होटल व्यवसायी महासंघ नेपालको १२औं वार्षिक साधारणसभा सम्पन्न
काठमाडौं । साना, मझौला होटल तथा रेष्टुरेन्ट व्यवसायीहरूको छाता संस्था होटल व्यवसायी महासंघ नेपालको १२औं वार्षिक साधारणसभा सम्पन्न भएको छ । शनिबार काठमाडौंमा महासंघको वार्षिक साधारणसभा सम्पन्न भएको हो । साधारणसभाको अध्यक्षता महासंघका अध्यक्ष दिनेशकुमार चुकेको अध्यक्षतामा भएको हो । कार्यक्रममा अध्यक्ष चुकेले महासंघको अवधारणासहित होटल व्यवसायले पर्यटन प्रवद्र्धनमा पुर्याएको योगदानको चर्चा गरे । देशभर रहेका होटल तथा रेष्टुरेन्ट व्यवसायीको हकहित र अधिकारको प्रत्याभूति हुनेगरी आवश्यक नीति निर्माण हुनुपर्नेमा उनले जोड दिए । होटल व्यवसायी महासंघका अध्यक्ष दिनेशकुमार चुके । उनले बन्दसत्रमा भएको छलफलका क्रममा प्रतिनिधिबाट राखिएका जिज्ञासाको जवाफ दिएका थिए । संस्थाका संस्थापक ज्येष्ठ केन्द्रीय सदस्य गोपी सार्कीले शुभारम्भ गरेको सभामा वरिष्ठ उपाध्यक्ष शेरबहादुर थापाले स्वागत मन्तव्य राखेका थिए । यस्तै महासचिव टिआर भण्डारीले साधारणसभाको खुला तथा बन्दसत्र कार्यक्रम सञ्चालन गरेका थिए । सो अवसरमा महासंघका संरक्षक अमृतबहादुर भुजेल, सल्लाहकार केपी पाध्य, कोशी प्रदेशका अध्यक्ष राजन दंगाल, सह-आयोजक संस्था जिल्ला होटल व्यवसायी संघ काठमाडौंका अध्यक्ष सुरेश बराल र जिल्लागत संघको प्रतिनिधित्व गर्दै होटल व्यवसायी संघ, झापाका अध्यक्ष इन्दिरा श्रेष्ठ र रुपन्देहीका नरेन्द्र खनालले शुभकामना मन्तव्य दिएका थिए । कार्यक्रममा महासचिव भण्डारीले सांगठनिक प्रतिवेदन, कोषाध्यक्ष कृष्णकुमार श्रेष्ठले आर्थिक प्रतिवेदन र लेखा समिति संयोजक दिपेन सुवेदीले लेखासमितिको प्रतिवेदन प्रस्तुत गरेका थिए । विंस २०६८ सालमा स्थापना भएको यस संस्थाले वैधानिकताको साथ आफ्नो विधानले निर्दिष्ठ गरेको नेपालको पर्यटन क्षेत्र, त्यसमा पनि होटल तथा रेष्टुरेन्ट व्यवसायीको हकहित संरक्षणका लागि विभिन्न निकायहरूसँगको सहकार्यमा कार्यक्रमहरू सञ्चालन गर्दै आइरहेको संघले जनाएको छ । देशैभरका ७७ वटै जिल्लामा रहेका करिब २ लाखभन्दा धेरै होटल तथा रेष्टुरेन्ट व्यवसारीहरूको छाता संस्थाले संघीय सरकार, संस्कृति पर्यटन तथा नागरिक उड्डयन मन्त्रालयसहित विभिन्न मन्त्रालयहरू, प्रदेश सरकार एवम् पर्यटन मन्त्रालय, स्थानीय सरकार, पर्यटन विभाग, नेपाल पर्यटन बोर्ड, आन्तरिक तथा बाह्य पर्यटनसँग सरोकार राख्ने विभिन्न संघसंस्थाहरुसंग सहकार्य गर्दै आइरहेको छ।
राष्ट्रियसभाबाट पाँचवटै प्रतिस्थापन विधेयक बहुमतले पारित
