जेलबाट बाहिर निकालिए रवि लामिछाने
काठमाडौं । जेनजी प्रदर्शनकारीले रवि लामिछानेलाई जेलबाट बाहिर निकालेका छन् । प्रदर्शनकारीहरु नख्खु कारागारमा पुगेर उनलाई बाहिर निकालेका हुन् ।
हिमालय एयरलाइन्सको विमान पोखरा ‘डाइभर्ट’
काठमाडौं । तिब्बतको ल्हासाबाट काठमाडौं आएको हिमालय एयरलाइन्सको विमान पोखरा अन्तरराष्ट्रिय विमानस्थलमा अवतरण भएको छ । विषम परिस्थितिलगायत प्राविधिक कारणले काठमाडौं आएको हिमालयको विमान ‘डाइभर्ट’ भई पोखरा अवतरण भएको हो । उपत्यकाभित्रको विषम परिस्थितिलगायत त्रिभुवन विमानस्थल वरपर र उडान अवतरण मार्गको विभिन्न स्थानमा देखिएको धुवाँजस्ता कारणले जहाजको सुरक्षामा गम्भीर असर पर्ने देखिएकाले विमान पोखरा डाइभर्ट गरिएको विमानस्थल कार्यालयले जनाएको छ । उक्त विमानमा चिनियाँ नागरिक रहेको जनाइएको छ । त्रिभुवन अन्तरराष्ट्रिय विमानस्थलका प्रवक्ता रिञ्जी शेर्पाका अनुसार तिब्बतको ल्हासाबाट काठमाडौं आएको उक्त विमान सिमरामाथिको आकाशमा लामो समय होल्ड भएपछि पोखरा विमानस्थलमा डाइभर्ट गरिएको हो ।
आमनागरिकलाई संयमित हुन सुरक्षा र कर्मचारी नेतृत्वको अपिल
काठमाडौं । सुरक्षा र कर्मचारी नेतृत्वले सोमबारदेखि काठमाडौं उपत्यकासहित देशभर जारी जेनजीको प्रदर्शनबाट उत्पन्न परिस्थितिमा थप जनधनको क्षति हुन नदिन आमनागरिकसँग अपिल गरेका छन् । कर्मचारी तन्त्रका प्रमुख र चारवटै सुरक्षा निकायका प्रमुखले आज संयुक्त अपिल जारी गर्दै प्रधानमन्त्री केपी शर्मा ओलीको राजीनामा स्वीकृतसमेत भएको अवस्थामा सबैलाई संयमित हुन आग्रह गरेका हुन् । उनीहरुले वर्तमान विषम परिस्थितिमा राजनीतिक संवादको माध्यमबाट यथाशक्य छिटो शान्तिपूर्ण समाधान निकाल्न सम्बद्ध सबैमा अपिल गरेका छन् । नेपाल सरकारका मुख्यसचिव एकनारायण अर्याल, प्रधान सेनापति अशोकराज सिग्देल, गृह सचिव गोकर्णमणि दुवाडी, सशस्त्र प्रहरी महानिरीक्षक राजु अर्याल, प्रहरी महानिरीक्षक चन्द्रकुवेर खापुङ र राष्ट्रिय अनुसन्धान विभागका प्रमुख हुतराज थापाले संयुक्त रुपमा उक्त अपिल गरेका हुन् । सोमबारदेखि काठमाडौंलगायत मुलुकका विभिन्न भागमा भएको प्रदर्शनका क्रममा ठूलो जनधनको क्षति भएको उल्लेख गर्दै उनीहरुले त्यसबाट ज्यान गुमाउने व्यक्तिप्रति श्रद्धाञ्जली र परिवारजनमा समवेदना व्यक्त गरेका छन्।
जेनजीले घरमै कुटे देउवा दम्पती
काठमाडौं । नेपाली कांग्रेसका सभापति शेरबहादुर देउवाका दम्पती नै कुटिएका छन् । प्रदर्शनमा उत्रिएका जेनजीहरूले देउवा र उनकी पत्नी आरजु राणा देउवालाई कुटपिट गरेका हुन् । मंगलबार जेनजीहरूले देउवाकै निवास पुगेर गेट फुटाएर घरभित्र प्रवेश गरेका थिए । सोही क्रममा जेनजीहरूले उनीमाथि हातपात गरेका थिए । प्रदर्शनमा उत्रिएका जेनजी युवाहरूले सिंहदरबार, संसद् भवन लगायतका शीर्ष नेताहरूको घरमा आगजनी गरेका थिए ।
नख्खु कारागारबाट निस्के रवि लामिछाने
काठमाडौं । राष्ट्रिय स्वतन्त्र पार्टीका सभापति रवि लामिछाने कारागारबाट निस्किएका छन् । नख्खु कारागारमा रहेका उनलाई निकालेर बाहिर निकालिएको हो । लामिछाने निस्केको दीपक बोहराले जानकारी दिए ।
जेनजीलाई बालेनको आग्रह- अब संयमित हुनूस्, सेना प्रमुखसँग वार्ता गर्न तयार हुनुहोला
काठमाडौं । काठमाडौं महानगरका प्रमुख बालेन्द्र शाह (बालेन)ले जेनजी प्रदर्शनकारीलाई संयमित हुन आग्रह गरेका छन् । उनले सामाजिक सञ्जालमार्फत यस्तो आग्रह गरेका हुन् । उनले लेखेका छन् , ‘हामीले स्पष्ट रूपमा भनेका थियौं । यो नितान्त जेनजीको आन्दोलन हो । प्रिय जेनजी, तपाईंहरूको हत्याराको राजीनामा आइसकेको छ । अब संयमित हुनुहोला ।’ बालेनले देशको जनधनको क्षति हाम्रै भएकाले संयमित हुन जरुरी भएको बताएका हुन्। साथै उनले सेना प्रमुखसँग वार्ता गर्न पनि तयार हुन आग्रह गरेका छन् ।
सुदूरपश्चिम प्रदेशसभा भवनमा आगजनी
काठमाडौं । जेनजीले सुदूरपश्चिम प्रदेशसभाको भवनमा आगजनी गरेको छ । सोमबारको जेनजी आन्दोलनका क्रममा १९ जनाको मृत्यु भएपछि आक्रोशित युवाहरू सडकमा उत्रिएका थिए । त्यसैक्रममा उनीहरूले सुदूरपश्चिम प्रदेशसभा भवनमा आगजनी गरेका हुन् ।
माओवादी केन्द्रीय कार्यालयमा आगजनी
काठमाडौं । नेकपा माओवादी केन्द्रको केन्द्रीय कार्यालय पनि आगजनी भएको छ । मंगलबार प्रर्दशनकारीहरुले पेरिसडाँडामा रहेको माओवादी पार्टी कार्यालय जलाएका हुन् । जेनजी युवाहरुले गरेको आन्दोन चर्केको अवस्था छ । अहिले संसद् भवन, सिंहदरबारदेखि धेरै ठाउँका भवन, पार्टी कार्यालयमा तोडफोड आगजानी भइसकेका छन् ।
