विकासन्युज

मारुती सुजुकीको ‘एस-प्रेसो’ नेपालमा सार्वजनिक हुँदै, यस्ता छन् विशेषता

काठमाडौँ । मारुती सुजुकीको नेपालका लागि आधिकारिक विक्रेता सीजी मोटोकर्प प्रालिले मारुती सुजुकीको बिल्कुलै नयाँ उत्पादन एस-प्रेसोलाई नेपाली बजारमा चाँडै नै सार्वजनिक गर्ने भएको छ । यकिन मिति नतोकिए पनि सो कार मंसिर पहिलो हप्ता सम्ममा सार्वजनिक भइसक्ने कम्पनीले जनाएको छ । करिब एक महिना अघि भारतमा सार्वजनिक गरिएको यो मिनि एसयुभि स्ट्याण्डर्ड, एलएक्सआइ, भिएक्सआइ र भिएक्सआइ प्लस गरी ४ अलग भेरियन्टहरुका साथ नेपाली बजारमा उपलब्ध हुनेछ र यसको सुरुवाती मूल्य चाहिँ २२ लाख ९९ हजार रुपैयाँ तोकिने छ । एबिएस, ड्राइभर–साइड एयरब्याग, रियर पार्किङ्ग सेन्सर्स, सिट बेल्ट रिमाइन्डर्स, डिजिटल स्पिडोमिटर र स्पिड अलर्ट सिस्टम जस्ता फिचरहरु यस कारका सवै भेरियन्टमा दिइएको छ भने पेसेन्जर साइड एयरव्याग, म्यानुअल एयरकण्डिस्नर, भ्वाइस रेकोग्निशन सहितको ७.० इञ्च टचस्क्रिन इन्फोटेन्मेन्ट सिस्टम, स्टेयरिङ्ग माउण्टेड कन्ट्रोल्स, रियर पार्सल ट्रे र १२ भोल्टको सकेट जस्ता फिचरहरु चाहिँ एस–प्रेसोका अलि महँगा भेरियन्टहरुमा मात्र पाउन सकिन्छ । यस कारमा प्रयोग भएको इञ्जिन बिएस६–कम्प्लाएन्ट १.० लिटर पेट्रोल इञ्जिन हो जसले ६८ एचपीको पावर र ९० एनएमको टर्क प्रोड्युस गर्दछ । यस कारमा ५–स्पिड म्यानुअल ट्रान्समिशन दिइएको छ भने यस कारले २१.४ केएमपीएलको माइलेज दिन्छ । त्यसैगरी ५ सिटर यस मिनि एसयुभिको अगाडिको चक्कामा डिस्क ब्रेक र पछाडिको चक्कामा चाहिँ ड्रम ब्रेक दिइएको छ ।

बढी शुल्क लिने मेडिकल कलेजमाथि ठगी मुद्दा चलाइने, गुनासाे दर्ता गर्न विद्यार्थीलाई आह्वान

