ठूला रेमिट्यान्स कम्पनी मर्ज हुँदै, कारोबार मासिक ३० अर्ब बढी
काठमाडौं । आइएमई लिमिटेड र जीएमई रेमिटको साउन ३० गते एकीकृत कारोबार हुने भएको छ । आइएमईले जीएमई रेमिटलाई प्राप्ति गरेपछि अब दुई कम्पनी एक भई आइएमई लिमिटेडको नामबाट कारोबार हुने भएको हो । बैकिङ क्षेत्रमा सबैभन्दा धेरै र ठूला मर्ज गराउन सफल चन्द्रप्रसाद ढकालले रेमिट्यान्स क्षेत्रमा पनि पहिलो मर्ज गराउन लागेका हुन् । मर्जपछि कम्पनीको चुक्ता पुँजी एक अर्ब १५ करोड रुपैयाँ हुने छ । हाल आईएमईको पुँजी ९० करोड र जीएमईको पुँजी २५ करोड रुपैयाँ छ । रेमिट्यान्स कारोबार रकमका आधारमा आईएमई पहिलो र जीएमई तेस्रो ठूला कम्पनी हुन् । मर्जपछि कम्पनीको कारोबार मासिक ३० अर्बभन्दा बढी हुने अनुमान छ । आइएमई देशकै सबैभन्दा बढी रेमिट्यान्स भित्र्याउने कम्पनी हो भने जीएमई जापान र कोरियाबाट सबैभन्दा बढी रेमिट्यान्स भित्र्याउने कम्पनी हो । मर्जपछि कम्पनीले १० प्रतिशत सेयर सार्वसाधारणका लागि निष्काशन गर्ने प्रक्रिया अगाडि बढाएको छ । आईपीओ निष्कासनका लागि धितोपत्र निष्कासन तथा बिक्री प्रबन्धकका रूपमा प्रभु क्यापिटल लिमिटेडलाई नियुक्त गरिसकेको छ । अनुमतिका लागि नेपाल धितोपत्र बोर्डमा पनि गइसकेको छ । सेबोनले अनुमति दिने वित्तिकै कम्पनीले आईपीओ ल्याउने बताएको छ । यी दुवै कम्पनीको गत जेठमा भएको साधारणसभाले एक आपसमा गाभ्ने तथा गाभिने सम्बन्धि प्रस्ताव पारित गरेका थिए । सोही प्रस्तावअनुसार साउन ३० गते एकीकृत कारोबार हुने भएको हो । नेपालमा रेमिट्यान्सको माध्यमबाट ठूलो योगदान दिँदै आएको आइएमई लिमिटेड इन्टर नेशनल मनि एक्सप्रेसको दुनियाँमा पर्यावाची नै बनेको छ । नेपालमा दुई दशकदेखि रेमिट्यान्स सेवा दिंदै आएको यस कम्पनीले हजारौंलाई रोजगारी दिएको छ । यस कम्पनीको अध्यक्ष हाल चन्द्रप्रसाद ढकाल छन् । एकीकृत कारोबार पछि भने सो कम्पनीको अध्यक्ष हेमराज ढकाल बन्नेछन् । आईएमईले प्राथमिक सेयर (आईपीओ) पनि सार्वजनिक गर्ने तयारी गरिरहेको छ । नेपालको पहिलो रेमिट्यान्स कम्पनी, देश तथा विदेशमा सबैभन्दा ठूलो नेटवर्क, सबैभन्दा धेरै सेवाग्राही, सबैभन्दा धेरै रेमिट्यान्स कारोबार गर्ने र सरकारलाई पनि सबैभन्दा बढी कर बुझाउने रेमिट्यान्स कम्पनीको रुपमा स्थापित यो कम्पनीको व्यवस्थापकिय नेतृत्व खिलेन्द्र पौडेलले गरिरहेका छन् । पछिल्लो समय यस कम्पनीले रेमिट्यान्स सेवासँगै डिजिटल प्रविधिमा पनि प्राथमिकता दिइरहेको छ । डिजिटल प्रविधिको विकास, प्रयोग तथा प्रतिस्पर्धाले लागतलाई अझ कम गर्ने रणनीतिलाई आत्मसात गर्दै कम्पनीले सेवाग्राहीहरूलाई कम लागतमै रेमिट्यान्स पठाउने तथा प्राप्त गर्ने अवस्था सिर्जना गर्न काम गरिरहेको बताएको छ । जीएमई रेमिट पनि विप्रेषणको बजारमा छोटो समयमा ठूलो फड्को मारेको कम्पनीमध्ये पर्छ । विदेशमा रहेका लाखौं नेपालीको रेमिट्यान्सलाई सहज रुपमा नेपाल भित्र्याउनका लागि यस कम्पनीले ठूलो भूमिका खेलिरहेको छ । विश्वका विभिन्न रेमिट कम्पनीहरुसँग समझदारी गरेर जीएमईले पनि आफ्नो बजारलाई थप विस्तार र प्रभावकारी बनाउँदै आएको छ । जीएमईले बहराइन, साइप्रस, हङकङ, अष्ट्रेलिया, अमेरिका, यूएई, कतार र कुवेतमा आफ्नो व्यापार तथा नेटवर्क विस्तार गरेको छ । हाल जीएमईको व्यवस्थापकीय नेतृत्व दिवाकर पौडेलले गरिरहेका छन् भने सञ्चालक समितिको नेतृत्व अर्जुन पौडेल शर्माले गरिरहेका छन् । अब आइएमई र जीएमई एक भएर थप प्रभाकारी ढंगले काम गर्ने रणनीति बनाएका छन् ।
के हुन्छ बाँसबारी जग्गाकाे कराडौंको संरचना ?