काठमाडौं । राष्ट्रियसभाले पाँचवटा प्रतिस्थापन विधेयक बहुमतले पारित गरेको छ । सोमबारको बैठकमा सभाका अध्यक्ष नारायणप्रसाद दाहालले सबै विधेयक बहुमतले पारित भएको जानकारी गराए । ‘सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक, २०८१’, ‘सहकारीसम्बन्धी केही नेपाल ऐनलाई संशोधन गर्ने विधेयक, २०८१’, ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’ तथा ‘निजीकरण (पहिलो संशोधन) विधेयक, २०८१’ र ‘आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने विधेयक, २०८१’ पारित गरिएको हो । राष्ट्रियसभामा संशोधनसहित दफावार छलफलपछि विधेयक पारित गरिएको हो । सभाबाट पारित विधेयक सन्देशसहित प्रतिनिधिसभामा पठाइनेछ । राष्ट्रियसभाको अर्को बैठक यही चैत २५ गते सोमबार दिउँसो १ बजेर १५ मिनेटमा बस्नेछ ।
जनतामा रहेको आक्रोशलाई सम्बोधन गर्न हामी तयार हुनुपर्छ : रवि लामिछाने
काठमाडौं । राष्ट्रिय स्वतन्त्र पार्टी (रास्वपा)का निलम्बित सभापति रवि लामिछानेले जनताका असन्तुष्टीलाई सम्बोधन गर्न शान्तिपूर्ण अभियानका लागि तयार हुन पार्टीपक्तिलाई आह्वान गरेका छन् । रास्वपाको केन्द्रीय समितिको बैठक बस्नुअघि आज पार्टी कार्यालय चमतिमा उपस्थित शुभेच्छुक एवं कार्यकर्तालाई सम्बोधन गर्दै उनले आफू आजैदेखि सभापतिको नेतृत्वमा फर्किन लागेको बताए । ‘जनतामा रहेको आक्रोशलाई सम्बोधन गर्न हामी तयार हुनुपर्छ, कसैलाई गाली गरेर, होच्याएर केही हुनेवाला छैन, शान्तिपूर्ण अभियान मर्न दिनु हुदैन’, उनले भने । सहकारी ठगी प्रकरणमा आफूविरुद्ध अदालतमा मुद्दा दायर हुनुअघि लामिछानेले पार्टीका गतिविधिबाट अगल भएका थिए । त्यसयता डोलप्रसाद अर्यालले कार्यवाहक सभापतिको जिम्मेवारी सम्हालेका थिए । आजको पहिलो बैठकमा कार्यवाहक सभापति अर्यालले धन्यवाद ज्ञापन गर्ने र त्यसपछिको दोस्रो बैठक लामिछानेको सभापतित्वमा बस्ने कार्यवाहक महामन्त्री कविन्द्र बुर्लाकोटीले जानकारी दिए ।
आर्थिक संकटमा जुधिरहेको एस्टन मार्टिनलाई १६२ मिलियन डलरको लगानी प्रवाह
काठमाडौं । लक्जरी कार निर्माता एस्टन मार्टिनले कम्पनीको अध्यक्षबाट प्राप्त वित्तीय सहायता र उनले स्वामित्वमा राखेको फर्मुला वन टोलीको हिस्साको बिक्रीमार्फत १६२ मिलियन डलर (करिब २१ अर्ब ५४ करोड ६० लाख नेपाली रुपैयाँ) उठाउने भएको छ । मार्टिन बढ्दो घाटासँग जुधिरहेको छ । त्यसैले उक्त रकम उठाउन लागिएको हो । फिल्मी जासूस जेम्स बन्डको मनपर्ने कारका रूपमा चर्चित यस कम्पनीको सेयर सोमबारको सुरुवाती कारोबारमा ५.७ प्रतिशतले बढेर ६९ पेन्स पुगेको छ । पछिल्ला वर्षहरूमा आपूर्ति शृङ्खला समस्या, डेलिभरीमा ढिलाइ र चीनमा घट्दो मागका कारण एस्टन मार्टिन संकटमा परेको छ । अध्यक्ष लरेन्स स्ट्रोलले २०२० मा कम्पनीको नेतृत्व सम्हालेयता यो छैटौं पटक पूँजी संकलन गर्न बाध्य भएको छ । साथै कम्पनीले आफ्नो ५ प्रतिशत कर्मचारी कटौती गरेको छ । स्ट्रोलले हालसम्म एस्टन मार्टिनमा करिब ६०० मिलियन पाउन्ड लगानी गरिसकेका छन् । अब उनको यु ट्री कन्सोर्टियमले ५२.