काठमाडौँ । तोकिएभन्दा बढी शुल्क लिने मेडिकल कलेजविरुद्ध किटानी उजुरी परेमा ठगी मुद्दामा कारवाही गर्न शिक्षा, विज्ञान तथा प्रविधि मन्त्रालय र चिकित्सा शिक्षा आयोगले तदारुकता देखाएको छ । विभिन्न मेडिकल कलेजले बढी शुल्क लिएको आवाज उठिरहेको र कतिपय मेडिकल कलेजले आफूखुशी शुल्क लिन नपाए एमबिबिएसको भर्ना नलिने धम्की दिइरहेका बेला मन्त्रालयले र आयोगले आज सम्बन्धित पीडित पक्षलाई किटानी उजुरी दिन आव्हान गरेको हो । चर्काे शुल्क लिइएको विरोधमा चितवन, पोखरा, भैरहवालगायत क्षेत्रमा विद्यार्थीले आन्दोलन गरिरहेका छन् । “कुनै पनि पक्षबाट कुनै पनि बहानामा सरकारले तोकेको शुल्कको अवज्ञा हुने स्थिति आएमा किटानी उजुरीका आधारमा प्रचलित कानूनबमोजिम नेपाल सरकार कानूनी कारवाही गर्न बाध्य हुने स्थिति सिर्जना हुने व्यहोरा जानकारी गराइन्छ ।” मन्त्रालय र आयोगले आज संयुक्तरुपमा जारी गरेको विज्ञप्तिमा स्पष्ट भनिएको छ, “विद्यार्थी तथा तिनका अभिभावकबाट तोकिएको भन्दा बढी शुल्क लिइएको भए सम्बन्धित जिल्ला प्रशासन कार्यालयमा प्रमाणसहित उजुरी गर्नु सम्बद्ध सबैमा पुनःअनुरोध छ । नियमितरुपमा अध्ययन तथा अध्यापन एवं स्वास्थ्य सेवा प्रवाह गर्ने व्यवस्था मिलाउन सम्बन्धित सबैमा हार्दिक अनुरोध छ ।” यस विषयमा मन्त्रालय र आयोगले गृह मन्त्रालयसँग छलफल गरी त्यसरी किटानी उजुरी आएमा कारवाही गर्न आग्रह गरिसकेको छ । आयोगका सदस्यसचिव डा हरिप्रसाद लम्सालले आफूहरुले छलफल गर्दा प्रचलित कानूनबमोजिम बढी शुल्क लिनेलाई ठगीकै मुद्दा चल्नुपर्ने देखिएको बताए । चिकित्सा शिक्षामा अध्ययनरत विद्यार्थीको शुल्क सम्बन्धमा सरकारले गरेको शिक्षण शुल्कको रकममा नेपाल राष्ट्र बैंकले प्रकाशित गरेको आर्थिक वर्ष २०७५ को मुद्रास्फीतिदर ४.५ प्रतिशतलाई आधार मानी विश्वविद्यालय, प्रतिष्ठान तथा शिक्षण संस्थासँगको परामर्शपछि आयोगको यही कात्तिक १ गतेको निर्णयबमोजिम शैक्षिकसत्र २०७६/७७ का लागि एमबिबिएसतर्फ काठमाडौँ उपत्यकाभित्रका लागि रु ४० लाख २३ हजार २५० र उपत्यका बाहिरका लागि रु ४४ लाख ३६ हजार २५ एवं बिडिएसतर्फ रु २० लाख १९ हजार ५८० कायम गरिएको छ । मन्त्रिपरिषद्को २०७५ असोज २८ को निर्णयबाट शैक्षिक सत्र २०७५/७६ का लागि एमबिबिएसतर्फ काठमाडौँ उपत्यकाभित्रका लागि रु ३८ लाख ५० हजार र उपत्यका बाहिरका लागि रु ४२ लाख ४५ हजार एवं बिडिएसतर्फ रु १९ लाख ३२ हजार ६१२ कायम गरिएको थियो । सो निर्णयविपरीत कुनै पनि कलेजले विद्यार्थीसँग बढी शुल्क लिएमा विद्यार्थी वा अभिभावकले सम्बन्धित जिल्ला प्रशासन कार्यालयमा उजुरी दिइ सम्बन्धित विश्वविद्यालय र प्रतिष्ठानमा सोको जानकारी गराउन तथा सो उजुरी उपर जिल्ला प्रशासन कार्यालयले प्रचलित कानूनबमोजिम छानविन गरी कारवाही गर्नसमेत उक्त निर्णयमा उल्लेख भएको थियो । नेपाल सरकारले गरेको उक्त निर्णय कार्यान्वयनका लागि मिति २०७५ कात्तिक ०४ मा मन्त्रालयबाट सबै विश्वविद्यालय तथा प्रतिष्ठानलाई अनुरोध गरिसकेको थियो । आयोगले आगामी शैक्षिकसत्रका लागि सम्बन्धित क्षेत्रका विषय विज्ञसहित शिक्षण संस्था समेतको प्रतिनिधित्व भएको कार्यदल गठन गरी दिगो ढङ्गले शुल्क प्रणाली निर्धारण गर्ने कार्य अघि बढाउन प्रक्रिया थालिसकेको सन्दर्भमा शैक्षिकसत्र २०७६/७७ को विद्यार्थी भर्ना र शुल्क कार्यान्वयनमा आयोगको पूर्वनिर्णय कार्यान्वयनका लागि मन्त्रालयका सहसचिव दीपक शर्मा र आयोगका सदस्यसचिव डा लम्सालले जारी गरेको विज्ञप्तिमा आग्रह गरिएको छ । सरकारको उक्त निर्णयबमोजिम विद्यार्थी र तिनका अभिभावकको उजुरी उपर छानविन गरी कारवाही गर्न मन्त्रालयबाट सम्बन्धित जिल्ला प्रशासन कार्यालयलाई २०७५ कात्तिक १२ मा पत्र लेखिएको थियो भने यसबारे शिक्षामन्त्री गिरिराजमणि पोखरेलले सम्बन्धित विश्वविद्यालयका उपकुलपतिलाई लिखित निर्देशन दिइसक्नुभएको छ । आयोग गठन भएपश्चात् चिकित्सा शिक्षाको सुधारका निमित्त प्रणाली स्थापनको कार्यको शुरुको वर्तमान सङ्क्रमणकालीन परिवेशलाई समेत मध्यनजर गरी आयोग र मन्त्रालयको पहलमा विश्वविद्यालय, प्रतिष्ठान र मेडिकल कलेज सञ्चालकसँग पनि पटकपटक छलफल जारी छ ।  रासस

