आइतबार नेप्से परिसूचक र कारोबार रकम दुबैमा गिरावट, ७९ करोडको सेयर किनबेच
काठमाडौं । आइतबार नेप्से परिसूचक र कारोबार रकम दुबैमा गिरावट भएको छ । साताको पहिलो दिन नेप्से ११ दशमलब ७८ अंकले घटेर १६१७ दशमलब ९७ अंकमा झरेको छ । दोहोरो अंकले घटेको बजारमा ७९ करोड ४६ लाख रुपैयाँ बराबरको सेयर कारोबार भएको छ । सबैभन्दा बढी प्राइम लाइफ इन्स्योरेन्स कम्पनीको ५ करोड रुपैयाँ माथिको सेयर कारोबार भएको छ । सो दिन १५९ कम्पनीको ४६ लाख ७८ हजार कित्ता सेयर किनबेच भएको छ । परिसूचका आधारमा होटल बाहेक सबै समूहको परिसूचक ओरालो लागेका छन् । सबैभन्दा बढी बीमा समूहको परिसूचक ३९ अंकले ओरालो लागेको छ । त्यस्तै, उत्पादनमूलक, हाइड्रोपावर, विकास बैंक र बैंकिङ समूहको परिसूचक क्रमशः २५, १५, १४ र १२ अंकले घटेका छन् । होटल समूहको परिसूचक भने सामान्य ४ अंकले उकालो लागेको छ । बजारमा सबैभन्दा बढी हिमालयन डिष्टीलरीको सेयर मूल्य करिब ९.९२ प्रतिशतले घटेको छ । त्यस्तै, वल्र्ड मर्चेन्ट बैंकिङ एण्ड फाइनान्सका लगानीकर्ताले पनि ९.१४ प्रतिशत गुमाएका छन् । दोहोरो अंकले घटेको बजारमा पनि स्वरोजगार लघुवित्त वित्तीय संस्थाको सेयर मूल्य ९.९७ प्रतिशतले बढेको छ ।
नेपाली सडकमा गुड्छन करीब २८ लाख गाडी, एक बर्षमै थपियो करीब ५ लाख सवारी
काठमाडौं । नेपालका सडकमा करीब २८ लाखको हारहारीमा गाडी गुड्दै आएका छन् । नेपालमा कुल २७ लाख ८३ हजार ४२८ सवारी साधन यातायात कार्यलयमा दर्ता छन् । गत आर्थिक बर्ष ०७३/०७४ मा मात्रै ४ लाख ४४ हजार २६९ नयाँ सवारी साधन दर्ता भएका छन् । विभागले ०७३ फागुन १८ देखि काठमाडौं उपत्यकामा भने २० बर्ष पुराना सवारी साधन चलाउन रोक लगाएको थियो । यातायात विभाग अन्तर्गतका कार्यालयले मात्रै १ बर्षमा २० अर्ब ३२ करोड २९ लाख ६२ हजार रुपैयाँ राजश्व संकलन गरेका छन् । यो राजश्वमध्ये सवारी साधन करबाट ८ अर्ब ७९ करोड ८५ लाख ८२ हजार संकलन भएको छ । सडक निर्माण तथा सम्भार दस्तुरबाट ८ अर्ब ५३ करोड २७ हजार तथा सवारी चालक अनुमतिपत्र र सवारी इजाजतको दस्तुरबाट २ अर्ब ४० करोड १५ लाख ४२ हजार रुपैयाँ संकलन भएको विभागले जनाएको छ । विभागले चालु आर्थिक वर्षमा सबै सवारी साधनहरुमा हाई सेक्युरिटी इम्बोस्ड् नम्बर प्लेट प्रयोग गर्ने व्यवस्था लागू गर्ने योजनासहित काम गरिरहेको छ । करीब २५ लाख सवारी साधनका नम्बर प्लेटलाई इम्बोस्ड् नम्बर प्लेटमा रुपान्तरण गरिने विभागले जनाएको छ । हालसम्म काठमाडौं उपत्यकामा रहेको सवारी चालक अनुमति पत्र कार्यालयबाट २ लाख ६० हजार सवारी चालक अनुमतिपत्रलाई स्मार्ट कार्डमा वितरण गर्नुको साथै काठमाडौं उपत्यका बाहिर कर्णाली अञ्चल बाहेकका सबै यातायात व्यवस्था कार्यालयहरुबाट स्मार्ट कार्ड वितरणको कार्य प्रारम्भ गरिएको विभागले जनाएको छ । विभागले सबै सवारी चालक अनुमतिपत्र र सवारी धनी प्रमाणपत्रलाई आगामी पाँच वर्ष