काठमाडौं । काठमाडौं महानगरपालिकाले बाँसबारीस्थित जग्गा खाली गर्न निर्देशन दिएको छ । बाँसबारी जग्गामा लगाइएको चाँदबाग स्कुलले अतिक्रमण गरेको जग्गा खाली गराउन काठमाडौं महानगरपालिकाले निर्देशन दिएको हो । सोमबार महानगरको नगर प्रहरी बल स्कुलको जग्गा खाली गराउनका लागि पुगेको थियो । तर, केही समय माग गरेपछि जग्गा खाली नगरेर फर्किएको महानगर प्रहरी बलका नगर उपरीक्षक राजुनाथ पाण्डेले जानकारी दिए । उनका अनुसार जग्गा खाली गर्नका लागि सात दिनको समय मागेको छ । ‘हामीले दुई दिनभित्र खाली गर्न भनेर अल्टिमेटम दिएका थियौं । तर, समय माग गरेपछि सात दिन थप गरेका छौं,’ उनले भने । उनका अनुसार नगर प्रहरीले उक्त जग्गामा रहेको चाँदवाग स्कुलको सबै संरचना हटाएर खाली गर्न निर्देशनसहित सोमबार माइकिङ पनि गरेको थियो । चप्पल कारखानाको सरकारी जग्गा चौधरी ग्रुपले हडपेको भन्दै अनुसन्धान भएको थियो । प्रहरीको केन्द्रीय अनुसन्धान ब्युरो (सीआईबी)ले अरूण चौधरीलाई पक्राउसमेत गरेको थियो । सोही जग्गा सरकारले फिर्ता ल्याएसँगै जग्गा खाली गर्न निर्देशन दिएको हो । सो जग्गामा हाल चाँदबाग स्कुल छ । अब सो स्कुलको संरचना के हुन्छ भन्ने विषयलाई चासोका साथ हेरिएको छ ।
स्थानीय तहका ३४ रिक्त पदको उपनिर्वाचन मंसिर तेस्रो साता गर्न निर्वाचन आयोगको सुझाव
काठमाडौं । प्रधानमन्त्री केपी शर्मा ओली र निर्वाचन आयोगका प्रमुख आयुक्त दिनेशकुमार थपलियासहित आयुक्तहरूबीच स्थानीय तहमा रिक्त पदमा उपनिर्वाचनको तयारीबारे सोमबार छलफल भएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा आयोगले कीर्तिपुर नगरपालिकाका प्रमुखसहित ३४ रिक्त पदमा आगामी मङ्सिर तेस्रो साता निर्वाचन गर्न उपयुुक्त हुने सुझाव दिएको छ । प्रधानमन्त्री ओलीले जाडो समय अगावै हुने गरी निर्वाचनको मिति तय गर्न र निर्वाचनमा मितव्ययीता अपनाउन आग्रह गरेका थिए । निर्वाचनको मिति घोषणाअघि आयोगले सम्बन्धित तहमा मतदाता नामावली अद्यावधिकका लागि आह्वान गर्ने आयोगले जानकारी गराएको छ । छलफलमा प्रधानमन्त्रीका मुख्य सल्लाहकार विष्णुप्रसाद रिमाल, नेपाल सरकारका मुख्यसचिव लीलादेवी गड्तौलालगायत सहभागी थिए ।
समृद्धि फाइनान्सको बनेपा शाखाबाट वृक्षारोपण