३३ करोड बिगो सहित २ भारतीय बिरुद्ध राजश्व अनुसन्धानले दायर गर्यो मुद्दा

काठमाडौं । राजश्व अनुसन्धान विभागले नेपाली रुपैयाँको अबैध कारोबारमा संलग्न २ भारतीय विरुद्ध ३३ करोड ३२ लाख बिगो सहित मुद्दा दायर गरेको छ । विभागले भारतीय नागरिक रितेश कुमार मधेसिया र निरज अग्रहरी विरुद्ध रुपन्देही जिल्ला अदालतमा मुद्धा दायर गरेको जनाएको छ । विभागले उनीहरुसँग ३८ लाख ९३ हजार एक सय रुपैयाँ नगद समेत बरामद गरेको छ । भारतबाट नेपाली रुपैयाँ ल्याई विभिन्न नेपाली बैंकहरुमा १६ करोड २५ लाख १२ हजार ३ सय १३ रुपैयाँ जम्मा गरेका छन् । एक जनाले नेपाल आउँदा र जाँदा ५ हजार भन्दा बढी रकम लिएर आउन वा विदेश जान नपाउने व्यवस्था छ ।

घुम्ती बीमा कार्यक्रम संचालन गर्दै बीमा समिति, सातै दिन २४ घण्टा सेवा दिने तयारी

काठमाडौं । बीमा समितिले आगामी कात्र्तिक २१,२२ र २३ गते घुम्ती बीमा कार्यक्रम संचालन गर्ने भएको छ । समितिले प्रदेश–२ को जनकपुरमा तीन दिनसम्म उक्त सेवा संचालन गर्न लागेको समितिका कार्यकारी निर्देशक राजुरमण पौडेलले बताए । पाइलटिङको रुपमा आयोजना गर्न लागिएको उक्त कार्यक्रम अवधिमा २४ घण्टा सेवा दिने उनले बताए । ‘मुलुक भरी नै बीमा चेतनामा वृद्धी गर्न हामीले घुम्त्ती बीमा कार्यक्रम संचालन गर्न लागेका हौं,’ उनले भने यो कार्यक्रम पाइलटिङको रुपमा गर्न लागिएको हो ।’ आगामी दिनमा यस्तै सेवा सबै प्रदेशमा पुर्याउने समितिको उदेश्य रहेको छ । नेपाल राष्ट्र बैकको शाखारहित बैकिङसँग मिल्दोजुल्दो अवधारणा अनुरुप समितिले सो घुम्ती कार्यक्रम अघि बढाएको हो । घुम्त्ती बीमा सम्बन्धि नीति भने बीमा समितिले ल्याइसकेको भने छैन । यद्यपि बीमा समितिमा घुम्ती बीमा सम्बन्धी छलफल भने हुन थालेको समितिले बताएको छ । घुम्ती बीमा नीति आएपछि त्यसैको आधारमा बीमा कम्पनीहरूले स्विकृतिका लागि आफ्ना पोलिसी बीमा समितिमा ल्याउँने पाइएको छ । नीति बनेपछि सोही नीतिको आधारमा बीमा कम्पनीहरूले बीमा सेवा प्रदान गर्न सक्छन् । शाखा विना नै बीमा सेवा प्रदान गर्न बीमा समितिले यस्तो अवधारणा अघि सारेको उनले बताए । बीमा समितिले आगामी दिनमा २४ सै घण्टा बीमा सेवा दिन आवश्यक रहेको बताएको छ । बीमितहरुले बीमा सेवा लिँदा निवार्द सातै दिन २४ सै घण्टा पाउनु पर्छ भन्ने हो,’ उनले भने । घुम्ती बीमा भनेको बीमित उभिएको र बीमिति बसेको ठाउँमै पुग्ने बीमा भएको बीमा समितिले जनाएको छ । साथै, उक्त घुम्त्ती बीमा मार्फत बीमितले बीमा गराउँदा थप शुल्क बुझाउनु पर्दैन । बीमितले बैकमा चेक लिइ, लाइन बसेर बिमाङ्क भुक्तान गर्दा बढी समय लाग्ने भएकोले घुम्ती बीमाले बिमकलाई राहत दिने बताइएको छ । बीमा समितिका अध्यक्ष चिरञ्जीबि चाँपागाई मार्फत सो कार्यक्रमको शुभारम्भ हुनेछ ।