५ मिलियन पाउन्ड थप लगानी गर्दै ७५ मिलियन सेयर ७० पेन्स प्रति सेयरको दरमा खरिद गर्नेछ । यो सम्झौताले उनको हिस्सेदारी करिब २७.७ प्रतिशतबाट ३३ प्रतिशतसम्म बढाउनेछ । एस्टन मार्टिनले यु ट्रीले आफ्नो स्वामित्व ३५ प्रतिशतसम्म बढाउने इच्छा व्यक्त गरेको पनि बताएको छ । यु ट्रीले बेलायतमा सूचीबद्ध कुनै पनि कम्पनीको ३० प्रतिशतभन्दा बढी स्वामित्व भएकाले बाँकी सेयरधारकहरूको सेयर खरिद गर्न अनिवार्य प्रस्ताव गर्ने नियमबाट छुट माग्नेछ । यसका अतिरिक्त एस्टन मार्टिन अराम्को फर्मुला वन टोलीको हिस्साको बिक्रीले हाल बुक भएको मूल्य करिब ७४ मिलियन पाउन्डभन्दा बढी प्रिमियम प्राप्त गर्न मद्दत गर्ने बताइएको छ । कम्पनीले अब वार्षिक कार बिक्रीमा ’सामान्य वृद्धिको’ अपेक्षा गरेको छ । यो संशोधित पूर्वानुमान ट्रम्प प्रशासनले संयुक्त राज्य अमेरिकामा लगाउन सक्ने सम्भावित ट्यारिफको प्रारम्भिक विश्लेषणमा आधारित छ ।
टोखाले मुटु रोग उपचारका लागि नगरवासीलाई ५० हजार दिने
काठमाडौं । काठमाडौंको टोखा नगरपालिकाले मुटु रोग उपचारका लागि नगरवासीलाई उपचारका लागि ५० हजार रुपैयाँसम्म उपलब्ध गराउने भएको छ । काठमाडौंको उत्तरी क्षेत्रमा रहेको टोखाले आर्थिक वर्ष २०८१/८२ को हिउँदे नगरसभाबाट संशोधन गरेर रु १० लाख बजेटबाट नगरवासीलाई मुटु रोग उपचारमा ५० हजार रुपैयाँसम्म सहयोग गर्न लागेको हो । टोखाले नगरवासीलाई मुटु रोग उपचारका लागि आइतबार सहिद गङ्गालाल हृदयरोग केन्द्रसँग सम्झौतासमेत गरेको छ । सम्झौतापत्रमा टोखा नगरपालिकाका तर्फबाट नगर प्रमुख प्रकाश अधिकारी र अस्पतालका तर्फबाट कार्यकारी निर्देशक प्राडा रवि मल्लले हस्ताक्षर गरेका छन् । कार्यक्रममा नगरपालिकाका प्रमुख प्रकाश अधिकारीले मुटु रोग उपचारका लागि नगरवासीलाई थोरै भए पनि राहत पुग्ने उद्देश्यले उक्त कार्यक्रमलाई अगाडि बढाइएको बताए । ‘टोखाले वडाको सिफारिसका आधारमा प्रतिव्यक्ति रु २५ हजार र गरिब तथा विपन्न वर्गका लागि ५० हजार रुपैयाँसम्म सहयोग गर्नेगरी सम्झौता गरेको छ, यसले टोखाका बासिन्दालाई थोरै भए पनि मुटुरोगको उपचारमा सहयोग पुग्नेछ’, नगरप्रमुख अधिकारीले भने । उक्त सेवा लिनका लागि नगरवासीले स्थायी बसोबास गरेको देखिने नागरिकताको प्रमाणपत्र, बसाइँसराइको प्रमाणपत्र, अतिविपन्न नागरिक भएको वडा कार्यालयको सिफारिसपत्र आवश्यक पर्नेछ । यस्तै, नगरभित्र स्थायी बसोबास गर्ने जोसुकैले पनि मुटुको उपचार गर्दा २५ हजार रुपैयाँ सहयोग पाउनेछन् । बिरामीको उपचार गरेपश्चात् सम्झौताअनुसारको रकम लिनका लागि अस्पतालले नगरपालिकामा आवश्यक कागजात पेस गरेर मात्र लिन सक्ने व्यवस्था सम्झौतापत्रमा उल्लेख गरिएको छ । अस्पतालका कार्यकारी निर्देशक प्राडा मल्लले नगरपालिकाको सम्झौताअनुसार अस्पतालले सेवा प्रदान गर्ने बताए । कार्यक्रममा टोखाका उपप्रमुख मुरारी तामाङ, प्रमुख प्रशासकीय अधिकृत शेरबहादुर विसीलगायत टोखाभिका वडाअध्यक्षहरुको सहभागिता रहेको थियो ।