काठमाडाैं । समृद्धि फाइनान्सले सोमबार संस्थाको बनेपा शाखाबाट वृक्षारोपण कार्यक्रम सम्पन्न गरेको छ । उक्त कार्यक्रम इलाका प्रहरी कार्यालय बनेपा परिसरमा विभिन्न फलफूल तथा फूलका बोट लगाई सम्पन्न गरिएको हो । साउन पहिलो साताबाट सुरु भएको वृक्षारोपण कार्यक्रम नारायणगढ, औरही र इटहरी शाखाबाट सम्पन्न भइसकेको र साउन महिनाभित्र फाइनान्सका अन्य शाखाहरूबाट पनि सम्पन्न गर्ने तय भएको संस्थाले जनाएको छ । समृद्धि फाइनान्सले हाल १३ वटा शाखामार्फत् नगद कारोबार, आरटिजिएस, आइपीएस, कनेक्ट आइपीएस, रेमिटान्स, क्लियरिङ लगायतका बैंकिङ सेवा प्रदान गर्दै आएको छ भने मोबाइल बैंकिङ डेबीट कार्ड, क्यूआर कोड आदि डिजिटल सुविधा निःशुल्क प्रदान गरिरहेको छ ।
काठमाडौं-भियतनाम दुई चार्टर्ड उडान हुँदै
काठमाडौं । काठमाडौं-भियतनाम दुई चार्टर्ड उडान हुने भएको छ । रुप्से होलिडेजले नेपाल र भियतनामबीच पर्यटक आदनप्रदान गर्न थप दुई वटा चार्टर उडान गर्न लागेको जानकारी गराइएको छ । यी दुई मुलुकबीच सिधा उडान सुरु भइसकेको छैन । सोहीकारण पर्यटकलाई समूहमा ल्याउन चार्टर्ड उडान गर्न लागिएको हो । नेपाल र भियतनामबीच पर्यटक आदनप्रदान गर्न यसअघि पनि चार्टर उडान गरिएका थिए । यस वर्ष दशैंलगत्तै अब थप दुई चार्टर उडान गरी नेपाल र भियतनामलाई जोड्न लागेको कम्पनीले जनाएको छ । आगामी दशैंको टिकालगत्तै ३० असोज अर्थात् १६ अक्टोबरदेखि ५ दिनका लागि नेपालबाट भियतनाम र भियतनामबाट नेपाल पर्यटक आदनप्रदान गर्न चार्टर उडान गर्न लागिएको हो । भियतनामबाट नेपाल आउने भियतनामी पर्यटकलाई भक्तपुर, नगरकोट, काठमाडौं दरबार स्क्वायर, पाटन दरवार स्क्वायर, स्वयम्भु र बौद्धनाथको दर्शन गराउने गरी कार्यक्रम तयार भएको कम्पनीले जनाएको छ । नेपालबाट भियतनाम घुम्न जाने पर्यटकका लागि पाँच दिनको टुर प्याकेज तयार पारिएको छ । भियतनामको राजधानी हानोई आसपासका पर्यटकीय गन्तव्यमा नेपाली पर्यटकलाई घुमाइने भएको छ । नेपाल र भियतनामबीच सिधा उडान नहुने भएकाले चार्टर उडानमार्फत भ्रमण गराउन लागिएको हो । अन्य देश भएर भियतनाम जानु पर्दा धेरै खर्च हुने भएकाले चार्टर उडान गर्न लागिएको र दुवै देशबाट पर्यटक आउने र जाने भएकाले उडानको खर्च कम हुँदा टुर प्याकेज पनि सस्तो कायम गरिएको छ । भियतनाम भ्रमणका लागि सबै शुल्क जोडेर १ लाख ९ हजार ९९९ रुपैयाँको प्याकेज सार्वजनिक गरिएको छ । उक्त मूल्यमा भियतनामको दुईतर्फी हवाई टिकट, भिसा लेटर, एयरपोर्टबाट पिकअप तथा ड्रप, ब्रेकफास्टसहित होटेलको कोठा, स्थानीय टुरका लागि हुने खर्च, गाइड तथा यातायातको खर्च समावेश गरिएको छ ।
२० प्रतिशत डाउन पेमेन्टमा टाटा विंगर खरिद गर्न सकिने