सानिमा बैंकको नाफा १४ प्रतिशतले बढ्यो, कर्जा प्रवाह ८३ अर्ब ५२ करोड

काठमाडौं । सानिमा बैंकको नाफा १४.४० प्रतिशतले बढेको छ । गत साउनदेखि असोजसम्म बैंकले ५९ करोड ३६ लाख रुपैयाँ नाफा कमाएको छ । जुन अघिल्लो वर्षको तुलनामा ७ करोड ४७ लाख रुपैयाँ बढी हो । बैंकले अघिल्लो वर्षको सोही अवधिमा ५१ करोड ८८ लाख रुपैयाँ नाफा कमाएको थियो । चालु आवको तीन महिनासम्ममा बैंकले निक्षेपतर्फ साढे ६ अर्ब वृद्धि गर्दा कर्जा प्रवाह दुई अर्ब ११ करोडले बढाएको छ । बैंकको निक्षेप संकलन ९५ अर्ब ९२ करोड हुँदा कर्जा प्रवाह ८३ अर्ब ५२ करोड रहेको छ । बैंकको जगेडा कोषमा दुई अर्ब ५४ करोड रुपैयाँ रहेको छ । जुन अघिल्लो वर्षको सोही अवधिको तुलनामा ३१ करोड २३ लाख रुपैयाँ बढी हो । अघिल्लो वर्षको तीन महिनामा बैंकको जगेडा कोषमा दुई अर्ब २३ करोड रुपैयाँ रहेको थियो । असोज मसान्तसम्म बैंकले दुई अर्ब ९६ करोड रुपैयाँ व्याज आम्दानी गरेको छ भने एक अर्ब ८१ करोड रुपैयाँ व्याज खर्च गरेको छ । बैंकको कस्ट अफ फण्ड ७.२२ प्रतिशत, बेसरेट ९.२१ प्रतिशत र सीसीडी रेसियो ७८.८४ प्रतिशत रहेको छ । त्यस्तै, पुँजी पर्याप्तता अनुपात भने १२.६६ प्रतिशत रहेको छ । बैंकको ब्याजको स्प्रेडदर ४.४४ प्रतिशत रहेको छ । त्यस्तै, बैंकको प्रतिसेयर आम्दानी २६.४७ रुपैयाँ रहेको छ । गत साउनदेखि असोज मसान्तसम्म ६३ दिन कारोबार भएको बैंकको १२ लाख २९ हजार ७१० कित्ता सेयर किनबेच भएको थियो । सो अवधिमा बैंकको सेयर प्रतिकित्ता ३०० रुपैयाँदेखि ३६१ रुपैयाँको बीचमा कारोबार भएको थियो ।

राष्ट्र बैंक सञ्चालक समिति बैठकद्वारा ४ वित्तीय संस्थालाई मर्जरको स्वीकृति

काठमाडौं । नेपाल राष्ट्र बैंकको सञ्चालक समिति बैठकले चार वटा वित्तीय संस्थालाई मर्जरको स्वीकृति दिएको छ । समिति बैठकले तिनाउ मिसन डेभलपमेन्ट बैंकलाई नेपाल कम्युनिटी डेभलपमेन्ट बैंकलाई प्राप्ति गर्ने अन्तिम स्वीकृति दिएको हो । यसैगरी मनकामना लघुवित्तसँग स्मार्ट लघुवित्त गाभ्न सैद्धान्तिक स्वीकृति दिइएको राष्ट्र बैंक श्रोतले जनाएको छ । सञ्चालक समिति बैठकको भोलि पनि बस्ने जनाइएको छ । आजको बैठकमा राष्ट्र बैंकका डेपुटी गभर्नर शिवराज श्रेष्ठ माथि लागेको अनियमितताको आरोप बारे छलफल भएपनि निर्णय हुने सकेन र भोलिको बैठकमा ठोस निर्णय हुने राष्ट्र बैंक श्रोतले जनाएको छ ।  

