । इसेवाबाट मोबाईल रिचार्ज, टेलिफोन, इन्टरनेट, बिजुली तथा खानेपानीको महशुल भुक्तानी, हवाइ जहाज तथा बसको टिकट, विद्यालय/क्याम्पसको शुल्क भुक्तानी, होटेल र रेष्टुरेण्टको बिल भुक्तानी लगायत विभिन्न सुविधा उपभोग गर्न सकिनेछ । पछिल्लो समयमा इसेवाले क्युआरकोड मार्फत गरिने भुक्तानीलाई प्रवद्र्धन गरिरहेको छ । हाल इसेवामा ५५ हजार क्युआर मर्चेन्ट आबद्ध भइसकेका छन् भने क्युआर कोडमा इसेवाले आकर्षक क्यास ब्याक तथा छुटको व्यवस्था समेत गरेको छ । अबदेखि नेपाल इन्भेष्टमेन्ट बैंकका ग्राहकले इसेवामा पैसा लोड गरी सजिलै क्युआर कोड मार्फत भुक्तानीको सुविधा पनि लिन सक्नेछन् ।

नेपाल चेम्बर र पीएचडी चेम्बरबीच व्यापार तथा लगानी अभिवृद्धि सम्बन्धी छलफल

काठमाडौँ । भारत भ्रमणको अवसरमा नयाँदिल्ली स्थित पिएचडी चेम्बर अफकमर्स एण्ड इन्ड्रष्ट्रिजले आयोजना गरेको कार्यक्रममा नेपाल चेम्बर अफ कमर्सका अध्यक्ष राजेशकाजी श्रेष्ठले संबोधन गरेका छन् । उक्त अवसरमा उनले द्धिपक्षीय व्यापारमा पारवहन ढुवानी लागत घटाउनु पर्ने, सिमावर्ती क्षेत्रका चेम्बरहरु बीच सहकार्य गराउनु पर्ने, व्यापार मेला÷प्रर्दशनीमा सहभागिता जनाउनु पर्ने र चेम्बरले आउदो फागुनमा आयोजना गर्ने नेपाल चेम्बर एक्पोमा भारतीय उद्योगी व्यवसायीको सहभागिता जनाउन अनुरोध गरे । नेपालका लागि भारतीय राजदूत मन्जिभसिंह पुरीको प्रमुख आतित्थ्यतामा सम्पन्न भएको सो कार्यक्रमा नेपालका लागि पूर्व राजदूत तथा इन्डिया नेपाल सेन्टर, पीएचडीका अध्यक्ष के.भी. राजनले नेपालसँग भारतको घनिष्ट सम्बन्ध रहेको बताए । यसबाट लगानी र व्यापार एवम् आर्थिक कृयाकलापमा वृद्धि गर्न यस्ता कार्यक्रमले ठोस सहयोग पुर्याउने बताए । साथै उनले इन्डिया नेपाल सेन्टरको स्थापनामा चेम्बर सह संयोजक भई कार्य गरिरहेको र यसमा आगामी दिनहरुमा थप तीब्रता आउने आशा एवम् विश्वास व्यक्त गरे । उक्त अवसरमा पीएचडी चेम्बर अफ कमर्स एण्ड इन्ड्रष्ट्रिजका अध्यक्ष डा. डिके अग्रवालले भारतको नेपालसँग परापूर्वकालदेखि साँस्कृतिक, आर्थिक एवम् व्यापारिक सम्बन्ध रहेको र दुई चेम्बरबीच सहकार्य गरी यो सम्बन्ध अघि बढी मजबुतगर्न लगानी, पर्यटन व्यापारमा जोड दिन आफू र आफ्नो संस्था इन्डिया नेपाल सेन्टर मार्फत र द्धिपक्षीय रुपमा समेत तयार रहेको बतए । सो अवसरमा नयाँदिल्ली स्थित नेपाली राजदुतावासका मिनिष्टर (इकोनोमिक) नीता पोखरेल अर्याल, नेपाली व्यवासायिक प्रतिनिधि मण्डलका सदस्यहरु उद्यमी, व्यवशायी, रिभर्सबायर सेलर मिटका सहभागी प्रतिनिधिहरुको समेत उपस्थिती थियो ।