काठमाडौं । नेपालका लागि टाटा मोटर्सको अधिकारिक वितरक सिप्रदी ट्रेडिङ प्रालिले धमाकेदार अफर ल्याएको छ । जसअन्तर्गत २० प्रतिशत डाउन पेमेन्टमा टाटा विंगर खरिद गर्न सकिने कम्पनीले जनाएको छ । कम्पनीका अनुसार ६ वर्षको चुक्ता भुक्तानी अवधि रहेको छ । सो गाडी खरिद गर्दा ७० प्रतिशत फाइनान्सिङ सुविधा पनि रहेको उल्लेख गरिएको छ । योजना अगस्ट महिनाभरि लागु हुनेछ । मासिक ६० हजार रुपैयाँदेखि सरल किस्तामा सो गाडी खरिद गर्न सकिने छ ।
रिलायन्स स्पिनिङ मिल्सको वित्तीय विवरण झुटो, अनुसन्धान गर्न सीआईबी पठाइयो फाइल
काठमाडौं । नेपाल धितोपत्र बोर्ड (सेबोन) ले रिलायन्स स्पिनिङ मिल्सको प्रारम्भिक अनुसन्धानसहितको फाइल नेपाल प्रहरीको केन्द्रीय अनुसन्धान ब्युरो (सीआईबी) मा पठाएको छ । वित्तीय विवरणको प्रारम्भिक अनुसन्धान गरेर तयार पारेको फाइल शुक्रबार सीआईबीमा पठाएको धितोपत्र बोर्डका प्रवक्ता डा. नवराज अधिकारीले बताए । ‘प्रारम्भिक अनुसन्धान गरेर तयार पारेको फाइल शुक्रबार सीआईबीमा पठाएका छौं,’ उनले भने, ‘थप अनुसन्धान सीआईबीले अघि बढाउँछ ।’ बोर्ड आफैँले आईपीओ अनुमति दिएको रिलायन्स स्पिनिङको वित्तीय विवरणको प्रारम्भिक अनुसन्धान गरी फाइल तयार पारेर सीआईबीमा बुझाएको हो । बोर्डले गरेको प्रारम्भिक अध्ययनमा के छ भन्नेबारे भने उनले खुलाउन चाहेनन् । बोर्ड स्रोत भने रिलायन्स स्पिनिङले वित्तीय विवरण नै झुटाे पेस गरेकाे देखिएको बताउँछ । स्रोत भन्छ, ‘प्रारम्भिक विवरण हेर्दा रिलायन्स स्पिनिङको वित्तीय विवरण नै दोषी देखिएको छ, बाँकी अनुसन्धान सीआईबीले पूरा गर्छ ।’ धितोपत्र बोर्डको ऐनमै झुटा विवरण पेस गर्ने कम्पनीका विषयमा थप अध्ययन गर्न प्रहरीलाई जिम्मेवारी दिन सक्ने प्रावधान रहेको छ, सोहीबमोजिम सीआईबीलाई थप अनुसन्धानको जिम्मेवारी दिइएको स्रोतको भनाइ छ । धितोपत्र ऐन २०६३ को दफा १०० मा कम्पनीले झुटो विवरण वा लिखत बनाउन नपाउने उल्लेख छ । सेबोनले रिलायन्स स्पिनिङ मिल्सलाई महँगो मूल्यमा आइपीओ जारी गर्न अनुमति दिएपछि यस विषयमा सीआइबीमा उजुरी परेको थियो । त्यसपछि सीआइबीले यसबारे भएको के हो भनेर असार अन्तिम साता सेबोनमा पत्राचार गरेको थियो । सेबोनले त्यसको एक महिना पछि प्रहरीमा प्रारम्भिक अनुसन्धानसहितको फाइल पठाएको हो । रिलायन्स स्पिनिङले सर्वसाधारणलाई छुट्याइएको ११ लाख ५५ हजार ९६० कित्ता सेयरमध्येबाट १० प्रतिशतले हुन आउने विदेशमा रहेका श्रमिकलाई १ लाख १५ हजार ५९६ कित्ता सेयर जारी गर्ने तयारी गरेको थियो । कम्पनीले प्रतिकित्ता ८२०.