सार्वजनिक प्रतिष्ठानमा भएको सरकारी लगानीप्रति सरकार सचेत छ : अर्थमन्त्री पौडेल
काठमाडौं । उपप्रधानमन्त्री एवं अर्थमन्त्री विष्णु पौडेलले सार्वजनिक प्रतिष्ठानमा रहेको सरकारी लगानीको उचित व्यवस्थापन आवश्यक रहेको बताएका छन् । सोमबार राष्ट्रिय सभाको बैठकमा ‘निजीकरण (पहिलो संशोधन) विधेयक २०८१’ माथि दफावार छलफलका क्रममा सांसदहरूले उठाएका प्रश्नहरूको जवाफ दिँदै अर्थमन्त्री पौडेलले सरकारी लगानी डुबेकाले त्यसलाई व्यवस्थापन गर्न विधेयकमा विशेष व्यवस्था गरिएको उल्लेख गरे । उनले सार्वजनिक प्रतिष्ठानहरूमा गरिएको सरकारी लगानीले उचित प्रतिफल दिनुपर्नेमा जोड दिँदै, समाजवादमा पुग्ने साझा संवैधानिक लक्ष्यतर्फ अग्रसर हुन आवश्यक रहेको बताए । अर्थमन्त्री पौडेलले भने, ‘समाजवाद हाम्रो साझा गन्तव्य हो भन्ने कुरा संविधानले नै प्रस्ट पारेको छ। तर, समाजवाद के हो र त्यसमा कसरी पुग्ने भन्ने विषयमा आ-आफ्ना बुझाइहरू हुन सक्छन् । मेरो बुझाइमा, समृद्धिको जगमै समाजवाद सम्भव छ। नागरिकको न्यायपूर्ण समृद्धिको पहुँच नै समाजवाद हो, त्यसैले हामी त्यही दिशामा जानुपर्छ ।’ उनले थपे, ‘सार्वजनिक प्रतिष्ठानमा भएको सरकारी लगानीको व्यवस्थापन आवश्यक छ । त्यो लगानी डुब्न नदिनु र त्यसबाट प्रतिफल प्राप्त गर्नु नै सरकारको लक्ष्य हो । यही उद्देश्यअनुरूप विधेयक ल्याइएको हो ।’ सरकार सार्वजनिक प्रतिष्ठानहरूमा गरिएको लगानीप्रति पूर्ण रूपमा सचेत रहेको अर्थमन्त्री पौडेलको भनाइ छ।
नेपाल-म्यानमार चेम्बर अफ कमर्सले म्यानमारका भूकम्पपीडितलाई राहत उपलब्ध गराउने
काठमाडौं । नेपाल–म्यानमार चेम्बर अफ कमर्स एन्ड इन्डस्ट्रीले मित्रराष्ट्र म्यानमारमा भूकम्पबाट भएको जनधनको क्षतिप्रति दुःख व्यक्त गरेको छ । चेम्बरका अध्यक्ष शिवकुमार अग्रवाल नेतृत्वको प्रतिनिधिमण्डल सोमबार बिहान ललितपुरस्थित नेपालका लागि म्यानमारको राजदूतावास पुगेर म्यानमार सरकार र जनताप्रति समवेदना व्यक्त गरेको हो । चेम्बरले म्यानमारमा भूकम्पले गराएका जनधनको क्षतिबाट स्तब्ध भएको बताउँदै अकल्पनीय प्राकृतिक विपत्तिबाट सिर्जित विषम परिस्थितिको सामना गर्ने शक्ति म्यानमार सरकार र त्यहाँका जनतालाई प्राप्त होस् भन्ने कामना गरेको छ । चेम्बरले म्यानमारका भूकम्पपीडितको उद्धार एवं पुनस्र्थापनाको लागि आवश्यक पर्ने सबै प्रकारको सहायता उपलब्ध गराउन अन्तर्राष्ट्रिय समुदायलाई अपिल समेत गरेको छ । चेम्बरले सो अवसरमा म्यानमारका भूकम्पपीडितलाई राहत उपलब्ध गराउने प्रतिबद्धता पनि व्यक्त गरेको छ । आफ्ना सदस्यहरुबाट आर्थिक सहयोग संकलन गरी राजदूतावासमार्फत भूकम्पप्रभावितलाई राहत सामग्री उपलब्ध गराउने तयारी गरेको अध्यक्ष अग्रवालले जानकारी दिए । म्यानमारमा चैत १५ गते शुक्रबार गएको ७.