सातै प्रदेशमा टिभिएस अपाचे सप्तरङ्ग सिरिज २ हुने

काठमाडौँ । टिभिएस टु ह्वीलरको नेपालस्थित एक आधिकरिक वितरक जगदम्बा मोटर्स प्रालिको सक्रियतामा यसपटक देशको सातै प्रदेशमा टिभिएस अपाचे सप्तरङ्ग सिरिज २ सम्पन्न हुने भएको छ । यस मनोरञ्जनात्मक कार्यक्रमको उद्घाटन सातै प्रदेशका मुख्यमन्त्रीहरुले गर्नेछन् । सप्तरङ्गको पहिलो शृँखलाको लोकप्रियताबाट हौसिएको आयोजक संस्था ग्रीष्मा ब्रोडकाष्टिङ्गको आयोजना रहेको यो संगीतमय मनोरन्जनात्मक कार्यक्रम देशको सातवटै प्रदेशमा क्रमशः यही २०७६ कात्तिक २१ गतेदेखि मंसिर ४ गतेसम्म प्रस्तुत गरिनेछ । कार्यक्रममा विभिन्न गीतसंगीतका साथसाथै नृत्य, प्रहसन आदि पनि समावेश गरिएका छन् । यस साँगीतिक कार्यक्रमको प्रमुख आकर्षण महानायक राजेश हमाल रहने छन् भनें साथमा जितु नेपाल, गायक सुगम पोखरेल लगायतका चर्चित कलाकारहरुले आ-आफ्नो प्रस्तुति दिने जनाइएको छ । नेपाललाई सन् २०२० मा भ्रमण वर्षको रुपमा मनाउन लागेको सन्दर्भमा पर्यटन प्रवद्र्धन र समुन्नतिका लागि भन्ने नाराका साथ आयोजना गरिएको यस कार्यक्रमले भ्रमण वर्षको लक्ष्य प्राप्तीमा सहयोग पु¥याउने अपेक्षा पनि गरिएको छ ।

दुर्घटना अपडेटः सुकुटे बस दुर्घटनामा मृत्यु हुने १३ पुगे

मेलम्ची । अरनिको राजमार्गअन्तर्गत सुकुटेमा भएको बस दुर्घटनामा मृत्यु हुनेको सङ्ख्या १३ पुगेको छ । मुडे देउरालीबाट काठमाडौँका लागि छुटेको वा२ख ७२४५ नंको यात्रुवाहक बस सुनकोशी नदीमा खसेको हो । दश जनाको भने घटनास्थलमै मृत्यु भएको प्रहरीले जनाएको छ । अहिले नेपाल प्रहरी, सशस्त्र प्रहरी र स्थानीयवासी उद्धारमा जुटिरहेको स्थानीयवासी ढकप्रसाद तिमिल्सनाले जानकारी दिए । उनका अनुसार केही शव खोलाले बगाएको छ । दुर्घटनाग्रस्त बस सुनकोशी खोलामा डुबेको छ । बसमा ४० भन्दा बढी सवार थिए । जिल्ला प्रहरी कार्यालय सिन्धुपाल्चोकका प्रहरी नायब उपरीक्षक माधवप्रसाद काफ्लेका अनुसार दुर्घटना ठूलो भएकाले क्षति बढ्न सक्नेछ । उनले अहिले उद्धार जारी रहेको जानकारी दिए । घाइतेलाई सिन्धु सहाबहार अस्पताल तथा गम्भीर घाइतेलाई काठमाडौँ लगिएको सशस्त्र प्रहरीका प्रहरी नायब निरीक्षक भूपाल खत्रीले जानकारी दिए । घटनाको विस्तृत विवरण आउन बाँकी छ । रासस