८० रुपैयाँ तोकिएको थियो । कम्पनी योग्य संस्थागत लगानीकर्तालाई भने सेयर बिक्री गरिसकेको छ । रिलायन्स स्पिनिङको आईपीओ गत असार २७ गतेबाट वैदेशिक रोजगारमा रहेका नेपालीलाई बिक्री खुला गरिने भनिएको थियो । कम्पनीको वित्तीय अवस्थामा जालसाजी रहेको देखिएपछि आमसर्वसाधारणदेखि प्रतिनिधि सभाको सार्वजनिक लेखा समितिसम्म कुरा उठेको थियो । लेखा समितिले धितोपत्र बोर्डलाई पत्र पठाउँदै वित्तीय अवस्थामा कैफियत देखिएको रिलायन्स स्पिनिङलाई बुक बिल्डिङ विधिमार्फत आईपीओ अनुमति दिनुको कारणबारे प्रष्ट जवाफ पठाउन ७ दिनको समयसीमा दिएको थियो । लेखा समितिको निर्देशनपछि धितोपत्र बोर्डको रिलायन्स स्पिनिङको आइपीओ रोक्ने निर्णय गरेको थियो । सोहीबमोजिम आइपीओ रोक्न रिलायन्स स्पिनिङ र धितोपत्र बिक्री प्रबन्धक ग्लोबल आइएमई क्यापिटललाई धितोपत्र बोर्डले पत्र पठाएको थियो ।
मनसुन अवधिभरि एक करोड वृक्षरोपण गर्न वनमन्त्री शाहीको निर्देशन
काठमाडौं । वन तथा वातावरणमन्त्री ऐनबहादुर शाहीले मनसुन अवधिभरि देशभरि करिब एक करोड वृक्षरोपण गर्न निर्देशन दिएका छन् । मनसुन अवधिमा नेपालभरि बृहत् रूपमा वृक्षरोपण अभियान सञ्चालन गर्न प्रदेशस्तरमा रहेका सबै वन कार्यालय भू तथा जलाधार संरक्षण कार्यालय, राष्ट्रिय निकुञ्ज तथा आरक्ष कार्यालय र देशभरिका सात सय ५३ स्थानीय तहमा करिब एक करोड वृक्षरोपण सञ्चालन गर्न निर्देशन जारी गरिएको मन्त्री शाहीले बताए । वृक्षरोपण कार्यलाई प्रभावकारी बनाउन सबै निकायलाई आआफ्नो क्षेत्रबाट भूमिका निर्वाह गर्न मन्त्रालय मातहतका निकायलाई अनुरोध गर्ने निर्णय भएको उनले जानकारी दिए । मन्त्री शाहीले पछिल्लो दुई सय वर्षमा मिथेन, नाइट्रसअक्साइड, कार्बन डाइअक्साइड जस्ता हरितगृह ग्यास उत्सर्जनका कारण वायुमण्डलमा परेका नकारात्मक प्रभाव न्यूनीकरणका लागि सबैले भूमिका खेल्न जरुरी रहेको बताए । ‘जलवायु परिर्वतनले हिमालयलगायत मानव जीवन, सामाजिक, आर्थिक विकास, जैविक विविधता, पर्यटनलगायत क्षेत्रमा नकारात्मक असर पुर्यउन थालेको छ । अतिवृष्टि, अनावृष्टि, बाढीपहिरो, हिमपहिरो, खडेरीजस्ता प्राकृतिक विपत्तिको जोखिममा बढ्न थालेको छ । त्यसैले यसको न्यूनीकरणको लागि बृहत् वृक्षरोपण गरी हरियाली बढाउन जरुरी छ,’ निर्देशनमा उल्लेख छ । जलवायु परिवर्तनको सन्दर्भमा सन् २००४ मा प्रकाशित प्रतिवेदनलाई आधार मान्ने हो भने अहिले विश्वमा उत्र्सजन हुने ६० प्रतिशत कार्बन डाइअक्साइड वन जङ्गलले सोक्ने गरेकाले सबैले यसको संरक्षणमा लाग्नुपर्ने आवश्यकतासमेत औँल्याइएको छ । ‘प्रत्येक घर, कार्यालय अगाडि कम्तीमा एउटा मात्र रुख रोप्न सके पनि वातावरणीय लाभका साथै हामीलाई धेरै फाइदा हुन्छ । सडकको दायाँबायाँ किनारमा पनि वृक्षरोपण गर्दा हरियालीले गाउँ सहरको शोभा पनि बढाउँछ,’ मन्त्री ठकुरीले सोमबार जारी गरेको निर्देशनमा उल्लेख छ ।