७ रेस्टर स्केलको भूकम्पमा ज्यान गुमाउनेको संख्या १७०० नाघेको अन्तर्राष्ट्रिय सञ्चार संस्थाहरुले बताएका छन् । उक्त भुइँचालोले महत्वपूर्ण पूर्वाधारहरुमा ठूलो क्षति पुर्याएको छ । उक्त भुइँचालोबाट छिमेकी मुलुक थाइल्यान्डमा पनि जनधनको क्षति भएको छ । नेपाल–म्यानमार चेम्बर अफ कमर्स एन्ड इन्डस्ट्री दुई मित्रराष्ट्रबीचको आर्थिक एवं जनस्तरको सम्बन्धलाई अझ प्रगाढ बनाउने तथा दुवै देशको उद्योग, व्यापार, पर्यटनलगायत क्षेत्रमा लगानी प्रवद्र्धनमा सहजकर्ताको भूमिका खेल्ने जस्ता उद्देश्यले स्थापना भएको द्विराष्ट्रिय उद्योग वाणिज्य संघ हो । चेम्बरले उक्त उद्देश्य परिपूर्तिका लागि व्यापारिक प्रतिनिधिमण्डल आदानप्रदान गर्ने, दुवै देशमा आयोजना हुने व्यापार मेला तथा प्रदर्शनीहरुमा भाग लिन व्यवसायीलाई प्रोत्साहन र सहजीकरण गर्ने लगायत क्रियाकलाप गर्ने जस्ता कार्य गर्दै आएको छ ।
डिशहोमले ईजभीजको वाइफाइ आईपी क्यामेरा बिक्री गर्ने
काठमाडौं । डिशहोम इन्टरनेटले अब ग्राहकहरूको सुरक्षा आवश्यकतालाई ध्यानमा राख्दै वाइफाइ आईपी क्यामेरा पनि उपलब्ध गराउने भएको छ । यसका लागि ईजभीज र हाईकभिजनको नेपाल वितरक शारदा समूहको भगिनी संस्था वत्सल इम्पेक्स प्राइभेट लिमिटेडसँग डिशहोम इन्टरनेटले रणनीतिक साझेदारी घोषणा गरेको छ । कम्पनीका अनुसार घर तथा कार्यालय निगरानीका लागि ईजभीजद्वारा निर्मित वाइफाइ आईपी क्यामेरा विश्वभर अग्रणी स्थानमा रहेको छ । डिशहोम इन्टरनेट र क्यामेरा उत्पादक ईजभीजबीचको सहकार्यले शहरी तथा अर्ध-शहरी क्षेत्रमा सुरक्षा निगरानी आवश्यक पर्ने ग्राहकहरूलाई भरपर्दो र स्मार्ट सुरक्षा समाधान उपलब्ध गराउने लक्ष्य राखेको छ । नेपालभर उच्च ब्यान्डविथ इन्टरनेटको पहुँच विस्तार भएसँगै, नेपाली उपभोक्ताहरू पनि इन्टरनेटमा आधारित स्मार्ट उपकरणहरू प्रयोग गर्न बढी रुचि राख्न थालेका छन् । डिशहोमले आफ्ना ग्राहकहरूलाई सहज रूपमा देशभरि फैलिएको डिलर नेटवर्कमार्फत वाइफाइ आईपी क्यामेरा उपलब्ध गराउनेछ । यस सहकार्यले डिशहोमका प्रयोगकर्ताहरूलाई झन्झटमुक्त सुरक्षा निगरानी प्रणाली उपलब्ध गराउनेछ । कम्पनीका अनुसार यी सुविधाहरूले आधुनिक घरधनीहरूका लागि ईजभीजको उत्पादनलाई सुरक्षा निगरानीका लागि उत्कृष्ट समाधान बनाउनेछ । डिशहोम इन्टरनेटको बलियो पूर्वाधार र ईजभीजको विश्वसनीय सुरक्षा प्रविधि एकसाथ आएपछि ग्राहकहरूले आफ्नो घर तथा व्यवसायलाई अझ सुरक्षित वातावरण दिन सक्नेछन् । यस सहकार्यले डिशहोम इन्टरनेटका ग्राहकहरूलाई स्मार्ट सुरक्षाका साथ भरपर्दो सेवा प्रदान गर्न थप मद्दत गर्नेछ ।