भित्र स्मार्ट कार्डमा रुपान्तरण गर्ने भएको छ । देश भरिका करिब २५ लाख सवारी चालक अनुमतिपत्र तथा सवारी धनी दर्ता प्रमाणपत्रलाई ५ वर्षमा स्मार्ट कार्डमा रुपान्तरण गर्ने विभागका महानिर्देशक रुपनारायण भट्टराईले बताए । सवारी साधनको अनुगमन गरी ४१८ सवारी साधन कारवाहीमा परेका र उक्त सवारी साधनहरुबाट ११ लाख ७९ हजार रुपैयाँ राजश्व संकलन गरिएको विभागले जनाएको छ । गत आवमा यातायात व्यवस्था सुदृढिकरण आयोजना अन्तर्गत ६१ करोड ७९ लाख ९९ हजार रकम दिइएको थियो । सोमध्ये वार्षिक खर्च ४३ करोड २१ लाख ५८ हजार रहेको छ । जसमा वित्तिय प्रगति ७० प्रतिशत रहेको छ भने भौतिक प्रगति ८० प्रतिशत छ । मन्त्रालय अन्तर्गत सडक विभाग लगायत निकायहरुसँगको समन्वयमा जग्गा प्राप्ति गर्ने तथा भवन र ट्रायल सेन्टर बनाउने कार्यहरु अघि बढाउने बताएको छ । प्राविधिक कर्मचारीको आपूर्ति र अन्य जनशक्तिको व्यवस्थापन गर्ने तथा यातायातको क्षेत्रमा हुने अनियमिततामा शुन्य सहनशिलता कायम गर्नको लागि योजना अघि बढाउने महानिर्देशक भट्टराईले बताए ।
सिरहामा विद्युत् चुहावट १० प्रतिशत घट्यो
लहान । विद्युत् चुहावट नियन्त्रण अभियान सञ्चालन भएपछि आव २०७३/७४ मा सिरहामा १० प्रतिशत चुहावटमा कमी आएको छ । सिरहास्थित विद्युत् प्राधिकरण वितरण केन्द्रले चुहावट नियन्त्रणका लागि अभियान सञ्चालन गरेपछि चुहावट ४० प्रतिशतमा झरेको हो । विगत वर्षहरुमा करिब ५० प्रतिशत विद्युत् चुहावट हुँदै आएकामा आव २०७३÷७४ मा करिव १० प्रतिशत विद्युत् चुहावट घटेको विद्युत् केन्द्रका प्रमुख जितेन्द्र यादवले जानकारी दिए । समयमा विद्युत्को महसुल नबुझाउने जिल्लाका ८६५ ग्राहकको विद्युत् लाइनसमेत काटिएको थियो । विद्युत्को बक्यौता रकम समयमा नबुझाएको र पटक पटक समयमै विद्युत् महसुल बुझाउन आग्रह गर्दासमेत बेवास्ता गरेका ग्राहकको विद्युत् लाइन काटेको प्रमुख यादवको भनाइ छ । उनका अनुसार विद्युत् लाइन काटिएका ८६५ ग्राहकमध्ये ५४७ जना ग्राहकबाट १ करोड २३ लाख ६४ हजार ७ सय ९७ रुपैयाँ बक्यौता रकम संकलन भएको छ । विद्युत् लाइन काटिएका मध्ये ३२ जनाले महसुल बुझाए बापत ४५ लाख ३९ हजार रुपैयाँ संकलन भएको छ । केन्द्रले आव २०७३/७४ मा हुकिङ गरी विद्युत् चुहावट गर्ने ४८१ जनालाई पक्राउ गरी गरेको जरिवानमा ३० लाख ३६ हजार १ सय ५३ रुपैयाँ राजश्व संकलन हुनाका साथै सो क्रममा १०३ थान टिभी, १३१ थान पानी तान्ने मोटर, ६६ थान पङ्खा र ६ थान फ्रिजसमेत बरामद गरिएको प्रमुख यादवले बताए । रासस
अधिकांश वाणिज्य बैंक प्रतिसेयर आम्दानी बढाउन असफल, घट्दा पनि नविलको सबैभन्दा बढी (सूचिसहित)