एभरेष्ट बैंकले मनायो रजत जयन्ती

काठमाडौँ । एभरेष्ट बैंकले २५औं स्थापना दिवसको अवसरमा शुक्रबार लाजिम्पाटस्थीत प्रधान कार्यलयमा नर्भिक इन्टरनेशनल अस्पताल र नेपाल रेडक्रस सोसाइटीको सहकार्यमा विभिन्न संस्थागत सामाजिक उत्तरदायित्व कार्यक्रमहरुको आयोजना गरेको छ । बैंकले रक्तदान कार्यक्रम, निशुल्क स्वास्थ्य जाँच तथा नर्भिक अस्पतालका डाक्टर यादव भट्टसँग टक सो सञ्चालन गरेको थियो । समारोहमा बोर्ड अफ डिरेक्टर, प्रमुख कार्यकारी अधिकृत तथा वरिष्ठ अधिकारीहरुको उपस्थीति रहेको थियो । १ हजारभन्दा बढीको उपस्थीति रहेको उक्त कार्यक्रममा करिब १ सय जनाले रक्तदान गरेका थिए । सोही कार्यक्रममा बैंकले स्थापनाकालदेखि नै सेवा पुर्याइरहेका कर्मचारीहरुलाई सम्मानित गरेको छ । यसबाहेक, सबै प्रदेशमा रहेको बैंकका शाखाहरुमा पनि पुराना ग्राहकहरुलाई सम्मान गर्दै केक काटेर २५ औं वार्षिकउत्सव मनाइएको छ ।

जगदम्बा मोटर्सको ‘टिभिएस सुपर एक्सचेञ्ज फाइनान्स फेयर’ शुरु, कात्तिक ५ गतेसम्म सञ्चालन हुने

काठमाडौं । नेपालको लागि टिभिएस टू ह्वीलर्सको एकमात्र आधिकारिक वितरक जगदम्बा मोटर्सले एक भव्य फाइनान्स मेला “टिभिएस एक्सचेञ्ज एण्ड फाइनान्स फेयर”को आयोजना गरेको छ । उक्त मेलाको कात्तिक १ गते नेपाली क्रिकेट टिममा भूतपूर्व कप्तान पारस खड्काले उद्घाटन गरेका हुन् । कात्तिक १ गतेदेखि ५ गतेसम्म भृकुटीमण्डप, काठमाडौंमा संचालन हुने यो मेलाको प्रमुख आकर्षण नै ग्राहकहरुले ३० प्रतिशत डाउन पेमेन्टको उत्कृष्ट फाइनान्स सुविधा, एक्स्चेञ्जमा थप रु.१०,०००/- मुल्याङ्कन जस्ता उत्कृष्ट अफरहरु रहने छन् । मेलाको अन्य आकर्षणहरुमा शुन्य प्रतिशत ब्याजमा विशेष फाइनान्स योजना र साथमा विभिन्न उपहारहरु हेलमेट, बाइक कभर र ब्याग पनि रहेका छन् । कुनैपनि पुरानो मोटरसाइकल वा स्कूटरको बदलामा टिभिएसको नयाँ मोटरसाइकल वा स्कुटर साट्न सकिने यो अनुपम योजनाले टिभिएससँग नाता जोड्न चाहने नयाँ ग्राहकहरुलाई सुनौलो अवसर प्रदान गरेको छ भने पुराना टिभिएस ग्राहकले आफ्नो बाइकको स्तरोन्नति गर्ने मौका पाएका छन् । योजना सञ्चालन गर्नुको उद्देश्य माथि प्रकाश पार्दै जगदम्बा मोटर्सका प्रबन्ध निर्देशक शाहिल अग्रवालले भने–“हामीले यतिखेर ग्राहकहरुमाझ टिभिएस दशैंको दौड जस्तो पहिले नभएको विशेष अफर पेश गरिरहेका छौं र यो योजना प्रति ग्राहकहरुको झुकावले हामीलाई थप हौसला पनि मिलेको छ । यसै सिलसिलामा सोही अफरकै एक हिस्सा स्वरुप यो एक्स्चेञ्ज फेयर आयोजना गरेका छौं–उनले भने । ग्राहकले “टिभिएस दशैंको दौड” योजना अन्तर्गत बाइक नकिन्दा नै १ लाखसम्म नगद जित्न सक्नेछन् भने किन्दा १०० प्र्रतिशत नै नगद फिर्ता पाउन पनि सक्नेछन् । साथमा अन्य आकर्षक उपहारहरु पनि यस योजनामा प्राप्त गर्न सकिन्छ । टिभिएसले निरन्तर रुपमा आफ्ना ग्राहकहरुलाई पैसाको उत्कृष्ट मुल्य र सेवाहरु जस्तैंः ५ वर्षको वारेन्टी, स्थलगत एक्स्चेञ्ज, स्थलगत फाइनान्स र अन्य धेरै सुविधा प्रदान गर्दै आएको छ । देशभर १०० भन्दा बढी डिलरहरुको सञ्जालमार्फत् आफ्ना ग्राहकहरुको मुहारमा मुस्कान फैलाउन टिभिएसले आफ्ना दक्ष र तालिम प्राप्त जनशक्ति परिचालन गर्दै आएको कम्पनीले जनाएको छ ।

अमेरिकामा विश्व बैंकलाई अर्थमन्त्री खतिवडाको आग्रह-‘चरम गरिबी हटाउन सहायता बढाउ’