काठमाडौं । गत आर्थिक वर्ष ०७३/०७४ मा अधिकाँश वाणिज्य बैंक प्रतिसेयर आम्दानी (ईपीएस) बढाउन असफल भएका छन् । गत आवको असारसम्म नेपाल स्टक एक्सचेन्ज लिमिटेड (नेप्से) मा सूचिकृत वाणिज्य बैंकमध्ये हालसम्म वित्तीय विवरण सार्वजनिक गरेका २५ वटा वाणिज्य बैंकमध्ये १९ वटाको प्रतिसेयर आम्दानी घटेको छ । चुक्तापुँजी बढेपछि सेयर संख्या बढ्दा बैंकको प्रतिसेयर आम्दानीमा कमी आएको हो । नेपाल इन्भेष्टेमेन्ट बैंक, ग्लोबल आइएमई बैंक, मेगा बैंक, कृषि विकास बैंक, लक्ष्मी बैंकले प्रतिसेयर आम्दानी बढाउन सफल भएका छन् । त्यस्तै, माछापुच्छ्रे बैंकको प्रतिसेयर आम्दानी भने स्थिर रहेको छ । नेपाल राष्ट्र बैंकले चुक्तापुँजी ८ अर्ब पुर्याउनु पर्ने नीतिगत व्यवस्था गरेपछि बैंकले बोनस वितरण, हकप्रद सेयर जारी र थप निष्कासन (एफपीओ) गरी सेयर संख्या बढाएका छन् । बैंकहरुले सार्वजनिक गरेको गत आवको अपरिस्कृत वित्तिय विवरण अनुसार ५८ रुपैंयाँ ५४ पैसासहित नविल बैंकको इपिएस सबै भन्दा धेरै रहेको छ भने दोश्रो नम्बरमा एभरेष्ट बैंक रहेको छ । एभरेष्ट बैंकको प्रतिसेयर आम्दानी ४३ रुपैंयाँ ७८ पैसा रहेको छ । एभरेष्टको प्रतिसेयर आम्दानी २३ रुपैयाँ घटेको वित्तीय विवरणले देखाएको छ । प्रति सेयर आम्दानी धेरै हुने बैंकको तेश्रो नम्बरमा कृषि विकास बैंक रहेको छ । यो बैंकले ३४ रुपैंयाँ ५८ पैसाबाट बढाएर आफ्नो प्रतिसेयर आम्दानी ४० रुपैंयाँ ६० पैसा पर्याएको छ । गत आवमा कृषि विकासले प्रतिसेयर आम्दानी ६ रुपैयाँ बढाएको छ । चौथो स्थानमा रहेको नेपाल बैंकको प्रतिसेयर आम्दानी ४० रुपैंयाँ ३ पैसा छ । अघिल्लो आवको सोही अवधिमा यो बैंकको यस्तो आम्दानी ४६ रुपैंयाँ ६९ पैसा रहेको थियो । नेपाल बैंकको प्रतिसेयर आम्दानी ६ रुपैयाँ घटेको छ । सबै भन्दा थोरै प्रतिसेयर आम्दानी भने सिभिल बैंकको छ । यो बैंकको त्यस्तो आम्दानी १० रुपैंयाँ ७५ पैसाबाट पनि घटेर ६ रुपैंयाँ ५२ पैसामा झरेको छ । सिभिलको प्रतिसेयर आम्दानी ४ रुपैयाँ घटेको छ । चुक्तापुँजी बढेपछि प्रतिसेयर आम्दानी बढाउन बैंकलाई चुक्ता भएको एनआईसी एसिया बैंकका प्रमुख कार्यकारी अधिकृत (सीईओ) लक्ष्मण रिसाल बताउछन् । बिकास न्युजसंग कुरा गर्दे उनले ईपीएस स्थिर राख्न नै बैंकलाई ठूला उपलब्धी हुने बताए । बैंकको नाफा बढेपनि सेयर संख्या बढेपछि आम्दानी घटेको रिसालको भनाई छ ।
स्वदेशी लघुवित्त संस्थाले १५ प्रतिशत बोनस सेयर दिने
काठमाडौं । स्वदेशी लघुवित्त संस्थाले आफ्ना सेयरधनीहरुलाई १५ प्रतिशत बोनस सेयर दिने निर्णय गरेको छ । उक्त निर्णय भदौ १ गते बसेको कम्पनीको सञ्चालक समितिको बैठकले गरेको हो । बैठकको निणर्यलाई नेपाल राष्ट्र बैंकले स्वीकृति तथा कम्पनीको आगामी वार्षिक साधारण सभाले अनुमोदन गरेपछि मात्र सेयरधनीले सो मात्राको लाभांश पाउने छन् ।
यूनाइटेड फाइनान्सको सञ्चालकमा दिपककुमार अग्रवाल नियुक्त
काठमाडौं । यूनाइटेड फाइनान्सको सञ्चालकमा दिपककुमार अग्रवाल नियुक्त भएका छन् । भदौ १ गते बसेको कम्पनीको सञ्चालक समितिको बैंठकले अग्रवाललाई सञ्चालकमा नियुक्त गरेको हो । यसअघि कम्पनीको सञ्चालक पदमा सुरज शाक्य रहेका थिए । सञ्चालक समितिको सोहि दिनको बैठकले शाक्यको राजिनामालाई स्वीकृत गरेको छ ।
आउदो वर्ष ६ सय मेगावाट बिजुली थपिने
काठमाडौं । आगामी आर्थिक वर्ष ०७५/०७६ मा थप ६ सय मेगावाट बिजुली उत्पादन गर्ने लक्ष्य सरकारले लिएको छ । ४५६ मेगाावाटको माथिल्लो तामाकोसी, निजी लगानीमा निर्माण भएका आयोजना र सौर्य ऊर्जा मिश्रित गरी ६ सय मेगावाट बिजुली उत्पादन गर्ने लक्ष्य लिएको हो । विद्युत क्षेत्रको सुधार गरी आउदो ३ वर्षमा सरकारले १ हजार २ सय मेगावाट थप बिजुली उत्पादनको लक्ष्य लिएको छ । चालु आवमा सरकारले बजेटमार्फत ८ सय मेगावाट बिजुली उत्पादन गर्ने लक्ष्य लिएपनि नेपाल विद्युत् प्राधिकरणले सार्वजनिक र निजी लगानीबाट साढे २ सय मेगावाट बिजुली उत्पादन हुने बताएको छ । यता सरकारले माथिल्लो तामाकोसी सम्पन्न हुने अनुमानका आधारमा यो लक्ष्य लिएको हो । तामाकोसी आउदो ०७५ असारमा एउटा युनिट सञ्चालनमा ल्याइ बाँकी मंसिरसम्म सम्पन्न गर्ने लक्ष्य लिएको छ । चालु आवमा सार्वजनिक क्षेत्रबाट चमेलिया र कुलेखानी गरी ४४ मेगावाट र बाँकी निजी लगानीबाट बिजुली उत्पादन हुने विद्युत प्राधिकरणका प्रवत्ता प्रवल अधिकारी बताउछन् । गत आवमा निजी क्षेत्रका ११ आयोजना सम्पन्न भई प्रणालीमा १२२ मेगावट बिजुली थप भएको छ । यो समेत गरी जडित क्षमता ९८० मेगावाट पुगेको छ । यो हेटौडामा रहेको १४ मेगावाटको डिजेल प्लाण्ट र विराटनगरमा रहेको मल्टिफयुल प्लाण्ट समेत गरी हो । यी दुईको जडित क्षमता ५३ मेगावाट छ । जलविद्युत मात्र ९१८ मेगावाट छ । यसमध्ये विद्युत प्राधिकरणको ४७७ र निजी क्षेत्रको ४४१ मेगावाटरहेको छ । गत वर्ष राष्ट्रियविद्युत प्रणालीमा उच्चतम् माग १३०६ मेगावाट रहेको छ । आगामी सुख्खायाममा यो माग करिब १७४२ मेगावाट रहने अनुमान गरिएको छ । हालको विद्युत माग पूर्ति गर्न विद्युत प्राधिकरणबाट सञ्चालित जलविद्युत केन्द्रहरुबाट ३४५ मेगावाट, निजी प्रवर्द्धकका जलविद्युत केन्द्रहरुबाट ३३१ मेगावाट तथा आयात ३०० मेगावाट गरी कूल ९७६ मेगावाट आपूर्ति भइरहेको छ । ३३० मेगावाट उद्योगमा मात्र लोडसेडिङ भइरहेको अवस्था छ । विद्युत चुहावट २३.९ प्रतिशत छ । यता प्राधिकरणले लोडसेडिङ हटाउन यो वर्ष भारतबाट ५ सय मेगावाटसम्म बिजुली उत्पादन गर्ने लक्ष्य लिएको छ । गत आवमा प्राधिकरणले ३८५ मेगावाटसम्म बिजुली आयात गरेको थियो ।
सिद्धार्थ इन्भेष्टमेन्ट ग्रोथ स्किम १ले ६० प्रतिशत नगद लाभांश दिने
काठमाडौं । सिद्धार्थ म्युचल फण्ड अन्तर्गत संचालित सिद्धार्थ इन्भेष्टमेन्ट ग्रोथ स्किम १ ले आफ्ना इकाईधनीहरुलाई ६० प्रतिशत नगद लाभांश दिने भएको छ । त्यस्तै, सिद्धार्थ इक्विटी ओरिन्टेड स्किमले पनि २५ प्रतिशत नगद लाभांश दिने भएको छ । यी दुबै स्किमले २०७३/७४को नाफाबाट सो मात्राको लाभांश वितरण गर्न लागेको हो । सो लाभांश वितरण प्रयोजनको लागि भदौ १२ गते यी दुबै फण्डको बुक क्लोज हुने भएको छ ।