काठमाडौँ । अर्थमन्त्री डा. युवराज खतिवडा, नेपाल राष्ट्र बैंकका गभर्नर डा. चिरञ्जीवी नेपाल र प्रतिनिधिमण्डलका अन्य सदस्यहरुले संयुक्त राज्य अमेरिकाको वासिङ्गटन डिसीमा आयोजित अन्तर्राष्ट्रिय मुद्रा कोष तथा विश्व बैंक समूहको दक्षिणपूर्वी एशिया मतदान समूहको संयुक्त वार्षिक बैठकमा सहभागिता जनाएका छन् । विश्व बैंकले नेपालमा सहायता गरेको पचास वर्ष पुगेको उपलक्ष्यमा आयोजित विशेष कार्यक्रममा अर्थमन्त्री डा. खतिवडाले विश्व बैंकले नेपालमा सहायता परिचालन गर्दा विगतमा लिएका कतिपय रणनीति प्राथमिकताहरुको विषयमा चर्चा गर्दै नेपालको प्राथमिकता अनुसार चरम गरिबी केही वर्ष भित्रमा हटाउने र आम जनताको औषत आयु एसिया प्रशान्त क्षेत्रको औषत आयु बराबर पुर्याई गुणस्तरीय जीवन यापन गर्न सक्ने बनाउन बैंकको सहायता राशीमा उल्लेखनीय बृद्धि गर्न जरुरी रहेको बताए । बैंकबाट प्राप्त हुने सहायतालाई उच्चतम प्रतिफल प्राप्त हुने क्षेत्रमा लगानी गर्ने र ऋण माथिको निर्भरता कम गर्न तुरुन्तै प्रतिफल दिने क्षेत्रमा सहायता परिचालन गर्ने नीति नेपाल सरकारले लिएको बताउँदै अर्थमन्त्री खतिवडाले प्राप्त हुने सहायताको पूर्ण सदुपयोग हुने विश्वास दिलाए । विश्व बैंकका उपाध्यक्ष हार्टविक सेफर र अन्तर्राष्ट्रिय वित्त निगमका उपाध्यक्षले नेपालले विगतमा बैंकको सहयोगमा विभिन्न क्षेत्रमा गरेको प्रगतिको चर्चा गर्दै गत वर्ष नेपाल दक्षिण एसियाकै राम्रो प्रगति गर्ने मुलुक हुन सफल भएकोमा उच्च प्रशंशा अझै धेरै साझेदारी गर्न बाँकी रहेको बताए । नेपालमा वित्तीय संघीयताको कार्यान्वयनको अनुभव आदान प्रदान गर्ने कार्यक्रममा विश्व बैंकका उपाध्यक्ष हार्टविक सेफरले नेपालले छोटो सयममा वित्तीय संघियता कार्यान्वयन गर्न सफल भएकोमा प्रशंशा गरे । उक्त कार्यक्रमको अध्यक्षता गर्दै अर्थमन्त्री खतिवडाले वित्तीय संघीयताको कार्यान्वयनका सम्बन्धमा विविध पक्षमा प्रकाश पारे भने भने नेपालमा वित्तीय संघीयताको कार्यान्वयन खास गरी अन्तर सरकारी वित्त हस्तान्तरण तथा राजश्व बाँडफाँड लगायतको विषयमा नेपाल सरकारका सचिव डा. बैकुण्ठ अर्यालले प्रस्तुतीकरण गरे । विश्व बैंक समूह र अन्तर्राष्ट्रिय मुद्राकोषको संयुक्त वार्षिक वैठकमा सहभागी हुन आएको अवसरमा दक्षिण एसियाली क्षेत्रीय सहयोग संगठनका अर्थमन्त्रीहरुको १४ औं अनौपचारिक वैठकको अध्यक्षता गर्दै अर्थमन्त्री खतिवडाले यस क्षेत्रको आर्थिक बृद्धिका लागि व्यापार सहजीकरण जरुरी रहको बताए । यस क्षेत्रमा अन्तर देशीय सडक लगायत हवाई सञ्जालको पर्याप्त विकास हुन सकेमा यसले आर्थिक बृद्धिमा योगदान पुर्याउने उनले बताए । यस क्षेत्रमा भौतिक पूर्वाधारको पर्याप्त विकास नहुनु नै व्यापार सहजीकरणको लागि बाधक रहेको बताउँदै अर्थमन्त्री खतिवडाले विश्व बैंक जस्ता अन्तर्राष्ट्रिय दातृ निकायहरुको सहयोगबाट अन्तर देशीय सडक सञ्चालनको लागि पूर्वाधारहरुको विकास गर्न मद्दत पुग्ने बताए । दक्षिण एसिया क्षेत्रमा सडकको अतिरिक्त हवाई सेवाको सञ्जाल विकास गरी अन्तर आवद्धता बढाउनु जरुरी रहेको बताउँदै उनले यसबाट पर्यटन क्षेत्रको विकासमा टेवा पुग्ने साथै यसबाट आर्थिक वृद्धिमा परिपुरक भूमिका रहने बताए । साथै यस क्षेत्रको व्यापार सहजीकरणका लागि भुक्तानी सहजीकरण पनि अत्यावश्यक रहेको बताए ।